لقرآن، بدل ما ندفع التمن غالي من حياتنا..
◇والنوع ده، يعتبر النوع الأول من أنواع العقوبات، إللي هو النوع إللي ربنا بيعجّل له العقوبة في الدنيا👌
◇أما النوع التاني، فده بقى إللي حتى لو ندم فندمه مش هينفعه لإنه بيكون ندم عند الغرغرة وسكرات الموت ،
أو لإنه بيكون من إللي طغى واستكبر على الهداية واستحب الضلال فربنا طبع على قلبه وزاده ضلال على ضلاله لحد ما يموت،و ده إللي بتتأجل عقوبتهم للآخرة👌
تلاقي واحد ظالم طاغية وعايش زي ماهو عايز، لحد ما يموت، لكن عقوبته مستنياه في الآخرة..
وتلاقي بنت ولّا شاب ماليين الأرض فجور ومعاصي وفسق وفجأة ربنا يقبض أرواحهم والعياذ بالله قبل ما ينزل بيهم أي عقاب دنيوي 😞
◇وفي نوع ثالث وهو النوع إللي ربنا بيعاقبه وهو مش حاسس،
تلاقي الإنسان ربنا حرمه من الطاعات ومن القرب منه وهو مش واخد باله ومفكر إنه عشان جسمه سليم وبياكل وبيشرب وعنده مُتع الدنيا يبقى هو كده تمام 😑
وناسي إن أهم حاجة هي سلامة القلب لإن يوم القيامة يوم لا ينفع مال ولا بنون إلا من أتى الله بقلب سليم 👌
وده إللي بيسميه العلماء 《الاستدراج بالنعم》
يعني ربنا يُنعم عليك رغم المعاصي، ساعتها لازم تقلق وتراجع نفسك وتعرف إنك مُستَدرَج،
لإن النعم دي هتشغلك عن التوبة ومحاسبة النفس في المعاصي لإنها هتخليك تتخيل إن ربنا راضي عنك وقلبك بفتة بيضاء بقى وكده😅
فييجي الموت فجأة وانت على الحال دي من الغفلة وساعتها مش هينفع الإنسان شيء👌
"فَلَمَّا نَسُوا مَا ذُكِّرُوا بِهِ فَتَحْنَا عَلَيْهِمْ أَبْوَابَ كُلِّ شَيْءٍ حَتَّىٰ إِذَا فَرِحُوا بِمَا أُوتُوا أَخَذْنَاهُم بَغْتَةً فَإِذَا هُم مُّبْلِسُونَ"
ربنا يرزقنا جميعا القلب السليم إللي يكون سبب في دخولنا للجنة🤲

وبكده خلصت قصتنا النهاردة،
وإن شاء الله المرة الجاية نتكلم عن قصة الأعمى والأبرص والأقرع 👌

●ملحوظة:
إن شاء الله هكمل قصص الأنبياء بعد الجزء الجاي فهدخل في قصة يحيى وزكريا وعيسى عليهم السلام، وباقي قصص القرآن والحديث النبوي هتلاقوها في السيرة إن شاء الله😊

☆ملحوظة:
حد عايز يأخذ القصص وينشرها يتفضل أنا معنديش مانع نهائي😊

#Eman_Shalapy

https://m.facebook.com/story.php?story_fbid=458335559167019&id=100049717356242
لا تؤجل توبتك💔

‏قال رسول الله ﷺ:
"إن من أفضل أيامكم يوم الجمعة، فأكثروا عليّ الصلاة فيه، فإن صلاتكم معروضة عليّ"
اللهم صلِ وسلم على نبينا وحبيبنا محمد وعلى آله وصحبه أجمعين.❤

#قصص_الأنبياء
#الحلقة_الخمسون
#قصة_الأبرص_والأقرع_والأعمى

قصتنا النهاردة هي قصة الأعمى والأبْرص والأقْرع، حصلت القصة دي في بني إسرائيل في أي زمن بالتحديد أو إيه أسماء الثلاثة دول منعرفش🤷‍♂️
لكن رسول الله ﷺ حكالنا القصة دي للعبرة،
قال رسول الله ﷺ:
"إِنَّ ثَلَاثَةً في بَنِي إِسْرَائِيلَ أَبْرَصَ وَأَقْرَعَ وَأَعْمَى بَدَا لِلَّهِ أَنْ يَبْتَلِيَهُمْ.."
يعني كان في ثلاثة رجال من بني إسرائيل، واحد أعمى مش بيشوف، والتاني أبرص يعني عنده مرض البرص إللي هو بيكون أجزاء من الجسم لونها أبيض ومختلف عن باقي لون الجسم الطبيعي، ربنا يعافينا ويعافي كل مبتلى🤲
والتالت أقرع معندهوش شعر..
فربنا أراد إنه يبتليهم ويختبرهم...

☆طيب ما همّ أصلا في بلاء، هيبتليهم أكثر من كده إيه🤔
أشد البلاء هو الإبتلاء بالنعم👌
لإن الصبر على الشدة ناس كثير تقدر تحققه،
زي الصبر على المرض والصبر على الفقر ، وهكذا ..
وابتلاء الصبر على الشدة ده بيقدر عليه المؤمن والكافر زي ما قلنا قبل كده،
يعني الواحد مضطر يصبر كده كده مفيش قدامنا حيلة إلا الاستسلام غالبا🤷‍♂️
والسبب في كده إن النفس البشرية بتكون متأهبة ومستعدة للتحدي والمواجهة، وعلى طول الإنسان يقوم يتضرع ويدعو ربه بخضوع وانكسار وتذلل عشان يرفع عنه البلاء،
بعكس الإنسان إللي عايش في نعيم ومش بيواجه مشاكل، هتلاقيه مش في دماغه أصلا الاحتياج لشيء، وعايش حياته بالطول والعرض، ولو ذكّرناه بالله هيقول وهو أنا محتاج ربنا في إيه ما أنا كل أموري تمام💁‍♂️
عشان كده ربنا بيقول لنا:
"كَلَّا إِنَّ الْإِنسَانَ لَيَطْغَىٰ..أَن رَّآهُ اسْتَغْنَىٰ"

فالثلاثة دول لما كانوا في ابتلاء بالنّقَم يعني الشدائد كانوا خاضعين لله منكسرين،
فربنا أراد إنه يبتليهم بالنعم عشان يشوفوا نفسهم هيبقوا عاملين إزاي،
مع إن ربنا عالم باللي في قلوبهم لإن ربنا علام الغيوب وعليم بذات الصدور،
لكن زي ما قلنا كتير قبل كده، ربنا مش بيحاسبنا على سابق علمه فينا، لكن على أعمالنا الفعلية وإللي هي مش غيب بالنسبة له عزو جل أبدا، فبيبتلينا عشان نشوف الحاجات المستخبية جوة قلوبنا،
فينجو مننا إللي يُزكي نفسه ويعالج الأمور دي، ويَهلَك إللي يعمل نفسه مشفش حاجة ويكمل في الغفلة👌
فربنا عمل إيه معاهم 😊
قال رسول الله ﷺ: "فَبَعَثَ إِلَيْهِمْ مَلَكًا.."
يعني بعت لهم مَلك من الملائكة في صورة بشر عشان يسألهم أمنيتهم إيه؟
"فَأَتَى الْأَبْرَصَ فقال: أَيُّ شَيْءٍ أَحَبُّ إِلَيْكَ؟"
يعني المَلك راح للأبرص واتكلم معاه وبعدين سأله: نِفسَك في إيه، أو تتمنى إيه🤔
فالأبرص قال:
"لَوْنٌ حَسَنٌ وَجِلْدٌ حَسَنٌ، قد قَذِرَنِي الناس"
يعني أتمنى إن جلدي يكون حلو و لُوني يكون لون واحد مش لونين، وميكونش عندي إللي الناس بيبعدوا عني بسببه ده ويستغربوني 😔
"فَمَسَحَهُ فَذَهَبَ عنه، فَأُعْطِيَ لَوْنًا حَسَنًا وَجِلْدًا حَسَنًا"
يعني المَلَك مسح على جلد الرجل الأبرص فاختفى البَرص، والرجل أخد إللي هو عايزه من اللون والجلد الجميل..
وبعدين المَلك سأله: أَيُّ الْمَالِ أَحَبُّ إِلَيْكَ؟
يعني إيه أكتر أنواع الأموال إللي بتحبها🤔
فالراجل قال له: الْإِبِلُ، فالمَلك أعطاه نَاقَةً عُشَرَاءَ وقال له: يُبَارَكُ لك فيها.
يعني الملك إداله له ناقة حامل 🐪 ودعاله بالبركة👌 وبعدين سابه ومشي..
وراح المَلك للرجل الأقرع واتكلم معاه هو كمان وسأله تتمنى إيه؟
فالأقرع قال: نِفسي شعر راسي يرجع تاني؛ لإن الناس اشمأزوا منه ومن منظر راسي وشكلي😞
=ويمكن كانوا بيضايقوه كمان بسبب إن همّ عندهم شعر وهو لأ=
فأنا عاوز شعري يطلع تاني ويكون شكلي جميل
فالملَك مسح على رأس الأقرع فطلع فيها شَعر جميل،
ثم سأله برده عن أكثر الأموال إللي بيحبها فقال له: البقر ، فالملَك اداله بقرة حامل🐄 ودعا له بالبركة، وبعدين سابه ومشي..
وراح بعد كده للأعمى واتكلم معاه وسأله تتمنى إيه؟
فالأعمى قال له : نفسي ربنا يرجع لي بصري عشان أشوف الناس😔
فمسح الملك على عينه فبقى مُبصِر ، فسأله الملك هو كمان: بتحب إيه أكثر نوع من الأموال 🤔
فقال : الغنم ، فاداله شاة حامل 🐐 .. ودعا له بالبركة وبعدها سابه ومشي..

عدّت كم سنة والأبرص بقى عنده وادي من الإبل، والأقرع عنده وادي من البقر، والأعمي عنده وادي من الغنم.
تخيلوا معايا كده يعني إيه وادي😅
الوادي ده أرض منخفضة، حاجة كده زي الحوض الوااااسع، بيكون طوله آخر ما تجيب عينك من اليمين والشمال،
فكل واحد منهم بقى عنده أرض مليانة بالإبل أو البقر أو الغنم😮
وهنا جه وقت الإختبار👌
بعد كام سنة رجع لهم المَلَك تاني ..
الملك راح للرجل إللي كان أبرص في صورة رجل أبرص عشان يفكّره بنفسه زمان لو كان نِسي..
وقال له: "رَجُلٌ مِسْكِينٌ تَقَطَّعَتْ بِيَ الحِبَالُ في سَفَرِي فلا بَلَاغَ الْيَوْمَ إلا بِاللَّهِ ثُمَّ بِكَ،
أَسْأَلُكَ بِالَّذِي أَعْطَاكَ اللَّوْنَ الحَسَنَ وَالجِلْدَ الْحَسَنَ وَالمَالَ بَعِيرًا أَتَبَلَّغُ عليه في سَ

فَرِي😥
يعني بيقوله أنا عابر سبيل، مُسافر غريب ومش معايا أي مال أكمل بيه سفري، ولا أشتري أكل،
فمفيش حد يقدر يُعينني على سفري ده إلا الله ثم انت، فأسألك بالذي أعطاك الجلد الجميل واللون الجميل الذي أراه ، وأعطاك المال الكثير، إنك تديني ناقة واحدة أكمل بيها سفري،

☆واخدين بالكم المَلَك عمّال بيذكّر الرجل إزاي بإن ربنا غيّر له كل ده وعافاه وكمان رزقه الأموال، من غير ما يحسسه إنه عارف الماضي بتاعه👌
فالرجل إللي كان أبرص قال للملك المتخفي في هيئة مسافر فقير أبرص:
إِنَّ الحُقُوقَ كَثِيرَةٌ😒
يعني المسؤوليات إللي ورايا كبيرة... وأنا راجل عليّ ديون أد كده!

