وفا هر کیمسه‌دن کیم ایسته‌دیم اوندان جفا گؤردوم
کیمی کیم بیوفا دونیادا گؤردوم، بیوفا گؤردوم

کیمه کیم دردیمی اظهار قیلدیم ایسته‌ییب درمان
اؤزومدن هم بتر بیر درده آنی مبتلا گؤردوم

مکدّر خاطیریمدن قیلمادی بیر کیمسه غم دفعین
صفادن دم ووران همدم‌لری اهلِ ریا گؤردوم

اگر سو دامنین توتدوم، روان دؤندردی اوز مندن
وگر گوزگودن اومدوم صدق، عکس مدّعا گؤردوم

آیاق باسدیم در اومیده سرگردانلیق ال وئردی
هنر سررشته‌سین توتدوم، الیمده اژدها گؤردوم

منه گؤستردی گردون، تیره بختیم کوکبین یوز کز،
من بدبخت اونا هر گاه کیم، باخدیم، قارا گؤردوم.

«فضولی» عیب قیلما اوز چئویرسم اهل عالمدن
نه‌دن کیم هر کیمه اوز توتدوم  اوندان یوز بلا گؤردوم

#ملا_محمد_فضولی 

@qanadli_duyqular

عؤمروم داغدا-داشدا کئچیبدی منیم،
سیلدیریم قایالار دفع ائیله‌میشم.
قلبیمه او قدر دَییبلر منیم!
من‌سه باغیشلاییب عفو ائیله‌میشم.

اینجیمه‌دیم هئچ واخت دوستون سؤزوندن،
چون کئچه بیلمه‌دیم دوستون اۆزۆندن.
ایندی هامسی گلیر ایکی گؤزومدن-
گنجلیکده نه قدر کئف ائیله‌میشم.

وئرمیشم قلبیمه تابی-دؤزومو،
دئیه بیلمه‌میشم اورک سؤزومو.
«ائیواز»ام آی قارداش، اؤزوم اؤزومو
ساغلیقدا بیر یوللوق محو ائیله‌میشم.

#یتیم_ائیواز

@qanadli_duyqular

دونيا

ديلين چوخ شيريندی اوره يين آجی
اوزووا غم داشی يامانا دونيا
بير عؤمور باخميسان منه قيقاجی
گلميشم اليندن آمانا دونيا

بنزر اعتيبارين بير آخار چايا
وار دؤولتين قيلماز هئچ كيمه وايا
نه سنده شرف وار  نه بيزده حايا
دَيمرسن بير توربا سامانا دونيا

حوسنون خياللاردا گَزن بير قوشدو
كيم اونو چوخ سئودی چوخ غمه دوشدو
مين ايلده ياشايان اينتيظار كؤشدو
چاتسادا قوينوندا چوخ شانا دونيا

مرده دوشمن اولدون  نامرده آرخا
سويون دوز آخمادی مردله بير آرخا
كيم الين اوزالتدی قوردوغون چارخا
سالدين مين تؤهمته  بؤهتانا دونيا

نسيل لر يئتيردی شن نسيل لری
آچدی هر قاپيسی باغلی ديللری
چوخ شئيی دئييشن اينسان اللری
سنی سالانمادی بير يانا دونيا

اوزاقدير كامالدان عاغلين  هوشوندا
مين صيفت گؤرونور خيال قوشوندا
عدالت گؤرمورم قورولوشوندا
ساتيرسان ياخشينی يامانا دونيا

قان اوسته قورموسان ايلك حاياتينی
ياسا  دؤنده ريرسن  توی بوساطينی
الده ايتی قيلينج ظولمون آتينيی
سورورسن زاماندان زامانا دونيا

كيمه رحم ائتميسن نيشان وئر بيرين
سنی دوغان ياتسين بير داشدا درين
آغ دابان كندينده دده شمشيرين
قويمادين يوردوندا نيشانا دونيا

