عاشر بدر للشيعة غاب
جدد على المهدي المصاب
بثالث رجب سم جرعَّوه
واعليه بجه بحركه الكتاب
.......
سيرة حياته اترجمت ... من اول الاخر عمر
قاضي الحوائج للخلك ... ابكل المصادر ينذكر
ما واحد ابعسره كصد ... للهادي رد ما مبتشر
والسائل البابه حضر  ... رد ابعطائته الكثر

ثوب الكرم لايك عليه
ميَّرجع المداله اديه
عامر مضيف ابن الجواد
كل الخلائق تعتنيه


......
القابه كثرة تنذكر ... الهادي النقي والمرتضى
عاش العمر عابد تقي ... تشهد سموات وفضه
تشبه صفاته والده ... ويشبه بعد جده الرضا
ماواحد العلمه وصل... ذاك العصر حد ما مضى

مرجع صبح ذاك الزمان
حل المسائل يمه جان
الهادي مدرسة الأصول
كثرت علومه بكل مكان
......

اتولى الامامه أبمقدرة.... من والده عنه رحل
وهو بعمر تسعه وأقل... من تسعه ابن خير العمل
ذل كل طواغيت العصر... بصبره الصبح مضرب مثل
بيمانه وبعلمه كدر ... يقضي على اعقول الجهل

صغير العمر لكن جبير
الوادم تكصده تستشير
ادره بطرق ارض وسماء
جبريل ينخاه من يحير

......
عاصر الهادي بحقبته .... كثره من حكام الظلم عاش بزمنه كل محن ....كل ظلم من جور الحكم
عشرين عام الي سكن ... سامرا كضاها بهضم
محبوس داره بكل وكت .... من كل زياره منحرم

منعو تزوره شيعته
خلَّص حياته بحجرته
بين العساكر عمره ضاع
مسجون ظل الموتته
........
نحبه قضه الهادي بغدر ... سم الخليفه المعتمد
ما راعه حرمة فاطمه .... خان العهد والمعتقد
باجر حساب الي ظلم .... ال الرسول ابلا عدد
بطلعت المهدي المنتضر .... كل حق لأهل بيته يرُد

باجر المهدي بالظهور
ياخذ أبثارات النحور
ويقيم دولة كلها خير
خاليه من اهل الفجور
........
كلمات
موسى الخادم

هاي زينب ماتدنك راسها
حته لو غربه اصبحو حراسها
٠٠٠٠ ٠٠ ٠٠٠٠
يامره البفعاله مبچيه الزلم
شماتجور الدنيه تتزايد عزم
من صبرها حيرت اهل العلم
الشام الو ماهيه ماظله اسم

هيبه مابين الغرب
جنها حيدر بالحرب
ام عون هاي وبالفعل عباسها
حتى لو غربه اصبحو حراسها
٠٠٠٠ ٠٠ ٠٠٠
منها ضيم الشام والطف أبتده
مشت مسبيه ورجعت قائده
هيبه زينب حته كون مگيده
ياشعار بصوت عالي نردده

مره ماتشبه مره
هاي البوت حيدره
الشام ذلت كل اهله وناسها
حتى لو غربه اصبحو حراسها
٠٠٠٠ ٠٠ ٠٠٠٠
حسين ثوره وبيها كملت ثورته
راحت ويل راس زينب حرسته
عامر الديوان باهله شافته
بمجلس ابن ازياد وگفت ذلته

ميسره وجابت نصر
مثله صارت للصبر
حسين ياخويه نطبع بنفسها
حتى لو غربه اصبحو حراسها
٠٠٠٠ ٠٠ ٠٠٠٠
يالله شدو حزامكم شدو الهمم
وخلو وي كل بيت يرفرف علم
وين اهل الغيره واصحاب الشيم
اليوم يوم الفزعه ويوم الخدم

