حرگت و فلشت ..و بعدين ؟
من راح يرجع يبنيهن ..بفلوس منو ؟
ليش بعدكم مصدگين بمواقع التواصل ؟
خلص هاي هي ؟
الاحزاب ماعدها جمهور ؟
چا منو اللي صعدها قبل ؟
روح سويلك تشكيل سياسي و اكسب الناس حتى تقلل من نفوذ الاحزاب بالسلطة ..لا تضيعون تعبكم بالبلاش

تعرفون هذا منو ؟
هذا اللي چان ينزل تغريدات فرح بعد كل انفجار !
هذا اللي چان يهوّس لد١عش !
هذا اللي ما اخذته الغيرة على محافظته !
هسة جاي الگواد يريد يسوي ميليشيات جديدة بداعي حماية المتظاهرين !!

*الگواد : القوّاد يعني اللي ماعنده غيرة على اهله .

@tamimali98

⭕️ كل واحد تشوفوه ناشر : الحسين ما يشوف الستوري ، جاوبوه كالآتي :

لعد الله لازم موبايله بأيام الجمعة و يشوف ادعيتكم و "الجمعة مباركة" ؟

لو عيسى المسيح يلزم الايفون مالته بالكرسمس و يشوف ستورياتكم من تدگون و ترگصون ؟

الحسين وحّد ؟



و اذا ما فاد وياه ..حولوه الي ..

@tamimali98

القنوات الفضائية نعرف المن تابعة و عددها قليل نسبيا لان تكلف هواي و بيها مستمسكات قانونية و رخص بث فبالتالي نقدر نعرف منو صاحبها و ايضا نقدر نعرف خطابها و شتريد من عدنا ... يعني نعرف الشرقية مال سعد البزاز و دجلة مال الكرابلة و افاق مال حزب الدعوة الخ ... صفحات التواصل مو هيج ما بيها اي تكلفة و لا مستمسكات و اشخاصها غير معروفين و قد تكون حسابات وهمية و ممكن نفس الشخص يسوي 100 صفحة و يكتب اي شي و انت كمتلقي تشوفهم هواي ... مواقع التواصل مجرد مواقع تواصل لا تكبرون حجمها و تخلوها دينكم الي تاخذون منه ارائكم و تصدقون شنو بيها و لا كثرة الاصوات تعني شي لان اسهل شي بالدنيا تسوي صفحة و لا تخلي عدد المتابعين يغرك ترى تمويل بسيط يجيبلك 100k او مليون.. مو معناها اذا لقيت فد 5 صفحات متابعيها بمئات الالوف و الملايين معناها تحجي صدك و اذا لقيت 5 صفحات كل وحدة شكم الف معناها كذب او كلامها غير معتبر ... العدد تقدر تشتري ترى ماكو اسهل منها ... كافي نفكر مثل قطيع الخرفان شنو اكو بالصفحات نصدك لا كثرتها تعني شي لان اي واحد يقدر يسويها و لا عدد متابعيها تعني شي لان تقدر تشتريهم باعلانات تمويل .. خلي عدنا شي اسمه التفكير النقدي و التفكير خارج القطيع لان بس الخروف يفكر وية القطيع و انا ارفض اكون خروف بعد بقت يمكم.

#نريد_شعب

⭕️ اذا شفتوا واحد يكول :
كافي كل سنة تعيدون نفس الحچي بمحرم گلوله :

كل سنة نگعد بنفس المجالس
كل سنة نلبس نفس الملابس
كل سنة نعيد نفس النعي
كل سنة نعيد نفس اللطميات
الناس صارلها ١٤٠٠ سنة
تحيي القضية بإستمرار
و احنة بالعراق صارلنا ١٧ سنة
نحيي القضية بشكل واضح للعالم
و يجي هالزبالة يكتب هيچ !!

تخيّل بعد كل هذا الإحياء المستمر
هالزبالة و غيره يدرون انه اكو ناس
راح تسمع الهم ! ف كتبوا اللي كتبوه
لعد اذا ما نستمر نحيي شيصير ؟
شيكتبون ؟
شيلعبون بالتاريخ بعد ؟
وتكلي ليش تحيون كل سنة ؟
نسويها مونديال كل ٤
سنين ؟


@tamimali98

جزء كبير من المدونين والحالمين بوادي السيليكون الأمريكي لايهمة من "الاحتجاجات الشيعية"في وسط وجنوب العراق منذ 1/10/2019 ولليوم،، الا زيادة مستوى القتل والعنف والفوضى وكره إيران! أما باقي متطلبات الإصلاح التي ثبتت آنذاك لا قيمة لها عند هؤلاء!،، فهم بالنتيجة لاعقي أحذية من يدفع أكثر،، لا أكثر!!....


