الشاعر عبدالله المسعودي - رحمه الله -

كان من أبرز شعراء المحاورة في نهاية التسعينات هجرية... له قصيدة جميلة يحذر فيها لسانه من التعدي عليه وإدخاله في المتاعب.


يا لساني احذر عن فمي لا تعدى
قدام لا اعضك على الضرس والناب
احذر تودي هرجة ما تودى
اذا بدت قالو لك الناس كذاب
اللي تعشى بالكذب ما تغدى
واللي تعالج به من السقم ما طاب
احذر ثم احذر بالردى لا تجدى
حاجتك ما تقضي وسرك مع الباب
من يوم ما يفهم حقيقتك صدى
واصبح يسولف بك مع الناس الأجناب
عز الله اني تبت وابا اتعدى
توبة نصوح عن دروب الخطا تاب
واصدى عن أصحاب الردى واتحدى
خله يقولون العرب ماله أصحاب

📜📜

الشاعر ذياب بن عبود العصيمي:


الشعر ماهز المشاعر إلى قيل
قديم شعر جزل والاجديده
والفخر للي يحكمون التماثيل
سمحات جزلات البيوت الفريدة
ما اعتاد واحدهم على القال والقيل
ويفوز واحدهم بالاريا السديدة

مرثية

قصيدة ( فرحة يتيم )

الشاعر مشعان البراق :


فرحت لك .. وأنا معاليقي حطام
والصدر .. من ما فيه بيّح كنينه
فرحة يتيم .. ليلة العيد ما نام
خالاته , وخواله .. مواعدينه
مواعدينه بشت .. وشماغ بسّام
ويلّعبونه .. في ملاهي المدينه
مانام .. واحلامه تحّراه قدام
كنه يطول أحلامه براحتينه
صبحه تجّلا نوره بعيد الاسلام
وقبل يروح المسجد : ملّبسينه
صلّى وجاء وأمر الله اللي قضى تام
ماهوب داري عنه .. زينه وشينه
بشته عليه .. مهندم ٍ خير هندام
واللي بعمره .. كلهم محترينه
رجع ولكن فرحته ضايعه دام
كل ٍ مشى وأخذ ولده بيمينه
صاروا خواله في نظر عينه اصنام
أحيو بداخله الجروح الدفينه
ولا عنده الا أمه وناب القهر سّام
جاها يبي منها اليدين الأمينه
شعوره اللي حس به مثل الإلهام
وأول سؤال في باله : أبوي وينه ؟
جته تعدي , ماهو تخّطي بالاقدام
وشالته بيديها .. وحبّت جبينه
أبوك : جاء البارح وقبل الفجر قام
وشرى لك ألعاب , وهدايا ً ثمينه
لحظه وهو بين الحقايق والأوهام
والدمع الازرق حاير ف.. مقلتينه
يمّه : ترى مانمت والعالم نيام
ماجاء ..ولا لمست يديني يدينه
مدام رقمه معك من بين الارقام
بأكلمه , يوم إنك تكلمينه !
قالت بدون شعور وإدراك وإلمام
. أبوك ! في تراب القبر دافنينه
العام مات .. ومتّ من موته العام
وكني بعد مامات عني سجينه
أبوك جندي للوطن ضد الإجرام
عطاك عمره دون داره ودينه
كل ٍ عذلها .. بين عاتب ولوّام
تصّبري .. خلي ضلوعك متينه
ماهوصحيح ان الضروره لها احكام
اكبر خطاء يوم إنك تعلمينه
بكره تنسّيه الليالي والايام
هو فيه أحد ينسى حدا والدينه ؟
طير السعد في عالمه مابعد حام
والله يعلم وش تخبي سنينه
أنا كذا ! ساكت وصابر ومنضام
لكن كان الفرق بيني وبينه
الدمع ل.. عيون الأرامل والايتام
ودمع الرجل ذل وهوان وغبينه !

فاقد الشي يعطيه


للشاعر / الحميدي الثقفي

من قال مالك شي من فاقد الشي
ماهو صحيح وفاقد الشي يعطيه
مثل الشجر يعطي لنا بارد الفـي
يعطي الظلال ولاهب القيظ يكويه
مثل القمر يعطي لنا برزخ الضي
يعطي الضيا ومايندرى وش يغطيه
مثل العذاري تسقي النازح المي
تسقي البعيد ونخلهـا ماتسقيـه
مثل الطبيب اللي يداوي عن العي
لكنّ ماهولاقـي احـدٍ يداويـه
عطيتك التحنان من خافقٍ حـي
يعني عطيتك شي انا منحرم فيه
أرويتك ابعضي وانا فاقد الـري
مخفي ظماي وقلبي الحزن طاويه
لي في عيونك لاح مستقبلٍ جـي
حلمٍ بعيد ٍ .. ساهر الليل يرجيه