☆بالرغم من تذكرة الملك للرجل بفضل ربنا عليه والعافية، إلا إن الراجل للأسف ولا اتأثر 😶
ابن السبيل من المستحقين للزكاة أصلا 😑
فلو هو فعلا غني الغنى ده كله فأكيد عليه زكاة، ولازم يدفعها.. طب ما يدفعها لابن السبيل؟
ولنفرض إنه خلاص دفع زكاة ماله من فترة،
فهو غالبا برده بيكذب، لإن ديون كتيرة إيه دي إللي عليه، وهو عنده وادي مليان إبل🤓
ثم هو لو مديون فعلا بديون كتيرة كده زي ما بيقول، ومع ذلك لسه محتفظ بالأموال دي كلها عنده يبقى مش كذاب ماشي أيوة، لكنه آكل لأموال الناس ومستحقاتهم المالية بغير حق! فهو كده أو كده مخطيء جدا ومتورط في المنكر حتى النخاع😬

طيب الملك قال له إيه 😈
قال له:كَأَنِّي أَعْرِفُكَ!! أَلَمْ تَكُنْ أَبْرَصَ يَقْذَرُكَ الناس فَقِيرًا فَأَعْطَاكَ الله!
يعني بيقوله أنا تقريبا عارفك🤔 مش انت إللي كنت أبرص وربنا أعطاك لون جميل وجلد جميل..؟ مش انت كنت فقير وربنا أغناك😏
فالرجل قال له :لقد وَرِثْتُ لِكَابِرٍ عن كَابِرٍ😤
يعني بيقوله انت بتقول إيه .. أنا ورثت المال عن أبائي وأجدادي.. إحنا عيلتنا كلهم أغنياء أصلا💁‍♂️

☆ده انت كذاب فعلا بقى... ومش بس كذاب.. ده انت جاحد لنعمة ربنا كمان🙄
وده للأسف بقى وضع غالب في الناس دلوقتي إللي ربنا بيكرمها ويفتح عليها بالنعم بعد الشدة والفقر، إلا من رحم الله..
وربنا بيقول عنهم :
"وَلَئِنْ أَذَقْنَاهُ رَحْمَةً مِّنَّا مِن بَعْدِ ضَرَّاءَ مَسَّتْهُ لَيَقُولَنَّ هَٰذَا لِي ". يعني أنا إللي عملت وأنا إللي تعبت وأنا إللي كسبت ده بشطارتي وأنا.. وأنا ..
طيب فين فضل ربنا في حياتك..؟ مفيش😑
وبالتالي انتم ماتزعلوش لما تُحسنوا لحد وتقفوا جنبه، وفي الآخر يتنكّر لكم..
ماهو تنكّر لفضل ربنا الأول واستكبر بالنعمة على خلقه ولم يُرضي الله فيها بالشكر المطلوب.. فما بالكم بالبشر 😶

فالمَلك قال له :"إن كُنْتَ كَاذِبًا فَصَيَّرَكَ الله إلى ما كُنْتَ"
يعني خلاص لو انت كنت كذاب فيارب ربنا يرجعك زي ماكنت 🤲
والملك سابه ومشي....
واتوجه للراجل التاني إللي كان أقرع،
دخل عليه الملك في صورة إنسان فقير وأقرع وقال له نفس الكلام إللي قاله للأبرص، قال:
أنا عابر سبيل .. مليش في الدنيا غير ربنا ثم إنت .. فاديني بقرة واحدة من كل دول، أكمل بيها سفري😥
نفس اللي عمله مع الأبرص بالضبط وقعد برده يعظم له من حجم النعمة في قلبه والعافية..
فالراجل قال له:
الحقوق كتيييرة... دانا عندي ديووون... مش هقدر أديك حاجة😒
فالملك قال له:
كإني أعرفك؟! مش إنت كنت أقرع وربنا رزقك بشعر جميل؟! وكنت فقير وربنا أغناك🙄؟!
فالرجل قال له بانفعال برده:
إزاااي تقول كده...!! ده أنا وارث المال من أبائي وأجدادي ..! أنا عمري ما كنت في يوم فقير 😏
فالملك قال له: لو كنت كاذب يارب ترجع زي ماكنت 👌

☆واخدين بالكم إزاي إن الإنسان ممكن يتمنى حاجة وتكون سبب في ضياع دينه😞
زي مثلا لما أخت يكون نفسها تتزوج شخص معين وبتتوسل لربنا يزوجها له هو وبس وبتطلب ده في دعاءها بإلحاح، ومش قادرة تتخيل حياتها من غيره،
لإنها مُعتقدة تماما إنها لو تزوّجته هتكون سعيدة ومش مُفوضة الأمر لله إللي أعلم منها بالخير من الشر،
ومتعرفش إنها ممكن لو تزوجته يكون سبب فتنتها أو سبب تعاستها، وياما سمعنا ده حصل 👌
أو مثلا واحد نفسه يدخل كلية معينة، ونفسه فيها وميعرفش إنها ممكن لما يدخلها دينه هناك يضيع ويموت على معاصي مع صحبة سوء عُمْر ما حد كان يتخيل إنه يوصل لها 😶
طيب الحل هنا إيه😥
الحل في حاجتين :
◇الأول هو الإستخارة في الحاجة إللي احنا عايزينها يعني نستخير ربنا ونقول دعاء الاستخارة، فلو الحاجة إللي احنا عايزينها فيها خير ربنا هييسرها لنا، ولو مفيهاش خير ربنا هيبعدنا عنها 👌

◇ وتاني حاجة هي الدعاء عموما😊
يعني الاستخارة دعاء مخصوص لحاجة مخصوصة...لكن الدعاء عموما بيكون بشكل عام وعلى كل حال،
فاحنا ندعي باللي نفسنا فيه كوووله مفيش مشكلة، بس في الآخر نقول يارب استجب لو ده كان فيه خير🤲
لإننا منعرفش نميّز الخير من الشر بِدقة، ومش كل إللي بندعي بيه وبنتمناه هو الخير، وربنا قالنا:
"وَعَسَى أَنْ تَكْرَهُوا شَيْئاً وَهُوَ خَيْرٌ لَكُمْ وَعَسَى أَنْ تُحِبُّوا شَيْئاً وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لا تَعْلَمُونَ"

☆عارفين بقى

ليه نقول كلمة 《لو كان فيه خير》😁
احنا كده بنعلّم نفسنا اليقين والتوكل على الله، وبنعلم نفسنا الرضا بقضاء الله،
بمعنى إن أي حاجة هتحصل احنا راضيين لأننا عارفين ومتأكدين إن هو ده الخير👌
وكمان عشان لو محصلش إللي احنا بنتمناه لحكمة ربنا يعلمها واحنا منعرفهاش...ميجيش الشيطان ويقول لحد فينا شوفت أهه ربنا مستجبش ومدكش إللي انت عايزه😒
فين بقى ادعوني أستجب لكم...وفين إني قريب أُجيب دعوة الداع إذا دعانِ وفين..وفين...
خلاص بطّل دعاء بقى ماهو مفيش فايدة😤
وندخل في دوامة من الشبهات بسبب حاجة بسيطة خالص مكناش واخدين بالنا منها👌
وحصلت مع ناس كتير للاسف😬
فلمّا نقول مع الدعاء لو في خير؛ وقت لمّا ميحصلش...أول حاجة هنقولها: أيواااا ده مكنش فيه خير👌

¤وهقول لكم معلومة عالسريع كده🤭
عارفين، كل دعوة بندعيها ربنا بيسجيبهالنا ١٠٠% بس هقول لكم عالسر 🤫
مش لازم استجابة الدعاء تيجي زي احنا عايزين بالضبط👌
لأن ربنا عالم الغيب بيعملنا أحسن حاجة مناسبة لينا 😊
يعني ولله المثل الأعلى،
لو عندنا طفل صغير أخ أو ابن مثلا أو أي طفل بنحبه وطلب مننا حلاوة ياكلها واحنا عارفين إنه لو أكل النوع ده من الحلوى بطنه هتوجعه وسنانه هتسوس، هنديله الحلاوة دي ولّا لأ🤔
أكيد طبعا مش هنديله الحلاوة 💁‍♂️
لأننا بنحبه واحنا عارفين إنها هتضره وخصوصا إنه صغير ومش عارف مصلحته،
حتى لو زعل وعيط وصرخ وعمل إيه، وحتى لو هو مفهمش إننا بنعمل كده عشان مصلحته...حتى لو قالك انتِ مش بتحبيني ..حتى لو...حتى لو... وهتحاولي تقنعيه وتبيني له ضرر الحلاوة دي👌
ولله المثل الأعلى إحنا زي الأطفال بنطلب حاجة من ربنا وشايفين إنها جميلة،
واحنا منعرفش إنها مضرة لنا، فربنا عالم الغيب يمنع عننا الحاجة دي عشان مصلحتنا ويعوضنا عنها مثلا بإنه يمنع عننا مصيبة كانت هتحصل لنا ،
أو يدّخر لنا الدعوة دي، يحوشهالنا يعني ويجازينا بيها يوم القيامة؛ لأنه يعلم إن أعمالنا لما تتحط في الميزان مش هتكفي فيزودها لنا بالدعوات دي💁‍♂️
عشان كده رسول الله ﷺ قال:
"ادعوا الله وأنتم موقنون بالإجابة"
يعني هيستجيب هيستجيب لكن إمتى وإزاي دي اللي منعرفهاش🤷‍♂️
ممكن في الدنيا وممكن في الآخرة👌
وجاء في الأثر عن رب العزة :
《إن من عبادي المؤمنين من لا يُصلِحه إلا الغِنَى ولو افتقر لأفسدَهُ ذلك،
وإن من عبادي المؤمنين من لا يُصْلحه إلا الصّحة ولو أسقَمْتُه لأفسده ذلك،
وإن من عبادي المؤمنين من لا يصلحه إلا السّقم ولو أصْحَحَته لأفسده ذلك،
وإني أُدبر لعبادي بعلمي بقلوبهم إني عليم خبير》
☆ملحوظة:
الحديث ده👆 باللفظ ده ضعيف، لكن المعنى صحيح وفي حاجات عندنا في الشرع صحيحة بتؤدي نفس المعنى، عشان كده استشهدت بيه👆

فاضل معانا في قصة التلاتة: الأعمى..
الملَك راح للراجل إللي كان أعمى، راحله برده في صورة بشر أعمى وقال له نفس الكلام :
أنا عابر سبيل.. ماعنديش حاجة .. ماليش غير ربنا ثم إنت.. فاديني غنمة واحدة من كل دول أكمّل بيها سفري😥

الأعمى قال له إيه بقااااا😁
قال: " قد كنت أَعْمَى فَرَدَّ الله بَصَرِي، وَفَقِيرًا فَقَدْ أَغْنَانِي فَخُذْ ما شِئْتَ فَوَاللَّهِ لا أَجْهَدُكَ الْيَوْمَ بِشَيْءٍ أَخَذْتَهُ لِلَّهِ"
يعني بيقوله :عارف.. أنا كنت أعمى زيك.. وربنا رد عليّ بصري وعافاني..
وهو إللي أغناني بكل إللي انت شايفه ده بعد ما كنت في يوم من الأيام معنديش أي حاجة زيك كده... فخد إللي انت عايزه من كل ده وسيب إللي انت مش عايزه بس..
فوالله أنا مش هراجعك في أي حاجة تاخذها👌
فالمَلَك قال له:
"أَمْسِكْ مَالَكَ فَإِنَّمَا ابْتُلِيتُمْ فَقَدْ رضي الله عَنْكَ وَسَخِطَ على صَاحِبَيْكَ"
يعني خلي لك مالك كله ليك.. ربنا يبارك لك فيه..
ده كان اختبار من ربك، وانت نجحت فيه، وربنا راضي عنك، وسخط وغضب على صاحبيك: الأقرع والأبرص👌

