أعكيلي
لذكرى أستشهاد أمير المؤمنين الأمام علي أبن أبي طالب عليه السلام
......................
لا تطبر هامة والينه
يا بن ملجم و تأذينه
.....................
يا بن ملجم حقدك شيله
حيدر ساجد دمعه أيسيله
ليلة قدر الكبرى الليله
وملاك الدنيا أتحف بينه
.....................
يا بن ملجم يغراب الشر
من تطبرها الهامة حيدر
يوم المحشر باجر تزغر
هذا الضيع دنيا أودينه
......................
خلص عمره أيحب الفقره
أو للأيتام أمجند عمره
يعني أبسيفك من أطبره
تجفي النعمه أمنصوانينه
.....................
نايم بالمسجد كل ليلك
حيل أمحزم للشر حيلك
حيدر يدري أشخافي أشليلك
سيف أو بالسم أمغمسينه
.....................
من الجمعه الحد الجمعه
ماتنشف من عينه الدمعه
أيصلي السائل يدعي أيسمعه
يهدي الخاتم من أيمينه
........................
كل الكون أمغرك خيره
النمله التدبي أوحتى الطيره
حيدر نعمه أتكفي الغيره
رحمه أو مو هينه أتجافينه
.......................
صايم قايم عابد ساجد
بالدنيه أشكد حيدر زاهد
ذكره اليوم المحشر خالد
تاج أو عالراس أمخيلنه
.......................
نور الله التارس أنفاسه
سيفك ليش أينام أبراسه
يابن ملجم عاين ناسه
عالراس أجنازه أمشيعينه
.........................
يابن ملجم جرمك دامي
هزل حيلي أوكل أعضامي
كل شيعي أينادي أو متسامي
خصمك بالمحشر هادينه
........................
خادم أهل البيت
الشاعر  : أسماعيل الجوراني
السبت : 25/5/2019

كعديه
لذكرى أستشهاد أمير المؤمنين علي عليه السلام
.....................
أيتام أيتام .. حاصل طبرة الهام
شحجي الليله محتار .. عاجل كل الأخبار
حاصل طبرة الهام
.....................
يوم أبن ملجم تعنه .. أوطبر هامك ياعلينه
حرنه بالام اليتامه .. والألم ناسينه بينه
أوغصت الدمعه أبجفنها .. علي وين أمشيعينه
هذا مو موعد منيته .. خالنظل أمجابلينه
تختل موازين الدهر .. لو طوله بتراب أنطمر
صح راسه بالسيف أنطبر .. من أبن ذيج اللعينه
أنعام أنعام .. حيدر سفرة أنعام
نعمه أتكفي كل دار .. عاجل كل الأخبار
حاصل طبرة الهام
...................
ترست الكوفه اليتامه .. والحزن جسد صفاته
الما عليه أصيام شرعي .. حنضل الماي أبالهاته
محد أيدور فيايه .. بالشمس كلها أستماته
واكفه أوجاري دمعها .. بينت عالخد غواته
أزغار وكبار اليتامه .. غاركه أبهاي الظلامه
تشفه وتكوم أبسلامه .. تندعي كلمن نواته
عالهام عالهام .. شبجت عشره عالهام
دمع العين جرار .. عاجل كل الأخبار
حاصل طبرة الهام
...................
يا علي مولاي عطفك .. حتى لحظات المصاب
أتوصي وآيات السعاده .. واضحه أبعينك جواب
لا تمثلون أبخصمكم .. من يحل وقت العقاب
أنتو أهل دين أوشريعه .. والفصل حد الكتاب
أشكد علي كلبك جبير .. وين أكو من هالظمير
ونته بفراش المصير .. تزرع الحب للثواب
ألمام ألمام .. عندك كوكب ألمام
هاي الجنه والنار .. عاجل كل الأخبار
حاصل طبرة الهام
....................
يا علي نفس العصابه .. الأسست حقد السقيفه
أوظلمت الزهره الزجيه  .. أونصبت غيرك خليفه
غمست بالسم نصلها .. أوبيد أبو النفس الضعيفه
سلمته أوأنته ساجد .. لله بالهامه الشريفه
وجهك أمراية محمد  .. زين يدرون أوتعمد
ذاتهم وبحقده الأسود .. نفذ الرغبه الكسيفه
أسلام أسلام .. هذا أشلون أسلام
قتل أبسبق الأصرار .. عاجل كل الأخبار
حاصل طبرة الهام
.....................
زمرة الشيطان عادت .. تمتهن قتل الهويه
أتحلل أشما حرم الله .. أتحرم أشحلل نبيه
بقرت أبطون الحوامل .. تاخذ الحره سبيه
للرذيله أنطت فتاوي .. عمت الدنيه الرزيه
السالفه أطول أوعريضه .. الما رعو دين أوفريضه
عادو أبنيه مريضه .. ويلي من الناصبيه
أعدام أعدام .. أنطو فتوة أعدام
وين الشيعي ما صار .. عاجل كل الأخبار
حاصل طبرة الهام
........................
خادم أهل البيت
الشاعر : أسماعيل الجوراني

