نزله أو مجلس او شور لليلة الوداع


صيحي العباس إجمعي العيله
يختي زينب هايه آخر ليله

گعدي يامهجة دليلي والنظر
هاي آخر گعده والتالي سفر
ابماي نحچي اليوم باچر بالگمر
من تطيح الرايه وي كل حيله

زينب العباس اشبعي مِنّه شوف
وحيل شمي ابهل مسه عطر الچفوف
مو گمر باچر على اخيامچ تطوف
نار مسعوره اوْعَدُوّچ خيله

عايني الضحكة علي كلهه ملح
الضحكه منه بالعصاري ماتصح
طوله تلگينه جرح يدفع جرح
ومنچ اطلب فاتحه تهديله

دوفي الحنه ابچفوفچ حضري ياس
راح نحزن عالشباب الچنه ماس
إبن أخونه وبيه يرفع عمه راس
جاسم الليله العرس سويله

يختي روحِيْ يِمْ وِلِدْ أم البنين
شكري طيب اصدورهم تنگط حنين
لو رجعتي للمدينه بالونين
عزي بسمي اوْجِفْنِي دمعه اجريله

آه يا عبدالله زينب ياحزن
ابروحي يذبح سهمه واسياط المتن
يعبر اضلوعي المثلث وانه احن
فرفح ابچفي وحرت شحچيله

خل أشبگج شبگة أمي فاطمه
وْقَبْلِي صدري لا سهم لا بي دمه
وخلي نمطر دم دمع گبل السمه
گلبچ ابحال النحر شرويله



خادم الزهراء (ع)
سيد حامد النعيمي

محرم 1440

انتقل الى رحمة الله عز وجل
والدي السيد ملبس
ارجو منكم خدمة اهل البيت (ع)
قراءة الفاتحة له
ولاتنسونه وكذلك والدتي بدعائكم متفضلين وجزاكم الله خير الجزاء

عظم الله اجورنا واجوركم .

ياسيدي ومولاي يا أبا عبدالله مصابي بفقد والدي كبير ولكن مصابي بك وحق ضلع امك الزهراء ( ع ) أكبر ودمعتي لكم أكثر وحرقتي لفاجعتكم أعمق واحتراماً لأيام مصابك لن أذكر والدي بمنشور إلا لدعاء له وشكر لمن عزانا إلى أن يكتمل أربعينك وأواسي أمك الزهراء (ع) وأختك ومولاتي زينب (ع) وبتوفيق الله عز وجل وقوته ورعايتكم سوف أستمر رغم ألمي أكتب ما أستطيع أن أقدمه لكم من قليل في مصائبكم التي لاتنقطع والتي هونت مصائبنا
واعتذر منك لتقصيري معك ومع أهل بيتك الاطهار (ع) هذه السنه بسبب وفاة والدي في هذه أيامك المباركة والحزينة وأطلب منك أن تكون شفيعه في قبره رغم يقيني بأنك تحضره لأن مات على ولايتكم ومحبتكم وحزين على مصائبكم

ااااااه يامولاتي يازينب بأي حزن تمر عليكِ هذه الليله
/لسان حال مولاتي زينب (ع)/

ها ياليل ماچنك نفس ليلك
من راح الگمر شفتك تشد حيلك
على زينب تعنيت وركبت الخيل
وگامت وحشه تدبچ عالصدر خيلك

قصيدة الامام السجاد (ع)

لسان حال مولاي صاحب الزمان ع

عمري كتاب اجروح يحباب / كله حزن عنوانه الباب
قريتو اهواي محد عرف تفسيره
من عنواني تبدي عدكم الحيره
عمري كتاب اجروح يحباب

صفحات عمري بس حزن / وجروحي أبد ما تستچن
كل يوم لمصيبه أون / وهالليله للسجاد أحن
ابصفحة امصابه انچوي ابجمر الخيام
وگوه من اقراهه ماليهه الظلام

وجه الحُروف امغَطّه دخان / وتلطم صدر لحسين بحزان

حرف السين راسه امثلمه تطبيره
من عنواني تبدي عدكم الحيره
عمري كتاب احزان يحباب

بوراقَه عَايَنْت انْرسم / حاير علي ابنار الخيم
وعينه على فرت الحرم / ظليت كاتلني الألم
مايِطَفّيهه الدمع بوراقه نار
وحافيه اجدام الحرم والسطر حار

چم خسفَه بَالْسَطْرِ ابْظَهر / تعني جدم زينب عثر

وگامت والنظر للشاطِيِ ادْيره
من عنواني تبدي عدكم الحيره
عمري كتاب احزان يحباب

مابيه حيل اعله السبي / ويتبع أثر بنت النبي
ماهمه سوط الناصبي / همه صلاته والعبي
يمسح ابخطوات عمته امن الأثر
وصوت إله ضربوهه اختك ياگمر

