خادم الزهراء
من وزن الموشح
شعر..دكتور كاظم المعقلي
ـ &&&&&&&&&
خدمِتي يم الحسن سجليها
بلكت اذنوب العلي أمحيها
ـ***
آنا الچ خادم واحس لابسلي تاج
وعالصدر بسم ابنج امعلگلي باج
ظلمه احسها الدنيا وعيونج سراج
يم حسن والتايهه ايدليها
ـ**
آنا خادم هاللقب كلش چبير
يعني آنا اوياكم اربطت المصير
خادم اتسمى وأحس آنا الامير
الخدمه تغبطني البريه اعليها
ـ**
عفت الالقاب الچبيره ومااريد
بس لقب خادمكم اشعر بيه سعيد
يامتاع الآخره وزادي الوحيد
روحي بس طاريكم ايسليها
ـ**
من محرم شدت احزامي الهموم
للبقيع وكربله ودايم تدوم
روحي طيره ابهمها وعليكم تحوم
وبسماكم حبكم امعليها
ـ**
روحي طيره وعالغري اترف الجناح
ومن تمر سامرا ياخذها النواح
وتمتحن بالكاظميه اويه الجراح
ومشهد اتمرها الحزن يغليها
ـ**
آنا خادم وافتخر لهل الاباء
وروحي ناذرها العزيزه لكربلاء
ربي خالقني لأجل اهل الكساء
الهم اول دنيتي وتاليها
ـ**
آنا بالذر بايعت آل الرسول
أحمد وحيدر علي وزهره البتول
والحسن وحسين ابايع بالقبول
وتسعه ذخر الآخره امخليها
ـ**
يم حسن آنا ابخدمتچ ما ألين
سجليني ابسجلچ اويه الخادمين
ازغر الخدام اريد اتسجلين
وصفحتي ابتوقيعچ اتحليها
ـ**

كاعـدين حسين وبصفه الحسن
وجيت العباس وعـــيونه بجن
أعليكم بحق دمعـتي ** حدثــــــــوني ســــادتي
عـــــــــن فاطمه
---------------------------------------------------------------
1= مخـتـنـك بدموعــه وأبــنصهم كعــد
قــبل لا يحجي عله الـــزهره نشد
حسين كض جفــــوفه من شافه رعد
شافـــه زعلان وكعــد كعــــدة أسد
---
بيت أبوي شلون كلولي أحترك
أثـنينهم شبكو عليه لمن شهك
صاح طفو جمرتي -- حدثـــــــوني سادتي
عــــــــــن فاطمه





2= أسود شخـيره نشدهم عـــالجدار
بيتــنه أمبـــين دوت بــركانه نار
بعــد ماخلص نـشد عالــباب دار
شاف دم يابس عليه شوف النهار
---
كالـــوا أكعد خل نسولفلك تعال
فاطمه عـــصروها بالباب النذال
كلهم ألمن ضلتي ** حدثــــــوني سادتي
عــــــن فاطمه
****
3= بــــيهم (300 ) يالـعـــباس أجـــو
وأحنه نسمع من وره الباب شحجو
أذبــــحكم الملعــــون كلهم لو نجو
قــتــــلوا الزهره وره الباب ومشو
---
للسكف وصلت النار من الحطب
نريد نوصل فـاطمه يردنه اللهب
والله ذابت مهجتي ** حدثــــــوني سادتي

4= رحنه نركض من بعدها الحيدره
ومن وصلنه ماكـــدرنه أنخبره
خفنه أبونه يموت من أللي جره
وأحنه عفنه البيت ناره أموجره
---
قـبل لا نحجي أبـونه جن عـلـم
لزم ضهره وصاح أخ مـن الألم
والله حيره حيرتي ** حدثــــوني سادتي
عـــــــــن فاطمه
****
5= أمنه شافــت حيدر وصاحت بطيت
ياعلي حركوني بالكــــــوه طفيت
ياعلي الـمحسن وكع وعليه بجيت
ياعلي لجلك تــره بكلشي رضيت
----
كون شايف حيدره ماضل يشوف
عله عيونه كام يلـــطم بالجفوف
صاح راحت زهرتي حدثـــــــوني سادتي عن فاطمه

6= ضلت من تجر نفسها تـــنوجع
مهشمات ضلوعها مو فـد ضلع
أعليها والله ثــيابنه نكعت دمع
بت رسول الله ع خــدها تنصفع
---
هاي قـــصة فاطمتــنه يالكمر
وساعة التــــوكع تجيلك للنهر
صاح تحضر موتتي -- حدثوني سادتي -- عن فاطمه
**
الخادم عبد الجليل المالكي