-منتظر الموسوي

قناة الحرة و جريدة الشرق الاوسط وحدة تگول للثانية : أني أگوّد اكثر منچ ..

🔺 هل تعلم ما هو سبب خسارة نادي باريس سان جيرمان اليوم ؟

الجواب سهل و بسيط :

لأن مالك نادي باريس هو "ناصر الخليفي" قطري ، و قطر حليفة ايران و الدنيا محرم ، زحمة يحتفلون .


ها استغربت ؟ 😂😂

ليش ؟

هذا منطق هواي مدونين و صفحات بمواقع التواصل 🤣


@tamimali98

*⭕️ ملحوظة مهمة : اني متابع هواي قنوات من مختلف الإتجاهات السياسية ، لمن اسوي اعادة توجيه لقناة او انشر قناة معينة على سبيل الإعلان فأني لا اتبنى كل منشوراتها ، اتبنى فقط ما أنشره او اعيد نشره .

⭕️ ملاحظات :

هالسنة محرم يختلف هواي عن السنة اللي راحت فشفت اكو هواي أمور تستحق الواحد يسولف بيها جمعتها بهذا البوست :

١.. ما اعرف ليش احِس أصحاب المواكب و مجالس العزاء يحسّون انه عيون العالم عليهم ! لهذا اقاموا الشعائر بصورة جداً لطيفة و حضارية و هم ملتزمين بالوقاية .

٢.. صعود دكتور جامعي للمنبر حركة جداً سخيفة بصراحة ؛ لأن المنبر يصعده الخطيب مثل ما اللي يدرّس بالجامعة هو الدكتور ، هذا اشبه بالتطفل و چان المفروض يلزم المايك و يحچي بدون ميصعد المنبر .

٣.. هالسنة طالعة مودة جديدة و هي انه "الحسين ميشوف ستورياتكم" و كأنما الله يشوف الستوريات ، او عيسى المسيح يشوف الاحتفالات مال كريسمس .

٤.. كل سنة اكو ١٠ ايام مال محرم لازم يتم التهجم على شعائر الشيعة بطريقة تحسسك اكو تعمّد و تخطيط لهالموضوع بشكل سنوي ، لا الطرف المهاجِم يبطّل و ييأس و يعرف انه من مئات السنين الهجوم مستمر و لا الطرف المُدافع يفهم انه هاي محاولات نفخ ب"گربة مزروفة" .

٥.. اكو شي كلش مهم انتبهت له هالسنة ؛ مو كل الناس اللي يقيمون الشعائر و هم مو خوش اوادم دافعهم الرياء ! يا اخوان اكو حُب بالموضوع ! شگد ما الانسان سيء و مو خوش ادمي بس تلگاه هو يحب الحسين و مو هدفه الرياء غالباً مثل اللي يجي من البصرة لكربلاء مشي ..هذا يدور رياء ؟ هذا يحب ! بس يمكن ما مقتدي .

٦.. يفرحني من اشوف نفس الشباب اللي طلعوا ضد د١عش و نفسهم طلعوا ضد فساد السلطة بإنتفاضة تشرين و نفسهم تكافلوا و ساعدوا المحتاجين و نفسهم اليوم يقيمون المجالس بشكل حضاري مرتب ..ذولة يحسسوك اكو امل ..يحسسوك انك شعب حَي .

٧.. شكد صارت انقسامات بالفترة الاخيرة بس بدة محرم احسها هواي قلّت و راحت ..يا عمي ركزوا على المشتركات و عوفوا اللي يفرقنا بدون تعصب .

🔹اي ملاحظة أثارت إنتباهك/چ ؟


@tamimali98

⛔️⚠️🚫

اكو موضوع شوية بيه حساسية و طبيعي ينشتم و يتخوّن (حط الف خط جواها) اللي يسولف بيه بس خلي نجرب بلكت يكون النقاش هادئ و هادف .

