أعكيلي
لذكرى استشهاد
أمير المؤمنين علي عليه السلام
............
أمشونه أنشيع نعش الغالي
............
أمشونه أنشيع شيخ الكوفه
نحضن نعشه أنبوس أجفوفه
أبكد ما غركنه أبمعروفه
أنبوس أيده أو دمعتنه أتلالي
..........
أمشونه أنشيعه أبأونه أو حسره
أو نشبج فوك الراس العشره
أنعزي الهادي أنعزي الزهره
أو منه المأتم ميظل خالي
..........
أنعزي حسين أنعزي أخوانه
يوم أذراعك شد ذرعانه
كان الله أبعونك مولانه
دمعك من دم يتراوالي
..........
أمشونه أنشيعه أنشيم نعشه
حزنه أعله المعمورة أنطشه
ذاك الطبرو هامه أبغبشه
لجله أهتز عرش الله العالي
...........
بعذيبي الفجر أو نسناسه
بالسيف الوالي أنشج راسه
يومين أو فاضت أنفاسه
وحنه اليوم أبعازة والي
..........
شيخ الكوفه الطبرو هامه
أو فاركنه أو ماتم أصيامه
من يسمع ونة أيتامه
حي بلجن يرجع بالتالي
...........
نعش الغالي أنوسده أبالحده
ماي أنرشه أو نكعد عنده
ياثار الله العهد أنعكده
ثارك ثاري أشما يجرالي
............
كل واحد منه أبدمعاته
يحيي أمصابه أبغيرة ذاته
يطلب من حيدر حاجاته
حيدر تدري أشصار أبحالي
...........
خادم أهل البيت
الشاعر : أسماعيل الجوراني
الخميس : 2022/4/21

🚩وداعيه🚩
................
 لذكرى أستشهاد أمير المؤمنين الأمام علي عليه السلام
................
الوداع الوداع ياأمير المؤمنين
الوداع الوداع ياأمام المتقين
................
ياأبو الحسنين حيدر ياولينه ياعلي
جادر أمصابك نصبنه والمدامع تنصلي
نلطم الليله صدرنه والحزن ماينجلي
ياولي الله أووصيه ياعشكنه الأزلي
ياملاذ الحائرين ... ياعرين الصابرين
................
ياأبو الكل اليتامه يتمانه أمصابك
هاي سجادة صلاتك باقيه أبمحرابك
ليلة الوحشه ثكيله لايطول أغيابك
ياأبو الشدات شده والفرج بعتابك
يامنار القاصدين ... ياصفاء العاشقين
................
المرادي أنشلت أيده أولاطبرلك هامك
ماخلص رمضان بعده العافيه أبهندامك
سفرة أيتامك تريدك تحتضن أيتامك
علي عاين عاليتامه حنت ألئيامك
يانواة الفاقدين ... يامظيف السائلين
................
الفجر حانت صلاته ماتصلي أبناسك
ياعلي لمن تأذن زاكيات أنفاسك
أوياعلي أبنية صلاتك مامثيله أحساسك جامع الكوفه يريدك والوفه نوماسك
ياحزن مايستكين ... يامعين المنهكين ................
أبابك الليله يتامه بالدمع ينعونك
سالم أوغانم يحيدر ودهم أيشوفونك
علي ياليث الحريبه أعداك ميهمونك
زودك أبكل المعارك ماخذل مظمونك
يامذل الكافرين ... يانجاة الراغبين
................
الوداع الليله هايه شيعتك حزنانه
ألتمت الليله أبمصابك والمهج ذبلانه
أنهدمت أركان الهدايه أبظربتك مولانه
أتنادي وتعشم نفسها بالحشر تلكانه
ياصراط الصادقين ... ياأمان الخائفين
................
خادم أهل البيت
الشاعر : أسماعيل الجوراني

أعكيلي
لذكرى هدم
قبور أئمة البقيع عليهم السلام
...........
نبنيها أكبور الهدموها
..........
مطلبنه أو ثابت مطلبنه
أو موش أحنه النسكت عن حكنه
هدنه أنطينه أو حد الهدنه
ساعتها أشلون أيعرفوها
..........
قبه أو حضره أو يفياف أخضر
جانت لازم ترجع وكثر
لازم يتجسد فد منظر
قطبين الكون أيشوفوها
..........
قبر السبط السمو جبده
أبفعلة بنت الأشعث جعده
بغضآ بمه أو بغض أبجده
رادو أمجاده أيشوهوها
...........
قبر الشاهد ذبح حسينه
أو من هامه العله الرجلينه
مسبي أو مجتوفات أيدينه
أو عمته أعله الهزل مشوها
...........
قبر الباقر وبنه الصادق
شيخ المذهب بالحق ناطق
يرجع ذاك الصرح الشاهق
لازم والشيعة أيحجوها
...........
قبر الحمزه الجبده أتفرهد
أبهند أو وحشي أتمثل مشهد
ليث الدين البي غيره أشكد
أو كد الغيره البي كرهوها
............
قبر أشرف وطهر بدويه
أم العباس العلويه
الصفت ويه حسين النيه
جي زوجه حيدر عادوها
..........
باجر جاي أو تطلع شمسه
خل كلمن ظالم من هسه
بيده أيحضر قبر النفسه
موتاهم ماظن يحصوها
............
باجر رايه أبصف الرايه
مشايه أبجتف المشاريع
صاحب موكب زاده أو مايه
يتلكه الناس الكصدوها
...........
بسم القائم ثوره أتباشر
شيعة حيدر لو حل باجر
كل وهابي أبحقده أيجاهر
راح الثارات أيربعوها
...........
خادم أهل البيت
الشاعر : أسماعيل الجوراني
الأثنين : 9 /5/2022

