عباس موضوعي / محرم 1446

لسان حال الامام الحسين (ع) 


صعبة أحبس ادموعي / عباس موضوعي
أحچي لاخته / أبقه سكته / حيرة امري / ضاع عمري
مات اخوي الگمر 

ياچلمه الأسولفهه ابرجعتي 
اول مرة هيچ اشعر محنتي 
فگد عباس اصعب من ذبحتي
شَگِلهه اوْ اختي تقره اعيوني اختي

اشيخفيهن آلامي / عفت الأخو دامي
للمنّية / بين اديه / دمه يجري / ضاع عمري 
مات اخوي الگمر

ابكبر حبه وعظم قدره رزيتي
أحاول ظهري اعدلنّه بمشيتي
تشهگ بالنفس ومبينه ريتي
زينب عاينت دمعي ابلحيتي

حزني افترض ينضم / بثيابي تنظر دم 

هيه تحچي / وانه ابچي / خاف تدري / ضاع عمري 
مات اخوي الگمر 

سِأْلَتْنِي يخوي احسين گلي
چا وِينَهْ أخوي وعزوة اهلي
آنه ابغير روحه ابروحي شلي 
عِرَفْتَه منكتل من راح ضلي

طوله اويه طولي انعد / لو غاب يعني انهَد 

طاح حيلي / ياخليلي / ضاگ صدري / ضاع عمري 
مات اخوي الگمر

درت زينب كسرنه صار واقع
ظهرهه وظهري من الكسره راكع
وْويانه عمود الخيمه واگع
حلم اصبح نشوف الغالي راجع

من خلصت الجربه / مايرجع ابدربه

منّه يخجل / مالگه حل / يسگي نحري  / ضاع عمري 
مات اخوي الگمر 

شهم لاخر نفس عباس وفّه
ترف ملمس رطب بالماي چفه
چفه الشلته من الگاع اعرفه
أثر عالجربه قابض رغم نزفه
 
لو باقيه گطره / وصلهه للحره

بيهه مهتم / راد يسلم / خانه دهري /ضاع عمري 
مات اخوي الگمر 

صحت العايلة او ونتي شجيه 
گعدت ابخيمتي التمّن عليه
يابس ريجهه كلتلهه هيه 
وداعاً گولي العمچ رقية

ساعة وْتِصدوله / راس ابرمح طوله
 
عذره واضح / چفه طايح / حاله مزري / ضاع عمري 
مات اخوي الگمر 




خادم الزهراء (ع) 
سيد حامد النعيمي 


 

نزلة

يشبه طبع عباس / محرم 1446


فضة بذهب بلماس / يشبه طبع عباس
جسّام اسمه / عباس رسمه

اربع طعش نوره اكتمل برسومه
ابلامة حرب كاشخ طلع بهدومه
العمه اتجه رايد يطب للحومه
باسمه افتخر ابن الحسن واعلومه

ابسبعين الف ينقاس / يشبه طبع عباس
جسّام اسمه / عباس رسمه

يستأذنه إسمحلي عم خل أثأر
للدين واصحاب الوفه والاكبر 
دم الگمر بيّه غلى ما أگدر
لو ساعة عن اهل الغدر أتصبّر

أمحيهه هل ارجاس / يشبه طبع عباس
جسّام اسمه / عباس رسمه

طب ضيغم وْمعروف ابن الساده
بصوته ارتجز رجفهه كل القاده
بعمر الورد لاچن فعل أجداده
عدهم نصر معروفه هيه العاده

ساس وْيِوَرّثْ ساس / يشبه طبع عباس
جسّام اسمه / عباس رسمه

چن ريح صرصر من حمل بيهم عج
ميدانهم يختظ صبح رجهم رج
سيفه ابضربهم مشتعل وجهم وج 
كل ضربة بسم الله القوي من يلهج

من سيفه فرت ناس / يشبه طبع عباس
جسّام اسمه / عباس رسمه

لِحْسين من شافه ابتهج بافعاله
نفّذ وعد سواله كل الگاله 
أشرله ابو الاكبر يعم صاحاله
العنده مثلك بالحرب هنياله

مرفوع دوم الراس / يشبه طبع عباس
جسّام اسمه / عباس رسمه




خادم الزهراء (ع) 
سيد حامد النعيمي 

راح ابنچ / محرم 1446

لسان حال الامام الحسين (ع) يكلم ليلى (ع) 