☆وهنا ييجي سؤال:
إيه إللي خلى الأقرع والأبرص يسقطوا في الإبتلاء والأعمى هو إللي ينجح🤔
خليني أسأل سؤال ...هو إيه إللي بيخلي الإنسان يبقى عايز حاجة معينة😊
يعني لو أنا ماشي في السوق مثلا، إيه الدافع إللي بيخليني أشتري اللبس ده وأشتري الذهب ده وأشتري الأجهزة دي.. وأشتري.. وأشتري...
مش إللي خلاني أشتريها هو إن شكلها عَجَبني فقررت أشتري💁‍♂️
طيب لو أنا ما شوفتش الحاجة دي، هل هيكون في داعي جوايا إني أشتريها🤔
أكيد لأ.. أنا أصلا معنديش فكرة عن وجودها، أنا مشوفتهاش، أنا عيني ما اتعلقتش بيها..
يعني باختصار من أعظم لذات الدنيا كلها هي 《النظر》 👌 يعني يكاد يكون النظر يكون هو البوابة لكل الملذات الدنيوية،
عشان كده ربنا بيقول في حديث قدسي :
"إِذَا ابْتَلَيْتُ عَبدِي بحبيبتَيْهِ –يعني عينيه- فَصبَرَ، عَوَّضْتُهُ مِنْهُمَا الْجنَّةَ"
فلما الإنسان يكون طول عمره عينه مقفولة عن الشهوات والمحرمات وفضول النظر .. قلبه هيكون عامل إزاي👌
خلينا نشوف فوائد غض البصر:
◇القلب هيكون كله تقوى وخشية من الله،
◇ القلب هيكون فيه يقين ومحبة لله، ده غير البصيرة والف

ِراسة إللي ربنا هيرزقه بها ،
وبكده الإنسان يقدر يفرق بين الحق والباطل ويفرق بين الشخص الصادق أو الكاذب ويعرف يطلّع الشخص المخادع😈
ده غير الراحة النفسية الكبيرة إللي الواحد بيكون فيها💁‍♂️
لأنه مش بيبص لصاحبه عند إيه، ولا بتبص لصاحبتها جايبة إيه في شقتها،
ولا بتحقد على جارتها إللي جددت شقتها وهي لأ، ولا غيرانة من أختها إللي اشترت ذهب وهي لأ، ولا...ولا...
وعشان كده ربنا أمرنا بغض البصر مش بس عن المحرمات لأ ده حتى عن ملذات الدنيا👌
قال الله تعالى:
"وَلا تَمُدَّنَّ عَيْنَيْكَ إِلَى مَا مَتَّعْنَا بِهِ أَزْوَاجًا مِنْهُمْ زَهْرَةَ الْحَيَاةِ الدُّنْيَا لِنَفْتِنَهُمْ فِيهِ وَرِزْقُ رَبِّكَ خَيْرٌ وَأَبْقَى"
فلما كان قلب الأعمى متحقق فيه الكلام ده👆 ومتربي من زمان على عدم تعلق نظره بزخارف الدنيا، كان طبيعي جدا إنه ينجح في الإختبار 😊
فكان ابتلاؤه بالعمى، رحمة عظيمة له وأجمل رزق، من حيث لا يدري👌

◇كلمة أخيرة،
لو أخذتم بالكم احنا كل يوم بنتعرض للإبتلاء بتاع الأبرص والأقرع والأعمى واحنا مش واخدين بالنا 👌
ممكن حد ييجي يطلب منك حاجة وانت ترفض بأي حجة زي حجج الأقرع والأبرص..
ممكن يكون ربنا رزقك نعمة زي نعمة وظيفة معينة ونفوذ معين، وتقدر تخلص بيه مصالح للناس متعسرة ومن غير تعدّي على حقوق الآخرين أو ارتكاب أي محرم،
ومع ذلك تقوم انت تعطل مصالحهم وتبخل عليهم بنفوذك وإمكانياتك..
وزي مثلا بعض دكاترة الكليات لما بيصعّبوا على الطلبة أحيانا الأبحاث ورسايل الماجستير والدكتوراة،
ويضغطوهم ويخنقوهم ويستقصدوهم ويرهبوهم ويصعبوا عليهم الإمتحانات،
وهم كانوا في يوم من الأيام طلبة زيهم وفي مكانهم ويمكن حصل معاهم برده نفس التشديد والتعنت والتصعيب ده،
ومع ذلك لما ربنا عافاهم مراعوش ربنا في النعمة إللي اداها لهم وعافاهم من الحرمان منها قبل كده..
وهكذا..
لو ركزنا في حياتنا هنلاقي إننا في امتحان مستمر زي امتحان الأبرص والأقرع والأعمى،
لكن السؤال بقى إيه هو رد فعلنا على الاختبار ؟
هل زي الأقرع والأبرص والعياذ بالله ؟
ولّا زي الأعمى😊

إن شاء الله من الجزء الجاي هنرجع لقصص الأنبياء تاني وهنكمل باقي قصص القرآن والحديث النبوي في السيرة النبوية 😁

☆ملحوظة:
حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy

تخيل أنك تدل صديقا أو قريبا على هذه القناه 💛
فكلما كسب حسنه كسبت انت مثلها !
فربما كنت نائما أو تتناول طعامك أو منهمكا فى عمل ؛ وعداد الحسنات ما زال شغال بسبب أشخاص دللتهم على هذه القناه وأستفادوا كثيرا منها وعملو ما بها
تخيل💛
يلا شير اللينك بقا💛🌻!.
https://www.tgoop.com/joinchat-U9L_Dku0QUuDMI9e

#قصص_الأنبياء
#الحلقة_الواحدة_والخمسون
#قصة_آل_عمران
#مريم_زكريا_الجزء_الأول

كنا واقفين قبل ما نبدأ قصص القرآن عند بني إسرائيل لما كانوا عايشين في بيت المقدس تحت الحكم الفارسي وبعدين تحت الحكم الإغريقي وبعدين تحت الحكم الروماني،
وقلنا إن في حاكم روماني اسمه هِيرُودِس هو إللي كان بيحكم فلسطين،
والحاكم ده دخل اليهودية ولكنه كان ظالم وفاسد والكل كان بيكرهه حتى اليهود وقلنا إنه جدّد المسجد الأقصى ووسعه،
ده كان حال الوضع في فلسطين بصفة عامة، ندخل بقى للوضع في بني إسرائيل بصفة خاصة،
بني إسرائيل إللي كانوا عايشين في فلسطين في الوقت ده كانوا من نسل يهوذا ..إللي كان فيه نسل ملوك بني إسرائيل،
واحنا عارفين إن المُلك والنبوة اتجمعوا سوا تاني مع بعض لداوود وسليمان عليهما السلام💁‍♂️
فبني إسرائيل الموجودين تحت الحكم الروماني في فلسطين هم من ذرية داود وسليمان عليهما السلام👌
كان في بني إسرائيل أهل بيت صالحين من العُبّاد، وكانوا من نسل سليمان عليه السلام،
أهل البيت ده كان معروف بين بني إسرائيل بالتقوى والصلاح وكثرة العبادة وكان اسمهم :《آل عمران》
"إِنَّ اللَّهَ اصْطَفَى آدَمَ وَنُوحًا وَآلَ إِبْرَاهِيمَ وَآلَ عِمْرَانَ عَلَى الْعَالَمِينَ"
الأب اسمه عمران وكان كبير الأحْبار من اليهود يعني كبير العلماء، وكان الأحبار في بني إسرائيل بيرجعوا له في كل شيء، وزوجته كان اسمها حَنّة،
وكان لها أخت اسمها أَشْيَاع وزوجها اسمه زكريا، ويقال إن أشياع دي بنتها،
فالموضوع على خلاف بين العلماء 😅
المهم في يوم من الأيام حَنة زوجة عمران شافت عصفورة بتأَكّل عيالها الصغيرين في العِش، فتحركت عاطفة الأمومة وبقى نفسها في طفل وكانت ساعتها كبيرة في السن،

☆زي كده لما نشوف طفل صغير لسه مولود ويبقى نفسنا في طفل زيه،
أو واحدة خلاص اكتفت من العيال بس لما تشوف طفل مع واحدة صاحبتها أو أختها، تشتاق نفسها للأطفال 😁

فده إللي حصل مع حَنّة زوجة عمران، اشتاقت للأطفال فدعت ربنا إنه يرزقها بطفل،
ونذرت إن إللي في بطنها ده هيكون لله، يعني عابد لله عشان ينصر الدين،
وكان موضوع نذر الأولاد للعبادة ده في بيت المقدس مشهور عندهم،
وتمّنت إن الطفل ده يكون ذكر عشان الذكر مختلف عن الأنثى في العبادة؛ لأن الأنثى بيجيلها وقت وتنقطع عن العبادة بسبب الحيض بعكس الذكر، ده غير قوة تحمل الذكر لأعباء الدعوة إلى الله،
"إِذْ قَالَتِ امْرَأَةُ عِمْرَانَ رَبِّ إِنِّي نَذَرْتُ لَكَ مَا فِي بَطْنِي مُحَرَّرًا فَتَقَبَّلْ مِنِّي إِنَّكَ أَنتَ السَّمِيعُ الْعَلِيمُ"

وفعلا حملت زوجة عمران لكن لما ولدت كان المولود أنثى🙊
فقالت يارب دي طلعت بنت😥
والولد مش زي البنت في العبادة😔
"فَلَمَّا وَضَعَتْهَا قَالَتْ رَبِّ إِنِّي وَضَعْتُهَا أُنثَى وَاللَّهُ أَعْلَمُ بِمَا وَضَعَتْ وَلَيْسَ الذَّكَرُ كَالأُنثَى "

☆طبعا ربنا يعلم إنها بنت وحَنة عارفة إن ربنا يعلم إنها بنت بس بتقول كده من باب مناجاة ربنا،
يعني بتكلم ربنا و بتعبّر عن استغرابها وإن أمنيتها متحققتش مع إن نيتها كانت حلوة وربنا أعطاها عكس ماهي عايزة😕

شوفوا بقى بالرغم من إن المولود طلع بنت مش ولد ..حنة زوجة عمران مقلتش خلاص يارب أهه إنت إللي قدّرت كده ..هعمل إيه يعني،
فخلاص هرجع في النّذر بتاعي لأن مش ده إللي كنت مخططة له، وخلاص وهخلي البنت معايا وهستنى لما ترزقني بولد بقى 🤷‍♂️
لأ، دي صممّت إنها تكمّل في القرار إللي أخذته وتستغل النعمة المُتاحة إللي ربنا أعطاها لها عشان تحقق نيتها الحلوة برده👌
المهم....حَنّة زوجة عمران سمت البنت مريم، ومريم معناها العابدة،
يعني كأنها بتقول لربنا:
يارب ولد ولّا بنت خلاص إللي انت رزقتني بيه هستغله ومش هضيعه 😤
ودعت ربنا إنه يعصمها من الشيطان هي وذريتها🤲
"وَإِنِّي سَمَّيْتُهَا مَرْيَمَ وَإِنِّي أُعِيذُهَا بِكَ وَذُرِّيَّتَهَا مِنَ الشَّيْطَانِ الرَّجِيمِ"
ودي صفات الإنسان الصادق في عبادته لربنا المُستسلم لقدر الله إللي مش بيتبع هواه..نشتغل بالموجود إللي ربنا أعطاه لنا 👌