نزله
لذكرى استشهاد
الأمام جعفر الصادق عليه السلام
.........
جعفر الصادق ولينه
المات جبده أمسممينه
أبنفس الأحقاد الدفينه 
اليوم قبره أمهدمينه
............
نفس الأحقاد القديمه
ترجمت نفس الظليمه
لبو الكاظم جان قبه
أو طاحت القبه هضيمه

السممو جبده النقيه
ورثو هاي السجيه
الكل عقول الناصبيه
الحاربت ملة علينه
..........
عادو أبنفس الجساره
أبنارهم حركوله داره
الكسرو أضلوع الزجيه
أبيوم والدها تواره
 
ما رعو حرمة عشيره
عادو أبنفس الوتيره
أمنيله الميت ظميره
مستحه أيندي جبينه
...........
جعفر الما مثله جعفر
بالطشت جبده توذر
كومو ننصبله العزيه
والمعزى المولى حيدر

يا علي صوت اليتامه
ينعى نبراس الأمامه
الصادق أبفعله أو كلامه
الساكن أبأأرض المدينه
..........
سادس أقمار الهدايه
الثبت أركان الولايه
سممه والي المدينه
الشاهد أبطون الروايه

آبأ آل هاشم يا مصيبه
خلت الكاظم نحيبه
يوصل الجده أو حبيبه
والد الزهره الحزينه
..........
الصادق أستاذ المذاهب
غدرته أحقاد النواصب
جيش المنصور حقده
على بيت آل أبو طالب

بالبقيع اليوم قبره
أبلا مناره أبلايه حضره
يمته بيده رايه خضره
صاحب الثأر أو يجينه
...........
الليله عالصادق مناحه
ننصب أو ما بيها راحه
كلمن أيحشم ظميره
لا تحد حزنك مساحه

نلطم أبحركه صدرنه
عالوجن يجري دمعنه
طول الثأر أو صبرنه
شيب أو لاشي بدينه
............
خادم أهل البيت
الشاعر : أسماعيل الجوراني
الجمعه : 20/5/2022

موشح
لذكرى استشهاد
الأمام جعفر الصادق عليه السلام
..........
الليله للصادق تجدد ثارها
الشيعه وتعاهد علي كرارها
...........
الجعفر الصادق عهد من شيعته
باجر أتصير القرايه أبحضرته
أو موش شيعيه بطنها الجابته
الما نطى حك حرمتك مكدارها
..........
حرمتك من حرمة الهادي الرسول
والشرح عن حرمتك وايد يطول
علمك أو تسبيحة الزهره البتول
توئم أو دارك أو حركت دارها
..........
أبدارها أو دارك النار المضرمه
بغضآ أبحيدر علي حامي الحمه
من سقيفة ساعده المو مسلمه
لعنة الله أعله السقيفه أو عارها
..........
لعنة الله الدايمه اليوم الحشر
ع لي سمم جبدك الهادم كبر
أبعون الله أتكوم رايات الخضر
بالبقيع أترفرف أو أمصارها
..........
أبكل شبر من البقيع الطاهره
رايه خضره أبكربلاء أمزوره
من قبر جدك حسين أمعطره  
أمراد أبو فاضل تشيل أكتارها
...........
أمراد للعباس أبن أم البنين
العالنهر كطعو يساره واليمين
ثار تطلب للي دامي الودجين
الداسته أخيول العدا أبحفارها
............
أبحافر الخيل أعله رمضة كربله
حسين لمن طاح جثه أمرمله
أهدومه سلبوهن شمر وي حرمله
كربله أتحدث تظل أخبارها
........
أخبارها أتحدث خبر يلحك خبر
أو توصل الجعده التي أبسابع صفر
سممت جبد الحسن خير البشر
أو كبته أطيح أو محمد جارها
.........
كبب جار ألها الرسول أو طايحه
لازم أعله الدين صاحت صايحه
الهل سبب بمصابك أتحل نايحه
يوصل السابع سمه ثغبارها
.........
خادم أهل البيت
الشاعر : أسماعيل الجوراني
الثلاثاء : 24/5/2022

 

هوسات جنوبيه
في مديح الأمام علي أبن موسى الرضا
والسيده فاطمه المعصومه عليهما السلام
.............
أذا كلبك تشوفه زايده أهمومه
دك باب الرضا أو دك باب معصومه
و طلب طلبتك و حجي الذي أترومه

ها ها
صدك لمن تنخاهم
ولد الكاظم حاشاهم
يرجع خايب من جاهم

ها ها ( وفايه )
بالدنيا أو محشر وفايه
...........
أباليلة مولدك يالساكن أخريسان
أطش جيت التهاني أمنالكلب فرحان
ألف مبروك ألكم مولد السلطان