هل مواكب تنصب
والدمع عالخد يصب
  العفه زينب والخدر من ساسها
حتى لو غربه اصبحو حراسها
٠٠٠٠ ٠٠ ٠٠٠٠
اليوم ننصب فاتحه الام الخدر
ماتت بخاطر يوادم من كسر
بين اهل الشام أصحاب الغدر
يا مصيبه ومنها مشدوه فكر

عيونهه المن تصد
الغربه حفروه الحد
خوتها تحضر جان هذا حساسها
حتى لو غربه اصبحو حراسها
٠٠٠٠ ٠٠ ٠٠٠٠
خادم اهل البيت ع
فلاح طالب الماجدي

قصيده حال السان الإمام
الكاظم عليه السلام
مقارنه بينه وبين مولاتي زينب ع

نفس الحبل والنوك
بس ما مشيت بسوك
انه اختلف بهواي
ماشفت روس وياي
٠٠٠٠ ٠٠ ٠٠٠٠
عليج ياعمه القهر مو عالسجن وگيوده
اول اميره وبت وصي تمشي بحبل مشدوده
شماامشي بعيوني شفت صورت سبي موجوده
الكفل راسه عله الرمح والدم يبس بخدوده

بعيونج تشوفين 
راس الكفل وحسين
محروم من الماي 
انه اختلف بهواي
٠٠٠٠ ٠٠ ٠٠٠٠
الضيم مو ضيم السجن موقفج عمه اذاني
عليج تهمل دمعتي كل ماشفت سجاني
تهون اكولن محنتي مايمي روس خواني
الشامج يعمه مارحت ولاشامت تلكاني

امصابي عمه يهون
ماورمولي امتون
مشدوه مني الراي
انه اختلف بهواي
٠٠٠٠ ٠٠ ٠٠٠٠
كل ما اشوف السلسله تبجي المصابج عيني
ياخذني حزني الكربله لدرب السبي يوديني
يم محنتج كلشي سهل شنهي السجن وسنيني
ماراكظ بذاك الظهر   ولا جمر جاويني

هد حيلي درب الشام 
شلون اليتامه اتنام
وبيهم شمر حداي
انه اختلف بهواي
٠٠٠٠ ٠٠ ٠٠٠٠
ضلمه السجن ماينسكن يشبه اليل العاشر
السم يگطع جبدتي وبجروحي للطف حاير
بس الفرق لمن متت ماصعد فوگي الحافر
جسمي شالوه ابنعش  منه ضلع ماخاسر

جسمي بنعش ينشال 
ماگطعوني وصال
ريت نعمت عيناي
انه اختلف بهواي
٠٠٠٠ ٠٠ ٠٠٠٠
مثلج ماصارت مره بمحنتها ومصيبتها
الدنيه مارحمت ابد وبكل بلد فرتها
بصفگه وهلاهل وفرح الشام متلگيتها
دنكت روس لبالقصر ومادنگت هامتها

انتي فخر للناس 
ياهيبت العباس
للصبر شلتي الواي
انه اختلف بهواي
٠٠٠٠ ٠٠ ٠٠٠٠
خادم اهل البيت ع
#فلاح #طالب #الماجدي

(ميمر مجنّس) ملاحظه البين الأقواس معاني الجناسات 

                     (عگب الخدر)

      عــگــب الــخــدر      أمــشــي بــيــسر
      فــــوگ الــهــــزل      ويـّـــه الــشــمــر

منين أجيبن عباس وبـطـولـه اكـحـل عيوني

                                *---------------*---------------*

آنــه العــقيـله والــدهــر.. جار ألهه (حاربهه)
وجنت الوحيده الما نظر.. جار ألهه (جيران)
أتــگــيـّـدت وأيدي الشمر.. جار ألهه (جراهه)

