العباس ع

فائزي

حيدر علي لنه الگمر     شُبِّها للناس
بسيف الفُقار المشرعه طب الها عباس
****
من خيمته املثم طلع  راعي الكفاله
مو رايه شايلها الگمر    شايل رساله
من خيبره رد الوصي   يجدد قتاله
حافر مهرته من دبچ  خمدت الأنفاس
****
متبختر اتعنه الگمر       بسمه ابنظرته
شاف الحرس يم النهر    وهزها يمنته
ما يترس الراس العدد   مو گد خزرته
بأربعة آلاف البطل   حاشه مينقاس
****
من مهْرِته عالشط نزل   چن نزل عزريل
عكس الأرض يفتر بده  فوگه السمه اتميل
عباس اخذ دور الشمس  واتملك الليل
غيّم ابو فاضل غضب  ويدخّن الراس
****
جرّد حسامه ويمنِته منها طلع موت
للزلم گاع المشرعه  سواها تابوت
يا حيدره صاح وطلع من النخل صوت
حتى الجماد بصحيته ظل يملك احساس
****
مثل اللهب ظل ينتقل ما بين الصفوف
كلشي تعب بس التعب  ما لاح الچفوف
الخاطر ابو فاضل تره مخلوقه الطفوف
يعني فرض حدر الجدم  هالحومه تنداس
****
كل الجيوش استسلمت  وين المفر وين
يم صارمه كظو سره  وهوسن الچفين
عاين عليه من الخيم  واتبسّم حسين
يا بعد عيني يالگمر  إفنيها الارجاس
****


الشاعر اياد الديراوي

  طبهه  الكمر   يم النهر    يم النهر

 طاح الكمر    يم النهر   يم النهر

..........١
طبها الشريعه        وابجفه رايه
اوصاح انه عباس    من الله آيه
اليوم اكلب الكون    عدكم درايه
ويه جيش الأشرار    تحله المنايه

  وين المفر .  حيدر حظر . يم النهر

...٢
صارت مذابح      يم الشريعه
خلاها طشار      حامي الوديعه
ديني ابركبتي     لا ما ابيعه
اويوم النصر كون    هاليوم اذيعه

محله  النصر . موش ابغدر . يم النهر
...  ٣
خله العساكر        حارت بأمرهه
حاصره الارواح    وابسيفه كرهه
جن حيدر اوصال    ليها اوزجرهه
اوكلمن يلاكي        ايده بترهه

كلمن عبر  ابسيفه انشطر  يم النهر
   
.....٤
من يشمر السيف     تذبح شمرته
اوكلها اتراجف        بس من حزرته
معروفه عباس    بالطف صطرته
لجل العقيله        يفدي مهجته

ماخذ حذر   من الكفر   يم النهر

......٥
زامطهم اوصاح     وين القياده
متعني هليوم       لجل الشهاده
واليعتنيني          ياخذ مراده
اورب العلى اختار   لجلي السياده

اسمع خبر جائكم سقر   يم النهر

.......٦

لئجل العقيده       دمي  ايتجاره
اوخليت الاعداء     كلهم حياره
اوذاك الظهر صار     اظلم نهاره
صاحوا يعباس        عفنه المعاره

 وينه الشمر .فنه اليمر . يم النهر
......٧

من ام البنين      عندي وصيه
أبييض وجهها     عند الزجيه
كالت يعباس      للغاظريه
ناذرتك انه      الزينب هديه

انه انتظر  تفدي العمر   يم النهر    
..
٨

اوزينب تناديه    والمدمع ايسيل
خافن يذبحوك     وادوسك الخيل
اخلافك يعباس    يتهدم الحيل
 ارجع يبو الجود    مو جلجل الليل

احنه بخطر  . نربي النظر  يم النهر
...٩

ياوسفه غدروك    واتغير الحال
اومن اليتامه     دمع الحزن سال
طاح الكمر طاح    هلغرب اوشال
بعدك يعباس     من يحمي العيال

راسه انطبر  ظهره انكسر  يم النهر

...١٠

من ودعيتك     مخنوكه الانفاس
صعبه ابغيابك       ابقه يعباس
تتدري اجرالي   من شفت الارجاس
يم الشريعه      كطعولك الراس
........
كلبي انفطر   شفت النحر   يم النهر

لخادم أهل البيت وخادمكم

ملا فاضل الشويلي
.............. لحنها موجود....