قالديردين گؤيلره دومان تك آهين
صنعت مئيدانيندا آشيق امراهين
صمد وورغون كيمی سؤز قيبله گاهين
نئيله دين  آپاردين هايانا دونيا

ستّارام قئيديندن بير يوللوق بوشام
چوخ چتين حوسنونله بيرده من جوشام
باشقا بير عالمين عشقيله خوشام
بيرده باغلامارام بئل سانا دونيا

#ستار_گول_محمدی

@qanadli_duyqular

‍ هئچ بیلمیرم من سنی،
هاچان، هاردا ایتیردیم.
یاغیش یودو،
یوخسا کی، کولَک آپاردی سنی؟
بو سئوگی ناغیلینی،
من بیر یوللوق بیتیردیم.
آختارمیرام،
آختارسام، یقین تاپاردیم سنی.

دونیادا بیرجه قورخوم،
سنی ایتیرمک ایدی.
سن یوخسان،
بو دونیادا داها منه قورخو یوخ.
آما سنسیز ائله بیل،
هر شئی شیکست‌‌دی ایندی.
ساعاتیمین عقربی،
چاینیکیمین قولپو یوخ.

یئل ووردوقجا یئل‌لَنیر،
پئنجه‌ییمین اَته‌یی.
پئنجه‌ییمین سونونجو-
دویمه‌سی‌تک قوپموسان.
باری چوخدان سووولموش-
آغاجین اوستونده‌کی-
ان سونونجو، ان شیرین-
مئیوه‌سی‌تک قوپموسان‌.

«دردلی‌لر اؤز دردینی،
سویا دئیر» دئییبلر.
یاخشی کی، سو دا گلدی،
دردیمدن آزاد اولدوم.
«آرمودون یاخشیسینی،
آیی یئیر» دئییبلر.
گئتدین هانسی آیینین،
داماغیندا داد اولدون؟!

سنسیز ائله بیلمه‌ کی،
کئفه باخیرام، کئفه!
سن یادیما دوشنده،
داریخیرام هر گئجه‌.
اوشاق واختی هاچان‌سا-
عؤمرومده بیرجه دفعه،
پیشی‌ییمیز ایتَنده،
داریخمیشدیم بئله‌جه.
داها اوشاق دئییلم،
هر ایتَنه آغلایام.
راحات یاتیرام داها،
یوخوم دئو یوخوسودو.

...کیمدی بو گئجه یاری،
قاپیمی جیرماق‌لایان؟
بو نه سس‌دی؟
دئیه‌سن،
پیشیک مییولتوسودو.

#رامیز_رؤوشن

@qanadli_duyqular

عؤمرون چوخو گئدیب، آزی قالیبدی،
قیشی اؤتوب کئچیب یازی قالیبدی.
سینه‌مده یازمالی یازی قالیبدی،
بیر اوغول گزیرم، یازا دردیمی.

یوخولار گؤرورم قاتما-قاریشیق،
یوخولار الینده چاشیب قالمیشیق.
دئییرم نولاردی بیر غملی عاشؽق،
کؤچورده اوچ تئللی سازا دردیمی؟
بیر اوغلان یوخدو کی یازا دردیمی؟!

گونده بیر دون گئییر بو ظالیم فلک،
دؤزور هر آغری‌یا-آجی‌یا اورک.
دئییرم آی «ائیواز!» نولار بو فلک،
گؤتوره قلمی، پوزا دردیمی.
بیر اوغلان یوخدو کی یازا دردیمی؟!

#یتیم_ائیواز

@qanadli_duyqular

ایسته‌مه‌!

سن سنه گر یار ایسن، گل ائی کؤنول، یار ایسته‌مه!
یار و دیلدار اولسانا، سن یار و دیلدار ایسته‌مه!

بی‌وفادیر چون بو عالم، کیمدن ایسترسن وفا؟
بی‌وفا عالمده سن یار وفادار ایسته‌مه!

گول بولونماز بو تیکانلی دونیانین باغیندا چون،
ابصم اول، بیهوده گولسوز یئرده گولزار ایسته‌مه!