دفعة الباب
من وزن الهجري
شعر .. دكتور كاظم المعقلي
&&&&&&&&&&&&&&
صوره مطبوعه ابخيالي..ابدفعة الباب
وانشده بالصوره بالي ...ابدفعة الباب
محنه مو مثل المحن
واجهتها ام الحسن
وانشده بالصوره بالي..ابدفعة الباب
.........
صوره مطبوعه ابضنوني وبيها نيران وجمر
بيها مهبط للملايك داسته اجدام الكفر
بيها باب الله ورسوله اتدفعه ادين اهل الغدر
وبيها ضلع امن النبوه ينكسر ماينجبر
يامصيبه الماكو منها ..ابدفعة الباب
حلّت بعيني وجفنها ..ابدفعة الباب
وباعدت عنها الوسن
واجهتها ام الحسن
وانشده بالصوره بالي ..ابدفعة الباب
.........
بيه للمهظومه لوعه .. وحيره وهموم ووجع
انكسر ودموعي تنزل ..لوشفت باب اندفع
تعتلي بگلبي المواجع لو حطب يمي انجمع
فكري يم باب الزچيه ..والجنين اللي وگع
يامصيبه اعظم مصيبه .. ..ابدفعة الباب
ياجمر يسعر لهيبه .. ..ابدفعة الباب
يادموع وياشجن
واجهتها ام الحسن
وانشده بالصوره بالي.. ..ابدفعة الباب
.........
اجمع اشتات المصايب وارسم اخطوط البله
لوعه اصف ابصفها لوعه ومرحله ابصف مرحله
مره اتيه اويه المدينه ومره اتيه ابكربله
مره گنفذ يدمي گلبي ومره نبلة حرمله
عايش بدنيا المآسي .. ..ابدفعة الباب
جامع اهمومي وأقاسي .. ..ابدفعة الباب
تنزف لآخر زمن
واجهتها ام الحسن
وانشده بالصوره بالي ... ..ابدفعة الباب
.........
بيني مابين المصيبه الف واربعميه تم
وچنها امس وگبالي چنها كسرة اضلوع وورم
ياخيال المايفارگ عيني يادمعة الم
مانفع ساتر دمعتي اتفجّر وسدها انهدم
عايشت نار الظليمه ..ابدفعة الباب
مره باب ومره خيمه ..ابدفعة الباب
حسرة آل المؤتمن
واجهتها ام الحسن
وانشده بالصوره بالي ..ابدفعة الباب
...........
ياعظم يتم العقيله ويادمع يتبع دمع
حيره وي دنياها حارت من زغرها وتنفجع
محسن اعلى الغبره واگع وامها مكسورة ضلع
عفيه زينب ياصبرها جرعت الماينجرع
ضاعت وضيعتها ضيعه ..ابدفعة الباب
يا مآسي ويا فجيعه ..ابدفعة الباب
بالهظم يتوجّسن
واجهتها ام الحسن
وانشده بالصوره بالي ..ابدفعة الباب
.........
يازمن سجل سطورك سطر خل يتبع سطر
واكتب ابأولها عصره وفاجعه وخد ينسطر
حمره عين الدنيا صارت والكواكب تنشطر
وشعجب مستقر يَذبُل للخطب ماينفطر
ساعة آلام الوديعه ..ابدفعة الباب
تنگلب كون الوسيعه ..ابدفعة الباب
من ضلوع اتكسرن
واجهتها ام الحسن
وانشده بالصوره بالي ..ابدفعة الباب
.........

ياعلي منك ردت هاي الوصيه
طلبتي گبري علي ودفني خفيه
من الجره وصار.       هاي الاسرار
هاي الوصيه
==========
ياعلي بعد الجره وصار اعل حالي
ماتِرّجع هالطلب تدريه غالي
بداعة العشرة علي وذيج الليالي
ادري تدري بطلبتي وتعرف سؤالي

بليل اظلم دفنتي وحدك اريدك
ياعلي گبري تحفره انت بيدك
عندك اخبار.        هاي الاسرار
هاي الوصيه
==========
ياعلي حان الاجل هاي المسيه
الله اليعينك على مصاب الزجيه
بدمعتك شد حيلك ودمعك تجيه
الليل اظلم وانت تحفر بالوطيه

دمعك البلل لحيتك لفگد الاحباب
وانت دافن ياعلي شمسك بالاتراب
بگلبك النار.         هاي الاسرار
هاي الوصيه
==========
ماردت ذاك النذل يحظر دفنتي
غاضبه وماسامحه وتشهد دمعتي
حسرة بيه من الالم يدري بحسرتي
بت رسول الله واجه وسبب كسرتي

غاضبه عليهم يحيدر واجري دمعي
الجان يتسمه صحابي كسر ظلعي
والزمن دار.        هاي الاسرار
==========
من بعد دفني علي اخفيلي كبري
انه مكسورة ظلع شيطيبه كسري
بالگبر لالا تظن مايطفه جمري
للعلي الباري العدل سلمته امري

من الظلمني الباري ياخذ حگي مرتين
وحگ اريد من الذبح بالطف الحسين
رايده الثار.          هاي الاسرار
==========
ياعلي نفس العصابه ادور صوبين
على وليدي بگربله وعطشان الحسين
النار هيه النار ذيج البصواوين
هناك بالعاشر اروح واسچب العين

هناك زينب حايره مجروحت احساس
من تشوف حسين واكع يمه عباس
ليه تندار.            هاي الاسرار
هاي الوصيه
=========
الشاعر علي النائلي

بعيوني عبره     وبخدي سطره
وضلع التكسّر     مايشفه كسرة
آنه الوديعـة فاطمـة آنه الوديعة
زينب عفتها ميتمه يوم الفجعية



1
بقلبي سوالف موت وبصدري ضيم هواي
ابدي الحجي من وين ياناس ضاع الراي
عن الضلع والباب لو عن هظم دنياي
ماكملت عشرين ودمعي أنخلط بدماي

سنيني العشتها     بحسرة أختمتها
وثمنطعش عام             ماكملتها
آنه إلي بيه ضاكت الدنيا الوسيعة
زينب عفتها ميتمه يوم الفجعية



2
جنت آنه وسط البيت وندك عليه الباب
فز قلبي واحتاريت مو دكت الأحباب
فتحته وشوفن سوط وعيون ناس أغراب
هنا ياعلي ناديت خفت الضلع ينصاب

وحدي لكوني      وحيل ادفعوني
كسرولي ضلعي    تالي ارفسوني
يعرفوني آنه بت نبي وضيعوني ضيعة !
زينب عفتها ميتمه يوم الفجعية


3
أندفعت عليه الباب وصبحت بين آمرين
لو محسن يسكطو لو ينكسر ضلعين
وثنينهن ياناس صارن بنفس الحين
او مو بس ضلع وجنين فوكاها سطره عين

أيد لجنيني       وأيد أعله عيني
ومابين الأنذال          انظر بنيني
أقبلت أموت بمحنتي ولاخصمي أطيعة
زينب عفتها ميتمه يوم الفجعية


