ابوذيات متفرقة

للامام الامام العباس عليه السلام 

مو خيبر خدرهه اثگيل كفلاه
عالم زينب وعباس كفلاه 
منو غير الگمر تنباس كف لاه
يوم اصياره وبيوم المنية

الگمر عباس عين احسين ترباه
مثل عين اليصلي وخال ترباه
 ابو فاضل تربى اشلون ترباه 
گبل ام البنين ابظهر ابيه 

........ 

الامام العباس مع السيدة زينب عليهما السلام 

عطشتي وبالغضب بانت تره اسماي
زحمه الناس لو گالو ترس ماي
يختي الذيچ فوگانه تره اسماي
ياغيمه التعجبچ أشرلي اليه

...... 

ياهو ادموعه وي زينب يهلهه
من عگب الگمر زينب يهلهه (ياهو الهه)
لاطارش وصل منكم يهلهه
ولاعباس رد للهاشميه

....... 

لسان حال السيدة زينب (ع) 

زينب ليش ماواحد يمرهه
يعباس الشمر طگهه ويمرهه (يأمرها) 
سهله اجدامي من داست يمرهه
الخدر خويه الخدر هتكوه إليه

ماكو اچفوف تمسح دمعي من سال 
لحم جسمي إلمصاب احسين من سل 
زينب بالغرب ياناس من سال 
على بنت النبي ثكله وسبيه
....... 
الحوراء زينب مع الزهراء عليهما السلام

ييمه ابيا گلب أگعد وكلماه
ونه الماظل حچي عندي وكلمه
أخوي ابلا نحر يُمه وكل ما 
أحركه ايطگ ضلع مابين إديه
..... 
سبي وسياط ومضيعه بت الهه 
وشمر ياحيف يتونس بتلهه
اشحچت زينب لمن صعدت بتلهه
نعت للخوه وبطور الزجيه

....... 

محرم 1447 (ركن الاخوّة) 
ليلة الامام العباس (ع) 
لسان حال مولاتي زينب (ع) 

هسه ابتده حزني الاكيد / يم النهر مات العضيد 
احسين راجع يمشي گوّه / منهدم ركن الاخوّة 
يم النهر مات العضيد

خطواته فَسْرَتْ كلشي الي همه وعذابه
خيّم على طوله الحزن واگليبه ذابه
والمثله فاگدله گمر يكلف مصابه 
عباس بالشدة وحرب كله مهابه 

ابفگده انكسر ظهر الغريب / ومنين اخو مثله يجيب
غيره كله وكله نخوه / منهدم ركن الاخوّة 
يم النهر مات العضيد

يمي وصل كلش صعب يبدي كلامه
بعيونه هذا الطف صبح باين ظلامه
چفينه يعصرهن ألم بيهن علامة 
ما انتظر عباس يرجعلي بسلامة 

عامود من الخيمه طاح / معنى الحصل عباس راح
نار بينه افراگه دَوّه / منهدم ركن الاخوّة 
يم النهر مات العضيد

بيناتنه صار الحچي حسره اعله حسره
واثنينّه نفس الامر كاسرنه كسره 
بي نشترك عباس لينه چان گمره
عينين صرنه ابلا نظر وادروب وعره

لحسين حضروه الذبح / والجسمه الف جرح وجرح 
ياسند بيه ايتگوّه / منهدم ركن الاخوّة 
يم النهر مات العضيد

موت الخذه چنه رمح والرامي وحشي
ياروح تصبر والمشه للروح كلشي
ساعات من فگده المضت شَيْبَتْلِي رِمشي 
بچفوفه اتمنى چنت ينشال نعشي

شِيْصَبّر الروح بمغيب / للاخته اخو وسلوة وحبيب
بماي گبلي ما تروّه / منهدم ركن الاخوّة 
يم النهر مات العضيد

يتجازه ماظن يا اخو مثله بزمانه
مرفوع راسه يم علي وفّه الامانة
راعي الوفه للخيمة رحت اشتم مچانه 
وْلچفوفه ذكرى قبّلت لزمة لوانه 

انساه هيهات ومحال / موقف شرف بالروح خال
يابشر افعاله سوّه / منهدم ركن الاخوّة 
يم النهر مات العضيد



خادم الزهراء (ع) 
سيد حامد النعيمي 


 

