قصيدة بحق السيدة زينب عليها السلام


بت علي وخير النساوين  فكروا مسبية
امتداد الثورة لحسين  ثورة صارت هية
بزينب الدين انتصر   والكفر ظهرة انكسر
ثورة صارت هية
======================
زينب ومن بعد ما طاح الحُسين  فرحوا امسلبيها
ما دروا دم ابو اليــــمة البالوريد  هو نفسة البيها
ذلت ايزيد بقصر حكمة العظيم  ياهو يوصل ليها
تحچي من مركز قيادة بكل صمود  والحبل بيديها
ما تذل الحرة هـــيهات   بت علي معروفة
زينــــــــب ربات الاباة   ذلت اهل الكوفة
بنهج اخوها والاثر    الكفر ظهرة انكسر
ثورة صارت هية
======================
التنسبي عد الطغات الظالمين  تنذل ايخلوها
وزينب اتوقعـــــوا تنذل لزيد  اتسرعوا سلبوها
صح اسيرة وبالحبل مچتوفة حيل  وللقصر طبوها
هدمت عرشة وصبح هو الاسير  اتورطوا جابوها
القضية ابعكس تندار   والحكَ اتعلاها
شما يحاول ذلها يحتار   شامخة يلگاها
ثبتت نصر النحر   والكفر ظهرة انكسر
ثورة صارت هية
======================
فكد كــــــيدك يا يــــزيد ولا نهاب   العلي علانة
أسعى سعيك احنا نبقى مخلدين  ابآخرة ودنيانة
انت ايامك عدد واحنا النعيش  خسر مَن عادانة
احنا ال الــــنبي وانـــتم طُلقاء  ها يبن مرجانة
شما تحاول احنا باقين   وانت من يتبدد
احنا نبقى بطول السنين  كل وقت نجدد
سكتت كلمن حظر   والكفر ظهرة انكسر
ثورة صارت هية
=======================
زينب وبس هية مــــرت بالزمان  الوريثة لأمها
شافت اهوال التهد حتى الجبال  والحزن لازمها
ورثت الكرار بالــحكَ ما تلين   الشمس شيضمها
بالحنان حســـين صارت للعيال  رايتة سلــــمها
حطمت صرح الطواغيت  والخصم هاباها
الهه صار بكل وكت صيت  والزمن عاداها
بيها الاسلام افتخر    والكفر ظهرة انكسر
ثورة صارت هية
========================
هية عنوان الصـــبر والانتصار   منها ناخذ عِبرة
صوتها الثوري يدوي بكل زمان  ما تموت الحرة
صح حزينة والحزن فاق الخيال  وبالعيون العبرة
بس بقت تمشي على نهج الحُسين  وكملتها الثورة
صعبة لمن تطب ديوان   عالغريبة هواية
من عليها الكان ما كان  حققتها الغاية
ما تذل اخت الگمر   والكفر ظهرة انكسر
ثورة صارت هية
==========================
أسألكم الدعاء رائد الاسدي

ضايع ابلا خدمتك
لولا نظرة رحمتك
يا حسين
ــــــــــــــــــ
بين الدروب البعيدة بلا عزاء تشتت
واجمع بأفكاري لكن جم الف مرة متت
حاولت ابحر بدونك بالبحر دمعه ضعت
ضايع بصحرة وادور عن نهر بس ماشفت

ما رويت محبتَك
لولا نظرة رحمتك
يا حسين
ــــــــــــــــــ
منك الدنيا خذتني وجردتني من الدمع
والسواد بقلبي واصل بالذنب حد الضلع
بقلبي ما خليت ذنبي يأثر وبي ينطبع
صرت تحت اخيام فضلك من بشر مابي نفع


انحرم من نعمتك
لولا نظرة رحمتك
يا حسين
ــــــــــــــــــ
كمت احس نعمة عطائك تنسلب مني بعجب
دورت عن الحقيقة واعرفت شنهو السبب
ناري خمدت من اذكرك جانت بروحي لهب
صرت واحد ما اهمك جنت احس اني وهب


