ياجـــــــــرح الجبير شلون يلتام
توجع چلمة اخت حسين بالشام
***
توجــــــــع والله بت حيدر سبيه
من دار الحسين لقصـــــــر اميه
هاي ام الخدر هاي اخت الحسين
شلون يكول عنها خـــــــــــارجيه
وجدها المصطفى عنوان الاسلام
#############
بت الخلـــص سنينه بعباده
هاي اخت الكمر روحه وفؤاده
شلون تروح مسبيه عله النوگ
بگيد مچتفــــــــــه بتكم يساده
بتكم يال هـــــاشم شبعت الآم
###############
جرح ام الخــــدر للمحشر يفور
ناره بكل وكت من نار عاشور
كلش توجع اخت حسين بالسوگ
بيها ديار غربه الظالـــــــم يدور
بديار الكفر متحملـــــــــــه سهام
################
هضمه وچايده شكد تحمل هموم
اخت حسين تمشي لارذل الكــوم
وتطب شامهم يا لوعــــــــــه يا آه
منظر للحزن بالشام مــــــــرسوم
شكد شافت هضم اختك يضرغام
#################
شبعت بت علي من الكافر ونين
يعيرها ويكلهــــــــا وين المعين
جا كفال خــدرج بت علي شبيه
توجع حيل زينب وين الحسين
وكلش چايده من دون الاكرام
###############
ونسألكم الدعاء لتعجيل الفرج
الشاعر حيدر كاظم الساري

١٣٣- حال الامام السجاد (ع)
عند دفن الاجســاد 👇

للغــاضريّه إتعنيّت ٠٠ أدفن حسين وگومه
ــــــــــــــــــــــــــــــــــــــــــ
هذا آنه زيـــــــن العــابدين السجّاد
آنه العليــــل وحـزني هاليـوم إزداد
جيت لمفــــاوز كربلا وحيــلي إنباد
ياشيعه عينوني إعلى دفن الأجساد

بگاع المصايب طبّيت ٠٠ بدمعة حزن مسجومه
ــــــــــــــــــــــــــــــــــــــــــ
مجروح گلبي وهالگلب شيصبره
وأنظر هلـــي المتــوّسدين الغبره
أجســـــادهم مابين طعنه وطبره
صرت أغســل الدم بمسيل العبره

حاير صرت من صدّيت ٠٠ كل الجثث مخذومه
ــــــــــــــــــــــــــــــــــــــــــ
والخلّه بركــان المشـــاعر ينهار
لمّن دفنت بإيدي هـــاي الأنصار
وشلون بيهم هالفــكر مايحتـــار
كومة وذر شمخليه بيهم الأشفار

ظلّيت أعـالج ظلّيت ٠٠ وگلبي شيفّك همومه
ــــــــــــــــــــــــــــــــــــــــــ
ظلّيت أعـــالج بالحــزن وأتحسّر
متحيّر وحـــالي يفســـــر المرمر
وحين إدفنت بالهم إخوي الأكبر
بركــان ـحزني بهالمصيبه إتفجّر

الأكبر شبيه المختـار ٠٠ وارث أسرار إعلومه
ــــــــــــــــــــــــــــــــــــــــــ
آلآم گلبــــــــــــــي المامثـــــلهن آلآم
حين الشفت مطفيّه شمـــــعة جسّام
ولمّن شفت مصيوب من عنده الهام
تذّكرت طبره راس جــــدّي الضرغام

جاسم تخّضب ياحيف ٠٠ ثوب العرس بدمومه
ــــــــــــــــــــــــــــــــــــــــــ
بزلزال همّي إنهــار حيلي وصبري
وإسمعت من نحر الحسين اليجري
وسّد رضيــــعي ياعلي عد صدري
هذا العزيـــــز وهــوّه شمعة گبري

وسّدته يم جسم حسين ٠٠ وبحسـرتي المكتومه
ــــــــــــــــــــــــــــــــــــــــــ
ومن كمّلت دفن الجسـوم بهمّي
تعنيّت يم النهـــــر أدفــن عمّي
شفته صريع وعالتـرايب مرمي
وبلحده وسّدته وتهّـــدم عزمي

مگطوعه منّه الچفيّن ٠٠ ومتغيّرات إرسومه
ــــــــــــــــــــــــــــــــــــــــــ
فراس المحمداوي

راسه نزله يارمح
تعبان ابوي من الذبح
يارمح وارحم حالي
نزلي راس الغالي....يارمح
————————————
بالله اسألك يارمح وانته تعرف حالتي
الليل ساهر ماغفه وي غربتي ودمعتي
الجان تارس هالعمر هجره تارس صفنتي
راح إمن ايدي الابو و بعيني ظلمة دنيتي
ليش وجه كل دم
شوفته صارت عدم
مني خذت آمالي
نزلي راس الغالي....يارمح
———————————-
يتعب اشوفن منحره يرتاح خله بحضني
ياذيه ادري لو علم من السوط ينزف متني
من شيبه امسحها الدمه رغم الحبال تعتني
من دمعي اقطرله ردت واروي شفايف ذني
شفاف ابوي مفطره
كسر ظهري منظره
نزف دم دلالي
نزلي راس الغالي...يارمح
———————————-
يابويه انظر جبهتك باقي اثر ذاك الحجر
لمن احضنك بي شفت اثنعش طبره عالنحر
المن عفتني بيا جرح زماني شبعني قهر
بنيتك انه و ياراحتك متعب عيوني السهر
افياي اسويله ردت
ياويلي يتلوه شفت
راس الحنين اكبالي
نزلي راس الغالي...يارمح
———————————
هل فاجعة بيهن تمر كلمن اجت تشكيلة
هاي الفواطم حايره بعازة ابو هالعيلة
هضموها تدري بنيتك فاض الدمع مسيله
اني رقية الغالية  ضيم اليسر ارويله
مني خذوا ترجيتي
وناكة هزيلة ناكتي
حادي الضعن جتالي
نزلي راس الغالي....يارمح
——————————-
عمتي العقيلة حايره تعاتب اشوف بعمي
اعتاب الاخو وبلا زعل وتگله ريتك يمي
مدللنه كل يومك جنت وجان الاميره اسمي
دار الوكت رحنه بسبي وعكبك تغيّر رسمي
اكعد تكله ياكمر
بالغربه ودانه القدر
انت المحامي الوالي
نزلي راس الغالي....يارمح
——————————
عطشان يارمح الابو تلهب جمر لهاته
يقشعر جلده ياوسف من ينظر إبنياته
مايحتمل انا انولي يغمض شفت نظراته
من اشكف اسياط الزجر عالي صده وناته
خليته عاري عالثره
فاجعني والله هالجره
ذبح الابو  يبرالي
نزلي راس الغالي....يارمح

تمت

علي موفق القزاز

للقاسم ع
.....
المستهل
اذا للدار لمك ماتجيها .. عيني الماتشوفك شلي بيها
يجاسم تعبي وينه ... تناديك الحنينه
.....
يجاسم أمك الفرگه چوتها .... كثرة بيها اللجروح
تبچي الحالها لو بس شفتها ... حگها الفاگده أتنوح
حنينه الام عليك أنته أعرفتها ... ومنها ماخذ الروح
فراگك ماتريده انته الردتها .... لامو وكتك اتروح
تحظن صورتك وتسولف اوياك
نساني الله اذا فد يوم أنساك
يالغايب علينه ... تناديك الحنينه
..............
أم وربت أوليد الكُبرها ... بي تصبح مسعده
محسبه أحساب من تكبر ذخرها .. تعب الربه أيرده
طول الوكت متحزمه بصبرها ... حيل أرباه تشده
تنطيه لو طلب منها عمرها ... لو بس تشم خده
بعد ألله حنينه الام طبعها
لو راح الأبن يكسر ضلعها
يبني ماتجينه..... تناديك الحنينه
......
عله أمك ماتحن وينه حنينك ... أحبك مو شفتني
يمه ما اعوفچ گتلي وينك ... شو تالي عفتني
الشيبي ردتك وعيني اعله عينك ... بيك أفرح ردتني
يوم ابيوم أعد وأحسب أسنينك ... يشهد هذا متني
ها كُبرك صرت شاب شحلاتك
عزيز أمك يغالي وشغلاتك
تظل أمك حزينه ... تناديك الحنينه
....
ياشمعة ضوه ومنوره الدار ... گمره باليالي
ينشدوني عليك وگلبي يحتار ... يبني هذا حالي
ومن أسمع باسمك أشتعل نار ... راح الچان غالي
منك ماتجي يوليدي أخبار ... بگبرك نمت تالي
.......
شكُبرها وحشتك تدري أشكبرها
أمك ما بعد مايسوه عمرها
ظل گلبي بونينه ... تناديك الحنينه
.........
دلوني الصبر يهل الصبر وين ... يبچي الصخر حني
محسود الولد چن صابته العين ... بي ينگطع ظني
وآنه الساهرت وتعبت اللسنين ... ظاع التعب مني
والضاع أمن أديه يلتگه وين ... حسراتي سلًني
يالمدلل تعال أگعد أگبالي
أذكرك بالربه وتعب الليالي
خذت عمري وسنينه... تناديك الحنينه
........
أريد الصبر من ألله أعله فگدك .... الله يعوظ أمك
يالبلحدك نمت ليًه اشيردك ... لو أندفن يمك
محد يمك وأدريها وحدك ... گبرك بس يظمك
هم لمك تحن يوليدي بعدك ... من چانت تشمك
يموتني الك يبني حنيني
أبچي بطيف لوشفتك تجيني
حالي الله يعينه ... تناديك الحنينه
....
سيد عدنان الحمامي

يعباس.    يعباس.   يعباس.  وداعاً ياالگمر
**
يبو فاضل بدت رحلة سبينه
بچينه والنهر يبچي البچينه
رجعنه بلا شراع ولا سفينه

يبو الخوه العظيمه الما مثلها
زينب رادتك ما ترجعلها
السوالف حلوه عنك مانملها

كسرت الفاگدله غالي مايطيبها الدمع
وانه طبع الماي طبعي ابچي بس ماانسمع
اشما اديرن وجهي كترك گلبي احسن ينشلع

چن اهلال.   چن اهلال.    چن اهلال..
              صبح خويه الضهر
**
بعدنه بعازتك ياعز خواتك
امس عباس ويانه اشحلاتك
حنين وحيل توجع ذكرياتك

وحشه الدنيا بعدك تدري هيه
خذاك الموت مني وانت إليه
مدري منين اجتني الغاضريه

وحشتك محد يسدها انت يانبض الگلب
خويه بس كلمة الوينك خلصت بيها الدرب
مو صعب لو روحي راحت لكن افراگك صعب

اسيرات ،اسيرات،اسيرات،،يودينه القدر
**
حسافه تضل يبو الغيره ورانه
تمنينه يهل شايل لوانه
العزيز يعيش ونموت بمكانه

الك برواحنه حسره شكبرها
رقيه بفرگتك ميته اعتبرها
مثل قطرت مطر نازل عمرها

والله يا عباس بعدك ابد مانهنه ونعن
الما تموتها المصيبه تموت من كثر الحزن
والهزيل علينه تصفن يابو فاضل من نحن

غريبات ،غريبات،غريبات،،تعبنه من السهر
**
اثر من رايتك باقي اعله هامي
كفيلي وهيبتي وبيرغ عمامي
يعباس اسمك محلي الأسامي

فريده خوتك ضلت فريده
يكاتب عاالنهر اجمل قصيده
يكافل شوفتك صارت بعيده

لخوتك تعجز الدنيا ماتعاود مرتين
هاذي النسميها خوه خوتك وي الحسين
الوفه بچفك كتبته وانت ما عندك ادين !!!

يوفاي ،يوفاي،يوفاي،يمن صيتك عبر
**
غرايب عيلتك صارو غرايب
وخواتك گعدوهن باالخرايب
لو عبدالله باقي يصير شايب

على ضيم اليمر بينه جزعنه
الهوى النشتمه صار بلايه معنه
الخرابه بلاسگف بيها نجمعنه

باالاهات ،باالاهات،باالاهات،،گضيناه هاالسفر

سعد العبودي

‏وين اخوتي انا زينب لليسر ودوني
‏واليتامه بدمع يلهب عنكم ينشدوني
‏ابغربتي واحزاني وفاگده خواني
‏لليسر ودوني
‏
‏شوفو اختكم والحرم مچتوفه الايدين
‏ويمشن ومـا يعـرفن ويـن الدرب ويـن
‏عـالـرمـاح اشـلون اصـد وتـصبر العين
‏وبالشمس والـحـر تغير وجـه الحسين
‏الرمح عالي بعد روحي شلون اذا فييلك
‏وانا اگله الچم جروحي لاتلچمه ادخيلك
‏وانه وروحي نعاني وفاگده خواني
‏لليسر ودوني
‏
‏رحـت واليـبرون الـيـه مـوش خـوان
‏واليمشون الضـعـن يبن امـي عـدوان
‏انشوف والينه عليل وحـيله خـلصان
‏وخـايـفـه نـسـوان تـتـستر ابـنـسوان
‏وانا گوه اجدامي تمشي لاتشاهد حالي
‏من بعدكم ضاع كلشي والهضم چـتـالي
‏ماطفت نيراني وفاگده خواني
‏لليسر ودوني
‏
‏شكثر چـنت اتمنه كون اعيوني متشوف
‏شلي بعيوني وعلي روس اخوتي اتطوف
‏وناس شـالت روسـكم مـاعـدهـا مـعروف
‏احـجـار تـرمـي المـا تلـگتـكم بـالاسيوف
‏هذا راسه الما وصلتوا من عدل يم داره
‏جبل شامخ يمه اسكتوا مـاتهزه احـجاره
‏هيبته عنواني وفاگده خواني
‏لليسر ودوني
‏
‏المن اشكي الناس غربه وحالي ياحال
‏هـايه اول مـره امـشي ابـلايـه كـفـال
‏معاشره الونه واديه مـعـاشره احـبال
‏مـال حملي وياهـو اگلله الحـمل مال
‏درت عيني للشريعه والـدمـع هـليته
‏خاف چفينه الگطيعه تأخره من انخيته
‏اندب وماجاني وفاگده خواني
‏لليسر ودوني
‏
‏يعـني ائايس لا اخـواني ولا عـشـيره
‏وحـايـره الـيـوم الوجـه لاويــن اديـره
‏هـس مـسـبـيـه الگـبـل چـانت امـيـره
‏اعـيـون صـلـفـه وناس مـامـرتـها غيره
‏ناس تنظر لي واشـوفـن تبتسم شماتي
‏حيره خويه شراح اگولن سولفن دمعاتي
‏چم كلام اذاني وفاگده خواني
‏لليسر ودوني
‏
‏اه يروحي صـار بـيـه المـاجرى وصـار
‏حيلي يخلص عيني من اتصد عـالزغار
‏تاركـه اچفوق ال امـيـه ابـخدهـم اثار
‏تـلاگـت اسيـاط وحـجـر عالچوته النار
‏من حقدهم من ضلهم خاطر النوگ انكسر
‏الشام كله وكل جمعهم ويانه متلگي ابحجر
‏حزت ابوجداني وفاگده خواني
‏لليسر ودوني
‏
‏
‏هـاني ناصـر السعيدي

لـــــــم بناته وكلماهن باليريده
ما ريدن وحده عن وحده بعيده
باچــــــر صعب درب السبي بناتي
:::::
وحده بصف وحده المشي  ما ريد تبعد اكثر
خايف عليچن بالدرب   طفله من عدچن تعثر
باجر بناتي اجمعن       ما طالعات بنص بر
هسه انه يمكم بالخيم   بس بويه باچر أخطر
ها بناتي وهـــــــذا آخر شيء اگوله
صعب درب السبي كلش مو سهوله
باچر سیاط اعلــــــــه العبي بناتي
:::::
تحترگ كل هاي الخيم    ما تبقه الچن خيمه
بجدامچن یچوي الرمل  تمشن بنص الهيمه
والنار توصل للعبي         ما تفزع ابد غيمه
والكله شيمه اعله النهر   والعدو ما بي شيمه
باچـــــر  الخیاله تهجـــــم عالصواوين
يختي زينب خلي عينچ عالنساوین
بالحـــــرم يحــــــدي الأجنبي بناتي
:::::
من هل المكان وتنسبن    راح احچي انه البيه
فهمتني زينب بالنظر   يعني انتي هم مسبيه  
رايدها بنص بالمشي    الرمل يچوي ارقيه
خليني اكض اذنچ بعد   ما تبقه هالترچیه
تموت اذا شفت تره راسي انه عالي
بنتي متعلمه علــــــــــي وعن دلالي
چا ويــــــــن باچــــر تختبي بناتي
:::::
باچر علي تسحگ زلم   والخيل والخياله
ما فكر بكثر الطعن   حسين ويهم بعياله
مرات میجرحك سهم حچايه عدو چتاله
هذا الحرم للمصطفى   والشمر ظل يبراله
ظل يصيح الشمر خل تدخل دواوين
شتمو عباس وبعد هم شتمو الحسين
زينب وحقـــــچ عاتبــــــي بناتـــــــي
::::::
للسوگ باچر تنسبن.        والشام كله يباوع
تتفرج اعليچن خلگ        السمع والما سامع
جبريل يستأذن قبل        بالخيمه ينزل راكع
واليوم ستر الله نشتم   والحق بديهم ضايع
باچـــــر تباتین زينب بالخـــرایب
يله من هسه استعدي للمصايب
رايــــد يزينب مطلبــــــي بناتي
:::::
علي جبار الكعبي
الفاتحه لوالدي

آنه وحميده ورقيه      نسولف كعدنه سويه
اركض رحت فرحانه    كلولي موش ويانه
*
الليله ما مرتاح گلبي        ايگلي سفرتهم طويله
بساعج ولحسين اركضي        لا يعوفج يالعليله
جنه ما حاسب احسابج        اخذي زينب وعتنيله
وخلي عبدالله عله متنج      من يشوفه ايحن دليله

گليله حن عله حالي     بلكت يگلج تعالي
بدونك اموتن آنه     كلولي موش ويانه
*
الليله حيرني زماني       والله مدري شضام اليه
مدري اروحن مدري اظلن     ومن اظل اشلون بيه
ومن اروحن خاف اتعبه          وينكسر گلبه عليه
رحت بالمدري ودمعتي           يم حميده ويم رقيه

شافني مكسوره خاطر      وكللي كلنه نسافر
منعوفج احنه اهنانه      كلولي موش ويانه
*
احنه التلاثه كعدنه      انسولف عله السفر گمنه
نحلم احلام عله گدنه         ازغار بس كلش تهمنه
ذيج گالت آنه ارتب            من نسافر كل خيمنه
وهاي كالت انه باجر             افرش العبدالله يمنه

عبد الله كلش نحبه         اناغيله دوم ونلعبه
يمنه يصير امجانه     كلولي موش ويانه
*
نتفق من هسه اكلجن     انه ابوي اهناك اخدمه
خيمته اخليها تزهي     وبيها اصيرن احله نجمه
ماي اجيبله الوضوئه     وحته مهره اهناك اقدمه
ومن يريد الماي يشرب           يلتفت يلكاني يمه

خليني اكلله يمك     وبعيوني يابويه اخدمك
ماكول ابد تعبانه      كلولي موش ويانه
*
والله لو وياهم امشي         إله اصير الهم فراشه
وعالضعن بالماي افتر          وما اخليهم عطاشه
والعزيز حسين بيدي     من العصر افرش افراشه
وحته عبدالله اكمطه             وما اقصر وياه حاشه

خدامه اصير بضعنهم      بس لا يبعدونه عنهم
ما ريد اظل حزنانه           كلولي موش ويانه
**
حضرت روحي ورحتله      وشكبر جانت فرحتي
شافني ونزلت دمعته      وكلي موش ويانه انتي
باوعتله وليش گتله       كلي اخاف عليج  بنتي
هالسفر مابيج حيله     گتله اخذني شلي بظلتي

ماريد اظل بويه اريدك     متعوده انام عله ايدك
والشوفتك عطشانه      كلولي موش ويانه
****
تمت
ميثم العمري

خــــــرابه واظلم انهار البنیه 
ومن تعب الدرب نامت رقیه
++++++++++++++++

گعدن شــــــوط مـــن الیل ناحن
وکل وحده ابکتر یاویلی طاحن
عــــــود الظیم بـــاچر یستراحن
باچــــــر یوگفن بیـــــن آل امیه
++++++++++++++++

باچر عــــــسه بــــاچر لایجیهن
اشکبرهه وگفت المجلس علیهن
اگبــــــال اعیونهن ینطگ ولیهن
وتـــلعب خیزران ابــــــن الدعیه

++++++++++++++++++
تجلب الیل زینب کون واتدور
ونوبه اتصیر عمه ونوب دکتور
تداوی یــــاجرح یاضلع مکسور
وهاي اتصیح متني وهاي ایدیه

+++++++++++++++++
عـــــله اتراب الوساده نومتهن
وبــجناح الــــــزچیه حومتهن
تلولی اعلـــه الجروح الأمتهن
واهیه امساهره الونه الخفیه

+++++++++++++++++
نــــــص الیــــــل لن طفله ابحلمهه
الوساده اتراب واتصیح امن المهه
ملح جـــاس ابجرح منهه ولچمهه 
وبحــــــت صوت عبرتهه الشجیه

+++++++++++++++++
طفله امن التعب ناحل جسمهه
ورده وذبــــل امن الحر رسمهه
بعـد مــــــحد یعارفهه اباسمهه
نسبوها رقــــــیــــــه الخارجیه
+++++++++++++++

غدت تبچي عله ابچاها الخرابه
وغــــــفه بجــروحه ملح الترابه
تهــــــز الشام لو صاحت یه بابا
ترانــــــي شــــوفتك عنت علیه
++++++++++++++++

تــــــنادي وین ماشوفچ یعمه        
ابــــوي اهنا یجي ودیني یمه
یشــــــابگني واشبگنه واشمه
ورشله ادمـــوع عیني واهلیه
++++++++++++++++

#الشاعر_الكبير_عزيز_الفيصلي

شلون گضّيتها عَشْرَه الثانيه
حسين ما فارگ خيالچ ثانيه
ما كِمَل دَفْـن الحِنين
الله خالِق لَه أربعين
ــــــــــــــــــــ
حسين حتّه بدفنه ضَلْ ما مستراح
يخْلَص من الخيـل يصعـد عالرماح
صـار ميّمونه الرمـح وبضعْنَـه راح
رافگاچ وخِلَـص سبييّچ يالله طـاح

يمشي بس أوداجه تگْطُر عافيه
إبرمحه ويسـولف سوالف دافيه
يدري باچر راجْعِين
الله خالق له أربعين
ــــــــــــــــــــ
گلُب والــد چـان ويْحـس بالزغـار
شما طفل ضاع انتبه له وراسـه دار
وچــان بالـ آيـات يختـار إختــيار
وعينه چانت عالشمر تمطر شَرار

حسين گلبه چبير گلب الوالد
وياچ طول الدرب واگـف گاعد
حسين أمان الخائفين
الله خالق له أربعين
ــــــــــــــــــــ
چانت حچايـاته تطلـع بالصمـيم
(أَمْ حَسِبْـتُم أَنَّ أَصْحَـابَ الْرَقِـيْمْ)
رغم ما بالضعن چان إشچـم لئيم !!
وانتو مچتوفين بس ضعنچ عظيم

النـاس إلـ تسمّي سبـي وهمـانه
جيش طبّيتوا اعله بن مرجانه
موش كيفه ابن اللعين
الله خـالق له أربعين
ــــــــــــــــــــ
خوش وگفات ويه ضعنچ عنده چان
وصار عنـده وياچ بصمه بكل مكان
حسين چـان أبطُـوله واگف للزمان
ينلچـم كلسـاع بس ينيـطچ أمــان

رغم دُوْرَت راسه تآذي أوداجه
چان يندار إعله گـدّ الحاجـه
عدل .. ميّت.. ما يِلِين
الله خالق له أربعـين
ــــــــــــــــــــ
وأبو فاضل دخـل قبلچ يـم يَزيد
إلـ وَحْدچ اتدخلين ميْعوفچ أكيـد
برمحه بس أوداعتچ لو عنده إيـد
چان خلّه الشام عِدْ جِدمچ عبـيد

الرمح شايل راسه بس بي خُوفه
چــان يتمَنَّــه بعـدها إچفوفه
برمحه گلّچ تنتچين
الله خالق له أربعين
ــــــــــــــــــــ

مهدي التقي

https://www.tgoop.com/rdeaa

يا من قدّمت خدمـــــه بحياتك
احضرك لو دنت ساعة مماتك
عَليّ لا تنشد منين
آنه خدمة حـسين
احضرك لودنت ساعة مماتك
ــــــــــــ
امّن يالتخـدمه ولا تهــم بالحال
ذنبك ما يهمني لو يصير جبال
اذا دمعك بأثر نار المواكب سال
يطفي الحاطمه وماعنده كل اشكال
تلوذ النار منــك لو تمرها
تدري بدمعتك تاخــذ عمرها
علي لا تبخل العين
آنه خدمــــة حسين
احضرك لو دنت ساعة مماتك
ــــــــــــ
اذا چفك تچوّه بخدمة الزوار
شتتوقع بعد ايدك تمسها النار
قسيم النار حـيدر واسمه حامي الجار
اليحامي الجار حاشا ينسى اهل الدار
بالزوار إذا دارك مليته
ينادي حسين بيتي اليوم بيته
وعَلي بضعاف هالدين
آنه خدمة حسين
احضرك لو دنت ساعة مماتك
ــــــــــــ
قسم بتراب متنك وانت ما ادراك
ابهذا التراب الجنه تتمناك
اذا من الخدامه تعبّت يمناك
علي ويّاك لجلك تهتـف الاملاك
ملك يسراك ينخــه اللي بيمينك
يگله مروتك خلي اعينك
واعد اجر الموالين
آنه خدمـــــة حسين
أحضرك لو دنت ساعة مماتك
ــــــــــــ
من تفزع تروّي مهجـة المشاي
تروّي مهجة الحرموه من الماي
من متن الشريعه ينـدهك الوفاي
وحگ ستر الخيم انا الك كفّـاي
تتبره يساري مــــن يميني
اذا ما حرستك بالگبر عيني
قسم بچفوف الايدين
آنه خدمــة حسين
احضرك لو دنت ساعة مماتك
ــــــــــــ
من ارماد المــواكب كحـل عيونك
ومن ذاري الترب لا تمسح متونك
حبيب وعابس اتعـــنوا يسجلونك
بهذا الحال خليــــــــهم يشوفونك
الك چف الشمــس ياخذ تحيه
اذا منهم خذت وصل الزجيه
جنه وفـــوز دارين
آنه خدمــــة حسين
ــــــــــــ
لاتشكي التعب اجر التعب مضمون
اذا حيلك نفذ حاضـر يعينك جون
مامحتاج بسمك ناســك يلهجون
يكفي فاطمه وحيدر علي يدرون
يشكر خدمـتك حــامي الحميه
ويهنيال الرضــت عنه الرضيّه
الفخر والعــزهّ كل حين
آنه خدمـــــة حسين
احضرك لو دنت ساعة مماتك
ــــــــــــ
كل خادم ذليل بحــــضرة الاسياد
الا خدمتك لحسين ابو السجاد
يم حد المواكب تــــركع الامـــجاد
وكل سلطان من جفك يريد امراد
لاتاج المثل تــاج الخدامه
ولاعزه بمثل هـاي الكرامه
اولادي السلاطين
آنه خدمة حسين
احضرك لو دنت ساعة مماتك
ــــــــــــ

من مشت زينب سبـيـــه
اجروحك الف وتسعميه
يالمصابك
سيدي ماصح مـــثيلـــه
ــــــــــــــــــــــــــــــــــــــــ
يــــــالغايـــــــب ابد مابـــطلت نوحك
وتظل كل ساعه تلچم كربله جروحك
ياظعن السبي شگد عايش بـــــروحك
احچایات الشماته بعظمك تلوحــــــك

يالجبت عمرك مناحــه
وماشفت بالدنيا راحه

يالدموعك
صارت الحزنك وسيله
ــــــــــــــــــــــــــــــــــــــــ
يبو صالح الشام اشعدها وي زينب
راحتـله سبـيـه والـــــگلب یـلهـــب  
ويـاوحشة نــــعشها وللدفن غـــرب
ولا واحــــد وگف من الاهل ینحب

الشــــام مابيها اهــلها
تحضر الزينب بأجلها

هالمصيبه
بمهجتك كلفه وثگيله

ــــــــــــــــــــــــــــــــــــــــ
يامحلـه الجنازه ابين اهـــاليها
ومن تسمع بچيهم كلهم اعليها
واهلها اعله المتن لمن تـخليها
وما صحّنّ الزينب ذني تاليها

غربه التشيع الجنازه
والاهل عازتــها عازه
وشثگلها
الليله وحشه عالعقيله
ــــــــــــــــــــــــــــــــــــــــ
يالصبــــرك ابـد ماتخــلـص احــدوده
بـقت زينب هنـــاك اجنازه ممــــدوده
تــشيعها تــــــجي ودشٌداشتك سوده
وتدري الوگفه وكت الضيج مـــريوده 

وانت لتـــوسد اديها
وتوگف وتنعه عليها
كون بيدك
هالنعش انت التشيله

ــــــــــــــــــــــــــــــــــــــــ
يبو صالح دمعتك لسه سچابـه
وبيتك للحـــــزن ماينـغلگ بابه
الگبر عمتك تهيل تريدك اترابـه
وتقره اعليها آ يحسين ومصابه

وتقره زينب ياغريبه
يامــصيـبتـها مصيبه
اليله عمتك
رادتك تقره العديلــه
ــــــــــــــــــــــــــــــــــــــــ
حيدر بشار الدراجي

سهم گلبك وسط گلبي يطب ريت
اختنگت ولا هوى عگبك يطب ريت
بوجه حسين شمسويه يطبرات
كسرتي اعظام وجه ابن الزچيه

شنو الحصلته من فرگاك وجناي
غير السوط خويه وسطر وجناي
الشمر من وج خيمنا النوب وجناي
احترگت وليلى گام اتطفي بيه

الگلب ياضيم يبن امي نزل بيه
وعر درب السبي وخافن نزل بيه
المتن سوط الشمر كلش نزل بيه
وصل لعظامي خويه الحگ عليه

رحت وعزي راح وياك وجهاي
وتغير شوف من الضيم وجهاي
الشمر من وج خيمنا النوب وج هاي
عباتي وگمت اطفيها بديه


اخـوتـي الفـارگـونـي وجفوني
الدمـع نـار بفـگـدهم وج جفوني
انــه ابـديـون تـــالي وجفـوني
وكل الناس تـتـفـرج عليه ..

چلـت كربله بوحـشه وخـيمات
وخدر ماضل بعد النه وخـيمات
شبيدي والزلم تفـتر واخي مات
احشمـن بعــد ينـغـر عليه ..

الشاعر عقيل الحسناوي..

كافي امن البواجي مو خلص دمعك
اشويه ارحم ابحالك ارحم ابوضعك
يالعايش الطف كل وكت
....1....

يلكل صباح وكل مسه... تبجي اعله مذبوح النحر
مو كافي مولاي البجي ... والنوح والهم والقهر
ارحم اعـيونك ذابله ... ويمكن ضعف بيها البصر
واشلون ما تعمه النظر ... يالخلصت عمرك سهر

أعذرني امن اكلك كـــــافي لا تبجي
ابو حمزه الثمالي الحضرتك احجي
خوفي اسمع بكلمت متت
يالعايش الطف كل وكت

.....2.....

ارحم ابحالك سيدي ... الخاطر الزهره ام الحسن
منكم تعلمنه الصــبر ... وكـــت الشدايد والمحن
ليلك نهارك تنتحب .... تلطم على الراس ابشجن
عل منذبح مـــن الكفه .... وعماتك اكباله انسبن

نيران المخيم تسعـــر بــروحك
الاف الجروح الخلفت اجروحك
كالساعه اشوفك تلفت
يالعايش الطف كل وكت





.....3 .....

الله يعـــينك ســـيدي ... مو هين الصار وجـــره
حكك اذا عشت الحزن .... عل منه كطعو خنصره
جم اه شــايل جم جرح ... جم لوعه يا بن حيدره
بالشام شفت اشكد صور ... تكسر الخاطر يا ترة

فوك الرمح راس احسين يبرالك
والشـــماته تضحك جــــانت اكبالك
معـــذور شــــاب شيبت
يالعايش الطف كل وكت





.....4.....

يا زين العباد اشوكت ... ننظر ابوجهك ضحكتك
نوحك اليا مــدة يظل .... خافن يطول الــموتتك
معذور ما تنسى الحصل ... بالحبل شــدو عمتك
الله يعــــينك سيـــدي ... نيـــران تسعــر شيمتك

مو سهله المصيبه الحلت اعليكم
الهسه كربله تبـــجي البواجــيكم
جم جسم المكطع شفت
يالعايش الطف كل وكت





.....5 ....

لساعه اثرها السنسله ... ابركبتك ما طابت بعد
اتذكرك بسبيت عليتك.... وذبحت اخوك البلمهد
صبرك كسر قيد اليسر ... واتحده كل عدة وعدد
ما دنكت هامــــك ابــد .... لحسينك انطيت العهد

شامخ كالجبل ما بينت كسرك
كـدام الاعادي منحنه ظهرك
اشكد اعثرت بس ما طحت
يالعايش الطف كل وكت

تمت
.......
الحمد الله رب العالمين
اللهم صل على محمد وآل محمد
موسى الخادم

مِن دِيره لدِيره يسلبونه .. وعباس مغمضات عيونه
شلون ايّام .. بكوفه وشام .. وعباس مغمضات عيونه
„„„ „„„ „„„ „„„ „„„ „„„ „„„ „„„
للسبي اطلعنه وعالهزل ودّعنه الاجساد
ردت انزل من الناگه لاچن علي السجاد
ناده عليه لا يعمه وعِلته تزداد
گَلّي ارحمي بحالي   لَوَن انزلتي    منو اللِي يرَكبچ
عَمّه ودعي الغالي  اعله ظهر الناگه  استعدّي لدربچ

بكيف الحادي امشينه ورايه .. ولا مَحمل ظَل ولا رايه
نِسَه وايتام .. بكوفه وشام .. وعبّاس مغمضات عيونه
„„„ „„„ „„„ „„„ „„„ „„„ „„„ „„„
طبينه للكوفه يويلي ويصعب الحال
نسوانهم تتصدق اعلينه يكفّال
وصحنه حرام الصدَقه متحِل على الآل
واعله روس اخواني  درتهه عيوني  وصحت ترضوهه
بت علي وهاي آني   اسيره بديره    هلي حِكموهه

وهِند الچانت تخدم عدنه .. تتسيد واحنه تفرهدنه
شگد آلام .. بكوفه وشام .. وعباس مغمضات عيونه
„„„ „„„ „„„ „„„ „„„ „„„ „„„ „„„
بثوب السبي ادخلنه عله ابن زياد اَسره
ومن سأل عني جاوبه السجاد حسره
وآمرهم الطاغي علي يگطعون نحره
بجمرتي حاچيته  شعِفت يا ظالم   گضو ولياني
انچان ذبحه انويته  سِوه تذبحنه   ابن اخوي وآني

وكمت استر وجهي بچفيني .. بديوان اجناب موگفيني
بنُص ظِلّام .. بكوفه وشام .. وعباس مغمضات عيونه
„„„ „„„ „„„ „„„ „„„ „„„ „„„ „„„
مِن الهِزِل طاحت سكينه بليله ظلمه
وابعَد ضعنّه وعالركض ما بيهه هِمّه
وطَر الارض رمح الحمَل راس ابو اليمه
الراس خاف اعليهه   وثبت بالغبره   الى ان صعدت
ثاري چف حاديهه  دفعها وطاحت  وبچت وانضهدت

تبچي وبِسياط يسكتوهه .. ومن تنخه حسين يشتموهه
دهري شضام .. بكوفه وشام .. وعباس مغمضات عيونه
„„„ „„„ „„„ „„„ „„„ „„„ „„„ „„„
برايات حمره وروس اخوتي ادخلنه للشام
اعيال الرسول بنُص خرابه اعيونهه اتنام
وبقصور وعروش اللي چانت گبل خدام
ومن حلمهه ارقيّه  اكعدت مذعوره  ابوهه تريده
جاهه بس يا جيّه  بطشت بس راسه   وتحب بوريده

والشافت منحر واليهه .. من حگهه الموت يحل بيهه
ما تنلام .. بكوفه وشام .. وعباس مغمضات عيونه
„„„ „„„ „„„ „„„ „„„ „„„ „„„ „„„



ياسر حسن