تهيئو للصلاه يرحمكم الله. اللهم صل على محمد وال محمد

الامام موسى بن جعفر عليه السلام

بجروح السجن
ودموع الحزن
يبچي لعمّته الراحت سبيه
٠٠٠٠٠٠
بسجن موسى بن جعفر غابت علومه
ومن گيد السلاسل تنزف دمومه
رغم هاي الجروح وروحه مالومه
ينوح على المشت للشام مهضومه
بگيد السلسله
يذكر كربله
وينصب مأتم بسجن المنيه
٠٠٠٠٠
بسجن طاموره ظلمه وتخنك بروحه
موسى الكاظم ودم تنزف جروحه
لچن مو للجراله ونّته ونوحه
على الراحت سبي دمعاته مسفوحه
يذكر عمّته
وسالت دمعته
مچتوفه بحبل بين آل اميه
٠٠٠٠٠٠٠٠٠٠
بسجن هارون موسى الكاظم اتعذّب
ساجد وبسجوده الظالم اتعجّب
بظلام الليل يبچي الكاظم وينحب
على المسبية عمته الطاهره زينب
كلما ينجرح
يتذكّر رمح
شايل راس ابن حامي الحميه
٠٠٠٠٠٠٠٠٠
خافوا من علومه ونهجه وفكاره
ظنّوا بالسجن يطفون انواره
لأن يدرون الله الخالق اختاره
خليفة طه جده بعلمه وسراره
بعلمه وحكمته
فارض هيبته
كلها تهابه شيج الجعفريه
٠٠٠٠٠٠٠
عكب كلّ الجراله الظالم يسمّه
مات الكاظم ومحّد حضر يمّه
بنعش مسموم شالوا للجسر جسمه
بلا تشييع منعو شيعته تلزمه
مجروح شكثُر
من سم الغدُر
گطّع چبدته سمّ المنيه
٠٠٠٠٠٠٠
فزعت شيعته من سمعت اخباره
صارت كل أهل بغداد انصاره
بين اليبچي بين يطالب بثاره
شالوا نعش موسى الكاظم لداره
نصبو مأتَمَه
عَزّو فاطمه
راحوا للرضا بأمر الوصيه

