بدت حياتي بدمعة عزائك والدمعه اصل الوجود
بلطمة چفوفي شفته صمودي واللطمه سرّ الصمود
اسيرك أنّه وگَيدني جرحك واتباها اذا صرت اسير
يبختي وانته سجاني صاير وابحزني چفك يجود

آه
من الطفوله چفك لزمني
ومو صوت ابويه صوتك ندهني
من گتلي اهلاً خدامي وابني

ومنها واعرفتك بالمشاعر
يا كسير اليجبر خواطر
بيها شفتك بين الحوافر

(١)

مشت سنيني وشفت طريقي وگمت الطم اعله المصاب
حلّه عذابي وذبل شبابي يل تسوّه لذة الشباب
يمعدن الحب الك كياني وكل الجوارح تصيح
اريدن اتعب على الگضاها ايامه كلها ابعذاب

آه
زهوّ شبابي بعزائك انحب
ومن المصايب دلالي عطّب
على الغريبه مولاتي زينب

زادك يغزّر باللي يريدك
هاك ايدي گتلك وانطيني ايدك
عبدك احشرّه بزُمر عبيدك

(٢)

الشيبه الاوله طلعت اليّه بمجلس حنانك وئام
وحلّت كبرتي وانه اسمي خادم ويا كبره هذا المقام
اجتني هفوه خذتني منك ورديت الك يا حبيب
لگيتك انته اترد اليحبك لو يبعد اعله الهيام


آه
وكل رجعه اموتن وانه نادم
مولاي حلمك خلاني خادم
رايدني وانه بذنوبي هايم

واچتافي عرضت من سفرتك
اللگمه الشريفه من حضرتك
خلتني اردن واحضه بنعمتك

(٣)

واجت نهاية عمري وخدمتي واتچفنت بالدموع
(الحَمدُ لله) متت احبك وخسفه اتركت بالضلوع
وشفتك يوالد يم الجنازه واهلاً تگلّي عليش
موش انه ذاكه الجرح غربتك الما عندي يمك خضوع

آه
گتلي يعبدي البچه الغربتي
وراسه يلطمه لرقيه بنتي
ما انسه منك وگفه لوگعتي

گتلك يغالي وهذا أنّه ارخص
گتلي اليحبني عل دمعه يحرص
وگتلي دموعك ما مرّه تنقص

(٤)

وبگبري شفتك متكفل انته بكل الخدم يا كريم
وشَعب المگابر تحسدني صارت چي عندي سيد رحيم
الماله دمعه بمجلس عزائك ماله شفيع وأمام
والعنده مثلك مالك رگبته تخلص حياته بنعيم

آه
يا تالي كلشي وشفت غرامك
رافعلي قيمه بعزّة خيامك
دمعي انزله العلو مقامك

يا سيدي بيك الگه عباره
الحب حلاته بدمع ايتجاره
حبك ربحنه وغيرك خساره

(٥)

صدر الدين

بليل عاشر
الطمأنينه اشوفن بيها حافر
يشعل العشره شمع خنصر ابونه
وليلهم بي خنجر ايطفي المشاعر
وانگطع خنصر ابونه ابأيد كافر
ياهوّى امشينه لابوي
انه من گد الركض ضعفت بُنيتي
شيلني وللوالد امشينه نسافر
خل اشوفن شنهو صاير
يا هوّى وجسمه انسحگ سحگ الگناطر
ودردمة خيل بوسط شمخة صدر كسرت خواطر
اليوگع وماله اخو ايمدله يمنته يگله گوم
فوگ كسرة ضهره كسرنّه الحوافر
ارد اگله
ليش يا ريجّ الله تعطش، وانته مو كوثر كواثر
ارد اگله
گلبي چوّه الگاع من ناره عليك
وچتفي الاتطبطب عليه چانت اديك
طبطب السوط اعله چتفي
السوط عند امدللاتك وحش كاسر

يا هوّى المصرع ابونه لو مشينه
لا تگلّه اتغربينه
اشضال بيّ هوه ونزيد اجروحه لو يدري بچينه
السكته بالعاشر تسولفها المحاجر

يا ضمير المستحه انذاع ابوگعته
حسين لمّن راح يتّم عيّن بنته
شفته يمشي، او ويّه كل نگلة جدم دمعي انگلّه
وراح معشوگ الضماير

يا هوّى الغربه ضباب وانّه عيني بيها علّه
حسين مو گلبي يريده حسين راده جسمي كلّه
ايدي رادت چفه مو حبل اليكضها
جسمي رايد حضنه راحه
مو مشي ليل ونهار وهضم حاظر
والسهر موّت اليناطر
انه تعبانه ومريضه وموتي باچر
فوگ طشت الراحه تطلع روحي مني
حضنه، راسه، المهم وياه اموتن، هذا عاشر
.
.
.