ها ها
أبميلاد الحجه الضامن
من ولد الزهره الثامن
لا تسكت حرك ساكن

ها ها (  أبميلاده )
بارك الزهره أبميلاده
..........
يا أخت الرضا أو بت موسى بن جعفر
أبجاه أمك الزهره فاطمه الكوثر
صدي أبنظره أليه أبدعوة المضطر

ها ها
يالقم بسمك تتباها
أو طوس أتباهت وياها
مضطر و بجدك طاها

ها ها ( دك بابك )
وده أتفزعيله دك بابك
..........
خادم أهل البيت
الشاعر : أسماعيل الجوراني
الجمعه : 10/6/2022

مولد
لذكرى ولادة أنيس النفوس
السلطان الضامن الأمام
علي أبن موسى الرضا
.........
حبك سعاده .. عايزها أراده
أعطف عليه .. أنطيني الجلاده
........
1
بالحب تراني .. مجنونك أني
يالساكن أبطوس .. يلهج لساني

مولى الحياره .. يا بو مناره
حبك تجاره .. مابي خساره

منك شهاده .. راد أبوداده
كلبي اليحبك .. حقق مراده
........
2
حبي مجازي .. موش أنتهازي
عالفطره حبي .. أبداعي أعتزازي

هنياله هسه .. اليمك تمسه
تضفيله لمسه .. مرتاحه نفسه

أعذيبي أبزياده .. نسمة براده
أبداخل ضريحك .. تشرح فؤاده
........
3
عيني أبدمعتي .. المشهد نظرتي
شعشع ضيائك .. نور ضلمتي

لجلك أمامي .. شدني هيامي
ذروة غرامي .. أهدي كلامي

أباليل الولاده .. نبره أبسعاده
يا حجة الله .. أعله عباده
.........
4
الضامن غزاله .. ماهي أستحاله
يضمنله خادم .. همه أشتكاله

أنعم وأكرم .. بالله أقسم
بهمومي ماهم .. مكظيه أجزم

عند الرشاده .. يوفي أجتهاده
مولايه مولاي .. علم أو عباده
.........
5
أبيقضه والأحلام .. تأخذني الأجدام
الشباكك الساع .. دلالي محتام 
 
والماشرب ماي .. أبصملك أبهاي
تتراجف أعضاي .. تقبلني رجواي

أبدونك وكاده .. عمري حماده
تطلبني زاير .. صك أعتماده
........
6
يبن الزجيه .. أو حامي الحميه
أبميلادك اليوم .. سبلت أديه

 يا ماي العيون .. ذبحتني الظنون
هايالرضا كون .. تفزعلي ممنون

الراجي أعتقاده .. دومه أبزياده
يحضرله مولاه ..  لو بسمه ناده
..........
خادم أهل البيت
الشاعر : أسماعيل الجوراني
الجمعه : 10/6/2022

نزله
أستهلال شهر
عاشوراء الحسين عليه السلام
..........
لطمو عالصدر لطمه ولائيه
خلو أيامكم كلها عزائيه
..........
أهلال النايبه وافانه هاليله
مو شيعي أو علي الما يلطم أبحيله
حسين أبدمه ضحه أشما نضحيله
منوفيله نسبة واحد أبميه (1% )
.........
الما يلطم أو يوجع بالطم صدره
لا يرجه شفاعة فاطمه الزهره
كل مجلس عزه لحسينها أتحضره
أدور عالصدور الكلها حنيه
..........
عاشور المواجع هل هل أهلاله
هنياله البجى واللطم هنياله
أشماله الما يفكر غافل أشماله
ساعه أو لنها بيه الدنيا مجفيه
.........
شد أعنان حيلك و حضر المجلس
و ندب يا حسين أو ريجك أميبس
المجلس مدرسه أمنالدرس لا تفلس
كلبك نظفه من الضبابيه
.........
نيران أبخيم من عدها مخروعه
جم طفله يتيمه أو تشعر أبالوعه
أو لحد ينسه مسلم ولتقى أبطوعه
النصرت غربته أبنيه فدائيه
..........
أهلال أبشع جريمه أبحقد سفياني
جاب أويا وجه ماله وجه ثاني
وجه طفله أو عليها أمخيم الجاني
يشرم منها أذنها الشان ترجيه
..........
خالنلطم صدرنه أبحركه ونوجعه
وبحفاد إل أميه أنضيك الوسعه
كل دمعه أعله خدنه تنسحب شمعه
فاز الدمعته دمعه كفائيه
 ........
الزينب وبن أبوها العالنهر حتفه
الطفه السهم عينه ونكطع جفه
أو ماي البجربته أتبده يا وسفه
تهتز كون حيطان الحسينيه
.........
كل لحظه أبمحرم حسره مطلوبه
عالسلبو بناته و نسلب ثوبه
تسحك صدره خيل أوخيل هالنوبه
تسحك فوك صدره أبكل عدائيه
..........
وينه العنده حاجه أيسبل أجفوفه
هاليله الحوايج كلها معروفه
مكظيه أو شفيعه حسين ميعوفه
من بخته الحضر لحسين لطميه
..........   
من مجلس حسيني المجلس أمشونه
خلونه نعزي المهدي خلونه
هاليوم أعله أبوه أمورمه أعيونه
ومورمه أعله عمته المشت مسبيه 
.........
خادم أهل البيت
الشاعر : أسماعيل الجوراني
الأثنين : 23/5/2022