       ريـــت الأجــل      گــبــل الحصل
       شــفــت الگمـر      صــايــر وصـل

راح وبــقـيـت بحسرات وســوط انطبع بمتوني

                                *---------------*---------------*

گلبي المصايب يا خلك.. يرحنه (جرحنه)
وغير المدامع مــا أضن.. يرحنه (ايريحنه)
عــگب الكفلني بلوعته.. يرحنه (حسره)

       حــتــى النـفـس      بــيــه انــحـبـس
       إگــبـالـي الـعـدو      واكــف حــــرس

فرجه اصبحت للعدوان بصعب جرح جرحوني

                                *---------------*---------------*

امــشــي أسيره والشمر.. مر بيه (أمر)
وعيني بطلعتي الكافلي.. مر بيه (اتباوع)
يالحادي گتلــه بروحتك.. مر بيه (مر بيه)

        عــمــري انكسر      عــفــت الگـمــر
        يــنــزف دمــــه      يــــــم الــنــهــر

أشلون اروح ابلياه وهوه الكفيل أضــعـونــي

                                *---------------*---------------*

ذاب الجفن من دمعتي.. محملهه (مااتحملهه)
طاح المحامي وحملته.. محملهه (ما حملهه)
الناگه هزله ولـو وگـع.. محملهه(الحمل مالتهه)

        تصعب عَــلــي      أســتــر بــــدي
        جبت الــحــرم      صـارتـلـي فَــي

مــا حسبت آنـــي بهاي بيوم العــده ايسلبوني

                                *---------------*---------------*

أرحــم حياتي يــا دهــر.. كافي ألهه ( كفى)
وتــدري العملته بكربـلـه.. كافي ألهه (يكفيهه)
روحي أوجعتهه وغيبت.. كافــلهــه (كفيلهه)

        بــسّــك بـعــد      گـلـبـي انـمــرد
        نــار الـســبــي      أصعب وأشــد

مجروحهه وبــهـذا الحال اهـل الحقد شافوني

                                *---------------*---------------*

صــارت عليه بكربـلـه.. ولياني ( وليه)
الــراح ايتفرج للخــدر.. ولياني (والأجاني)
بدوس الحوافر وزعوا.. ولياني (أخواني)

        عشت بـجـرح      راس ورمــــح
        بــيــن الزلــــم      دمعي يــســح

تــالي الـــزمـــان انسبّيت وام الحـــزن سَموني
                                *---------------*---------------*

✍ خادم زينب (ع)
الشاعر رعد الجريخي

أعمال ليلة #الرغائب المباركة

🔸معنى ليلة الرغائب.
ليلة الرغائب معناها ليلة العطاء الكثير، حيث أن لهذه الليلة المباركة منزلة كبيرة عند الله وفيها يتضاعف الأجر والثواب لمن صام نهارها وقام ليلها وأحياها بالصلاة والدعاء والعبادة والعمل الصالح.

🔸متى تكون ليلة الرغائب :
هي أول ليلة جمعة من شهر رجب من كل سنة.

🔸من أعمال ليلة الرغائب.
🔹الصُومُ🍜 (أَوَّل خَمِيسٍ مِنْ رَجَبٍ)
🔹الصــلاة🕋 (ما بين العشاءين ) صلَاة اثْنَتَيْ عَشْرَةَ رَكْعَةً، (كل ركعتين بتسليمة)
في كل ركعة سورة الفاتحة + سورة القدر (3 مرات) سورة التوحيد (12 مرة)
قول سبعين مرة : (اللهم صلِّ على مُحَمَّدٍ النبيِّ الأُمِّيِّ وعلى آلِه)
ثمَّ تسْجُدُ🕋 وَ تقُولُ فِي سُجُودِك سَبْعِينَ مَرَّةً : (سُبُّوحٌ قُدُّوسٌ رَبُّ الْمَلَائِكَةِ وَ الرُّوحِ)
ثُمَّ تَرْفَعُ رَأْسَك وَتقُولُ سبعين مرة : (رَبِّ اغْفِرْ وَارْحَمْ وَتَجَاوَزْ عَمَّا تَعْلَمُ إِنَّكَ أَنْتَ الْعَلِيُّ الْأَعْظَمُ).
ثُمَّ تسْجُدُ سَجْدَةً أخرى وَتقُولُ فِيهَا كمَا قَلت فِي الأُولَى : (سُبُّوحٌ قُدُّوسٌ رَبُّ الْمَلَائِكَةِ وَالرُّوحِ).