قضية "ربط ثورة الإمام الحسين بإنتفاضة تشرين الأخيرة او أي حراك ثوري إحتجاجي" :

لا شك أن الإنتفاضة الأخيرة هي إنتفاضة ضد الظلم والفساد اللي بالسلطة و لا شك أنه هي حق و لا شك انه سقطوا شهداء ابرياء هواي بس يواش علية ، مهما كانت محقّة و هدفها رف الظلم لا تربطها بثورة الامام الحسين . الامام ثار بزمن مختلف ، لغاية مختلفة ، لتكليف إلهي .

ثورتنا اني وياك ضد الظلم و الفساد نعم ، بس مو كل ثورة ضد الظلم هي تشبه ثورة الحسين (ع) ..نعم اني وياك نريد و لازم نقتدي بثورته : لازم اللي ما يريد يطلع ويانا نگله روح براحتك مثل ما الامام گال لاصحابه روحوا براحتكم .

لازم واحدنا يصير مثل العباس ما يبيع اخوه و امامه لإغراءات الشمر (او الاحزاب او الجهات الخارجية) نعم هذا مطلوب جداً ، الإقتداء مطلوب ، التشبيه خاطئ ، لمن تشبّه لازم تملك نفس المقومات و نفس الغايات .
اليوم ماكو يزيد العصر و لا حسين العصر ولا مختار العصر 😉 .

لازم اني وياك نثور وحدنا بدون ما نشبّه ، نقتدي بس ما نشبّه ابداً لأن احنة الخسرانين ..نثور وحدنا و نسوي ثورتنا نموذج خاص حتى باجر احفادي و احفادك يكولون خلي ثورتنا تكون من انتفاضة تشرين مال اجدادنا .

ثم اكو شي مهم ؛ الامام رمز ديني و ثار لقضية دينية و للحفاظ على بيضة الإسلام ، ما ثار للجياع للمحرومين او ضد المحتل ! نعم نتائج ثورته چانت مرتبطة بالمجتمع لأن اصلاً الدين مرتبط بالمجتمع ، شئنا أم أبينا .

لهذا ارجع و اگول ، خلي نقتدي بس ما نشبّه .

لا تفشّر ❌ ، لا تخوّن ❌ ، لا تغلط❌
فكّر ✅ ، و اذا اني غلطان اتقبل فكرتك .


@tamimali98

🔺شوف عيني ، اللطميات من إسمها جاية من "لطم" و اللطم يكون بسبب الشعور بالحزن الشديد لوقوع مصيبة ما ، متفقين هسة .

لمن الرادود بدل أن يقرأ لي المصيبة يسولف لي سياسة راح يكون اللطم بسبب تعديلات الدستور ؟ لو قانون الإنتخابات ؟

🔺نعم ، اني اتفق و بشدّة أنه الرادود يستلهم قيم ثورية و أخلاقية من قضية الإمام الحسين و يربطها وية واقعنا حتى نقتدي بيه ، مثلاً يگلي انه الامام من شاف نفسه قلّة ما گال اني خطأ لأن الاكثرية ضدي .

او يكلي الفاسد مهما كثرت قصوره وفلوسه يوگع ، يكلي العباس ما باع القضية لمن دعاه الشمر حتى يعوفوها ، يكلي عمر ابن سعد ما حصل لا دنيا ولا آخرة لمن خذل القضية الحقّة.. و و و الخ .

🔺الشغلة الثانية ، اليوم المجالس تجمعنا كلنا احنة المختلفين بتوجهاتنا .. اذا الرادود داس زايد احتمال باجر يكومون اله اثنين ينزلوه من المنبر يبسطوه لأن لمح بكلامه على جهة يوالوها ! .

🔺الشغلة الثالثة ، اللي ميريد الدين يطب للسياسة شلون يقبل تطب السياسة للدين و للشعائر الدينية ؟ فالانسب تكون قضايا اجتماعية مو سياسية ، او على الاقل تكون خطوط عامة مقتبسة من ثورة الامام .

⚠️هذا رأيي ، و اكيد قابل للتغيير لأنه يقبل الصح و الخطأ .

@tamimali98

هكذا قتلوا صفاء

لم يمت الرجل الذي قرر القفز من هامش الصفحات لأعلاها برصاصة قناصٍ مأجور او بقنبلة قذفها ذو قلبٍ أسود -كما يرتدي- ، بل قتله آخرون و ما زالوا ، و هم :

الأول : إستغل شعبية الشهيد و صدّر نفسه أنه المحب المدافع عن الحقوق لينفذ الأوامر الإعلامية الصادرة من العم الأمريكي .

