شلون اعوفك.. للعباس ع
من وزن المثلث
دكتور كاظم المعقلي
***
شلون اعوفك.. انت مو دگيته صدرك واكفلتني
شلون اعوفك.. وانت بيدك عالهوادج صعدتني
انت وحدك كافل لهاي الضعينه
انت كافلني وجبتني من المدينه
انت بيدك… انت بيدك
انت بيدك عالهوادج صعدتني
*****
آنا اجيت بظل اخوتي وراسي عالي
وانت كافلني وتچيتي وستري غالي
شلون اردن للمدينه ابلايه والي
ريتك تجاوب يچافل عن سؤالي

بيه حيره… وحيرتي ابلايا چفيل ضعوني حيره
بيه حيره… ابقى يمك لو ارد عگبك اسيره

شأرد اگله الگلي اخوچ النشمي وينه
انت كافلني وجبتني من المدينه
انت بيدك… انت بيدك
انت بيدك عالهوادج صعدتني

*****
آنا احس امأمْنه يمك من اشوفك
حتى لو واگع رميه ابلا چفوفك
سهمك ابنص گلبي احسه العامي شوفك
يمك اشعر بالامان شلون اعوفك

يادلالي… خل اظل بدموعي اغسّل لك نزيفك
يادلالي… احسبني ضيف وگاعده ابهيبة مضيفك

ضيفك وروحي ابأثر روحك رهينه
انت كافلني وجبتني من المدينه
انت بيدك… انت بيدك
انت بيدك عالهوادج صعدتني
*****
آنا انشدك بالامانه الامنوها
مثلي شايف حره گعدت تنعى اخوها
وتبقى يمه ابهمها كون ايخيروها
شده كون اختك تعوف اللي رعوها

لو عفتها… تدري بالطف تزرع بگلبي المآسي
لو عفتها…
ارجع ومن غير اخوتي امدنگه راسي

شرد اگلها ام اربع ابدور الحنينه
انت كافلني وجبتني من المدينه
انت بيدك… انت بيدك
انت بيدك عالهوادج صعدتني
*****
ارد اظل يمك واريد انصب عزيه
ويمي تحضر فاطمه الزهره الزجيه
وامك انواسيها بالدمعه الجريه
والله ابَچّي اهل العرش هاي المسيه

وانعى يمهن
امك وامي واون يمك واسَمعك
وانعى يمهن
وارد اوصّل صوتي لاسماعك وافجعك

ننعى يمك والعرش يبچي لنعينه
انت كافلني وجبتني من المدينه
انت بيدك… انت بيدك
انت بيدك عالهوادج صعدتني
*****
عالشريعه ازنود الي وتروي الروايه
ويمها جود ايصب مآسي ومچفي مايه
والهظم ملفوفه يمهن خويه رايه
روحي يمهن والجسد يم السبايه

من يلمهن… رايتك والجربه وزنود الگطيعه
من يلمهن… راح اودعهن امانه اعلى الشريعه

كوني ياارض الطفوف الهن امينه
انت كافلني وجبتني من المدينه
انت بيدك… انت بيدك
انت بيدك عالهوادج صعدتني
*****
عذرا انودعك غصب آنا وخواتي
ماكو حيله البيها اظل آنا ابرضاتي
المهم يبن امي ماطاحت عباتي
آنا اخت عباس اميره بكل حياتي

لو سبوني… ابقى بت المرتضي وحره واميره
ولو سبوني… يبقي صوتي ايدوي لو اصبح اسيره

يبقى صوت الله بضميري ويبقى دينه
انت كافلني وجبتني من المدينه
انت بيدك… انت بيدك
انت بيدك عالهوادج صعدتني
*****