حوار  بين السيده زينب والعباس
هوسات


اعـــرفـــك زيـــن اعـــرفـــك يـاذخــر دنـيـاي
اشـلـون بـخـوف افـكـر وانته تـمـشـي ٱويـاي
سـبـع تــنـــعـــام مـــنـــك يالأخـــو الـــوفّــاي

        ( عـبـاس افــعـالــك مــشـهــوده )


يـا بـحـر الـكـــرامـــه الـعـالـيـــه اجـــروفـــچ
عـــهـــد لـلـمـــوت آنــــه ٱويـــاچ مـاعــوفــچ
أشَــلْــعِ ٱعــيــونــه والـلـه الــرايـد ايـشـوفـچ

         ( يـازيـنـب زيـن اتـعـرفـيـنـي )


طلعت ٱمــن الــوطــن بـيـك الامـل مـعــگـود
أنــه امــأمــنــه بوجودك وانتـه راعــي الجود
إشـــمــــا زاد الــعـــدد ادريــك قـــوه اتــــزود

         ( يـمـوسّـم بـٱوسـام الـغـيـره )


مـعـانـي الـخــوف مـنـچ يــخــتــي شـلـيـهـه
أنـــه الـعــبـاس مـــو كـلـــمـــات واحـچـيـهـه
اسـوي الـجـيـش سـبـحـه وهــيـچ افر بـيـهـه

         ( ومبخوت اليسلم مـن سيفي )


يــا لـيـث الـحـرب يـا حـــيـــد يـــمـــشــكـــر
يــالــزودك ورثـــتـــه ٱمـن الـفـحـل حـــيـــدر
اخــوي وزيــن اعــرفــك فـــارس وقـــســـور

          ( ما تخلـف مـن تنطي احچايه )


يـزيــنـب أنـــه اخــوچ ايــوفــي بــوعـــوده
مـــاهـــم الـحـــرب والـجـــيـــش وجــنــوده
اخــلــي الـســيــف يـحـصـد مـثـل حـاصوده

          ( وبعينچ يختي تشوفيني )


إلــي دگـيـت صـدرك مـن طـلــعـــت ويـــاك
صـافـي الـــدر اعـرفــه الـبـالـــزغـــر غـــذاك
كـلـك زود حــاشـــه اتـخـيّـب الـيـــنـــخـــاك

            ( يالـبـيـك اتـعـلـك دلالـي )


شنهي الجيش شنهي الخـيـل شنهي اسيوف
اخوچ وبالحرب تدرين زود امچرب ومعروف
لـسـوي الـگـاع حـمـره وعـيـنـچ انتي اتشوف

         ( مـا يـرحـم سيفي بعدواني )


يــــرفــعــة راس اخــتــك اعــــرف بــــزودك
بـيـك اطـــبـاع حـــمـــزه انـجـمـعـت وعـودك
ويـنـه الـبـي شـجـــاعـه ويـــوصـل احــدودك

         ( والـيـوصـل يمهه تكص راسـه )

                                  *---------------*---------------*

✍خادم الحسين (ع)
الشاعر رعد الجريخي

نسألكم الدعاء

نزال

بجـفوفك نسولف لسه بجفوفك             
وبزودك وعزمك صارن اطفوفك             
ــــــــــــــــــ

من نـزلـت بطـف اليكـفل الايـه            
گلي انطـيت يمه لزينـب احجـايه            
سـبع الگـنطره والحـامل الرايـه            
صاحـب غيره انته وجود معروفك            

بجـفوفك نسولف لسه بجفوفك             
وبزودك وعزمك صارن اطفوفك             
ــــــــــــــــــ

يوسـف جان عنـده اهدعش خوانه           
لحسـين الشـهم بس انتـه ريحـانه           
يـاريـحـه بخـور وشـايـل الـوانـه           
كمر عدانان ضاوي بكربله انشوفك           