استشهاد الامام الهادي ع


حگها دموعي يا شيعه جريه
دومه ابالي يوم الغاضريه
كل هاي السنين  اصرخ يا حسين
دومه ابالي يوم الغاضريه
****
اليريد ينوح لمصابي اخبرنه
الدمع لتهله كله اعليه واتأنه
صحيح الچبده مسمومه والي ونه
ولكن يوم ابو اليمه فلا منه

صح الچبده هالليله خضيبه
بس يوم الطفوف اكبر مصيبه
جرحه ما يلين  اصرخ يا حسين
دومه ابالي يوم الغاضريه
****
اشما زادت جروحي وكثرت همومي
اقارن بين يوم العاشر ويومي
ما طحت اعله خدي وتنزف دمومي
محد هد عليه وسلب اهدومي

شنهو الچبده هذ آنه بسلامه
ما مچفي اعله وجهي بلا عمامه
گطعوله الوتين  اصرخ يا حسين
دومه ابالي يوم الغاضريه
****
الدمع لحسين نعمه وفايز الينحب
يستاهل دمه مو دمعه لتسلب
صحيح الينذبح بالسيف يتعذب
اشحاله البل سهم دلاله يتصوب

بسهم امثلث اتفطر دليله
محد يمه يتعنه ويشيله
مفضوخه الجبين  اصرخ يا حسين
دومه ابالي يوم الغاضريه
****
فوگ الغبره جدي بآخر انفاسه
دار عيونه گوه الصوب عباسه
چنه يگله خويه الحگني باحساسه
لحظات ويرفعون برمح راسه

اول مره عمي ما يطيعه
ميت ويلي وچفوفه گطيعه
مبتوره الادين  اصرخ يا حسين
دومه ابالي يوم الغاضريه
****
يمي العيله واحبابي بسلامتهم
لا شتموهم ولا حرگو اخيمهم
الشمر بالسوط ما هد ويلاحگهم
ولا بالخيل هاي أطفالي يسحگهم

الزينب عمّتي متوجره ناري
ويه العيله فرّت بالبراري
ما الها معين  اصرخ يا حسين
دومه ابالي يوم الغاضريه
****
الحسن يمي وبعد ساعه يغسلني
يچفني وبعدها بگبري يدفني
ولكن جدي وضعه بطفه حيرني
شلون اعله الترب ظل عاري دوهني

حگه لو ترس دمعي شليلي
اثلاثه اعله الرمل نايم يويلي
للضامي حزين  اصرخ يا حسين
دومه ابالي يوم الغاضريه
****

الشاعر اياد الديراوي

(تجليبه)

مـاتـت بـيـن غـربـه ودمـعـه هـمّـالـه
بنعش ام عـون لا تـسـرع يـشـيّـالـه

*--------------------*--------------------*

ابـهـونـك يـشـايـل زبـنـب الـحـره
هاي الـبـگـلـب مـابـردت الـجـمـره
خاطرهه انكسر لاتـلچـم الـكسـره

لحد اخـر نفس متحمله هالحاله

*-----------------------*-------------------*

خـلـيـهـه بنعشهه بـهـون خـلـيـهـه
مـسبـيــه تــره وبـعـيـد اهـآلـيـهـه
الـيـوم الـمنـاحـه واجـب اعـليـهـه