ليلة للامام العباس ع

ابوذيات

ابوذيات
لسان حال مولاتي السيدة زينب ع

ايام الفرح ماتت وي اهلاي
فراتين الدمع يجري ويهلاي
طفوف حسين ماخلت ويه لاي
غده كل شامت ايعاين عليه

يعباس الجدم خاوي وجرباه
وگلبي امن الطفوف اصبح وجر باه
رايه اعله النهر ظلت وجربه
گوم وشيلهن وارجع اليه

ياهو ادموعه وي زينب يهلهه
من عگب الگمر زينب يهلهه (ياهو الهه)
لاطارش وصل منكم يهلهه
ولاعباس رد للهاشميه

ماعوفج عزم لمره ورايه
ابسبي أمشي تليت آية وره آية
اجر بجدامي وتلفت ورايه
عباس انتظر ينده عليه

مولاتي زينب ع تكلم يزيد

تفخر والقتل عاده سمه النه
كمر عباس وجفوفه سمه النه
عرشك والحكم تعلم سملنه
وشامك والفخر والكوفه اليه

نعي على طور (مالي غيرك) شيخ زمان الحسناوي

على طور ( مالي غيرك ) شيخ زمان الحسناوي


نداء مولاتي زينب (ع) للامام العباس (ع)

خويه وينك زينب ابحيره سبية
خويه وينك بالحبل چتفوهه ادية
خويه وينك عاين العظم الرزية
خويه وينك هل عدى ضربو رقية
وانضرب بالسوط متن الهاشمية

(الجواب)

گلهه يختي أعتذر منچ يروحي
چفي ماكو نظري العيني وجروحي


ندائها عند السبي


آ يدهري عالهزل واتمنى موتي
آ يدهري دمعي سولف وبسكوتي
آ يدهري روحي صاحت وين اخوتي
آ يدهري ماسمع عباس صوتي


السيده رقيه من گعدت يم جسد الامام الحسين(ع)

بويه اگعد روحي وروحك سويه
بويه اگعد فرگتك تصعب عليه
بويه اگعد ليل واسياط وسبيه
بويه اگعد سطرو الخد آل اميه
بويه اگعد إمسح ادموعي الجريه
بويه اگعد يمك ابنيتك رقيه

(الطفله من الحرم الحسيني التي ضيعت اهلها بعد الطف وتسأل عن قبر الامام علي عليه السلام )

وينه گبره بالغري گالو اليه
طفله واسأل والدرب وحشه عليه
أرد اگصده جدي حماي الحميه
أرد اگلهه بالغرب بت الزچيه



مولاتي زينب (ع) لسان حالها
تخاطب الامام الحسين (ع)

وينه نحرك خل اشمه ابهل مسيه
واشكي همي واندب الزهره الزچيه
يُمَه ابنچ عاري ظل بالغاضريه
عنك امشي خويه لا تعتب عليه
راح اسافر وارجع ابلايه رقيه

گلهه روحي راسي ميفارگ ضعنكم
خويه بالچ سكته توگع طفله منكم
وابقه واگف واكسر ابخاطر گلبكم


ليلة الوداع

ليله صعبه / كلمن اتوادع وليهه
رمله تنحب / شمعه والحنه حچيهه
وام الاكبر / شبگته ابلوعة بچيهه
والرباب / ابلافكر لولة بديهه
باقي زينب / تگصد إلمن حسره بيهه
تشتم احسين وچبدته اموذريهه
مره تشتم / چف اخوهه امگطعيهه

ابيات نعي عامة

نعي

مولاتي رقية(ع) تكلم الامام الحسين(ع) بعد ما سحقته الخيل

متعوده اعله حضنك من يجي الليل
دورته ولگيته ابحافر الخيل
بويه حسين يمك مدمعي ايسيل
عدوانك سبونه ورادو انشيل
دگوم الزينب وحامي المداليل


لما امتنعت مغسلة الجنائز من غسلها خوف انها مريضه فتخاطبها السيدة زينب عليها السلام

يمغسله الجنايز گومي غسليهه
ظهرهه امجرح وبالچ تلچميهه
ترى من السوط أزرگ مو مرض بيهه
وثر نار الخيم بچفوف رجليهه