بجـفوفك نسولف لسه بجفوفك             
وبزودك وعزمك صارن اطفوفك 
            
ــــــــــــــــــ

عالجيـش بخـزرتك تجـدح اعـيونك           
والسبـعيـن الف فـنـهم يـلاوونـك           
ويله الجيـش لو بس صكت اسنونك           
خـيرهـم عـثـر من تـزمخ احروفك           

بجـفوفك نسولف لسه بجفوفك             
وبزودك وعزمك صارن اطفوفك             

ــــــــــــــــــ

كلـت الحـومـه افيـضها بدماياهـم            
معركه البسوس بسـيفـك ويـاهـم            
شردو تـاه عـدهم حتـى مسراهـم            
مرادم صـار بالعسكر من تشـوفك            

بجـفوفك نسولف لسه بجفوفك               
وبزودك وعزمك صارن اطفوفك              

ــــــــــــــــــ

كض الـكاع بـيده وطـقها بالحومـه            
ينفـضـهـم نفـض ما تاخـذه الومـه            
بـس الـي تـضده تبـقى محرومـه            
خـزره وسيـف رتبه الي عالجتوفك            


بجـفوفك نسولف لسه بجفوفك               
وبزودك وعزمك صارن اطفوفك               

ــــــــــــــــــ

الشاعر زيـن العابدين الشمري

ابيات نعي
****
البارحه بصياط اخيتك حالمه
فزيت وبثوبي نيشان الدمه
منالحلم يحسين باقيلي اثر
وسمع ابضلعك يخويه انكسر
وياك احس چنها الخاتمه
البارحه بصياط اخيتك حالمه

البارحه الحلم چنه صدگ
شفت بخيامنه نار وحرگ
وشفت شايب ابصوطه يطگ
نياشين اصواطهم بانن زرگ

البارحه يستر الله منالحلم
گمر مثلوم غاب ويالنجم
انه الخايفه يحسين واهم
مصيبه وخاف ماتطلع سلم

شفت خيل وعجاجه اسيوف
ورجف گلبي ودخل بي الخوف
وشفت عسكر اميه اصفوف
دگو للحرب خويه ادفوف
احس وياك چنهه الخاتمه
البارحه بصياط اخيتك حالمه
***
خادم خدام الحسين عليه السلام
محمد نعمه السكيني

شلون اصبر لا محال. اتمنه كل هذا خيال

اتصيح  ياعباس خويه وينك انت يا ابي
شلون ترضاها عليه بعدك انه انسبي
امشي بين اجيوش اميه ويحدي بيه اجنبي
الرايه بعدك ستر صارت سند صارت للعبي

حايره بعدك اصير.  وحدي امشي بالمسير
حافيه فوگ الرمال. اتمنه كل هذه خيال




يبو فاضل يوم اجينه گتلي ياخويه وعد
انتي والعيله برگبتي هذا وعدي للابد
اِنكسر ظهر حسين بعدك وحده ماظله سند
لا اخو ظل اليعينه ولا بقه صاحب بعد

انكسر ظهر الولي  صاح بويه ياعلي
انظر وعاين الحال. اتمنه كل هذا خيال



انه بعدك يخو زينب بعد ماريده العمر
تدري  عكبك يبو فاضل امشي حافي عالجمر
عالمتن خويه ضربني بسوطه يا وسفه الشمر
انه بت فاطمه الزهره يفتخر بيه الخدر

بعدك وبعد الحسين   بينه يحدي الحادي وين
بينه ويگود العيال.  اتمنه كل هذا خيال



صبر ماظل بعد عندي وانه اشوف القافله
تسري بينه واحنه يسره ابين شمر وحرمله
صحت وينك گمر  هاشم يا ابن عقد الوله
خويه ما اكدر اروحن شلون اعوفن كربله

صحت ياخويه تعال. اتمنه كل هذا خيال

قلمي أم حوراء البركاوي

مــن طحـــت يــم النهـر
تدري شنهي الي انكسر
ظهر الحسين يا أبو فاضل يا أبو فاضل

*
يا ابو فاضل من رحت صوب الشريعه
بقـه أمنـاطــر جيّتـك روح الـوديعــه
شحالــه لمّــن شـــاف چفينــك گطيعه
ضاگـت أبعـين الاخو هــاي الــوسيعه
ناده يا خويه الگمر بيك اشد انه الظهر
صار نصين يا أبو فاضل يا أبو فاضل