هـل يـوم الـجـفـن دمعاته تحلاله

*---------------------*-------------------*

مـاتـت بالـغـرب تـدريـهـه مهظومه
مـوتـهـه الـسبـي والـشـام وهمومه
ملـچومـه بـقـت هالـحـره ملچومه

هـاي الـمـا رحـمـه الـشـام بفـعـالـه

*---------------------*-----------------*

لمـصـاب الـعـقيلـه انرخص الدمعه
اتـريـد الـمـجـالس والـلطـم فـزعـه
خـلـيـنـه نـنــوح ولـلـخـدر نـنـعــه

وصـوت الـنـوح خله اعليهه يتعالـه

*-----------------------*----------------*

وآفـاهـه الأجـل وخـوان مـايمهـه
وامـهـه فاطمه الجبريل خـادمـهـه
مـاظـنـت غريبه الدنيا تـخـتـمـهـه

وتيشيّعهه الغرب ياهو التجي اباله

*--------------------*---------------------*

مـجـروح الموالي ومنكسر گـلـبـه
للماتت وحـيـده بـدريـت الـغـربـه
ماعدهـه اخو والـمـدمـع ايـصـبـه

التشيّعه اعزاز روحه بموته هنياله

*----------------------*-----------------*

✍خادم زينب (ع)
الشاعر رعد الجريخي

يا أبا عبد الله يا أبا عبد الله
............................................
على دربك مشينه وجاهدينه
والك رايـة رفعنه وياهاادينه
ركضنه ركضة العاشر....وصبغنه بالدمه الساتر
جمرنه ماطفت ناره...وكفنه أسيوف بتاره
لحد ما دكت الغاره...بخت وبصاية الشاره
على أدروب المنايه نسحك وكون
يضل دم النحر شاهد علينه
...........................................
مشينه أفواج والطف من هجيته
وحــرز مرجعنه دربك منهجيته
مشينه وجانت الفتوة...خيمة وتجمع اليسوه
المشى واللي نذردمه...من عابس أخذ عزمه
غيرة ومرجله وهمه...العايش عمره بالخدمه
هتف لبيك وأبشر يا عراق حسين
وحتى الشايب أيهوس بجفيته
.......................................................
نطينه أزلام تسوه مــن نطينه
وخضار الدنيا ماخذ منه طينه
شباب وشيب محلاهم...مشوا والموت حياهم
أبو مهدي وسليماني...عشكهم جان رباني
واحدهم فده الثاني...بأمرة علي السيستاني
قادتنه وفخر بيهم حلى الموت
وعلى نفس الدرب أحنه مشينه
................................................
حشدنه بكل وكت حامل لوانه
فخر وبجالــــــــهم محد لوانه
أهل نخوه وأهل غيرة....بدمهم حفضوا الديرة
حرز طلسم كرامتنه...بجفهم علت رايتنه
صبح ومسى دعوتنه...ألاهي بجاه دمعتنه
يحفضكم ألاهي بجاه الحسين
ويعلي شانكم بارينه دعوانه
.......................................................
صور تاريخ تبقــى شاهد النه
ويسوح الحرب شاهد شاهدلنه
شكم أم اللي مكسوره...عالحيطان جم صوره
شكم شاب الرخص نفسه...تحنى بدمه والهسه
أمه أتحضر العرسه...وحي أتكول ماتنسه
أبنها جن عدل وأتاني عالباب
يرجع واكفه وبجفوفها الحنه
.......................................................
خادم خدمة الحسين
الشاعر
محمدالموالي



https://www.tgoop.com/rdeaa

الله يـعــيـنـك مـولاي يـالـمـهـدي يـبن الـزهـره
جرحك ابروحك وايطيب لمّن تـِـقـوم ابـ ثوره

الله يعـينـك ســيدي بهاللـيلـه
ياهوّه يمك يـگعـد وتــشـكـيله
حيلك مثل شلال طايح حيـله
لجدك علي الهادي اليوم بجرحك تجي لسامره