سيد زيد الفحام
~~~~~

.
.
.
.
السلام على حليف السجون.
.


استشهاد الكاظم ع
.....
المستهل
.
الك نشكي الالم يالكاظم نخبرك
نحتاج الصبرنا انطينه من صبرك
بوضعنه أتشوف .. رفعنه چفوف
...1

يگظاي الحوايج منك انريد ... مطلب لاترده
كثره أمن المآسي وجايه أتزيد ... وحده بعد وحده
انته بالصبر فصمته للقيد ... واحنه القيد بعده
ونشوف الفرج شو صاير أبعيد ... ماتخلص المده
يردون الفرج يالكاظم أحبابك
كلها أتلوذ يمك سيدي ابابك
بظريحه انطوف ...رفعنه أ چفوف
.........2
يالصابر صبر من عندك ألنه ... وعيونك علينه
غيرك ماطلبنه الحاجه منه ... ونسولف البينه
يالگلبك علينه بي محّنه ... يمك لو أجينه
نشتم بضريحك عطر جنه ... وتنطينه بدينه
طبيب انته اليجيك ايحصل الوصفه
تردله العافيه بذن الله من يشفه
ابكرم معروف ... رفعنه چفوف
........3
يباب الكرم مايحصل بديله ... عالباري اعتماده
يمن ألله جعل بيك الوسيله ... يرحمهم عباده
عطاياك بأذن ألله جزيله ... تكرمهم زياده
تنطيه للمحب لا مو قليله .... وتسرله فؤاده
تجيك أفواج كلها بعازتك هالناس
يباب أمراد انته وعمك العباس
يبوا المعروف ... رفعنه چفوف
........4
أذا جار الزمان أعلينه ويدور ... ملجانه بعتبتك
هم نطلب الحاجه من نجي انزور ... ندعي تحت گبتك
ونشاهد الناس أتوفي اللنذور .... ياالبخت الله بختك
من نور السماء بمرقدك نور ... تنظرنه برأفتك
نلمس رحمة الله من نجي انزورك
وكل أواجعنه تنزال من نورك
دوه الملهوف ... رفعنه چفوف
........5
جهادك بالسجن كل طاغي ذليت ... يانور الامامه
عابد بالعباده ادروسك انطيت .... للدين ونظامه
على روس الطغات بحلمك امشيت .... ردتنه السلامه
راكع ساجد الكل عمرك اگظيت ... وأحملت الظلامه
الباري ايكّرمك خلاك باب أمراد
متفشله اليجيك بحاجته گصاد
تبعد الخوف ... رفعنه چفوف
.....6
بني العباس منك وشيريدون .... خافوا عالكراسي
جواري بالقصور الهم يخدمون ... يحيون الأماسي
نهج الله وقوانينه يضيعون .... كل ظالم سياسي
خالد من تظل همه ميدرون .... من عملوا مآىسي
ونته الناس يمك تعنتني افواج
بشباچك يلوذ وينحني كل تاج
للجرح رووف ... رفعنه چفوف
....
سيد عدنان الحمامي

#قصيدة_للامام_الكاظم_عليه_السلام

كأني بالامام الكاظم عليه السلام


ذِكَر عمته     و دمعت اعيونه الحنين
و لخدرها.    سوّه مجلس عالحسين
حافظ ابگلبه القصـيدة
يلطـم و  سلــسلة بيده
عالحسين عالحسين
ــــــــــــــــــــــــــــــــــــــــ ــــــــ
ينحب إمــــــام الرافـــــضة.   ابطامورة وَحدَه
و لكربــــــلة دگ و لِطَــــــم     بچفـــوفه خـده   
مجلس عـــــــزه بالمُعتــَـقل.   هالليــــلة عنـده
مهضومة روحه او بالخيم     محـروگة چبده

چف يمنته مـــــن ينظره
يـــذكر  حبيبه و خنصره
مـــن دمه نَضْفو محبسه
و انعـرض للبـــيع و شَرَه

الشذرة طاحت.   فوگ اصبعه العاف اديه
الها شـــــــــالوا    و الصِبِع سحـــگوا عليه  
لوعة الخنصر شديدة
يلطم و سلـسلة بيده
عالحسين عالحسين
ــــــــــــــــــــــــــــــــــــــــــــــــ
گيــــد ابرگبته و فرفحت   روحه الحزينة
مو جاره لا سابـــع سجن    يســمع ونيــنه
جدَّه بطَرَف ســن  الرمح    ماكوله عيــنه
وجهه حــلو بـس الحجر.    خَرَّب جبـــينه

شمس الله حارگته الشمِس
عطشان بـــس شابــع رفِس