راح ابنچ يَمْ علي 
راح منچ كل هلي
ميّت وِمگطع واويلاه 
وشما اصرخ مترده الآه

من طلع من خيمته عشت الخطر 
ليلى ودعته وحس گلبي انفطر  
ماشي الموته علي مو للنهر 
يمشي خطوة وْيِلْتِفِت من القهر

عين الي صدهه ابألم
عين الچ صوب الخيم

شوفت طولچ بس يتمناه
وشما اصرخ مترده الآه 

بروحت ابني عيني تعبهه الدرب
مو سفر متعني ساحات الحرب
ويه حافر مهره دگّات الگلب
خوف والد عالولد حگي انرعب

سيف يتناه ورمح
سيف حد روحه الذبح

تتنطّر جيته اسيوف اعداه
وشما اصرخ مترده الآه

انتي ماشفتيه مشهد حيرته 
الگابله ابطعنه تغرز طعنته
حيل يتعمّد يقوي ضربته
آخ لو شفتي إليه نَظْرِتَه

صاح بويه همِّتَك
صاح سَرِّع خطوتك

آخر انفاسي الفظهه اهناه
وشما اصرخ مترده الآه

من وصلته روحي حسّت بالضياع
ذاك طوله امترب اصبح فوگ گاع
هيه طيحه وْهيه شبگه حزني شاع
منذهل بجروحه اشتم بالوداع

وين ألزمه ينثلم 
وين ابوسه ينلچم

وذرو وِشْمعظمهه بلواه
وشما اصرخ مترده الآه

من سكت غاليي ما اسمعله صوت
گام چفي صار يلطم عل بتوت
والله لو ما زينب آنه يمه أموت
ابدال صوته شامت اسمع من يفوت

گال إنهد حيل ابوه
گال طبلو سَمِّعُوه

صوت افراح بساعة ينعاه
وشما اصرخ مترده الآه

والله هنيالچ يليلى عشتي ألم
بيه شفتي فرگه حد باب الخيم
آنه شلته وذره وذره كله دم 
وبيه طعنة سيف ورماح وْسهم 

بيد اسدنله جرح 
بيد شلته منذبح

چنت اتمنى لو ميت اوياه
وشما اصرخ مترده الآه




خادم الزهراء (ع) 
سيد حامد النعيمي 




 

حلم لو واقع / محرم 1446 

لسان حال مولاتي الرباب (ع) 


سهم ابوريدك / وامك أريدك 
تناغيني يعبدالله يعبدالله

حلم لو واقع انت ميت اگبالي
سهم حار ابرگبتك يبني الغالي
ولا اسمع بچي منك يدلالي
الطفل من ينجرح صوت البچي عالي 

شو انت سكته / گلبي شلعته
تأذيني يعبدالله يعبدالله 

أخليك ابحضن كاروك لو حضني
كاروك اليهزّك مو أحن مني 
اشكد هزيتك اولا تبتسم يبني 
اشكد لوليت بلكت مره تسمعني

لو مره احچي / فز فزه وابچي 
دحاچيني يعبدالله يعبدالله 

نايم والدفو بگماطك امن الدم 
غافي يالولد لو سكته تتألم 
لو تگعد يلو أنصب إلك مأتم 
سكوتك لو طُوَلْ يكتلني يمه الهم 

لا صوت تسمع / لا عين تدمع
يناسيني يعبدالله يعبدالله 

ميت واعرفتهه من إديه اخذوك
الگبر حفروه وابظهر الخيم دفنوك 
گلي احسين عنك باچر اينبشوك 
وبعد راس ابرمح گدامي ايشيلوك

تاليهه فرگه / تتبعهه حرگه
تخليني يعبدالله يعبدالله 

شِلّي ابعمري بعدك شلي بايامي
وي ساعة منيتك ماتت احلامي
تمنيت الاجل ما ياخذك ضامي
وعميه اعيوني ولا شافتك دامي

يبني وحياتي / موتك مماتي
يضي عيني يعبدالله يعبدالله 




خادم الزهراء (ع) 
سيد حامد النعيمي 

اخواني اخواتي الاعزاء خدمة محمد وال محمد عليهم السلام
ارجو ان لا تنسوني ووالداي وامواتي من خالص دعائكم
ولجميع ارواح موتى المؤمنين والمؤمنات ومن لم يذكرهم ذاكر وبالخصوص شيعة واتباع محمد وال محمد عليهم السلام الطيبين الطاهرين