☆وعايزين نقف هنا ياجماعة وقفة😊
حنة زوجة عمران كان نفسها في حاجة معينة بصورة معينة وكانت نيتها فيها طيبة وخالصة لوجه الله،
وده بيحصل معانا ساعات لما ندعي بحاجة معينة بصورة معينة وتبقى نيتك فيها طيبة،
لكن ربنا يعطينا حاجة عكسها خالص..فنبدأ نشك في نفسنا ..نشك في حكمة ربنا والعياذ بالله والشيطان يبدأ يوسوس لنا وندخل في متاهات 😶
لما حنة ربنا أعطاها عكس إللي كان نفسها فيه عملت إيه😊
استغلت الموجود 👌
عارفين زي إيه😁
واحدة نفسها تلبس النقاب وأهلها مش موافقين وبيمنعوها كل مرة تلبسه،
وساعات بيقطعوا النقاب مثلا أو مش بيدوها فلوس تشتري نقاب أوغيره،
وبيخلوها تخرج معاهم من غيره بالغصب وهي مغلوبة على أمرها في ده حاليا، ومش عارفة تلبسه،
طيب هي تعمل بقى دلوقتي؟
هل توقّف حياتها عند النقطة دي؟
طيب دي حاجة مش متاحة دلوقتي زي ما هي بتتمنى، خلاص يبقى تشوف إللي ربنا أ

تَاحُه لها و تُخلِص فيه النية بقوة وهمة عالية لحد ما ربنا يأذن بفتح الباب المقفول،
مثلا عندنا الصلوات الخمس نحافظ عليهم مع السنن بتاعتهم،
عندنا القرآن نقرأ ونحفظ ونتعلم.. عندنا صيام التطوع.. عندنا أخلاق عايزة تتظبط.. تقدر المرأة تلبس عبايات واسعة وتقدر تلبس خمارات طويلة، وتغطي على وشها بالخمار من الجوانب،
وتقدري تلبس جوانتي، وممكن تلبس حتى قناع طبي ومحدش هيقدر يمنعها.... يعني كل دي أبواب مفتوحة، ليه بقى نجيي عند باب الطاعة إللي مغلوبين فيه على أمرنا و نقف 😕
وكذلك الكلام عن الشباب في مواقف حياتهم المشابهة..
ممكن واحد منهم يبقى نفسه يتعلم علم شرعي في مسجد على إيد شيخ بشكل دوري ومنتظم،
وطلب ده من ربنا وربنا ميسّرش الباب ده لكن يسّر له أبواب تانية زي دورات النت ومعاهد العلوم الشرعية والدروس والكتب إللي على النت وفي المكتبات،
هل معقولة يرفض ده كله ويقول طالما مش طلب في المساجد على إيد الشيخ وزي ما اتمنيت وخططت، يبقى مش لاعب؟ أكيد لأ🤷‍♂️

فباختصار كده يا جماعة كلنا نستغل الرزق والأسباب المتاحة.. لا تدري لعل الله يحدث بعد ذلك أمرا💁‍♂️
ومَا دُمْتَ مُلْزَمًا فاسْتَمْتَع 😁👌
زي ما حنة زوجة عمران عملت 😊

خلّونا نشوف بقى كان إيه نتيجة استسلام حنّة زوجة عمران
لقضاء الله واستغلالها للمُتاح إللي ربنا وهبهولها 👌

◇أولا:
ربنا تقبل منها النذر بتاعها ، وكمان أنبت مريم نباتا حسنا ومُبارك فيه.. فكانت بتكبر في اليوم الواحد إللي كان بيكبره باقي الأطفال في سنة.. وجعل شكلها جميل ومنظرها مُبهج وقرة عين للي يشوفها،
"فَتَقَبَّلَهَا رَبُّهَا بِقَبُولٍ حَسَنٍ وَأَنبَتَهَا نَبَاتًا حَسَنًا"

◇ثانيا:
كِبار العلماء تنافسوا على كفالتها، يعني بقوا يتجادلوا ويتنازعوا مين إللي ياخد باله منها ويراعيها،
لأن بعد سنتين الرضاع حَنة أم مريم أخدتها للأحبار في بيت المقدس عشان تقعد هناك وتنقطع للعبادة وكان في الوقت ده أبوها عمران مات، فتنافس الأحبار على كفالة مريم،
زي كده لما مثلا مجموعة من علماء زماننا يتنافسوا إنهم ياخدوا طفل صغير ويعلموه ويراعوه، فشوفوا مكانة الطفل ده إيه وسط الناس،
وكان من ضمن العلماء دول نبي من الأنبياء اسمه زكريا،
وكان زكريا عليه السلام نبي بني إسرائيل في الزمن ده،
يعني مش بس العلماء إللي كانوا عايزين يكفلوا مريم، ده كمان نبي عايز يكفل مريم بنت عمران،
لكن الأحبار كانوا رافضين،
فقال لهم زكريا عليه السلام إن هو إللي هيكفلها لأنه زوج خالتها أو زوج أختها على اختلاف الروايات،
فباقي الأحبار أعترضوا وقالوا لأ ..احنا نكفلها ..فعشان يطلعوا من الخلاف قالوا خلونا نعمل قرعة ..نرمي أقلامنا في الماء،
وإللي قلمه يمشي عكس التيار هو إللي يكفل مريم،
فلما رموا أقلامهم كان قلم زكريا عليه السلام هو إللي مشي عكس التيار فهو إللي تكفّل برعاية مريم،
يعني هو إللي هيكون مسؤول عن تربيتها وتعليمها الدين والمسؤول عن رعياتها،
"وَمَا كُنتَ لَدَيْهِمْ إِذْ يُلْقُون أَقْلامَهُمْ أَيُّهُمْ يَكْفُلُ مَرْيَمَ وَمَا كُنتَ لَدَيْهِمْ إِذْ يَخْتَصِمُونَ"

كان زكريا عليه السلام بيعلم مريم الدين فكانت مريم بتتعبد في بيت المقدس في حتة في المسجد اسمها المحراب، والمحراب في لغة العرب يعني الجزء المبني المرتفع في المسجد، عارفين زي الصندرة بتاعة زمااان كده🤔
كانوا بيبنوا المسجد وبيبنوا جزء تاني قبل نهاية السقف كده بيكون زي دورين بس في مكان واحد،
ممكن تبصوا على الأوضة إللي انتم فيها كده..في نص الحائط تخيلوا كأن في سقف تاني زي كده 👈 ----| فالجزء إللي فوق ده المنعزل عن الناس كانوا بيناموا ويتعبدوا فيه وبيسموه المحراب👌
فكان المحراب ده موجود في البيوت القديمة أوي وبعدين لما الناس نسيت إن ده محراب ومعمول للصلاة سموه صندرة وبقوا يخزنوا فيها الحاجات القديمة 😅

المهم يعني مريم كانت بتتعبد في المكان ده وكانت معروفة بين الناس بعبادتها وتضرعها وقنوتها وخشوعها لله على الرغم من سنها الصغير👌
وكانت لها كرامات، والكرامة زي المعجزة بتاعة الأنبياء والرسل،
يعني حاجة خارقة للعادة ربنا بيجعلها على إيد بعض عباده الصالحين فالناس تعرف إنهم أهل خير وصلاح وتأييد من ربنا عز وجل، فهي للأنبياء والمرسلين اسمها معجزة أو آية، ولغير الأنبياء من أولياء الله الصالحين اسمها كرامة،
من الكرامات إللي ربنا وهبهالها، إن كان عندها فاكهة الصيف في وقت الشتاء وفاكهة الشتاء في وقت الصيف!

وكان زكريا عليه السلام كل ما يدخل عليها في المحرب عشان يطمن عليها يلاقي عندها الفاكهة دي فيستغرب،
ويسألها يامريم الفاكهة دي بتيجي منين 😮
"كُلَّمَا دَخَلَ عَلَيْهَا زَكَرِيَّا الْمِحْرَابَ وَجَدَ عِندَهَا رِزْقًا قَالَ يَا مَرْيَمُ أَنَّى لَكِ هَذَا"
فكانت مريم عليها السلام بتقول له :
من عند ربنا، هو في حد بيرزق عباده غيره 👌
"قَالَتْ هُوَ مِنْ عِندِ اللَّهِ إِنَّ اللَّهَ يَرْزُقُ مَن يَشَاء بِغَيْرِ حِسَابٍ"

☆خدوا بالكم إن رب

نا بيهيأ مريم نفسيا بالكرامات دي عشان
تطمن على نفسها ؛ لأن في أمر عظيم هيحصل في حياتها بعدين ويعتبر هزة جامدة لأي واحدة قانتة وتقية زيها،
فلما مِن وهي صغيرة تتعود إنها تشوف الكرامات دي وتتعلم إن ربنا على كل شيء قدير وإن دي علامات لقبول طاعاتها وصلاحها وعاجل بُشرى ليها من ربنا بالخير والرضا؛
هتقدر تتقبل وتواجه الأحداث إللي هتحصل بعدين👌

والكلام ده ينبهنا لنقطة مهمة وهي إن كل ما كان الإنسان من صُغره بيتعرض لمواقف بيربي فيها نفسه... كل ما كان قادر إنه يتحمل ظروف الحياة،
فلما تلاقي نفسك في ابتلاءات مستمرة وبتتعلم منها اعرف إن ربنا بيجهزك لدور معين في المستقبل محدش هيقدر يقوم بالدور ده غيرك👌

◇طب إيه بقى إللي هيحصل مع مريم رضي الله عنها 🤨
مش لما نعرف الأول إللي حصل مع زكريا عليه السلام 😁 لإن إللي حصل مع زكريا عليه السلام كان من ضمن التهيئة إللي ربنا عز وجل بيهأ مريم ليها نفسيا👌

☆قبل ما نعرف إللي حصل مع زكريا عليه السلام عندنا معلومة عايزين نعرفها وهي إننا ينفع نقول عن مريم:
《عليها السلام》 أو 《رضي الله عنها》،
وكلمة عليه السلام أو رضي الله عنه بصفة عامة تجوز في حق أي إنسان مسلم صالح،
يعني يجوز مثلا نقول مصطفى رضي الله عنه، أو كريم عليه السلام،
لكن المشكلة إننا نثبّت الكلمة دي في كل مرة بنذكر اسم الشخص ده، لإنها بتوْهم السامع إنه يا إما نبي يا إما صحابي، بالذات عليه السلام بتوهم جدا إنه نبي،
عشان كده الصح إننا ننوع بين اللفظتين عند ذكر مريم، لإنها بالفعل مش حد عادي، هي مكانتها عالية وربنا اصطفاها على نساء العالمين لكنها مش نبية 🙅‍♂️

نرجع لزكريا عليه السلام،
كان زكريا عليه السلام نبي بني إسرائيل في الزمن ده زي ما قلنا، وهو من ذرية سليمان عليه السلام،
وقلنا إنه كان متزوج من خالة مريم أشياع.. وكان زكريا بيشتغل نجار، وكان كبير في السن كان عمره حوالي تسعة وتسعين سنة،
وكانت زوجته عمرها ثمانية وتسعين سنة، ومكنش عنده أولاد..
فلما دخل على مريم وشاف عندها الفاكهة والرزق الواسع العجيب ده، وسألها وقالت ده من عند ربنا اللي بيرزق من يشاء بغير حساب؛
كإن مريم بجوابها ده نبّهت زكريا عليه السلام لمعنى عظيم ، وهو إن إللي بيرزق مريم في محرابها بالرزق العجيب وإللي بدون أي أسباب دنيوية، قادر إنه يرزقني الولد وأنا كبير في السن كده..