قصيده : جوابيه
لذكرى أستشهاد أمير المؤمنين الأمام علي أبن أبي طالب عليه السلام
....................
الله أو لحد .. الله أو لحد
يا أمام الجعفريه
هاي المسيه
مطبور هامه
..................
جينه نشيعك للكبر
خالص صبرنه .. حسره أبصدرنه
يا داحي خيبر

بكلوبنه يسعر جمر
نحيي قدرنه .. ثبت أجرنه
يا علي حيدر

الدمعه عالخد .. الدمعه عالخد
ولنه الهويه
مولى البريه
مدمي العمامه
.....................
حلال شدتنه علي
عاين علينه .. بالهم كضينه
من المصيبه

ماغيرك أنبايع ولي
نهتف أجينه .. تبقه ولينه
راعي النجيبه

شيدنه مرقد .. شيدنه مرقد
بالنفس هاي الأبيه
اليوم المنيه
رغم الظلامه
.....................
شاهد دمعها عالوجن
تارك نياشين .. ياوالد حسين
حيدر يكرار

والحزن مامثله حزن
كل الموالين .. أنطت براهين
تطلب لك الثار

حب أوتجدد .. حب أوتجدد
والملامح حيدريه
نفس التقيه
يابو اليتامه
......................
هاي الولايه خالده
بيدك أمرها .. يخلد ذكرها
ونته ضواها

أخلاقك أظل رائده
أومحور صبرها .. حيدر عطرها
أوحامل لواها

بالثوب الأسود .. بالثوب الأسود
وبسواعدها الوفيه
تنكط سويه
غيره أوشهامه
.........................
وجه المكابر بالصور
مثل الحديقه .. هاي الحقيقه
أبدم الشهاده

للمذهب أبوقت الخطر
نكتب وثيقه .. الموت أبطريقه
ألنه ولاده

حبك تخلد .. حبك تخلد
والنوايا مهدويه
تكتب وصيه
النصر الأمامه
......................
خادم أهل البيت
الشاعر : أسماعيل الجوراني
الأحد : 26/5/2019

نزله
لذكرى أستشهاد أمير المؤمنين علي أبن أبي طالب عليه السلام
....................
هذا ياهو هذا طبرو هامه
حيدر الكرار  لو أسلامه
.......................
هذا مو دم الوصي البعمامته
اليوم دين الله طبرو هامته
والنبي المختار عيد شامته
مات الأسلام أونقص بصيامه
.....................
هذا ياهو الهامه بالسيف أنغدر
أو دمه بالمحراب ينبوع أنفجر
أن جانه كرار الحرب فارس مضر
عظم الله الأجر ليتامه
......................
يعني معقوله علي خير العمل
الشرف الأسلام في حرب الجمل
راسه نصين أنشطر جاله الأجل
تسئل أبكلب أنفجع خدامه
.....................
فجر الأسود هالفجر ريت الفجر
ما طلع عالدنيه من الله الصبر
لو نعه الناعي علي نام أبكبر
يندب الشيعي أو يعظ أبهامه
.....................
ياعلي ياعلي الكرار ياعقد الوله
صوت للأيتام بالكوفه أعتله
اليوم صرنه أيتام والداعي أبتله
ولعلي كمنه نحن ويامه
........................
غصت الدمعه أنعطب لب الكلب
العيد عالكوفه أذا باجر يطب
جادر أحزان العقيله ينصب
زينب الشوف الأبو محتامه
.....................
هذا دمك يا علي دم الفرض
الغطه أقطاب السمه أووجه الأرض
شيعتك للثار باجر تنتفض
من أبو صالح ترف أعلامه
......................
خادم أهل البيت
الشاعر : أسماعيل الجوراني
الأثنين : 27/5/2019