معریفت‌دیر خالیص آلتون، سیکّه‌سی فضل و هونر
آلتونو تانی زَیَلدن، آری، دینار ایسته‌مه!

حقّه مونکیردیر فقیه، اینانما اول شئیطانا، کیم-
یوخدور اول جین‌خیلقتین ذاتیندا ایقرار، ایسته‌مه!

آری گوفتار، ائی کؤنول، گئرچکلرین نیطفی دورور،
هر دیلی‌اَیریده یوخدور، آری گوفتار، ایسته‌مه!

جیفه‌دیر دونیا، آنین طالیبلری عادی کیلاب،
اولما کلب آنین کیم اولدو آدی موردار، ایسته‌مه!

شربتی آغولودور فانی جهانین، سن آنین،
شربتیندن نوشدارو اومما، زینهار، ایسته‌مه!

دونیانین سئوگیسی آغیر یوک ایمیش، مندن ائشیت:
نفسینی یوک ائتمه آنا، ائی سبوکبار، ایسته‌مه!

بیر امین محرم بولونماز، ائی «نسیمی!» چون بو گون،
خلقه فاش ائتمه بو رمزی، کشف اسرار ایسته‌مه...!

#عمادالدین_نسیمی

@qanadli_duyqular

عـاشق اؤز دردِ دلین ایسته‌دیگی یاره دئیر،
دئمز اغیارا اورک سرّینی، دلداره دئیر.

رحمسیز بیر گول اوچون بلبلِ بیچاره‌یه باخ!
نه قدر جؤر و جفا چکسـه، گئدیب خاره دئیر.

عاشقِ کامل اولان سیرّینی پنهـان ساخلار،
اینانیب یارا دئیرسن، او دا اغیاره دئیر.

التجـا ائیله‌مز هئچ بیر کسه حقدن غئیری،
ظلمدن تنگه گلن دردینی سـرداره دئیر.

بیر پرینین نـه زاماندیز کی، بـلاسین چکیرم،
نه یانار حالیما، نه دردیمه بیر چاره دئیر

خوش او گونلر کی، سرِ زلفون اسیری من ایدیم،
ایندی عالم منه هجرینده «گونو قاره» دئیر

منیم احوالیمی، بیر اهلِ وفا دوست اولسا،
جان وئریب-جان آلان او شوخِ ستمکاره دئیر

نازنینلر نه بیلیر، عاشقین آهیندا نه وار؟!
ایلدیریم شعله‌سینه «ثابت و سیّاره» دئیر

یئنه اول زولفو سئوردیم، گؤزَلیم! قورخورام ائل
«فتنه زنجیرینه بـاغلاندی بو بیچاره» دئیر

گرک اول یارا دئییم، کؤنلومو غم سئیلی ییخیب،
رخنه گؤرموش بیر ائوین صاحبی، معماره دئیر

قیمتِ لعلینی یارین، دئمه‌یین اغیارا!
گؤهرین قدرینی صرّاف، خریداره دئیر

عشق سرّین دئمه «واحد!» بو قارا گؤزلولره!
مست درک ائیله‌مز؛ عارف سؤزو هوشیاره دئیر.

#علی‌آغا_واحید

@qanadli_duyqular

جاوانلیقدا چیخدیم یارین قارشینا
دیلیم سوسدو اورک سؤزون گؤز دئدی
آیریلیغین جان یاندیران کؤزونده
یار اوزومه مین کیتابلیق سؤز دئدی

گولومسه‌ییب گؤزون تیکدی گؤزومه
اتک ووردو آلوولانان کؤزومه
هئچ باخمادی غم بویاقلی اوزومه
او داش اور‌ک آنجاق منه دؤز دئدی

دؤزدوم حیات کوشنینده داش کیمین
گؤزدن دوشدوم گؤزدن دوشن یاش کیمین
ایللر اؤتدو قاش آغاردی باش کیمین
زامان منه یاردان الین اوز دئدی