شوط كربلائي
أستهلال هلال عاشوراء الحسين
شهر محرم الحرام
............
يا شيعة علي الكرار  عاودكم شهر عاشور
كثروها الروايا السود عالدور أو أعالي الدور
..........
أبكل دار الروايا السود أبمسجد وبحسينيه
أو مجلس توعيه أو أرشاد بي دمعه ولائيه
أو لطميه أعله مد الحيل تخلص تبدي لطميه

كل مجلس عزه لحسين
بي تسجب دمعها العين
عند الزهره يمحبين
تلكونه أبسجل مكتوب ولكم بالحشر مذخور
.........
رايه أبواجهت كل دار أبكل موكب ترف رايه
عاده أو تنكطع هيهات هاي العاده من هايه
حسين أيكيف أبكل جاي لحد يهجر أقرايه

سجل يا حبيب الجاي
والكاعد يوزع ماي
صار أبخدمتك مولاي
شيخ أنصار أبو السجاد ناده والكلب مسرور
..........
عاودكم شهر ما صار كبله أو لا شهر بعده
شهر حسين أبو السجاد الطه المصطفى جده
هنياله الذي أبأخلاص عد الهالشهر عده

آيا يحسين ومصابه
مات أو سلبوا أثيابه
أو نار الخيم لهابه
مأجور اللطم لحسين واليبجي علي مأجور
.........
شهر البي أمير حسين كطعو من قفا نحره
عطشان أو خضيب الشيب وبجسمه 12 طبره
أو خيل الأعوجيه أتجول فوكه أو هشمت صدره

أو خيمات العلاوي أبنار
محتركه أو يتامه أزغار
من جيش العدا الجرار
فرت ترست الوديان أو تنور المنايا أيفور
..........
يا شهر الكدر والظيم جرح أمصيبتك بينه
ما دام الجسد بي روح يالمنه أو يبجينه
أو يا رمز الشهاده حسين وينه الحاربك وينه

صرخه أو ما تملها الناس
تحجيها أبفخر وحساس
أو تلطم عالصدر والراس
يحسين النصرت الدين للحق أسست دستور
.........
يمته أترف لبو الثارات رايه أطالب أبثاره
أو مهديكم ظهر يا ناس أمنادي أيزف البشاره
و فواج المنايا أتسير خلفه أو بيده بتاره

منا الذله أبد هيهات
مخطوطه على الرايات
لعروش الظلم دولات
تتساوى أويه وجه الكاع أو مايبقه ظلم لاجور
........
خادم أهل البيت
الشاعر : أسماعيل الجوراني
السبت : 4/6/2022

هوسات جنوبيه
لذكرى بيعة
عيد الغدير الأغر عيد الله الأكبر
........
من بعد حج الوداع وبأرض خم الغدير
الله شاء أو الله قدر علي يتنصب أمير
ورسل الوحي أبرساله للنبي الهادي البشير

ها ها
يابو القاسم هالساعه
حيدر وجبتله الطاعه
بذراعك شيل أذراعه

ها ها ( خليها )
حجه أعله الوادم خليها
...........
البايعك يا علي فاز  والمشى ضدك خسر
أو هوه  لو حظ بيه أصلآ لحظه حقك ما نكر
اليعجبه الحجي أيعجبه الما يعجبه أمنالبحر

ها ها
يشرب خله أشما يكدر
كل شيعي اليوم أستبشر
من الله أمنصب حيدر

ها ها ( ناكص غيره )
و الما يقبل ناكص غيره
..........
خادم أهل البيت
الشاعر : أسماعيل الجوراني
الخميس : 14/7/2022

نزله
لذكرى استشهاد سفير سيد الشهداء
الأمام مسلم أبن عقيل عليه السلام
........
تنعد أبطال الوغى بفعالها
والمثل مسلم قليل أمثالها
.........
الكاتبو إقبل أمس خانو عهد
وظل وحيد وماله ناس أبهالبلد
وينه عنه حسين ويمده أبمدد
الكوفه للدينار باعت حالها
........
أبلا عشيره لا أهل غربة وطن
كل هذن مسلم عليه أتلملن
أباب طوعه أمنالعطش حيله وهن
طوعه بالجنه ألف هنيالها
........
من تعد زود الزلم عد ما يلي
مسلم أبيوم البرز يندب علي
راجله أو فرسان كامت تنولي
الشرده بالروح العزيزه أشوالها
.........
غاره بعد الغاره عالعسكر حمل 
الجندي من الخوف بالجندي ختل
طوعه نادت عفيه يا مسلم بطل
آل هاشم تعبت أعله أرجالها
........
ظل يكر عالجيش كرة حيدره
ومن كثر ما هي الجثث متناثرة 
الكوفه ذاك اليوم صارت مكبره
والبكت عدله تخاف أخيالها
.........
ظل يباغتهم مثل عصف الهوه
أبضربه فوك الكاع روس أمكوره
أجساد موته أجساد بيها أمعوره
حابل أبنابل شركها أبفالها
........
هاشمي وغيراوي شد حيله أبعزم
وينه وينه أبسيفه يستنكه الزلم
والله ذاك اليوم سواهم فلم
جيفه عالجيفه الجيف منوالها
........
ثار مسلم ثار ثوره حاسمه
بيها يطلب من أميه المجرمه
كسرة الباب أعله أمه فاطمه
ومحسن الطاح أبفعل جتالها
.........    
أتحايلو ضده أو أله حفرة حفر
والغدر من شيمة أصحاب الغدر
يا حميده عالجره المسلم صبر
كربله باجر تشيب أهوالها
.........
مفخره الكل شيعي مسلم بالشرف
والعرف مسلم ولا مثله عرف
صان مذهب ملته الحد مانزف
دمه وبعالي الكصر تكمالها
.........
خادم أهل البيت
الشاعر : أسماعيل الجوراني
الثلاثاء : 19/7/2022

