قالت لأختها وهي بتتكلّم
عن العلاقات السامة Toxic Relationships:

🥀صحبتي كلما تسمعني بتكلّم بـتفاؤل وبحكي عن طموح
بتحاول تكسّر مجاديفي
وتحسّسني إنه مستحيل أعملها

🥀قريبتنا لمّن تعرف
إني بادية بزنس أو كورس أطوّر بيهُ نفسي بتخوّفني
وتصعّب علَـي الموضوع
وتذكُـر لي التوقّعات السيئة وإنه ده ضياع زمن ساي!

🥀بت أهلنا كلما تشوفني
تعلّق لَي على وزني الزائد وشكلي اللي ما عاجِـبها!

🥀جارتنا بتطلب مني المساعدة في كل حاجة في حياتها وبتستعين بَي في أي شي
وأنا ما بقصّر معاها لكن أول ما أطلب منها المساعدة
بتعتذر في كل مرة
وما حصل وقفت معاي في حاجة حقّتي!

🥀خطيبي دايمًا بينتقِدني ويطلّعني غلط حتى لو أنا صاح
بحاول يقلّل من مكانتي
ويحسّسني بالتقصير وعدم الإهتمام، مع إنه
الحاصل عكس كده تمامًا!

أختها ردّت ليها :
أي زول تحسّي بيهُ ساعي يحسّسك بالنقص ويقلّل من مكانتك
وما بقدرّك ولا بقدّر وجودك
ولا بقدّر يدك اللي بتمدّيها ليهُ، وأي إنسان بحاول يخوّفك من بكرة و ما يبقى ليك سنَد

ديل كلهم أبعِـدي عنهم
وأبعِـديهم عن بيئة حياتك، لأنه السلبية مُتعِبة و مُعدية
فأفضل حل إنك تبعدي
وتحاولي تقرّبي من الناس الإيجابية اللي بتدعمك
وتملاك تفاؤل وأمل كتير

لازم ندّي روحنا حقّها ومكانتها، نريّح قلوبنا ونطمّنها بـ إنه
نخلّيها تعيش وسط الناس الحلوة
وبتحب ليها الخير، نضوّي قلوبنا عشانها هي في الأول
وعشان تنوّر
للحولينا بالإيجابية وتقديم الخير

الناس السلبية نكون حاسمين معاها، نوقّفهم باحترام
على مسافة كافية تمامًا
لا نتأثّر بيهم ولا نركّز معاهم كتير!

فاللهم قلبي لا يمسّه ألمٌ ولا ضِيق، قرّب إلينا مَن تهمّه ساعدتنا وتقدُّمنا في الحياة، وأبعِد عنا كل شرّ و أصحاب النوايا السيّـئة .

ممكن نصلّ على الحبيب! ♥️
#تيسير_الصادق

ضحكتوا في الزلزال ولا لِسه ؟

الزلزال ده آية من آيات الله تعالى
زي التنبيه لينا
عشان نتوب
ونرجَع ونراجِع نفوسنا وأعمالنا

عشان نوقّف المعاصي والذنـوب
المُحيطة بينا في كل مكان

التبرُّج اللي بِقى المُنتشر
كأنه حاجة عادية في الواقع والمواقع

الكلام الفـاحش والمُعاملة السيّئة
بين الناس
وفي تعليقات الفيس والواتس وكل
وسائل التواصل!

وحدة عايشة في مصر
قالت لي
لحظة الزلزال الفات اللي قبل كم يوم داك
من الخُـلعة
والخوف
جريت خلّيت ولدي عُمره شهرين راقد في السرير .

ما اتذكّرته
إلا لمن شفتَ ولد جارتي أمه شايلاهُ 🥺

ذكّرَتني يوم القيامة
كل زول حيجري ويقول نفسي نفسي
لا حتتذكر أمك وأبوك ولا طفلك ولا أخوك

الزلزال جاء تاني في مصر قبل ساعات
ولسه الناس بتضحَك!

فاللهم اغفر لنا وارحمنا، يسّر برحمتك أمرنا وتُـب علينا، ألّا تجعل الدنيا أكبر همّنا فتُنسينا الآخرة، ولا تُزِغ قلوبنا بعد إذ هدَيتنا، وحَسّن خاتمتنا وارزقنا أعلى الجِنان.

ممكن نصلّ على الحبيب! ♥️
#الزلزال
#تيسير_الصادق

قبل ٩ يوم
صحبتنا ولدت بيبي ودخّلوهُ الحضـانة

الدكاترة قالوا ليها
حنخلّيهُ راقد
في الحضـانة لكن نسبة إنه يعيش ضعيفة جدًا!