یاردان اوزدوم بئل باغلادیم ائلیمه
ائل اوغروندا قلم آلدیم الیمه
ماهنی قؤشدوم تاپدالانمیش دیلیمه
دیلیم منه سؤز اینجی‌سین دوز دئدی

#عاصیم_اردبیلی

@qanadli_duyqular

ای طبیب عام! الین چک چاره ائتمکدن منا
عاشیقین جانیندا داییم، درد جانان گیزلیدیر

#عمادالدین_نسیمی


نبضیمیزدن چکمز ال، ای ماه، بیر ساعت طبیب
حسرتِ چشم‌ینله اول گۆندن کی، بیمار اولموشوق

#سید_عظیم_شیروانی


مبتلای درد عشقم، ال گؤتور مندن طبیب،
ائیله  بیر تدبیر كیم  بو درده درمان اولماسین.

#میرزا_علی_اکبر_صابر


گر توتسا خدنگین رگ جانیم، نه عجب
نبض ایله قیلیر طبیب، تشخیص مزاج

#حکیم_ملامحمد_فضولی


مریض- عشق اولانا نئیله‌سین طبیبِ زمان
سوای شهدِ لبین یوخدو بیر دوا، گئتمه

#خورشیدبانو_ناتوان


هر مرض چاره سینی ائیله مک آساندی طبیب
مرض عشقه نه تدبیر، نه درمانین وار؟

#صابر


گلمیشم یاش گؤزده ، ائحتیاج ال‌ده
شنلیک گئده- گئت‌ده، غم گله- گل‌ده
سن طبیب تانیندین آخی ازل ده
گرک‌لی درمانی آرا کؤنلومه!...

#اوستاد_عقیل_مورادی


کیم کی سوداسیندان اولدو سایری شهلا گؤزلرین
شربتی شیرین لبین دیر، عیسوی نطقون طبیب

#عمادالدین_نسیمی


سن یارا وور، من دؤزه‌رم یارییا
چال کیپریگین! قوی کؤنلومو دارییا
طبیب ایستر یارالاریم سارییا
چاراسیندان دئ نه دئییم کؤنلومه؟

#فاطمه_عبدی_کؤنول



عشق دردیله خوشام ال چک علاجیمدان طبیب
قیْلما درمان کیم هلاکیم زهری درمانیندادیر

#حکیم_فضولی


چارۀ دردیمه زحمت چکمه‌یین، ای دوستلار
درد عشقه چاره اولماز، اولسا افلاطون طبیب

#میرزا_علی_اکبر_صابر


دردیمین درمانینا هیچ کیمسه بیلمز چون علاج
یاردان اؤزگه نه چاره سؤیله گیل سن،  ای طبیب

#عمادالدین_نسیمی

@qanadli_duyqular

ذیروه‌ده بیتن تک آغاجا

ائی اوجا ذیروه‌ده بیتن تک آغاج!
یاشیل بوداغینا اللر چاتماییر.
ظریف بوداقلارین سئوگییه مؤحتاج،
کؤلگه‌نده اوبالار، ائللر یاتماییر.

خیرداجا تۇم ایدین، قوروجا بیر دن،
سنی گؤر هارایا اکدی کولک‌لر!
قولوندان یاپیشیب اوشاقلار کیمی،
اوجا ذیروه‌لره چکدی کولک‌لر.

بولودلار هالای‌لا گزیر دؤوره‌نه،
یوخدور بوداغینی دوغراییب کسن.
مئشه‌لر حسدله بویلانیر سنه،
سن ده مئشه‌لرین حسرتینده‌سن.

بیلمیرم پالیدسان، بیلمیرم ولَس،
اوردا- اوزاقلاردا کؤلگه کیمیسن.
سنه یئتیشمه‌ییر نه هنیر، نه سس،
دوغمالار ایچینده اؤزگه کیمیسن.

عؤمور وار شیرین‌دیر، عؤمور وار آجی،
عؤمور وار هر گونو بیر اولدوز اولور.
حدسیز اوجالیق دا داریخدیریجی،
حدسیز اوجالیق دا معناسیز اولور.