صدر الدين

الى سفير الساده
.
.
.
آه... يا اصل الحب ويا باب احسين
آه... بيدك صار الخادم خادم زين
آه... يل رازقني الدمعه وسرّ العين

يرب دلّالّي المحسوب امن اتباعك
عبد عدّ جرحك واتعلم اطباعك
آدب تنطيني اعله ابن الزهره ودمعه
اريد ابچيلك واتحزّم لاوجاعك

انته الكفيل... وانته الدَليل... لاصل البچي
رايد دموع... واكسر ضلوع... مو بس حچي
(١)

آه... بالـ آه ابدي وياك وردتك عون
آه... لمصابك مو دمعه ابچي عيون
آه... حته افهم شنهو ابسرّك مكنون

شفت بفنونك حيدر من يقاتل
خلست الكوفه وما يدنالك عايل
لچن امر الله رايد تگضي ايامك
وتموت اهناكه ودمّك يصبح سايل

بموتك طفوف...ولمعة سيوف... تعمي النظر
بجرحك أنين... من الحسين... شفته انكسر
(٢)

آه... بيك اخيام الما تطفى ابفد يوم
آه... يل بالكوفه امخلي الموت ايحوم
آه... تالي الآخ ابگلبك تگعد دوم

يصگر الكوفه التنشاف اشگد واضح
اعله قصر الطاغي شفتك چنك رايح
بسماء الباري اتحلّق هيچ اطباعك
شعجب عل گاع ابهم گلبك شو طايح

دار الزمان... وضاع الامان... بهاي الارضّ
انته الچبير... واجمل امير... وحبك فرضّ

(٣)
آه... يا هيبه ابسوگ الكوفه ايفروك
آه... بخت الساده اليرهبهم يدروك
آه... بهذا السوگ ايريدون ايشَوّفوك

شني اللي يجري باسواق الما ترحم
حميده اتطبله وعطرك بي من تشتم
يحرگون الها چم گلب ورادوها
الأميره العظمى ابهل موقف تتيتم

صعبه عليك... مچتوفه اديك... چنك علي
محسوبه هيچ... بچف الرچيچ ... چفك خلّي

(٤)

آه... من راسك فوگ ارماح ايضل ويل
آه... حته ابجَيّة ضعن اليگطّر هيل
آه... تتلاگه الروس وتضوّي اشچم ليل

نحر يستقبل ضعن الفاگد منحر
وتضل الروس اتوّن ابمدمع احمر
على النسوان الفگدن كافل يرهب
اركضن والهيبه متحب ركضه ابنص برّ

صعبه النساء... تبقه ابعراء... هاذا الآلم
بليل السكون... رادن يكون... الهن خيّم

(٥)

صدر الدين

الكسرت خاطرك بچّيت الاضلاع
عطش ريجك فلا تتحمله الگاع
واخيول الشمس داست بالاجروح
وخلت جرحك يسولف بالاوداع

صوغة الزهره اتفرهدت حيف
ونامت بصحره بلبة الصيف
مو وكته هسه يصلي معذور
بنحر القداسه اشركّع السيف

(١)

دورة حَجّر رحّه اندارت الخيل
عليك، وطحنتك چن طحنة الهيل
ابرنّة كسر ضلعك وكت الانداس
لون العرش والدنيه صبح ليل

من النهر للخيم جابوك
بس مو اشيول ابخيل دنوك
وفوگ الهضيمه وذيچ الاجروح
ابلا راس فوگ الگاع عافوك

(٢)
مو جسمك الخيمه امن البچي اتبيد
يشيخ وطحت بيد الموش اجاويد
يمتوسّد وساده من الاتراب
توّليه الزلم من يوگع الحيد

احمولك اثگال اتريد الاينوح
واجروح گلبك بالبچي اتفوح
ضاعت ارسومك من الاسيوف
الحد ما صرت چن جرح مفتوح

(٣)

بوگعتك عاشرت خيماتكم نار
وجمر چلّب خباثه ابرجل الازغار
صعدت غيرتك والضعن منهوب
الغيره اتريد حار وطبعك الحار

گمت اعله حيلك رغم الاوجاع
وابسيفك اتچيّت عل گاع
بس يل سندت الساق والكون
طحت وشفتها طيحة اوداع

(٤)

لـ أكبر جرح
.
.
.

