من صبرچ انطيني
مولاتي    وفقيني
يا زينب  أحميني  ،،  دخيل ،، دخيل

-------------------------------------------

تاخذني دنيا  وللأسف  ،،  اركض عليهه بلا  وعي  ،،   والتالي وين  ايامي ؟

شو چني گاعد من حلم  ،،  هو العمر شو منتهي   ،،  شنهي  البعد  گدامي ؟

لعمر   الطفوله   هوايه    اشتاگ
شبسرعه   هاي   سنيني  تنباگ  ؟
محني الظهر    لا  حيل  بالساگ
مو  بالنهر      غركان       بالراگ


اي    هيه  خلصانه
مشوار         دفانه
هالدنيا     خسرانه   دخيل  ،، دخيل


--------------------------------------------


زينب عليچ ام الحسن ،،  محتاج وكفة كافلچ  ،،  حاجة  گليبي  احچيهه  ؟

ما  عندي بس الله ودمع  ،، باچيه على امصاب النحر  ،،  يم  عون  لترديهه

ما  بيهه   ذله   مجدي    علباب   
من عندچ اطلب   من  ابو تراب
آنه    الدخيل    امحمل   اعتاب
يمكم  مريض  لهسه  ما    طاب

يا     ساده     عينوني
بالحضره     شوفوني
صوت بحچي عيوني   دخيل  ،، دخيل


-------------------------------------


انطيني من صبرچ صبر  ،،  ضيم المشو بين   علي  ،، من فارگوني احبابي

كلهم ترى بگاع النجف  ،، وانه البقيت بلا   اهل  ،،  يم عون  هذا  مصابي

فگد  العزيز    ايموت   الاجدام  
يبدي  بعمى  ويوصل    للعظام
يخنگ  بعدهم     يشبه   الشام    
لا مو  جسد    توجعني   الايام


بلوى   وعلي   بلوى
دنياي  مو      حلوه
گوه  النفس     گوه    دخيل  ،، دخيل


-----------------------------------------

وفقيني   اخدم   وانقبل  ،،   واتواضع لكل  الخدم  ،،  وفقيني  حسن  النيه

آنه  العليكم  منتچي   ،،  بساعة ولا  واحد يظل  ،،  يوم  اللحد علويه

لو  صرت  جثه وتغمض العين
الكم   بعد  انطي الوجه   وين
انترك   طين  ورد على  الطين
تتبرى  كلهه  ويبقى   الحسين


بيوم   الگبر    ظلمه
يحضرني ما  حشمه
انه    الگلت      لامه   دخيل  ،، دخيل

-----------------------------------------

بيوم  الحشر   خوف وندم  ،،  وشده الابد ما تنوصف ،، ياهو اليأمن خوفي ؟

اتنخى  بامچ  فاطمه  ،،  من تشفع لاهل الدمع   ،،   هم  آنه اشيل چفوفي


آنه اليون   من  يسمع   ام عون
ويلطم    بديه   ويدگ  بالعيون
بحسين لا  تسأل  شنو ؟  شلون ؟
عقلي  اكتمل  من صرت مجنون


صاحب وعي وعابد
لله     فقط   ساجد
هو  العلي    الواحد  دخيل  ،، دخيل


كلمات الخادم  /  رعد الفريجي
3 / رجب / 1445
ثوابها الى روح والدتي

قدر زينب.  عليها السلام.
....................................


ليل وحشه وگلب ذايب
غـربه والمــــدمع يعاتب

من غفت بالنعش زينب ودعت أمــها المصايب


’’’’’’’’’’’’’’’’’’’’’’’’’’’’’’’’’’’’’’’’

من يمر طاريهه زينب حرك خيمه أحنه نشوف.
نــــذكر المحنه بصبرها والحـــــزن بينه يطــــوف
جــم جــــرح ينــــزف أسمها فاجعه بكل الحروف  
والـــدليـــل أم المصايب صارت بــــوادي الطفوف

عاشرت جرح المصيبه
عاشت  .وماتت غريبه

هونت يـــوم المنيه يــوم تــوديع الحبايب

من غفت بالنعش زينب ودعت أمــها المصايب

’’’’’’’’’’’’’’’’’’’’’’’’’’’’’’’’’’’’’’’’
عالجنازه هناك تنحب مو أهـــل صحبة مسير   
صحبه من عاشر محرم ما يناضرهه  نظير
الصبر والهم والمصيبه محنه قـــّدرها القدير 
ماتشوف اعيون زينب بس غرب من تستدير