أبيات أبو ذيه
لذكرى أستشهاد أمير المؤمنين الأمام علي أبن أبي طالب عليه السلام
......................
من طر
أبفجر يوم القدر عالكون من طر
صفه هام الصميده أبسيف من طر
أملاك أونمله تدبي أبكاع من طر
يندبن ياعلي أونصبن عزيه
.....................
لا باس
يشايل نعش أبو الحسنين لا باس
نزله أعله الأرض لحظات لاباس
أجه العباس حزن الكون لا باس
يريد أوداع أخير أبحضن أبيه
.......................
خادم أهل البيت
الشاعر : أسماعيل الجوراني
الأثنين : 27/5/2019
..................
1- من طر : لما أشرق
2- من طر : مظروب
3- من طر : الطير
.....................
1- لا باس : لو سمحت
2- لا باس : لو بس
3- لا باس : مرتدي

الى من نفتقدهم وتتوق النفوس لرؤياهم
.................
بلمكابر عيدي صار
والحزن أصبح قرار
حسرتي حسرة يتيم
دمعه ماي أودمعه نار
.................
كل حياتي .. الحد مماتي
أكبال عيني الذكريات
الجان غالي .. أمجانه خالي
أودمعة أعيوني فرات
فجأه فجأه .. الشوفه أرجه
ودع أبلحظه الحياة
من أذكره .. العازه مره
والأمل بخلافه مات

حيل طال الأنتظار
وانه مابيدي خيار
حسرتي حسرة يتيم
دمعه ماي أودمعه نار
...............
أهنا مشينه .. أهنا حجينه
أهنانه لمانه الزمان
أهنا عمرنه .. أهنا صورنه
لوحه مليانه حنان
الشوك بيه .. أبكل مسيه
وفتقد ذاك الأمان
الشوك شدني .. القبره أخذني
والحزن شاهد عيان

أنفاس متروسه أحتضار
شاخص وبعيوني صار
حسرتي حسرة يتيم
دمعه ماي أودمعه نار
.................
يغلا ناسي .. دهري قاسي
ترجم الساني شعور
أقره سوره .. أبظل حضوره
أوتستمع أهل القبور
ليش سكته .. وينك أنته
يلي ماعندك غرور
أحجي يمه .. أوكبره ألزمه
والحزن شكل حضور

المقبره صارت مدار
العيد يتنفس مرار
حسرتي حسرة يتيم
دمعه ماي أودمعه نار
...............
أحجي وبجي .. فدوه أحجي
أكسر أبجلمه الغرام
عمري ضامي .. جل مرامي
عابد أبهيئة أمام
نظره منك .. تحجي عنك
خاف ممنوع الكلام
أبكل كيانه .. يمك أنه
دمعتي علخد وسام

ألك أشعر بفتقار
أبغربة الماعنده دار
حسرتي حسرة يتيم
دمعه ماي أودمعه نار
...............
أبكل دقيقه .. أظل حقيقه
أتوالف أكليبي الحنون
أحجايه أخيره .. أهمومي ديره
مقبره أبهذا السكون
أنته نفسك .. بيهه أحسك
تنتظر يمك أكون
أبخدي دمعي .. أشغر أدعي
يمته تاخذني المنون


ونعم أبهذا الجوار
ونتهي من هلمرار
حسرتي حسرة يتيم
دمعه ماي أودمعه نار
................
خادم أهل البيت
الشاعر : أسماعيل الجوراني
الثلاثاء  : 12/6/2018

أبيات نعي
عن لسان حال أم عند قبر أبنها الشاب
....................
جبت ماي الورد يمه وجيتك
أو لعد كبرك تراني أعتنيتك
أوعله نومة أمس نايم لكيتك
أشحلالك بالكبر من صار بيتك