يالمهدي من تمشي بهظم مشايه
تبـچـي دمــه لمـن تشــاهـد رايـه
وتصـيح يـالعبـاس راعـي الـثايـه
وتوگع على وجهه الگاع مثل الـيگض الجمـره

گلبك مصايب والجرح جم ديره
والشيب أِلِبراسك مصيبه چبيره
بعدك شباب وحزنك شگد حيره
خلاّك شــايـب مـتـعـوب مـن الألــم والحـسره

يالمهدي خدّامَـك وانــت قـائـد
وانت عشگنه والمجالس شاهد
نظره على الخدام واحد واحد
يالمهدي بيدك مولاي شافي المريـض بنـظره

مـاعـدنـه غـيرك سيـدي ونگـلـّه
صب الزمـان عـلـينه جـوره كـلّه
معگود امرنه وچفك انته ايْحلّه
للــشدّه انـت الـموجود چنـك علـي بـالــنـبره

ألــصــاحـب انـت للــتـعــوفـه ربــعـه
وانت الچفوف التركض اعله الدمعـه
والــخـير انـت الــينـزِل بـكـل جـمـعه
وانته المحنه والطيب حظنك فتحته حضره


#رزقهم_سلام_الله_عليهم
#احمد_رزاق_الاعرجي

﷽


⚪️ صلاة يوم الجمعة من شهر رجب الأصب

📖 روى السيّد عن النّبي (صلّى الله عليه وآله وسلم) :

-  انّ من صلّى يوم الجمعة من رجب أربع ركعات ما بين صلاة الظّهر وصلاة العصر

- يقرأ في كلّ ركعة الحمد مرّة
- و آية الكرسي سبع مرّات
- وقُلْ هُوَ اللهُ أحَدٌ خمس مرّات،

▫️ ثمّ يقول عشراً :
(  أَسْتَغْفِرُ اللهَ الَّذي لاإلـهَ إِلاّ هُوَ وَأَسْأَلُهُ التَّوْبَةَ)،

- كتب الله له من اليوم الذي صلّى فيه هذه الصّلاة إلى اليوم الذي يموت فيه بكلّ يوم ألف حسنة، وأعطاه بكلّ آية تلاها مدينة في الجنّة من الياقوت الاحمر، وبكلّ حرف قصراً في الجنّة من الدُّرّ الأبيض، وزوّجه حور العين ورضي عنه بغير سخط، وكتب من العابدين، وختم له بالسّعادة والمغفرة، الخبر.

📗 اقبال الأعمال ؛ ابن طاووس ج3  ؛ص200.

#رجب_شهر_الله

وينك بويه يحسيـــــــن الحكلنه
الشالوا نعش زينب موش أهلنه
عازتكم هلي عازه   
...............................................
غريبة عاشت وماتــت غريبة
ولا جنها أميــــرة وكلها هيبة
مــــــــا تحضر تشيعها عجيبة
مثل نعشك نعشها شهالمصيبة
ريتك حتى لو بس راس تحضر
وتجيب اوياك عمي الكمر تكدر
هلبت تـــــــرد بيها الروح منه
الشالوا نعش زينب موش أهلنه
عازتكم هلي عازة
.....................................................
مكسورة ضهر جتها المنيه
أيــــــــد أبأيد موتتهم سويه
عمتــي بويه زينب هاشميه
ترضـى أشلون تتشيع سبيه
ليل أنهار مـــــا ينشف دمعها
ريتك حاضر وتنضر وضعها
ومن كثــــــر البجي وياها متنه
الشالوا نعش زينب موش أهلنه
عازتكم هلي عازة
................................................
ماتت والدمــــــع يبس جفنها
زينب ما حضر واحـــد دفنها
لا أب لا أخــــــو لا من أبنها
غريبة ويكسر الخاطر حزنها
عادة اللي تموت أبين اهلها
أخوتها اللي تتولــى حملها
واحنه امن ألأهل خالـــي نزلنه
الشالوا نعش زينب موش أهلنه
عازتكم هلي عاز
..................................
الوادم تنشد الوادم عليــــها
الجنازة أمنين وتأشر أبأديها
أهلها ويــن ما تحضر تجيها
غربة الشيعوهــا ومشوا بيها
وآنه امن الحزن مشدوه بالي
عايش مدري ميت بويه حالي
أمشي واجـذب الونه أعله ونه
الشالوا نعش زينب موش أهلنه
عازتكم هلي عازة
...................................................
من الخيمة للهيمة كسرهـــــا
ميته ومحني يا بويه ضهرها
عليل وكوه بيدي أحفر كبرها
ألله أيعضم أجرك لــو أجرها
جانت كل مسه تدعي وتراقب
آه يحسين عدها النعــي واجب
وي وجه الصبح تجمع شملنه
الشالو نعش زينب موش أهلنه
عازتكم هلي عازة
...........................................
خادم خدمة الحسين
الشاعر
محمد الموالي

