سمير صبيح


ترستك ماي خوة و لا نداوة الگـيت
طلع جودك شبچ واسراري تطشر

خاويتك عشب
ويـ كل نسيم اتميل
جربتك شجر بالريح تتكســــــــــر

ومن صارت صدگ
ردتك ولو حاجوز
وغصب عذرك قبلته اتخاف تتعــور

بزلاتك اضم
ردتك ضمير اتصـــــير
وجذبت الصدگ حتى انته ما تخسر

وعاونتك عَلَي
من شفت عذرك خاب
وقنعت النفس گلتلها يتغـــــــــير

لا كصرك طول
لا فاض بيك الطيب
لا شمسك علت والراكد اتبــــخر

لا مدك وصل
والعين شافت نـــور
لا گصرك طول لا لغزك اتفســــــر

گدامك طحت ما شفت وجهك گام
وهاك ابسط مثال وشوف واتصور

ولك خشبة بطبر
فرگست چف حطاب
من شافت حطب گدامها اتطـــبر

وجبت تعبي درب
صغته بعدالة ماي
يا درب الاصوغه وبعد ما تعثــــــر

ياليل اليظل لو فجر يتعـــــــناه
يا گلب اليدگ لو دمه يتخـــــثر

يا ذلة النهر يقبل سواجي ايصير
وگبل كل السواجي المايه تتنطر

گلت تطرح ثمر
غرني الخضار البيك
وبقت روحي اعله فيك تالي تتحسر

مرتضى مطشر

ياحبيبي ولا اتخاف
احنه كلما نبعد نرد للبدايه
گاع ربنا مدوره ومامش نهايه
ويجي يوم الگاع تفتر ونتلاگه
وكل وسيله تصير غايه

يجي يوم الزم اچفوفك
واوكف بگلب الولايه
يجي يوم وبالحلال بزفه افضحك
يجي يوم اهمس بذانك
همسه العرسان ذيج
المدري شيگولون بيها
المهم تضحك

يجي يوم ابفرد ماعون انتعشه
يجي يوم وتغفى فوگ ضلوع صدري
واحسب بنمشات وجهك نمشة نمشه

واني ناذرلك اجيب الزفه ممشة
وموش بالليل الصبح نغبش عليك
الرايد يجيب الرزق يغبشله غبشه

انت يالماتشبه احد
دائما من ارد اوصفك اصفن واحتار بيش
انت خصله براس كل ليله مضلمه
خصله محطوطلها ميش
شلون تعقلها اهدك
وانه غرگان ولگيتك حدري گيش

انه احبك گد حلاتك
لا اتـگلـي اتـحبني لــيـش
انت تدري عيونك مسويتلي واهس حتى اعيش ؟
انت تدري خدودك اترف من شكو بالدنيا ريش ؟
انت تدري بلون شعرك على لون الليل طاغي ؟
انت تدري الاوردة المتفرعه بيدك
كلها متفرعه بدماغي ؟

انت عندك علم برموشك يضحكن ؟
تدري بيهن بالخجل مرات يحچن ؟

انت ماعندك علم بيهن هذني
انت لو تدري بهذني
غازلت روحك غزل حتى احلى مني

اضحك اگبال المراية وشوف روحك ...

حيدر شيآع



حـاﭼـيني الـدروب اذنـوب
من يشـتـد عـطش بالـروح
تسبيـح العطش للماي
يرسـم بالفياي احبـوب

يـاقـداح
ياضـحكـة هـرش بعـيون كل فلاح
احـس بعيـوني ليل ودم
صـاحب ثار مايـحلـم
ياذيـني هـوه اجـويريـد
من كـل صـوب صوت ازرگ

ياعشـگ الصبـة والـكاس
حـلات الكاس من يعتـگ
اجـرحني وٲگـولن والمت جـرحي
اطـوش امنيـن ؟
وانت بكـل كتـر برحـي
كلـشي البيـك مامـگـيول للحـايف
ولامـاخـوذ منـك للـغريب امتـاع
حـلاتك عالسـوالف يشـتريك الراي
ماتنبـاع

حـاﭼـيني النـشد موعيب للهايـم
هنيـال الستر يتسمة بسمة الثوب
حـدرة اشـﭼـم گمـر نايـــم

تـعال ابـروحي اناغيـلك
وسـولفلك سبـع شبـگات
عن خصـرك واغنيـلك
وٲبـدي اگـبال عيـنك
دمعتي السمره

اخـاف مـن الـمحابس
وانـته نجـمة ابلـــيل
بعـيون الـزلـم شــذرة
ولـك ياهيـــل
بيـه امنـل خضـار اعله النخل صاعود
واسـتاهـل تلمني ابيـن اصابيعـك ورد ذابــــل

ﭼـم ليل ايتبسم والصبح ناطـور
بـﭼـيت اشـﭼـم قميـص ابـلاعطـر منــك!!!!!

