الشوك يكتل

السلام ع علي ابن موسى الرضا المرتضى س


متعبيك وانته الحاطنه ع متونك
منين الكه بلدنيه بشر من لونك
وين اكو بنادم كله خير واحسان
عميه العيون الماتحب عيونك

هنياله كلمن حبك وسافر ليك
ب احواله مافكر وفكر بس بيك
هنياله كلمن عاش وياك ادموع
ناسيها روحه بس ذكر يبجي عليك

العاشك يموت بطاري محبوبه ابساع
لو جابو اسمه تغص بدموعه الكاع
منانه تعرف غربة العاشك وين
بلغربه بس دمعته وياها امتاع

الغربه تبدي بلدمع دون اسباب
وتعيش لاجن كله تحسبها اغراب
هنا تبدي لوعات التعب والويلاهه
من تبدي تعطش والدمع يبدي عتاب

من يبعد عليك الدرب من تشتاك
من يطك صبرك وانته بعدك بفراك
وتستثني عن كل الحجي وترضه ازور
بلطيف وتكل للرضه يمته الكاك


محمد تقي الزاملي

(رايد توبه)


انه الطريد الضايع ابلا اسمك
شارد اجيتك فدوه اخذني لكلبك
فدوه اخذني ارد اعيشن يمك
الدنيه ضلمه والضوه بس دربك

بيدك اخذني الباب عطفك
عيشني من احزان طفك
عبدك اصير ابكل عزيه
يكفيني اضل بخير لطفك

يكفيني احبك بس انته وحدك
وانسى الخليقه وبس انته اخلدك
حبيبي



نادم عله ايامي المضة مو كربك
وكل ساعه مرت مابجيت الهمك
رزقني كلب يلهيني بس ابحبك
اليبجيك سامعها يفرح امك

يكفي اعيش وياك دمعه
يكفيني اضل ابجيك وانعه
وطبع العبد متهمه شهره
ينفذ فقط كل اليسمعه

يكفيني ترضه اعله دموعي فاطم
وتقبلني خادم بين المأتم
حبيبي



اسف اجيتك انه يامحبوبي
وانته القبلت الحر وعفت اذنوبه
يلتستر العاصي وتغطي اعيوبي
من ذنبي هارب جاي رايد توبه

انته الامير وانه عبدك
عاقبني كلشي بلايه بعدك
انته الرحيم الماتفرط
لمن تعاقب عاصي عندك

كلشي بعطائك من عندك اقبل
خل كلها تزعل همي انته تقبل
حبيبي



يلتنطي للأفل درب لو يطلب
وترزقه وادم بي تدلي وتنصح
اطلعه انته من وسط ذاك الجب
ومن يلتزم بيبان اله اشكد تفتح

اترزقه انته من يثابر
علطاعه والذنبه يهاجر
من ينسه كل ذيجه حياتي
ولحب جديد يضل يسافر

يلتكرم انته دون اي مقابل
راضي بقضائك لن انته عادل
حبيبي



بعد الندم كله انه رايد هسه
ترزقني دمعه وانه خاطىء جيتك
كل ماضي عايش جنت رايد انسه
دخيلك انادي سيدي اتنخيتك

خليني زلمه وياك انته
خلي دمعتي اطيح سكته
وغربني مابين الخليقه
يكفيني جرحك بيه شفته

وبقه مواسي وكل عمري نايح
ابجي المصابك للدمعه طامح
حبيبي



محمد تقي الزاملي

رايد توبه

رايد توبه

الرادود سجاد الخزاعي
بصره

بّـ متون السماوات الرفيعة اسمك ،
نجم ما هادن الظلمة
الگمر لو راد يتبختر
صناديگ الليالي السود
ما تگدرله وتضمّه