من صبرچ انطيني
مولاتي    وفقيني
يا زينب  أحميني  ،،  دخيل ،، دخيل

-------------------------------------------

تاخذني دنيا  وللأسف  ،،  اركض عليهه بلا  وعي  ،،   والتالي وين  ايامي ؟

شو چني گاعد من حلم  ،،  هو العمر شو منتهي   ،،  شنهي  البعد  گدامي ؟

لعمر   الطفوله   هوايه    اشتاگ
شبسرعه   هاي   سنيني  تنباگ  ؟
محني الظهر    لا  حيل  بالساگ
مو  بالنهر      غركان       بالراگ


اي    هيه  خلصانه
مشوار         دفانه
هالدنيا     خسرانه   دخيل  ،، دخيل


--------------------------------------------


زينب عليچ ام الحسن ،،  محتاج وكفة كافلچ  ،،  حاجة  گليبي  احچيهه  ؟

ما  عندي بس الله ودمع  ،، باچيه على امصاب النحر  ،،  يم  عون  لترديهه

ما  بيهه   ذله   مجدي    علباب   
من عندچ اطلب   من  ابو تراب
آنه    الدخيل    امحمل   اعتاب
يمكم  مريض  لهسه  ما    طاب

يا     ساده     عينوني
بالحضره     شوفوني
صوت بحچي عيوني   دخيل  ،، دخيل


-------------------------------------


انطيني من صبرچ صبر  ،،  ضيم المشو بين   علي  ،، من فارگوني احبابي

كلهم ترى بگاع النجف  ،، وانه البقيت بلا   اهل  ،،  يم عون  هذا  مصابي

فگد  العزيز    ايموت   الاجدام  
يبدي  بعمى  ويوصل    للعظام
يخنگ  بعدهم     يشبه   الشام    
لا مو  جسد    توجعني   الايام


بلوى   وعلي   بلوى
دنياي  مو      حلوه
گوه  النفس     گوه    دخيل  ،، دخيل


-----------------------------------------

وفقيني   اخدم   وانقبل  ،،   واتواضع لكل  الخدم  ،،  وفقيني  حسن  النيه

آنه  العليكم  منتچي   ،،  بساعة ولا  واحد يظل  ،،  يوم  اللحد علويه

لو  صرت  جثه وتغمض العين
الكم   بعد  انطي الوجه   وين
انترك   طين  ورد على  الطين
تتبرى  كلهه  ويبقى   الحسين


بيوم   الگبر    ظلمه
يحضرني ما  حشمه
انه    الگلت      لامه   دخيل  ،، دخيل

-----------------------------------------

بيوم  الحشر   خوف وندم  ،،  وشده الابد ما تنوصف ،، ياهو اليأمن خوفي ؟

اتنخى  بامچ  فاطمه  ،،  من تشفع لاهل الدمع   ،،   هم  آنه اشيل چفوفي


آنه اليون   من  يسمع   ام عون
ويلطم    بديه   ويدگ  بالعيون
بحسين لا  تسأل  شنو ؟  شلون ؟
عقلي  اكتمل  من صرت مجنون


صاحب وعي وعابد
لله     فقط   ساجد
هو  العلي    الواحد  دخيل  ،، دخيل


كلمات الخادم  /  رعد الفريجي
3 / رجب / 1445
ثوابها الى روح والدتي

قدر زينب.  عليها السلام.
....................................