دمعتي ما همتك
لولا نظرة رحمتك
يا حسين
ــــــــــــــــــ
رغم كل أخطائي لكن رققت قلبي الك
اني عبدك وانت تعرف عبدك بدونك هلك
سيدي نادم اجيتك جدمي يم بابك سلك
امي ما عدها محنة بگد حنينك ونملك


انحرم من رأفتك
لولا نظرة رحمتك
يا حسين
ــــــــــــــــــ
مستحيل أكدر بدونك لحضه اعيش ابلا هوه
علتي صعبة وخفية و فقط بس ذكرك دوه
تروي جبدي وانت ضامي وجبدك بنار انجوة
الكون ما يحتوي إحساسك قلبك الكون احتوة


تنهي كون بدعوتك
لولا نظرة رحمتك
يا حسين
ــــــــــــــــــ
نضرة منك عندي تسوة عمري هذا بأكملة
انت باب الله الوسيعة ما اليرد كل مسئلة
سيدي اجعلني خادم قلبي انته تكفلة
ذنبي قاسي أشعر يألمك من سهم من حرملة


ذنبي بخيامك فتك
لولا نظرة رحمتك
يا حسين
ــــــــــــــــــ
الشاعر زين العابدين الشمري

اللهم عجل لوليك الفرج
ــــــــــــــــــ
يومك تأخر يمهدي واحنه منتظرينة
يابو صالح والله صعبه الناس تشمت بينة
ناس ما تؤمن وجودك ناس تنشد وينة
علة بغيابك يمهدي وطلعتك تشفينه


اللهم عجل لوليك الفرج
ــــــــــــــــــ
سيدي ويومية هجمة وبالأخص عالشيعه
ناس تحجي وناس تنقد صوت حقنه نذيعه
تريدنا نعوف الولاية والوصي منطيعة
بالكواكب كلها حيدر مستحيل نبيعه


اللهم عجل لوليك الفرج
ــــــــــــــــــ
سيدي ويومية حاقد روج بعنوانا
بس شعارات وقضايا ضد نهج ايمانا
وقابلة ذيج الجماعة يحترك قراءنا
بس عراقك يابو صالح طلع ضد الخانا


اللهم عجل لوليك الفرج
ــــــــــــــــــ
سيدي وكلش تعبنه وسقطونة هواية
حرفوا كل القضايا وحرفوها الآية
والله والآراء صارت كلمن وبس راية
والجهل صاير ثقافة يبدي من حجاية


اللهم عجل لوليك الفرج
ــــــــــــــــــ 
هواي مثل أصحاب موسى والعجل بديارهم
كلمن وبس تاج راسة تدري عن اخبارهم
طلع معدن ناس كثرة وبينت أسرارهم 
والعبودية وسافة علموها ازغارهم


اللهم عجل لوليك الفرج
ــــــــــــــــــ
اكو بعض البشر عنده فقط بس يجامل
خاف من يحجي الحقيقة بالمضرة يقاتل
واكو هواي الحق تشوفة وتعتمد ع الباطل
واكو يستاهل تحية واكو ما يستاهل


اللهم عجل لوليك الفرج
ــــــــــــــــــ
قلة من الي عرفها وانتظر بجروحه
وصان نفسه وصان بيته ماكو كلشي يلوحه
وما دنه اعله الشبها ابداً حفظ قلبه وروحه
تلكة بيبان الذنوب العنده ما مفتوحة


اللهم عجل لوليك الفرج
ــــــــــــــــــ
سيدي اسوالف جثيرة اللي تگدر الخاطر
هالوكت هاي الشباب وبالمصيبة تخاطر
حاوطوا بينه بقضايا جنها جيش العاشر
ما نعرفه المنة بينه ومنهو ضدنا الكافر


اللهم عجل لوليك الفرج
ــــــــــــــــــ
سيدي وهاي المصايب يمك وتدريها
ما أزيد جروح قلبك وانت تعلم بيها
لجن يا مولاي والله نخاف من تاليها
خاف يأخذنا ركضها الدنيا وي رجليها 