ليالي الوحشة / محرم 1446 
لسان حال مولاتي زينب ع 


ياليالي الوحشة رُحْمَنْ حالنه
بس عليل وغيره واحد مالنه

كلنه مكسورات نسوه ابلا خيام
منّه راح اليوم چم زلمه وامام
الليل يرهب لا تطوخن بالظلام 
إخوة ماعدنه وعدو يبرالنه

ابيا وكت بالغربه بالهيمه نبات 
ومن عگب عباس احامي امخدرات
آه لو يدري بخواته امتربات
چا گلب هالكون چف كفّالنه

امفطره اوجوه العلاوي چن ارض
بين نار وسوط تعبنه الركض
السوط چفه بالظهر لمّن يكظ
وذره يشلع بي حفر سوّالنه

يوم عاشر خيلهم سحگت ورد 
تيّهت بحسابي لاطفالي اعد 
طفله لو ضاعت تموت وما ترد 
حافر البي موت يتعنّالنه

هذا واكثر حالنه والمر صعب
مختصر لو احچي ما تكفي الكتب
ليل امس يم اخْوِتي هسه رعب
لا ضوه والخوف شاغل بالنه

ياليالي اعليچ أمنه فاطمة
من وجه عباس ضويهه السمه 
عيلته حامي عليهه امعلمه
والگمر يحمينه من اخيالنه 



خادم الزهراء (ع) 
سيد حامد النعيمي 

ابليلة الجمعة / بالحزن ينعه
منتظرنه اليوم / حاير ابوضعه


الرادود عقيل الحياوي
كلمات خادمكم

موكب مؤمن قريش ابو طالب / الكوت

www.tgoop.com/sayedhamid74
الصفحة الشخصية

جرح الشام / محرم 1446
حال الامام السجاد (ع) وجرح الشام 


شفت ابسبي / بنت النبي / دخلوهه ديوان
الله يعينك الله يعينك

حرب السيف تدري قاتل ومقتول
كرامتكم شهاده ابموت انت اتگول 
عاشور ابتفاصيله ابحرب مقبول 
زينب بالسبي بس هايه مامعقول

وفوگ الهزل / دمعه تهل / واتباري نسوان

علي السجاد انت وجارت الايام
معصوم بحديد امگيد وتنظام
لا طف وذبح بيك اعظم الآلام
جرح من عظمه صحت الشام جرح الشام

ليل وصبح / بي تنذبح / للآه عنوان

سوگ الشام واطبول الفرح واعيون
كَلَتْ طول الحرم مادامهم يمشون 
وماي الحار والسوط اليطگ امتون
هذن اسهام وابگلبك يسيد الكون

واصعب أمُر / يفني العمر / يوم الخدر بان

القصر طبيته زلمه ابگيد ما مهتم
من الجامعة ثوبك يصبغه الدم
يزيد وعرشه هديته او إلك ألّم
هد حيلك لَمَنْ وي عمتك اتكلّم

يابت علي / وين الولي / والكافلچ چان 

زينب صوتهه بالبيت مايطلع
ومن زود الشرف يم امهه تتگبع
تركع لله والدنيا لها تركع
يزيد ومثله عنهم عفه تترفع

بيهه وسف /  لا ما رأف / تالي الوكت خان 

الك صدّت علي اتحاچيك بس بالعين 
صوت ايزيد شليته خرسته الحين
لچن يدري اليأذيني يعرفه وين 
كسرني ابعوده من كسّر ثنايه احسين 

طحتو سوه / نجمك هوى / محّد الك عان 



خادم الزهراء (ع) 
سيد حامد النعيمي 

أدور عن هواك / محرم 1446 

لسان حال مولاتي رقيه (ع) تكلم ابيها الامام الحسين ( ع) عند لقائها معه في قبرها 


أنكت ابريتي وْأَدور عن هواك
بويه من بنتك أمس ياهو الخَذاك
ياحُسين ياحُسين  

بالگبر لافيني تبقه لو تروح 
بويه اگعد واسمع اشبيّه جروح 
چان بالطف صوت الي يمك انوح
وبِيّه عاشت ظلمه من طفو ضواك 

بويه بالطف صار حالي چل هشيم 
وتسعر النيران مامش كل نعيم 
ديرة الدخان تخنگ كل نسيم
وانه نسمه وصوتي دخن من نعاك

تيّهِيتَكْ من سَحِگْهُم عالصدر
وْگمت ادوْرك أيّسِتْ بيّه تمر 
صار عگبك ثوب للگاع الجمر 
وجدمي گد عثرات زينب دوّراك