ويـدگ گلبي علـﻰ المامش
اثـاري الـدم رفيق ايسولف الــدمـك

تـدنالي الشتال يعيش گاع الله
ويخضر بالسـواجي الـوان
من يلـگة النفس صدريــن
ياخـذ كل هوه البستـان
علـﻰ يامال؟
ادور بالفتاوي ومالگيت الدين
فتـوة تحلل البـــوســة

علـﻰ يامال؟
لوسولف العاشـگ بالعشگ يلام
واكبار العشاير تنگلب هـوسـة
ماترهـم اگـلادة او جيـد
مـرهون بـحرز ينســام
ولاتـرهم ﭼـگارة حيــف
تنصـاغ الـحلـگ نمام
ﭼا ليش الحجـر مـذمــوم
لو صادف اخدود الـجام

ليش اللام؟
وانه اول دمـــع مستـور
اضـحـك ع الـرحي من اتـدور
واخضـر رغـم غيـض النار
سالـوفة رغيف ابـحلگ كل تنور
اسـبگ للضفاير مسـتحة او حنـه
واطش روحـي اعلـه كل مغـتاض
بـﭼـفوفي هـله وشـاجـور
حـاﭼـيني ابـكثر ما حاولت انساك يالغالي
التلوحـة الجـفوف ارخـيص
مو مثل التـريض وانعشـگ
تالـي.

مـامرة عبايـة وتحـت منها انـتـه
ولابصـمات اديـه
الحضنـة الشباﭾ
مر بيها النـدة وطاح الاثر سكتـه
هـذا انـه حلـم مـگـيول
للماغمضة عيـنة
وهذا انـه جـرح بالـگاع
يضـحك والمساحي تسولف ابطيـنة

احـن واشتاگـلك عز الشـتة الـمالوم
شـوگ الشمس للـوردة
تعال اعيـوني كلها انجـوم
وحـدة تسولف الـوحدة
انـه اول عشـگ منـهوب
ليش اللام لو گلت الدروب اذنوب
تسبيح العطش للماي
يرسم بالفياي احـبوب

غآزي ثجيل


صواني اشموع للغايب
يدجلة اچم وچم وديت
تتهادى اويه جاري الماي
وبعيني ملح حطيت

وأتنطر وأعد أيام وحجارة درب ذبيت

أدگ كل باب لعيونك
يجاسي الماعلي حنيت
تدريني يلفني الشوگ
وابدربك انة انذبيت
مر بيَّ ولو طارش واگولن مر علي للبيت

مر بيه ولو شامت
واگولن ليك انه انذريت
مر بينه گلب يفلان
ذابل وارضه لو مريت
شنهي المارچه عيوني
على اعيونك گبل ماجيت

شنهي البدل گليبك يخايب ليش مانشديت

نذر لعيونك عيوني ..
وحنيني ...
وكل بجايا الحيل
يلكلّك طمع عاشج
يعايل ماتعرف العيل
أظن تدري ابحنيني يموت
مالوم اعله چف اسهيل
واشچيلك واحن مگرود
يلوصلك ترافه وهيل
احن چالفاجده امن النوگ
لو فگدت حوار بليل
يالمها گلب مصدوع واتردها مدامع سيل

يطربها الحنين بشوگ
لو حنت ثلث توكات
وروحي الماغداها الفوت
لفها وجمع بيها وفات
يفطمها الهجر واتعود
ترضع بالوصل مرات

ديدان الهوه هذا ..
وصل
وامكابر
وحسرات
لاچن ياحلاة الشوگ لودگ بالگلت نغمات

يدعيلك حماد الروح
روض يعانج النسمات
محفوف ابسواجي الود
عليه أمروز ملتفات
مشتول ابأمل باچر
فرح بجناح فراشات
ترسم للهوه اخيالك
وتهديك بترف نجمات