☆زي كده لما نكون حافظين آية معينة من القرآن، زي آية: "الَّذِينَ إِذَا أَصَابَتْهُم مُّصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ "، وبعدين يموت حد من معارفنا إللي بنحبهم، فنسمع حد بيقول لنا:
"احنا كلنا راجعين عند ربنا، إنا لله وإنا إليه راجعون"
فبنحس كأننا بنسمعها لأول مرة.. مش عشان احنا مش حافظين الأية ولا عارفينها، لأ.. لكن لأن مكنش لسه جه موقف يعبر عنها أوي فبالتالي تأثر فينا التأثير ده،
فنبدأ نستحضر معناها من تاني كإننا أول مرة نسمعها أو كانت تايهة عننا ولقيناها👌

فلما زكريا عليه السلام شاف الفاكهة عند مريم وهي في غير الموسم بتاعها، وقالت له إن السبب هو إن ربنا بيرزق من يشاء بغير حساب، وهو كان عارف طبعا من زمان إنه ربنا بيرزق من يشاء بغير حساب 😁
لكن هنا وبعد جملتها، وقع المعنى في قلبه عليه السلام وكإنه أول مرة يلمس المعنى ده بإيده بشكل قريب ومباشر،
يعني كإنه حدث نفسه وقال لها:
يعني ربنا رزق الطفلة الصغيرة دي بأعاجيب الرزق بفضل منه وبدون ماهي تدعي أو تطلب،
أومال أنا بقى لو دعيت ربنا هيحصل إيه😮
فعلى طول دعا زكريا عليه السلام ربنا باللي بيتمناه وكان فقد فيه الأمل بسبب انقطاع أسبابه الدنيوية عنه👌

يا ترى زكريا دعا بإيه، وهل لما دعى، ربنا استجاب دعاؤه ولّا لأ؟
ده إللي هنعرفه الجزء الجاي إن شاء الله😊

☆ملحوظة:
حد عايز يأخذ القصص وينشرها يتفضل أنا معنديش مانع نهائي😊

#Eman_Shalapy

#قصص_الأنبياء
#الحلقة_الثانية_والخمسون
#مريم_زكريا_الجزء_الثاني
#زكريا_يحيى

اتكلمنا المرة إللي فاتت عن زكريا عليه السلام لما كان بيدخل على مريم الطفلة الصغيرة عشان يعطيها الأكل بتاعها ،
فكان بيلاقي عندها فاكهة الصيف في الشتاء ،
وفاكهة الشتاء في الصيف، فلما سألها قالت له إن ده رزق من عند ربنا👌
فوقع في قلب زكريا عليه السلام إن ربنا حقق للطفلة الصغيرة دي كرامة وأعطاها الفاكهة من غير ما تطلب،
أمّال لو أنا بقى دعيت وطلبت بقى ..أكيد ربنا هيستحيب،
حتى ربنا مقالش في القرآن فدعا زكريا لأ..ده قال:
"هُنَالِكَ دَعَا زَكَرِيَّا رَبَّهُ "
فكأن زكريا عليه السلام جت له فرصة فاغتنمها👌
يعني يارب إنت إديتها حاجة عجيبة من عجائب الأرزاق من غير ماهي تسألك،
لكن أنا يارب هسألك فيا ترى عطائك هيكون إزاي لمن يسألك😮
ودعا زكريا وقال:
"رَبِّ هَبْ لِي مِن لَّدُنكَ ذُرِّيَّةً طَيِّبَةً إِنَّكَ سَمِيعُ الدُّعَاء"
يعني يارب هب لي ذرية طيبة على الرغم من كبر سني وشعري إللي شاب وعقم زوجتي.. يا سميع الدعاء يا مَن ترزق من تشاء بغير حساب🤲

☆طيب هو ليه زكريا عليه السلام قال لربنا : "هب لي" ومقلش "أعطني"🤔

لأن الهبة لا يُحاسَب عليها الشخص إللي هيوهبها لي لو لم يهبها لي👌
بمعنى إن أنا لو اديتك هِبة فده فضل من عندي، ولو منعتك الهبة دي فانت ملكش أي حق إنك تزعل أو تضايق،
بعكس لو جيت طلبت مني شيء، وأنا منعته عنك ممكن ساعتها تزعل..
ننزّل الموقف على زكريا عليه السلام:
هو طلب من ربنا الهبة، بمعنى إنه لو إداله الطفل هيبقى كرم وفضل من ربنا عليه عز وجل ،
ولو منعه الطفل، فخلاص مش مشكلة مش هيزعل إن ربنا منع عنه شيء لإنه أصلا بيطلبها وهو شايف إن ملوش حق فيها ولا يملك حاليا أسباب الهبة إللي بيطلبها دي، وكله هيبقى أولا وأخيرا بفضل ربنا..
وده يعملنا جانب من أدب الأنبياء في الدعاء عليهم السلام👌

تعالوا كده نحلل دعاء زكريا عليه السلام ونشوف إزاي دعا ربناو نتعلم منه 😊
◇أول حاجة، زكريا عليه السلام كلم ربنا بينه وبين نفسه، مناجاة في الخفاء من غير ما حد يسمعه..
"إذْ نَادَى رَبَّهُ نِدَاء خَفِيًّا"
قال:
يارب متسبنيش من غير ولد ولا وارث يرث النبوة من بعدي وأنت خير الوارثين🤲
"وَزَكَرِيَّا إِذْ نَادَىٰ رَبَّهُ رَبِّ لَا تَذَرْنِي فَرْدًا وَأَنتَ خَيْرُ الْوَارِثِينَ"

☆واحد عايش بقاله مائة سنة تقريبا بيطلع يشوف الناس ، فلان معاه أبناؤه بيلعب معاهم، وده أبناؤه بياخدوا بالهم منه وده..وده..
مائة سنة.. ماسمعش كلمة بابا.. مش هيحس بإحساس زكريا عليه السلام غير إللي اتحرم من نعمة الذرية...
يارب يرزق كل مشتاق ذرية صالحة 🤲

☆عارفين بقى زكريا عليه السلام حالته من ناحية التشخيص الطبي إيه🙃؟
رجل وزوجته داخلين على مائة سنة.. هي عاقر وهو شيخ كبير عجوز.. يعني من الناحية الطبية استحاااالة إنهم يخلفوا أطفال😶
فكان زكريا عليه السلام بيدعو في الخفاء بالليل بينه وبين ربنا... متخيلين لو الناس سمعوه وهو بيدعي بإن ربنا يرزقه طفل، وهو ظروفه زي إللي قلناها كده.. الناس هيكون رد فعلهم إيه😶

◇تاني حاجة بدأ زكريا عليه السلام الدعاء بأنه أظهر الفقر والضعف والذل لله👌
قال : يارب أنا عظمي بقى ضعيف يعني لو انت شايفني واقف لكن انا عظمي ضعيف😔
وشعر رأسي شاب كله، وأنا عمري ما دعيتك قبل كده ورديت دعائي،
"قَالَ رَبِّ إِنِّي وَهَنَ الْعَظْمُ مِنِّي وَاشْتَعَلَ الرَّأْسُ شَيْبًا وَلَمْ أَكُن بِدُعَائِكَ رَبِّ شَقِيًّا"

☆خدوا بالكم إن في أدعية ربنا بيستجيبها لنا من غير ما ندعي بيها👌
يعني انت النهاردة دعيت ربنا إنه يحفظ لك بصرك؟
دعيت ربنا إنه يحفظ لك سمعك، جسمك، عيالك، والدتك، والدك، بيتك إللي إنت ساكن فيه، موبايلك إللي معاك دلوقتي، إلى آخر كل النعم إللي احنا غارقانين فيها ليل نهار؟
طيب ولما مش بتدعي إن ربنا يحفظهم؟ مين إللي بيحفظهم من غير دعاءك؟ الحفيظ عز وجل..
نِعم كتير أوي ربنا حافظها لنا من غير ما ندعي بس احنا مش واخدين بالنا 😞

◇تالت حاجة بقى قال لربنا في الدعاء السبب هو ليه عايز الولد، فقال :
"وَإِنِّي خِفْتُ الْمَوَالِيَ مِن وَرَائِي وَكَانَتِ امْرَأَتِي عَاقِرًا فَهَبْ لِي مِن لَّدُنكَ وَلِيًّا.. يرِثُنِي وَيَرِثُ مِنْ آلِ يَعْقُوبَ وَاجْعَلْهُ رَبِّ رَضِيًّا"
يعني يارب أنا خايف إني أسيب أحبار اليهود يُفسدوا على بني إسرائيل دينهم ومفيش نبي غيري دلوقتي، وكمان زوجتي عاقر لا تلد😔
فيارب اوهبني من رحمتك ذرية 🤲
لكن مش أي ذرية أنا مش عايز ولد كده وخلاص، لأ أنا عايزه يكون ذرية طيبة يرثني ويرث من آل يعقوب النبوة..

فاستجاب الله دعاء زكريا عليه السلام👌
ومش بس كده😁
ده ربنا أرسل له الملائكة عشان تبشره وتقوله:
"يا زَكَرِيَّا إِنَّا نُبَشِّرُكَ بِغُلامٍ اسْمُهُ يَحْيَى لَمْ نَجْعَل لَّهُ مِن قَبْلُ سَمِيًّا"
يعني يا زكريا، احنا ملائكة الله جايبين لك البشارة من ربنا إنه استجاب دعاءك وهيرزقك بولد اسمه يحيى من أحسن ا

لبشر وأشرفهم،
ومن شرفه وعلو مكانته ربنا بنفسه عز وجل هو إللي سمّاه،
ومش أي اسم، ده اسم مفيش حد قبل كده على الأرض اتسمّى بيه😊
يعني الملايكة بتبشره بمجموعة من الأخبار السعيدة،
مش بس بتبشره بطلبه فقط،
لأ، ده زيادة عليه كمان حاجات عمره ما كان يتخيل إنه يطلبها أو تكون من نصيبه👌

☆عارفين زي إيه ولله المثل الأعلى😅
زي لما تكون بتدوّر لابنك أو بنتك على اسم جديد ويكون معناه حلو، ثم حد بتحبه قال لك اسم جديد وجميل محدش سمّاه قبل كده،
فتسمي ابنك بالاسم ده وكل ما حد يسألك عن اسمه تقولي ده فلان هو إللي سماه وهو أول طفل يتسمى بالاسم ده😁

فكان ده الوضع مع زكريا عليه السلام، فرحته بالاسم والبشرى وتسمية الله لابنه وكل ده، كانت أعظم مما نتخيل،
ومش بس كده، شوفوا البشريات التانية:
"أَنَّ اللَّهَ يُبَشِّرُكَ بِيَحْيَى مُصَدِّقًا بِكَلِمَةٍ مِّنَ اللَّهِ وَسَيِّدًا وَحَصُورًا وَنَبِيًّا مِّنَ الصَّالِحِينَ"
يعني هيكون سيد وحصور👌
و "سيد" يعني شخص كلمته مسموعة وليها أثر في الناس وبيتبعه ناس كتير،
وحصُور يعني معصوم من الذنوب فلا يأتيها،
يعني كإنه حُصِرَ عنها فبقى مانع نفسه من الشهوات الضارة ومن إنها تأثر عليه ومش بس كده، ده كمان نبي من الأنبياء 💁‍♂️
يعني هو طلب ذرية طيبة ربنا رزقه فوق ماكان يتخيل👌

تعالوا بقى نشوف كده إيه ممكن تكون الأسباب إللي تخلي ربنا يعطي زكريا عليه السلام النعم دي كلها ويحقق له المعجزة دي😊
عارفين الملائكة لما راحت تبشر زكريا عليه السلام بالولد كان فين وبيعمل إيه 😁
كان واقف بيصلي في المحراب بتاعه👌
"فَنَادَتْهُ الْمَلائِكَةُ وَهُوَ قَائِمٌ يُصَلِّي فِي الْمِحْرَابِ "
¤ واحنا قلنا يعني إيه محراب المرة إللي فاتت 😅