لا أبو اليطبك جفنها
لا أخو اليحظر دفنها

بالجفـّــن لا أم تلفـــهه بجفها لفتها النـــوايب

من غفت بالنعش زينب ودعت أمــها المصايب

’’’’’’’’’’’’’’’’’’’’’’’’’’’’’’’’’’’’’’’’’

عـــادت التّگرب منيته ايطالـــع اوجوه الاهـــل    
زينب بأخر نفسها استرجعت كلشي الحصــل
استعرضت راس اعله رمحه وعين وجفوف الكفل   
ختمت بنار المخيم صورة باحضان الاجـل 

اتذكرت حرك العبايه
لوعت اسياط السبايه

اتفـّــزع ومحـــد يجيها جثث متوسده التـــرايب

من غفت بالنعش زينب ودعت أمــها المصايب

’’’’’’’’’’’’’’’’’’’’’’’’’’’’’’’’’’’’’’’                                                                                                                                                               قبــل لا يسكن نفسها جن احس صاحت رقيــه   
عمه ما عفتج اجيتــج عمه بس ماصح بديه
جيــت اسولفلج مصايب من رجعنه اشصار بيه   
جيــت وتمنيت يمــج عمــه تاخذني المنيه

حته مانصبح غرايب
نكعد انسولف مصايب

يلتقـــن گبرج وگبـــــري عمه يم ذيج الخرايب

من غفت بالنعش زينب ودعت أمــها المصايب

’’’’’’’’’’’’’’’’’’’’’’’’’’’’’’’’’’’’’’’’’

هــذا مكتوب اعله زينب تندفن والهم جفنها  
حته لـــو ماتت غريبه مايفاركهــا حزنها
تندفـــن لا بالمدينه لا عله التل صح دفنها  
القدر حاكم عدله ميته ما تشم تربت وطنها

حته من بعد المنـــيه
أتـــريد تسبيها أل أميه

يصيح جــن صوت العقيله عجــل بثارك يغايب

من غفت بالنعش زينب ودعت أمــها المصايب

’’’’’’’’’’’’’’’’’’’’’’’’’’’’’’’’’’’’’’’’’’’’
✍️  ابو منتظر الحجامي

هاي السنه زواري ما اجوني
جيتهم تنشف دمع عيوني
واتنطر الاخبار ما جوني الزوار
هاي السنه
****
تترقب بعدها وتنظر العين
احب زواري بيهم ريحة حسين
اكيد الزارني زاير العباس
عطر وياه جايب من الاثنين

سكته الصحن ماكو ضوه المناره
هاي السنه زينب بلا زياره
وبگلبي تسعر نار ما جوني الزوار
هاي السنه
****
ظل خالي الصحن ماكو اليلطمون
نعشي اعله الأرض وين اليشيعون
وين الي يحبني ويگصد الشام
ما ترضون تبقه بحالها ام عون

مرتين گالو تنسبي وحچوها
راية نصر گدامي علگوها
وينه اليصيح الثأر ما جوني الزوار
هاي السنه
****
خالي الصحن ما جاي انظر الناس
اذا ما شوفكم تخنگني الانفاس
ما ريدن غريب يصيح مرتين
مسبيه بعدها اخت عباس

گالولي بعدچ انتي خارجيه
اكرها كلش كلمة السبيه
بنت حيدر الكرار ما جوني الزوار
هاي السنه
****
المرقد يحله بيكم هذا معلوم
كشختها السمه من تطلع انجوم
حيل ارتاح لمن يمي تلفون
اريدنها الزياره وياكم أدوم

ما ريدها ترد من جديد اليه
مرقدي بنصهم والحكم اميه
نفس الحكم اشرار ما جوني الزوار
هاي السنه
****
هذا الفعل ذكرني بخبر كان
بس أيتام يمي وماكو اخوان
حكم ازيد رايد يرجع انوب
ينسد مرقدي وتنغلق بيبان

ما ناسيه السوط وحچي الشماته
اول شخص متعذب بمماته
جدي النبي المختار ما جوني الزوار
هاي السنه
****
علي جبار الكعبي
الفاتحه لوالدي

ميمر أنتظار الفرج.
........................