يلما عاتتك كل شوگ غير اطيافك الحلوة

ينيسان الهوه ابترتيب
ياسلوه اعلى كل سلوه
هواك ابكل كتر چودر وسموك الخلگ بلوه

مصطفى الخزاعي

لا تحلم الدنيا أصغر من عيونك
الدنيا وجوه وأشكال وضحك چذاب
بس أنت بطرگ لونك ..
بس أنت تفيض من البجي اعلى الناس
كافي تفيض مايك بلل اظنونك ..
كافي تعاتب النجمة ..
الشمس طيرة صبح حطت على عيونك
ووجهك باعته الظلمة .. والـ بعينك تبدة وسال ..
حزن عينك دفو موال!
اخذ كل صورة برموشك وسافر للصبح خيال ..
واخذ روحك .. ضباب الناس يكبر وأنتَ عمر اهلال ..
أخذ روحك ..
أنت متاني گذلة من الشمس تنباع للحيطان ..
كل ذنبك رفضت تطيح ..
أجت غيمة .. بچى وجهك رمل عالريح ..
وجزت غيمة .. وضحك وجهك رمل بالريح
أنت اعلى الضباب الـ ضيّع ارسومك ضواك يصيح ..
ضواك الباگته الوحشة ..
اعلى كل شباچ مد چفه ..
وارسومك الذبلانات مدري بيا جفن تغفى ..
گبل ليلة بالدخان ترسم وجهك الشفّة ..
الـ يمتى؟ وليلك يبيع البرد للناس
وتشب وولايتك تدفى ..
السهر بيبان مفتوحة لـ بچي الوسفة
السهر موگد حدر فَي الجفن يطفى ..
وحدر الـ آآآآه وجروحك تنام جروح الولاية ..
جروح اللوم ما ينشف نزفها بضحكة امراية ..
امشي اعلى الزعل ما دامهم ماشين ..
وبيبان الملاگة تسدهم حچاية ..
باچر والصدگ يخبط زلال اوجوه
كلمن چذب بـ مايه ..
وباچر لو جزوا طاريك ..
حدر كل نجمة توگف عينك امراية

عطآ السعيدي




بناك تنام ليلك وانه اظل سهران
وتغط بالوسن وتكول سهرته..

وتتثاوب كسل ومنغصات الليل
مامرن عليك وضكت ماضكته..

وتفرهدني الليالي والتهي بطرواك
بس اجتر حزن واذرف دمع سكته..

اذا هذا اليدور بخاطرك غلطان
ماتعرف عطا وعن كرب جربته..

موش انته البالي ولا انت المقصود
مدري شلون رهمت وانت صرت انت..

وردتك عود ترهم مارهمت وياي
وردت بس ما تهيأ الحاسبه وردته..

على الخامس وسادس كالبتهه وياك
وارخيلك حبل وبلا وعي تعته..

ويمر صيفك واجرعه وعود اتاني شتاك
ياحنضل مرار ان كاظ وان شتـــّـه..

لهسه مرورتك تحت اللسان تبات
عكده وكل حلو بهواك ما ضكته..

صواهيگ وعطش وفياي مامش بيك
لا بالگيض في ولا دفو بشته ..

واحس بمنجلك يحصد ورود الشوك
اول ما نما الحدين وشرته..

اباريلك عليمن ليش بعد ارجاك
مجفي وكل سبب للوصل كطعته..

دناك انه الرجيج المايعرف الغيض
لو انه اليسيل الماي من تحته..

انا من اغتاظ افك للغيظ مية باب
واغلك للمراضه وللصلح سته..

انا يسمر نكور ومثل نزر الطير
اول مال لجحت البيك فرزنته..

مو صاحب طويله ولا ثمل بهواك
ولا انت ولام كلبي وصدك والمته..

اذن سيان عندي ان رحت وان ظليت
دامنت اعله هجرك عمر عاشرته..

اذا هذي رغبتك والهجر سلواك
موش انه اليعت بذيال بايعته..

ولانه اليشتري غالي ويبيع ارخيص
ويحط ثمن نفسه بسوك عاطفته..

ولو ادري اتغنــَّـج والغنج مطلوب
بس لعب العواطف فاتي او فتتــّـه..

انا بشرع العشك دين وصلاة وصوم
وبثكل البوارح لو حكم صمته..

وبشرعك شطارة وغالب ومغلوب
وكلمن يرى الناس بعين شاكلته..

اناحزني التلولي اعله المهد الوحيد
ماينشبع منه شكثر ما عدته ..

علامك ما تفرق الچمه عن الچوخ
ولا عمرك لبست الزري وكدرته ..

هو انه الزري .. والعله متونك چيد
بعد ما دار حوله وبله وسملته ..

على الغارب حبلها وروح لا رديت
مليت المسايس ما نفع شفته..

مقفوله وابوه اليدك باب اهواك
لا ابو يوصلك لو تظل بس انت..

أعادة نشر " عشگت الموت "

محسن الخياط السماوي


هويت وما عرفت عليه شيصير ..
و لا فد يوم اشوفن حالي واصحه ..
جبت بيدي الأصيلة للنواعيــــر
وانا من ايدي الظلام الضاع صبحه
وعگب عش الحمامة والعصافير
لفاني غراب لف جنحي اعله جنحه

انا البضلوعي دگيت البسامير ..
لخنجر ما حسبت احساب ذبحه ..
يهلبت انتبه واخذ تدابيـــــر
واسولف عالشداد اليدّي جرحه

انا ايلوموني اليدرون بالصار
وانا فوگ الملامة عاشرت مر
اتاعي بوصله حمرة لطير مطيار
گلت بلـﭼـن يحط وعليه يكسـر
الطير الما يصيد الصيده مو عار
لجن العار من تفلت من الحر ..
ﭼـثير من العشگ جريته مجرار
لگاح بنخلة ميتة شلون يثمر
ونزلت الحس دلو وبصرة البير
العطش يطرحني نوبة ونوبة اطرحه