يا كلشي
وگبل كلشي
وبعد كلشي
وقصايدنا
وسوالفنا
وذخرنا بسود المعسرات
وعگدة شيلة امّي وحيل الـ مّعجزات
والصورة الـ على الحايط
الندخل عدها واحنا زغار يلا نبات
وحچي زغار الدرابين العتيگة
بواحد يحلّ للخلگ صعبات
حچي الغبشة
وعطية الله
والـ يداين الحيل
ويحضر الدفنة ويعين المات
الـ يطيّح الزعل
ويرد المغربين
ويگوّي امّي
واذا رايد ابوي
من النخل تمرة
يحط بچفه المرطبات
الـنحبّه
واليحبّنا
والنصحيه
وباسمه نستفتح
والـ يجيب الشمس
والغيم بچفوفه
ويجيب الـ جاي مثل الفات
كلام الله
وجبر خاطر المكسورين
وابو العدلين والموتى
ابوي
الحيد
والـ يگدر
والـ يحلها
وابو الزينات

(ليل الحزن)

دمعي جره عليك... وبخدي نيشان
وبدمعي احاجيك... والكاك تعبان
اصرخ يويلاه... ويتفرهد الحيل
ماضل كتر بيك... سالم يعطشان

ياويلي جم اه والم تجرحني لو مر بيه
ذكر الحسين ومنذبح لو طلعت العلويه
امجازه الاحسان اختلف بال النبي تاليه
اليرشف الخيل انذبح ماراوي كطره اميه

جم هضمه تكبر وبروحي تصعب
ويلي بجراحه ضل ايتكلب
ثخنت جراحه وويلي وتعذب
وصدره متله جروح

واويلا حسين


بليل الحزن راح... عقلي ويه ناعيك
بحسرة دمع ناح.... ويهضمه طاريك
ياجرح الاحساس.... لو كالو حسين
تهضمني الارماح.... تااذيني وابجيك

تاخذني نوبه من الدمع وانهار وابجي بحيره
ولمثلي عايش عل الدمع يافشلته وتقصيره
ولسا يشم هوه الهوه ومامات لاهل الغيره
وبافشلت اجروح الكلب لو يلتهن يم غيره

محبوبي طايح سلبو ثيابه
يتلوه ويلي فوك الترابه
اخ الغربته واخ العذابه
يصد رحله منهوب


واويلا حسين


واجب يعزوو... . الي يموت والي
يمه ويصبروو.... يعزون اهالي
الميت يجبلو ...يحضروله تشيع
بس ويلي الحسين...اعله الغبره تالي

واخته العزيزه مارضو يم جسمه تمشي اتودعه
صار الاوداع اعله الهزل تومي ل اخوها ابدمعه
مشوها بدروب السبي وفجعه تتالت فجعه
اه يامصايب كربله والشام اصعب وضعه

ثكال المصايب لامو خفيفه
عل هزله تمشي ويلي العفيفه
بس جسم اخوها مسلب تعيفه
يرافكها بس راس


واويلاه حسين

ادري الحجي يطول ... وماتكضي الالام
بدفوف وطبول .... تلكوها بلشام
جرح الخدر صار....بدلالي عطاب
معقول معقول ... لوهايه احلام

ضعن الكفاله الهاشمي بس الحده بي شامي
من بعد عباس اصبحت زينب كفيله تحامي
ويلي ابو الباقر منضره من الجامعه ضل دامي
ياهول من عظم الجره وكلب الحرم هم ضامي

اخ العقيله عاشت مصيبه
ويلي العذاب وويلي العجيبه
هند بقصرها وزينب غريبه
يحير تره الصار



واويلاه حسين








محمدتقي الزاملي

ليل الحزن

الرادود سيد مؤمل العرداوي

(باب الجواد)

اليجود برحمتك عن كلشي مانادم
جواد وهل اسم خلاني اضل هايم
اليحضه من الجواد بنضره لو لحضه
كفيله النضره هاي تميزه بلوادم

بس مو بلسهل هل نضره
يحصلها الشخص بالفطره
لوطاعه وورع وملازم
علخدمه يضل كل عمره

كل عمره يبقه
اعله الطاعه لازم
يله يحصل هل امر
الرايدها لازم
بالطاعه يسعه
بمرضات امام العصر