4
عصرني النذل ياحيف وبيه سده البسمار
وقنفذ أجاني بسوط وبمتني خله آثار
ناديت أنا الزهراء وبابي شبو نار
ماظلي شي ياناس من هجموا أعله الدار

كلشي خسرته          والهم جرعته
تاليها بــ آه             بيتي هجرته
ليلة مصابي مؤلمه وكلش فضيعة
زينب عفتها ميتمه يوم الفجعية


5
أبالي ابد ماجان كلشي من أيديه أيروح
طفلي وحياتي وبيت وحسرة قلب مذبوح
بداري عفت أطفال بين الدمع والنوح
باجر تصير أيتام وحيدر علي مجروح

منهو اليعينه        الفاكد حنينه
وي دمع الأيتام     نوحه ونينه
حيدر عليه ماسكت نوحه يشيعه
زينب عفتها ميتمه يـوم الفجعية


6
الكسرولي ضلعي اليوم باجر تعيد الدور
يسحكون صدر حسين وخيل أعله جسمه أتدور
زينب تشوفه أوحيد ومنه الظهر مكسور
لا ناصر ولا معين ومن الكفه منحور

هاي الرزية        بالغاضريه
جثه خضيبه     وعيله سبيه
يادمعة سيلي وكتبي قصة رضيعة
زينب عفتها ميتمه يـوم الفجعية

بغداد
امجد صاحب الشطري

بسم الله الرحمن الرحيم
   اللهم صل على محمد وآل محمد
....................................
آجرك الله يسيد المرسلين
عن مصاب الطاهره أم الحسنين
...................................
الله وكبر عالجره موﻻي والصار
خان الدهر وي عترتك وبغدرته جار
وأنسلب حق حامي الحمه حيدر الكرار
والسبب كله من السقيفه وهالشياطين
..................................
بعدك يموﻻي الجره صارت فجيعه
اﻷعراب غصبوا منبرك وبكل خديعه
سلبوا فدك جور وظلم من هالوديعه
ما رعوا حق وصيتك بآلك الطيبين
....................................
اﻷعراب ردت عالكفر والدين مآلوم
والخمسه أصحاب الكساء دنياهم هموم
والمرتضى بعدك يسيد الكون مظلوم
يشكي السقيفه والجره من هالملاعين
.....................................
بعدك يسيد الكون يالهادي هاﻷعراب
عالبضعه هجمت يانبينه ودفرت الباب
بسمار ينبت بالصدر والضلع منعاب
والبضعه تشكي والحسن يبچي والحسين
....... ...........................
موﻻي المصاب الجره حير هالعقول
أشما گلنه عنه سيدي نحتار شنگول
فرعون عصرك يارسول الله مسؤول
والسامري وياه چانوا همه بادين
..................................
موﻻي أعراب السقيفه هدت أركان
خلوا بضعتك يانبي تگضي باﻷحزان
زادت عليها هموم من هجمت العدوان
واﻷشد لحظة أسگطوا منها هالجنين
...................................
موﻻي أبو أبراهيم ياعظم الرزيه
اﻷعراب عدوا وأنكسر ضلع الزچيه
سبطك المحسن سيدي أول ضحيه
الله ياعظم الجره من يوم اﻷثنين
.............................. .....
موﻻي فرعون العصر سب الزچيه
وعده حدوده يانبي وداس الوصيه
عبد درب لهل الغدر هالناصبيه
ﻻ شرع عدهم يارسول الله ﻻ دين
....................................
موﻻي جارت هالسقيفه وخانت عهود
ما رعت حق العترتك وتعدت حدود
والوصي حماي الحمه بحبال مگيود
ما چنه سبع الموزمه وسيد الوصيين
.....................................
يبن اﻷمام العسكري گوم أشعل النار
تناديك صرخات الحزن موﻻي بالثار
أحفاد السقيفه أتكاثروا والدين محتار
ذكرهم بثار الزچيه إن چان ناسين
..................................
لخادم أهل البيت .عليهم الصلاة والسلام .
عبد الكريم سيد سعد .نسألكم الدعاء وقراءة سورة الفاتحه قبلها الصلاة على محمد وآل محمد