انا البضلوعي دگيت البسامير
لخنجر ما حسبت احساب ذبحه
بعد يمته انتبه واخذ تدابير
واسولف عالشداد اليدّي جرحه

عشگت الموت سكتة و لا تنخيت
وعبنها الطيبة بيه اضواي يمتد
خشف ميتة امهاته بهيمة ضليت
غلبني الغالبه والبيه يشتد
الوكت من شافني بعكازة رديت
بنى ﭼـالي اعله ﭼـالي وگالي اصعد
واجب ماخذت بس واجب انطييت
وانا ذنبي وفيت الراح والرد ..
والمعزب طردني من المسايير
حويت من الحصاد اتراب رحة

انا البضلوعي دگيت البسامير
لخنجر ما حسبت احساب ذبحه
بعد يمته انتبه واخذ تدابير
واسولف عالشداد اليدّي جرحه

اجيت وطوگ تاليت العمر راح
وخلت بيه المحطة وفاتني الريل
وحسبته يگوم ذاك العاثر و طاح
گلت مركاض هذا وتعثر الخيل
اثاريني برمح من ايـد رماح
اشوف الدنيا ظلمة وما گلت ليل
بعد حگه الـ عليّه توكح وصـاح
مهو الـﭼـنگال ﭼـلب بالزناجيل
وصعب بس انا كسري اعله الجبابير
صدگ سواهه وكتي بلايه ملحه ..

انا البضلوعي دگيت البسامير
لخنجر ما حسبت احساب ذبحه
بعد يمته انتبه واخذ تدابير
واسولف عالشداد اليدّي جرحه

عمآر خضير


انه وگلبي
وچم موعد دفه بخلين وأيد بأيد
انه وگلبي
ولوحدنه ومن ايدي انمسح موعد
ومثل شمعه ومنذوره لدرب عميان
وين الليل بيه يريد

انه مالي سمه ويالناس
محد عذر بيه هلال اسمر لون
من عاشور لاگه العيد

ادور لون لجروحي
وشفت كل لون عني بعيد
اه يهلال يامسرع غروب العيد
گادتني السنين لكل فرح مشلول

مخنوگ وشفت روحي گمر تايه
عله چتاف الگصب مشيول
وجهي من السنين رماد
ماصادفت چف گمره وونيني
يناغي كل مكتول

ادور بالسوالف تاهت حروفي
ادور نسمه بين اوجوه اليمرون ماصحت
شفت تابوت لاخر چف لگه چفوفي

وطحت مكتول بين البلكت وخوفي
بس انه وبلايه عيون تحضني
ضعت بين الشمس والليل وطيوفي
وفشلتي جناح لاح الگاع
ماصحت هلا تكحلني لضيوفي

وصحت كافي وصحيت بوجه كل غيمه
انه وگلبي ومشينه دروب محصوده

وفزيت بتوالي الناس شفت الفزه مريوده

منهد ذاك النهار الطاح من چف الفجر عالگاع بيده الشمس مشدوده
سمعت الوادم تسولف عله جروحي بسوالف غيم وبروده

من عدهه عرفت الناس
تشبهني لسن ووجوه
بس گلوبهم سوده

من عدهه افتهمت الناس
وكت الاه كلمن يلتهي بروحه

من عدهه افتهمت الگمر من يحزن
لوحده يعيش
على وجه الضلام ويرسم جروحه

من عدهه افتهمت السكته للملچوم مفضوحه

من عدهه ولوحدنه انه وگلبي تگاودنه
ومامش للنهار ابواب لا چف الشمس عتنه
وضعنه وجوه غربه بحضن الولايات مبيوعين عالنسيان
لانسمة هوه ونرتاح لاصح گبر يشهگنه

وتوسدنه الحزن تابوت
نترجه الصلاة وشموع
اثار الوحشه التزتنه

وتوادعنه فجر وغروب وي الناس
طشينه الموادع طيب

خفنه نصير عثرة شوگ لو وشلة خطيه
بدرب المتيهين لو طحنه

انه وگلبي مشينه لحد صدى النسيان
غنينه وحفرنه گبورنه ومتنه

كآظم اسمآعيل الكآطع



تهت
ذبني سمه اجناحي ابشبچ غربه
طحت بولاية الغربه
اجر عمري ابجدم حيران
اعت روحي ابجدم تعبان
ينگلني وانگله
بهمة الفحطان