يبن الرضا دخيلك
من نفسي اشتكيلك

عبدك سائلك من العدم قادم
وانته ابن الذي قبل الطلب كارم
دخيلك سيدي غيرلي احوالي
وانته بفقر حالي وضرتي عالم

لايذ بلعطف باعتابك
ادعو برحمتك يم بابك
وانته للكرم عنوانه
النجيب المنتجب القابك

سائل اجيتك
بلرحمه طامع
وانته الامام المنتجب
وعدي يقين
بهذه كلامي
مترده خايب لو طلب

يبن الرضا دخيلك
من نفسي اشتكيلك


من باب الجواد اطلب اضل خادم
ومنه استجدي انه دموع المأتم
وحيلي لكربله من عنده انه طالب
وانه بشده ورخائي بعتبته لازم

اباب الجواد دمعاتي
كل حسره التمر واهاتي
خيري البين ادي افضاله
ب اسم ابن الرضا حاجاتي

ماكو قياس
العطفه وعطائه
ابن الرؤوف المرتضى
ماحاجه اسولف
عنه سخائه
غير اهوه ابن الرضا

يبن الرضا دخيلك
من نفسي اشتكيلك

وكفت ابابك وطالب انه الزلفه
وانته ابن الرؤوف ومنك الرئفه
ارزقني المحرم جمره من خيمه
ولجمه لمعمتك منعدها مااشفه

دمعه لعمتك طالبها
تصاحب وجنتي حاسبها
بس ذني ردت للعاشر
ويوم امحرمك اكتبها

بفضل الجواد
النعمه هايه
وعليها اشكرك سيدي
باب المراد
وابن الكريم
الضامني من مولدي


يبن الرضا دخيلك
من نفسي اشتكيلك





محمد تقي الزاملي

باب الجواد

متباركين بولاده مولاي السلطان علي بن موسى الرضا عليه السلام

(سلطان الروح)


غزاله بحضرة الصياد
روحي وانته ضامني
فجأه وفزت عيوني
من نومي ومشت عني
طيفك جمل عيوني
حلم بليقضه عيشني
من حضرت علي الصحنك
شوكك بيه ويعتني

يعت من النجف بيه لمزارك
خيعونه الصبح بلگبر جارك
خَفت كل نار وي نار اليتانيك
طريد وملجأي ابعتبات دارك

عتاني الشوك .... واجيت اعله بابك تسولف دموعي
كلبي المحروك ... يخاف ابوداعك اذا حل رجوعي



اجيت يعتني ليك الشوك
مشايه اعتنت روحي
اضمَن شوكي عن الناس
وتفضحه دمعة اجروحي
يضامن دمعة الحبوك
يمهيج حزن نوحي
يمدلل شكو زاير
يجيلك وبطلب يوحي

من باب الجواد وانته اجود
طافت روحي يمك يبو محمد
انعمالله اعله الضوه المن المنارات
فتح شوف البصيره الجان ارمد

شكرا مولاي .... برحمتك قبلت اعتنيلك وازورك
عطشان هواي .. ورويت ابدمعتي لمن شفته نورك



احتار والك اشتاك
وفجأه وانته تأخذني
وتوصلني لعتابك
وبحبك تدللني
تخليني ابتسم مرات
ومرات انته تكسرني
ابجي واضحك ابابك
الدلال اهواي حيرني

مجرد بس تصد عيني أعلى كبتك
تنزل دمعتي بعتبت رحمتك
واكلك عل القاء مولاي شكرا
واطلب عوده ترزقني الحضرتك

سلطان الروح .... على بابك كعتي ويزود اشتياقك
كلبي المجروح .... اليخاف برجعته يطول فراقك


ساعه ابجي من الشوك
ساعه من البعد انحب
ساعه الفاطمه ابجي
وساعه غربتي الزينب
حيرني العذاب البيك
كل ساعه بحزن يلهب
ابجيك وتكاودني
تكلي نبجي التسلب