كل غالي متلمسه الزغار / لؤلؤ أَخَيْتَكْ يامحار

چنت اعليهه حارس يابو الغيره
من عنواني تبدي عدكم الحيره
عمري كتاب احزان يحباب

عكازه دمعه ويرتچي / وعل ياعلي من ينتچي
مابين عِلّه والبچي / مخنوگ صدره بالحچي
مو علي چنه علي ابيوم الضلع
صلب واگف طوله بس كله دمع

وحده تِكَسّرِلّه الگلب / لمن رقيه تنضرب

الشمر سوطه ابحقد مايرحم ازغيره
من عنواني تبدي عدكم الحيره
عمري كتاب احزان يحباب

قصة هلي ماتنقره / لكتاب ميحمله الجره
أجسادهم فوگ الثرى / وحروفهم متطشره
چنت اظن فوگ الألف همزة جرح
ثاري راس احسين هذا اعله الرمح

للشام مهدينه اليزيد / والشايله چف العبيد

يوصل بالعجل ممنوع تأخيره
من عنواني تبدي عدكم الحيره
عمري كتاب احزان يحباب



خادم الزهراء (ع)
سيد حامد النعيمي

محرم 1440

☝️☝️☝️☝️☝️
بفضل الله عز وجل وبركة اهل البيت عليهم السلام ودعائكم ماكان للامام السجاد ع بعد وفاة والدي اللهم لايحرمنا واياكم خدمة محمد واهل بيت محمد ع

ياحسين

دورت دنيا ابجفائك واخسريت
تاجرت وياك يحسين اربحت
ربحي وياك انلمس مو دنيا مال
اتمدلي إيدك سيدي كلما طحت

لسان حال مولاتي رقيه (ع) ليلة وفاتها
محرم 1440


دمعاتي بعيوني / ابلون السمه امتوني
بشفافي اموشله المحاچي / واذاني مابيهن تراچي
بالطيف من يسمع نحيبي / شحچيله من يسأل حبيبي

قصة آلام وسبي للشام صعبه
والزغير المثلي شنهو ايكون ذنبه
حادي شامت من يمل من طول دربه
سلوته بالسوط متني من يضربه

ياهو الأحشمنه / وبحالي اخبرنه
راسه ابرمح عباس عمي / نحره نزف من شاف دمي

مجروحه والميت طبيبي / شحچيله من يسأل حبيبي

من حضن لحسين بيتوني ابخرابه
ويلسع ابحرگ الجدم ملح الترابه
اتشيط روحي وانْدِبَه وينك يبابه
يا أمل لِيهَ اعْتِنِي مسدود بابه

موگتلي ليچ أحضر / لهلالك اتْنَطّر
وينك صحت وبعالي صوتي / احضر گبل ميجيني موتي
روحي شمس گرّب مغيبي / شحچيله من يسأل حبيبي

اتْوَسّدِتْ آهاتي من ظيم الولانه
طاح جفني ومن غفه امتَيّه أمانه
لنه ذاگه ابطيف لحسين وحنانه
يارقيه ايصيح هذا الغالي آنه

واتعجب ابحالي / يگطر دمه اخيالي
گلي يبس ريجچ على الماي / لو هذا اثر لفراگ وياي

شوگچ مثل شوگي ولهيبي / شحچيله من يسأل حبيبي

اشگد چبير الشيب عمره وعمري أزغر
من شفت راسه ابطشت والشيب خَضّر
گتله أبويه گال اي بنتي وْتِحَسّر
وگام يبچي من صحت الله أكبر

عذبني من شفته / حافر حجر گصته
ومو ناعمه خشنه لحيته / جامد عليهه الدم لگيته

گلي ابدمع غسليه شيبي / شحچيله من يسأل حبيبي

راسه بارد من دفه بحضان صدري
ابسكته گمت اوياه أحچي گتله تدري
چفك ابأربع أصابع چنهه عمري
وخنصر الوحده تغرب چنه گبري

بالشام أظل صعبه / وي زينب ابغربه
عزريل وانته والمنيه / ياوالدي مرو عليه

والزهره گلهه أچفان جيبي / شحچيله من يسأل حبيبي



خادم الزهراء (ع)
سيد حامد النعيمي

قصيدة / شجرة نعشك / للامام الحسن ع



والله حيره / شجره نعشك / صارت اغصانه السهام
والله حيره / ليش گبرك / منعو اعليه السلام
يابن فاطمه / قصتك مؤلمه
يامظلوم يامظلوم

دمعك عالأبو بعده اعله خدك
گوم العادتك سموه چبدك
عندك امنيه وتريد لحدك
بي من تندفن بحضان جدك

أمنياتك / عارضتهه / العارضت نهج الامام
أمنياتك / ماشفتهه / ياضوه اوكلهم ظلام
نعشك إنرمه / قصتك مؤلمه
يامظلوم يامظلوم

الگمر بي سولفن دمعات بالعين
بيهن كلمك ياضي إلسنين
سبعين العدد أنصار لحسين
وانته اوياك صار اسهام سبعين

ابگلبه ناره / السيف سله / غضب بيده شايله
ابگلبه ناره / احسين گله / خويه ضمه الكربله