اللهم عجل لوليك الفرج
ــــــــــــــــــ 
الشاعر زين العابدين الشمري 

ودعتك الله خوية يحسين
ــــــــــــــــــ 
ودعتك ونار الهجر حراگة
موهين امشي بلا اخوا عالناگة
هذا القلب مل الحزن بفراگة
يم الزجية بالحشر نتلاگة

ودعتك الله واحنا ماشين
ــــــــــــــــــ 
راح امشي خوية والدموع بعيني
بس خوية عنك قلبي ما ينطيني
يالمنذبح فوگ الرمل حاجيني
بلكت تبرد قلبي وتواسيني

ودعتك الله وي المطاعين
ــــــــــــــــــ
راح احسب بهذا السفر لأيامي
بلكت اموت وتگضي كل ألامي
عفتك جسد يبن أُمي نحرك دامي
راسك انُظرة اعله الرمح گدامي


ودعتك الله وانتَ نصفين
ــــــــــــــــــ 
يا حيرة ما مرت مثل هالحيره
من دِيره يسبوني يخوية لديره
وبينه التعب ما ينشرِح تفسيره
هاي الرزية يا حُسين جبيرة

ودعتك الله يا ضوه العين
ــــــــــــــــــ
راح الدلال اعله الترب بالهيمه
كلشي حترگ ياخوية وي الخيمه
بس الله يعلم قلبي همه وظيمه
من روحتك يالغالي يابو الشيمه


ودعتك الله وراحت سنين
ــــــــــــــــــ 
باجر يضربونه بحقد يالوالي
خوية من أكابِر والدمع جتالي
من الألم گيد الحبل شل حالي
باجر اشاگُف من تلوذ أطفالي

ودعتك الله بدمع إلِونين
ــــــــــــــــــ
هالليلة وحشة وزينبْك حزنانة
مثل الشمع حيلي انتهىٰ وذبلانة
تعبانة خوية وبلكي اموت هنانة
مهمومة مهضومة واظل حيرانة 

ودعتك الله  وميتة كل حيّن
 ــــــــــــــــــ
شيْطيب الخاطر يبعد الخاطر
حزن القلب جنة انطحن بالحافِر
آهْ يا جرح آهْ يا مصيبة عاشر
باجِر يخوية عنك احنا نهاجر


ودعتك الله وما ألي معين
ــــــــــــــــــ 
 
الشاعر زين العابدين الشمري

هاي الخدامه كلها خير ونعمـه
والما نظر هالنعمه يحشر اعمه
ـــــــــــــــــــــــــــــــــــــــــــــــ
بارينـــــا بالطـــافه ينزّل رزقه
وكل واحد بهالدنيا ياخذ حقه
واليخدم بأخلاص يعله ويرقه
صافي الگلب والخدمه تمشي بدمه
ـــــــــــــــــــــــــــــــــــــــــــــــ
راحتنـا بالخدمه فقط شفنـاها
هنياله كــــلمن نيّتـــــه صفّاها
والنفسُ قد افلحَ من زكـاهــــا
أتزكي النفس شفناها هاي الخدمه
ـــــــــــــــــــــــــــــــــــــــــــــــ
وجهه ابيض اليخدم عزيز الزهره
بالخير هالوادم تذكـره ابگبره
بالآخره والدنـــيا طيب ذكـره
واللزم درب حسين هو يلزمه
ـــــــــــــــــــــــــــــــــــــــــــــــ
يوفقنا ريت اويه الخدم بارينا
ونخاف من هالدنيا لا تغريــــنا
الباري برحمته هوه لينــجــينا
وينظر يريت بعطفه نظرة رحمه
ـــــــــــــــــــــــــــــــــــــــــــــــ
بهل الخدمه غايتنه فقط حب حسين
ونتشكر بفــضله علينه بكل حين
بهـاي العقيده كمّل الباري الديــن
هالخدمه صارت چن هوه ونشمه
ـــــــــــــــــــــــــــــــــــــــــــــــ
لو أهلي عيني ابموتـتي سدوها
وجنازتي فوگ الچـتف شالوها
اسألكم الخدمه فقـــط اهدوها
الخادمكم الجوه الترايب جسمه
ـــــــــــــــــــــــــــــــــــــــــــــــ
حيدر بشار الدراجي