كل اليعتنيك اتجرحه بحسين
مصابه بگبتك ينشاف مرتين
الصفار البيهه يشرح للعطش لون
ارزقني الدمع يلقارح العين


مهيج الاحزان... اعلى بابك دموعي تعيشني الطفوف
اعظم سلطان ... اليتيه مسيره يرد يمك يشوف


تعنيتك يبو محمد
ودموعي اتسابج اجدامي
طلبتي اتزيدهن مولاي
عالضل عالترب ضامي
وعلى الطبت بديرة شام
كون اللوعه باحلامي
يوم المابجتهه العين
مامحسوب بايامي

الشام اللجمته بگلبك جبيره
اريد ابجيلهه شما بيه غيره
يبو محمد العون لدمعة ام عون
جانت هيه هسه الحضره اسيره

يسدون الباب. وضلام اهدعش من محرم صحنهه
والصنته مصاب هدوء الضريح اتضح هوه ونهه



محمد تقي الزاملي
مصطفى خالد الجبوري

سلطان الروح

بحب الحسين
صباحا اتنفس بحب الحسين
مساء اتنفس بحب الحسين
بحب الحسين

انطيتني اهوايه نعم وخيرك يفيض عليه
يلكبرت كل الخدم حته اليوزع اميه
خيرك عليه هواي احس وابجيلك بلطميه
امنيتي اموت من العطش لواعوف الحسينيه

يلخيرك مغطيني....ارزقني دمعه لعيني
حركه وجزع انطيني...وخليني اون اسنيني

بحب الحسين
صباحا اتنفس بحب الحسين
مساء اتنفس بحب الحسين
بحب الحسين

اقبلني عبد بمجلسك وارزقني حركه شويه
خليني اوج بهلخيم واعرف حجي المجويه
عيشني لوعات اليسر وضيم وبجي العلويه
اجويلي كلبي بلجمر الداست عليه ارقيه

ابخدمتك اقبلني...زودلي ضيمي وحزني
المجلسك وفقني...وخليني اموت ابوني

بحب الحسين
صباحا اتنفس بحب الحسين
مساء اتنفس بحب الحسين
بحب الحسين

يلدمعتك رحمه اصبحت خليني دوم ابجيلك
ناصبلك بكلبي عزه ودم انه اصيح ادخيلك
يلحبك مغرك البشر جيت بدمع احجيلك
ياسيد الون والبجي امنيتي اشفي غليلك

لالا تهدلي اديه .... ابداعت الترجيه
زودلي ضيم البيه..ارد ابجي بحنيه

بحب الحسين
صباحا اتنفس بحب الحسين
مساء اتنفس بحب الحسين
بحب الحسين

يلخيرك مغطيني احس هوايه علي حينيتك
مااوافي لوطول العمر صبح ومسيه ابجيتك
معشيني دوم ابرحمتك وانه الذي بجيتك
ماسوه خيط من الخيم يلكبرتني بصيتك

خليني دوم بدربك..لالاتعوف الحبك
يحسين انه وربك...ضايع لون مااحبك

بحب الحسين
صباحا اتنفس بحب الحسين
مساء اتنفس بحب الحسين
بحب الحسين

طوفان هلدنيه اصبحت وبس انته التنجينه
ولوما خدمتك والعزه ماتلكه طيب بينه
ميت تراهي بدنيته المايون لحسينه
تايه يضل بلا فكر وبلا حياء اسنينه

الي يتيه ادروبك..تايه يضل من دونك
المايواسي ونينك..تايه يضل وعيونك

بحب الحسين
صباحا اتنفس بحب الحسين
مساء اتنفس بحب الحسين
بحب الحسين




محمد تقي الزاملي

(حبك لو عذاب الطف)


الحب خلق منهج حيات
دمعه ولطم شوك امنيات
والحب وجد كسرة غرام
وباب الندم باب النجات

حرت والتهضم بكلبي حبك لو عذاب الطف
حرت والجابني البابك مااعرف انه ياجف
حرت واتنوع لروحي بذكرك كلبي رأسن رف

عرفني واعيت الحزن حته اقره كربله
حته اعرف اليعشك جرح مايهده بال اله
ليله ونهاره بخلوته دمعاته هامله

................