*

تــدري يا خــويه شجـره ذيـچ الظهيره
ابطيحتك ظهــره انكسر شيـخ العشيره
ومن رجع للخيمه شفت أبوجهه حيره
چنــه گلــي صرتــي يــا زينــب أسيره
من أجه وهل مدمعه بعينه شفت المشرعه
وبيهه چفين يا أبو فاضل يا أبو فاضل

*
من رجــع للخيمه يــا خــويه وسألته
گتلـــه ويــن الكافـــل وهلّــت دمعته
عينه گالت عـل النهر يا وسفــه عفته
أبصفه جـــوده ورايته وچفينه شفته
شفت يا خويه الِأمرْ بالسهم طافي النظر
ماخذ العين يا أبو فاضل يا أبو فاضل

*

خـويه يــا فگـــد الاخــو يسعــر لهيبه
وابد مــا تشبها كــل محنــه و مصيبـه
حسين صارت روحه من بعدك غريبه
نــاده چنــه منين ابـو فاضـــل أجيبـه
يا نظر عيني وعمّت وي سهم عينك طفت
ناده الحسين يا أبو فاضل يا أبو فاضل


*

شگــد رزايـــا مـــرت بــروح الزچيه
مثــل فگـــدك ابــد مــا مــرت رزيــه
طيحتــك اكبــر مــآسـي الغاضــريـه
حسين داست صدره بعدك الاعوجيه
هذا يا خويه الجره حسين گطعوا منحره
بالميادين يا أبو فاضل يا أبو فاضل

*
الشاعر
موسى البديري

للعباس ع
أوگف اعلى المشرعه
من وزن المثلث
شعر..دكتور كاظم المعقلي
♕♕♕♕♕♕♕♕♕
حالف اليوم.. على الگوم.. اسوي الماجره
آنا عباس.. وفا وباس.. اسألوا الگنطره
آنا أول اربعه
أوگف اعلى المشرعه
أگلب الكون..على الكون..وأسوي مجزره
آنا عباس.. وفا وباس.. اسألوا الگنطره
♡♡♡♡♡♡♡♡♡♡♡
انا دربني الصميده وسيفي بيدي
آنا ساحات الحرب والحومه عيدي
انا بس المايفر بالحومه صيدي
يمهم اوگف وارتجز وأقرا بنشيدي

وين الابطال.. والرجال.. اريد المايفر
ارد الاگيه...واراويه..نجوم البالظهر

خلي يسعى اللي سعه
اوگف اعلى المشرعه
ياهو بي زود..اله زنود.. أظل امناطره
آنا عباس..وفا وباس..اسألو الگنطره
πππππππππππππππ
جودي بيدي وواگف ورافعلي رايه
أروي للتاريخ اريد أعظم روايه
هذا نهر العلگمي ويامحله مايه
گبل اخوي أشرب فلا ارضاها هايه

فرّت اعداي..عن الماي.. غصب عنهم فتت
هاي الاصناف.. بالآلاف.. فلا منهم هبت

جيش أميه أگطَعه
أوگف اعلى المشرعه
خل يشوفون..يخبرون.. اليدري المادره
آنا عباس.. وفا وباس..اسألو الگنطره
πππππππππππππππ
آنا اجيت الموت الاگي الموت أريده
أنا اسلاحي المبدأ ودرعي العقيده
اليريد العزه يبذل دم وريده
ايخلي روحه ابراحته ويحملها بيده

وانا من جيت..تعنيت.. اريد الملحمه
اگطع ارگاب.. ولاهاب.. واسوي الطف دما

للي رايد مصرعه
أوگف اعلى المشرعه
خلي التـْفوت..تجي تموت..علي تلزم سره
انا عباس.. وفا وباس.. اسألوا الگنطره
ππππππππππππππ
انا عباس وصدگ عابس عليهم
غاضب ابوجه العدا وما اختشيهم
عيني بيها اسهام اذا تتصدى ليهم
ماكو حاجه ابسيف اداهمهم وأجيهم