بكَت واتجرّسَـت
واتصلت بينا يوم الخميس الفات تكلّمنا
قلنا ليها :
بُـكرة الجُـمعة يوم مُـبارك فيهُ ساعة إستجابة
خلّي يقينِـك قوي
و ربنا ما حيخذلِـك حاشاه ♡

اها يوم الجمعة بالليل رجعَت لينا
بمكالمة
أول ما فتحنا الخط نسمع الزغاريد 😁
اللهم بارِك

قالت لينا :
ولدي كويّس
الحمدُلله وخلاص خرّجونا البيت ♥️

بعد بارَكنا ليها
حكَـت
مما صلّوا عصر الجُـمعة قعدنا
أنا وزوجي نصلّي على الرسول ﷺ
وندعي
لحدي ما المـغرب أذّن

وبعد العشاء جاء الدكتور قال لينا
قـوموا جـِيبوا حلاوة
وزّعوها
ولدكُـم بخير
تقدروا تسوقوهُ معاكم البيت ♡

فاللهم آتِ كُـلًا منا ما يرجو ويتمنى، نسألُك مافي قلوبنا وأكثر، أن تجبُـرنا في الدنيا وتُسعدنا، وتجعلنا في الآخرة من أهل الجِـنان .

ممكن نصلّ على الحبيب! ♥️
#الدعاء
#الجمعة
#تيسير_الصادق

ما لاحظتوا
لمّن ننتظر اللبن عشان يفُور ما بفور ؟

أول ما نتلفِت يقوم يفور فجأة!

نفس الشي = الصّبر 🌱
مرات بكون حار وفيهُ مرارة شديدة، عشان نحنا
قاعدين مُـركّزين
مع موضوع معيّن وموقّفين حياتنا عشانُه!

وسبحان الله طبيعة الحياة
إنه أي حاجة
لازم تاخد وقتها الطبيعي عشان تحصل
لكن التركيز الشديد
بخلّيك مُقلّق والصبر ببقى ليك طويل وما مُحتَمَل .

والعكس بيحصل
لمن تنشغل بـحاجات تانية وتملأ وقتك
حيجي الفرَج
في وقت نشوفُه مناسب تمامًا؛ لأننا ما ركّزنا معاهُ التركيز اللي يخلينا مُرهَقين!

عشان كده
نجتهد يكون عندنا حاجة اسمها [ مُؤانسَة للزمن ]
يعني الوقت
اللي بين الحدث والفرَج
نستغِلّه قدر ما نقدر في حاجات مفيدة تنفعنا
لأنه كده كده
حنعيش الفترة دي في الموضوع الحاصل لينا
وتركيزنا المبالغة في الفرَج
ما حيغيّر زمنه
ولا حيجيبه سريع!

فاللهم اكتُبني من أهل الصّبر الجمِيل، أصلِحني وغيّرني إلى ما تُحِبّ وترضى، أن تطِيب نفسي وتفِيض أيامي بالنّعيم، وتغمُرني العافية بلُطفِك وتحُفّني التقوى مع الورَع واليقين .

ممكن نصلّ على الحبيب! ♥️
#الحياة
#تيسير_الصادق

صحبتنا طلعت مع أسرتها من السودان
بسهولة شديدة
بالدعوات في قِيام الليل ♡

لِـقوا شقة دورين
نضيفة ومفروشة وسعرها بسيـط جدًا
بالدعوات في قِيام الليل

عملوا شركة هي وأخوها
والشركة حقّـقَت أرباح خيالية في زمن وجيز
بالدعوات في قِيام الليل .

سـفَّروا أمها وأبوها الحج
السنة دي
بالدعوات في قِيام الليل!

بعدما فقدوا كل شي، وبِـقوا ما عندهم ولا شي
حاليًـا فاتحين بيوت كتيرة
في السودان
وشايلين أهلهم
وناس من معارفهم
بالدعوات في قِيام الليل

اللهم بارِك ♡

أمبارح قالت لَي :
بإذن الله شركتنا حتبقى عالمية
وأخوي حيلقى بِـت حلال يتزوجها، وأختي حتتعالَـج
من الكـانسـر
بالدعوات في قِيام الليل

مافي دُعـاء قُلته في قِيام الليل
وما شُـفته حقيقة 🥹

فاللهم مافي قلوبنا وأكثَـر، يسّر أمرنا وحقّق مُـرادنا وأدخِلنا الجنة أجمعين.

ممكن نصلّ على الحبيب! ♥️
#الوتر
#تيسير_الصادق

أمبارح في راجل ليبي كان ماشي المطار
عشان مُسافر
السعودية مع الحُـجّاج .