الثاني : الذي قرر نشر صور ومنشورات صفاء الخادشة لمشاعر ملايين العراقيين كإمساكه بالمسبحة و كأس الخمر ، أو شرب الخمر على سجادة صلاة و مثيلاتها .

الثالث : أحمق ؛ أراد أن ينفع فأضر ، كالذي يرسم بحلاقته لرأس أحدهم وجه الشهيد صفاء ! .

الرابع : أحمق آخر (وهذا أكثر حمقاً من الأول) استفز مشاعر الكثيرين حين يقرر أن يقرن الشهيد صفاء برمز ديني مقدس كأبي الفضل العباس .

الخامس : أحمق ثالث (وهذا أكثر حمقاً من الأول و أقل من الثاني) إفتعل كذبةً كبيرة بأن العتبة الفلانية لم تسمح بدخول المتظاهرين لحملهم صورة الشهيد .

السادس : الذي كان سبباً في أن ينفر الناس من اي ذكرٍ لإنتفاضة تشرين بسبب تصرفاته الطائشة كمحاولاته إستغلال الشعائر الدينية لإثبات موقف او رأي لا يتفق عليه كثيرون الذين يودّون ممارسة شعائرهم بعيداً عن أي حدث آخر .

السابع : كل عميل للجهات الخارجية او لأحزاب السلطة أساء للإنتفاضة و أفقدها شعبيتها و لم يكتمل بسببه -و أمثاله- طريق الشهداء ؛ صفاء و أخوته .

صفاء لم تقتله رصاصة أو قنبلة ، بل قتلوه هؤلاء -وما زالوا- فإحذر إن كنت محباً له أن تقتله بفعلٍ أو قول او منشور او تعليق ، إحذر الصعود على أكتاف الشهيد ! ستُرهِق أكتافه ، و ستسقط ؛ لأن الشهيد العراقي "اله حوبة" .


@tamimali98

منو تصدگ ؟ و شلون ؟

🔹الإعلام بكل العالم تسيطر عليه مؤسسات تابعة لرجال أعمال او سياسة كبار يملكون أموال هائلة و عادةً ما يكونون يهود (أدخل على أشهر صحف العالم و شوف منو مالكيها) ، المهم تقريباً ماكو وسيلة إعلام معروفة (تلفزيون او صحف او مواقع ) ما تابعة لجهة او شخص او حزب .

🔹زين منو نصدگ ؟ اذا كلها تشتغل لأجندة تملكها
هنا انت محتاج أدوات تتعامل بيها وي كل خبر (اذا انت تدور حقيقة) :

اولاً ..تدور على دليل بنفس الخبر ..اذا اكو فالحمد لله ، ماكو ؟ تنتظر .

ثانياً ..تشوف القناة او الصحيفة او البيج عدهم سوابق بالكذب ؟ هم مچذبين قبل بخبر بس حتى ينفذون الاجندة ؟ لو لا ؟

🔹ثالثاً ..تشوف الدوافع شنو ..مثلاً : لمن قناة الانوار ٢ تنقل خبر يدين امريكا المفروض انت ما تقبله رأساً ، ليش ؟ لأن هاي القناة هي اصلاً ضد امريكا ف تنتظر وسيلة إعلام امريكية تنقل نفس الخبر او وسيلة إعلام اوربية مثلاً تنقل نفس الخبر حتى تصدگه .

🔹ونفس الشي وي اكبر البيجات بالمواقع او المدونين الكبار (ما راح اذكر اسماء خشية التبعات القانونية) لمن تنقل خبر يدين ايران او المحور ، المفروض انت ما تصدگه رأساً لأن ذولة اصلاً ضد ايران فتنتظر وسيلة اعلام قريبة من ايران او المحور او وسيلة اعلام شبه محايدة حتى تصدگ بالخبر .

🔹هاي اذا انت تدور حقيقة صدگ ، و اصلاً ما مجبور تصدگ الخبر او تنكره بسرعة لأن المفروض قناعاتك و افكارك ما تبنيها على أخبار و بس !

@tamimali98

حتى تعرف نفسك عايش بغابة واحد يريد ياكل الثاني بيها ، آخر شي ممكن تسمعه بهاي الغاية هو حرية التعبير و الرأي الآخر .