حال السيدة زينب (ع) في اليسر

بعد حسين والعباس اخيه
الج صارت بواجي زينبيه
يزينب يزينب
............................
تذوب الشمعه حين التشتعل نار
بس ابكل ظلام اتخلي اثار
صبرج وي مدامع تجري باعبار
نصرج بي تحقق والزمن دار
وصرتي ابكل زمن اعظم قضيه
الج صارت بواجي زينبيه
يزينب يزينب
............................
يهتز كل غصن من يشتد الريح
وانت كالجبل مايقبل ايطيح
بصوتج ثوره ومن الزهره تسبيح
والمبحوح جرحه ابساعة ايصيح
وبقت نبرات صوتج نهضويه
الج صارت بواجي زينبيه
يزينب يزينب
............................
تره المرفوع مو تل اليرفعه
سحكتي اعليه وصار ابهذا وضعه
المهم شفتي الحسين اهناك اصبعه
مكَطوع واجه الميمون ينعه
واستقبلتي ميمون المنيه
الج صارت بواجي زينبيه
يزينب يزينب
............................
الورد بين الحوافر وشتلمين
انتشرو بالطف ايتام الرياحين
وحرتي بهالامر المن تحشمين
ابوفاظل كفيلج لو للحسين
وحدج وي عليل الغاضريه
الج صارت بواجي زينبيه
يزينب يزينب
............................
عمرج بالحزن واهات الايام
خلص وتحمليتي هضمة الشام
مثل هالتضحيه ماكو بالاسلام
واسمج ضل شعار بكل الاعلام
وحروفج زلزله الكل ناصبيه
الج صارت بواجي زينبيه
يزينب يزينب

ياسر العارضي

اشلون اعوفك الشاعر دكتور كاظم جاسب المعقلي

يابو الباقر     يابو الباقر  
عينك لينـــــه يابو الباقر
***
بجـــاه آلام البمـــــتونك
وبالدمع المابين اجفونك
اسمع دعوات اليدعونك
بالمجلس نلطــــم نادينه
***
يالماميت حـــي  وخالـــد
نعلم حاضــر انته وشاهد
كل خادم تســمع وشرايد
بالنيه اشـــــنطلب تدرينه
***
اقبل دعوتنـــــه بأيامـــــك
سجلنه بدفــــــتر خدامـــك
نحي امصابك نحي آلامك
واجفو الســــــــائل مدينه
***
بجاه اعزازك يابـــو الباقر
انمشي اعليك الداسه الحافر
والظلت مكســــورة خاطر
بخيمتكـــــــــم نخدم خلينه
***
انحلفك بالراحـــت مسبيه
ام عون الحـره العلـــويه
اختم هالعمــــــــر وتاليه
بلخدمه اريدك تهــــدينه
***
ياهنياله ومكــــبر حــــظه
اليلزم هاي النعمه ويحضه
وانته تبارك بيـــه وترضه
نترجـاك انته ادليــــــــــنه
***


ابو علي الركابي

نزله (( #الأميرة )) 
……………………………………………………………

أسيرة .. رفض كلمة اسيره
أميره ..  ابعرش راحت أميره

……………………………………………………………


جبل عالناگه صاعد . ابعرش بلقيس گاعد
واذا باوع على الگاع . يشوف الالف واحد 
ابطريج السبي كله . شمر من عدها لابد
ابد ما مات عباس . تراها ام عون قائد

عشيره . غدت بيرغ عشيره
أميره . بعرش راحت أميره

……………………………………………………………


اسم طه اعل چفها . حبل شنهو و چتفها
النار و بردن اتصير . اذا وصلت طرفها
تطيح النجمه جائز . وشمخ زينب انفها
تميل الكاع بالناس . اذا مايل چتفها

كسيره .. ايخسه الگايل كسيره
أميره ..   ابعرش راحت أميره

……………………………………………………………


لمن بالكوفه خطبت . رياح الخوف هبّت
اصفر اصبح اللون . شوارب زلم گلبت
قيامه اليوم چنهم . عليهم نار شبّت
حچيها اتكول فقار . لبن مرجانه رعبت

زغيره .. زلم صارت زغيره
أميره .. بعرش راحت اميره

……………………………………………………………


خذت دور الزعامه . حجاب و كالعِمامه
غدت وي زين العباد . درع يحمي الامامه
تضم الباقر الها . مثل جنح الحمامه
درب چن لبوه تمشيه . وشمر مثل النعامه

وزيره . لبو الباقر وزيره
أميره . ابعرش راحت أميره

……………………………………………………………


نزل من الله اسمها .  وعلم كامل علمها
الله وگص عباتين . الها او وحده لمها
عاشت ورده بيضه . ابشغف حيدر يشمها
اذا ضيّعت الحسين . فقط تلگاه يمها

قريره .. بها عيونه قريره
اميره .. ابعرش عاشت اميره

……………………………………………………………



الملك تيّه لسانه . قزم ضاع ابمچانه
يزيد انغسل وجهين . سمع اكبر اهانه
تگله اعليك غصبن . يظل يرف لوانه
ابن هند ام الاكباد . و بنت الزهره انه