حرب العيون..يشوفون..اذا جدحت غضب
بيّه يدرون..اخو ام عون..اشَوّفهم عجب

عزمي حيدر منبعه
أوگف اعلى المشرعه
لمن اتشوف..الصـْفوف..ترد امقهقره
آنا عباس..وفا وباس.. اسألوا الگنطره
ππππππππππππππ
آنا للطف معتني وحامل رساله
بيها ابوي المرتضى انطاني الكفاله
انطي للخوّه مضامين الجلاله
امي وصتني وأنفّذ لا محاله

مضرب أمثال..للاجيال.. وفاء الخوٌه الي
آنا لحسين..علَي دين.. وصيه ومن علي

زودي حيدر مرجعه
اوگف اعلى المشرعه
بيدي بتار..غضب نار.. زلمهم تحـْذَره
آنا عباس..وفا وباس.. اسألوا الگنطره
ππππππππππππππ
آنا عاهدت العقيله او عد عهودي
ينگطع راسه اليمر مره بحدودي
ماتواجهني الزلم يدرونه زودي
الا غفله وبالغدر تگطع زِنودي

كون الازلام.. لها اقدام..عليه تتـْجِه
مو يغدرون.. يخِتلون ..ردت وجه بوجه

وره النخله امجمّعه
اوگف اعلى المشرعه
وطول الايام..هالاقزام.. تظل امعيّره
آنا عباس..وفا وباس.. اسألوا الگنطره

ابذمة الله … كافلي وآنه في ذمته
ابذمة الله … عالنهر وآخر چلمته
سامحيني … سامحيني
… … …
عالنهر جف الدمه ابعينه اوجبينه
اومن شفاهه فاضت الچلمه الحنينه
“سامحيني” للخيم واصل ونينه
منه أعرف گّطعوا اشماله اويمينه
جاني صُوته … منكسر خجلان آسف
جاني صُوته … واذكرت عشره ومواقف
يا حنيني … يا حنيني
… … …
عشره حلوه كلها إحساس اومحّنه
منها أفهم صمت اخويه اشلون ونه
أعرف احساسه ولا في اگسه منه
واگع ابصوب النهر وابباله سكنه
ابگلبه حرگه … والنهر ياوسفه بارد
ابگلبه حرگه … والسهم في عينه جامد
نُور عيني … نُور عيني
… … …
صاح يختي العدو يمي قهرني
يشمت ابحالي اوسهم عيني كسرني
والأشد لحسين حاير من نظرني
يرجع اشلون لسُكينه التنتظرني
ابعينه عيني … وگتله سهمي لا تشيله
ابعينه عيني … ومستحي من العقيله
لا تجيني … لا تجيني
… … …
جانه لحسين اوعمود الخيمه ذبه
ماحچه لن الخبر جارح يعذبه
اوسكنه تحسب الوعدها جاب عذبه
ليته ملچ المُوت ينده مُوته چذبه
ابهالعلامه … أعرفت طايح عمدنه
ابهالعلامه … أحضنت بالگوه سكنه
وابونيني … وابونيني
… … …
صُوت اخويه انگطع ماصرت اسمعه
بس خرير الماي مشتد وأتبعه
مُو عذب مجراه يجري هسه دمعه
وابكتر لچفوف رايح لليجمعه
صاح مايه … خذني بچفوفك يساقي
صاح مايه … چم طفل مُحروم باقي !
من معيني … من معيني
… … …
مُحرم ١٤٤٧هـ _ 2025م
إبراهيم حسن الجاسم 🖊️

نزلة للقاسم عليه السلام

هاشمي ودم حيدر بشرياني
وما ابايع ناصبي وسفياني
........

آنه من صلب الحسن بچّاكم بحرب الجمل
القاسم باول شبابي  افتـدي خير العمل
آنه ابواليمّه امامي.  مو يزيد ولا هُبَل 
ما اطخ للذلّه راسي  شامخ بعلو الجبل

بحب ابواليمّه كمل ايماني
وما ابايع ناصبي وسفياني
........

