يشيخة لوما تكوللنا جان شصار بينا
طبعًا فد استفزتني هالتغريدة جدًا

يعني الدين اللي افضل الانام عليهِ الصلاة والسلام تعذب ديوصلنا شاف اهله يموتون وأصحابه واحبابه يتعذبون وهو شخصًا تعذب وتعب وشال همنا شلون ديوصللنا الدين وينصره وتحمل ما تحمل وكُلنا نعرف السيرة الحد الادنى خنگول من سيرة النبي عليهِ افضل الصلاة والسلام في سبيلنا أحنا أُمة محمد
هذا حالنا !!!وطبعًا هسه الواحد شيگول من يقرا بلسم بطرانة دتحكم من حجي شخص واحد

بس اصفنوا صفنة سريعة على نفسكم وعلى اهلكم واحبابكم وعلى البيئة اللي انتو بيها وجربوا
اسألوا نفسكم سؤال بسيط لو هسه الرسول عليهِ الصلاة والسلام عايش ويانا وديراقبنا وديشوف حالنا حيرضى؟

فد انقهر والله من اشوف هيج الوضعية يعني والله توصل لمرحلة انهُ ابچي جديات يعني العالم وين تخيلوا طفل اسأله وهو عمره اول متوسط اكله لا تسوي هيج (جان ديتنمر على طفل أصغر)
أكله لا تتنمر هذا الفعل رب العالمين ميحبه ولا من صفات المُسلم وحتتسجل عليك ذنب

الرد الصادم بئه
بلسم شنو يعني ذنوب ؟ والله احس ارد احجي وارد عليه بعد ما اكدر طفل عمره ١٣سنة ما يعرف الذنب ؟شنو والحسنة والسيئة والحرام والحلال البيسك خنكول اللي تناسب عُمره
ادري الاهل شديسوون؟

طبعًا هسه هذا حال المجتمع ان جنرل مو حالات فردية انهُ يلا من كُل ألف واحد لا لا هذا السائد
اسأله عن اغنية كذا يسردلك ياها سرد
اسأله عن انواع البلي ستيشن وشركات الاجهزة الالكترونية حافظهم صم ومميزات كل جنريشن ووو زين تكول لأمه يابه هذا لا يفقه في الدين شيئاً صلاة ميصلي
تكلك ها بعده صغير !!!
هنا بلسم تنهار والا شوية اكوم اجر راس أمه ارگعها بالميز. بس ما باليد حيلة😂😭

الاجابات تستفز والله يعني جملة بعده صغير تستفزني حيل يعني شمنتظرين لما يصير عمره عشرين سنة ويگوم بصعوبة يلتزم ويفلت ؟
التعلم في الصغر كالنقش على الحجر اغلبنا الاشياء اللي تعلمنا عليها واحنا صغار گدرنا انهُ نحافظ عليها اكثر مما احنا كبار

اما الجهة الأخرى فئة الشباب العظيمة
الحد الادنى من انهُ كونهم مُسلمين ما مسوي جديات والله
الصلاة بس يعرفون الجمعة ويصلوها بالجامع وهاهي باقي الايام اعفاء 😂
عمي شسالفة ترا اني مو شخص ملتزم وهيج شي عميق ودانصح لا ابد
بس جديات هاي البديهيات المفروض يعني ع الاقل ها ملتزمين بيها
انتو دتتخيلون واصلين لمرحلة صديقتي متقدملها واحد تكلي بلسم يصلي ويصلي الفجر بالجامع وحاستها فد ميزة لا تُشترى بالذهب!
طب ي بنتي ما دي البديهيات يعني ما مسوي فد انجاز يُحتسب انهُ يصلي
بعدين اتذكر الحقبة اللي عايشين بيها فحقها خطية

جديات من تركز تصدع وتتعجب
تدرون حتى الشغل هسه ميردون اللي لابسة حجاب ولبس طويل وتعاملات بما يرضي الله وحدود وكذا وشاطرة ولا يعلى عليها
كُلما انتِ سافرة فرصتج اعلى
و حسابج عام وعندج متابعين فرصتج أعلى
يعني من تصفن كُلشي بالمگلوب

ف الحمد لله انهُ مهما بذلنا بالدنيا ف محنوصل لا للسعادة اللي نريدها ولا للراحة اللي نريدها الحمد لله انهُ هي دنيا تضيق وتضيق على البشر الحمد لله انهُ هي دنيا مُتعبة وتبقى تنسحل بيها
كُل هذا بيها حكمة ربانية انهُ منتعلق بيها
الهدف الاساسي انهُ منتعلق بيها
الحمد لله انهُ هي دار فناء والمستراح في الجنة والله

بس تحزن على حال الأمة أُمة محمد خير الخلق والله العظيم الواحد بينا لو بس يكعد يفكر شوية. انهُ الدين وصلنا على طبق من ذهب
لا احد يعذبنا لانهُ نصلي ولا يجلدونا ولا يحطونا بنار ولا يجوعونا
ولا معارك وقتال وهالسوالف ولا هالعذاب اللي نعرف شلون تعذبوا بي الصحابة
ويدرك نعمة انهُ الله خلقنا مُسلمين عرب نگدر نقرا القرآن ونگدر نصلي
الاعجاز بلغتنا بعد شنريد

احنا وصلنا الاتعس حقبة اعتقد
العالم تنطي رأيها بالدين
انت مجرد عبد فقير ذليل لله تعالى ان يشأ الله تعالى ينسفنا نسف ويأتي بقوم يحبهم ويحبونه
وما ذلك على الله بعزيز يعني ما اعرف العالم متخاف ؟
وفوك ما تنطي رأيها يحللون ويحرمون بكيفهم يعني اني ما اسوي هالشغلة وما التزم بيها
ما اكعد شلون ما كالت هالبنية فوك انهُ ادورها بما يخدمني وانكر انهُ هالشي الزامي نسوي

يمكن كتبت هواية والله لو اكعد لباجر حجيي هواية ارد اكتبه بس يلا نكتفي لهنا سووا سگب مو ضروري تقرون اكيد😔😂

- الرساله ؛ عيني دكتوره بلسم مفهمت ليش نسوي سكب🤣
انا استمتع بكتاباتج ومرات ارجع ع القديم تدرين🤏🏻🤎كومه حب الج ولعقلج الواعي والله يزيدج فهم وعلم وبصيره 🤎

هسه انتو ليش تريدون تبچوني تالي الليل😭😂💙💙💙💙💙💙💙💙💙

فدوة لعمرج والله احبكم جماعة سمسم دايمًا مسجاتكم تغيير مودي الله يحفظج يحبيبتي💙

هذا الدُعاء تقرا عادي
بس من تقرا القصة اللي صارت وليش النبي عليهِ افضل الصلاة والسلام دعى بهِ يعني حيل حيصير مُختلف حيل 😭💙

إِنَّ العُيونَ الَّتي في طَرفِها حَوَرٌ
قَتَلنَنا ثُمَّ لَم يُحيِينَ قَتلانا

يَصرَعنَ ذا اللُبَّ حَتّى لا حِراكَ بِهِ
وَهُنَّ أَضعَفُ خَلقِ الله أَركانا