#طالع_حمید

@qanadli_duyqular

بیر دردین وارسا آچا بیلرسن آغاجلارا.
آغاج یارپاق وئریر،
سیر وئرمز روزگارا...

#جاهید_صدقی_تارانجی

@qanadli_duyqular

قورخو

منيم سول اليمده يانيق يئرى وار
او منه تؤحفه‌دیر کؤرپه‌لیییمدن
او‌دون اولدوغوندان خبرسیز واختلار
الیمی مانقال‌دا یاندیرمیشام من

منه "جیز"  دئدیلر
آنجاق قورخمادیم
الیمی یاندیریب تانیدیم اود'و
منیم حیات‌ایله ایلک تانیشلیغیم
الیمی یاندیران اود'دان باشلادی....

اوخشادی گؤزومو هله اوشاق‌کن
اوجاغین آل-الوان  آلووو ‌، کؤزو
دونيايا گله‌لی ، بیلمیرم  نه‌دن
نه‌یه وورولدوق‌سا ‌، یاندیردی بیزی...

من اود'دان قورخمادیم یانانا قدر؛
من قورخو بیلمه‌دیم قانانا  قدر
ائله کی ، یاندیم
اودلا اویانماقدان  قورخدوم، دایاندیم.
باشلاندی قورخو
باشلاندی  ائحتییاط
باشلاندی حیات...

#بختييار_واهابزاده

@qanadli_duyqular

ای گول، یانیرام غیرایله سن همدم اولاندا،
بولبول آلیشار خار ایله گول محرم اولاندا.

چوخلار اولوب اول زلفِ پریشانین اسیری،
ییغ، توپلا بو مجنونلاری فیکرین جمع اولاندا

تر قطره‌سی وئرمیش اوزونه باشقا لطافت
گول یارپاغی زینتلی اولور شبنـم اولاندا

تک‌لیکده جهنّم گئچیـر عشـق اهلینه هر یئر،
یارایله اونا جنّت اولور باهم اولاندا

جانانه اورَک سیرّینی دمسیـز دئمک اولماز،
جان اهلی جسارتلی اولورموش دم اولاندا.

دوشمن اولا دونیا قدری، اونلارا باتماز،
هر گاه، ایکی دوسـت آراسی محکم اولاندا.

بیر نازیله جان قویمادی منده هله گل، گؤر،
عالم نه اولور اورتادا یوز چم خم اولاندا

قیمت وئریر اوْل قاشـی هیلالین سنـه، واحید،
باشین آغاریب اونداکی، قـدّیـن خم اولاندا

#علی‌_آقا_واحید

@qanadli_duyqular

🥀

گئده‌نه یالوارما گئدیرسه گئتسین
نه‌ییمه گَرَکدیر داها قالماغی
حَتتا بو حَیاتین قانونو بودور
آغاج دا ساخلامیر دوشن یارپاغی


اَگَر کی آغلیندا واردیرسا گئتمک
نه واختسا گئده‌جک او اَوول-آخیر
ائله بالیق وار کی ،بالیقچینین دا
دایانمیر، سوروشوب اَلیندن چیخیر


گؤر سَنی گئدرکن نه گونه قویدو؟!
دانیشا بیلمیرسن، گوله بیلمیرسن
حَیاتیم یازیردین هَمین اینسانا
ایندی هئچ سالام دا یازا بیلمیرسن


بَلکه‌ده اونودوب هاردان بیله‌سن؟!
دوشونمور گئجه‌لر سَنی، یاتاندا
سَن گیزلی نؤمره‌دن گیزلی زَنگ ائدیب
هَر گئجه سَسینه قولاق آساندا


هارداسا سَسله‌نن حَزین موسیقی
یادینا سالارسان، اونا باخ بئله
تَصادوف، هارداسا گؤررسن اونو
گَزیر باشقاسییلا، توتوب اَل-اَله


اؤزون ائشیدرسن او اؤزگه‌سینه
یانیندان اؤته‌رک جانیم سؤیله‌دی
سَن اوندا بیلرسن، او آن اینسانین
دونیاسی باشینا داغیلماق نه‌دی


گؤزلریم یورولدو یول گؤزله‌مکدن
مَن خَسته دوشموشم، هاردان بیله‌سن؟!
خَیالین او قَدَر گؤزومدن کئچیب
حَکیملر دئییر کی ضَعیف گؤرورسن...