......................
يحلو الطول طولك بعده نفسه
لو طولك خرب من ضاع حسه
تراها أمك تشوف أيام نحسه
لو شافت شباب أبقاط عرسه
.....................
عيد الناس فرحه أو أمك أحزان
تخلص عيدها والدمعه نيشان
يريان المعاني أشلون ماجان
أجبر خاطر أمك ونطه سلوان
...................
يشاب الما تهنه أبعز شبابه
أوظلت صورته أو ظلن ثيابه
أمك جايه أو جابت عتابه
أو كلبها أمشيب أبسبة عذابه
...................
خادم أهل البيت
الشاعر : أسماعيل الجوراني
السبت : 1/6/2019

أبيات نعي
عن لسان حال أم عند قبر أبنها الشاب
.......................
يبني المن شبابك صرت محروم
أجيك أو نيتي بيضه أبسود الهدوم
أزرعلك مناحه أبحيل مهدوم
وعايد كبرك أودلالي ملجوم
....................
كبل لا كول جلمه جرحي أيكول
أمك عالكبر كعدت يمدلول
الحزن هد حيلها والكلب معلول
أو عليك البال منها أهواي مشغول
...................
أجيتك يمه أنشد عن حلاتك
بعدها ذبلت أبالحظة مماتك
أمانه من خواتك من بناتك
سلام الله أعله طولك من غلاتك
...................
الليالي أتمرني وتروح الليالي
أو عله أخدودي دمع عيني يلالي
أو دللول الولد وفراشه خالي
صارت صوره مطبوعه أبخيالي
.....................
خادم أهل البيت
الشاعر : أسماعيل الجوراني
الأثنين : 3/6/2019

مولد
لمديح وموالاة سيد الوصيين أمير المؤمنين علي أبن أبي طالب عليه السلام
........................
شيعي أو موالي .. طول الليالي
بس حب علي علي .. تارس خيالي
 .......................
حبه شِجَاني .. شاغل كياني
أبداعي الأماني .. ألهج تراني
لو خيروني .. لو هددوني
ينكص لساني .. أوتعمه عيوني
أخصم جدالي ..طول الليالي
بس حب علي علي .. تارس خيالي
 .......................
الما يدري خَله .. يسمعني اكله
حيدر أجله .. وبـغيره خِله
حبه جنوني .. هيج شجوني
يعني غزاني .. أوبدد ظنوني
هدالي بالي .. طول الليالي
بس حب علي علي .. تارس خيالي
 ......................
داعي السلامه .. روح الأمامه
مولا اليتامه .. شدني غرامه
حد المنوني .. ياروحي هوني
شمع الصواني ..أبميلاده كوني
خليني أعالي .. طول الليالي
بس حب علي علي .. تارس خيالي
 ......................
أنشر صحيفه .. أبنيه شريفه
حيدر خليفه .. الله حليفه
والصنفوني .. حاقد دروني
أبعمر الثواني .. دم أبسنوني
ذولي السحالي .. طول الليالي
بس حب علي علي .. تارس خيالي
 ....................
ياروحي طيبي .. ربي رقيبي
أفخر حبيبي .. شيعي نصيبي
والخاصموني ..  والكفوروني
منهم شعاني .. ماغيروني
ماغيره غالي .. طول الليالي
بس حب علي علي .. تارس خيالي
 ......................
مولى البرايه .. راعي الوصايه
أبهايه أويه هايه .. أرفعله رايه
والضيعوني .. أبذروة سكوني
واضح مكاني .. أبحيدر لكوني
سامي المعالي .. طول الليالي
بس حب علي علي .. تارس خيالي
 ......................
خادم أهل البيت
الشاعر : أسماعيل الجوراني
السبت: 25/4/2015