لسان حال الزهراء( ع) في اول ليله من محرم

للعاشر أتاني وْدمعتي ابعيني
وادور بالخلگ ياهو اليواسيني
تِطَيَّبْ اجروحي وبصوتك تداويني
يناعي احسين من تنعه وتبچيني

نسيت امصاب ضلعي وعصرة الباب
أدور وين طاري حسين ينجاب
كل مجلس احضره ابدمع سچاب
جرح حسين ينزف بعده ماطاب
أداويه ابواچي ونوح الاحباب

لحال الزهراء( ع)

يناعي حسين زيد الصوت والحسره
ابحزنهه اوياك تنعه حضرت الزهره
تلطم عالضلع من تذكر العتره
اويچويهه الدمع لو لامس السطره
تون ونه وتصيح بصوت متكدره
ياعباس ضربو زينب الحره

الحوراء زينب والعباس (ع)

صحت عباس وينك ياكتر وين
حرمة ونار شبت بالصواوين
وشاهد خيل داست گرة العين
حرت بين الخيم بين اقصد حسين
وبين اطفال هامت بالميادين

(نعي) الحوراء زينب ع للامام العباس ع

مسبيه وغرب بالسوط توليني
ياعباس اصيحك ما تحاچيني
الك چلمة عتب لمن درت عيني
مشيت وما گلت يا خويه تانيني

زينب للامام الحسين( ع)

مشت لحسين تتعثر بلمهه
بيهه النار وبطارف هدمهه
يخويه اتصيح لو واحد سمعهه
ركض بالسوط متعني المتنهه

نعي

إكعد يا كمر زينب واريد انخاك
إلي تنظر عليك بداعت سكينه
سبو زينب غرب وانته الغيور شلون
تقبل لو غرب كامت تصد لينه

......

الامام الحسين (ع) عند رأس الامام القاسم (ع) بعد استشهاده

أخضب الشيب يبني ابفيض دمك
يم راسك گعد وينوح عمك
أرد ابيا خبر جسام لمك
شگلهه الحنه لو دم فوگ جسمك
يعريس المنايه اشكبره همك

رمله (ع) تخاطب الامام القاسم (ع) بعد استشهاده

يجاسم يبني توه ازهر دليلك
ليش الحنه صارت دم وريدك
التالي الشيب امك من تريدك
تريد اتموت يمك واعله ايدك

.......

عند رجوع علي الاكبر من الحرب عطشان واستقبله الامام الحسين (ع)

شبگ ابنه وينادي ابحزنه إلحسين
علي يبني العطش ذبلّي شفتين
خشبه إلساني صار ابعملت البين
لابيّا دمع واعصرلك العين
اولا گطره ابسمه اوترويك هلحين


لسان حال الامام الحسين (ع) عند وداعه للامام علي الاكبر (ع) بعد رجوعه من الحرب الوداع الثاني

ياعطر النبي اونسمات إلشواگ
لو غَمَّضْ جفن لعيونك اشتاگ
هدم حيلي وداعك والصدر ضاگ
علي يبني الأبو مايحمل افراگ

ليلى (ع) تخاطب علي الاكبر (ع) بعد استسهاده

يطول الليل بغيابك وتاني
تمر بالطيف ياحلو المعاني
علي ياحيل امك والاماني
دمع فرگاك عذبني وعماني


الامام الحسين (ع) عند جسد الامام علي الاكبر (ع) بعد استشهاده

شبگ طوله اويصيح ابصوت إلحزان
يجدي اسگيه مات اوليدي عطشان
غدت طبره اعله طبره ابجسمه نيشان
وصبح خد الأشمه فوگه تربان

.........


لسان حال مولاتي زينب (ع)
عندما وصل ضعن السبايا الى الكوفه

ياكوفَةْ أبونه اندارت الأيام
الأميره اعليچ ردت وبضعنهه ايتام
اخيالي الچان ينظم شافته الظلام
ليالي البيچ اهون من ليالي الشام
العلي اليوم ينشد ما معاهه ازلام
الأخو عباس راسه اعله الرمح جدام

.........
خادم الزهراء (ع)
سيد حامد النعيمي

ابوذية

لسان حال مولاتي الرباب (ع)

عجّل بالأجل ياموت شمتان
عبد يَمَّه طفل بالراس شمتان
وراسه امن الذبح مابيه شمتين
ذبل من العطش حد المنية