السلام عليكِ يامولاتي يافاطمة الزهراء
    ـــــــــــــــــــــــــــــــــــــــــــ
راحت أمي والفرح بـيامي مات
راحت أمي اوماتت اوياهه الحياة
      ياأم حسن أظلم البيت
     اني زيــنب الـــج حنيت
ـــــــــــــــــــــــــــــــــــــــــــ
مــــو كسرة غــــصن ونكول يتــجبر
كسر بالروح فكدج يا ام حسن وكثر
سبب موتج ييمه من جفوف الشـــر
هاي اول رزيه وعله الديــــن أخــــطر
مات الحنان  ـــــــــــ راح الأمـــان
اذوها ليـش ـــــــــــ ماضل ضمان
ياضوانه السافر العالم بعيد
ياضوانه نور من عـندك نريد
   من المصيبه والله ونيت
   انـي زيــنـب الـــج حنيت
ـــــــــــــــــــــــــــــــــــــــــــ
ردي البيــت أظــلــــم يا ضوه عيـوني
زغـــــيـــــر بلايه  أم كــــام يـــــنادوني
هاي الماتت امها ضـــل يسمعـــونــي
وضل ابجـي ونــوحـن  من يهضموني
عمري زغيـر  ـــــــــــ بعدج احـيـر
انـتـي دواي  ـــــــــــ جرحي جبـير
انتي خيمه الجان اتلمنه بدفو
انتي خيمه ولعلي صرتي كـفو
    يالحبــيـبه بصوتي ناديـت
    انـي زيــنـب الـــج حنيت
ـــــــــــــــــــــــــــــــــــــــــــ
يـيمـه الدنيــا غربـه والـعــرف انــتـي
اشلـون بـحال زيـنـب وانـتـي ودعتـي
ياروحي وحيـــاتي  مــــا رحــم وكتـي
تـفــارگــنه ييمه وبأسمـي ما صـحتـي
ماضلي حيل ـــــــــــ دنيانه ليــل
ماضن تجين ـــــــــ دمعي يسيل
يالحبـيـبه اشلون مدفونه بگبر
يالحبـيـبه بعده ما اريده العمر
   جم جرح يادهري خليت
   انـي زيــنـب الـــج حنيت
ـــــــــــــــــــــــــــــــــــــــــــ
بـثــيــابــج اشمن  يمـه مـن اشتـاك
زغيـر عله البعـد مابــيه  حيـل افـراك
ويـوم اغـيـــاب وجهـج  بالكلب حراك
اوطعنات الوكت وسط  الدليل الحاك
اهواي الجروح ـــــــــــ جاوين اروح
سيف الغياب ـــــــــــ خــلاني انــوح
انتي عمري والله يا أم الحسن
انتي عمري وگـصه وياج الزمن
     من الهجر لحزاني رديت
     انـي زيــنـب الـــج حنـيت
ـــــــــــــــــــــــــــــــــــــــــــ
مــو سهل المفارك جلمه نحــجيـهـا
الدنيا بلايه امـــي اشلـــــون نكظيـها
جرح طول الــعـــمـر صــارت لياليها
لســــه الـــباب أثـــار الــحرك بــيـهـا
الدنيا عـذاب ـــــــــــ  صارت مصاب
ينزف حنين ــــــــــــــ جرح الـغـياب
وين اشوفج وانتـي يايمه بلحد
وين اشوفج ودري وجهج مايرد
ياكبر يا وجه ضمــــيــت
انـي زيــنـب الـــج حنيت
ـــــــــــــــــــــــــــــــــــــــــــ
الشاعر : خالد جودي العارضي

قد أنكرو اللآيات
ملمع من وزن المفتون + الچلمه ونص
شعر.. دكتور كاظم چاسب المعقلي
الابيات بين الاقواس باللغة الفصحىٰ
@@@@@@@@@@@@@@
(البابُ والمسمارُ والجنينُ)
(والضلعُ والآلامُ والأنينُ)
(وماتلىٰ المختارُ في غديرهِ)
(قد أنكرو الآياتِ في وزيرهِ)
(فحسبي اللهُ ونعم الوكيل)
@@@@@@@@@@@@@@
اشكولك امن الآلام.. ياربي من دفعوني
علحايط وخلف الباب.. أهل الحقد عصروني
وَگعو جنين البحشاي.. خلوني أون خلوني
وأخذو نِحِلتي امن الايد.. والله ورسوله انطوني

غصبو فدك اخذوها..
ما أورث وورثوها..
إرثي و الي ويدروها... أهل الضغن

داري المَلـَك يلفيها
يحرگها چف طاغيها
گلوله فاطم بيها.. گلهم (وإن)

(تباً لهم من زمرةِ الأحقادِ)
(قد أغضبو ربَّ العُلا والهادي)

(ياويلَهم في الحشرِ من سعيرِهِ)
(قد أنكرو الآياتِ في وزيرهِ)
(فحسبي اللهُ ونعمَ الوكيل)
@@@@@@@@@@@@@@
للهادي ابعث شكواي ومصابي ادري امصابه
مارعو حرمه ولادين من بعد عينه اصحابه
بيت الخِدَم بيه جبريل داسوها حرمة بابه
ماچن نزل بيه قرأن بآياته وبأحزابه

دار الوحي ايحرگوها
والحرمه ينتهكوها
وأهل السما ايهابوها... أهل العرش

والبضعه عالو بيها
روس الذي امدنگيها
صارو سِباع اعليها... ووين الوحش

(اين الذي في فعله مذمومُ)
( أو في الوغىٰ دون الورى مهزومُ)

(من لم يـعِ ماالأمرُ في مصيرهِ)
(قد أنكرو الآياتِ في وزيرهِ)
(فحسبي اللهُ ونعمَ الوكيل)
@@@@@@@@@@@@@@
آيه آنا من القرآن.. آذوني ماعرفوني
خدي اليقبله المختار...ورّم عليه سطروني
وعيوني من السطرات.. سووها حمره عيوني
بس ماندبت الكرار.. يفني الفلك من دوني

مابينتها اخباري
لابيها حيدر داري
لاكسرضلعي وناري... لاسطرِتي

بس فضه تدري بحالي
تمسحلي دمعي الهالي...
اخبرها باليجـرالـي... وبحسرِتي

(لو كان يدري قصتي الكرارُ )
(لأهتزَّ في ساعاتِها الفقارُ )

(ذا أسدٌ يُرعِبُ في زئيرهِ)
(قد أنكرو الآياتِ في وزيرهِ)
(فحسبي اللهُ ونعمَ الوكيل)
@@@@@@@@@@@@@@
انهض وأكع فوك الگاع..چف الغدر ماذيني
ايد اعلى ضلعي المكسور.. ايد اعلىٰ خدي وعيني
أكتم نشيج الآهات... احبسهن اويه اونيني
اتظاهر ابأحسن حال.. لو حيدر ايلاگيني

ماتنسمع وناتي
وبصدري اظم حسراتي
وشما تكت دمعاتي... امسح دمع

صوت الألم لاغيته
ومكابَر امسويته
كسر الضلع خافيته... كسر الضلع

(ياحسرةً في خاطري تجولُ )
(يانارَها عِبرَ المدىٰ تطولُ)

(والصبرُ أوهىٰ القلبَ في مريرهِ )
(قد أنكرو الآياتِ في وزيرهِ)
(فحسبي اللهُ ونعمَ الوكيل)
@@@@@@@@@@@@@@
حال الحسن ويه حسين كلهم الم جدامي
و دمعتها زينب هيهات مانشفت ال آلامي
زينب نزيف الدمعات.. لاينسچب بأيامي
ضميها يمه لعاشور.. يوم النحور الدامي