ماهبت منهم
من وزن المجرشه
شعر..دكتور كاظم المعقلي
♕♕♕♕♕♕
لا ماأذل من ذبحو الوالي
آنا العزيزه وابقى للتالي
آنا الچبيره او بالمجالس زغّرتهم
من هيَّ زينب بت محمد خبّرتهم
آنا العزيزه وابقى للتالي
♕♕♕♕♕♕
ياشيعه آنا ام الخدر وبعزة امي اتحلّه
بت فاطمه آنا وبت علي ودرب الكرامه اندله
آنا اخت الحسين الصـدح (هيهات منا الذله)
ماارضى يوصفني البعض عن كبريائي اتخله

مااقبل ايوصفوني مذلوله
ماارتضي ولا هايه مقبوله

من اخطبت آل الفسق ماقدّرتهم
من هيَّ زينب بت محمد خبرتهم
آنا العزيزه وابقى للتالي
♕♕♕♕♕♕
آنا اللي عمري امخدره ومحد يشوف اخيالي
أحمل صبر حيدر علي مهما جرا ويجرالي
ابقى بشموخي ومااذل رافعته راسي وعالي
مكسوره صح بس ماهنت يم اليريد اذلالي

مهيوبه يم الطاغي شافوني
ما انثني ولا غيرت لوني

بيهم صحت ومن العواقب حذّرتهم
من هيَّ زينب بت محمد خبرتهم
آنا العزيزه وابقى للتالي
♕♕♕♕♕♕
وَصفُوني وصف ام الصبر رمز الصبر خلُوني
زينب أنا ومو بس حزن مو بس دمع تدروني
آنا التحدي آنا الحزم آنا الشموخ افنوني
من گتله كد كيدك رجف بالمجلس وهابوني

منطق علي بمجلسهم احچيته
والگصده ذِلي ابحچيي ذليته

لا مو اسيره وبالمجالس اسّرتهم
من هيَّ زينب بت محمد خبرتهم
آنا العزيزه وابقى للتالي
♕♕♕♕♕♕
ديوان اميه ومجلسه الشاهد يظل لأقوالي
من گتله ماتمحي الذكر يبقى الذكر متعالي
ظل ناصب واسعى السعي سعيك فراغ وخالي
يبرالك الذل والخزي وانا الفخر يبرالي

من كربله استلهم معانيها
والدم على السيف انتصر بيها

مو انت ال احرزت النصر يللي اذبحتهم
من هيَّ زينب بت محمد خبرتهم
آنا العزيزه وابقى للتالي
♕♕♕♕♕♕
ياشيعه زينب مو فقط دمعه وبچي اتحسبوها
ومو بالمجالس بس عزا وبس لطمه تعتقدوها
رمز الشموخ بكربله زينبكم اتذكروها
مسؤوله من بعد السبط عالعيله لاتنسوها

آنا الكفيله اخلاف ابو اليمه
ذممني بيها احسيني هالذمه

وتكفلت واحفاد اميه الحيّرتهم
من هيَّ زينب بت محمد خبرتهم
آنا العزيزه وابقى للتالي
♕♕♕♕♕♕
لو مر محرم لو صفر رفعوا ابتحدي الرايه
ادريكم ابدرب السبي اتلاگوني بالمشايه
انا أدري تطوون الدرب ماانسى الكم هايه
ومسجّلتكم بالسجل ياشيعه يلوفّـايه

مثلي الدرب بالحسره تطوونه
وتمطر دمع واحدكم اعيونه

آل الزنيم بهالمدامع حطّمتهم
من هيَّ زينب بت محمد خبرتهم
آنا العزيزه وابقى للتالي
♕♕♕♕♕♕

باچر كلشي يشهد حتى العيون 
شمحلاهه ابسجلك دمعه يلگون 
الف هنياله مرتين...... .اليبچي ابمجلس احسين 

.....................