طفهم چبـــيرة و جثـــــــته
ترستــــها يالـــــــوادم تَرِس

ضلع واصـــل.   منّه يم نـوگ السبي
و ضلع زاحف   صـوب تــل الزينبي
و ضلع شابك چف عضيده
يلـــــــطم و سلــسله بيده
عالحسين   عالحسين
ــــــــــــــــــــــــــــــــــــــــــــــــ
مــن والده الكـــاظم خَـــبَر   من زغره سامــــع
چبد ابو اليمة اويه السهم  .  ثلثيـنه طــــــــالع
الحــافر غِده فــوگ الصـدر.  رايــــــــح و راجع
و الشيب مــو بس اختضب.  لا شيــــــبه واگع

مجــهولة صـــارت جِثته
زرگة اعله حمــرة جبهته
مو هوه شـــو چنه صبح
شلون اخته زينب عرفته

شباقي منه .  شخلت الحافر عليه
بس گلبها.      زينـــب الـــدّلاها بيه
دم طفل باقي اعله جِيده
يلطم و سلــــــسلة بايده
عالحسين  عالحسين
ــــــــــــــــــــــــــــــــــــــــــــــــ
راهب بني هاشــــم سِجَد.  سجدة طويلة
و من رفع راسه رد لـِــطَم.   لجل العــقيلة
من دم متن عمته انصبغ.   ظـــهر الهـزيلة
و همزين ظــــلت باليسر.   فــوگاها شيلة

كلشي انسلب منها غصب
ابحـــــــجة غنيمة للحرب
باگوا غــــــراض ام الخدر
و اتقاسمـــــــوهن بالدرب 

بس عباية.   عافوا اعليها صدگ
ما خذوها.    لان مآخِذها الحرگ
چا خذوها لـو جديدة
يلطم و سلسلة بايده
عالحسين.  عالحسين
ــــــــــــــــــــــــــــــــــــــــــــــــ
من سوطهم آ يالقــــــهر    دم يصــب كــله
و امن الحديد امرضرضه  و مكسورة رجله
كل ذَنّي بي مــــــــا أثّرَن . و جروحه سهـلة
بـــــس الخــرابة الأذِّتــه    و رَبَتّله عِــــــلَّه

عمَّاته ركبــــــــن عالهزل
هذا الصدگ ما ينـــحمل
بيا سلسلة يحـــس بالألم 
و زينب اكل چفها الحبل

ياهوه يرضه.   عمته بالشارع تبات
يسب ابوها.   شكو واحد منها فات
شحالها و ظلت وحيدة
يلطم و  سلــسلة بايده
عالحسين عالحسين
ــــــــــــــــــــــــــــــــــــــــــــــــ
ظل ينحب و لا مـــــا سكت  و تصب دمعته
و نــــاح لرقية مــــــــن ذِكَر    معصـومة بنته
فَزّن  حيــــاطين الســــجن    من گد شهگته
منـــها التــراچي امســــلبه     يدريـها عمـته

برجليها ظـل شوك و جمر
شـما بابا صــرخت تنسطر
زغيرة بعدها اعله الهـضم
مو مال شــــــام و لا يسر

كل جسمها.    چَوّته نــار الخيـــــــم
و الخـــرابة.    هواية نزفت بيها دم
بالطشت طاحت شهيدة
يلــطم و سلـــسلة بيـده
عالحسين عالحسين
ــــــــــــــــــــــــــــــــــــــــــــــــ
الحمدلله
#علي_حسين_الكناني

عله الغــــــــــريــــــــــب واويلاه
ــــــــــــــــــــــــــــــــــــــــــــــــــــــــــــ 

  هـــــذا المــــــــــصاب يشيب الراس
  مطــــــــــروحه ليش اجنازت الياس
  فوك الجسر خـــــــن صيح بحساس
  هــــــــذا الغريب منـــــــــين ياناس

  خلــــــــــونه  بالــــــدمعات ننعاه
  عله الغــــــــــريــــــــــب واويلاه

ــــــــــــــــــــــــــــــــــــــــــــــــــــــــــــ

  خلــــــــــونه نبـــــجي ونعمي العيون
  للكــــــضه عــــــــــمره بسجن هارون
  حــــــي بني هاشم خــــــل يحضرون
  نعـــــــــش الغــــــريب ابعازت امتون

    خــــــــــن شيعه بالحسرات ولاه
    عله الغــــــــــريــــــــــب واويلاه

ــــــــــــــــــــــــــــــــــــــــــــــــــــــــــــ