يايمه عندي اوصيه
حفظيها يلعلويه
مذخوره للطف هيه... حفظيها الي

شمي الحسين ابنحره
قبلي الحسين ابصدره
گوليله من الزهره.... يابت علي

(يوما به يبقىٰ بلا مُعينِ )
(امانتي هٰذي الى حسيني)

( اذ يخلوَ الميدانُ من نصيرهِ)
(قد أنكرو الآياتِ في وزيرهِ)
(فحسبي اللهُ ونعمَ الوكيل)
@@@@@@@@@@@@@@
عندج مآسي اتمر بيچ وحده اكلف امن الاخره
طبرة ابوچ ابرمضان.. عالهامه ليلة غدره
و سم الحسن من ايلوج.. چبده ايتحير بأمره
واكلفها الحسين الخيل.. لمن يرضّن صدره

ابصبر ابوچ اتحلّي
صبرچ يغرگچ خلي
بالصبر يُمه اتعلي.... وكت البله

باچر شمر يتحده
وعلى الخدر يتعده
شده الأشد من شده... في كربله

(يوما به فوقَ الثرىٰ الأضاحي)
(تضجُّ اهلُ العرشِ بالنواحِ )

(اذ يشتفي سفيانُ من أسيرهِ)
(قد أنكرو الآياتِ في وزيرهِ)
(فحسبي اللهُ ونعمَ الوكيل)
@@@@@@@@@@@@@@
٢٠٢٤/١١/١٨
١٥ جمادى الاولى ١٤٤٦هـ

منظر فطر گـلب السمه / حيدر يشيع فــــاطمه
كوثر حياته ومن مشت / گضا العمر ميت ضمه

ــــــــــــــــــــــــــــــــــــــ

بالــــــوداع  .....  شابگ  نعشها ويجري دمعه
صبره ضاع  .....  يدريها روحه ابلايه رجعه

للـــزهره حسراته اشكبرها
والمشكله ايعرف السطرها
والسطره اسود ظل اثرها

صابر لچنه امن الصبر / يم ناره يتدفه الــــــجمر
فگد ام حسن خله الشمس/ بعيونه صارت مظلمه

ـــــــــــــــــــــــــــــــــــــــــــــــــــــــــــــــ

والضلوع .....  حين العرف بيهن كسيره
ظل يلوع .....  چن لوعة الفاگد  عشيره

معناها حيدر ما سمعــــــها
ولا حاچته ابكسرت ضلعها
وابخير اله اتبيِّن وضــــعها

اي حگه حيدر ينذهل / معذور اذا عاف الـــــغسل
حط راسه ما بين الركب / وادموعه علخد ساجمه

ـــــــــــــــــــــــــــــــــــــــــــــــــــــــــــــــ

بالظلام  .....  شال النعش وچفوفه ترجف
يـاحرام  .....  ١٨ عــام الــــــــكوثر  ايجف

حين اللي وسدها ابـــلحدها
وصه اللحد لا ياذي خــــدها
امن العصره ما طابت بعدها

هل الترب واخفه الگبر/ وبلا عمر عاش العمر
لا تنلچم وصه الچفن / يدريها حيل امــــألمه

ـــــــــــــــــــــــــــــــــــــــــــــــــــــــــــــ

علگبر .....  بالــفاتحه انفتحت جروحه
للطهر .....  يهديها ما ندري اعله روحه

من رش گبرها ابجاري دمعه
سبع الشداد لــــــــحاله تنعه
تشارك علي وتون يَـــ بضعه

شَيل الجبل اي ينحمل /  بس فگد فاطم مو سهل
وسفه الرضيّه الراضيه / تمشي ابـــــزعلها وناقمه

ــــــــــــــــــــــــــــــــــــــــــــــــــــــــــــــ

ابيا وضع .....  يرجع الــــدافن امنياته
والــــدمع .....  شيعوض الماتت حياته

كلما يصد باب ايـتحسر
شوغة الـــبسمار ايتذكر
يذكر الــمحسن دم تعفر

لمن تمر بي (والعصر) / يذكرها طاحت بالعصر
سورة الكوثر چن يحس / ايات بيها امهشمه


ـــــــــــــــــــــــــــــــــــــــــــــــــــــــــــــــ

مستحيل .....  نوصف حزن حامي الحميه
شي قليل .....  لو گلنه شاب ابهلـــــــ رزيه

يدمي الگلب حزن الـوديعه
بس هونه احسين ورضيعه
ماتو عطش يم الــــــشريعه

موبس ضلع بي منهشم / سحگت عليه خيل وزلم
راسه انرفع فوگ الرمح / وابـــــــنار شب امخيمه

سيد علي عبدالزهره الناجي

من فاطمه كسرو ضلع كسرة غصن
والتهظم أكثر ياخلگ كلمة (وإن)
هـل يا دمـع والمنفگد أم وأبـن
لاذت ورة الباب أبحذر....وتدافع أوياهم قهر
وبالعصرة محسنها وگع.. ويلي وضلع منها أنكسر
مابي روح،، محسن على العتبه وگع
وأمه تنوح،، بشهگة نفسها امن الوجع
مامذبوح،، من صدمة الباب أنصرع
                                                              ////// /////
كسر الضلع لا مو سهل أصعب كسر
لا يـنـفـع أضماد ودوة ولا ينجبر
لو شافه حيدر مايظل عنده صبر
لو شاهد أبعينه الضلع .. أيهد حيله ويطيح الدمع
يبچيها غيرة ومرجله.... وينحب عليها وينفجع
غربه وليل،، مو بالعلن صار الدفن
دم يسيل،، من حيدرة دمع الجفن
مابي حيل،، خاطر على الزهراء يون
                                             ////////////

