أبوذيات لسيدة زينب،،ع،،
-------------------------------------------------------
بس الدمع للفاگد يراعون
ودمعهه ماوگف مره يراعون
زينب تسمع أخوتهه يراعون
راس أيوصي راس أختك سبيه
=_=_=_=_=_=_=_=_=_=_=_==_=_

برماح الروس وبونهه يشركون
ونعه العباس لوحاضر يشركون
الأگي الگبل والهسه يشركون
أبديني ولا أشوف أختي سبيه
=_=_=_=_=_=_=_=_=_=_=_=_=_=
حنينه ونوحچ أبونه وفيلاچ
وراح الچانلچ خيمه وفيلاچ
يدنيه أتولمي أبنارچ وفيلاچ
سبو كعبة علي والغاضريه
=_=_=_=_=_=_=_=_=_=_=_=_=_=_

خادم أهل البيت،،ع،،
أبوحسين السرگودي...🕊️🕊️🕊️

لسان حال مولاتي زينب (ع) قصيدة لاستشهاد الامام علي ع

ناوي اعله السفر وبصحبة التابوت
ميرجعك إلي يالغالي درب الموت
يا وجه شمس الصبح /ابروحي داويه الجرح
ميرجعك إلي يالغالي درب الموت

شد الجرح لتموت إرحم بويه حالي
نزف الجرح خطواتك الگبرك يغالي
لتعوف زينب بين حزنك والليالي
كسرة غصن كسر البنت من غير والي

يعافيتي الحياة احزان من دونك
حلاة الدنيه كلهه ابنظرة اعيونك

بيك گلبي ينشرح / ابروحي داويه الجرح
ميرجعك إلي يالغالي درب الموت

سيف اللعين ابوسط راسك ليش يغفه
چف حامله يامه أكل وياك چفه
لصوابك انطيه العمر لو ناره تطفه
ذر الگلب فوگ الجرح من كون يشفه

اليتامه اوياي تصفگ بويه إيد ابإيد
واعليك انكسر ويانه ظهر العيد

مثلك إلنه مايصح / ابروحي داويه الجرح
ميرجعك إلي يالغالي درب الموت

طول اليتامه اليوم شابگ طول بابك
واحد يواسي الثاني من ساعة مصابك
وعباس من شاف الدمه ترست ثيابك
عينه دمه هلت گبل لحظة غيابك

الخاطر دمعة العباس ظل يمنه
ماترهم علي لا إنته لا أمنه

روحتك طعنة رمح / ابروحي داويه الجرح
ميرجعك إلي يالغالي درب الموت

يغمه عَلِيك وْتفتح اعيونك عليه
تحچي ابوصيتك واعرفت فرگه ومنيه
كل ساعه صرت اتجيب طاري الغاضريه
وخليت بيدك إيد عباس ابإديه

گتله امدلله عباس اختك هاي
لتقصر اذا منك تريد الماي

بينكم آنه وملح / ابروحي داويه الجرح
ميرجعك إلي يالغالي درب الموت

يمسافر او ماشي ابدرب مابيه رجعه
ابياروح إلي وابياگلب شخصك أودعه
وابعيني أنظر طولك الوادم تشيعه
وحسين يرجع دافنك وبعينه دمعه