كبيره .. أنه الشيخه الكبيره
اميره .. ابعرش راحت اميره

……………………………………………………………


غدت جنه الخرابه . وابد مو عالترابه
الله امن السمه ابساط . فرش الها السحابه
تنور وماكو ظلمه . الكمر فك الها بابه
يخسه يزيد ويعيش . خدر الله وحجابه

قديره .. تهد قصره قديره
اميره .. ابعرش راحت اميره

……………………………………………………………
✍️ ( سيد خضر الزاملي )

ربِ ارجعوني لعّلي اخدم حسين
_
بعالم الموت _ لو سئالني
الباريّ وينشدني شنهي امنيتك
كون ترجع _ وشّتسوي
صفي رايك لو يگلي ونيتك
عمر ثاني _ لو وهبتك
سنين ويام وشهور انطيتك
الساني يصيح بصوت ورفع اديه
بس خدمة المظلوم ابن الزچيه
بعالم الخدمه يربي ارزقني عمرين
_
مالي رغبه _ ولااريدن
بس مجالس ساعه اگعد بيها
ياحسافه _ يا خساره
عيوني ما شبعت بواچي شبيها
وين ماكو _ مجلس امشي
وخادم ازغير يكون احچيها
اليمشي بطريق حسين عالي مكانه
مثل الملك ويعيش عمره وزمانه

بالمجالس روحي لنهه بعازة ونين


حسين دربه _ شفته جنه
بالبصيره ونكشف عني البصر
ودعي ربي _ لوتردني
للحياة اهديني اخدم كل شهر
كل حياتي _ لبو اليمه
واليخدمه هناك يقطف بالثمر

يختلف عن الناس كلمن يخدمه
يوگفله ابو السجاد ويعّلي اسمه

ريت المصابه يلاهي تعمه عينين
_
بيته عالي _ الچان يبچي
والطم صدره على حسين الغريب
واليواسي _ للزچيه
عل بقه عريان عالغبره وسليب
عالي قدره _ وشانه عالي
عالم الخدمه يهل وادم عجيب

اليخدم ابو السجاد وابن المجالس
الله يحسبه هناك من العوابس

تربح الناس التخدمه تالي دارين
_
ماتركني _ اعليه يسئال
هناك يفزعلي ويجي وكت الشدد
الحضر مجلس _ واليخدمه
شفت ابو الاكبر اله صاير سند
مايعوفه _ الكله غيره
مايعوف احبابه منطيهم وعد

بس غمضت عيناي يحضر رجيته
الماعفته انه بدنياي يمي لگيته

الماخذ سنيني يجيني يكحل العين
____
والزچيه _ ام الحسين
بالحشر تحظر تطلع احبابهه
وعد منهه _وما تخلفه
وهاي جيتهه نعرف اسبابهه
كالحمامه _ اتريد تاخذ
كلمن الواساها يوم مصابهه

تتفگد ام حسين يوم القيامه
ربع المجالس وين وهل الخدامه

آم أبيها تحضر الحضروا معزين
____
حيدر بشار الدراجي

(ًعمه وينه)


عمه وينه      الحظنه دافي كلميني
عمه وينه     ليش ابويه  مايجيني

گلبي مشتاگ الحنانه  .. وانه ما اندل مكانه
       
          كلميني     ***       كلميني

*-------------------------*----------------------*

سولفيلي عمه وينه بيا  مكان
علماني بحظنه أغفه بكل أمان
چنت اشمه وگلبه ينبظ بالحنان
خيمه أليه وبوجوده جنه چان

راح أموتن        بالأماني يمته أشوفه
راح أموتن         بس حناني ما أعوفه
*-----------------------*----------------------*

تغفه عيني وصوره تحضر للحبيب
يمته أشوفه الفارگاني وكله طيب
بكل صباح اتنطريته  بكل  مغيب
عايش بروحي واحسه اشگد قريب

چن اشوفه         الغالي لحظه مانسيته
چن أشوفه         أگبالي هسه اتخيليته
*-----------------------*--------------------*

گلتي  سافر  واليسافر هم  يعود
وين أبويه ادموعي حفرن بالخدود
الفرگه مره ومضلم بعيني الوجود
صارت ايامي العشتهه بلحظه سود

صبري خلّص         عني غايب ما أجاني
صبري خلّص         يمته اشوفه الفارگاني
*----------------------*---------------------*

عمه زينب صبري خلّص انتضار
الدمعه تنزل بالنواضر چنهه نار
كمت أحس الليل  يشبه للنهار
مادريته ودهري بيه بسرعه دار