تحضيرات شهر محرم الحرام لعام 2019
شوط كربلائي
أستهلال هلال شهر محرم الحرام
......................
يهلال أبشهر عاشور .. زينب لا تأذيها
واسيها أبمصاب حسين .. لتزيد الألم بيها
.......................
يهلال الحزن والنوح .. زينب فاكده الخوان
مكسورة كلب من يوم .. شافتهم عله التربان
جاه الله نمشي أعليك .. ب خت المنذبح عطشان
يهلال التهل عالناس
وضع أم الخدر حساس
لتروع أخت عباس
وتجمل حزنها أحزان .. حزن البيها يكفيها
....................
جايب يا خبر يهلال .. بيك أنحس ذبح منحر
أو صدر أمهشمته الخيل .. وبسيف العدا أموذر
موت أحمر يغص بالموت ..ليلك والعطر عنبر
عنبر من نحر مذبوح
ظل فوك الثره مطروح
وبصفه العقيله أتنوح
أوتصفك باليمين أيسار .. من شدة مئاسيها
....................
شاعت للمنايا أعلوم .. نامت عالترابه أبدور
ما بين الكفلها أو بين  .. شبان أبجمال الحور
بهداي أعله أم الظيم .. لن منها الكلب مطرور
الكافها أنكطع جفين
وتصوب سهم بالعين
وولاد الحسن وحسين
زينب بيهم الهاليوم .. ما كفت نعاويها
.......................
بالطف شافت المنشاف ..زينب بت علي يهلال
عبد الله أبسهم ذبحوه ..أطفال أوبديها أحبال
نيران أبنات حسين .. كضت والشمر يختال
أبأمر الطاغيه أبن أزياد
غاليها علي السجاد
للشام أبحبل ينكاد
وبسن العواسل روس .. مرفوعه لهاليها
.....................
كل حول التهل يهلال .. زينب للألم تحتام
ويتام أبكترها أتلوذ .. وتنام أبحضنها أيتام
وحزان الخرابه أتصير .. عيد الكل أهالي الشام
أو عالدار أبرقيه أوصار
حيل أم الصبر منهار
تندب والدمع مدرار
وين أمي تجي وتشوف .. ياحاله أعانيها
......................
خادم أهل البيت
الشاعر : أسماعيل الجوراني
السبت : 15/6/2019

أعكيلي
لذكرى أستشهاد الأمام جعفر الصادق عليه السلام
.......................
عا لصادق هلن دمعاتي
.....................
مجلس هاي الليله أبذكره
هنياله البي وسم صدره
يلطم باليمنه أو باليسره
سجلها الحبك لطماتي
...................
يابو الكاظم حبك بيه
من درة أمي الشيعيه
صار أبدمي أو صرت أبضيه
أتنور بيه أبظلماتي
..................
أصل الدين أو كل أفروعه
ساري السم أبين أضلوعه
حكي أشعر هاليله أبالوعه
وندب يا فاطم مولاتي
.....................
يا لصادق يا شيخ المذهب
شيعي أو بخلاقك أتأدب
و بمصابك لازم أتعذب
وتضيك الوسعه أبنظراتي
.....................
سادس نور أتغيب أنواره
والنار أتشب أبنص داره
يا ويله اليجهل مقداره
باجر لو كامت ثاراتي
..................
نفسه السمك عاد أبجرمه
ضدك نفذ حقده أو ظلمه
قبرك مهدوم أبيا تهمه
أسئل وتجوه أبحسراتي
.....................
يا ويله أو ويله أو يا ويله
كلمن جند ضدك حيله
جف الحشد الشيعي أيشيله
ترجيه أبأذنه أحجاياتي
.....................
باجر رايه أبصف الرايه
أو حفاي أتروح المشايه
تندب يالصادق مولايه
بالمحشر أحضر شداتي
......................
خادم أهل البيت
الشاعر : أسماعيل الجوراني
الخميس : 27/6/2019

أبيات نعي لذكرى أستشهاد جعفر الصادق عليه السلام 
..................
الليله حزنانه الطوايف
مات أبو حلو السوالف
سممه بيده المخالف
تنعه عالصادق مضايف
...................
من صباح الله المدينه
فكدت أجواء السكينه
ياأبو الكاظم ولينه
وين نعشك ماخذينه
..................
خلو أنشيعه يشيعه
نسجب أدموع الفجيعه
ضاكت الدنيه الوسيعه
مات قانون الشريعه
..................
طلعت أهله والعشيره
أوكلمن المخلص ظميره
أتشيعه الذيج الطميره
ويلي عالماجد نصيره
...............
ويلي عالمذبوح نحره
أوسحكت الخيل أعله صدره
والسهم ناخرله ظهره
أو جسمه بيه 12 طبره
...................
خادم أهل البيت
الشاعر : أسماعيل الجوراني
الخميس : 27/6/2019