بيا حاله توصف حالته گلب الحسن
مامر على عيونه بغياب امه الوسن
مهظوم مكروب ونواعيه بـشـجـن
ينعى ونواعيه بألم...العظم المصاب دموعه دم
فاگد أحن أم وأخو... وبعيونه الفراگ أنرسم
وآ أماه،، ينعى المصيبه بيا حزن
دمعه وآه،، شيصبره گلبه الممتحن
وا ويلاه،، لمن يحن يبچي ويون
                                             ////////////////

بيت وبلا أم مگبره أيحسه الولد
ظامي الحنان أمه وبعد مترد أبد
تتألم أضلوعه الحسين شما نـهـد
الفگد أمه بگليبه جرح.. وباچر ورا خيل وذبح
وبسمار المصوب ضلع.. باچر يرد بالطف رمح
بدمع العين،، باب أمه كل ما شاهده
يعلى أونين،، هل حاله كلش تضهده
حال حسين،، مامر على أنسان وسده
                                     ///////////////////
لا يا زمــن لا تمتحن صـبـر الگلب
دمعه غريبه من جفن زينب تصب
باچـر وراهـا كربله وطـف وغـرب
النار الـ عله الباب أسعرت.. حسبة وقت من أنطفت
باچـر تـرد تحرگ خـيـم... أتفر الفواطم لـو دوت
نفس النار ،، باچر بالمخيم توج
والكفار،،، اليسبوهه من نفس العرج
عالأطهار،، هذا الحقد عدهم نهج
~~~~
حسين حمدان الدلفي ✍🏻

الله يعينك ياعلي

الله يعـيـنـك يا عـلـي من ودعـتـها الـزهـره
راحت يحيدر فاطمه وراحت وياها العشره
ضياع .. عمرك بدون ام الحسن
ضياع .. الزهره چانـتـلك وطـن
الله يعـينـك يا عـلـي
……………………………

الـ بس هيه چانـتلك كـفو .. والتارسـه بـيتك دفـو
وچـانت الك أم وابـو .. راحت يحيدر
ذيـچ الحـنينه الطيـبة .. روحـك علـيها معـذبـه
جـرح الهجـر شيطيـبه .. وگـلبك تكـدر

أم بـيـتـك وأم وابــو وچـانـت اخـو بـالـشـده
وچانت حبـيـبه ام الحسن وياها حلوه الگـعـده
ومـاي الـيـبـردك بالضـمـه والمـاي هـسـه اتـبـده


ذبحـو عشرتـك يا علي وراحت هذيـچ ايامك
من يوم ما طگـها النذل وطاحت تون جدامك
ضياع .. ابابك بدت ذيچ المحن
ضياع .. الزهره چانـتـلك وطـن
الله يعـينـك يا عـلـي
……………………………

شفت الجره عليها وحصل .. بيتك على الزهره اشتعل
لگـلب العرش دمها وصل .. بذيـچ الرزيه
من الرفـس من الضـرب .. تـتـلـوه ضلت عالـتـرب
ودمعـك علي الها يصب .. تـگـلها شبديه

الغـيرة والحـيرة اكـسرن ظـهرك ابـذيـچ اللحـظـه
گـبالك يدوس اعله الضلع واسمعت طگـة الرضه
ومجـبـور عن ذاك الوضـع الـنـظـر گــوه تـغـضـه

چـف الضرب خـد فاطمة ماتگدر انته اتگـصه
مجـبـور يا حـيـدر لأن ابـهـاي چـنـت امـوصه
ضياع .. هـاي اول ايـام الفـتـن
ضياع .. الزهره چانـتـلك وطـن
الله يعـينـك يا عـلـي
……………………………
الداس بـثـنـية منـزلك .. قصده يحرگـك وي هلك
بـس فاطمة ضحت الك .. زهـرة عمـرها
فدت الك خـد وضلع .. وضحت الك شوف وسمع
خافت ابچـتلك تنفجع .. تحملت كسرها

وهو استغل هالتضحيه وصوب اصوابه ابگـلبك
يـدري بــدون ام الحـسـن الدنـيـا راح اتـعـبـك
ورادك تمـوت مـن الحزن يدري بـهجرها ايعذبك


والثاني حـقـق غايـته وچـتال چـان اصوابه
الغالي مـن يسكـن گـبر اتـمـوت كـل احـبـابه
ضياع .. حـيدر ابـدنـياه انسجن
ضياع .. الزهره چانـتـلك وطـن
الله يعـينـك يا عـلـي
……………………………

الله يعـينـك عالهـجـر .. من غسلـتـها ابـيا صبر
ماتدري شمسوي الكسر .. چـان بصدرها
وي كل نـَفس خنگـة وألم .. چان الهوى مثل السهم
وزفـراتـها تـطلعـها دم .. مصيبة شكبرها

وما چانت اتـريـدك تحـس يا حيدر ابـمحـنـتها
مـن تـقـره قـرآن الفـجـر تـطلـعـها بـي ونـتـهـا
وبكل قنوت ابكل فرض فرصة تصب دمعـتـها

شگـد جـاهدت وي الألـم لمن شهـيـده ماتـت
توها الزچيه من الوجـع ابنص گبرها ارتاحت
ضياع .. بيـها المصايب دولـبـن
ضياع .. الزهره چانـتـلك وطـن
الله يعـينـك يا عـلـي
……………………………

يا راحـة تلـگـه ابدنيتك .. وام حسن وحدك عافتك
ايعـينك الله ابـغـربـتـك .. يا حـامي الجـار
الچـانت الك مثل الهـوى .. وبالحلوة والمـرة سـوه
شگد گـلبك عليها انچـوه .. وما تنطفي النار

الچانت سكن روحك امس هسه بگبرها سكنت
بـثـيابـها شــم يـا عـلي لـو لـيـها روحـك حـنـت
مكـتـوب روحـك مـن تـحـن للمگـبـرة اتـعـنـت

شم بتراب ام الحسن وصب عالگبر دمعاتك
واحـچـيلـها عن غربـتك بـفـراگـها ولوعـاتك
ضياع .. دموع المفارگ لو جرن
ضياع .. الزهره چانـتـلك وطـن
الله يعـينـك يا عـلـي


الشاعر عقيل الحسناوي..
.

حگـه حيدر لـــــو يِّشَيِّب راسه