الف هنياله التسجل خادم او من العبيد 
حلوه لو تلگه ابسجلك باچي لحسين الشهيد 
وهيه لو مالدمعه هايه كلشي عندك مايفيد 
ولو متت باجر يخادم حسين يحظرلك اكيد
 
خادم من عبيدك لو شسع جون 
تحسبني اريد امن اليخدمون 
تشجع ام البنين......   اليبچي ابمجلس حسين 

.........................

حسين يعرفني واعرفه ودوم اذكره بكل مسه 
حاشه يتركني بغربتي وانه حاضر مجلسه 
انه من احضر مجالس بعشگي اقلد  عابسه 
انه من گد مااحبه حبي ياهو ينافسه 

مجنون بمحبتك دوم مجنون 
خليهه البشر عني شيكولون 
 يحضره بدمعت العين .......  ليبجي بمجلس احسين 

........................

هيه مو شغلت تفاخر لارياء او عاطفه 
يمشي الحسين ابوريدي حبه ابد مااوصفه 
الخادم الله شكد يحبه وخله بي هاي الصفه 
مايمل من الخدامه ولا يتاني توصفه
 
بالجنه اباهي العالم هناك 
انه الخلصتهه دوم وياك 
يامحلاته الونين… . اليبچي بمجلس حسين 

..........................

كل عشگ بالدنيه هايه ينتهي وماضي ايغدي 
وعشگ ابو سجاد باقي بلا نهايه ويبتدي 
خادم او ثوب التواظع بحب الحسين ارتدي  
بالگبر لو جاني منكر ليه يفزع سيدي 

انه شمااسوي مااوافيك 
يالواكفلي دوم شلون اجازيك 
خادم صارلي سنين .......ليبجي ابمجلس حسين 
......................

انه لحسين انتمائي ومن عشيرت فاطمه 
وماتهمني انه الاسامي ولا ملام اللايمه 
انه لامساني سوط ولاسيوف ولاظمه 
لو حجه المله ابمصابه روحي تطلع لسمه 

من اذكر مصابك تبدي الآلام 
وگلبك بالحوافر رد للخيام 
اه يمصاب الحنين .....ليبجي ابمجلس احسين

.....................



حسين الزيدي

عمتااه .. مَنَ الذي أيتَمَني؟
عمتااه .. مِن غَفوَتي أَيقَذَني
عمتااه ..عمتااه
----------------
عَمَتي ماذا صَنَعنا ؟هل خُلِقنا كَي نَضيع؟
هَل ذَنَبنا حتىٰ نُجزىٰ هكذا سبياً فَضيع؟
عَمَتي من ذا يقودُ ضَعنَنا عِنديْ سُؤال!
أيُ قــائِدْ. لا يُــبالي في مُراعات القَطيع؟

عمتااه ..فَـأيُ رأساً والدي
عمتااه .. وَلا يَصِلّهُ ساعِدي
عمتااه .. مَنَ الذي أيتَمَني؟
عمتااه .. عمتااه
000000000000000
دَمعَنا مِهراقُ يَنزِل في خُدوداً مُترَفات
وَأنجَمعنا تَحتَ ضِلاً بَعدَ أنْ كُنّا رُفات
كانَ ضِلْ رَأساً جَديراً انْ يَكونَ في السَماء
وَاعتَلى فوقَ القناةِ مِنْ هَوانْ السٰامِيات

رأسُ مَن؟ .. يُرَتِلُ في المُصحَفِ
رأسُ مَن؟ .. بهِ الجُيوشِ تَحتَفي
عمتااه .. مَنَ الذي أيتَمَني؟
عمتااه .. عمتااه
000000000000000
جَرحيْ نَجلاً مِنْ حِبالاّ تُعتَبر للِطفله داء
ضَيعَتيْ ياعَمه كانَتْ عِندٕما ضاعَ الدَواء
كَيفَ خاتَم كَفْ حَبيبي فِي يَداً لا تَستَحِق
وَالحُلي كانَت هَدية كَيفَ تَصُلحْ لِلشِراء؟