چني الزهراء من طگهه الظلوم
من غبت حد موتي مابيّه أگوم 
حيل المفارگ جفن ماضاگ نوم 
وحيلي حبل اخيام زينب من وراك 

تدري لليشتاگ ما يرتاح بال
وگام دمعي بيّه يچوي چ الرمال
وضاع نومي مثل ما ضاع الدلال 
وبالخرابه سرفنت جفني البچاك

ابطيفك اتوضى الجفن والنيّه موت
وْكَبّر ابمحراب راسك دمعه صوت
وابتدى ابسورة نحر سَلّم سكوت
ومات يمك شوگ من ميت لگاك



خادم الزهراء (ع) 
سيد حامد النعيمي 

شجرة نعشك / للامام الحسن ع 


والله حيره / شجره نعشك / صارت اغصانه السهام
والله حيره / ليش گبرك / منعو اعليه السلام 
يابن فاطمه / قصتك مؤلمه
يامظلوم يامظلوم

دمعك عالأبو بعده اعله خدك
گوم العادتك سموه چبدك
عندك امنيه وتريد لحدك
بي من تندفن بحضان جدك

أمنياتك / عارضتهه / العارضت نهج الامام 
أمنياتك / ماشفتهه / ياضوه اوكلهم ظلام 
نعشك إنرمه / قصتك مؤلمه
يامظلوم يامظلوم 
 يامظلوم 

المثلك سيدي للدين عازه
الموت استعجلك والله توازه
السهم عزبت إله فوگ الجنازه
الطبعه چن ورد بيش ايتجازه

ياوسافه / ابكل جساره / رادو الذكرك يضيع
ياوسافه / ابلا مناره / مندفن بارض البقيع

نورك بالسمه / قصتك مؤلمه 
يامظلوم يامظلوم 

الگمر بي سولفن دمعات بالعين
بيهن كلمك ياضي إلسنين
سبعين العدد أنصار لحسين
وانته اوياك صار اسهام سبعين
 
ابگلبه ناره / السيف سله / غضب بيده شايله
ابگلبه ناره / احسين گله / خويه ضمه الكربله

وكته بالضمه / قصتك مؤلمه 
يامظلوم يامظلوم 

أخوك احسين ناده ياخليلي
من بعدك يضل دايم عويلي
للعباس صد گله يويلي
باچر لو طحت شيوگفه حيلي

صوته ناده / هذا أَخَيَّك / يا گمر ضيه انطفه
صوته ناده / هملي جدمك / هسه زينب خايفه

دنيه مظلمه / قصتك مؤلمه 
يامظلوم يامظلوم 

يم زينب بقن سبحه اوتربتك
تشبگ ذكرياتك دمعه لختك
عفتلهه طشت بي كل چبدتك
بالهم تشبگ ابنك مره بنتك

من تذكرك / بيهه حسره / سيف تنزل عالجراح
من تذكرك / يمه زهره / اتصيح أخويه يمه راح

تبچي من دمه / قصتك مؤلمه 
يامظلوم يامظلوم 


خادم الزهراء (ع)
سيد حامد النعيمي 

عاشگ لا تلوموني (للمشاية)

عاشگ لا تلوموني / احسين الساكن عيوني
هايم واعلن غرامي / گاصد المرقد إمامي
               عاشگ لاتلوموني 

عاقد النيه اعله حبه هذا معشوگي الحُسِين
واليريد ايلوم بيه خل يلوم ام البنين
هيه اساس وهيه مصدر كل وفاء العاشگين
أربعه انطت وِاتِّمَنَّه عدهه گد الزائرين

عالحب من تربيهم / للمظلوم تفديهم
وكلهه عباس الأسامي / گاصد المرقد إمامي 
عاشگ لاتلوموني 

عاقل واتبع جنوني حبه ابگلبي استقر
المعتني الشوفت حبيبه ينسه بدروبه الخطر
يمشي ابخطوه هيامه يحله بعيونه السهر
الله لحسين انطه شيعه وهوه انطاه النحر

عنه ما تبعدوني / حته لو تعذبوني
منه مايرهم فطامي/ گاصد المرقد إمامي 
عاشگ لاتلوموني 

اشماتطول اسنيني تلهب بيه جمرات الحنين
من اگصده ابربعينه چني ماماشي سنين
خطوة الزاير ثمن جنات رب العالمين
الله باچر بالحشر يرفع مقامي المدري وين

وافخر من تحسدوني / يل چنتو تضدوني
كوثر اشرب غيري ضامي/ گاصد المرقد إمامي 
عاشگ لاتلوموني