  كلب الزجيه انفــــــــجع هــــــل يوم
موسى ابــــن جعفر مـــــــات مسموم
جـــــــــرح الضــــــــلع بفراكه ملجوم
  مهــــــــضوم كلب الزهرة مهـــــضوم

   ومصابه مــــــــــاضن يوم تنساه
   عله الغــــــــــريــــــــــب واويلاه

ــــــــــــــــــــــــــــــــــــــــــــــــــــــــــــ
شــــــــــدو الحــــــــــزم هاي المسيه
وبالــــــــــدمع خـــــــــل ننصب عزيه
خــــــــلــــــــونه  ننــــــــعه ويالزجيه
ونحـــــــــيي  اليالي الكاضــــــــــميه

  جا كــــــــــون ميتين احنه وياه
عله الغــــــــــريــــــــــب واويلاه

ــــــــــــــــــــــــــــــــــــــــــــــــــــــــــــ
 
خــــــل نمشي كربه بكـــــــلب مفجوع
وفـــــــــوك الجنازه انـــــــرش الدموع
ونلــــــــــطم لحد منــــــــكسر الضلوع
  ونحــــــــترك يمه شلون الشــــــــموع

  بكل  شــــــــده اسمه ويانه نلكاه
  عله الغــــــــــريــــــــــب واويلاه

ــــــــــــــــــــــــــــــــــــــــــــــــــــــــــــ

  كاظم الغــــــــيض واســـــمه معروف
  حــــــــــاشه خليه يــــــــــرد الجفوف
  تــــــــــرابه دوه للـــــــعله مــــوصوف
  الكـــــــلبه انجــــــــوه بنيران الطفوف

وسبي الحــــــرايــــــر حيل اذاه
عله الغــــــــــريــــــــــب واويلاه

ــــــــــــــــــــــــــــــــــــــــــــــــــــــــــــ

حسين عبد الزهرة الدراجي

گلبي مُغرَم بالعِشگ والساني لاهِج
عندي حاجه وكلَّفِت باب الحوائج

روحي ببن الصادق...اتعلِّقت وادريهه
ابهالتعلِّق تربح...أوَّل وتاليهه
أعتني يم بابه...وحاجتي أحچيهه
وادري موسى الكاظم...حاجتي يگضيهه
للشدايد والعِلَل هو المُعَالِچ
عندي حاجه وكلَّفت باب الحوائج

أنسه كل اهمومي...لو وصلت اعتَابه
يالثگيله اجروحك...إجري دمعه ابَّابه
رغم كل آلآمه...ورغم ذاك امصابه
من عطائه الكاظم...حاشه ينسه احبابه
ماشفت مثله أبد للشِّدَّه فارِج
عندي حاجه وكلَّفت باب الحوائج

هذا امامي السابع...وافتخر واليته
جيت اواسي الزهره...ابدَمعِتِي اتعنيته
أدري يسمع صوتي...آنه من حاچيته
گتله اليعاديكم...والله ماحبِّيته
رافضي وأبقه افتخر باسمه وأحاجِج
عندي حاجه وكلَّفت باب الحوائج

سيدي اتعنيتك...واعرف اتحيِّيني
أنحب اعله امصابك...واجري دمعة عيني
كل وكت ويَّاكم...عالعهد تدريني
نظره مِنَّك رايد...خادِمَك خليني
خَلِّي گلبي ابكل وكت للخدمه عارِج
عندي حاجه وكلَّفت باب الحوائج

يالمُضيفك عامر...مايسد بيبانه
ويبقى إسم الكاظم...راهب السَّجَّانه
ياحليف السجده...أمِّن الدعوانه
للأمام المهدي...ندعي يامولانه
والضهور المهدوي ايذل الخوارج
عندي حاجه وكلَّفت باب الحوائج

سيد علي الموسوي

من حدر الطوامير  ٠٠  الكاظم كتب تحذير
                أليريد النهايات   السعيده                          
                خل يموت وتعيش العقيده
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
بدينه اقيود بس  مالزمت ايده
سجين الكاظم  وسوه   اليريده
الكلمه  اتقاتل    وتوكع  شهيده
وكل  ماتندفن      تطلع  جديده
٠٠٠٠٠٠٠
       عاشت ذيج الجفوف ٠٠ العبرت حاجز الخوف
                   ألبعين الضلم يصرخ نشيده
                   خل يموت  وتعيش العقيده
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
العبره   بكل    قضيه   بالنهايه
وابن جعفر عرف اصل الحكايه
درسها الخطه   من أربع  زوايه
وبكل     زاويه  ثبتله       ثايه
٠٠٠٠٠٠٠٠٠
     يدري الساق مرضوض ٠٠  وصاح الضلم مرفوض
                     والماتوصل  اخباره وبعيده
                      خل يموت وتعيش العقيده
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
شوكه بعينهم    صار  وعماهم
امام الرافضه    يعرف  دواهم
حرسهم لو سمع موسى اجاهم
القصور الطاغيه يوصل بجاهم
٠٠٠٠٠٠٠٠٠٠٠٠
       ماينهزم  منصور   ٠٠٠  مايطفه يضل نور
                 توكع عروشهم ثورة وريده
                 خل يموت وتعيش  العقيده
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
  اجتمع حشد الضلم يدرس الحاله
  شلون من  السجن   طلعت رساله
  انفصل عن شيعته  وكلمن مشاله
  وبعدنه  ماخلصنه     من   نضاله
   ٠٠٠٠٠٠٠٠٠٠٠٠٠٠٠٠
          شطلع هاي الاخبار ٠  والجمعه الوعد صار
                     يريد الشيعه والشيعه تريده
                     خل يموت  وتعيش العقيده
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
مات ألا  رشيد  وموسى مامات
ودويلات  الضلم صارت خرفات
العلي امربيه  منه الذله  هيهات
نزل   روسهم      وارتفع  رايات
٠٠٠٠٠٠٠٠٠٠٠٠٠٠٠٠
       لسه ايوزع امراد  ٠٠٠  عايش أسد بغداد
                  قبابه كل سنه ترجع جديده
                  خل يموت   وتعيش العقيده
٠٠٠٠٠٠٠٠٠٠٠٠٠٠٠٠٠٠٠٠٠٠٠
        عبد الجليل المالكي

باب الكرم والجود
مثلك فـــلا موجود
من صمودك سر خلودك وبقيودك أشـــارة
حتى والي يحجي سكته بيده تنطي البشارة
يا مولاي
...........................................
من وحي عرش القداسه نزلت آيات
جاعلك رب البرية قاضـــي حاجات
أباب صحنك يابو طلبة شكد كرامات
شفنه حتــــى الطير يتنفس صلاوات
باب الكرم بابك نعم يا سابــــع العترة
كل شدة يمها تنكضي وبصاية الزهرة
تنطي بـلايا أحدود
باب الكرم والجود
يا مولاي
.......................................................
يالعشت أيام عمرك حلـــــــــم مذبوح
أمنين ما تندار تلكه القلــــــــم واللوح
صاحب السجدة الطويلة  يا عمر نوح
بين حيطان السجن شكد كاتب أجروح
عايش جنت لكن متت والعاشن أنفاسك
و15 عمر الضلــــــم بس شيبن راسك
يا حجة المعبـــود
باب الكرم والجود
يا مولاي
......................................................
يا ملك عرشك جنت والآية صبـرك
بين وادم رادت السلــــــطه وتنكرك
أنته أنته الكاضم وضل عالـي قدرك
وينه هارون ويشوف شكبره قصرك
مثل الشمس نـوره سطع للباري معراجه
ومكوب خدم صحنك بحر تتلاطم أمواجه
عزة وفخر والزود
باب الكرم والجود
يا مولاي
.......................................................
يا كريم وبالكرم والجــــــود مقياس
هاي زوارك أجت تلطم على الراس
يا حرز كل حاجه أسمك شالته الناس
يا وحي الكــل شدة من شباجه ينباس
بحركه ودمع مثل الشمع هالجينه مشايه
لزيارتك والحضرتك رايه تــــــشد رايه
بالدم كتبنه اعهود
باب الكرم والجود
يا مولاي
.......................................................
يا جرح عاش وكبر مابين اللعيون
شيب شبان وحــــرم كلهم يخدمون
هلا بالزاير هلا أنصـــارك يهتفون
فخر والله خدمتـــــك خادم وممنون
ثورة عشك من تحترك بالخدمة خدامك
نموت وتضل ثورة مجد يا كعبة آلامك
أنصارك أحنه احيود
باب الكـــرم والجود
يا مولاي

..................................................
خادم خدمة الحسين
الشاعر
محمد الموالي

طِلعت اجنازه امنالسجن


بغــداد مـرجـونـه رَجـــن
طِلعت اجنازه امنالسجن



هـالصـوت رَدد بـالفَضـه
وَوِّيلا يـالكـاظـم
عالجسر نعش اُبو الرضا
وَوِّيلا يـالكـاظـم
شيعـوا إمـام الـرافضــه
وَوِّيلا يـالكـاظـم

لبسـوا السواد ابهـالحـزن
طِلعت اجنازه امنالسجن



قصه بـدمـه السم كتبته
وَوِّيلا يـالكـاظـم
بـالسجن موسى بغربتـه
وَوِّيلا يـالكـاظـم
عدوانـه بـالســم سمتــه
وَوِّيلا يـالكـاظـم

إبـآخـر رجـب لــن ينعلـن
طِلعت اجنازه امنالسجن



بالدفـن لـن صوت اعتلـه
وَوِّيلا يـالكـاظـم
رگبـة ابــن عقــد الــولــه
وَوِّيلا يـالكـاظـم
تجـري دمـه امنـالسلسلـه
وَوِّيلا يـالكـاظـم

تُـوجـع يلحظات الـدفـن
طِلعت اجنازه امنالسجن



هالعَــزه قِيمـوا كـل سـنه
وَوِّيلا يـالكـاظـم
هــــارون الله يلعنــــه
وَوِّيلا يـالكـاظـم
سَمَّــم الطيــب معــدنــه
وَوِّيلا يـالكـاظـم

يستحـق هــارون اللعـــن
طِلعت اجنازه امنالسجن



نشرَوا سـواد ابحضـرتـه
وَوِّيلا يـالكـاظـم
مشـايــه نــاسـه اتعنتــه
وَوِّيلا يـالكـاظـم
باللطـم تبچــي و زارتــه
وَوِّيلا يـالكـاظـم

لــزيــارتــه كلــهــا تحـــن
طِلعت اجنازه امنالسجن



كلمـن گصـدلـه ابحـاجتـه
وَوِّيلا يـالكـاظـم
و قـدم طلبتــه بـدمعتــه
وَوِّيلا يـالكـاظـم
إيـرد لهلـه بيــده طلبتــه
وَوِّيلا يـالكـاظـم

و المدمع امجرح الجفـن
طِلعت اجنازه امنالسجن



كريم الحاج فليح
٢٢ ــ ١ ــ ٢٠٢٥

باب الحوائج.     موسى بن جعفر
٠٠٠٠٠٠
وين اصحاب الحوائج خل يجون
اباب موسى يشتكوله وينتخون
هذا بيده الكون والكُن فيكون
كل أمر يصعب على الكاظم يهون

أمّن يزاير.     بس تنخه يحضر
باب الحوائج.     موسى بن جعفر
٠٠٠٠٠٠٠٠٠٠٠٠
موسى بن جعفر عظيم المنزله
اباب صَحنه تنحل اعظم معضله
زور يالمحتاج وتوجّه اله
گبل ما تنخه يگلّك يا هلا

حَل الشدائد.     بس هو يگدر
باب الحوائج.     موسى بن جعفر
٠٠٠٠٠٠٠٠٠٠٠٠
كل مريض مأيّس وضايع دواه
خل يجي للكاظم ويطلب شفاه
يشفه من يشتم عطر گبره وهواه
وما يخيب الّلزم شبّاچه ونخاه

يكرم ضيوفه.    لا ما تعذّر
باب الحوائج.     موسى بن جعفر
٠٠٠٠٠٠
هذا موسى الرافض الذل والخنوع
زور يا زاير ضريحه بكل خشوع
وذكر مصابه وعليه اجري الدموع
باجر بگبرك يحوّلهن شموع

أدّيله حقّه.     من تعرف اكثر
باب الحوائج.     موسى بن جعفر
٠٠٠٠٠٠
موسى نور الله الصراط المستقيم
مثل جده حسين عند الله عظيم
ما يرد محتاج والعنده مقيم
طوف يالزاير ودك باب الكريم

بچفوفه ينطي.    شما تنخه اكثر
باب الحوائج.     موسى بن جعفر
٠٠٠٠٠٠
احنه خدام الامام وشيعته
عالوعد كل عام نحيي زيارته
جتمعت الزوار كلها ابحضرته
جينه هالليله نشيع اجنازته

نشفي بدمعنه.    چبده التوذّر
باب الحوائج.     موسى بن جعفر
٠٠٠٠٠٠
وين هارون وقصوره ودنيته
خل يجي يشوف السجين وگبته
موسى بن جعفر ملائك خدمته
گبره عالي وبالسمه ترف رايته

والينتميله.        رابح ميخسر
باب الحوائج.     موسى بن جعفر

سيد زيد الفحام
~~~~~

سورة الشمس صدقة نيابة عن صاحب الزمان لحفظه و لسلامته أهديها لأمي فاطمة الزهراء (عليها السلام)💙
بِسْمِ اللَّهِ الرَّحْمَنِ الرَّحِيمِ

وَالشَّمْسِ وَضُحَاهَا (1) وَالْقَمَرِ إِذَا تَلَاهَا (2) وَالنَّهَارِ إِذَا جَلَّاهَا (3) وَاللَّيْلِ إِذَا يَغْشَاهَا (4) وَالسَّمَاءِ وَمَا بَنَاهَا (5) وَالْأَرْضِ وَمَا طَحَاهَا (6) وَنَفْسٍ وَمَا سَوَّاهَا (7) فَأَلْهَمَهَا فُجُورَهَا وَتَقْوَاهَا (8) قَدْ أَفْلَحَ مَنْ زَكَّاهَا (9) وَقَدْ خَابَ مَنْ دَسَّاهَا (10) كَذَّبَتْ ثَمُودُ بِطَغْوَاهَا (11) إِذِ انْبَعَثَ أَشْقَاهَا (12) فَقَالَ لَهُمْ رَسُولُ اللَّهِ نَاقَةَ اللَّهِ وَسُقْيَاهَا (13) فَكَذَّبُوهُ فَعَقَرُوهَا فَدَمْدَمَ عَلَيْهِمْ رَبُّهُمْ بِذَنْبِهِمْ فَسَوَّاهَا (14) وَلَا يَخَافُ عُقْبَاهَا (15)


الزيارة المُختصرة لصاحب الأمر 💙

بسم الله الرحمن الرحيم

السلام عليك يا صاحب الزمان السلام عليك يا خليفة الرحمـٰن السلام عليك يا شريك القران السلام عليك يا قاطع البرهان السلام عليك يا امام الانس والجان السلام عليك وعلى ابائك الطيبين واجدادك الطاهرين المعصومين ورحمة الله وبركاته
اللهم صل على محمد وآل محمد وعجل الفرج والعافية والنصر والتمكين والتأييد لهم 🕊

واظبوا على هذه الزيارة فإنها تصنعُ العجائب🌹❤️

الحمدلله الذي عرفني نفسه ولم يتركني اعمى القلب

الحمدلله الذي جعلني من أمة مُحمد صلى الله عليه وآله

الحمدلله الذي جعل رزقي في يديه ولم يجعل رزقي في أيدي الناس

الحمدلله الذي ستر ذنوبي ولم يفضحني بين الخلائق