مو عطش...
فگدك امخَشّبْ السان ابوك
يا چبير الغيث، تعطش؟
وانته اسمك( كوثر حسين) وربيعه، عَطّشوك؟
العصمه ماتت ثلث موتات اعله مودك
يل اموگف الغيمه، بس اوگف لابوك
لا يموت
انته يا ريج الحُسين وكون تنشف
يبقه ابوك ابلايه صوت
حسين من اتمدد اوياك ابعظمته
قماش خيمه مدري عرش الله اللّي كَزبر
انته يا اكبر جرح خلّه الحُسين ابضلّه يعثر
انته بس المن اسولف عن مصابك
اختصر كل الحچي بـ الله اكبر

يا سراط الحب عجيبه
الخيل والخيّاله ما فهمت عَضمتك
على نهجك، موش فوگاك الخيول اتدوس جثتك

حسين من تيّه طريقك
وانته لحسينك ابن( بارّ) وصديق
يعني چان ايشوفك ابكل، اتجاهات الطريق

الخيل نثرت عطرك ابكل كربلاء
اتشضّى تاليته الضياء
امراية احسين( ابحوافر غشمه) كسروها حسافه
والتراب ايغطي وجه الله شكثر بالطف صلافه

كلشي بالطف صلف صار
الشمس تچوي الجمر هيچ القرار
والعطش عاف الخليقه، واحتضن ريج الزغار
والهوه ما برد واينگط سموم، الطف دمار
ها يخلّاس العطش انهض تراه الرمل حار
ثلث نوبات الحسين، شفته جاسه الاحتضار
وابوگعتك انضر الفيّ عِلن عن الانتحار
وانكشف كلشي يغالي ابعزّ نهار
ابوگعِتك هذا الحسين شفته موش حسين صار

وانته يل مو هيّن اوداعك كسر ضهر الخيام
انطفت عين الامامه من طحت فضّ الكلام
مات ابو الاكبر يالاكبر والسلام

📜ولدي علي

🎤ميرزا علي الحلفي
✏️ صدر الدين
🎤 تبارك عبد الرزاق

⛺️هيئة يد الله
مجلس عزاء محرم الحرام 1443هج
كربلاء المقدسة

#ياأباعبد_الله_عليك_منا_السلام

سولفت بيك اويه گلبي وچان وكت القصه ليل
وگال گلبي ابهل عباره هاي ليله اتريد حيل
ها يسلطان المشاعر ابشاربك عبدك دخيل

هلّ محرم وانه اريد
من حظرتك مدة ايد
وتنتشلني امن الضياع
وكون اصير امن العبيد

دخيلك... ارد اطهّر دمعتي
دخيلك... وبيك اشدّن طلبتي
دخيلك... ردت تحرگ مهجتي

دخيلك يا علي ابن موسى الرضا

(١)

ها يطاري الله ذكرتك والدمع شافك ضريح
وگال بس انته ضماني وانته باب الله الجريح
اليلطم اتكض چفه بيدك وحاشه خدامك يطيح

ليك مبعوث ابكتاب
من جرح عاش ابعذاب
ابنظرتك شفت الخلاص
وتنطي للجازع مصاب

يغالي... عَلگ دمعاتي اشد
يغالي... وابرحمتك ينعگد
يغالي... خايف ايكضني البرد

دخيلك يا علي ابن موسى الرضا

(٢)

دارت الدنيه ابدمعتي وشفتك الگلبي دليل
وخذت بيّه لجرح عمتك وصارت ادموعي سبيل
شفت حبك يعلّ گلبي واشفى لو اصبح عليل

انته علمت الينوح
ايخلي ملح اعله الجروح
حته اعيشن بالمصاب
وعطر نار ابقه افوح

خدمتي... بيدك ومالي حچي
خدمتي... بزودك اعليها انتچي
خدمتي... هيه مصدر كل بچي

دخيلك يا علي ابن موسى الرضا

(٣)

هذا شهر حسين رايد بي ابيّض وجهي كون
والطم ابحزني العزلته على آلّام الضعون
شلون بعيونه يعاين الما لطم فوگ العيون

للضعون اگضي السنين
ابچي بالحب والحنين
هذا نذر الحَب خيام
يعيش ويموت بونين

عزائي... بزودك وحاشه يفضّ
عزائي... على التاهن بالأرض
عزائي... بيّه كل دمعه فرض

دخيلك يا علي ابن موسى الرضا

(٤)

يا چبيّر الفيّ دخيلك خلّي دمعي ايصير نار
على الضاعن بالبراري وطلعن ابعزّ النهار
ردت حار الدمع يوگع حسين رايد دمع حار

