علي ييمه... وين وين
الجرح اضمه... وين وين
وانّه الحزن وياي... صار عِشره

عليك انادي... وين وين
بذيچ البوادي... وين وين
علي الگلب مشلوع... لا تكسره

ارجع صحت... خليني اشمك
يمه ونحت... مو ردت اضمك
لمّن رحت... اتيتم دليلي
هذا الوكت... عذبها امك

خَشّب يمّه... السان ابوك
وگلبي بهضمه... راد ايعوفوك

ولدي علي... ولدي علي

(١)

انضر مشيتك... ويل ويل
تذبح خطيتك... ويل ويل
وانضر منيتي وياك... چنها تمشي

رحت واشوفك... ويل ويل
تسحر طيوفك... ويل ويل
لو تهجر انته العين... ايطيح رمشي

رايح علي... وادعي تردلي
انسه هلّي... غير انته اهلي
يبني الگلب... ما بي يودعك
وادللي... اذكر تگلّي

خاف انته اتموت... وتنهمل الروح
يمددلني... بهونك لتروح

ولدي علي... ولدي علي

(٢)

وانته تقاتل... آه آه
شفتك مناضل... آه آه
بس من طحت يا يوم... ليلى ماتت

واحسين اجالك... آه آه
امترّب بچالك... آه آه
واتمدد اعله الگاع... وروحه فاحت

حسين انفجع... من شاف جثتك
شفته انصرع... يبچي الوگعتك
هذا الأمر... ما شفته بالطف
گلبه انصدع... من شاف ونتك

واتلث نوبات... من مات حسين
متت انه وياه... يا ضيّ العين

ولدي علي... ولدي علي

(٣)

يا فرحة امك... هيچ هيچ
مو جاي اكلمك... هيچ هيچ
جابك ابوك اهنا... وگلبي فرفح

للخيمه اجاني... هيچ هيچ
عِمّه زماني... هيچ هيچ
وشفتك رغم مذبوح... عطر تنضح

يمه الدمع... مريود لجلك
واكسر ضلع... والطم واگلك
هذا الحزن... ما مثله ثاني
ابطول الوضع... گلبي يصدلّك

شافك عل گاع... گلبي المحزون
وشمّ بيك اوداع... راح المزيون

ولدي علي... ولدي علي

(٤)

خلصت حياتي... نوح نوح
وهذا مماتي... نوح نوح
يل رايح اخذ اوياك... ليلى فدوه

الليله حلاها... نوح نوح
گمر عِلاها... نوح نوح
چانت حياتي وياك... حيل حلوه

ابلايه گمر... ليلى حزنها
يكسر ضهر... يمّه ألمها
منها مشه... وهايه مصيبه
شلون العمر... يگضي وضنه الها

ضل عل تربان... والخيل اهواي
يا ضيّ عطشان... دمعي اجمل ماي

ولدي علي... ولدي علي

(٥)

صدر الدين

يا عمي... تحله النومه چانت لو على چفوفك
يا عمي... أنه ارقيّه البقت تبچي على اطيوفك
يا عمي... خلص عندي الأمل ما اضن بعد ترجع
يا عمي... اتضل امعصّبه العين اللي متشوفك

وينك يستري... اعله عمري
متندمه لأن ما متت باحضانك

توني بديته... وجزيته
وچني ابگد رباب ابكثر احزانك

عازه الحنانك... وأمانك
چن عازة حسين الكضّة اردانك

واويلاه... يصگّار الزلم مو هذا تقديرك
واويلاه... عل گاع وسهام اتريد تفسيرك
واويلاه... وما متعوده اروحن اشكي يم غيرك

ابو فاضل يعمي... ابو فاضل يعمي

(١)

شو طايح... يا فتشة نضرنه ومقلة الزهره
شو طايح... يل امنسيني حضن امي ابحچي السهره
شو طايح... منهو ايگلي (صار) اينفذ الردته
شو طايح... واشوفن مصرعك چن مصرع العتره

غافي اشعلامك... وخيامك
حارسهن صفه اسمك ليش عايفهن

احسينك كسرني... وقهرني
من شفته دموعه اعله الترب ذبهن

وضهره عوجته... وكسرته
وحته اخيامنه امن القهر شيبهن

وينك ليش... عايفنه شنو الزعّلك من عدنه
وينك ليش... واحنه نحبك وردناك كافلنه
وينك ليش... يا موت اليعطلك عن محاملنه

ابو فاضل يعمي... ابو فاضل يعمي

(٢)

بخيامك... صاح الصايح وهدهن عظم جرحك
بخيامك... عگّب هل روحه ما اضن يل كفو انلمحك
بخيامك... طب اتراب واختنگت شكو ريّه
بخيامك... وينك يل تخلسه بلمعه من رمحك

يل تعبتني... شفتني
چني حسين ضهري امحدب اخلافك

لا مو طباعك... وداعك
مو هيچي وجبّ اشبگهن اچتافك

وبوسة يمنتك... وجنتك
واجب على عمري ابهل امر طافك

يالمهيوب... گوم الخيل گربت يمّك انحرهن
يالمهيوب... واخيامك احترگن من كبر همهن
يالمهيوب... بنات الساده طلعن من مضاجعهن

ابو فاضل يعمي... ابو فاضل يعمي
(٣)

يا عيني... ويا عين الفواطم يا علي ونوره
يا عيني... بس اشلون عيني غدت مسطوره
يا عيني... ما تنگال حاشه وانته ساطرهم
يا عيني... بس حادي اجنبي هسه اخذ دوره

من مات ابونه... اجونه
وخلّوا بينه چم دمعه ولا نشفت

ذوله الاجانب... عجايب
شفنه منهم وروحي بحزن نشغت

وسفه عرينك... تسلّب
يا ليث الحجاز الگوم من هجمت

عل خيمات... هَدت خيلهم بريدت رجلينه
عل خيمات... لمن اجو حرگو حته اسامينه
عل خيمات... وشو صرنه سبايه وهيچ ضلينه

ابو فاضل يعمي... ابو فاضل يعمي

(٤)

واخذونه...بلا راي الزلم بالگوّه اخذونه
واخذونه... وغصباً صعبه نطلع والغرب جونه
واخذونه... النوگ اتبدلن صارن هزّل وسفه
واخذونه... عگب ذيچ المهابه ابوادي طلعونه

خنگة مشيهم... وسبيهم
خلونه نطب الدوّل ضهرّيه

وهايه چبيره... الأميره
تاخذها غرب وبأسم مسبيه

وينه الكفلنه... وحملنه
وينك يا چبير اتصيحك ارقيه

وينك گوم... الحگنه الطريق الشام يا عمّي
وينك گوم... تلگانه سبايه والدمع يهمي
وينك گوم... ضلّ ايصلّ عليّه أمن الزجر عضمي

ابو فاضل يعمي... ابو فاضل يعمي

(٥)

صدر الدين

انته اللذي... تخسف گاع الحرب
ابسيفك يا شهم عل حومه امن اتطب... يا قاسم

طبعك صعب... ضِلّك سدّ الدرب
ها يخلّاس الزلم يا نارك لو تثگب... يا قاسم

يا صوتك... زلزلة رب الآزل
متفوتك... رگبه لو سيفك زعل
امن اصيارك... رابي باحضان الگمر
يا قوتك... من علي خير العمل

يصگّار الاسباع يسيف الكافل
غضب الله عل گاع حسامك نازل
علي چنك ابيوم عليهم داخل

(١)

حدر الشهم... تتلولح هل رگب
وانته حدر اعيونك تتلوح كل الگاع... يا قاسم

بيك الزلم... حارت يا سيدي
ومن خزرتك شردت يا مولاي اسباع... يا قاسم

خزراتك... اتگول چن يوم الحشر
زمخاتك... اتگَعد المات ابگبر
ما يبقه... آثر للّي ايگابلّك
نضراتك... تمحي كل هاي البشر

الك نضره تنهاب ينسخة والدك
يل اتعاند الموت منوّه ايعاندك
يسيف الله وحسين عليهم حادّك

(٢)

اصل البخت... يمك كلشي ركّع
انته قبلة كل نشمي وانته التنهاب... يا قاسم

رشگة نبل... عينك وكت الخزرّ
ارموشك چن نشّابه الما ذَل بيها انصاب... يا قاسم

بعيونك... دوم ياخذني السهر
وافنونك... نشّفت ماي النهر
يا فگره... الگابلك وكت الحرب
يدرونك... انته تربات الگمر

متخطيلك ضربه يناصر عمّك
دخيل الله تكتل يفورة دمك
تقسم الاعادي القاسم اسمك

(٣)

انته الاصل... يا شارب والدك
فورة ادلاله من چفك طبعك حار... يا قاسم

تخسف مهر... مدري گاع الحرب
يا ثگل بختك يل تجدح عينك نار... يا قاسم

اعصارك... ما يبقي الهم اثر
يا نارك... بالبرد تچوي الحجر
انته الما... يشبَهك بس والدك
فقارك... بالحرب يلفظ سوّر

يبو اچفوف التسطر ولا تخطي الخدّ
ابرگاب اللّي ايعادي حسامك ينحدّ
ينار الله التچوّي منو الگال تبرد

(٤)

صدر الدين

عَمد خيمّه... من طيّح احسين
عَمد گلبي... اتهدّم يطيبين
يا هذيچ اللحظه بيها الشفته
حسين خلّص ضهره المن عفته

**

انهزّ طول الخيمه... وما ضلّت شيمه
چن صرت ايتيمه... يخويه

اشصاير بحسينك... ضل يندّه وينك
كاسرته ايمينك... يخويه

اجّه ولمن اجه باخياله عثر
ضهر اخوك اتيتم ابهذا الخبر
گوم واسند ضهره مو ضهره انكسر

ابو اليمّه... بهل فاجعه ايموت
سَمعه صوتك... ايعَيشه تره الصوت
ما ايعيش ادريه اذا مو انته
حسين خلّص ضهره المن عفته

(١)
يا فتشة عيني... حزنك سابيني
گوم وحاچيني... يخويه

من صارت ضجّه... وابگاعك عَجّه
اهنا گمت اترجه... يخويه

الحومه لو سكتت يخلاّس الزلم
يعني مات الچان بالحومه مهم
الچان دگة رجله تكسر چم شهم

يا كفيلي... الموقف يهزّني
اليرفض ابچي... من عنده حزني
كعبة الخوّه گضت من يمته
حسين خلّص ضهره المن عفته

(٢)

امناشغ خيماتي... ولطم ابنياتي
يشرح دمعاتي... يخويه

احچيلك واسمع... يل ما ترضه ادمّع
هسه اني اتوجع... يخويه

گمت اگله حسين جيبه للخيم
وگال ما يرضه يجي راعي العلم
يستحي الما جاب ماي يجيب دمّ

يلـ مؤدّب... بس ردت اشمّك
انه زينب... ابمنزلة امك
انه ربيتك وضيمك شلتّه
حسين خلّص ضهره المن عفته

(٣)

شبيدي بهل حاله... وربّ الخيّاله
الچنت امشي بجاله... يخويه

عايفني اهنانه... وكتلتني احزانه
الريشاته احمانه... يخويه

مدري احاچيمن واگله بهل عذاب
چنت اگلك من اطيحن بالمصاب
هسه ام الهيبه گعدت عل تراب

گمت انوحن... شنهو الأسويي
گلبي هجرك... كلش يچوّيي
كلشي وكته وهل خبر مو وكتّه
حسين خلّص ضهره المن عفته

(٤)

هيّن يا حالي... والشاغل بالي
حيرة هل والي... يخويه

حسين انسد شوفه... بس كون تشوفه
مذبوحه اطيوفه... يخويه

ارد اگلك يل تشاهد خَبرّيّ
احسين مو عامود هزّ ابنضري
هذا اخوك اهتز عموده الفقري

خلص كلشي... وما خلص نوحي
وگمت انطر... تزهگ يروحي
حسين شفت امصاب طف ابصَمّته
حسين خلّص ضهره المن عفته

(٥)

صدر الدين

اجيت اشكيلچ أمن الآذه گلبي
علي وليدي الحنين الزاد تعبي
اليدليني الدرب تيهلي دربي

صويحب دليلي... اصبح بلوتي
امحلي وگفتي... وليدي وعزوتي
چانت الوادم... ما ضنهم ابني
ايحسبونه واحد... من ضمن اخوتي

الما عايف روحي والجسد
عافاني وعل ترب گعد
انهز گلبي بطيحة الولد... حبيبي

بچف ايدي الدنيه والارض
لحگيلي رايد انتهض
دوهني اوليدي بالركض... حبيبي

(١)

ملخ گلبي لمّن جيته بوگعته
صديج الروح فوگ الگاع شفته
ما بيه اعله ايدي شلون شلتّه

من طاح شفته... وگلبي تگطّع
لمّن احاچي... ساكت ويسمع
گتله دجاوب... ريحلي گلبي
ونّ واحسّن... روحي اللي تطلع

يا ليله اذكرله من اجه
وگلبي بضحكاته توّجّه
شو هسه دمعي هيجّه... حبيبي

ما متعودله ينكسر
يوجع لو ينحني الجَسر
خلّص يم جثّته العمر... حبيبي

(٢)
رحتله وارد اجيبه للمخيم
لگيته وگلبي بالمشهد تثلم
ابمكان البسته بي شو گاعد الدم

عود ارد اگومه... مديتله ايدي
ولا چني اجيته... اتغير اوليدي
عايفني اصيحن... ومتوسد الگاع
وابصمته نشّف... دمي بوريدي

الما يرضه الوحّدي امش
السميته گلبي والهرش
اندهله وطابگ الرمش... حبيبي

يا ليله الموقف الصعب
العايش بإحضاني والگلب
شو غافي والحضن ترُب... حبيبي

(٣)

امرادف وحده يم وحده المصايب
ويا بلوة علي السوتني شايب
ابو نوم الهني غافي بترايب

ضيّ الأمامه... عل گاع طافي
امعطش كياني... اميبس اشفافي
چانت غفوته... كلش عزيزه
ايفز ويه كل صوت... ما يبقه غافي

چا هوسة معركه وحرب
والخيل وهدّة الغرب
والنوم بهل وضع صعب... حبيبي

يلّه ابني احضاني هل اجت
يمدلل امك انتهت
گوملنه امن البچي گضت... حبيبي

(٤)

اتعبت ما بيه عل خيل وسحگها
شخلّه اوليدي بالروح وخلگها
فجوة علي بنص گلبي شغمگها

راح اللي تارس... عيني بوگفته
وخلاها روحي... تموت بوجعته
اعرفت النهايه... من موتت ابني
خلصت حياتي... لمن شبگته

احاه يا شبگة الفگد
يوليدي مو حلو البعد
الفگدك ما اضني مستعد... حبيبي

مو طبعك تكسر الابو
يا صاحب گلبي وانته اخو
شو طايح طولك الحلو... حبيبي

(٥)

صدر الدين

#نعي


يسوايتك ما صارت ابيوم
خليت گلب احسين مالوم
يمخشّب ابموتك الزردوم
بيتي ودليلي اعليك مهدوم

امنشفني من الراس للچاز
لمن صرتلك ابو وجناز
المغني العوالم صار معتاز
معتاز توگفلي يجيدوم

مهموم ابو روح العفيفه
رضيني واحچيلي طريفه
سكتت السانك تره امخيفه
خلّت ابوك ايطيح وايگوم

يشراع ابوك اشصار وياك
وما گمت من جيت ابچي وانخاك
تعبان ابوك وموش كواك
ترضاها اجيك وگلبي مهضوم

مو عادتك تتركني احاچيك
وسكته انته من راسك الرجليك
چا هوّه وينه الدمع وابچيك
هلكان حيلي وگلبي مضيوم

أنّه واخوي اعليك نثغب
ويسندني من ابچيك واتعب
امترب يحس متن الامترب
ردينه منك والبچي ايدوم

طبيت خيمتنه البخيته
وليله انضرتني ابعين ميته
گالت علي ودمعي جريته
وانكسر خلگي وگلبي مثلوم

.
.
.
صدر الدين

اچبير بيت الزهره والحب والهوه
البيده صم الضلمه يتحول ضوه

حچي الگلب گلته... بمولاي وعظمته
على الكرم بخته... متسيّد نِضرته

***

بزر حيدر... ابو الغيره
شنو ايوصفه ويحدّ فعله منو يگدر
الكرم كبّر... على چفوفه
ربّه اعله ايده انسگه بخيره وبقه يكبر

مو مثل كل هاي العطايا تختلف عطيته
اكرم بني هاشم صفت فوگ اللسن كنيته
للما طلب گبل الطلب فاتح دليله بيته

كوثر الزهره وسيف حيدر سيدي
فرحة مُحمد من ضحكته تبتدي
الحسن گلب امه... وگلب امه ندبته
على الكرم بخته... متسيّد نِضرته

(١)

ابحرت بأسمه... ابشجاعاته
الكسر گاع الحرب زوده منو ايفهمه
علي ابقوته.... اشثگل چفه
الحسن زود الله واشحاله اللذي ايردمه

كاسر ضهر چم حومه حيله وتشهد المضارب
من الـ نهروان وللـ جمل ما مثله بيها غالب
معروف لو طب للحرب ذرية ابو طالب

لمعة انياب الليث يلمع صارمه
وما يعله فوگ امهنده بس الدمه
جَسّر فلا مثله... بالحومه سمعته
على الكرم بخته... متسيّد نِضرته

(٢)

الربه بحضنه... ابو فاضل
على زوده يضل كل الفخر يدنه
فحل هاشم... ابو القاسم
اليخزره يموته بامچانه ودمه ايدفنه

وعلى ايده كل الهواشم ربت من زغرها
وينه اليعجب الحومه چفه ويكسر ابضهرها
سبع الهواشم ابو محمد والخلگ صگرها

زوده وحميته ما مثلهن بالبشر
غيضه انتقام الله وركع يمه الدهر
علي يشوفونه... لو شافو وگفته
على الكرم بخته... متسيّد نِضرته

(٣)

العشگ لجله... الحسن عشگي
الگلب يحچي اعله مولايه بشنو اوصلّه
الوطن هوّه... الرزق منه
وعلى عيونه شفت كل الغزل يحله

مو بس شجاعه لو كرم هوه الحسن قضيه
منه عشگنه وهوه اصل رزق اللذي بديّه
وبيده مصيري حبه لن للحب صبح هويه

ما مثله واحد سيد اعله الازمنه
بخته اللذي يم الحسن گلبه اعتنه
الهوه تره مِنه... وبريتي شهگته
على الكرم بخته... متسيّد نِضرته

(٤)


صدر الدين

اربعين السيدة
.
.
.


حچه اترابي … ويريد ادموع الاترطبه
على احبابي… حنّت روحي بالغربه
ولا والي… انگابه امبلل بخويه
وأنه اعتابي… عليك وعَتبتي صعبه


عرف عند الخَلگ سايد … المات اتگوم اهاليته
يزورونه وفلا واحد… ما مروله اهل بيته
بس بالشام ضل شاهد …ما اجو بربعينيته

يحسين ديَّن الخوّه مريود
والوحشه تدري اتفت الاچبود
محتاج گبري امناشغ احيود…يحسين

مرلي الحچي البل غربه ذباح
وفوگ الگبر مامش اخو صاح
ومملوح منك صوت الانياح …يحسين

(١)

بچت روحي… وبچاني اللحد والموته
انه جروحي… صوتك طوّل اسكوته
بقت حسره… كلت گلبي وتهد حيلي
سبب نوحي… اخوي الما طلع صوته

اذكرك والحچي اتعلعل… بوكتها ما الي طاگه
اجيتك باربعينيتك… لحنانك چنت مشتاگه
اطوّل بين ما انزل… اشمرت روحي من الناگه

امن الناگه شمرتني المحنه
وبلكت گلت يلتم شملنه
اتشگ گبرك وتگعد تلمنه … يحسين

تاكل بگلبي لهاي الايام
احچايه وتصلّ من عدها الاعظام
عفت العزيزه اتموت بالشام… يحسين

(٢)

انه زينب… يخويه وزينب اتهمّك
الگبر شيّب… وادري بهل حچي ايهضمك
نساوينك… كلهن ماتن ابغربه
الگلب يلهب… ادري يا عزيز امك

يحسين اشبقه بحالي… غريبه وگلبي شيهيده
ولا يم گبري ضل غالي… ويواسي العمّه الاوحيده
مكتوب انه بلا والي… اعيش ودفنتي ابعيده

ثاري الغرّب يرادله اگلوب
والشام بس بالضيم مچهوب
عاين لاخيتك ميته وتلوب… يحسين

بالشام عازه لكلشي ينشاف
عازة اصياح وعازة اچتاف
وكون بلطم هل گبر ينطاف… يحسين

(٣)

يبو عيوني … التعب يمي صفه امچانه
انخطف لوني … وشلع دلّالي الامتانه
ميعنوني … الخلگ تعنيني بس انته
وانه شلوني … يريدك گلبي واحزانه

يلبّ الگلب لو يمّك … اغفه بلحدي مرضيّه
وما همني وحگ امك… الايسميني مسبيه
المهم اندل الاتلچمك… واداويها يبو ارقيه

يعمي البعّد وايهدم الحيل
والضوه عگبك يشبه الليل
يا دوه گلبي السحگته الخيل… يحسين

اي وحگ دمك يا ابو دم حار
ما شفت بعدك ضي للانهار
بالنار افز واغفه على النار … يحسين

(٤)

على اوجاعي … اريدك بلسم ايهدّي
الحزن ناعي… وصفه مگعاده يم لحدي
يبو الخوّه… مهي اندفنت اويه اعيونك
وعلى اضلاعي… تدوس الخنگه واتعدي

اداري الامي بحچايه … هسه احسين يحضرني
ابو الوگفات الاهوايه… ما متوقعه يتركني
هذا احسين واكفايه… اسمك دومه يسندني

والنعم منك يبو السجاد
دومك لاخيتك دوه وضماد
بس يبقه ضيمي لهسه ما هاد… يحسين

ما همني كلشي وكسرتي اتهون
انته مصابي اليهدل امتون
الضيمك تضل عميانه الاعيون… يحسين

(٥)

صدر الدين

اسعد الله قلوبكم
بولادة مولانا الحسن صلوات الله عليه
.
.
.
بچر الزچيه وبخت حيد السبعه
وبالحومه مو ريج الزلم يا مولاي
اتنشّف خزرتك حته ريج الدمعه
وابوكت چفك طلع صوت ابلسعه

وبس انت چنت اتسمعه
صاحت جهنم، مهي اتعرف اليكرم
هل من مزيد وبيها جوع امخيّم
واتلاحگِتها بجيش من الرعنان
وچيّمت وينّه او وينّه الامتونه اسمان
وغابات لجدور المضيف اتچيّم
عفيه اشقضية كرم چفك للنار
هاااا يبو محمد حار واتداري الحار
والحچي ابـ بزرة ام ابوها ايشيّم

وانته اللذي اتشيمهم
حِب بيت حيدر وانته طاسة حِبهم
يذراع حيدر ذاك الامنومسهم
امگمط النده الحد ما مطر يمك صار
واعيونك امربيه الغيوم العدهم

وتلتحف رمشك لغيوم
يل بيك فكة ريجها الزهره اليوم
امرورة اسماء الخلگ بالزردوم
ومن گلت اسمك سيدي اتحله الريج
وشفت الخضار اعله الارض ضل ايحوم

والسمه ابجيتك تضحك
يل تخلس ام الجمل فرّة رمحك
ويتبريد الفارس العينه تلمحك
اليوگع ابسيفك بزر بزره يموتون
ايغزر حسامك مثل رشة ملحك

واعيون عندك تجرح
ويم لون رمشك صار ليلك املح
امن اتلولي امك مهدك اليتمرجح
متهزّه امك گالوا وهذا اثبات
كاروكك ايضل بالحسِن يترنح