ضيعتااه .. مِن بَعدِكَ يا والِدي
ضيعتااه .. وَالحُزنُ قامَ يَعتَدي
عمتااه .. مَنَ الذي أيتَمَني؟
عمتااه .. عمتااه
000000000000000
عَمَتي لَو رِدنا نَغفوا كَيفَ نَغفوا وَالجياد
صَوتُها مُرعِب وَ عالٍ وَضَعوها فِي الحِياد
وَ النياقُ المُتعَباتِ جَنبَنا كيـــفَ نَـنــاامْ
رغُمَ هذا وَ الخَرابةْ لا نَـجِدْ فِيها وِسـاد

لا نَناام .. ليلا طويلا شائقاً
لا نَناام .. وَالكُلُ فِينّا مُرهَقاً
عمتااه .. مَنَ الذي أيتَمَني؟
عمتااه .. عمتااه
000000000000000

علي ميران

حي الله اهل الغيره  خدام الحسين
حي الله اهل الغيره  خدام الحسين
*
حي الله اهل الغيره   ذوله النشامه
عزنه وشرفنه گالوا   هاي الخدامه
بيها انتمسك بيها    اليوم القيامه
وخدام ابو رقيه   فخر الدواوين
حي الله اهل الغيره  خدام الحسين
*
نصبوا مضايف كلهم   عالفطره يا هل ناس
واهلا وسهلا نادوا   بزوار اخو العباس
عطر السبط عطركم   ويطيب الانفاس
فاز وعلي الخدمكم   ياگرة العين
حي الله اهل الغيره  خدام الحسين
*
خدام ابو الائمه   والنعم منهم
تربوا بالخدمه هايه  من الزغر كلهم
لو بالوسيعه  اندور   ماكو مثلهم
غيره او وفه وحميه  كلهم موالين
حي الله اهل الغيره  خدام الحسين
*
صوت ارتفع للعالي   صوت الموالين
حيو التعنوا للطف   زوار الحسين
نتشرف بخدمتكم  وبيكم هلاوين
تدرونه ننتظركم   يالنينوى ماشين
حي الله اهل الغيره  خدام الحسين
*
مرونه لحظه مبارك  انقبل جدمكم
فايز وحگ البضعه   كلمن خدمكم
يسجله حبيب بسجله   ويصبح مثلكم
يحضره الحسين واهله   اقسم ببو الݘفين
حي الله اهل الغيره  خدام الحسين
*
واجب انحمده اعليها  رب كل الانام
الله منعم علينه   خلانه خدام
ويوم الحشر نتباها  وعالي يظل الهام
وتاخذ بدينه الزهره   وتخدمنه العين
حي الله اهل الغيره  خدام الحسين
*
خادم اهل البيت / ابومحمد العاشوري

#كاني بالسيدة زينب تكلمت مع حارس ضعن السبايا
و قالت

فك اديهــن نايمات.    ما يرجـــعن للفرات
حيـل آذتهن حبالك.    انته ما عندك بنات
ــــــــــــــــــــــــــــــــــــــــ ــــــــ
غافيــات و حبل اديـــهن يجري دم
فوگهن مـــــــا كفتــك حـرگ الخيَم
تعبــن و نامــــن بنـاتي امــــن الالم
و ادري هسه ايحلمن ابراعي العلم

وحدة وحدة بدم يسيل   تشتكي لعمها الكفيل
لا تظــل اتبـــــاوع الهن    انته مــا عنـدك بنات
ــــــــــــــــــــــــــــــــــــــــ
زغيرة وحدتهن ابـــــد مـا تحتمِل
و حيل مشدودات اديهـن بالحبِل
الله ما يرضه تــــــره ابهذا الفعِل
مدللات احسين مـــــو مالة هزِل 

كافي لتــــــعاند حرام.   و افتَح اجناح الحمام
عاد خـاف شوية ربك.    انته مـا عنــــدك بنات
ــــــــــــــــــــــــــــــــــــــــ
نامن امن الخوف مـدري امن الحزِن
و المـهم گـــــدرن يطــــبگنه الجــفِن
بلكت الله أيطــــــــيب لارقية المتِن
و ما تفـز اسكــــــــينه و لعمـها تحِن