شايل غربتي ابچفي
وشايل دنيتي ابچفي
وشايل غايتي ابگلبي
ادورلهن حياة اتلوگ للانسان
تايه والدرب ما يندل ادروبه
وصفن مثلي
و رمح شايل الخوف بقطعه مكتوبه :
الحچي ممنوع ..!
اهل هذا الدرب خرسان !!
الومي ممنوع ..!
اهل ذاك الدرب عميان!!
وبوجهي الضوه قفـل شبابيچه
وظلام الليل غلف وحشة الحيطان
ذباني ابدرب شاتل رصيفه اسيوف
وسيوف الرصيف اوسادة التعبان
وافتر ...
والعمر بكرة خساره ايلف
وانه ودربي
احس ثگل التعب
حية جزيره اعله الجدم تلتف
احس باجي العزم
گطره ابهبوب
وما رضت تنشف
واشوف الناس بس اوجوه
متخيط حلگها بخوف
ومشبگه الحچي بزنجيل
والدنيا ارگصت للطايح بيده الدف

لا چنها نست
من جلب هذا الدف!
منهو العاش مية طف؟
منهو العلگوا راسه
وبگت روحه نبع
سباحها بگلب الزمن يزحف
بعد عين السواجي
ايصب عله خدود الرمل دمعها
وجرحها من الكبر ينزف
وانه وليلي
وعمر بكرة خساره ايلف
انتحلم بالضوه
وننخه الشمس بلچن تجي ابهالليل
وتخلي الوكت يكشف

وانه ودربي
فرد سچه
وقطار العشگته اميسر
فرد طاسه غريبه ومايه امطشر
تعاتب غيمها الغايب
يچان الغيم مهره امجنحه
ابطاري العطش تعثر
چان الطف يشتم الجفن البعيد
وايمام الجرح
گبل الندب يحضر
وانه وگلبي
بعدنه ابشبچة الغربه
انتحلم بالعلم الابيض عله السده
نربي اظنون
وتصلي الدموع افروض كل رده
وانه وليلي الكبر ذنبه
خنگ كل الضوه ابعيني
ولا فرگس ضوه ابخده
وبعدني ابظنة الرده

اصبر بالعمر ،، تاني
اصبر بالعطش ،، تاني
اصبر بالدرب ،، تاني
ثگل ذنب الظلام
وگاعه جاي ادوس
جاي اتهب مساحي الريح
وتكسر اعناد الباب
وتفك الضوه المحبوس
جاي اتهب هلاهل ليل المعرسين
وترد لجسمها الروس
يمته..
اتهب هلاهل ليل المعرسين ؟؟
وترد لجسمها الروس ؟؟

محمد الزبيدي


الجماد بكونا هم عنده روح
لچن مايعرف يثرثر.. حچيه سكتة..
الباب من اتطبگه حيل يزقفل انفاسه ويموت ويدري هنته!

يبقى جامد،
حتى ماينطبگ مرة الثانية ويجرح العتبة، العتبة بتّه..

الباب يعرف كل بشر
من صوت دگته!
اليعرف بگلب البحر لمّن يطبله
راح يشبگ مايه... بس نظن يفوجه..
الجرف من يبدي يجف اعتبره مثلك
عاشگ وفاگدله موجة..

الحايط يعيش اكثر من البشر
فوگ الگاع هاي،
ايعاند الگمرة وشمسنا ويوگف وينطينا فيّ!
ايبوگ طيف من الضوة ويشعل الظلمة
ويحس انّ الظلمة ضي!

اي يروحي،
ماكو شي بالكون ساكن
كلشي قابل للتمرّد والتحرُّك هو طبع الدنيا هچي!
لچن من طبع البشر ينغر بروحه
ويعتقد بس هو قادر،
يضرب الحصوة بغرابة
ما يفكر ان تكون الحصوة طفلة وراح ترجع لامها تبچي!

مظفر النواب - گالولي



روحي ولا تكَلها : شبيج
وانت الماي
مكَطوعة مثل خيط السمج روحي
حلاوة ليل محروكَة حرك روحي
حمرية كَصب مهزومة بالفالة ولك روحي
وعتبها هواي ....
لا مرّيت ... لانشديت .... لا حنيت
وكَالولي عليك هواي
وعودان العمر كلهن كَضن ويّاك
يا ثلج الي ماوجيت
تعال بحلم ... أحسبها إلك جيّه واكَولن جيت
يلي شوفتك شبّاج للقاسم ... ودخول السنة من الكَاك
يا فيّ النبع واطعم .... عطش صبّير ولا فركاك
يلرهميت ... يا مفتاح فضة ولا رهم غيرك عليّ مفتاح
أجرت لك مخدتي وانطر الشبّاج اليجيبك
وانت عرس الليل والقدّاح
يا هلبت تجي وترتاح ؟؟
طركَــ المسج والنوم ...... طركَــ المسج والنوم
عمر واتعده التلاثين ... لا يفلان
عمر واتعدّه واتعديت
ولا نوبة عذر ودّيت
وانه والمسج والنوم ... واغمّض عود اجيسك يا ترف تاخذني زخة لوم
واكَلك : ليش وازيت العمر يفلان
يفلان العمر ... يشكَر ولك يفلان
وهجرك دم ... كل ليلة اشوفك بالحلم عريس
اكَول اليوم يجيبه .... خلص كَلبي واكَول اليوم
ولا التفتيت ... ولا وعديت ... ولا استخطيت
ولا طارش جذب ودّيت
ولا مرّة شلت عينك تعرف البيت
وكَالولي عليك هواي .... ورحت ابراي وجيت ابراي
حسبالي سنة وسنتين وتلاثة
واشوفك ذاك البكَلبي .... واضوكَــ الماي .. واضوكَك ماي
حسبالي اشوفك ابن اوادم .... يا شكَلك ... موش اشوفك هاي
ولا حسّيت ....... ولا استخطيت
ولا جيت اعله ماي
تبيع بيّه وتشتري بالسوكَــ
لا ما جيت
وكَالولي عليك هواي .. كَالولي ..
كَالولي