شيله : حماسيه
في مديح قمر العشيره
الأمام أبا الفضل العباس عليه السلام
..........
حلف هاليوم عالشط أله أنهيهم
بس حسين كله فدوه خليهم
لوما حسين خلهم وصه أبو فاضل
والعباس جا عباس كاظيهم
.........
1
تعنه الشط يجيب الماي لسكينه
عطشانه أو نخت عمي البطل وينه
هلهل صارمه أو دخن غضب راسه
أونصهم روحه راحت من خزر عينه

من شافوه أجاهم دب رعب بيهم
أهل الكوفه بهل الشام شعليهم
هذا أيوصي هذا أشرد أبروحك
جن عباس موت أحمر أملاكيهم
.........
2
كشخه أو طوله راهي أو منفرد صدره
ماخذ من علي أبفن الحرب شمره
الديوان المراجل عنده تسيوره
ماجن كربله بيها أنحفر قبره
 
واكف مبتسم يفحص معانيهم
من الخوف رعشت رعشه رجليهم
شوف العين شافو شايفه أتخوف
علي وبنه أبو فاضل هدو أعليهم
........
3
كامت غبره وصلت للسمه السبعه
أنجلت عباس واكف خنكته الدمعه
يسمع صوت زينب عالتل أتناديه
لا عابت يمينك خويه وتشجعه

دك صدره أبشهامه هاج أنظريهم
راس أولهم أكطع راس تاليهم
خويه أوداعت أمك فاطمه الزهره
أله أبنار سيفي اليوم أكليهم
.........
4
صد لحسين كله أبداعتي أشلونك
يمن خيعوني بيك أو بيه خيعونك
راح أنزل غضب فوك العساكر هاي
لحد ما أنكتل يا بو علي دونك

حد ما أنكتل بالموت أغذيهم
ولأمة محمد فرجه أسويهم
أخوك أخويدمك ويخدمك أبروحه
يبعد أخويدمك حشمني أربيهم
.......
5
هد أبغيرة الله التارسه أنفاسه
جاس الجيش كله الجيش ما جاسه
زلم تردم زلم كربله  خلاها
لحد ما بالغدر صاب العمد راسه

أبد ما ثنه ضربه أو ظل يدميهم
عله الروح العزيزه ظل يوازيهم
اليعز روحه ترى العباس بالمرصاد
ياخذ منه روحه أو هذا ياذيهم
.......
6
دخل نهر الفرات أو شرف أجروفه
غرف من عنده غرفه الحيد بجفوفه
لاكن ما شرب يا نفسي بعد حسين
هوني أو هالروايه عدنه معروفه

عطاشا البالمخيم وده يسكيهم
ماي ألي أبجربته جايبه ليهم
أنصابت جربته ونكطعن الجفين 
بعد عباس جا ياهو اليحاميهم
.......
خادم أهل البيت
الشاعر : أسماعيل الجوراني
الخميس : 21/7/2022

ميمر
الخدمه الحسينيه المباركه
.........
لا تنخذل            وتزل رجل
آبسبط النبي        دربك عدل
 
الصفه النوايه ويه حسين ما يخسر أبتاليها
.......
1
 هالدنيا غداره أو تدور الزله
و البيها ينغر بي تظل تتسله
من عدها أخلص والدرب تندله

يلا أستعد           وبذل جهد
عاشور أجه          أو رايد حشد

زحمه المأتم تنتهي أو جدمك فلا مر بيها
......
2
أمم حياتك للمصاب ابكل حين
أحيي العزه ولطم أو هل دمع العين
باجر تموت أو منكر أيسئلك وين

راح العمر             ليش الصدر
ما بيه أثر             ينطيك أجر

الفرصه أغتنمها هالسنه وم الحسن واسيها
......
3
أشكد بيك طاقة حيل حيلك حزمه
وخدم حسين أبيش ردت أتخدمه
تعبان أذا نفسك شفت متأزمه

أبطاسة ماي             أسكي الجاي
حاجي حسين           كله أبثوابك مولاي

مذخوره ألك عد حسين هالخدمه مو ناسيها
........
4
أبكد ما تحب حسين أصلح حالك
والصيت أذا أنطاك ألف هنيالك
بس أحذر أو بالك يعيش أبالك

دون الخدم             صرت العلم
خلك نبه                  كبل الندم

وتواضع أوأذكر دوم زينب شمر سابيها
........
5
عاشور أجه أو رايدله منك دمعه
أو رايد لطم فوك الصدر وونين كون أيسمعه
أو رايد زياره التنقري لحسين ليل الجمعه