جبت العمر. . دمعه وصبر.
أحسب علامات. . أنتظر.

يا. حجة الله المحجوب. ياجبر كسر البضعه
.......................................

يا ..يوسف الزهره انتظارك لا وين..
يل عن صبرنه صبرك انت بسبعين.
بيك النوى أين استقرت .للحين.

في نينوى . . أم ذي طوى.
في اي ارضٍ ... يا ترى.

يم ضلع صابه البسمار .لو يم صريع الدمعه .
......................................

يا..فجر يمته. اتحل غياهب ليلك.
يمته الفرج صبح. ومسه ادعيلك
كثر البجي يا سيدي هدّ حيلك.

تجري الدمع. .. دم عالضلع.
والكربلائك. . تنفجع.

تستعرض الطف والباب. ذاك الهظم شيجرعه.
.......................................

وينك .. يمن سر ( الاله ) بسرك
يا. أمنية كل شائق الينتظرك
يبن الاطايب يمته عيني اتنظرك

واسمع خبر. . بين البشر

رد. من غيابه ... المنتظر

من تصد عيني بعيناك. ثق ما تلمني الوسعه
.......................................

ياحجة الله بعيني راسم رسمك.
حتى ابمنامي اشفافي تلهج اسمك.
يوميه الف مره الدليل ايحشمك.

يمته الفرج.. يبن الحجج.
يا بلسم الكل.. المهج.

ناطر لقائك. مولاي وتوسلك كل جمعه.
......................................

كل جمعه اجددلك مشاعر نوحي
واقرالك الندبه. بلفيف اجروحي.
يالشوفتك صارت اعز من روحي.

يوم الهنه. . ويوم المنه.
لو نلتقي... بهاي السنه

لجلك اجيبنهه الروح واعلگهه مثل الشمعه.
...............................

خوفي العمر يخلص واموت متاني.
وبدرب شوگ الملگه ما تلگاني.
ذاك الوكت يالغالي لا. تنساني.

يل شوگي الك. . مابدلك.
حدر الترب. . وتأملك.

يالمهدي احلفُ بحسين. منك اريد الفزعه.
..................................

✍️ أبو منتظر الحجامي. 2024

(شور)


يا مآيله يا مآيله   يا مآيله الدنيا اويه زينب

*------------------------*-------------------*

مالت الدنيا اويه زينب يوم حاديهه حده
تمشي وبناگه هزيله عـرجـه مابين العده
زينب اتلاهب گلبهه والهظم بيهه ابـتـده
ساعت الشافت رقيه چنهه ورده امگيده

ماصايره ماصاير   ماصايره شافت عَجب

*------------------------*-----------------*

اتحمّلت ظيم البراري وطبت الشام بحزنهه
تسمع بكلمت سبيه الوادم ايـگولـون عـنهـه
تنظر اعليهه الشماته وتستر الـحـره بردنهه
تنهظم زينب يشاهد واحـد الدمعه بجفنهه

بعيونهه بعيونهه    بعيونهه تحمل عَتب

*----------------------*------------------*

محد اليعرف قدرهه وجهلوا بجَدهه القرابه
بالحبل مشدوده اديهه وباتت بذيچ الخرابه
فوگ حيرتهه وسبيهه الغرب اصعب مصابه
والأشد تسمع رقيه بالدموع اتـصيـح بـابـه

مهظومه مهظومه   مهظومه من التعب

*--------------------------*-----------------*

للقصر ياحاله طبت وگالوا اعليهه السبيه
مخدرت عباس هايه توكف بديوان اميه
صعبه ويردد اسمهه ابن مرجانه وسُميّه
حيره ماصارت مثلهه أتمنت اهناك المنيه

شتموهه شتموهه   شتموهه ابلا سبب

*----------------------*----------------*

حـتـه موتتهه يـوادم صارت ابعيده وغريبه
عذباهه الشام حقده وماتت بعِظم المصيبه
دنيا مارحمت غربهه هاي مـو دنيا عـجيـبـه
ألهه منذوره المدامع والمحب باقـي بنحيبه

بجروحه بجروحه   بجروحه گلبه التهب

*-----------------------*------------------*

✍خادم زينب ع
الشاعر رعد الجريخي

(ياهلي)