نزله
لذكرى أستشهاد سادس الأئمه الأمام جعفر الصادق عليه السلام
.................
طلاب العلم هاليوم مصدومه
لن جبدة أبوها أتشوف مسمومه
..................
بفراش المرض يتلوه والدها
الله أبعونها أو الله اليساعدها
يا شيخ الشيوخ أيصيح واحدها
والونه يونها أبروح مهمومه
....................
يالمني الأشوفه اليوم يجرالك
ياجعفر أمامي أوريتني أبدالك
مسمومه جبدتي أو أنته تبرالك
كل حلقة درس تنطيني معلومه
..................
لو بيدي العوافي أنطيك عافيتي
يالفضلك علي هذبلي تربيتي
يادنيا الهواشم بيش جازيتي
بالسم والذبح والشيعه مظلومه
...................
يانعش التشيعه أبحال ياحاله
طلاب العلم والدمعه تتلاله
فوك الخد جمر ياويل جتاله
والزهره أومحمد باجر أخصومه
....................
عميد المذهب أختلفت معانيه
المجالس كلها متشيده المراثيه
أو هاليوم أبحزن كل الأماميه
للصادق مزار أرسومه مهدومه
.....................
نفسه السممه عاد أوهدم قبره
لا ظلت مناره أو لا بقت حضره
لا تشرك يزاير بيها فد نبره
عفنه أمن السقيفه الغيره معدومه
...................
باجر من تهل رايات مهديها
طلاب العلم تزهي معانيها
وتثور أبعزيمه الثار واليها
والحشد الحسيني يترس الحومه
...................
باب الله الوسيع أو حاضر الشده
الشيعي الموالي غيرك أشعنده
أبجاه حسين جدك والنبي جده
يالصادق نريد الحاجه محسومه
......................
خادم أهل البيت
الشاعر : أسماعيل الجوراني
الخميس :27/6/2019

نوحيه
...............
لذكرى حرق دار
الأمام جعفر الصادق عليه السلام
.....................
من نار الشبت بالدار
أبحال العلويات أشصار
ياويلي أبنيات الزهره
يتوارن من حجره الحجره
أبحال العلويات أشصار
.....................
على صوت العلاوي جعفر أستنفر
يطفي النار بيده أو كلبه يتفطر
أو تذكر بس شنو ألي أذكره جعفر
تذكر من بنات حسين تتعثر

مسكينات أشكد أزغار
مغدورات أمن الأشرار
هاي الطاحت من السطره
أوهاي الطاحت من العثره
أبحال العلويات أشصار
....................
أو بعد شنهو يشيعه ألي تهياله
على الغبره الحسين أو حالته حاله
بعد ذبحه أبد ما رحمو أعياله
جحافل راجله هجمت أو خياله

تاكل بالخيمات النار
والجيش أبكل أستهتار
يظربهن  والفرحه أبصدره
الطاغي الشام أيزف البشره
أبحال العلويات أشصار
......................
أبالهيب النار شاف أجفوفه ملسوعه
كعد مهدوم حيله أويسجب أدموعه
أعله جده المنذبح ومهشمه أضلوعه
أو جثته  أمن الدفن أيام ممنوعه

أبفصل الصيف أوظهره الحار
ظلت أيام أبلا ذار
الواليهن من ذبحو نحره
مسلوبه أو متوسده الغبره
أبحال العلويات أشصار
......................
بناته أو حرم بيته أبنار ماترحم
لجن هالنار وين أو نار المخيم
أبصدر زينب هذيج النار جن علكم
تشوف أيتام أخوها أبجمر تتخضم

وحدها أو مامن أنصار
تندب والدها الكرار
يابو الأيتام أويه الفقره
زينب بنتك تشكي أبحسره
أبحال العلويات أشصار
. ..................
مصايب كربله أعظم على الخاطر
عطش ذبح أو سبي بمصيبة العاشر
12 طبره أبجسد فوكاها أثر حافر
سبايا أو عالنهر طف ثاني متواتر

جف أيمين أو جف أيسار
صارن معقل للزوار
للخوه أيوفن بالنصره
بصمن لجل حسين أبعشره
أبحال العلويات أشصار
.....................
خادم أهل البيت
الشاعر :أسماعيل الجوراني
السبت 29/6/2019