عمري شمعه            ونار  بُعده  ذبّلتهه
عمري شمعه          وهل مصايب عاشرتهه
*-------------------------*---------------------*

چني ريشه وجني فجئه العاتيات
أطشرن بيهه أمنياتي وحلمي مات
ذكره  ذكره  كمت  أعدن  ذكريات
وي أبويه أسنيني غابت والحياة

هذا حالي          وعمري دمعه ما أريده
هذا حالي          وصبره گلبي مايفيده
*----------------------*----------------------*

عمه كافي أتعذبيني بهل سكوت
كلشي سكته والدموع بلايه صوت
كلميني  من  سكوتچ  راح  اموت
يجرح  الريه  الهوه  لمن  يفوت

صعبه احسهه         التفارگ تبقه عدله
صعبه أحسهه       العنده غايب مايردله
*------------------------*--------------------*

✍ خادم الحسين// ع  //
الشاعر رعد الجريخي

في حق الإمام السجاد( ؏) أيام السبي

عله الغيــرِه السَلام
امگيّد بيــــد اللئام

وينـــــــه الي رافگني ويگلّي بسلامه
هاظمنِي امشي اويا العده وبلا كرامه

يرمي ابڪلامه سهَام
ذاك الذبَـــــــــح إِِمام
ــــــــــــــــــــــــــــــــــــــــــــــــــــــــــــــــــ
شايـِــل خلگ گد الأرض بس يا هظيمه
علويه وترافگ كفُــــــر امصيبه عظيمه
لكنــــــــــــها هيبتنه كفو تمشي حليمه
اتردد باسم عبـــــــاس ثورَه مو سليمه

الگـــالت اذلّ اشام
گول وفعِل تــــمام

مشتريــه عزّه الها تصَافحها الشهامه
محروسه بت حيدر نيَاشين الفخَامه

عله الغيــرِه السَلام
ــــــــــــــــــــــــــــــــــــــــــــــــــــــــــــــــــــ
تمشي الأميره بالضعن اتصفي الحساب
حسين هو حسينها وتــــــرجع للمصاب
اتگلي عمــــــــــه اليسر مايرحَم أحباب
وجهي اديره امدنگه ماتشوفـه الجناب

الشرف أكبـر وسَام
ماريــــدن أي مقَام

نتــــــوڪل اعله الما إله ابداً ختــامه
ونشهگ عشگ حيدر علي ابو الإمامه

عله الغيــرِه السَلام
ـــــــــــــــــــــــــــــــــــــــــــــــــــــــــــــــــــــــ
مرَاكض بنات حسين وسط الحومه هزني
وهاج الحـــــزن بيمن تلوذ وظهري مَحني
دامي السمِه إِبراس ابوي اگبـــــالي هَدني
وجْزع مصيبه امچتف اعله النـاگه سبني

الدنــــيه چن ضَلام
جرح وحـــــزن ألام

ابچف الزغار من الحبل صارت عَلامه
بُعــــــد المسَافه جـرح اخدود اليتامه

عله الغيــرِه السَلام
ــــــــــــــــــــــــــــــــــــــــــــــــــــــــــــــــــــــ
ابذمة كفر نمشي انـــه وعمتي سبايه
انلم بالحزن نشگف سياط من البدايه
انچن باليتامه ومستعز بيـــها الرعايه
ابوكت الضلام بلا ضوه نفرش عبايه

ابدمي ســـــرَه الإلهام
أحرص ابروحي ايتام

ابطيفي اذا مرني العزيز ابلايه هَامه
يجيني ويشوف الخِـــدر كلهن نيامه

عله الغيــرِه السَلام
ـــــــــــــــــــــــــــــــــــــــــــــــــــــــــــــــــــــ
ابوجه الليالي نـــوگف انسولف حزنه
ننعى سويّـه امصاب ابواليمه سندنه
ذبلن اعيوني ما اشوف الطف عمتنه
والناگه هزّله اعثـــر وطيحن عذبتنه

نبات ابلا خيـــــــــام
ينــــــظر علينه العام

ياريـــــت عم الساده ذاك ابو الجهامه
ايحَشم الهاشم تجـــــي تحظر عمامه

عله الغيــرِه السَلام
ـــــــــــــــــــــــــــــــــــــــــــــــــــــــــــــــــــــــــــ
الشاعر: حيدر مكي النصاري

¹⁷محرم ¹⁴⁴⁷