ياهلي مابـيـه حـيلـه والله تعبني الـغـرب
يا هلي هالعام وحدي آنه وبموقف صعب

            ياهلي       ياهلي

*-----------------------*-----------------*

ياهلي يمته تجوني خاطري بحاجت جبر
مابقت دمعات عندي وبالغرب ذاب الصبر
الـصـحـن فـارغ اشوفه انـي للجيه انتظر
بيش اصبرنّـه دليلي مـنـي مايـقبـل عـذر

هل سنه تصعب عليه مـاكـو بصحني لطم
هل سنه بدموعي ابقى بين حسرات وهظم

*----------------------*-------------------*

والله منتظره تجوني حيل ماعندي بـعـد
كافي مليت البواچي ليش انـوحـن للابـد
السنه ماكو مواكب يعني هالـغـربـه اشـد
وين عباس الكفلني وين اليوفّي الـوعـد

حيل محتاجه الوجوده هالسنه بحاجت كمر
حيل تـعبنـي زماني والـظهـر مـنـي انـكـسـر

*-------------------------*--------------------*

انعادت اعليه المصايب وآنـي مابـيـه تعب
ياهلي حرموني منكم اعتب وحَـگ العتب
ليش يردوني غريبه  ماعرف شنهو السبب
تنزف اجروحي بعدهه والگـلـب نـار التهب

منعو بصحني المواكب الچانت الروحي دوه
منعو الزوار تلطم الـتـنحـب واتـبـچـي سـوه

*---------------------*-----------------*

شحچي عالشام وغربته التارك بروحي جرح
ضيّـع اسنيتي وحياتي والـدمـع مـنّـه يـسـح
ماترگني الهسه بـعـده غـيّـب بعيني الصـبـح
جدد اجـروحي عـلـيـه وينـثـر بنصهن مـلـح

البُعد والغربه صـعبـه بس تسليني الخَـدم
البعد كـاتلني جـرحـه يـنـزف ادمـوم وألـم

*----------------------------*-------------------*

السبي تكفيني ناره والله ما احمل هـظـم
كافي يادنيه عذابچ روحي شيّبهه الظلـم
عاشرت نوحي اونيني عاده خليلي اللطم
تحضر الخدام يمي وحضرتّي الـهـم تظـم

السبي يكفيني وحَده ليش متحزمه عَلّي
السبي لـلـيـوم اذِكّـره خـلـه أثـآره بـأدي

*---------------------------*-------------------*
✍خادم زينب ع
الشاعر رعد الجريخي

يمسافـر بعيني صـور لو غمضت اتمنـه
طيفك يدك باب الحلم ولعالمك ياخذنه

دلـيني يا مچـــان
خايف ردت أمـان
يا صاحب الزمان

ـــــــــــــــــــــــــــــــــــــــــــــــــــــ

مولاي تــعبني النشد ما مــش عــرف بيها الناس
وميل انتظارك هل جزه وبين بياض اعله الراس
باوعــلي مو وجهي نترس بتراب بــاب العبــاس
وارزقني كــد محبتي من اجروحك الما تنجاس

والغربه ماترهم وطن يالســاكن بنــــص كلبي
دك بابي يالجفك ترف عيني اعله جيتك تربي

ارحمني ابوس اديك
وزينب متت عــليك
وشيب العشك يبـان
ياصـــاحب الـــزمان
___

مــد چفك وجيس الگلب خل يطمئن مـــا مـرتاح
لــيش انته عايش بالحزن وانه الـي عايش بفراح
وليش انته وحدك سيدي ومن عندك هواي الـراح
عــاّلَـم سكــوتك ينسمــع للــيفهم الــدمعه صيـاح

ياحــزنك المامــر بشــر لا أدم ولا بن ادم
وياحيلك الهده التعب جدم بجدم تترادم

يا سيدي الحزين
بس شكثر حنيـن
يا مملكت حنـــان
يا صاحب الزمان
___

حـبيتـك وشـفت الــيحـب رايـد گـلـب يتعبلك
كالو عليك تحب بچي وصوت النعي يمر اذنك
ما بينك و بيني شكثر وبدمعه وحـده أوصلك
صـح انه مـا أنـدل لـجَـن هـوه الـدمـع يـنـدلك

أشعر وجودك بالقرب بس عيني ما شافتك
وي روحـي اتعاتب لان متـأخره مـن حبتك.