حسين ابن خير البرية.  تابع لجدّه النبي
ما يبـايــــع آل اميـة   ولا يزيد الناصبي
آنه متربي عله ايده.   هوه ديني ومذهبي
اليوم اراويكم قتاله.   من يسل سيفه الصبي

والدي بهذا الأمر وصّاني
وما ابايع ناصبي وسفياني
........

القاسم آنه وهذا سيفي.  عوض عن سيف الحسن
والـــدي وصّه بوصيته.    وآنه ابنه المؤتمن
انصر المظلوم عمي.      وهزم اصحاب الفتن
أليمس عمي بأساءة      راسه اشلعه امن البدن

إلا آخذ ثاري يا عدواني
وما ابايع ناصبي وسفياني
........

مثل ما گال وتوعّد.    للحرب طب مبتسم
القاسم بسيفه غزاها   وشردت اشباه الزلم
گام بصفوف آل اميه.   يطشّر بسيفه ويلم
الفارس اليوگف گباله.   ينذبح لو ينهزم

آنه من بيت النبي عنواني
وما ابايع ناصبي وسفياني
........

عجزوا يلاگـونه كلهم.   سوّه بيهم ملحمه
هاشمي وارث شجاعه  من علي حامي الحمه
بالغدر گدروا يجوله     بني امية المجرمه
صوّبو بالسيف راسه.   طاح مخضوب بدِمَه

صاح يا عم فدوه لجلك آني
وما ابايع ناصبي وسفياني

سيد زيد الفحام
____

نزله للقاسم عليه السلام

وينه اليمس حسين   يا آل اميه
وبن الحسن موجود   بالغاضريه
.................

ابن الحسن ياناس والقاسم اسمي
ربّاني عالكلفات من عزمه عزمي
وصاني بالطف كون اوگفله عمّي
لازم اوفي اليوم   عهد الوصيه
.................

اوگف لبوالسجاد وگفت عضيده
ويله اليمسّه بسوء اگطع وريده
لو ينحجب بالغيم اوصل وصيده
والمايصدگ هاي   خل يدنه ليه
..................

آنه الفتى المغوار وينه الينازل
وارث شجاعه وزود منّ ابوفاضل
متهمني لا والله هاي الجحافل
دون الحبيب حسين   اهوى المنيه
.............

سيف الحسن معروف لابد تذكروه
بالقاسم ابنه اليوم كلكم تشوفوه
غالي الثمن بالموت لازم تدفعوه
ثار الحسن وحسين   يرجع بديه
................

ما همني بالميدان يكثر عددكم
بالسيف احز الروس وسحگ جثثكم
يامن غدرتو حسين حالف اذلكم
قوة علي وعباس   موجوده بيه
................

ماعوف ابوالسجاد عمي وامامي
واجب انصره اليوم اوفي بكلامي
ذاخرني ابوي لهاي آخذ وسامي
بالطف اسمعه وياي   سلّم عليه
................

للغالي فدوه يروح عمري وشبابي
يايُمّه لا تبچين فرحي بمصابي
آنه النصرت حسين والدم خضابي
وتخلّد اسمي وياه   روح الزچيه

#سيد #زيد #الفحام
____

‏مقطع صوتي من mlahythmallamy

يمه حسين واويلاه
يمه حسين واويلاه
ــــــــــــــــــــــــــــــ
اجيت الكربله يحسبن .. اجيتك وأنه محـــنيه
اجيت ايدي على اضلوعي .. يمه وحيل مابيه
اعوفك بالصحاري شلون .. وانت الروح والريه
كون اهنا اضل بالطف.. وابنيلي حسينيه

يمه حسين واويلاه
يمه حسين واويلاه
ــــــــــــــــــــــــــــــ
ييمه امن الگفه مذبوح .. ونحرك ظل يفيض ادماه
اجيت أنه بظلام اليل .. اصبعك يمه ويـن الــــگـاه
بقيت امحيره يحسين .. ويـسندني الحــــزن والآه
اظل اوي الجسد يحسين.. راسك من يروح اويـاه

يمه حسين واويلاه
يمه حسين واويلاه
ــــــــــــــــــــــــــــــ
ليش اعلى الوجه مگلوب .. ومطبور اثنعش طبره
نايم عالرمل يحسين .. وتـچـــوي اضلوعك الغبره
وسفه الماي شح اعليك .. وماحــــصلت ولا گطره
يايمه وجر اعليك .. الف شـوغـه والـــف حــــسره