بصوت مظفر

زآمل سعيد فتآح



هذا آنه وهذاك انت
تظل بظنوني ذاك انت
هذاك انت ويمر طيفك
واشوف آمالي لو شفته
كبرنا وكبرت الدنيا
بهوانه وكل حلو عرفته
عرفتك جوري لو فوَّح
عرفتك طير من يصدح
ومن حبك غناي انه تعلمته
وهذاك انت

عرفتك وردة القداح برد الصبح جفلها
ومن حبك هويت الكَاع والماي الي يغازلها
شفت بعيونك بلادي
سهل وجبال والوادي
شفت دجلة وفي مثلك
يجود بخير الي ولأجلك
شفت موجاته مثل معاضيدك فضه
تتهادى ويه جاري الماي هلهولة فرح غضه
ومن حبك غناي انه تعلمته
وهذاك انت

هواك انت يذكرني
بربوع بلادنا الخضره
هواك انت الي يسعدني
ويكحل عيوني بزهره
هواك إنت يذكرني بفرات ودجله يوميه
مثل كًلبي ومثل كًلبك تلاكًن صافيه النيه
هواك انت ورد اخضر يمطر وفه وحنيه
هواك انت شتل عنبر يجود بغير منيه
ومن حبك غناي انه تعلمته
وهذاك انت

علي دحام


( ليش ما تحچي الجريدة ؟!! )

البَحر .. جَنَّاز ( الخيال ) !
إلشـايل جنازة ( بريده )

( الفكرة ) تتمثل ( سفينة )
شراعها ( الآه ) ( العنيدة ) ..

( أرخبيل الدم ) كِسر موج البياض
و كاسَر بلونه ( النهايات السعيدة ) !

ساحل عيون ( الضمير )
إتكحّل بــ( عود الثُقاب )
و حِرگ كل ( نظراته ) بيده ..!

النوارس ليش ( يترمَّد ) جنحها ؟
و تكبر بعين ( التوابيت ) البعيدة ؟؟!

يا ( لقاح ) ؟ إيريده ( حلگ ) المُعطيات ؟
حتى يرتاح ( الحچي ) و يطلق ( نشيده ) ؟!!

من نِشوف ( الجام ) طينه ..
( إيلطّخ ) بــ( أم الكلام ) !!
راح نعرف ( ماتت الكلمة شهيدة ) !

راح نعرف شكو ( عاقل )
جرحته ( الكلمة البليدة ) !

عدها نعرف ..
( ليش ما تحچي الجريدة ؟!! )

حسين سعد

چم جرح متوچي يم بابك صرخ :
يَا اهَل الدوه بلكت دوه
ورجّعتهن خايبات
اتبوسها اسموم الهوه
وبوكتها اجدامي گوّه
ترفع الخطوة رَفع ..
وِرجعت للبيت اموتن
ويصرخ 'جويسم' ابراسي :

"ما تاب هَالگو*د گلبي"
"بطل العتب وانچب يَا گلبي"
"امكافف بعد منهم يَا گلبي"

يقبض الموال گلبي
وحسرتي ما تنرفع
چان دخان الجكارة " عَطَب فشلة "
وچان دم اجروحي " كحلة "
وچان خَمري "هَم ثگيل"
وچانت المزّة " دمع "

وانت فوگ الضيم عَلوة
ذكرياتك والتصاوير وسَمر ذيچ الليالي
التمن ابگلبي وتولنّه لَسع
سورَب ابعافيتي جدمك
ويَّ كل رفعة جدم
سبّاح من روحي احسن ينشلع
خوشنَت روحي ابعطشها
وانت نهرين ونبع..
كونك اتحن...
من يجي الليل ويزف نعش الشمع
كونك اتحن...
من تشوفه ايموت گوه
ومامش آه التنسمع
آه يا سيف الهجر لتبطّي موتي
مُر شِبه جدحة وِاخِذ
دمي اعلى حَدّينك لَمِع ....