عنك جنت بعيد
ارجع الك اريد
لا يخلص الأوان
يا صاحب الزمان.
___

سـديت بيبان الكلب سمعته مـنـي حـجايه
يا كلبي شو بسك بعد بالدنيه عشت هوايه
خـلـينه نلحك بــالخدم وتـحـزم انته ويايه
لانـجـرح الـمـهدي بـعـد يـبـعـد تـراه فـيـايه

لا تـغـدر الـمـدلك يـده ويـطعـمـك بخيراته
يا گلبي ما ضل بي بعد حيله انتهه لعماته

تسَجِل وقف أله
وبالحسره رتله
احلا من الجنان
يا صاحب الزمان.

___

يبـن الأطايب والطـهر يبن النجوم الزاهره
أين استقر يا صاحبي بيك النوه وبأي ثره
في جمكران المستقر أم نينوه ام ذي طوه
يمسافر بكل هالدرب يسيرلي لو شمة هوه

يايوسف الزهراء شبعد هل من سبيل ونلتقي
مـشـتـاك اون لـونـتـك واتـسامـر ويـاك ابـجي


وننعه السبي سوه
والضل عله الثره
وتجوينه يا نيران
يا صاحب الزمان.


الاحقر
حسنين الضامي

شكثر محتاجينك.  سيدي متانينك.
يابو صالح وينك.
ياولينه

ـــــــــــــــــــــــــــــــــــــــــــــ١

بغيبتك شفنه المصايب  .  والحزن يبلانه
شلون نرتاح بغيابك.  وانته مو ويانه
الدنية من دونك يتيمه. وبالظلم غرگانه
يمته تنقذنه  بظهورك.  ياملك دنيانه.


  ينعه الگمر.  تبچي الشمس..
والحگ  ندب.  يمته الفرج. .يالمنتظر. ينعه الگمر.


يمته تنشر دينك . .سيدي متانينك.
يابو صالح وينك.

ـــــــــــــــــــــــــــــــــــــــــ٢

يمته تاخذ ثار أمك.فاطمة  أم العتره
ابلا ذنب كسروا ظلعهه.  وعينهه اتصب حمره.
طاح وياهه ضناهه   .  المحسن وبالعبره
صاحت البضعه يفضه. أبني ودع عمره.
.

محسن  وگع. أبني أنعصر.
ظهره أنكسر. وانه أنصبت. صدري أنحفر
. أبني انعصر


عليهه تبچي سنينك .  سيدي متانينك.
يابو صالح وينك.  ياولينه.


ـــــــــــــــــــــــــــــــــــــــــــــــــــــــ٣

حسين ضل ثاره يحشمك.  الراية ضلت حمره.
الخيل داست صدره ضامي. والشمر حز نحره.
وسلبوا المحبس من ايده.  وخنصره انگص حسره
وحرگوا الخيمة اعلزينب. وين تمشي الحره



ليل وغرب.  شافت رعب.
اطفال ونسه. بين العده.  موقف صعب.
ليل وغرب.


انصيح ماناسينك.  سيدي متانينك.
يابوصالح وينك.
ياولينه
ـــــــــــــــــــــــــــــــــــــــــــــــــــــــــــ٤

روح للعباس عمك عالنهر ضل نايم.
ورايته يمه تندبك.  ماتهل يالقائم.
چفوفه غيره وخوه تنزف  وراسه ماضل سالم
بالعمد هشموه وعينه. بسهم صابه الظالم.


طاح الوفي.  وضل الصبط. من غير أخو.
ظهره أنحنه.  مايشتفي. طاح الوفي.


أنكسر ظهره حسينك. سيدي متانينك.
يابو صالح وينك.
ياولينه.

ــــــــــــــــــــــــــــــــــــــــــــــــــــــــــــــ٥


طبرت الكرار تنشد عنك وتنتطر
وچبد ابومحمد يگلك عني لاتتأخر
وجدك السجاد وابنه الباقر اليتحسر
وجعفر الصادق وابنه البلسجن يتأثر.


وچبد الرضا.  وابنه النقي . والهادي هم.
چبده انمرد. والعسكري. بالسم گضه

انته شفته بعينك. سيدي متانينك.
يابو صالح وينك.
ياولينه.
ــــــــــــــــــــــــــــــــــــــــــ

#حيدر موسى الرميثي.