ليل وحشه وگلب ذايب
غـربه والمــــدمع يعاتب

من غفت بالنعش زينب ودعت أمــها المصايب


’’’’’’’’’’’’’’’’’’’’’’’’’’’’’’’’’’’’’’’’

من يمر طاريهه زينب حرك خيمه أحنه نشوف.
نــــذكر المحنه بصبرها والحـــــزن بينه يطــــوف
جــم جــــرح ينــــزف أسمها فاجعه بكل الحروف  
والـــدليـــل أم المصايب صارت بــــوادي الطفوف

عاشرت جرح المصيبه
عاشت  .وماتت غريبه

هونت يـــوم المنيه يــوم تــوديع الحبايب

من غفت بالنعش زينب ودعت أمــها المصايب

’’’’’’’’’’’’’’’’’’’’’’’’’’’’’’’’’’’’’’’’
عالجنازه هناك تنحب مو أهـــل صحبة مسير   
صحبه من عاشر محرم ما يناضرهه  نظير
الصبر والهم والمصيبه محنه قـــّدرها القدير 
ماتشوف اعيون زينب بس غرب من تستدير

لا أبو اليطبك جفنها
لا أخو اليحظر دفنها

بالجفـّــن لا أم تلفـــهه بجفها لفتها النـــوايب

من غفت بالنعش زينب ودعت أمــها المصايب

’’’’’’’’’’’’’’’’’’’’’’’’’’’’’’’’’’’’’’’’’

عـــادت التّگرب منيته ايطالـــع اوجوه الاهـــل    
زينب بأخر نفسها استرجعت كلشي الحصــل
استعرضت راس اعله رمحه وعين وجفوف الكفل   
ختمت بنار المخيم صورة باحضان الاجـل 

اتذكرت حرك العبايه
لوعت اسياط السبايه

اتفـّــزع ومحـــد يجيها جثث متوسده التـــرايب

من غفت بالنعش زينب ودعت أمــها المصايب

’’’’’’’’’’’’’’’’’’’’’’’’’’’’’’’’’’’’’’’                                                                                                                                                               قبــل لا يسكن نفسها جن احس صاحت رقيــه   
عمه ما عفتج اجيتــج عمه بس ماصح بديه
جيــت اسولفلج مصايب من رجعنه اشصار بيه   
جيــت وتمنيت يمــج عمــه تاخذني المنيه

حته مانصبح غرايب
نكعد انسولف مصايب

يلتقـــن گبرج وگبـــــري عمه يم ذيج الخرايب

من غفت بالنعش زينب ودعت أمــها المصايب

’’’’’’’’’’’’’’’’’’’’’’’’’’’’’’’’’’’’’’’’’

هــذا مكتوب اعله زينب تندفن والهم جفنها  
حته لـــو ماتت غريبه مايفاركهــا حزنها
تندفـــن لا بالمدينه لا عله التل صح دفنها  
القدر حاكم عدله ميته ما تشم تربت وطنها

حته من بعد المنـــيه
أتـــريد تسبيها أل أميه

يصيح جــن صوت العقيله عجــل بثارك يغايب

من غفت بالنعش زينب ودعت أمــها المصايب

’’’’’’’’’’’’’’’’’’’’’’’’’’’’’’’’’’’’’’’’’’’’
✍️  ابو منتظر الحجامي