يمه حسين واويلاه
يمه حسين واويلاه
ــــــــــــــــــــــــــــــ
ماضل كتر سالم بيك .. چـنـك مـــاي متـــبدي
بيك الف وتسعميه جـــــــروح تسيل وتنـــدي
مصابك هيج احزاني .. وذكرني ابسطر خـــدي
شلون اتحملت يحسين .. يمن يومك مرد چبدي

يمه حسين واويلاه
يمه حسين واويلاه
ــــــــــــــــــــــــــــــ
خلني اوياك اظل يحسين .. شلون آنه ابتعد عنك
واتوسد ابكترك ريت .. ومــــن نـحــرك اشمـــــنك
اخلي ايدي حدر جسمك .. على امصابك اعيننك
لا اگـدر اظـل يـمــــــك.. ولا اگـــــــدر اعوفــــــنك

يمه حسين واويلاه
يمه حسين واويلاه
ــــــــــــــــــــــــــــــ
حيدر بشار الدراجي
#جديد_محرم_الحرام_

عزيز امه انسحك بالخيل
واجته اخته تلمه بليل
ماخذهه التعب كل حيل ما بيهه
1
من سابع سمه وينظرهه رب الكون
كعدت يم اخوهه ابلايه شوف ام عون
حارت جسم اخوهه اتلمه مدري اشلون
مسحوك اعله طوله وما بقتله امتون

حارت … تجمع ،،،
جسمه ابيا حيل
صاحت … يارب …
طشروو بالخيل

طشروو خيرك اعله الكاع ... وكل حافر اخذله امتاع
من اضلوع اخوي الداست اعليهه
............2............
أجت بس ما اجه وياهه يويلي الحيل
وخطوات الدرب كظتهه عثره بليل
متّربه العبايه وساحكتهه الخيل
كوه اجر نفسها والطريق اطويل

لطمت ،، ونت ..
لحسين اهواي
أوصلّت … وحشه ..
الموته ابلا ماي

توضت زينب بدمعات
اوقرتله الفاتحه لوعات
وصلاة الوحشه صلّتهه بنواعيهه


_3_
من بعد الدواره الدورتهه اهواي
وصلت يم اخوهه الفاكده اجم راي
اجته وجايبه وياهه طاست ماي
تكله اكعد اروي اضماك عوف اضماي

جيتك .. خويه ..
اتكله بعنوان
اكعد … واروي…
الجبد العطشان

جبت الماي إلك يحسين
بس راسك أجيبه امنين
اشربك ماي من النحر تاليهه


==4==
بدت تجمع بخوهه الما بقاله امعين
واول شي تجمعه رادت الضلعين
ما كدرت تلمهن مارديهن زين
ظلت بالأرض تحفر تدور حسين

بلكت … تلكه …
أشويه من المات
حفرت .. شافت ..
ضلعه ولجمات

يصب نحره اعله طوله دموم
وجرح شابك جرح ملجوم
يفز حسين كل ما مدت ايديهه
...............

5
فرشت شيلت امهه ابمصرع المذبوح
وكل ساعه تشد منة جرح مفتوح
واتوخر التراب البل نحر وتنوح
ومن كد ما بجتله منهه طلعت روح

صورت .. زينب ..
تبجيله عيون
خلت ،،، كلشي ..
ينوح اويه ام عون

حزنهه اخته اعله ذبحه اهواي
بكثر ما عطشوه للماي
لذلك بجت الكون ابواجيهه
...............

6
ابسرعه الليله عدة عالعقيله ابساع
ما لحكت تودع حسين خوش اوداع
ولا كدرت تعوفه امطشر اعله الكاع
الوكت من عدهه ضاع بخنصره الي ضاع

خلَصت .. ليلة
حادي المقتول
أدور … خنصر
ضايع بالجول

عليهه ابسرعه طر الانهار
أتعبت بس ما لكتله آثار
ضاع الخنصر وظلت مآسيهه
::::::::::::::::::::::::::::::::::
✍🏻💔 كلمات موسى الخادم
#جديد_محرم_الحرام_