خايفات الــــــدنية ليل   و انه ما ظل بيّه حيل
يركضن و اركض وراهن.   انته مــا عندك بنات
ــــــــــــــــــــــــــــــــــــــــ
ارد اسالك انتــه لـــــو مسـلم صدگ
ترضه بنتك چــــــف رجلها  يحترگ
تركـــــــض و دخــــان خانگـها خنگ
و بالســــــياط امتونها يصيرن زرگ

معـــــــلمات اعله الدلال    و هسه نامن عالرمال
و الحبـل گتلك جرحهن  .  انته مـــا عنـدك بنات
ــــــــــــــــــــــــــــــــــــــــ
شلــــــون نومـــــة عالتـرايب نايمات
و راس ابوهن يبچي من دم  عالقناة
بيــش اغطـــــيهن حــــرت المدللات
و انه ما ظلـــت عليَّ بــــس هالعباة

كلــشي راح اويه الخيام     و يلچم اجروحي الكلام
بيش اغطــــــــيهن بناتي     انته مـــا عنــــدك بنـــات
ــــــــــــــــــــــــــــــــــــــــ
اهواية تعَّبهن ثگل هـــــــذا الحديد
فكهن و لتـخاف مـــــــيروحن بعيد
حتى لو فـرن ركــــــض و لهن تريد 
يم ابوهــــــــن راح تلگــــاهـن اكيد

يحاوطنه اعـــله الرماح.   يضمدن ابراسه الجراح
و هنه وحـــدهن يــردن.   انتــه مــــــا عندك بنات
ــــــــــــــــــــــــــــــــــــــــ
الحمدلله
#علي_حسين_الكناني

https://www.tgoop.com/rdeaa

الابوذيه:
بيت الحــــــزن لمصابه بنيناه
ويفت الصخر دلالــــي بأنيناه
على الراحو ابفد روحه بنيناه
ومذابيح ارقــــدو بالغاضريه

~~

ود آبائنه اورثـــــــــنه ود امنه
الك وارواحنه ارخيصه ودمنه
خـــــدم يحسين خلينه ودمنه
عله هذا النهـــــــــج حد المنيه

~~

كتلنه العطش وانته مايتلنه
وحتى الگاع بالطف مايتلنه
خبر جــانه وكسرنه مايتلنه
الگمر والجود هم طايح رميه
~
حيدر بشار الدراجي

قصيدة ( جرح كربلاء ) موالي يسأل الامام السجاد عليه السلام عن اي الجروح أكبر وأعظم



يـا جـرح مـن كـربلاء    
دايـم اعليــه البكــاء
جرح السبي  جرح الذبح  
خبـرني عـن اكبر جــرح    يا أمــامــي  

****

بيش ابدي الجـــروح ويــاك
          ابــدي بجــرح أبو اليمه
ريحــانــــــة محـمــد لــــيش
         الخيــل تـهشــم بجــسمه
انشــدك مــن گصدته بنــوح
         وگمــت بـﭼفــوفـك تلمه
وصل صار اعلى كبر الگاع
           حتــى بالهــوه تشــمّــه
مغسل بفيض الدماء      
جسمه تارس كــربلاء
مولاي احس صعب الشرح
خبرنـــي عــن اكبر جــرح     يــا امــامــي

****

جــرح عبدالله ضني ازغير
        بــس  بگلبـــك  شكبــره
ضامـي وراد گطــرت مـاي
      الفرات يشح عليـه گطـره
الاصعــب بيد أبـوه حسـين 
      نگطــع يا للأسـف نحـره
وگـــف ووليــده بـﭼفوفــه
        حيــل  اتَحـيّــر  بــأمــره
لــو يــرده لخيمــته     
وامــه لو جتْ نظرته
وتشوفه ظل دمه يسح  
خبرني عن اكبر جـرح       يــا امــامــي    