كتب الشاعر محمد الغريب
عام 1977
عكس دوري

بكل ناعور دار الماي
وانه تراب گام
يهيل ناعوري
وكل عصفور عله وطار
وانه بنص قفص
مسجون عصفوري
وكل شبچه تصيد الحوت
وانه بشبچتي
ما يحصل الزوري
وكلمن حصل الراده
وانه من الطلايب يبس حنجوري
وكلمن شرب چايه وراح
وانه اعله الوجاغ مثلج القوري
وكل ناطور عين الذيب ……
ماتغفه
وانه العصر
كام يغفي ناطوري
وكل بذره صفت شجرة
صفت بستان….
وانه وحيد هاي الناس
يبست ماتت بذوري
عكس دوري .عكس دوري .عكس دوري

وكتب عام 1987
عكس دوري

رحم الله اعلى ابو ايامچ
عكس دوري
ناعور اليهيل اتراب
حمل جمر ناعوري
ولايگدر لحمل الظيم
طگ ومات عصفوري
ومتحمله حياية ماي
شبجه الجابت الزوري
گصب ومشرگ من الدوس
من كثر المصايب صار حنجوري
ورحمه الله على ماي البارد وافيش ….
متخسف لگيته
ومايع القوري…
وزين وچان بس ينام ….؟
تخورس ونطرش ونعمه ناطوري.
عرس مدلل وچانت يبويه ايامنه حلوه .
عكس دوري.عكس دوري.عكس دوري

وكتب عام 1997
عكس دوري

ماظل شي أخاف عليه
وبكيفچ عكس دوري
ستر الله على الجمرات
ظل عودان ناعوري
وطلعت ريحته ولا حيل بيه الدفن عصفوري
وردت شبچتي من الماي
لا حيه ولا زوري
ومن عوزي أعله ابو الفافون
بعته وما بقه القوري
وما ظل عازه للناطور
أشعندي ويظل ناطوري
صابر وانتي التعبين
مطلعيني من طوري
وشما أسرع اتفرين اكللچ…………
عكس دوري.
عكس دوري .
عكس دوري

محمد عبد الكريم



من ابعيد
نجمة تعّبر الشباچ
لــ اخر صوب بالوحشة
والظلمة حزن مايبرد برمشة
واليعثر بلا وجهه
غريب شما تلمة وجوه

والسبگ بحزن امرايته تشربة
والصفنة جسر للتوجعة الغربة

انه هناك ..
ادور بـ الجدايل درب ما مجيوس
واوصل واستحي اندله

غريب الغافل عيونة 
وكبر ساعة گبل ضلة

أمنت العمر ع الطين
واخذني ملامض الحنطة
ويتعده الضوه بروحي
وشني غير الحلم ينسمع بالسنطة

وانت هناك
ويمر الشتة وانده محطاتك
وألمك بالضباب الجاي
مثل هالليلة من نث المطر
باگتني اصابيعك وضعت وياي

جست كسرات روجاتك
قريت چفوف المتيهين
وثگل طعم الوداع
او وحشة الخايف

وشفت كسرات نفنوفك
شربت  السكتة بعيوني
وعثرت بشدهة الحايف

ولميت البگة بروحي
شذرتين بطرف شالك

موسى الحمامي

ملحده تسأل حبيبها
ــــــــــــــــــــــــــــ

- انا كلش خايفة

وماكو شي يخلس ابنادم مثل ظنه

موسى… خاف باجر ماكو جنه !

خاف وحدنا انخلقنا !

خاف من نموت نبرد

خاف مامش روح تصعد

خاف محد…

خاف صدفة…

خاف بس الدنيا عدنه
_________ج

- الخوف تربات السجون

وانتي حرة

الصدفة اذا خلقت الكون

شلون گدرت تخلق عيونج الشگرة !

لا تصدگين بحجيهم

ليلة المحشر تخبل ، والقيامة هواي گمرة

والهوه ينسم علينا ، والمية تگول خمرة

ويمرگ الله

ويبقى كلشي بطرگ عطره

يباوعلنه ويبتسم

يعذر القصر تجاهه گبل لا ينطي عذره

ويصرخ الشيطان كفرة

شلون يتساوى اليعيش عل الكمان وي اليعيش عل المدافع

يبتدي يأشر علينه واحنه نعرفها الاصابع

من نبوس الايد ما ننسه الاصابع

هذا يشرب
ذاك ما سحگت جدامه تراب جامع

ذوله غنوا لازم انصب الرصاص اعله المسامع

لازم ولازم ولازم
لجن سبحانه يخزره

يگول حضروا الحنه لوليدي الأحبه ويدفع من جيوبه مهره…

علي دحام


( غُبشة الميّت حِسابه )

زَعل من ( ريج ) السطور ..
( إيفرفِح ) و يِبسَت ( زَراديم الكِتابة ) !