نزلة 
للامام المهدي (عج)


نبقه احنه وياك / نبقه احنه وياك 
للموت يامهدينه

بالذر كتبنه العهد 
بايعنه الك للأبد
والرب علينه شهد
بَصّمْنَه بالدم

بالذر وكت عالخَلِق
ربك يوزع الرزق
إنطانه ليك العِشِق 
واعلينه أنعم

من عدهه حبك بالگلب أثّر
بدمانه يمشي وساكن الأبهر
وِوْسام من شلناه بي نفخر
أربع عوالم بيهه الك يكبر

بالخامس اهناك / بالخامس اهناك
بالبرزخ اينجّينه 
.... 

لحم وجلد بالحرگ
هيچ البشر تفترگ
بس احنه اهل العشگ
مانشبه احد

فرگتنه بيهه رُقِي
بگلوبنه نلتِقِي
مثل العبادة وتَقَي
لا والله أزيد

ويانه باليقظة وحلم وردي
بسمك نِصَبّح بالنِفَس تبدي 
وْنشتمك ابكل ريح إلتعدي 
نسمه تهب لو صحنه يامهدي 

وِاتْوَرّد الروح / وِاتْوَرّد الروح
وايطگ خضار البينه
........
 
شامت سأل عالفرج
راعي الأمر ماخرج
جاوبنه وبلا حرج
ننطرهه طلته

يخلص ظلام الأمس
بعد الفجر نلتمس
لابد تِضَوّي الشمس
والنور انته 

نهر الفرات انْغِبْطَه يوم الطف
چي لامَسِ اخْدوده الگمر بالچف
يالمنتظر بينه اشوكت ترأف
وبچفك احنه نريد نتشرف 

وِانْوَفّي إلعهود/ وانْوَفّي إلعهود
وانصارك اتخلينه


خادم الزهراء
سيد حامد النعيمي 

محرم 1447 (ضاعن احلامچ) 
ليلة الامام القاسم (ع) 
لسان حال مولاتي زينب (ع) تكلم ام القاسم رملة (ع) 
ملاحظة: (يام) المقصود (يا أم) 

يام جسام ضاعن كلهن احلامچ
حزن والجاي اشد من دونه ايامچ
واويلاه واويلاه 

عمته وْأُمه يام جسام خل ننعه
على العريس خل ننحب نهل دمعة
ألف ياحيف لا حنّه وْطفت شمعة
ذاك امّدد العريس گدامج
واويلاه واويلاه 

بالدم سابح امن اسيوف طبرنّه
جابه احسين مامش كل رجه منّه 
ابطوله احسين صاير من كثر حزنه
ظهره اعليه حدّب شارك آلامچ
واويلاه واويلاه 

من هول المصيبة اعليچ شفتي الويل
سكون احزانچ ابگلبچ تهد الحيل
ثگل احمولهه لمّن يجيچ الليل
كل دمعة ابسهم واهواي اسهامچ
واويلاه واويلاه 

الأم اتريد ابنهه اوْياهه بالشدة 
الله ايعين گلبچ كلشي ماعنده
مكان ابنچ يرمله ياهو إليسده
فوگ افراگه وبكونه الدهر ضامچ
واويلاه واويلاه

كومي اوياي نگصد لام علي الاكبر
إبچي اوياهه خلي العبرة تتكسر 
وتالي الضيم وحده بوحد تتصبر
بلكي ايفيد وانتي ابشوگ مادامچ 

سبي النسوان باچر عازه والي ايريد 
ابنچ كون انتي اوْياه إيد ابإيد 
درب خطواته طگ اسياط ممشه ابعيد 
وانتي الهسه حرگ اخيام بجدامچ
واويلاه واويلاه 



خادم الزهراء (ع) 
سيد حامد النعيمي 

محرم 1447 (هز الحومة) 
قصيدة حماسية 
ليلة الامام علي الاكبر (ع) 


من طبّاهه   هز الحومه

تجهّز للحرب من گِصْته باسه احسين
ركب ظهر الفرس حالف يگر العين 
عهد خلاه ينصر والده والدين 
علي ابن الاطايب وارث الماضين