وكته بالضمه / قصتك مؤلمه
يامظلوم يامظلوم

الموت استعجلك والله توازه
المثلك سيدي نعتازه عازه
السهم عزبت إله فوگ الجنازه
الطبعه چن ورد بيش ايتجازه

ياوسافه / ابكل جساره / رادو الذكرك يضيع
ياوسافه / ابلا مناره / مندفن بارض البقيع

نورك بالسمه / قصتك مؤلمه
يامظلوم يامظلوم

أخوك احسين ناده ياخليلي
من بعدك يضل دايم عويلي
للعباس صد گله يويلي
باچر لو طحت شيوگفه حيلي

صوته ناده / هذا أَخَيَّك / يا گمر ضيه انطفه
صوته ناده / هملي جدمك / هسه زينب خايفه

دنيه مظلمه / قصتك مؤلمه
يامظلوم يامظلوم

يم زينب بقن سبحه اوتربتك
تشبگ ذكرياتك دمعه لختك
عفتلهه طشت بي كل چبدتك
بالهم تشبگ ابنك مره بنتك

من تذكرك / بيهه حسره / سيف تنزل عالجراح
من تذكرك / يمه زهره / اتصيح أخويه يمه راح

تبچي من دمه / قصتك مؤلمه
يامظلوم يامظلوم


خادم الزهراء (ع)
سيد حامد النعيمي

محرم 1439

(قصيدة للمشاية)

عاشگ لا تلوموني / احسين الساكن عيوني
هايم واعلن غرامي / گاصد المرقد إمامي
عاشگ لاتلوموني

عاقد النيه اعله حبه هذا معشوگي الحُسِين
واليريد ايلوم بيه خل يلوم ام البنين
هيه اساس وهيه مصدر كل وفاء العاشگين
أربعه انطت وِاتِّمَنَّه عدهه گد الزائرين

عالحب من تربيهم / للمظلوم تفديهم
وكلهه عباس الأسامي / گاصد المرقد إمامي
عاشگ لاتلوموني

عاقل واتبع جنوني حبه ابگلبي استقر
المعتني الشوفت حبيبه ينسه بدروبه الخطر
يمشي ابخطوه هيامه يحله بعيونه السهر
الله لحسين انطه شيعه وهوه انطاه النحر

عنه ما تبعدوني / حته لو تعذبوني
منه مايرهم فطامي/ گاصد المرقد إمامي
عاشگ لاتلوموني

اشماتطول اسنيني تلهب بيه جمرات الحنين
من اگصده ابربعينه چني ماماشي سنين
خطوة الزاير ثمن جنات رب العالمين
الله باچر بالحشر يرفع مقامي المدري وين

وافخر من تحسدوني / يل چنتو تضدوني
كوثر اشرب غيري ضامي/ گاصد المرقد إمامي
عاشگ لاتلوموني

رايتي شايلهه چفي واذكر اچفوف الكفل
وچني اشاهد ذيچ زينب تشكي من ضيم الحصل
رَدَّت وخالي ضعنهه لاكفيل ولا أهل
حگي لو شگهن ثيابي جدمي لو يمهه وصل

من دم تجري دمعاتي / واصرخ واسو مولاتي
أنحني وأبدي ابسلامي / گاصد المرقد إمامي
عاشگ لاتلوموني

آنه والمهدي وعقيلة حيدره نمشي سوه
ليلي صاير چن نهاري همه بدروبي ضوه
نسمه البريتي عزيزه منهم اشتمه الهوه
خل يفجروني النواصب زينب الجرحي دوه

هيّه أغلى من ناسي / حبّي إلهه عباسي
شمعه إلتنور ظلامي / گاصد المرقد إمامي
عاشگ لاتلوموني

كربله أوصلهه حالف بيهه مأتم يِنِّصُب
اعلَيَّه حتمن ربي يشهد فاطمه الزهره تطب
ما أشاهد فاطمه أنظرهه بحساس الگلب
لو جرت دمعاتي يعني دمعة البضعه تصب

فاطم أدري تنظرني / فاطم أدري تشكرني
للحُسِين اهجر منامي / گاصد المرقد إمامي
عاشگ لاتلوموني



خادم الزهراء (ع)
سيد حامد النعيمي

محرم 1439

إذن بالشام اسمع بيهه دگ اطبول
وحچي شمات من سابع ظهر طالع
الچانو وكت أهلنه شيله ميرهمون
طبينه القصرهم من حشه السامع
طبينه وإذن بيهه اسمع الحياچ
علي چنچ علي من الحرب راجع
رفعي الراس زينب دنگي راس الشام
مادام الگمر راسه ابرمح ساطع
گتله ابشر يروح اختك تعرف ام عون
حچيهه امگبع وراية نصر رافع

أنكت ابريتي وأفتش عن هواك
بويه من بنتك أمس ياهو الخذاك
ابطيفك اتوضه الجفن والنيه موت
وْكَبّر ابمحراب راسك دمعه ذاك
وابتده ابسورة نحر بوسه السجود
ومات يمك شوگ من ميت لگاك