قصة عايش و نورة


قصة رائعه وقديمه



قصه حقيقه حصلت في قريه قريبة من مدينة الرياض في السعوديه قبل ان تسمى الرياض.
كان هناك شاب اسمه عايش يعيش في هذه القريه وكان يحب بنت اسمها نوره ,
وفي يوم من الايام ذهب عايش لكي يخطب نوره ولكن ابو نوره رفض لأن عايش كان على قد حاله وما عنده حلال ولا عنده فلوس كثيره,
فشاف عايش نوره عقب ما طلع من عند ابوها وقالها :نوره انا راح يصير عندي فلوس وراح اشتغل وراح ارجع اخطبك واتزوجك,
ونوره كانت تحب عايش فوافقت انها تنتظره.
سافر عايش الى منطقه مرموقه في السعوديه وصار يشتغل في التجاره ومرت الايام وصار عنده فلوس
ورجع لقريته عشان يطلب يد نوره من جديد ويتزوجها ولكن لما رجع القريه تفاجى انه نوره تزوجت لان ابوها اصر عليها انها تتزوج
وكان عندهم البنيه لازم تتزوج اذا جاها شاب قادر على الزواج. وتفاجى ايضا انها مب بس تزوجت بل هاجرت الى مكان ثاني مع رجلها ولا احد من القريه يعرف المكان.
فقام صاحبنا عايش وقال بيت شعر (ابنشدك عن نور القمر وشلون نوره) وقرر يسافر ويدور على نوره. ومر على القريه الاولى وراح وسلم على امير القريه وقاله انا عندي لغز واللي يجاوب عليه بعطيه كل حلالي فقاله الامير وشو اللغز قال(ابنشدك عن نور القمر وشلون نوره؟) احد الجالسين قال له ابيض واحد ثاني قاله اصفر وكل الاجوبه غلط محد عرف حل اللغز.
فسافر الى قريه ثانيه وطرح عليهم نفس اللغز ومحد عرف الجواب راح للقريه الثالثه وكان تعبان من السفر فقالهم انا عندي لغز واللي يعرف يحله بعطيه كل حلالي قالهم (ابنشدك عن نور القمر وشلون نوره؟) محد عرف الجواب فقالهم انا اليوم بنام عندكم لاني تعبان واللي يعرف الجواب يقوله لي الصبح
ومن بين الحضور كان زوج نوره موجود فرجع للبيت وقالها :نوره !! قالت له :سم ؟ قال: جانا اليوم واحد خبل يقول عندي لغز واللي يحله بعطيه مالي وحلالي كله, فقالت له: قولي وشو اللغز يمكن احله قالها(ابنشدك عن نور القمر وشلون نوره؟) فبتسمت نوره وقالت له :عرفت الجواب قال لها :صدق؟ قالت له :قوله(مثل السمك في البحر وشلون عايش؟) فقام الصبح رجل نوره وراح وقاله: انا عرفت الجواب فقاله :وشو الجواب قاله(مثل السمك في البحر وشلون عايش؟) فبتسم عايش وقاله هذا مالي وحلالي وسلملي على نوره ,,.

علاقه الناقه بصاحبها ....


جرت على رجل من قبيلة الدواسر اسمه عبدالله بن مفرح ويلقب عبدالله الشمالي .......كان عنده ذلول طيبه , أحسن عسفها واسماها (الهدية)وهي سريعه في الجري , ومحبه الرجل لناقته غير مستغربه وكذلك موالفتها له , وايضا فابل تعرف صوت صاحبها وتحن عليه

واصيب عبدالله الشمالي في مرض الجدري , ولزم الفراش قرابه شهرين وكانت الناقه قد احست بما اصاب صاحبها فاخذت تاتي وترفع رواق البيت براسها تطالعه وتحن .......

وبعد مده توفى صاحبها فكانت الناقه كلما ورت تاتي للبيت وترفع الرواق براسها وتنظر الى مكانه خاليا ثم تسري فكانت ابنه الشمالي تعقل الناقه حتى لاتسري في الليل وظلت الناقه نصف شهر وهي تهجرع بالحنين ....

وكان عندهم جار اسمه (حصيبان) من قبيلة عنزه او قظته ذات ليله وهي تهجرع بالحنين .. فأثارت الاحزان في نفسه وذكرته بجاره المتوفي
فقال....



مل قلـب هيضـه حـس الهديـه
هجرعت بالصوت من عقب الشمالي

ياذلـول القـرم حمـاي الـرديـه
اصبري عقبه على سقـم الليالـي

ذكرت بالحـب مـن عينـه شقيـه
ذاكـر فـي نجـد خـلان وغالـي

عقب فقـده مـا توالـف للرعيـه
تطرده ساره علـى روس المفالـي

عزتـي للقـرم حطوالـه بنـيـه
عزتـي للقـرم مـن قبـر هيالـي

عادتـه بالكـون يثنـي للـرديـه
ينسـم الحفيـات ريـف للهزالـي