ها يسلطان الغرام
الليله اريد ابچي اعله شام
واترس الريّه ابخنگتي
كون ما مرتاح انام

خذاني... دمعي يم باب الرضا
خذاني... وتهت نجمه بنص فضا
خذاني... وگلبي باللوعه انگضه

دخيلك يا علي ابن موسى الرضا

(٥)

صدر الدين

📜آه يالليل


🎤ميرزا علي الحلفي
✏️صدر الدين الدراجي
🎤ذكر علي قاسم

⛺️هيئة يد الله

مجلس عزاء شهر صفر 1443هج
مشاية أربعين مولانا الحسين صلوات الله عليها



#ياأباعبد_الله_عليك_منا_السلام

يم بابچ لمّة اعراب... هَدّو بس هَدة طلاب
شيطان ايشاور شيطان... خل ندفع عل زهره الباب
***

مسموم الهادي ابأمر اكبر شيطانين
راح اليستأذن لو دگ باب ام احسين
مات الچان امگيد كل اچفوف الشين
اتلثمية حاقد صاحوا ويه الجبتين

خل ناخذ من طه الثار... ونچتف ايد الكرار
والحيدر نحرگ بيبان... خل ندفع عل زهره الباب

(١)

ملعون ايشاور ملعون الذبح الخير
وابابچ نيران الضيم اتشب واتغير
چانت نيّتهم بجروحچ آه اتصير
ومُحسن يُذبح يم بابچ چن ذبحة طير

حار البسمار امن النار... وترفه ادري رگبة لزغار
گالوا بامجازه الاحسان ... خل ندفع عل زهره الباب

(٢)

بأم الكون اتخون الوادم والأقدار
يل من الله اجيتي الأشرف بقعه ودار
(أنا اعطيناك الكوثر) للكرار
مو للباب البي بسمار وحطب ونار

يا دفعه ويا حسره او ويل... الخلّت حيدر گاظي الحيل
وصار الما مرّ بالحُسبان... خل ندفع عل زهره الباب

(٣)

ودفعوا بابچ، حرگوا گلبچ، مات اوليد
حومر خدچ، اسود متنچ، دمعه تزيد
الطبّ البيتچ، غاصب حقچ، شنهو ايريد
ابچف حبل الله رادوا يثبت لون الگيد

واتچتّف ذاكه الما يوم... خسران ابحربه ومهزوم
وما فزعت ليه الجيران... خل ندفع عل زهره الباب

(٤)

اخذوا حيدر وانتي ابگلبچ نار اعتاب
صحتي اتعوفو لو عن راسي ايطيح انگاب
اخسف هاي الگاع ومتضل سمه وتراب
وهم وصاچ الوالي اتصبرين اعله امصاب

چم امصاب وچم اصواب... وانسميهم عود اصحاب؟
يا ربي العن هل شيخان... خل ندفع عل زهره الباب

(٥)

للشاعر
صدر الدين

مبارك لكم ❤️

اجيت وجيتك اتسرّ اليواليك
مطر بالصيف، فرحت كل نفس بيك
ونزل جبريل عايف كلشي باسماه
خاطر يهزّ بجناحه الكواريك
وتطّش املاك ربك بالسمه انجوم
وتمَسّح اجناحها بأطراف رجليك
چهبت الگاع بس چهبة الملاچ
واجه وجه الصباح ايصبح اعليك

من تمشي الأرض تصعد ليمناك
يتيمه ورادت اتحس راسها ايديك
السنابل من تمر من يمها مولاي
لو اعصار يمرگ ما تجافيك
توگف مستعدّه الهيبتك ذيچ
ما تتحرك الشافت معانيك

اگلوب الناس چانت چنها صحراء
وچن طوفان اجت بيهم طواريك
بوكت محد يهفّي ابوجه الاصنام
هُبل واللات سجدن جوّه رجليك
بوكت الكعبه بيها امحاوطه ارجاس
الكعبه اعله الخليقه زامطت بيك

يعرفك تشفي گلبه بهاي الاقوام
وزلمة زين ما تنگدر يدريك
لأصعب أمّه دزّك يدري خيّال
صنع ايدّه ويعرفّك يعرف شبيك
أول شخص من نور الله مخلوق
وأول عفيه گالاها الله بس ليك

نشرت الدين نشرة گمر بالليل
واعيون اليحبونك تناغيك
هلا بالخلّه راس احبابه مرفوع
شاري اگلوبنه ابطيبة محاچيك
الايحبوك صاحوا كلنه بحمال
خلّي اگلوبنه من يمر طرواك
تتوضه بعشگ وابحب تصليك
.
.
.
متباركين ❤️

هوَ كلام ربُ الرجال
المُنكسر
معَ جرحه
لما جرى على اهل بيته

.
.
.