رايتي شايلهه چفي واذكر اچفوف الكفل
وچني اشاهد ذيچ زينب تشكي من ضيم الحصل
رَدَّت وخالي ضعنهه لاكفيل ولا أهل
حگي لو شگهن ثيابي جدمي لو يمهه وصل

من دم تجري دمعاتي / واصرخ واسو مولاتي
أنحني وأبدي ابسلامي / گاصد المرقد إمامي 
عاشگ لاتلوموني 

آنه والمهدي وعقيلة حيدره نمشي سوه
ليلي صاير چن نهاري همه بدروبي ضوه
نسمه البريتي عزيزه منهم اشتمه الهوه
خل يفجروني النواصب زينب الجرحي دوه

هيه أغلى من ناسي / حبي إلهه عباسي
شمعه إلتنور  ظلامي / گاصد المرقد إمامي 
عاشگ لاتلوموني 

كربله أوصلهه حالف بيهه مأتم يِنِّصُب
اعلَيَّه حتمن ربي يشهد فاطمه الزهره تطب
ما أشاهد فاطمه أنظرهه بحساس الگلب 
لو جرت دمعاتي يعني دمعة البضعه تصب

فاطم أدري تنظرني / فاطم أدري تشكرني
للحُسِين اهجر منامي / گاصد المرقد إمامي 
عاشگ لاتلوموني 



خادم الزهراء (ع)
سيد حامد النعيمي 

كل الشكر والتقدير والاحترام لدعم مؤسسة بني هاشم عليهم السلام للقنوات الحسينية مجاناً لخدمة القضية الحسينية المقدسة ونسأل الله عز وجل ان يزيد في توفيقهم ويحشرههم مع محمد وال محمد عليهم السلام

الشاعر سيد حامد النعيمي

زيارة الامام الحسين عليه السلام يوم الاربعين

وقد رويت زيارته في هذا اليوم وهو يوم العشرين من صفر على نحوين، أحدهما ما رواه الشّيخ في التّهذيب والمصباح عن صفوان الجمّال قال : قال لي مولاي الصّادق صلوات الله عليه في زيارة الاربعين:
تزور عند ارتفاع النّهار وتقول:
 
السَّلامُ عَلى وَلِيِّ اللهِ وَحَبيبِهِ، السَّلامُ عَلى خَليلِ اللهِ وَنَجيبِهِ، السَّلامُ عَلى صَفِيِّ اللهِ وَابنِ صَفِيِّهِ، السَّلامُ عَلى الحُسَينِ المَظلُومِ الشَّهيدِ، السَّلامُ على أسيرِ الكُرُباتِ وَقَتيلِ العَبَراتِ، اللّـهُمَّ إنّي أشهَدُ أنَّهُ وَلِيُّكَ وَابنُ وَلِيِّكَ وَصَفِيُّكَ وَابنُ صَفِيِّكَ الفائِزُ بِكَرامَتِكَ، أكرَمتَهُ بِالشَّهادَةِ وَحَبَوتَهُ بِالسَّعادَةِ، وَاجتَبَيتَهُ بِطيبِ الوِلادَةِ، وَجَعَلتَهُ سَيِّداً مِنَ السادَةِ، وَقائِداً مِنَ القادَةِ، وَذائِداً مِن الذادَةِ، وَأعطَيتَهُ مَواريثَ الأنبِياءِ، وَجَعَلتَهُ حُجَّةً عَلى خَلقِكَ مِنَ الأوصِياءِ، فَأعذَرَ فىِ الدُّعاءِ وَمَنَحَ النُّصحَ، وَبَذَلَ مُهجَتَهُ فيكَ لِيَستَنقِذَ عِبادَكَ مِنَ الجَهالَةِ وَحَيرَةِ الضَّلالَةِ، وَقَد تَوازَرَ عَلَيهِ مَن غَرَّتهُ الدُّنيا، وَباعَ حَظَّهُ بِالأرذَلِ الأدنى، وَشَرى آخِرَتَهُ بِالَّثمَنِ الأوكَسِ، وَتَغَطرَسَ وَتَرَدّى فِي هَواهُ، وَأسخَطَكَ وَأسخَطَ نَبِيَّكَ، وَأطاعَ مِن عِبادِكَ أهلَ الشِّقاقِ وَالنِّفاقِ وَحَمَلَةَ الأوزارِ المُستَوجِبينَ النّارَ، فَجاهَدَهُم فيكَ صابِراً مُحتَسِباً حَتّى سُفِكَ فِي طاعَتِكَ دَمُهُ وَاستُبيحَ حَريمُهُ، اللّـهُمَّ فَالعَنهُم لَعناً وَبيلاً وَعَذِّبهُم عَذاباً أليماً،
السَّلامُ عَلَيكَ يَا بنَ رَسُولِ اللهِ، السَّلامُ عَلَيكَ يَا بنَ سَيِّدِ الاوصِياءِ، أشهَدُ أنَّكَ أمينُ اللهِ وَابنُ أمينِهِ، عِشتَ سَعيداً وَمَضَيتَ حَميداً وَمُتَّ فَقيداً مَظلُوماً شَهيداً، وَأشهَدُ أنَّ اللهَ مُنجِزٌ ما وَعَدَكَ، وَمُهلِكٌ مَن خَذَلَكَ، وَمُعَذِّبٌ مَن قَتَلَكَ، وَأشهَدُ أنَّكَ وَفَيتَ بِعَهدِ اللهِ وَجاهَدتَ فِي سَبيلِهِ حَتّى أتاكَ اليَقينُ، فَلَعَنَ اللهُ مَن قَتَلَكَ، وَلَعَنَ اللهُ مَن ظَلَمَكَ، وَلَعَنَ اللهُ أُمَّةً سَمِعَت بِذلِكَ فَرَضِيَت بِهِ، اللّـهُمَّ إنّي أُشهِدُكَ أنّي وَلِيٌّ لِمَن والاهُ وَعَدُوٌّ لِمَن عاداهُ
بِأبي أنتَ وَأُمّي يَابنَ رَسُولِ اللهِ، أشهَدُ أنَّكَ كُنتَ نُوراً فىِ الأصلابِ الشّامِخَةِ وَالأرحامِ المُطَهَّرَةِ، لَم تُنَجِّسكَ الجاهِلِيَّةُ بِأنجاسِها وَلَم تُلبِسكَ المُدلَهِمّاتُ مِن ثِيابِها، وَأشهَدُ أنَّكَ مِن دَعائِمِ الدّينِ وَأركانِ المُسلِمينَ وَمَعقِلِ المُؤمِنينَ، وَأشهَدُ أنَّكَ الإمامُ البَرُّ التَّقِيُّ الرَّضِيُّ الزَّكِيُّ الهادِي المَهدِيُّ، وَأشهَدُ أنَّ الأئِمَّةَ مِن وُلدِكَ كَلِمَةُ التَّقوى وَأعلامُ الهُدى وَالعُروَةُ الوُثقى، وَالحُجَّةُ على أهلِ الدُّنيا، وَأشهَدُ أنّي بِكُم مُؤمِنٌ وَبِإيابِكُم، مُوقِنٌ بِشَرايِعِ ديني وَخَواتيمِ عَمَلي، وَقَلبي لِقَلبِكُم سِلمٌ وَأمري لأمرِكُم مُتَّبِعٌ وَنُصرَتي لَكُم مُعَدَّةٌ حَتّى يَأذَنَ اللهُ لَكُم، فَمَعَكُم مَعَكُم لا مَعَ عَدُوِّكُم صَلَواتُ اللهِ عَلَيكُم وَعلى أرواحِكُم وَأجسادِكُم وَشاهِدِكُم وَغائِبِكُم وَظاهِرِكُم وَباطِنِكُم آمينَ رَبَّ العالِمينَ.
 
ثمّ تصلّي ركعتين وتدعو بما أحببت

انا لله وانا اليه راجعون 😢

هنيئاً لك الشهادة

مالِي وَقَفتُ عَلى القُبورِ مُسَلِّماً
قَبرَ الحَبيبِ فَلَم يَرُدَّ جَوابي
أَحَبيبُ مالَكَ لا تَرُدُّ جَوابَنا
اَنَسيتَ بَعدي خِلَّةَ الأَحبابِ
قالَ الحَبيبُ وَكَيفَ لِي بِجَوابِكُم
وَأَنا رَهينُ جَنادِلٍ وَتُرابِ
أَكَلَ التُرابُ مَحاسِني فَنَسيتُكُم
وَحُجِبتُ عَن أَهلي وَعَن أَترابي
فَعَلَيكُمُ مِنّي السَلامَ تَقَطَّعَت
مِنّي وَمِنكُم خِلَّةَ الأَحبابِ

#الامام_علي_عليه_السلام
#رثاء_الزهراء_عليها_السلام