****  

جـرح ينـزف الم وفــراگ
      مـن عنـده الدليـل احتــام
يوضــي عينــك بـدمعـات
       جــرح ابن الحسن جسـام
الينــزف گلبـه لا هيهـات
      ﭽـفنه مــن الجـروح ينـام
جروحـك كـربلاء حسـين
      مــا يهــدن  ونـيـن ايتــام
الفگِد ريحه من الحسن     
مــا يمِر جفنه الـوسن
بصدره الهوه حگه يشح    
خبـرني عــن اكبر جـرح       يــا امــامي    

****

مـن علتـك تـوّن ضنـهم
       وتهــل يـا سيـدي المـدمع
لنفسـك انتــه مـا ونيـت
       تــونْ من ساعة المصرع
حــرت هــذا علي الأكبر
       لــو طـاهــا الــذي اتگطـع
مثل حسين اظن جسمه
       شبيـه الـهــادي اتــــوزع
الجرحه اخوه اوالده     
ما سكن مره وهده
صار الحزن قبله و صرح
خبرنـــي عن اكبر جـرح       يــا امــامي    

**** 

جرح مثل الكسر والمـوت   
       ولا يتـوصــف بجـرحـيـن 
مثــل حــرگ الخـيّم بالنـار
      لجــله دم تسـيــل العـيـن
لمّــن شـاهــدت عـالمــاي
      جــوده ورايـه والـﭽـفـين
جرح صاب الگلب نشـاب
       يشبـه حيل جـرح حسين
يا جــرح ما يلتئم      
منــه گلبك ينلـﭽم
جرحك معاشر بس ملح  
خبرني عــن اكبر جرح     أمــامـــي

**** 

جــرح سبـي العقيلـه المـوت
        اشد هذا الجــرح واكلــف
دمّــك ينشــف مــنْ  الـصــار
          ودمــع عينـك فـلا ينشف
الشرف كله اعلى هزل حيف
         اسف مربوطه چف لـچف 
الظلـها الـچـان مــا ينشــاف
           بديــوان الــدعّــي توگـف
ضجت أمــلاك السماء     
لجــرح گلــب الأنبـياء  
جــرح السبــي فـــاق الذبح
خبرنــي عــن اكبـر جــرح      يــا امــامــي

****
الشاعر
موسى البديري

نعي على زينب

ليالي الشام سون عمله بيه
مثل وحشة الطف اتمر عليه
وصلولي يخويه الحگ يعباس
وإحتلو ضريحي الناصييه
هالمره الرصاص إبدال الاسياط
يطگن بالصحن واشگف بديه
هسه آنه چبيره اتحمل الضيم
المصيبه ابحظرة الطفله رقيه
اذا محد فزعلي بهاي الايام
احسبو احسابكم يهل الحميه
ينبشون الگبر هالمره الإرهاب
واروح بجثتي اوياهم سبيه

محمد الجماسي
اللهم عجل لوليك الفرج

🔹️دعاء يقرأ كل صباح

🔹️الحمد لله الذي عرفني نفسه ولم يتركني عميان القلب
🔹️الحمد لله الذي جعلني من امة محمد ٠٠٠
صل الله عليه وآله وسلم
🔹️الحمد لله الذي جعل رزقي في يده ولم يجعل رزقي في أيدي الناس
🔹️الحمد لله الذي ستر ذنوبي ولم يفضحني بين الخلائق

                افتتح نافذة الصباح بدعاء الفرج


     اَللّهُمَّ
                  کُنْ لِوَلِیِّکَ
             الْحُجَّةِ بْنِ الْحَسَنِ
        صَلَواتُکَ عَلَیْهِ وَعَلی آبائِهِ
    فی هذِهِ السّاعَه وَفی کُلِّ ساعة
  وَلِیّاً وَحافِظاً وَقائِداً وَناصِراً وَدَلیلاً
        وَعَیْناً حَتّی تُسْکِنَهُ أَرْضَکَ
             طَوْعاً وَتُمَتِّعَهُ فیها
                      طَویلا