#ساحیل_ریضایئو

@qanadli_duyqular

#احمدکایا
#دؤستوم

@qanadli_duyqular

گؤر منی نه گونه سالدی محبّت!

دوستوم، گل دردیمی سؤیله‌ییم سنه!
گؤر منی نه گونه سالدی محبّت!
او قدر ظولم‌لر ائیله‌دی منه،
قلبیمی دوغرادی، چالدی محبّت،
گؤر منی نه گونه سالدی محبّت!

اونونلا باغلادیم هر بیر سؤزومو،
دۆز آچدیم همیشه اونا گؤزومو.
بعضاً قوربان وئردیم اونا اؤزومو،
گؤردوم خیاللارا دالدی محبّت،
گؤر منی نه گونه سالدی محبّت!

دائیم مندن قاباق دوردو آیاغا،
باخدیغیم اوزلره قویدو قاداغا.
بیلمم نئچون منی وئردی قاباغا،
اؤزو یاری یولدا قالدی محبّت،
گؤر منی نه گونه سالدی محبّت!

محبّت کی واردی، بیر آغیر یول‌دو،
گونده نئچه دفعه بوشالدی، دولدو،
او قدر سؤالیم جاوابسیز اولدو،
نه بیله‌یدیم آخی لال‌دی محبّت؟
گؤر منی نه گونه سالدی محبّت!

اونونچون پوچ اولور آرزو-دیلک ده،
توفانا چئوریلیر عادی کولک ده.
اونسوز دا، قارداشیم! هر بیر اورکده،
سیلینمز لکه‌دی، خال‌دی محبّت،
گؤر منی نه گونه سالدی محبّت!

دوندوروب الیمده یازان قلمی،
آهیم، ناله‌م توتوب بوتون عالمی.
«اصلی»نین اودونا سالدی «کرم»ی،
آلیشدی محبّت، یاندی محبّت،
گؤر منی نه گونه سالدی محبّت!

گئیینیر-کئچینیر گونده بیر دونو،
قان‌دی، فاجیعه‌دی، دهشت‌دی سونو،
سالدی صحرالارا یازیق «مجنون»و،
«لئیلی»سین الیندن آلدی محبّت،
گؤر منی نه گونه سالدی محبّت!

گنج ایدیم، بیلمیردیم او نه تهَر‌میش،
سن دئمه، غم دولو دردمیش، قهرمیش
آند اولسون آللاها، آجی زهرمیش!
من ائله بیلیردیم بال‌دی محبّت،
گؤر منی نه گونه سالدی محبّت!

«ائیواز» مین عذاب‌لا چکیردی اونو،
سویوق دا، شاختا دا بیچیردی اونو،
تزه‌جه قلبینده اکیردی اونو،
چیخدی خزان یئلی، سۏلدو محبّت،
گؤر منی نه گونه سالدی محبّت!

#یتیم_ائیواز

@qanadli_duyqular

بیر آغ واراق اوسته آدیم یازیلیب
بیر ده آنامین آدی
و شکیل لر
و حرف لر
و بوتا‌لار...
بیر قولچاغا ساریلیب بو کاغیذا
و آیین بوتون اولدوغو بیر آخشام
قویلانیب بیر اوشاق قبرینین دیبینه...
بیلمم بلکه بئله بیر سناریویا باغلی دیر
اوره‌ییم ده اسن غم...
یوخسا بو چیرپان کوکلک
بو سومویومه گئچن شاختا
و قیپ قیرمیز بولودلار
عادی دئیل بو
عادی دئیل

#واحید_سولطان_اوغلو


@qanadli_duyqular

#حسرت

بو گئجه دونیانین ان غریبی‌یم
نه داما، نه داشا سیغیر بو حسرت.
جانی بوغازیندا اولان جانیمی،
ییغیر بوغازیما، ییغیر بو حسرت.