الحب يسببلك وصول
ويشرح شكو جلمه تكول
مو بلحجي بدمع العيون
من توصل الباب القبول

هنا عيني حديث الها تشرح عن خبر مبهم
الدمعه التنبجي اعله حسين مايبقه وراها هم
هاي الدمعه تصنع ناس لغير الخدمه ماتهتم

لطام اصير ابمجلسك وبلوعه مبتلي
وابقه بعذابات وسهر ولونه تعتلي
هنيالي ابهذه الرزق شكرا يابو علي

...................

الحُب قوانينه الثبوت
واولهن يلازم سكوت
والحَب صدك ماعنده راي
وويه اليحب لازم يموت

هنا كلبي بده يسولف كال الحب عذابه هواي
بس وياك يامولاي تحله من اضل ب اضماي
وحلوه من اموت اعليك حته اصبح صدك وفاي

بيدي اخذ ياسيدي كافي بعد ندم
وخل دمعي ماينشف ابد لو سولفو خيم
مااريد اضل بغفلتي وملازم الوهم

..............

الحب يطول اشما يدوم
شكر النعم وكت الهموم
واليرضه بلنعمه التجي
من المصايب والغموم

انته ترافك حساسه بخلوته ولو كصد مشاي
الامره يسلمه الك مولاي مسير مو مخير راي
انته ترزقه غربه وشوك ويصبحلك صدك بجاي

بجاي اصير الغربتك ماينشف الدمع
ولو كالو الحره انسبت كون اكسر الضلع
وكل مايمر طاري الك كون ابقه منفجع


محمد تقي الزاملي

(حبك لو عذاب الطف)

الرادود حسن نعيم الحار

(حبك لو عذاب الطف)

الرادود مجيد عقيل الزبيدي

(حبك لو عذاب الطف)

الرادود سيد مؤمل العرداوي

سيتم نشر بقية البرنامج قصائد العشره الاوله من محرم الحرام ان شاء الله
من اليوم

(كلب اليحب يثلم)

استقبال شهر محرم


بدموعي استقبل شهر..حزني ومصابي
انصب عزاء المنذبح .. وابقه بعذابي

كل حيلي اطلبه من الكمر
وادموعي من اخت الرضه
وابقه بعذابات وسهر
ومن فاطمه اطلب رضه

من ام البنين اتعلم
كلب اليحب يثلم

ياالله بلغنى محرم بلدمع

انصب عزاء بكل وكت ... ودموعي تجري
مشتاكه اديه الخدمتك ... وبحالي تدري

خليني الك دمعه اهل
ورايد اعيش انه بهضم
كون بمحرم ماامل
من البجي ومن الطم

كرب هلال محرم
كلب اليحب يثلم

ياالله بلغنى محرم بلدمع

وي روحي اسولف والحزن .. مالك كياني
ياسيد الحب والدمع ... حزنك سباني

وداني يم حرك الخيم
وخلاني اهيم بعالمك
ثاري اليحب راعي العلم
يصبح حقيقه بنادمك

وي روحي جاي اتكلم
كلب اليحب يثلم

يالله بلغنى محرم بلدمع

العاشك ضعن راح بسبي ..ماتطفه ناره
ينعه امامه بكل وكت .. ياخذله ثاره

الله يعينه المنتضر
دمعه فلا ينشف ابد
يوميه تنعاد الصور
هزله وحبل حيله نخمد

كل ساعه ضل يتئلم
كلب اليحب يثلم

ياالله بلغنه محرم بلدمع



محمد تقي الزاملي

(كلب اليحب يثلم)

الرادود مجيد عقيل الزبيدي