هاي الصور                بيها العبر
جنة عدن                   عندك خبر

فتحتلك أثمن أبواب تنتظرك أتوافيها
........
6
بالثوب الأسود والكلب أبيض كون
حاجي الحسين أو كله منك ممنون
أو حلفه أبرقيه أو سكنه وبأخته أم عون

يا بو علي              يبن الولي
يوم الحشر            أنظر ألي

وحسين حاشا ينساك بس نيتك صفيها
........
خادم أهل البيت
الشاعر : أسماعيل الجوراني
الأثنين : 25/7/2022

نزله
ليلة الأنصار رضوان الله عليهم
........
أنصار أبو السجاد أهل الغانمه
حلفو أيطيبون خاطر فاطمه
........
حلفو أبهاليوم سجيل الغضب
ينزل أعله الجيش ويكصله الرقب
الما يكصله ركبته أيكصله العصب
باشطين أربات حامي الحمه
.......
أتعاهدو عالموت مدعاة الفخر
ما نعوف حسين لو صرنه وذر
يا شمر يكدرنه يكدر يا عمر
يا أبن مرجانه جدمه أيقدمه
.......
الجيش من أسيوفهم موت أرتوه
حاسرين الراس صوت ألهم دوه
اليوم جود حسين عالكاع أستوه
أو كربله للدين دوله وعاصمه
........
الغانمه البيهم ولا صارت أبد
الشاف أخوه أينام عالغبره جسد
أو داعتك لحسين ما أخلف وعد
عالعساجر فات شاهر صارمه
........
أكبال خيمة زينب أبنية علي
دويه صارت دويه وبحس معتلي
حاضرين أم عون كولي أدللي
ندري والزهره المنايه أمحتمه
.......
أمسابك أعله الجيش صار أبكربله
أبداعت المولى علي عقد الوله
عوفهم خلهم ألي الصوت أعتله
أكلوبهم عالموت هيج أموالمه
........
غيره عدهم تلهب أفجوج الحرب
فدوه أروحلهم على نفس الكلب
ترسو العسكر رعب بس يا رعب
كربله خلوها بحر أمنالدمه
........
دكو الجتف أبجتف أهل الشرف
ما يعوف أصويحبه الصاحب حلف
لو نموت أثنينه لو ماكو طف
حارين أهواي وكت الموزمه
..........
عن يمين الجيش عن الميسره
الحمله بعد الحمله شنوها تره
جيش أبن سفيان تيه محوره
راجله أو فرسان غاشيها العمه
.........
يالزجيه فاطمه الزهره أم حسن
اليوم جينه الكربله وجبنه الجفن
الموت دون حسين مكصدنه عسن
بالشهاده أنال حسن الخاتمة
.........
خادم أهل البيت
الشاعر : أسماعيل الجوراني
الخميس : 28/7/2022

أعكيلي
.......
في حق مجالس عاشوراء
الحسين عليه السلام
.......
يا مجلس عاشوري أتحضره
بيه أستشعر روح الزهره
.......
1
أبضلعين العدها المكسوره
تتعنه المجلس مقهوره
تنشد عن أصبع مبتوره

ياهو الشاف أصبع منبتره
بيه أستشعر روح الزهره 
.......
 2
لنحور الباتت مدميه
حضر صدرك للطميه
عينك من دمعك معميه

خلها ونادي حسين أبحسره
بيه أستشعر روح الزهره
......
3
أبثوب أسود زين هندامك
خلي أيام الطف أيامك
عطشان أو مذبوح أيمامك

ويام أموسد عالغبره
بيه أستشعر روح الزهره
.......
4
آ يحسين أندب ومصابه
ظل أبشمس الله اللهابه
عاري أو مسلوبات أثيابه

أبحافر خيل أمهشم صدره
بيه أستشعر روح الزهره
.......
5
عن مسلم سولف وحجيلي
يا ناعي الطف وهدم حيلي
رايد من حزني أتبجيلي

عيني اليمنه وعيني اليسره
بيه أستشعر روح الزهره
........
6
أنصار حسين أستذكرهم
طيب بدموعك خاطرهم
أطلب الله أيحسبك منهم

أنجان حسين أتريد أتنصره
بيه أستشعر روح الزهره
.......
7
أبعباس الكطعو جفينه
أوسهم النيبه الودر عينه
عزي أرقيه أو عزي أسكينه

وشبك فوك الراس العشره
بيه أستشعر روح الزهره
.......
8
رمله أبدمعاتك واسيها
الله اليعلم شنو البيها
بس أوحيد شو تاليها

بالطف أوحيدها أتخسره
بيه أستشعر روح الزهره
........
9
عالأكبر كثر وناتك
يمناك أظربها أبيسراتك
ياثار الله أصرخ من ذاتك

جسمك ليش الكوم أتوذره
 بيه أستشعر روح الزهره
........
10
عبد الله أو جبده العطشانه
السهم الظالم حز شريانه
مات أبيا مهجه الذبلانه

أشذنبه أيموت الباول عمره
بيه أستشعر روح الزهره
......
11
جان أسمك رايد يتسجل
يوم العاشر أخي المقتل
ليلة وحشه أشكد تتحمل

زينب داعيها الله أيصبره
بيه أستشعر روح الزهره
.........
خادم أهل البيت
الشاعر : أسماعيل الجوراني
الجمعه : 29/ 7/2022

عتاب
عن لسان حال
السيده فاطمه العليله عليها السلام
........
بلا حيل .. وجى الليل .. والمرض أذاني
رحت وين .. يالحسين.. ياهو جا يرعاني
.......
طفله وهلي غياب
عيني أتراقب الباب .. ودموعي جريه
سترن جلدي الهدوم
تعبانه من الهموم .. وتمنه المنيه
ميته أشكد تمنيت
لا متروكه بالبيت .. موتي أحسن أليه

الأوجاع .. والوداع .. زودن حرماني
رحت وين  .. يالحسين .. ياهو جا يرعاني
......
صعبه أشكد الأيام
تمضي وكلبي محتام .. للهجرو نزلهم
باجر ها يردون
عيني أتشوف الضعون .. ولكاهم وكلهم
راحت كل الأحزان
من ردولي خوان .. يدري الله شحبهم

عمر فات .. حلم مات .. ما أجو خواني
رحت وين  .. يالحسين .. ياهو جا يرعاني
......
أذكر ونته موجود
تمسح دمع الخدود .. و توصي أبسكينه
بنتي أشما تكدرين
 يم أختك تكعدين .. و سكينه الحنينه
فدوه أختي رقيه
خالنكعد سويه .. و للمغرب بقينه

شنو الصار .. ترى الدار .. وحشه يا خلاني
رحت وين .. يا لحسين .. ياهو جا يرعاني
.......
خوفي أبكربله هناك
مذبوح وهلي وياك .. مكطوعه المناحر
تسحك صدرك أخيول
دمك عالثره أسيول .. خلته الحوافر
جسمك بضعه بضعه
جفك حن لصبعه .. الكطعته الخناجر

شبح موت .. خنك صوت .. حسك الإنساني
رحت وين.. يا لحسين.. ياهو جا يرعاني
.......
 راسك يارمح شال
بكليبك سهم ضال .. حافرله حفيره
حركو ليش الخيام
زينب عمتي للشام .. عالهزل أسيره
بويه أوسلوة الروح
نحري أتمنه مذبوح .. دونك بالظهيره

ألف حيف .. مضه السيف .. أبحسنك الرباني
رحت وين يا لحسين ..  ياهو جا يرعاني
.........
خادم أهل البيت
الشاعر : أسماعيل الجوراني
الأحد : 31/7/2022

نزله : حماسيه
في مديح السيده الطاهره أم البنين
وشجاعة أولادها عليها وعليهم السلام
........
من صار وكت الوداع .. لحظه أمكم أتناديكم
يمه يولدي السباع .. بحسين ما وصيكم
.......
1
أم بنين الأربعه ببنينها
كامت أتوصي أو دمعها أبعينها
يمه ولدج دوم لتوصينها
جاوبو كلهم سوى من حينها

كلبج أبد لا يرتاع .. كالت نشامه أدريكم
يمه يولدي السباع .. بحسين ما وصيكم
.......
2
باجر أتسمعين كلبو كربله
على راس الجيش نزلو زلزله
أدري بيكم زين كلكم مرجله
يا بزر بطني الرباته أمعدله

سهر الليالي ما ضاع .. ما ضاع تعبي أعليكم
يمه يولدي السباع  .. بحسين ما وصيكم
.......
3
هيجي وترفعون راسي أبنينوه
عاليه الشمس أو تحجبون الضوه
أمنالمدينه الكربله الدرب أنطوه
جنه وتشوف الولد كلهم سوه

بالجيش خسفوها الكاع .. هذا قليل أشبيكم
يمه يولدي السباع .. بحسين ما وصيكم
.......
4
صار شتريدين يجرالج بعد
تحرم أعله الجيش نومات الرغد
حرمله أو شمر  أوعمر أبن سعد
نسحك أعله أخشومهم هذا وعد

بربعه ردوه الصاع  .. أرضوني كد مرضيكم
يمه يولدي السباع  .. بحسين ما وصيكم 
........
5
من وطيس المعركه أشتد وحتدم
أبزينب أتواصو سوه أهل الشيم
أخوان زينب صاروا الزينب خدم
دكو الجتف أبجتف دون الخيم

بذراع مشدود أذراع .. دون الحرم خليكم
يمه يولدي السباع .. بحسين ما  وصيكم
........
6
طاح الأول ثاني من دمه غرك
الثالث أمنالموت ما جفنه طبك
حي أبو فاضل بقه أولمن حمك
الجيش من الخوف دلاله نتك

طيحو لحم بالأجماع .. موت الشرف يحيكم
يمه يولدي السباع .. بحسين ما وصيكم
.......
7
بالعهد أهل الشيم  وفو صدك
أو كربله أبدمهم صفت كعبة عشك
يشبك الشباج بذراعه شبك
الزاير ويتراوه لعيونه الطبك

لعيونه تتراوه أوجاع .. كلبي ألي ما ناسيكم
يمه يولدي السباع .. بحسين ما وصيكم
.........
خادم أهل البيت
الشاعر : أسماعيل الجوراني
الأحد : 1/8/2022