أبيات نعي
حوار بين سيدة نساء العالمين
فاطمة الزهراء عليها السلام
وأم البنين عليها السلام
..................
أم الكمر عباس والزهره الزجيه
يتسامرن بالدمعه هاليله سويه
ياويلي من أمصاب يوم الغاضريه
وبدور هاشم عالترب جثه رميه
.....................
يم البنين الأربعه الكلهم شهامه
ولدج مشاعل نور بدروب الخدامه
عند الحسين أوعد علي مرفوعه هامه
وانه أحضر أو أشفع الولدج بالقيامه
....................
يابت رسول الله الزجيه قره العين
مشكوره لنك بالحشر باجر تحضرين
لو عندي غير الأربعه تدريني أبنين
ضحيت بيهم يالعزيزه الخاطر حسين
....................
كفيتي يم عباس أبد ما منك أقصور
شاركتي زينب بالمصاب أبشهر عاشور
مشكور حزنك والنعي لحسين مشكور
والشيعي لو هل دمعته من عندي مأجور
....................
يالزهره يم حسين يالبنتك غريبه
كل شيعي يذرف دمعته أبهاي المصيبه
منك نصيبه أينال من عندي نصيبه
وحسين أبو السجاد ما ينسه حبيبه
...............
خادم أهل البيت
الشاعر : أسماعيل الجوراني
الجمعه : 5/7/2019

 تحضيرات شهر محرم الحرام لعام 2019
نزله
..............
لذكرى أستشهاد سفير الحسين الأمام مسلم أبن عقيل عليه السلام
......................
من درو محد نظيره
حفرو المسلم حفيره
...................
بيده مرسوم الأمامه
ها لكتب منكم علامه
صارت الكوفه القيامه
حسين يتباها أبسفيره
.................
مسلم الحر المناضل
حد مماته ظل يقاتل
جندل أبسيفه الجحافل
طالبي وبراسه غيره
...................
طوعه شدي أحزام صبري
أدري موتي اليوم أدري
فدوه لجل حسين عمري
أو هاي عند الله جبيره
.......................
حامي ملتك حامي دينك
عفيه لا عابت يمينك
مسلم الجنه أبجبينك
نادته طوعه البشيره
...................
أو وداعت أبنيتي حميده
اليوم هذا الجيش أبيده
جرد البتار بيده
أو صال صولاته الشهيره
....................
نشمي وبهيبه أو أراده
خطله خطه أومنها ناده
يا هو البكلبه جلاده
سيفي بالخطه سعيره
....................
عمت الكوفه النوايح
هذا صايح غاد صايح
الزلم صارت ذبايح
بيها شردت بيها أسيره
.....................
أخبار وصلت للمدينه
صاحب الذات الحنينه
أبروحه ضحه الشان دينه
أخلص النيه ال أميره
....................
فاطمه أنطيني مرادي
جاهدت والتقوى زادي
جسد الدور الجهادي
أو صار نوماس العشيره
...................
تاجر أويه الله تجاره
ما نكث عهد السفاره
من على قصر الأماره
أنشمر ذيج الظهيره
.................
خادم أهل البيت
الشاعر : أسماعيل الجوراني
الخميس : 4/7/2019

نوحيه :
لأنتصار الدم على السيوف
ونصرة مظلومية سيد الشهداء
الأمام الحسين عليه السلام
...................... 
شهر عاشور أو صفر
بيهن الدم أنتصر
كيد كيدك يا يزيد
ما نقر قر العبيد
تبقه للشيعه فخر .. تبقه للشيعه فخر
...................
زينب أبمجلس مظالم
خطبت أونصبت محاكم
من ذبح أهل المكارم
حد سبي أوشتم المحارم

أممت وجهت نظر
يا يزيد أنته الأشر
رأيك ألا فند .. جمعك ألا بدد
حرمه وبهذا الوقار .. ما يحيرها أنكسار
تبقه للشيعه فخر .. تبقه للشيعه فخر
.........................
أحنه من نلطم صدر
والدمع عالخد يدر
ندري ألف مية شمر
ينتظر فرصه غدر

لو يكطعنه وذر
نكتب أبدم النحر
على لطمات العزاء .. بينه مزورع الولاء
بالمهد توه وليد .. عالصدر تلطمله أيد
تبقه للشيعه فخر .. تبقه للشيعه فخر
...................
جامعه أظل الطفوف
أنته يامجلس تشوف
هذا صف أمنالصفوف
منه نتعلم حروف