بيده هال اتراب اعز ڪل ناسه

........................

حگــه حيدر لو يّــذب اعـمامِـتَه
بالــگلب نار اعلى فــــرگة جنِّـته
لا محمد عنده ظل لا بَضعتَه

حزنه الف يعگوب اظن مقــياسه

........................

حگه قالع خيبر ايــــــــگوم ويطيح
شالت امن اعيونه اُم وجه الصبيح
( بَعدَكِي عَيشي ) يگــلـلّـها قَبيح

وبيتي يَم بيتي انهدم من ساسه

........................

تغفه عينه اشلون ابو الحمله ويّچن
وذكريات ام الـــــحسن ترس الجفن
يگعد ايـــــــــگوم ايتذكرها ويّحن

ويذكر الــــــــــضلع الكسير الـــجاسه

........................

صوره بعيونه لـــــــــكسر ذاك الـضلع
ولـــــجفنها بعينه چن شاتل شمع
المره الاولى ايون علي ابـون ينسمع

ويضرب اخماس الحزن بـ اسداسه

........................

مو عجب حُزنَاً على الخدها انسطر
شاطر الـــــــهامات اذا گلبه انشطر
اشحاله من شاف اعله المتون الأثر

بالغُسل حسره اعله حسره انفاسه
........................

شيّـــــــعاهه ابليل واخفاه الگبر
بعدچ ايگـــــــللـها لا طال العمر
كسري يَـ اُم زينب بعد ما ينجبر

وبـاليتم هسه اعرفت واحساسه

........................

من رجعت امن الدفن يا حيدره
بثوبك وُ وجهك تراب المگبره
صبّــــرتها اشلون زينب يا تره

يمكن ابـــــــــ طفها وعزم عباسه

........................

بالصبر مثلك فلا صابر صَُبَر
القاتل اتنظره وتغض عنه النَظَر
ما تحرك ساكن ابوجه الجِسَر

علـــــــبتوله وباب بيتك داسه

........................

لـ اُم حسن حزنك ولا قبله وُ وراه
گلبك ٣٠ عام ومـــــــــــــا نساه
من گبل موتك تون : وا فاطماه

بالــــــــبشر مثلك شخص ما قاسه

ــــــــــــــــــــــــــــــــــــــــ

سيد علي عبدالزهره الناجي

حكاية مولاتي زينب مع الرمح وموقف السيدة رقية


لا يارمــــح لاتـخــلي عيـن اشوفة
وجه الحبيب الوانة شو مخطوفة

راس العزيز الشلتة
لـمــن تشوفك بنتة

لا يارمح

------------------------
انطيني راسه من الشمس ضمه بعباتي
ومن ترجعه الجثته اخذ امنياتي
انه بـعــده يارمــح شلي بحياتي
وهسه اتمـنى تـمـر ساعة مماتي

لا يارمـــح لـو هــسه بنتة تريده
ومحلة الأبو مـن بنتة تلزم ايده
ومن تگعد بحضنه وتشمه بهيده
بس هل شعور الگلب هذه ايهيده

انطيني راس الغالي
يارمـح ارحــم حالي

خليني ارجعه الجثته

راس الـعــزيـز الشلته
        لا يارمح
--------------------

ياشمس من يمة غيبي شهل رزية
وجه اذا ســومــر يــعذهه ل رقية
من تشوف الغالي ابوهه بهل مسية
راسه فوگ الرمح راس أول ضحية

وهسه لـو حـــنت علي وبحيرة
الشوگ مايعــرف جبيرة زغيرة
يارمـــح مـابــيك شـــايل غيرة
گلب طفلة ارحم علي بي غيرة

يلب راســه مسافر
أكسرت  جم خاطر

والحر مذبل شفته

راس العزيز الشلته
          لايارمح

---------------------------

يارمح امشي بسواد اليل ارضه
وهلبت من تمر علي جفني تغمضه
يارمح من انذبح ماهاد لحضه
وصدرة الينگط محنة الخيل رضه

انه مــن شـــفت الشمر حز نحرة
صـحـت مـاجــيتي ييمة الزهرة
خلي اخبرج خيل داست صدرة
وراسه فـوگ الذبح ضل ايطبرة

ضرب راسه بسيفة
يايـــمة جنة بكيفة

يكسر الخاطر شفته

الراس العزيز الشلته

        لايارمح
---------------------

برگبته شـجم جــرح اسأل لجمته
وانا احسهن يوجعنه بعيني شفته
شـابة الـنار بعــباتي ومـن وصلته
راسـه فـوگك يارمـح وتهل دمعته

يارمح غمض لي عيني الغالي
ابنتة مـــن وصه انكسر دلالي
مااريــد ايشوف انا أليجرالي
ولايـگلـي الصوط شاغل بالي

وگلالي هاية الكلمة
يـــــمــج رقـية ذمة

وذاني حيل بونته

راس العزيز الشلته
        لايارمح
------*----------------

راسـه يارمـح ظـمه من الأيتام
وهـلبـــت ليلة نـگـدر نـغـفه ونام
ونشبع شوف منه وتبدي الأحلام
ونــذكــر گبـل كـــل ذيـــج الايام

وانه أفـــز وروحـــــي حيل اشمه
وبيدي اخذ راسه ارجعة الجسمه
ويارمـــح مـايــبس اخـــضر دمه
مــن يشوفه  گليــبي يكـــثر همه

هيج گلبي احساسه
ايـــريـــديأخذ راسه

وبــيه يـــزرع علته
راس العزيز الشلتة
         لايارمح
-----------------------------

يارمــح مـتــحملة كلــــش خطية
شافت الراس بطشت ماتت رقية
يارمح جم غالـي راح انه من دية
