مو سيف النبي طبعه ترافاه
واول من شهد لله ترى فاه
محمد لو مشه طوله ترى فيه
جمال الله وعلي حامي الحميه

(يازهراء)

جزء من قول للإمام علي (ع)
إني ذقت المرارات كلها فلم أجد أمر من الحاجه إلى الناس.( سؤالي إلى مولاي (ع) )

ياهو الأَمَرْ عالروح يستاهل ادموع
حاجة علي للناس لو كسر إلضلوع

عيسى روح اللَّه وأمان الخائفين
وافتهم روح اللَّه مو بس للمسيح
عيسى شمس اللَّه التِضَوِّي للجميع
حاله حال احسين سيدنه الذبيح

كل عام وانتم لله ولمحمد واهل بيته الاطهار (ع) أقرب

صح آنه حيدر قالع الباب
ظهري انكسر بفراگ إلحباب
سلمان ماتت فاطمه / مو حگي دمعي من دمه
لتلومني من تجري العين / لتلومني من تجري العين

مثلي ياسلمان محد ظلمته الناس اشكثر
الدين لو جرحوه أضمد جرحه بسنين العمر
حيدر آنه والصبر مني تعلم عالصبر
وحده ما أصبر عليهه فاطمه تسكن گبر

لمن بدت ساعات إلوداع / بيهه شفت مني العمر ضاع

ابسهم البعد گلبي انرمه / مو حگي دمعي من دمه
لتلومني من تجري العين / لتلومني من تجري العين

أذن آذان الحزن وبجفني تكبيرة دمع
أشهد أن الصحابه بالغدر كسرو ضلع
چفي بالتغسيل لو مر ابضلعهه أنوجع
منخسف صدر المحنه اوصوت ونته تنسمع
‏
من چفنتهه فتحت إيدين / رادت حسن وياه إلحسين

ضمتهم ومتألمه / مو حگي دمعي من دمه
لتولمني من تجري العين / لتلومني من تجري العين


الساني من يذكر إسمهه صدري أحسه ينشرح
فارگتهه وخانگ ابروحي الحچي كبر الجرح
العايش وميت حبيبه الليل لو مر ينذبح
اتموت ضحكاته اعله شفته والفرح لا مايصح

يگضي الليالي يعصر اچفوف/ وهمومه كعبه اعليهن ايطوف

وبروحه ناره مضرمه / مو حگي دمعي من دمه
لتلومني من تجري العين / لتلومني من تجري العين

من رجعت البيتي زينب گامت إلأمهه تحن
تشتم اهدومي وتحبهن بيهن اتراب الدفن
اتگلي بويه ابيا گلب تدفنهه ام طبع الحَسِنْ
غابت أمنه وياعلي دمع اليتم ماينسجن

ترويلي صارت قصة الدار / مو غربه إلي شعلو النار

أهل السقيفه الظالمه / مو حگي دمعي من دمه
لتولومني من تجري العين / لتلومني من تجري العين

راح اعيش وياك ياسلمان بس شكل وجسد
الضاعن اعيونه وضواهن يلتفت إلمن بعد
الگلب تدري وحده عايش غير دگته ماله احد
وانه دگت گلبي فاطم حزني سرمد ماله أمد

چان الجفن ليتامي مينام / هسه أصبحو أطفالي ايتام

روحي بعد متيتمه / مو حگي دمعي من دمه
لتلومني من تجري العين / لتلومني من تجري العين


خادم الزهراء (ع)
سيد حامد النعيمي

1439

ابحضنچ اشعر بالحنان ودافيه
ليش تمشين وبعدني غافيه
گليلي ليلي من يجن / زينب تنام ابيا حضن
يمه اريدچ / يمه اريدچ

يُمَهْ آخر ليله هايه وذكريات ايصير حضنچ
بيهه گتلچ يل حنينه لاتضميني اعله صدرچ
من اشبگنچ ونامن بالضلع يمه ألچمچ
عايش ابروحي ونينچ ضلعي مكسور اويه ضلعچ

لو رحلتي / ياهو يمسحلي الدمع
لو رحلتي / ونتي بعدچ تنسمع

ويذوب گلبي من يحن / زينب تنام ابيا حضن
يمه أريدچ / يمه أريدچ

اشلون انساچ اوصِوَرِّچ تارسه اعيوني يزهره
وين ماصد كل كتر بالبيت ألگه باقي ذكرى
مره اذكر صوتچ ابساعة دعائچ واحنه نقره
ومره اذكر صوتچ ابلوعه حزينه اوآه عصره

البيت يمه / طبته صارت موحشه
البيت يمه / يحلى وانتي عايشه

بفارگچ ابعيني سجن / زينب تنام ابيا حضن
يمه أريدچ / يمه أريدچ

كل طفل لو شاف موقف بالحزن ماينسه الصار
وانه كل موقف أذكره سطرت اخدود وحرگ دار
كل جرح بيه يفز لو يمي جابو طاري بسمار
ليش دنيانه النحبهم من وكت بالموت تختار

شجره چنتي / وانه غصنچ من عشت
شجره چنتي / يمه من متي متت

ميعيش بعدچ كل غصن / زينب تنام ابيا حضن
يمه أريدچ / يمه أريدچ

عمري خمسه اسنينه شابن وانه بحضانچ زغيره
گلتي باچر طبره اعيونچ تشاهد مو أخيره
والحسن چبده ايتگطع والطشت عنچ يديره
وگلتي يِتْگَطَّعْ جِسِمْ لِحسين وتلمه الحصيره

يمي أمانه / عفتي لبنچ لو كبر
يمي أمانه / شمه لحسين ابنحر

والروح بيهه تنطحن / زينب تنام ابيا حضن
يمه أريدچ / يمه أريدچ

كربله ونار الخيم عنهن حچيتي وعملت ارجاس
عاليتامه اوعالمتن سولفتي وآنه امدنگه الراس
رفعي راسچ ليه گلتي ماتدنگ إخت عباس
الله ضملچ خوش زلمه بالطفوف اچفوفه تنباس

بيه ينشد / ظهر إلحسين وحسن
بيه ينشد / ظهرچ ابوكت المحن

چفينه يفدي ومايمن / زينب تنام ابيا حضن
يمه أريدچ / يمه أريدچ


خادم الزهراء (ع)
سيد حامد النعيمي

1439