كربله أبكل الصور
للعلم أوسع بحر
منها نستلهم درس .. كيف تهذيب النفس
جامعة علم أو يقين .. والعميد ألها الحسين
تبقه للشيعه فخر .. تبقه للشيعه فخر
........................
نبقه نندب ياغريب
يا أبو الخد التريب
الهامه مصيوب أبقضيب
صاحب الجسم السليب

ياأبن فارس مضر
أخو عباس الكمر
عهد ألنه كربله .. وجه ما ثاني أله
أوعله تل الزينبي .. زينب أبهيبة نبي
تبقه للشيعه فخر  .. تبقه للشيعه فخر
......................
باجر أيحين الظهور
اتئوول للمهدي الأمور
تنتشي أبفرحه الصدور
الثورته الشيعه تثور

أبرايه بيد المنتظر
للظلم ظهر أنكسر
أبسيفه تنحز الرقاب .. الحاربت هذا المصاب
دوله شيعيه المقام .. بيده يبنيها الأمام
تبقه للشيعه فخر  .. تبقه للشيعه فخر
..........................
خادم أهل البيت
الشاعر : أسماعيل الجوراني
الأحد : 7/7/2019

أبيات شعر فصيح
لمديح منقذ البشريه
الأمام القائم أبا صالح
المهدي عجل الله فرجه الشريف
...................
ولي في طي الغائبين حبيبا
ترنو أليه نواظري لمشيبا
أن قد عمري فهو يحضر مدفني
أو طال لي عمرآ أراه نصيبا
جزل المعاني فهو صبغة أحمدا
مغوار في خضم الحروب مهيبا
الطعن في السيفين حسن صنيعه
ف لجده الكرار فيه خصيبا
صفين والجمل وبدرا وخيبرا
والنهروان وغير ذاك كثيبا
أن تسألوني من تحب فأجيبكم
من ليس فيه للخصال معيبا
هو يوسف الزهراء وأبن حسينها
روح الحطيم وبن مكة وطيبا
القائم المهدي أمام زمانه
وخليفة الله العلي قريبا
......................
خادم أهل البيت
الشاعر : أسماعيل الجوراني
الأثنين : 8/7/2019

أبيات شعر فصيح
لمديح منقذ البشريه
الأمام القائم أبا صالح
المهدي عجل الله فرجه الشريف
...................
ولي في طي الغائبين حبيبا
ترنو أليه نواظري لمشيبا
أن قد عمري فهو يحضر مدفني
أو طال لي عمرآ أراه نصيبا
جزل المعاني فهو صبغة أحمدا
مغوار في خضم الحروب مهيبا
الطعن في السيفين حسن صنيعه
ف لجده الكرار فيه خصيبا
صفين والجمل وبدرا وخيبرا
والنهروان وغير ذاك كثيبا
أن تسألوني من تحب فأجيبكم
من ليس فيه للخصال معيبا
هو يوسف الزهراء وأبن حسينها
روح الحطيم وبن مكة وطيبا
القائم المهدي أمام زمانه
وخليفة الله العلي قريبا
......................
خادم أهل البيت
الشاعر : أسماعيل الجوراني
الأثنين : 8/7/2019

هوسات
لذكرى ولادة السلطان
ضامن الجنه الأمام علي أبن موسى الرضا عليه السلام
.........................
المحمد وآل بيته أنزف البشاره
علي موسى أبن جعفر هلت أنواره
هلا أبضامن الجنه الطيبه أخباره
ها ها ( أمضويها )
بنواره الدنيا أمضويها
.....................
أجينه أنقيم محفل لبن داحي الباب
أبو محمد الطيب من نسل أطياب
أونزور الليله مشهد والدمع سجاب
ها ها  (أنخليها )
والحاجه أبابه أنخليها
....................
هلا أبعطر الغريب البرض خاراسان
علي موسى الرضا المعروف بالسلطان
طبيب العلل كلها أو للكرم عنوان
ها ها (أيكفينه )
من جوده انريده أيكفينه
..................
خادم أهل البيت
الشاعر : أسماعيل الجوراني
الثلاثاء : 9/7/2019