ومابقالي بـــــس عليل بهل مسية

شمت الراس ويه گطع أنفاسهه
وعله راس الغالي حطت راسهه
هذا ابوهه وهـــم اعز كل ناسهه
انت فوگ المر جرحت احساسهه

حســـيت گال اگبالهم
متغيرة من اصياطهم

ومنه أنزلت دمعته
راس العزيز الشلتة
       لا يارمح



الخادم محمد البنداوي

             مَجروحه تدريها    لاتنطي ابد بيها
                لو زعلت الزهره بيمن ترضيها ؟
                           ____
            صاحب عَقيده ورافضي فاطم تريدك
              لاتنكل وياهم حطب محد يفيدك !
              دافع عله الزهره لحد كطعت وريدك
               بيد الكسر ضلع النبي لتخلي ايدك
                اِقره الكتب كلها  لاتحمي قاتلها
                  بالك تجاملهم  بالك تأذيها
                           
                     _
              ضلع الزجيه بسكتتك احذر تكسره
             هل من مناصر لو هتف افزع وانصره
             حط طينته بخده الهجم واسمه اذكره
               المفاتح القران ابد لتضن يفسره
                 عِندك اساميهم    المن تبريهم !!
                  لاتفزع لضالم فشله تسويها
                            _
             اترك سقيفت ساعده واحذر غدرها
               مابيها فيي ولانفع واضح امرها
             الشجره الخبيثه لاتضن لذه بثمرها
              ولاتسمح بكاعك ابد يمتد جذرها
              لتامن بشجره حقدت عله الزهره
              منْ العرك كصها لاتمشي تسكيها
                       _
          اليهجم عله حرمه شتضن يملك رجوله !!
            وانته تكلي طائفي من اسمه اكوله
            كسر الضلع بالك تضن يشفه بسهوله
            ملعون كل واحد غضب الله ورسوله
       
               ثار بدوي ثارك  لاتنطفي نارك
            وام الحسن تدري حاسبتك اعليها
                      ____
              لتضن ابد يكبر شخص زعل امامه
                ماتكبر بهذا الفعل بس القمامه
               بالك تبيع وتشتري بهاي الضلامه
             واللي يحب ام الحسن واحد كلامه
              اكشف نواياهم  لاتمشي وياهم
             والخانت الصحبه المن تماشيها
                        _
سيد معتز الحسيني

بالحلم شفت الشمس مذبوحه يمي
صحت يا ستار بس لا ماتت امي

خفت واستعوذت بالله من الحلم
هسه جنه انسولف بحرك الخيم
ماتت امي.         ماتت امي
〰〰〰〰〰〰〰

جنت يمهه ودعتني بابتسامه
گالت الله وياج يمه بالسلامه
يمه ما وصيج بالطف عل اليتامه
الدنيه غار وصيري يا زينب حمام
::
النار من تحرك عباتج مو جديده
روحي شوفيهه عباتي مو بعيده
 
بيهه اثر بسمار يمه وبيهه دم
هسه جنه انسولف بحرك الخيم

〰〰〰〰〰〰〰〰
گمت منهه وزغرت بعيني امنياتي
وريحه الدخان اشكنهه ابعباتي
توجهت  لله  بدمعتي  ونايباني
وغفت عيني فوگ سجادة صلاتي

بالحلم شمس الله اجتني ودعتني
وصرخه من فضه اسمعتها وفززتني

صرخه لاجن منهه احس حيلي انهدم
هسه جنه انسولف بحرك الخيم
〰〰〰〰〰〰〰〰

رحت لمي وردت عود انشد عليهه
وعلضلع واحوال واسمع حجيهه
تالي عالقبله شفتهه امدديهه
والزراك من الضلع واصل لديهه

هاي معقوله امي ميته اگبال عيني
وصدك راحت بعد مني وما تجيني

المهم بعد عينج تجي وجايبلي هم
هسه جنه انسولف بحرك الخيم
〰〰〰〰〰〰〰〰〰

امي جان الگمر ياخذ من ضواها
والثريه تستحسي  وتلبد وراها
امي نجمه وتلمع بدورت سماها
والصبح من غبشه يتنفس هواها

امي ورده ومنجل الشر ما رحمهه
ورده والبسمار كاسر ضلع منهه

امي عالعصفور تبجي وتنهضم
هسه جنه انسولف بحرك الخيم
〰〰〰〰〰〰〰〰

اخ يا ام المحنه الرحتي عني
اهواي عندي هموم يمه اخذيهه مني
الدنيه ما رحمتني وانه بزغر سني
طفله واطيور السمه تبجي اعله وني

البيت وحشه خلاف عينج يالحنينه
والفرح من غبتي ما سير علينه

العين تبجي والدمع ما ينلزم
هسه جنه انسولف بحرك الخيم
〰〰〰〰〰〰〰〰

بعد ما ضل كل عذر يا دمع عيني
عيني عالفارگتني وما تجيني
امي ماتت وانطفت شمعه سنيني
اله اشيب شيلتي من گد ونيني

وداعه الله يا اعز واغله الحبايب
رحتي عني او وگفت ابابي المصايب

صدت امها وصارت البيتج اسم
هسه جنه انسولف بحرك الخيم
〰〰〰〰〰〰〰〰〰

〰〰〰〰〰〰〰〰〰
الشاعر مسلم علاوي التميمي
طباعه القصيده ثواب الحاجه
زهره حيدر مرحال
▪︎