يعني الملائكة مجتش لقيته نايم مثلا ، لأ، ده دعا ربنا باللي هو عايزه وفضل مكمّل في عبادته،
يعني ما دعاش وهو تارك للعبادة، لأ ده دعا، و مخلاش أمنيته تشغله عن محرابه، وكمل عبوديته لله الحق على أكمل ما يكون،
ولا قال أنا هدعي وهجرب كده وأشوف ربنا هيستجيب لي فأكمل عبادة ولّا لأ، زي ما في ناس بتعمل للأسف😶
ودول ربنا قال عنهم:
"وَمِنَ النَّاسِ مَن يَعْبُدُ اللَّهَ عَلَىٰ حَرْفٍ فَإِنْ أَصَابَهُ خَيْرٌ اطْمَأَنَّ بِهِ ۖ وَإِنْ أَصَابَتْهُ فِتْنَةٌ انقَلَبَ عَلَىٰ وَجْهِهِ خَسِرَ الدُّنْيَا وَالْآخِرَةَ"

فالنوعية دي بتبقى بتعبد ربنا بمزاجها ولمزاجها، وعاملين زي بني إسرائيل كده، بيجربوا،
مفيش يقين، وعندهم ريبة وشك وتذبذب، وبيشترطوا على ربنا في العبادة وعاوزين ربنا يعمل لهم إللي نفسهم فيه، وبكده تبقى الحياة وردي وتمام التمام😀
لكن لو ربنا عمل معاهم غير إللي همّ كانوا متصورينه أو متوقعينه، زي مثلا أخّر عنهم تحقيق الدعاء أو أعطاهم شيء تاني بدل إللي طلبوه ولم يُعطهم إللي عايزينه،
أو ابتلاهم بدل ما يعطيهم، هنا بقى يشتغل سوء الظن في الله ويبقى الواحد من جواه ساخط على ربنا وأقداره وتدبيره وتصريفه للأمور،
إللي هو: إيه ده ؟!.... ده أنا مكانش بيحصل لي كده وانا بعمل المعاصي😳
بقى بعد ما أتوب وأرجع لك وألجأ لك يحصل لي كل ده؟ يعني ياربي هو ده جزائي إني سيبت المعاصي وسيبت التوسل بالقبور وتركت الدجالين والمشعوذين؟!
وإزاي يارب ..وليه يا رب .. واشمعنى يا رب... طب خلاص بقى انا أرجع لحياتي إللي قبل كده وكنت بعمل إللي انا عايزه 😶
زكريا عليه السلام ماعملش كده.. زكريا دعا وكمل في طريق العبادة👌
فربنا استجاب له ووهب له يحيى وفوق منهم عطايا تانية فوق ما كان يتخيل..
"فَاسْتَجَبْنَا لَهُ وَوَهَبْنَا لَهُ يَحْيَىٰ وَأَصْلَحْنَا لَهُ زَوْجَهُ ۚ إِنَّهُمْ كَانُوا يُسَارِعُونَ فِي الْخَيْرَاتِ وَيَدْعُونَنَا رَغَبًا وَرَهَبًا ۖ وَكَانُوا لَنَا خَاشِعِينَ "
فكان سبب الإستجابة إن هو وزوجته إشْياع كانوا طول عمرهم بيعملوا ثلاثة أشياء ميعملهاش غير الصادق وإللي غايته فعلا رضا ربنا وهم:
◇ أولا:《كانوا يسارعون في الخيرات》
أي حاجة فيها خير مش بس بيعملوها، لأ.. دول كانوا بيسارعوا فيها.. مفيش تسويف.. مفيش تأجيل.. وأي حاجة كانت تغضب ربنا كانوا يسيبوها فورا.. مفيش تباطؤ.

◇ثانيا: 《يدعوننا رغبا ورهبا》
يعني بيدعوا ربنا برجاء وخوف.. برجاء يعني بطمع في كرمه إللي ملوش حدود، عشان يرزقهم إللي عنده بكرم ويكون عند حسن ظنهم في واسع كرمه..
و بخوف يعني خوف من عقابه وعذابه ومن عدم قبوله لأعمالهم فيدخلوا على الآخرة من غير ما يكون عندهم أعمال فيدخلوا النار والعياذ بالله،
فبيدعوا ربنا خوفا من عقابه عشان يصرفهم عنه وعن عذابه،
فكانوا عارفين زي ما ربنا غفور رحيم فهو شديد العقاب،
وهو ده تمام الإيمان؛
لإن الإيمان لا يكتمل ولا يقوم إلا بالرجاء والخوف مع بعض، زي الطير كده ما يعرفش يطير بجناح واحد..
والنبي ﷺ قال: "لو وُزن خوف المؤمن ورجاؤه لَاعْتَدلا"

ثالثا: 《كانوا لنا خاشعين》
يعني متذللين..متواضعين لله.. مُخبتين.. مخلصين.. مؤمنين باللي ربنا أنزله..
والإيمان مش مجرد كل

ام،
لأ ...لازم يكون معاه عمل، يعني مينفعش واحد ييجي يقول أنا مؤمن بكلام ربنا ورسوله، فمالكوش دعوة باللي بعمله، الإيمان في القلب وربنا رب قلوب.. ويكون هو عمال يعمل معاصي ليل نهار ويجاهر بيها ومعتقد إن ربنا مش هيحاسبه بزعم إنه مؤمن وخلاص 😅
لإن الإيمان قول باللسان بنقوله، وتصديق بالقلب يعني بنبقى مصدقين بقلبنا كده إن ربنا هو الخالق وهو المستحق للعبادة،
وعمل بالجوارح يعني جسمك بيتحرك بعمل الطاعات عشان يطبق الإيمان ده👌
فلما نصلي يبقى احنا مؤمنين بإن ربنا هو الخالق المستحق للعبادة،
لما ننفذ أوامر ربنا ونبعد عن الحاجات إللي نهى عنها، يبقى احنا مؤمنين بالله فعلا لأن احنا جمعنا بين الثلاثة:
الكلام باللسان وتصديق القلب وعمل الجوارح💁‍♂️

◇وخدوا معلومة على الماشي كده😁
الإيمان مش بيكون ثابت في القلب بدون زيادة أو نقصان،
الإيمان بيزيد بالطاعات.. يعني كل ما نعمل طاعات خالصة لوجه الله الإيمان هيزيد في قلوبنا وهنحس بحلاوته،
والإيمان بيقل بسبب المعاصي .. يعني كل ما الإنسان بيعصي ربنا؛ إيمانه هيقل وقلبه بيضلم ويحس بهم وغم ونكد😶

فنقدر نختصر السبب إللي خلى ربنا يستجيب لزكريا عليه السلام ويرزقه الولد إن كان هو وزوجته عندهم رصيد كبير جدا😊
زي يونس عليه السلام لما كان في بطن الحوت وربنا أخرجه لأنه كان من المُسَبِّحين.. فاكرين😅
وكمان أيوب عليه السلام لما صبر على البلاء وكان زي ما ربنا وصفه بإنه نِعْم العبد إنه أواب، وربنا استجاب له بأقل إشارة صدرت منه لما قال : "أنِّي مَسَّني الضر وأنت الراحمين"

¤طيب هقولكم على قصة تانية يمكن ناس كتير متعرفهاش😁
عارفين رسول الله ﷺ الحبيب ..أحب خلق الله إلى الله ..حصل خلاف بينه وبين زوجته حفصة بنت عمر بن الخطاب رضي الله عنهما، فطلقها🙊
شوفوا،
كسر المرأة طلاقها زي ما رسول الله ﷺ قال،
فما بالكم إذا كان إللي طلق هو رسول الله😳
《السبب في الطلاق مفيش فيه حديث واضح لكن العلماء استنبطوا السبب من القصة إللي جت في القرآن: "وإذ أسَرَّ النبي إلى بعض أزواجه حديثا فلما نبأت به"..
قالوا: إن الزوجة هنا حفصة، فلما أفشت سر النبي ﷺ ..رسول الله طلقها》
☆احنا بنذكر لكم هنا كلام العلماء عشان احنا عارفين فضول البعض الناس مننا، هنسيب الموضوع كله ونمسكوا في: طيب هو طلقها ليه يا تري🤔
المهم.. فلما طلقها ، قعدت تبكي ودخل عليها خيلانها الإثنين بيواسوها وهي بتبكي وتقول:
والله ما طلقني من شِبع... يعني هو ماطلقنيش عشان زهق مني😔
فوهمّ عالحال ده، لقوا الباب بيخبط! بيفتحوا الباب لقوه رسول الله ﷺ!
فاستغربوا ..إيه إللي خلاك تيجي يا رسول الله مش إنت طلقتها.. !؟ فقال رسول الله ﷺ -وهي قاعدة وبتسمع:
جاءني جبريل وقال إن الله جل جلاله أرسلني من فوق العرش وقال: قل لمحمد راجع حفصة ..
يعني رجَّع حفصة لعصمتك تاني👌
طيب ليه يارب من فوق سبع سموات تنزّل وحي في قضية زي دي وتقول لرسول الله راجع حفصة😳
هل عشان عندها أجمل الفساتين...؟ ولّا عشان ماشية على أحدث خطوط الموضة...؟ ولّا عشان جمالها وحسبها ونسبها؟ ولا عشان إيه..؟
فيأتي الجواب: راجع حفصة فإنها ((صوّامة قوامة))..
شوفتوا الرصيد😊
يعني من الأسباب الرئيسية لاستجابة الدعاء ورفع البلاء إن الإنسان يكون له رصيد عند ربنا وقت الرخاء👌

وانتم طبعا عارفين الحديث إللي بيقول: "تعرّف إلى الله في الرخاء يعرفك في الشدة"
والحديث التاني "من سرّه أن يستجيب الله له عند الشدائد والكرب فليُكثر الدعاء في الرّخاء"..
يبقى احنا عندنا ثلاثة أسباب:
المسارعة في الخيرات// والدعاء رغبا ورهبا//والخشوع لله.
لو بتعملوا الثلاثة دول : أبشروا 😁✌️
طيب لو مش بتعملوهم لسه 💁‍♀️
عاااادي ..نبدأ من دلوقتي.. لسه في فرصة ما دمنا على قيد الحياة .. والعبرة بالخواتيم ..
وأَحسِن فيما بقي يُغفر لك ما مضى 😊
المطلوب مننا إننا نبدأ وناخد خطوات للتغيير ..مش مطلوب مننا إننا نوصل للكمال👌
خلينا ماشيين في طريق المسارعة في الخيرات حتى لو بنمشي خطوة ونقع التانية..
هو الطفل الصغير مش أول ما بيبدأ المشي بيمشي خطوة ويقع التانية وبعدين يقوم ويفضل كده لحاااد ما تلاقيه بقى بيجري😁
أهم حاجة إننا نبدأ مادام عرفنا الطريق👌
لأن ربنا هيحاسبنا على مجهودنا مش هيحاسبنا على النتيجة😊
أيوة احنا ممكن نسعى للكمال ونجاهد نفسنا إننا نقدم لربنا أفضل حاجة عندنا ،
وده على فكرة من الحاجات إللي بتخلي همتنا عالية ومنرجعش لورا تاني ..لاااكن ميكنش الكمال غاية👌
عشان ممكن يجيلنا إحباط😑

فزكريا عليه السلام، لما الملائكة بشرته بالولد وهو قائم بيصلي قال :
إزاي يكون عندي ولد وامرأتي عاقر وعمري خلاص داخل عالمائة سنة😮
"قَالَ رَبِّ أَنَّىَ يَكُونُ لِي غُلامٌ وَقَدْ بَلَغَنِيَ الْكِبَرُ وَامْرَأَتِي عَاقِرٌ"

☆هو مش لما دعا كان عارف الكلام ده كله يعني😅
أيوة كان عارف.. بس سؤاله هنا سؤال تعجب مش سؤال استفهام،
زي مثلا لما حد ييجي يقولك انت كسبت معانا رحلة عمرة..وتكون انت دعيت ليل نه