يا جرحي الما ناشف... وبيك الدم ما نازف
بس (هم) تنزف شايف... نزيف الهم... يبچي الدم

ليلك من ايخيّم... جفني اشلون ايسلهم
وبيك المدمع يثلم... تحنّ ليها... لمحاچيها

اجاك الليل يل طبعك
بالضلمه تهل دمعك
شطّت وانّي... على احزاني
انامن وافزّ باللسعه

مصاب الزهره والمُحسن
بيّر اجروحي الاتخزّن
وانه شلوني... بهت لوني
ويلوگ النوح للمحزِن

شيضل بيّه وانه اضلوعي تصلّ من اذكر الحاله
واجي للبير واشكيله وميّرد اخرس اشماله
منو اليسمع حچي اعيوني بس فاطمتي تفهمني
يغربة روحي من راحت گالوا حدّب اخياله

(١)

تلهب شفتك جرحي... من اتبدّه البرحي
ومتكحل شو صبحي... بسواد الآه... ينادي اماه

يل ما ترحم بيّه... وتلچمني ليليّه
من فگد العلويه... نهجم گلبي... وكثّر تعبّي

تره ما مشت بس هيّه
روحي وياها مچفيّه
خَذت عمري... وكبّر كسري
يعايّن شامتي بيّه

اول مرّه مگيوله
(حيدر طاح من طوله)
فزع حزني... وشفت ردنّي
اول مره مبلوله

يسرّ الهم منو اليسمع صوّت الكسرة الخاطر
بس الچان بهروشي يحسّ ابلوعة الحاير
موش انياط تتگطّع انگطعت روحي من جسمي
احس روحي ضلع محني وبيه استفحل الحافر

(٢)

غطيتك بادموعي... يا حزني وموضوعي
يا سرّ حني اضلوعي... گرب حتفي... وهدل چتفي

من غسلت الزهره... بدمعي اليوگع مطره
تنزف شفتك حسره... وتون مثلي... انسلب كلّي

اريد ارفع نعش ضيمي
وتجمّع بالجفن غيمي
ورعدّ يجدح... مطر يجرح
ومنها وانعلن يتمّي

خذه روحي نعش حالي
حيل البل نعش غالي
شريچ الونّ... شنو امچفّن
چا ياهوه يبقالي

بطريقي اعثر مثل دمعي من يعثر على خدّي
حيّل الله انّه وقوته ما بيه ارفع ابزندي
واومي للنعش (ارجع) لا تاخذ دفو اگليبي
مثل ذاك الجمر عل گاع هيچ اصبحت متبدي

(٣)

راح احچيلك موقف... خلّه اجروحي اترفرف
وبيها احزاني التنزف... صعب وصفه... ولا تعرفه

الدفنة بنت الهادي... ما ينطيني افّادي
ضل الساني اينادي... ارجعيلي... يضيّ ليلي

ابو تراب انعرف صيته
وابني اتراب وصيتّه
امانتنه... لتلچمها
هايه كل علي وبيته

اعله هونك ويه ام روحي
الچانت مرهم اجروحي
مهي امّك... من اتهضمك
تذكّر هَدمت اصروحي

يجرحي الما ترك گلبي گلّي اشيمسح اوجاعي
اعله هل موقف شفت بيّه چودر للحزن ناعي
(مشت فاطم) ( مشت فاطم) هل كلمه تهزّ گلبي
سافرت ألارض هضمي ودمعي ماخذه متاعي

(٤)

غربة حيدر شِدّه... حيدر ضلّ الوحدّه
ودمعه ابرمشه ايشدّه... اليحس دمعي... منو بوضعي

يا غربة ايامي... يا ريجي الضل ضامي
چا هلبت باحلامي... تمر بيّه... وتسّد فيّه

الرايح مو شخص هيّن
ايعوّر فگد الاحنيّن
منو ايعوضه... الحزن فرضه
يخلي امن الصلب ليّن

آيات الحزن تحله
بطور الآه لو تُتله
يقرآني... الحچه احزاني
وابكل وجعتّي انضرله

انختم حزني بهضم باقي لحد ما موتي يتحتّم
النيّه البيضه لو تبچي من ونّها يخضّر همّ
عاشت فاطمه ويايه وماتت موش ويايه
الزمان الفرگ العشاگ خله عيشتك بالدمّ

(٥)

صدر الدين