زلمه وْماخذ من جده اسمه
وْمن جينات الحامي وْدمه
وْخصّه الباري باجمل نعمه

چنه احمد يشبه لرسومه 

طب الليث راجز بيده سيف الحگ
متكتره الزلم ياهو ابعلي يندگ 
عظم اصدورهم عظم ابعظم ينطگ
البي آخر نفس للشهگه ما لحّگ

وْكلمن يبلع ريجه وخانس
هزهم هز ومامش فارس 
يطلع كون ابزوده ينافس 

من هاشم يدرون اعلومه 

محتارين ياهو ايگابل الاكبر 
قائدهم جبن گال انه ما اگدر
مرحب وي علي بالضربه انطر طر 
نزل صاعق عليهم صعبه يتفسّر

گد ما بيهم يرعد چفّه
رجليهم صارت بالرجفه 
چن ريشه ابريح الخفّه

وْكل واحد گلبه ابزردومه

متلثّم علي چن حيدر القادم
روجه ابروجه من طگهه وْطلع سالم
من عدهم طلع بارِز ابن غانم 
راس ابدون جسمه رده للوادم 

ابن احسين القطعن يفلح
شافو سيفه ابإيده اتمرجح
واحدهم رعبه ابيقظه اصبح

وْبالرگبه امچلب جيثومه
 
يحصد بالرگب موسم حصد ارجاس 
من زاد العطش ماهزهه راعي الباس
علي ابناموسه عمه ابفعله يرفع راس
من جاب النصر هز سيف اله العباس 

گام العباس وْگالاله 
ليث انت وْمحد يدناله
انت اليرعب خصمه اخياله

گدهه امنتصول وْمحسومه



خادم الزهراء (ع) 
سيد حامد النعيمي 


 

ليلة الرضيع
لسان حال الرباب (ع ) ام الرضيع (ع)


عبدالله بالطف موسى باليم
عبدالله يُذْبَحْ موسى يسلم
واويلاه واويلاه

حكمه بيهه آنه وام موسى اشتركنه بالبلاء
كلمن ابإيده رضيعه شده عشنه مو رخاء
وِبْرَحِمْتَهْ أوحى لام موسى الجليل امن السماء
لا تخافي إلقي باليم إبنچ أفعل ما أشاء

محفوظ إبنچ آنه أعلم
عبدالله يُذْبَحْ موسى يسلم
واويلاه واويلاه

موسى بالصندوگ يوضع وابني بچفوف الامام
من بحر رد النبي لحضان أمه وبسلام
وانه عبدالله رجعلي شايل ابنحره سهام
ميت ابسكت ورد ومفرفح ابجنح الحمام

وگماطه أحمر ناگع ابدم
عبدالله يُذْبَحْ موسى يسلم
واويلاه واويلاه

ماتوادعنه ابرحيله لاشِبَعت ابشوفه عين
نظرة اعيونه الأخيره عكست ابعين الحُسين
بيهه أقرا احچايه بويه فدوه أحلفك أمي وين
گلبي نار ورايد اغفه عالصدر ذاك الحنين

ولحضانهه مشتاگ أشتم
عبدالله يُذْبَحْ موسى يسلم
واويلاه واويلاه

لو فرغ كاروك ابنهه الوالده يترسهه نوح
من تهز جذعه ابحزن تتساقط اعليهه الجروح
كل جرح لچماته ذكرى لو صور تلفي وتروح
الدنيه بفراگ الغوالي مگبره مابيهه روح

ظل بس حزنهه ابصدري خَيَّم
عبدالله يُذْبَحْ موسى يسلم
واويلاه واويلاه

الضحكه بشفايف رضيع وبالمهد إلهه طعم
بالعطش ضحكت ضنايه يبست وبالمي حلم
موسى من فرعون ينجي أطغى حكام الأمم
وال اميه امن الظلم عبدالله منهم ماسلم

القاتل براءة ورده يندم
عبدالله يُذْبَحْ موسى يسلم
واويلاه واويلاه


خادم الزهراء (ع)
سيد حامد النعيمي

محرم 1447 (كلّي حيره) 
ليلة الوداع 
لسان حال مولاتي زينب (ع) تكلم الامام الحسين (ع) 


خويه صدلي نظره اخيره
وانه يمك كلّي حيره
باچر اتلوحك منيّه
وامشي آنه لغير ديره
 
حزني هدني ... وانت سالم باچر اليبقالي مدمع
انت مني ... نجمة وتلازم ضواهه ابليل تطلع
ماتلمني ... دنيا بس اوياك لو شخصين تجمع  
خويه خلني ... شوف ومسامر حبايب منك اشبع