أعكيلي
......
في مديح وفضائل
السيده أم البنين عليها السلام
.......
بسم أم عباس البدويه
سمي اليوم أوصفي النيه
........
اليخدمها أم عباس أتريده
كون المجلس حشمه أيزيده
مو بس يبجي أو تلطم أيده
عاشوري أبذات أو قوميه
........
أبعاشور حسين أبن الزهره
كون المجلس مثل الحضره
هيج الناس أتخصه أبنظره
لمن تحضر فد مرثيه 
.......
محبوبي أو محبوبك واحد
أحيا الدين أبموقف خالد 
أتخيلها أم عباس أتناشد
كل شيعي اليوم أو شيعيه
.......
بخلاق آل البيت أتحله
عنهم أبدآ لا تتخله
لو ما دمهم ما ظل مله
دمهم خلالك شرعيه
.......
باهات الطف كد ما تكدر
جاهد نفسك فطره أو مصدر
شاهد حي أعليك المنبر
يا نسبه التاخذ من 100 
........
كبلك جم خادم بكبيره
طوله أتواره أشبيك أبحيره
أطلب منها الطيبه السيره
ميت حي خصيني أبجيه
 .......
بسم الضحت لجل المذهب
عباس البالغيره أمعذرب
سمي أو جند حيلك وتعب
أبمسجد أخدم وحسينيه
........
بالمجلس خامل لا تجلس
حرك ساكن خلي لك حس
لو تلزم مكناسه أو تكنس
لو بيد أتعدل زوليه
.......
شهر حسين أو هاذي أيامه
محتامه الزهره أو محتامه
أم عباس الكل خدامه
صلي أعله الزهره المرضيه
.......
خادم أهل البيت
الشاعر : أسماعيل الجوراني
الثلاثاء : 2/8/2022

أعكيلي
لذكرى استشهاد سفير الحسين
الأمام مسلم أبن عقيل عليه السلام
........
يا مسلم تسلم يمناتك
توجع بالعسكر طكاتك
......
يم عتبة باب النشميه
طال أجلوسك عنده أشويه
كالت شنهو أتريد أميه
جاوبت أو سمعت حسراتك
.......
كالت منك أنعم وكرم
دار أختك دارك يا مسلم
خادمتك أتشرف و خدم
مولاتي الزهره و مولاتك
......
راكع ساجد ليلك كله
تدعي الله الرحمن أتكله
دون حسين السبط أو أهله
أستشهد عالخد دمعاتك
.......
يوم الخانت أهل الكوفه
وضدك جيش أستل أسيوفه
جفنك ما رف طوعه أتشوفه
خطوات الواثق خطواتك
......
جيش أمجهز واكف ضدك
ونته أبديرة غربه الوحدك
صلت أو رديته أو ما ردك
لليوم أمجاد الصولاتك
.......
نازل عالجيش أبيا غيره
كل ما يسمع ظل تكبيره
الساتر الله النيبه جبيره
يصرخ والزود النزلاتك
.......
صاعد سيفك نازل ماكل
بيهم صار أو زودك حافل
هذا أبذاك الظلو خاتل
والله أيسدد رمياتك
........
أبن زياد أبكل وحشيته
ظل يرجف خايف خليته
داخل أنذار أبنص بيته
كفيت أو كفت حملاتك
.......
واحد أنته أو همه الكثره
كالو هالواحد منكدره
غدرو بيك أو حفرو حفره
الله أيصبرنه أبمأساتك
.......
بسم الحجه اليوم المأتم
كد ما تتألم نتألم
مسلم ثوره أو ثورات الدم
باجر نحيهها أبثوراتك
........
خادم أهل البيت
الشاعر : أسماعيل الجوراني
الأربعاء : 3/8/2022

أعكيلي
في شجاعة الأنصار  رضوان الله عليهم
.......
ينصار حسين أعله المنبر
من عدكم  واجب نتشكر
.......
نتشكر من عدكم واجب
ما تعله العين أعله الحاجب
صاحب جنتو ونعمه الصاحب
بالطف يوم حسين أتحير
.......
أبخيمة زينب عن راويكم
سامع جلمه أتشين أعليكم 
شاطت لله الغيره البيكم
موش أحنه الباجر يتعذر
.......
يا خوف المر كلبج زينب
موج الطف وياكم نركب
جينه أنموت ويبقه المذهب
خوفح خل عنج يتكتر
.......
باجر لمن يطلع فجره
بسم حسين وبسم الزهره
هذا العسكر نكسر ظهره
عالموت أنخلي يتحسر
.......
أنعم منكم برض الحومه
خاف الجيش أوذب أهدومه
حيدر عاد أو عاود يومه
وعورة صفين ألكم تظهر
........
حك يتباها حسين أبناسه
صانو عهده أو رفعوا راسه
واحدهم حد شهك أنفاسه
بالموت أويه حسين أتبشر
.......
ألكم والله أفضال أهوايه
لو ما دمكم مترف رايه
لا كو أزياره أو لا مشايه
كلب ألكم بالحق أستبصر
 ........
70 أو ماكو أسبع منكم
يا ألأشرف مرقد مرقدكم
حكنه أنباهي الدنيا أبحبكم
يهل الغيره أطياب المعشر
.......
خادم أهل البيت
الشاعر : أسماعيل الجوراني
الخميس : 4/8/2022