( الكلمة ) صح ( نورس ) يباغِت كل ( سَواد ) !!
لكن ( إتلطخَه ) الغَرابة !

( الشعور ) إيموت إذا جاسَه ( العِتاب ) ؟؟!
و المُحِب عاش ( بـعِتابه ) !

( الگِيض ) مِن يتعـدَّه ( موسم ) !
ما نــزل عالــ( فَـي ) لُعابـــه !!؟

شويــّة ( مُوت ) و راح بــ( الواقع ) تعيـش !
و ( الجـرح ) مِن يِعدَل ( إيشيعَه ) إلتِهابـــه !!

( الحَدَث صـنـدوق أَسود ) ..
( الگلــب الأبيض ) لازم إيشــد الرِحال !
و لا يحط ( إذنه ) إعله بــابه !؟

كلمــن إبـــ( أذنــه ) گبــر ..
يكــفيلـه ( جيــل ) إمن ( الكــآبة ) !!

كلــمن بــ( راســه ) تعاويـذ الصحــاري ..
تبتلــع ( برزخ ) حياتــه !؟
و تشمر ( الشينـات ) يـم ساحل ( سَرابـه ) !!

عامِــل ( التسويـف ) رَهـَّــــل شكو بالوادم ( صبر )
و الصبر أضحى ( خــرابه ) !

يا ( شريعة غـاب ) ما حِسدَت ( نِفَسْـــنا ) ؟؟!
و يا ( سـواد عيـون ) ما يشبَه ( گلبنــا ) ؟؟!
بـكل نظر نِنشــاف ( غابـــة ) ..!

( الريــم ) هَــد ( محراب ) رِمشـــه ..
و صَـــلَّت إعيـــون ( الذيــابة ) !

نامي يــ( عيــون ) الليالي ..
المـوت راح إيــهوِّد ( الگمـرة ) إعلـه چتفه !
و تِعتـني ( النجـمـات ) للظلــمَة ( برِحــابه ) !!

و ( الجِــفِن ) يمطر ( نَــدم ) و الخَــد ( رعيــد ) !
و كل ضَباب ( الهَم ) يِشِــد حيلـه ( بسَـحـابـه ) !!

و ( غُبشة الميّت حِسابه ) ..

كآمل العآمري



إشتهيتك
إسبعطعش توني إعله ماي الثوب ضگتك
وإشتهيتك
مثل عنگود العنب سچّين گطّعني وأحبك

عشب ليل وگنطرة عيوني إعله مايك
وگلبي سعفه
صلّت بوجهك ركعتين الصبح

مطر غيمة ريش جدمك
والمشي بگاعك فخاتي
يا حلاة الـ مشتها الـ يلهث على نهودك غزال
من تكف حد النبض

مبخوت أصيحن لك يَا هَل مبعد تعال
جيسني وردني بصابيعك سفينة
أشتعل طير إعله خصرك وانطفي بعينك مدينة

أزحف بروحي ورد وآنا سواجي
واصلب بدمي الوكت عمرين اثيّلّك بواچي
وانطرح بيدك گمر واتگبع بليلك حرير

وانحنيلك جلدي غابة
وصوتك مسنبل حدر روحي حمام
أطبگ چفوفك طفل
وجهي شجر مصلوب وعيونك حياة
وروحي وجهين الرمل والنار واشفافك فرات
يا قميص الشوك يل ملتف على عيوني خضار

صدرك بصدري زراگ السما بغبشه
من يدگ وشمه على شفاف النهار

هاك چلماتي عصافير
ونبض گلبي غزال
اتعده بيهن شجرة الدم الـ تفييها سنينك
روحي تتمره الليالي تشوف يسراك الگمر والشمس تفاحه بيمينك

يا سما المحني صدر ام إعله وجهي
الخبز جوعان وحليبك
فرس دم بروحي تمشي

يا حلاتك
ينغسل وجه التعب من يعتنيك
يا حلاتك
وجهك أطيب من خبز حنطه بصريفه

نار أسهرك فوگ جلدي
وينفتح شوگي على جفونك بحر
أعبر بلا صوت روحي
المرمر أزرع وردتين بماي صوتي
أطبع بظهري صليبك
گطرة گطرة سگيني موتي

إذبحني مرتين بسمار الـ بيك
أنبع نفس من يصعد وينزل يشتهيك
يا حلاتك ينغسل وجه التعب من يعتنيك

لفني خيمة وسافر بكل السچچ
تلگيني ما بين الجلد والثوب أخضّر لك براعم
بيدك أحضنّي عشگ موتك
لعب طفلة بجنح فراشه ناعم