ار قبل إعلان النتيجة إنك تكسب فعلا.. فلما كسبت، أول حاجة بتيجي في بالك إيه..؟ مش بتقول لنفسك: إيه ده إزاي! معقول😳
فرد المَلَك على زكريا:
"قَالَ كَذَلِكَ قَالَ رَبُّكَ هُوَ عَلَيَّ هَيِّنٌ وَقَدْ خَلَقْتُكَ مِن قَبْلُ وَلَمْ تَكُ شَيْئًا"..
يعني ربنا لما بيريد شيئ بيتحقق لإن بيده الأمر كله والأسباب كلها، بيهيأ الأسباب،
ولو مفيش أسباب؟ يقول للشيء كن فيكون...
ثم انت مستغرب ليه يا زكريا؟ ما ربنا خلقك انت وكل الناس من العدم👌
فمش صعب عليه إطلاقا يخلق بشر من بشر تاني حتى لو عجوز عقيم..
فزكريا عليه السلام من فرحته عايز يبقى في علامة ظاهرة كده إن الحمل حصل فعلا،
فربنا أوحى له إن العلامة بتاعتك إنك مش هتقدر تكلم الناس ثلاثة أيام إلا بالإشارة..
لما تكون لوحدك تتكلم عادي لكن لما تكون مع الناس مش هتقدر تتكلم إلا بالإشارة..
يعني ده مش هيكون بسبب إنك مريض، لأ، انت صحيح ومعافى تماما👌
"قَالَ رَبِّ اجْعَل لِّيَ آيَةً قَالَ آيَتُكَ أَلاَّ تُكَلِّمَ النَّاسَ ثَلاثَةَ أَيَّامٍ إِلاَّ رَمْزًا "
فلما خرج زكريا عليه السلام من المحراب عشان يمارس حياته ويدعو قومه ويذكّرهم بالله، مبقاش عارف يتكلم فعلا..
طب هل سكت وقال خلاص أنا مرفوع عني القدرة على الكلام حاليا فمش هدعو الناس لحد ما يرجع لي صوتي😕
لأ،
استخدم معاهم لغة الإشارة عشان يذكرهم بالله👌
"فَخَرَجَ عَلَى قَوْمِهِ مِنَ الْمِحْرَابِ فَأَوْحَى إِلَيْهِمْ أَن سَبِّحُوا بُكْرَةً وَعَشِيًّا"
فأوحى إليهم يعني أشار إليهم من غير كلام..

☆وده يعلمنا إننا نبلغ دين ربنا مهما كانت قدراتنا محدودة أو فيها عجز،
ندعو بالمتاح، وربنا بيحاسب على الوسع والطاقة..
النبي ﷺ قال: "بلغوا عني ولو آية"..
مجرد آية تنشرها عندك في الفيس أو الواتس أو تعلقها في الأسانسير أو على باب بيتك كل اللي يزوركم يقرأها،
أو على بطاقة وتوزعها على المحلات حد يشوفها فيتذكر ربنا ويتوب أو تأثر فيه فتزود إيمانه في لحظة يأس وحزن، ويبقى ده في ميزان حسناتك تندهش منه يوم القيامة من حيث لم تحتسب..
زي ما الإمام الشافعي قال: سيروا إلى الله عُرجا ومكاسير..
يعني مش لازم تكون عالم عشان تقول لأخوك أو صاحبك: عارف؟ ..من قال سبحان الله وبحمده ربنا بيغرس له نخلة في الجنة..
مش لازم تكوني فقيهة عشان تقولي لأصحابك ولا أهلك: عارفين..؟ من قال أستغفر الله العظيم الذي لا إله إلا هو الحي القيوم وأتوب إيه ثلاثة مرات ربنا يغفر له ذنوبه كلها👌 وهكذا... ما تتحججش بالعجز والفقر والضعف والمرض، اشتغل بالموجود، وربنا كريم، يضاعف لمن يشاء،
الدعوة إلى الله مش مجرد حلال وحرام ونقول الدليل..
رسول الله ﷺ قعد ١٣ سنة في مكة بيدعوا الناس لعبادة الله ويرغبهم في الجنة ويخوفهم من النار ويرغبهم في الأخلاق الحميدة،
معندكش علم بأصول الفقه ..بس على الأقل تقدر تقول للناس إن من قرأ آية الكرسي بعد كل صلاة مش هيمنعه من دخول الجنة إلا الموت...
ادخل على جوجل وابحث عن الأعمال البسيطة 《الصحيحة》 إللي ثوابها كبير وانشرها بين الناس..ويبقى انت كده دعيت إلى الله ...ودي أشرف شغلانة ممكن الإنسان يشتغلها 👌
وخليك فاكر إن أي حد هيعمل باللي انت قلته ونشرته فهو في ميزان حسناتك..تبقى في القبر وعداد حسناتك شغال...فمحدش يفوت الفرصة 😊

حملت زوجة زكريا عليه السلام بالنبي يحيى.. وبعد ثلاثة أشهر من حملها حصل حادث هو الأول والوحيد من نوعه على الأرض، هيعمل قلق وضجة شديدة جدا بين الناس 🙊
إيه إللي هيحصل؟

ده إللي هنعرفه الجزء الجاي إن شاء الله 😁

☆ملحوظة:
حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy

#قصص_الأنبياء
#الحلقة_الثالثة_والخمسون
#مريم_زكريا_الجزء_الثالث
#مريم_الجزء_الأول

اتكلمنا المرة إللي فاتت عن زكريا عليه السلام وإنه دعا ربنا إنه يرزقه الذرية الصالحة لما شاف إنه بيرزق مريم بنت عمران فاكهة الصيف في الشتاء وفاكهة الشتاء في الصيف،
وكان ده كرامة من ربنا لمريم بسبب كثرة عبادتها وزهدها وتعلقها بالله،
كانت مريم مختلفة عن البنات إللي في سنها، يعني كان جسمها بيكبر وبيقرب من البلوغ أسرع من البنات العادية،
وكان من عادة بني إسرائيل إنهم يحجّون لبيت المقدس،
يعني بيطلعوا في قافلة من مدن القدس ويتوجهوا من هناك لبيت المقدس لأن بيت المقدس كان قبلتهم،
زي ما المسلمين بيتوجهوا للحج في مكة👌
في يوم من الأيام لما كان عمرها حوالي خمسة عشر سنة
خرجت في قافلة مع أهلها لبيت المقدس وهي كانت من مدينة النّاصرة،
في الطريق..سابت أهلها وتأخرت عن القافلة لسبب معين،
"إِذِ انتَبَذَتْ مِنْ أَهْلِهَا مَكَانًا شَرْقِيًّا"
إيه السبب منعرفش بالضبط..ممكن يكون أصابها الحيض،
أو إنها كانت عايزة تطهر من الحيض...أو غيرها من أقوال العلماء،
المهم إن حصل حاجة خلتها تتأخر عن الناس إللي معاها وراحت وراء جبل قريب كده بس بعيد عن عنيهم،
"فَاتَّخَذَتْ مِن دُونِهِمْ حِجَابًا "
فهي كانت عايزة تكون لوحدها..وفجأة لقت قصادها رجل..فاتخضت وخافت 🙊
"فَأَرْسَلْنَا إِلَيْهَا رُوحَنَا فَتَمَثَّلَ لَهَا بَشَرًا سَوِيًّا"
فكرت إن الرجل ده عايز يراودها عن نفسها أو عاوز يؤذيها
ويعمل فيها حاجة يعني،
فقالت له : أعوذ بالرحمن منك لو كنت من المتقين😰
لأن التّقي هو إللي بيخاف ربنا وخوفه من ربنا بيمنعه إنه يعمل أي شيء محرم👌
"قالَتْ إِنِّي أَعُوذُ بِالرَّحْمَن مِنكَ إِن كُنتَ تَقِيًّا"
فالرجل قالها: متخافيش الموضوع مش زي مانتي فاكرة أنا رسول من عند ربك عشان أوهبك غلام..طفل طيب وطاهر، هتكوني انتِ أمه.
"قَالَ إِنَّمَا أَنَا رَسُولُ رَبِّكِ لِأَهَبَ لَكِ غُلامًا زَكِيًّا"

☆قبل ما نكمل هنقف كم وقفة كده مع آيات القرآن نتدبرها 😊
♡ربنا بيقول 《وأرسلنا إليها روحنا》
الروح هنا المقصود به جبريل عليه السلام ..طيب ليه ربنا سمّى جبريل عليه السلام بالروح🤔
احنا كبشر بنتكون من حاجتين هما جسد وروح صح؟
إيه إللي بيحرك الجسد😁
الروح هي إللي بتحرك الجسد..يعني الروح هي السبب في حياة الجسد👌
جبريل عليه السلام هو المَلك المسؤول عن توصيل الوحي،
والوحي ده سبب في حياة القلوب...فالإنسان بيكون حي بحاجتين: حياة جسدية وحياة قلبية👌
الحياة الجسدية كوووول الناس بتشترك فيها حتى الحيوانات بتشترك في الحياة الجسدية دي،
لكن الحياة القلبية دي خاصة بعباد الله المتقين....
"أَوَمَن كَانَ مَيْتًا فَأَحْيَيْنَاهُ" يعني كان كافرا فهديناه👌

يعني باختصار كده الروح تحيا بها الأجساد وجبريل عليه السلام يحيا بسببه القلوب عن طريق الوحي..عشان كده اسمه الروح😊

♡ نشوف الآية الثانية :
ربنا بيقول عن مريم لما راحت في مكان لوحدها لقت قصادها رجل《بشرا سويا》..ليه ربنا قال بشرًا سويا 😁
عشان يوصّل لنا إن إللي مريم شافته كان من البشر ومكنش من الجن..ده أولاً
ثانيا : البشر إللي هي شافته ده هو في أصله مَلك من الملائكة إللي هو جبريل عليه السلام،
والبشر ميقدروش يشوفوا الملائكة على أصلهم لازم يتمثلوا في صورة بشر عشان نقدر نشوفهم،
فلو كان الرجل إللي هي شافته ده طويل جدا مثلا أو قصير جدا أو في خِلقته أو في شكله أي حاجة مختلفة عن البشر العاديين كان الطبيعي إنها تخاف ويبان إن ده إللي مخوّفها💁‍♂️
لكن القرآن بيقول لنا إن ده مكنش سبب خوفها،
يعني هي مخفتش لمجرد إنها شافت بشر لإن البشر إللي شافته كان بشر سويّ الخِلقة مفيهوش علامة غريبة تستدعي الخوف في حد ذاته.. لأ.. ده بشر طبيعي زي أي بشر،
لكن هي خافت على نفسها من الرجل ده إنه يعتدى عليها 👌

♡الآية الثالثة😊
لما قالت مريم《إني أعوذ بالرحمن منك》 ليه قالت الرحمن؟ مع إن المفروض هنا كانت تقول الجبار أو ذو الانتقام والبطش عشان تخوفه مثلا ، ولإن هي عايزة تدفع عن نفسها الضرر فطبيعي تستغيث بالقوي المتين الجبار 🤷‍♂️
زي كده لو حد اعتدى على حقي، هقول له:
"موعدنا عند الرحمن"؟ ولّا هقول له موعدنا عند الجبار ؟ 👌
فمريم عليها السلام قالت الرحمن بالذات ومقلتش اسم تاني من أسماء الله الحسنى إللي فيها معنى الاستجارة بذي القوة والجبروت والبطش؛ لإنها كانت بتحاول تذكّر الراجل ده برحمة ربنا قبل عذابه👌
بتذكّره بالرجاء قبل الخوف من باب الرفق بالناس ودعوتهم للخير قبل ترهيبهم بالضر والعقوبة..