هاي فرصة نگعد احنه 
كل حچينه بس محنه 
هيه ليلة وما بديّه
وامشي انه لغير ديره 
 
روحي غاصت ... بالحزن وادريك بيّه انت تهتم 
صحره شفتك ... يابسه ومن عدهه باين جاري الدم
رايده افرح ... خويه بشفاك الفطر أتمنى يلتم 
ادري يابس ... بيش احلفك رطبه من عيني وْتِبَسّم 
  
بيك انظر ضحكة امي 
لو شفتهه اتزيل همي
تدري بالضيم العليّه
وامشي انه لغير ديره

الله يشهد ... وجهك الشاحب يشابه امنياتي
حيلي من هد ... جفنك الذابل اصدله چن گواتي
منه اسود ... من تروح اتصير بعدك كل حياتي 
مالي احد ... تنذبح بالسيف وآنه ابذكرياتي 

وعيني اتصد عالشريعه
شهم يفزع للوديعه
انتظر وشّر بديّه
وامشي انه لغير ديره 

هسه يمي .... إكعد وخليني اشم ياخويه نحرك 
سيف معمي ... وثلّموه الخاطر ابذبحك يعورك 
وانت مدمي ... محد ايعينك فقط ربك يصبرك  
وانت مرمي ... بالگمر لو بيك اكلك عظم اجرك 

وي سهمهم يچوي گلبك 
من شمر بيده يگلبك
وْنور وجهك عل وطيه
وانه امشي لغير ديره
 
آه صدرك ... بالسحگ من ظهرك اضلوعك يِطِلعن
آه صدرك ... من سحكهم لو بناتك كسره سمعن 
آه صدرك ... هو بس يشفي ألمهن لو تِوَجْعَن 
آه صدرك ... شرد اكلهن ينطحن بالخيل طبعن 

كلمه اخيره صوتي سمعه
انتظر للمهدي طلعه
ثارك ايجيبه إليّه 
وامشي انه لغير ديره 



خادم الزهراء (ع)
سيد حامد النعيمي 

اعادة نشر
ليالي الوحشة
لسان حال مولاتي زينب (ع)


ياليالي الوحشة رُحْمَنْ حالنه
بس عليل وغيره واحد مالنه

كلنه مكسورات نسوه ابلا خيام
منّه راح اليوم چم زلمه وامام
الليل يرهب لا تطوخن بالظلام
إخوة ماعدنه وعدو يبرالنه

ابيا وكت بالغربه بالهيمه نبات
ومن عگب عباس احامي امخدرات
آه لو يدري بخواته امتربات
چا گلب هالكون چف كفّالنه

امفطره اوجوه العلاوي چن ارض
بين نار وسوط تعبنه الركض
السوط چفه بالظهر لمّن يكظ
وذره يشلع بي حفر سوّالنه

يوم عاشر خيلهم سحگت ورد
تيّهت بحسابي لاطفالي اعد
طفله لو ضاعت تموت وما ترد
حافر البي موت يتعنّالنه

هذا واكثر حالنه والمر صعب
مختصر لو احچي ما تكفي الكتب
ليل امس يم اخْوِتي هسه رعب
لا ضوه والخوف شاغل بالنه

ياليالي اعليچ أمنه فاطمة
من وجه عباس ضويهه السمه
عيلته حامي عليهه امعلمه
والگمر يحمينه من اخيالنه



خادم الزهراء (ع)
سيد حامد النعيمي

نسألكم الدعاء لنا ولوالدينا رحمهما الله والى جميع المؤمنين والمؤمنات والمسلمين والمسلمات الاحياء منهم والاموات
ولا سيما بالخصوص شيعة اهل البيت عليهم السلام ومن لم يذكرهم ذاكر

يوم العَاشرْ يوم حزن الزهراء والعقيلة زينب والحجة المنتظر (عليهم السلام) ويوم الْوَدَاع ويوم الْبُكَاء وَيوم الْحُزْن
"السَّلَامُ عَلَىٰ الشَّيْبِ الْخَضِيبِ 💔
عظم الله اجورنا واجوركم واحسن الله عزائكم