دونیادا ان غریب بو گئجه منم
بو نئجه غوربتدی، بو نئجه منم؟
سارالمیش باغچایام، سولموش چمنم
بئله‌جه کؤنلومو سیخیر بو حسرت.

دئییر گؤز یاشینا آغلا، آی اورک!
آرزینا نه قدر کولک اسه‌جک
کولالیق قیصاصی اولان بوینوز تک-
بو گئجه آلنیمدان چیخیر بو حسرت.

بو گئجه کؤزه‌رن کؤمور اولموشام
عؤمرومه قنیم بیر عؤمور اولموشام
ائله بیل برکیییب دمیر اولموشام
دونیانی اوستومه ییخیر بوحسرت.

بو گئجه دیدرگین قوش للـه‌یی‌یم
اوزومو اوشودن قیش کوله‌یی‌یم
قورولار اودوندا یاش گیلئیی‌یم
یاندیریر بو حسرت، یاخیر بو حسرت.

بو گئجه داشلارا دَییب قاییدان-
سسلره بنزه‌ییر سئوگیم ده، اینان!
بو گئجه اوستومدن یول سالیب گومان
گؤرن نه اولاجاق آخیر بو حسرت...؟

#علی_جوادپور

#گئجه_نیز_دینج

@qanadli_duyqular

ائشیتدی بیر سس ائشیکدن، بیری اؤزون آتدی
گلیب گئدنلرین آغزیندا سؤزلرین بیلدی
- الو پولیسدی فیلان یئرده بیر نفر یئخیلیب
جان اوسته دیر، بله شیبدیر قانا، اؤلومجیلدی

قاییتدی پنجره یه، گؤردو یئرده کی یئخیلان
گئدیبدی یوخدو یئریندن، آما قانی یئرده
گلیب گئدن یئره باخمیر، قانی گؤرن یوخدور
بیر آندا هرنه دؤنوب عادی فورما چئوریلدی

پولیس یئتیشدی، باخیب گؤردو بیر خبر یوخدور
سوروشدو بوردا بیر ایش اولدو؟ هاممی چاشدی، نئجه؟!
چالیندی زنگی، پولیس دیر، خبر وئرن گلسین...
اینانمادی بالاجا زنگینن پولیس گلدی

داریخمادان هامییا زنگ آچاندا گل اؤلورم
تاپیلمادی بیری ایشدن الین چکیب گلسین
پس اؤلمه ییم دیریلیک دن اؤنملی دیر بوردا
دوشنده دونیا گؤزوندن، گؤزون یاشین سیلدی

چالیندی زنگی، - آی اوغلان هایانداسان بورا گل
یوبانماغینلا یالان جورمونو آغیرلاتما
اونون لئشین دیری سیندن چوخ آختاران واریدی!
بئش آلتی دیقه دئیلدی، بوتون اوتوز ایلدی

بو دونیا بیر ننه قارنی دی قالمادیم دوشدوم
گؤروم قالانلاریزا سووخا نیسگیلیم قالسین
بو دونیادان اوزولن دیر اولوب قالان هر شئی
اوزولمه ین دییه سن بوردا تکجه نیسگیلدی

آلیردی آینادا گؤز یاشلاریلا دسته مازین
اوزون چئویردی، آیی آلنینا مؤهور قویدو
باغیردی اشهد ان لا اله یالقیزلیق
یئرین گؤیون آراسیندا دوروب ناماز قیلدی

اوچوب یئتیشدی یئره، قان قار اوسته فیشقیردی
آپارتمان لارا چیرپیلمادایدی سون هارایی
- دئنن پولیس لره دوز گلمیسیز یالان دئمه دیم
ووروبدولار بیله سین... بیر نفر اؤلومجیلدی

#حمید_عیوضی

@qanadli_duyqular