◇وده يعلمنا إن في الدعوة إلى الله قبل ماننهى عن المنكر نأمر الناس بالمعروف حتى ربنا بيقول لنا إيه:
"كُنتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنكَرِ "
فربنا قدم الأمر بالمعروف قبل النهي عن المنكر👌
فدايما في الدعوة إلى الله نقدم الأمر بالمعروف وبعدها على طول في نفس اللحظة ننهى ع

ن المنكر.. مش نلغيه أو نأجله خالص، لأ..
هو مجرد ترتيب أسبقية قدر المستطاع وحسب الموقف طبعا،
يعني بنقدم لهم البديل الصحيح👌

ومريم رضي الله عنها مكنتش تعرف هل الرجل ده تقي ولّا لأ فعشان كده حطت له شرط من باب التشجيع والتحفيز له..وهو :
《 إن كنت تقيا》يعني لو انت من إللي بيخافوا ربنا فإنت مش هتؤذيني،
زي مثلا لما نقول لحد لو انت بتحب ربنا اعمل كذا..فنلاقي الشخص اتحمس: أيوة أنا بحب ربنا ويبدأ يعمل،
وزي ما ربنا بيقول لنا :
" وَأَطِيعُوا اللَّهَ وَرَسُولَهُ إِن كُنتُم مُّؤْمِنِينَ"
فتلاقينا بنتحمس لطاعة ربنا ورسوله عشان نكون مؤمنين👌

◇في الغالب لو اتكلمنا مع الناس بالمعروف والترغيب الأول الناس هتستجيب👌
وزي ما قلنا من شوية ربنا بيقول لنا:
"كُنتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنكَرِ "
فربنا قدم الأمر بالمعروف قبل النهي عن المنكر💁‍♂️
فمريم عليها السلام ذكّرت الرجل ده برحمة ربنا إنه لو كان ناوي على شر فربنا رحيم هيقبله لو هو معملش المعصية ورجع عن إللي في دماغه،
مش ساعات كده بييجي في بالنا حاجات غلط عايزين نعملها والشيطان بيقعد يشجعنا ويقولنا خلاص اعمل الغلط ده ماهو ربنا عالم بنيتك السودة دي أصلا ومُطلع على سريرتك السيئة، فهتروح تصلي إزاي دلوقتي وانت كنت ناوي على كذا وبتفكر في كذا وكذا😕
فيقعد ييئسنا من رحمة ربنا عشان نرتكب الغلط ونستمر عليه ونعمل غلط تاني أكبر منه وهكذا..
فالإنسان في اللحظة دي بيبقى محتاج حد يذكّره برحمة ربنا .. انت معملتش حاجة لسه.. ارجع .. ربنا رحيم.. حتى لو كنت عملت.. ربك بيقبل التوبة👌 وهكذا..

فمريم عليها السلام ذكّرت الرجل ده برحمة ربنا إنه لو كان ناوي على شر فربنا رحيم هيقبله لو هو معملش المعصية ورجع عن إللي في دماغه وكمان هي كان في حالة استضعاف فممكن لو أخدت موقف شديد تستفز الرجل ويعتدي عليها😬

نرجع بقى لكلام جبريل عليه السلام وإنه قال لها إنه رسول من عند ربنا،
الأول بشرها إن ربنا اصطفاها وطهرها على كل نساء الدنيا..
"إِذْ قَالَتِ الْمَلائِكَةُ يَا مَرْيَمُ إِنَّ اللَّهَ اصْطَفَاكِ وَطَهَّرَكِ وَاصْطَفَاكِ عَلَى نِسَاء الْعَالَمِينَ"
وبعدين قال لها إن ربنا بيبشرك إنه هيوهبك غلام..لكن الغلام ده مختلف ..هو كلمة ربنا ..يعني هيخلقه في رحمك بكلمة كن فيكون..
"إذْ قَالَتِ الْمَلائِكَةُ يَا مَرْيَمُ إِنَّ اللَّهَ يُبَشِّرُكِ بِكَلِمَةٍ مِّنْهُ اسْمُهُ الْمَسِيحُ عِيسَى ابْنُ مَرْيَمَ وَجِيهًا فِي الدُّنْيَا وَالآخِرَةِ وَمِنَ الْمُقَرَّبِينَ"
وهيكون مشهور في الدنيا وهيتعرف اسمه بين المؤمنين بالمسيح عيسى بن مريم..وله وَجاهة وله مكانة عند ربنا...
هيكلم الناس ويدعوهم لعبادة الله وهو لسه مولود في المهد وكمان لما يكبر ..وهيكون من الصالحين المقربين عند ربنا👌
"وَيُكَلِّمُ النَّاسَ فِي الْمَهْدِ وَكَهْلاً وَمِنَ الصَّالِحِينَ"

☆قبل ما نشوف رد فعل مريم عليها السلام عايزين نرجع كده شوية للوراء في الزمن، ونشوف أصل مريم كان إيه😊
أصل مريم كان نية صالحة 👌
فاكرين لما أمها حنّة تمنّت إن يكون عندها ولد عشان يخدم الدين ويكون عابد لله، وربنا رزقها ببنت وكأنها زعلت إنها مش هتعرف تحقق إللي كان نفسها فيه...ومع ذلك هي استغلت المتاح إللي ربنا أعطاه لها👌
السؤال بقى😁
هل أم مريم كانت تتصور يوم ما وضعت البنت إن البنت دي هتكون أفضل نساء العالمين؟
هل تصورت ولا جه على بالها إن مريم دي هتخلف نبي من أولي العزم من الرسل بمعجزة إلهية محصلتش ومش هتحصل إلى يوم القيامة؟
هل تصورت حنة إن النبي ده هينسب لبنتها مريم إللي هي من آل عمران؟

♡وده يعلمنا إننا منستعجلش ومنزعلش لما حاجة عكس إللي احنا عايزينها تحصل 😊
ويعلمنا إن نية الإنسان ممكن في وقت من الأوقات تكون أفضل من عمله👌

نرجع بقى لمريم إللي كانت بتسمع كلام جبريل عليه السلام وهي متفاجئة... بشارة ورا التانية..وقبل كل ده ..إزاي هيكون لها طفل أصلا وهي مش متزوجة ومش ناوية تتزوج ولم تفعل الفاحشة😳
"قَالَتْ أَنَّى يَكُونُ لِي غُلامٌ وَلَمْ يَمْسَسْنِي بَشَرٌ وَلَمْ أَكُ بَغِيًّا"
فلما قالت للمَلك الكلام ده قال لها:
هو أمر ربنا خلاص قضاه..هتحملي بطفل بدون رجل عشان يكون آية ومعجزة للناس على قدرة ربنا الخالق👌
زي ما خلق آدم من غير لا أب ولا أم، وخلق حواء من ضلعه، قاردر يخلق طفل من أم فقط بدون أب💁‍♂️
"قَالَ كَذَلِكِ قَالَ رَبُّكِ هُوَ عَلَيَّ هَيِّنٌ وَلِنَجْعَلَهُ آيَةً لِلنَّاسِ وَرَحْمَةً مِّنَّا وَكَانَ أَمْرًا مَّقْضِيًّا"

☆في هنا فايدة لنا...وهي إن مريم مقالتش للرجل إللي هو جبريل عليه السلام إنت كذاب ..هو في امرأة تحمل بدون رجل..وابعد عني و..و..
لأن العاقل لا يُكذّب إللي بيقول له كلام لحد ما يكمل معاه ويستفهم ويشوف الدليل على الكلام وهل هو صادق ولّا لأ..
مش مجرد ما أقولك ده حصل كذا وكذا تقوليلي كذابة 😒
فلازم نفهم الأول ومنحكمش على ح

اجة بصدق ولا كذب إلا لما نتأكد ونفهم 👌

◇نرجع لتدبر القرآن😊
لما قالت 《لم يمسسني بشر》 ليه مقالتش لم يمسسني أحد😈
المس هنا المقصود به هو الجماع فلو إنها قالت لم يمسسني أحد يبقى كده الجان هيدخلوا في الآية، ومفيش زواج ولا علاقة زوجية بين البشر والجان يكون نتيجته حمل👌
فهي قالت بكل دقة إن لم يمسها أي بشر 💁‍♂️

¤معلومة عالسريع😁
يَحرم الزواج بين الجن والإنس على افتراض إن ده ممكن يعني😅
لأن ربنا قال لنا : "وَاللَّهُ جَعَلَ لَكُم مِّنْ أَنفُسِكُمْ"
وقال: " وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا"
ثم متخيلين كل واحدة ممكن تحمل حمل حرام تيجي تقول ده أنا حملت من الجني فلان🤓

بعد ما أخبر جبريل عليه السلام مريم إن حملها أمر من ربنا مفهوش رجعة، نفخ فيها الروح وحملت مريم بعيسى عليه السلام👌

◇يعني إيه بقى الكلام ده 😁
النفخ معناه إني أطلع هواء من فمي .. النفخ المعروف يعني لما تنفخ في أي حاجة ..ده أصل النفخ،
فربنا أمر جبريل عليه السلام إنه ينفخ في جيب الدرع إللي كانت مريم بتلبسه، وهو رقبة الثوب ومدخل الرأس،
عارفين لما نيجي نلبس جلابية أو عباية؟ ..بندخل راسنا منين 😅
أهي هي الفتحة دي.. حاجة زي كده 😁
فجبريل عليه السلام نفخ في المكان ده والنفخة دخلت في رحم مريم عليها السلام بأمر ربنا،
وعيسى عليه السلام هو الوحيد إللي جبريل عليه السلام نفخ فيه الروح، أما باقي البشر ففي ملك معين مسؤول عن نفخ الروح فيهم بعد تكوينهم في الرحم،
فنفخ الروح كان بداية خلق عيسى عليه السلام في رحم أمه مريم وبعدين كمل مراحل نمو الجنين العادية👌
حملت مريم عليها السلام بعيسى على أرجح الأقوال تسعة أشهر زي باقي النساء، ويقال إنهم ثمانية أشهر..

¤سؤال ..ربنا قال إن عيسى روح الله
" فَنَفَخْنَا فِيهِ مِن رُّوحِنَا "
هل ده معناه إن عيسى جزء من ربنا😳

طبعا لأ...الإضافة هنا إضافة تشريف وتكريم..فاكرين في قصة صالح عليه السلام لما ربنا خلق الناقة وصالح عليه السلام قال لقومه: هذه ناقة الله..وكمان الكعبة بنسميها بيت الله..كل الحاجات دي منسوبة إلى الله تعظيما وتشريف مش أكثر👌
يعني مش زي ما نقول علم الله وقدرة الله وسمع الله وبصره..دي صفات متصلة بربنا..بعكس الروح إللي بنضيفها لله عشان نبين مكانتها زي ما قلنا💁‍♂️

حملت مريم بعيسى عليه السلام وسلمت أمرها لله👌
أنا عايزاكم تتخيلوا مشاعر مريم عليها السلام🙊
شوفوا لو وصل لنا إن حد بيتكلم علينا مجرد كلام عادي وبيجيب في سيرتنا بنكون متضايقين إزاي😑
دي واحدة حامل من غير زوج وهي أصلا منقطعة للعبادة يعني مكنتشي ناوية زواج من أصله،
وهي مش شخصية عادية إطلاقا 😶
دي واحدة مشهورة بين الناس يعني العين عليها والناس مركزة معاها بزيادة،
وكمان أبوها كان كبير العلماء عندهم، هيقولوا عليها كانت بتمثل الطهر والعفاف وكذا وكذا،
تخيلوا إن كل ده بيدور في رأس بنت صغيرة لسه يادوب خمسة عشرة سنة😳
بطنها بدأت تكبر والناس بقت تبص لها نظرات ريبة🤨
فانعزلت عن الناس خالص عشان محدش يعايرها بالحمل بدون زوج، وراحت في وادي بيت لحم،
وفضلت هناك لحد ما جاء وقت ولادة عيسى عليه السلام😊
قبل ولادة عيسى بثلاثة شهور ويقال ستة أشهر اتولد مييين😁
ده إللي هنعرفه الجزء الجاي إن شاء الله 👌

☆ملحوظة:
حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy