بكى وجه ألغياب اللي بلا تبرير !
و وقف قلب العتاب اللي بدون خصام

يطول ألدرب مع ذكرك وهو قصير !
تخيّل! خطوتيني عن ثلاث اعوام

أنا آسف على ألواجد من التقصير
كتبتك.. لين ماخلّص حبر  الاقلام

تعب عقلي وانا أتعب على التصوير
أنا شاعر .. ولكني معك رسّام!

تصوّر، والحكي عاجز عن التعبير
يطيح الحرف بالدفتر.. ولا ينلام!

يبي يرسمْك بوراقي قبل لاصير..
ضحيّة دمع عيني، والدموع ايتام!

حبيبي .. والمدامع في عيوني غير
تبكّي.. قبل ماتنزل وله و هيام !

هي الدمعات كالعاده .. بداية خير
على الباقي من الاحزان والأوهام!

تركت بداخلي صوره .. بلا تأثير !
رماديّه .. مثل وصلك ، يبو الألهام

لك البسمات ، والأفراح ، والتقدير
وانا لي قلب نكّس بالغياب أعلام !

أشوفك حلم وانت تشوفني تفسير !
وانا من ظلم عكس الحلم صعب انام

تمرّ بـ درب حلمي واسرقك واطير
واقول لـ كل احلامي كفايه احلام !

انا الأوّل على دربك .. وانا الاخير !
واشوف أنك بدايه للعمر وختام.

أحبّك لو ( احبّك ) خانها التعبير ..
انا مالي سوى احبّك مع الايام 🕸

‌
أسمع حبيبي.. والعمر معك جنّه
وبعض المشاعر بالحكي ماتحاكيك!

كل الشعور اللي من أعوام اكنّه
هو نفسه اللي في عيوني يورّيك!
‌
أحب وجهك.. واقترب له.. واحنّه
ومافيه غيرك بالخلايق يساويك!
‌
و محبتي لك.. ما بها ايّ منّه!
غصبن على قلبي أحبّك.. واداريك
‌
يهمّني ماضيك.. واصد عنّه!
خايف على عمري من أسرار ماضيك!
‌
و اسألتي الواجد.. وبالي.. كأنه
أشياء غرقانه.. وهي بين أياديك!
‌
اللي مضى لك.. مالي أيّ حق منّه!
حقي معك.. من صار قلبي حواليك
‌
ماضيك ماحبه.. ولا أبيه.. لانه
يمكن يخليني بـ إيدي أخلّيك.

‌❤️🖤

عطوني أقتباس عميق لدرجه محد يفهمه الا انت ؟🥇