واتلگه الحسن وبلون الاسود ذاك
اللبسته ابدفنت أمي من چنت أتناك

لا تخليني انذبح / ابروحي داويه الجرح
ميرجعك إلي يالغالي درب الموت



خادم الزهراء (ع)
سيد حامد النعيمي

@sayedhamid9

ولادة الامام الحسن ع

راسملك اجمل صورة ببالي .. يالحسن
گُبة ومنارة وحضرة اتلالي .. يالحسن
""""""""
حلم وردي يراودني وتشوفه عيني كل مره
إلك يالمجتبى حضره كأنه جنة مو حضره
گُبة ومناره .. يالغالي
تشع بالاناره .. يالغالي
واجمل زياره .. يالغالي
وزوارك اتصيحك مبتشره .. يالحسن
نظرة دخيلك يبن الزهره .. يالحسن
"""""""""
مثل اصلك ذهب صافي اشوف الحضرة مزهيه
المنارة من ذهب چنهه واشوف الگُبة ذهبيه
وصحنك اشوفه .. يالغالي
الشيعة تطوفه .. يالغالي
لا ما نعوفه .. يالغالي
حيدر ابوك الدر الصافي .. يالحسن
وانته الكرم والجود الوافي .. يالحسن
"""""""""
ازدحام الحضرة انظرهه مواكب ويه مشايه
وعبارة انكتبت اببابك كفو منكم يوفّايه
زحمة اعله بابك .. يالغالي
ونسمع جوابك .. يالغالي
الزاير هلا بك .. يالغالي
گلتلنه اهلاً يا والينه .. يالحسن
وانگلك اهواي اشتاگينه .. يالحسن
""""""""""
اليجيك ايظل على الگُبة يطيل هوايه بالنظره
بدمع عينه يشاهدهه ترفرف رايتك خضره
الجاي الحضرتك .. يالغالي
رايد نظرتك .. يالغالي
فارش سُفرتك .. يالغالي
والزاير الطاحت دمعاته .. يالحسن
من رايتك ياخذ حاجاته .. يالحسن
"""""""""
نشوف الحضرة مبنية حقيقة مو حلم عندي
لان عندي امل بالله وعقيدة عندي بالمهدي
والمهدي بيده .. يالغالي
اجزم اكيده .. يالغالي
صحنك يشيده .. يالغالي
وارض البقيع اتشع ابنورك .. يالحسن
وشيعة علي يومية اتزورك .. يالحسن

انيس الخفاجي الكربلائي

قصيدة لاستشهاد الامام علي ع 👆👆

عگدنه بيرغك بچفوفنه ونسأل
محرم يا بو فاضل جاي شنهو الحل

محرم جاينه ومكسور واهسنه
يبن الرد شمس رجع مجالسنه
ابابك مو شِعر بدموع هوسنه
يكافل زينب انت بهاي تتكفل
...
محروگ الگلب لو عاتبك معذور
كلفه يا بو فاضل من بعيد انزور
كلشي ايهون بس اشلون اجه عاشور
سكته يمر محرم ؟ انت ما تقبل
...
عليك بداعة الخيمه الخذتها النار
إفزع للخدم والحچي مزامط صار
نسمع من اهلنه واحنه چنه ازغار
اليدگ باب ابو فاضل عمره ما ينذل
...
وصيّة امنه لو ضيم الزمان ايهيج
نعگد بيرغ العباس وكت الضيج
ترضه السنه ماكو ركضة طويريج
چبيره السالفه ونريد تتدخل
...
يتچاية حملنه لون راد ايميل
الشعائر ورث اهلنه وجيل يتبع جيل
تدري امتونّه تذبل بلا زنجيل
خدمتكم نهر والعافها يذبل
...
يالبچفك درينه الما يصير يصير
ديره هموم بينه نسولف ليا بير
معقوله السنه ما يطلع التطبير
ضعنه وغير بابك كلشي ما نندل
...
أفه يالربتك بدويه وفايه
صعب بچفوف زاير ما ترف رايه
صدگ ماكو اربعين وماكو مشايه
إِزعل إلك حگ بهاي من تزعل
...
هواي الگالو من اللطم شمحصلين
هذا الحال عند البعض گرة عين
لتشمتهم بخدام اخوك حسين
عليك بوگفة ام الخدر فوگ التل
..
خادم الحسين ( عليه السلام)
كرار حسين الكربلائي

السلام عليكم اخواني وتاج راسي خدمة اهل البيت عليهم السلام ان شاءالله غداً او بعد غد سوف يتم نشر بعض قصائد محرم والبقية بتوفيق الله واهل البيت ع ودعائكم بعد العيد وان شاءالله اي قصيدة تكتمل قبل العيد سوف تنشر في وقتها ونسألكم الدعاء

ملاحظة : الحمدلله على كل حال لازال المرض المزمن مستمر عندي وهو السبب الرئيسي بعدم الكتابة لكل المناسبات او منهاج كامل لمحرم ولتقصيري اقدم اعتذاري لاهل البيت ع ولكم .
‏القصائد المكتملة ليس بترتيب الليالي بالضبط ومايوفقني الله للكتابة لأي ليلة انشره وعندكم الترتيب

ونسأل الله التوفيق والشفاء ببركة دعائكم وانا خادم لتراب اقدامكم

خادم الزهراء ( ع)
الشاعر سيد حامد النعيمي