لمن وصل طلع عنده مُـشكلة في إسمه
موضوع أمـني
فـناس الأمن
قالوا ليهُ إنتظر شوية نحاول نلقى ليك حل

بعد الحُـجّاج كُلهم
تمّـوا إجراءاتهم ورِكبوا الطيارة خلاص
مشكلته إتحلّـت
لكن الطيّـار رفَض يفتح باب الطيارة

والطيارة طارَت بدونه!

ضُـباط الأمـن
قالوا ليهُ :
ما تزعل
يمكن ما مكتوبة ليك السنة دي، وما مقسُـومة
ليك

لكن هو رفَـض يمشي من المطار!

فجأة الطيارة رجعَت بسبب عُـطل
وبعد اتصانَـت
الطيّار رفَـض يركّـبُه تاني!

وهو رفَض برضو يمشي من المطار .

وبعد شوية
الطيّارة رجعَت للمرة التانية عشان فيها عُـطل
والطيّار قال :
ما حأتحرّك إلا لمّن عامـر يركَب!

فـما الذي بينه وبين الله 🥹

و ده درس لينا
لمّن يرحل مننا أي شي و تتقفل الأبواب
نتذكر إنه
باب ربنا فاتح وما بيرحل أبدًا

اليقين وحُسن الظن بـربنا جميل جدًا ♡

لازم نستوعب
إنه ربنا قادر يغيّر كل الكون عشان يحقق أمانينا
ويستجيب دعواتنا

ما نيأس ولا نقول لسه ما استجاب لينا، ندعي ربنا
وكلنا ثقة
إنه دعواتنا حتكون حقيقة قريب بإذنه تعالى 🌱

فاللهمّ عجّل لكلٍّ منا مُراده، طَمئن قلوبنا باليقين والتوكُّل والرضا، واجعل الأمنيات حقيقةً يا أرحم الراحمين.

ممكن نصلّ على الحبيب! ♥️
#الدعاء
#تيسير_الصادق

جاهزين لِخير أيام الدنيا = عشر ذي الحِجّة ؟♥️

ربنا سبحانه وتعالى أقسَم بيها في
سورة الفجر :
{ وَالْفَجْرِ (1) وَلَيَالٍ عَشْرٍ (2) وَالشَّفْعِ وَالْوَتْرِ (3) }

و رسولنا الكريم ﷺ
قال :
إنها أعلى من الجهاد في سبيل الله، والجهاد بسبعمائة ضعف
يعني أعلى من سبعمائة ضعف .

يعني المئة " ذِكر " حيكونوا بسبعمائة ألف حسنة بإذن الله
وصفحة القرآن
بسبعمائة صفحة قرآن، يعني ختمة وخمسة أجزاء!

•ليلة القدر مَخفيّة لكن
العشرة أيام دي + يوم عرفة معروفين بالنسبة لينا ، يبقى نجتهد و نبقى مركّزين فيها ( ننشغل بالآخرة )

•التكبير المُطلَق حيبدأ
مِن مغرب الليلة لحدي آخر أيام العيد .

يعني نردّد التكبير بصيغة الله أكبر كبيرا أو ممكن نشغّلها من التلفون في البيت .

•من أهم الحاجات ( النِيّة ) إنه نجتهد فيها ونعمل كل اللي بنقدر عليه، و تكون نِيَّتنا خالصة لوجه الله تعالى .

•لازم يكون عندنا وِرد قرآن يومي
و ممكن نختِم فيها ♡

•نصلّي الفرض في وقته، و نصلّي النوافل ١٢ ركعة في اليوم، وما ننسى الضُّحى وقيام الليل .

•اللي بيقدر يصوم التسعة أيام، واللي ما بيقدر
يصوم يوم عرفة
لأنه يكفّر ذنوب سنتين كاملات .

•الدعاء بيقين
ونتحرّى أوقات الإجابة
بين الآذان والإقامة، وقت الفطور للصائمين، في السجود، ووقت نزول الأمطار

•الذكر بعد كل صلاة
سبحان الله ، الحمدلله ، الله أكبر
و آية الكرسي
بالإضافة لأذكار
الصباح بعد الفجر، و أذكار المساء من بعد صلاة العصر .

•ما توقّفوا الذكر نهائي
طول اليوم = تسبيح، إستغفار، حوقلة،
و صلاة على نبيّنا الحبيب ﷺ ♡

•إتصدّقوا
ولو باليسير وإهتمّوا بِصلة الرحم شديد .

•خلّونا نعمل تغذية لقلوبنا في العشرة أيام دي
نهتمّ بالطاعات
ونتدبّر القرآن ونسمعه ونستفيد من المحاضرات .

وما ننسى نذكّـر غيرنا ♡

فاللهم وفّقنا وبارِك لنا وتقبّل منا، نسألك الجَبر والرضا والسعادة، أن ترزقنا نعيم الدنيا والآخرة مع تعظيم الأجور .

ممكن نصلّ على الحبيب!♥️
#وليال_عشر
#تيسير_الصادق

-يابت في تُراب وقَشّ في جبهتِك!

=كنت بَصَلِّي في الضُّحى، لقيت المصلّى
فيهُ نضافة فقُلتَ أحسن أصلّي ورا القاعات قبل ما
وقت الظهر يدخُل💕

-وليه ما سُقتِيني معاكِ ؟

=ناديتِك مرتين لمّا كُنتي بتتونَّسي، ولمّن ما ردّيتِ
مشيت!

مَسَكت يد صحبتها وعيونها رَقرَقَت، وقالت ليها :
خُفتَ عليكِ من التراب، ما بتخافي عَلَي
من نار جهنّم ؟!

مُش اتَّفقنا حندخُل الجنّة سَوا، والما حتلقى
رفيقتها تتفَقَّدها!

قالت :
حَسّيت عِتابها الرّقيق ده زي الطّعنة في قلبي، قُمتَ
رَدِّيت ليها :
ربنا يبعِدنا عن النار
ويجعلنا من أهل الجنّة يا حبيبتي♥️

تاني ما بَعِيدها ..
ما كان قصدي أفُوتِك بس استَعجَلتَ
شويّة للصلاة، عارفانِي بتضايَق كيف لو ما صلِّيت الضُّحى!

وفي الأيام اللي بعدها
كانت بتنبِّهني وأنبِّهها، تنتَظِرني وما بقدَر أسبِقها.

وما حصَل ولا يوم الدنيا شَغَلَتنا عن طاعة ربنا
ولا عن العِبادة ..

نصُوم التطوُّع مع بعض، نصحَى لقِيام الليل سوا
ونكمّل الحَوجات ونطلِّع الصدقة
حتى القرآن
خَتَمنا في نفس الزمن، واليومين دي صايمِين
عشر ذي الحِجة
سوا ماشاء الله تبارك الله ♡
..

من نعيم الدنيا إنك تَلقى صاحِب صالِح
وتقضّوا أيامكم
مُتحابّين في الله تعالى💕

ينادِيك للخير
ويصبُر عليك ويآزرَك في الحزن
قبل الفرح والسعادة!

يدُّه ترفُض تفلِتك مهما تكون الظُّروف، يخُت ليك العُذر
قبل ما تنطُقه
وصوته دايمًا يلِح عليك
وكل همُّه إنه تجمَعكُم الجَنّة!

{الْأَخِلَّاءُ يَوْمَئِذٍ بَعْضُهُمْ لِبَعْضٍ عَدُوٌّ إِلَّا الْمُتَّقِينَ} 🌱

فاللهم حياة الرّفاق اغمُرها جبراً وأماناً ومَسَرّة، بارِك صُحبتنا وأدِم المودّة بيننا، فلا تُفرّقنا الدنيا ولا نغفل عن الآخِرة، وارزقنا طِيب الفؤاد ونُور المنابِر والقلوب .

ممكن نصلّ على الحبيب!♥️
#وليال_عشر
#الصحبة_الصالحة
#تيسير_الصادق

..

موسى عليه السلام لمّن وصل مَدين
‏لم يكن لديه
بيت، ‏ولا عمل، ‏ولا زوجة!

‏صنعَ معروفًا وتولَّى إلى الظل .

‏وقال :

‏{ رَبِّ إِنِّي لِمَآ أَنزَلْتَ إِلَيَّ مِنْ خَيْرٍ فَقِيرٌ }

‏لم تغرب شمس ذلك اليوم
‏إلا وصار لديه بيت وعمَل وزوجة ♥️

#الوتر

قبل كم سنة ماما كانت حاجّة وصحبتي وصّتها
تدعي ليها بموضوع
مُعيَّن، بتوفيق الله حاجتها دي اتحقّقَت ♡

بِقَت كل سنة ترسّل دعواتها .

يوم عرفة السنة الفاتت قبل أسبوع
قالت لي :
أدعوا لَي إنتِ وأمك بالزوج الصالح .

من باب دُعاء المؤمن لأخيه المؤمن بِظهر الغَيب
مُستَجاب ♡

اللهم بارِك
اتزوّجَت بعد شهرين من عرَفة، ربنا يسعدهم
ويهنّيهم .

اها الليلة لِقيتها مرسّلة لَي ٦ ورقات فُلسكاب ونُص
مليانات أسماء بنات
من كل الجهات في الورق!

قلت ليها ده شنو ؟

قالت لي :
ديل بنات أهلي في البلَد، قالوا ليكم أدعوا لينا
يوم عرفة
نعرّس أزواج صالحين 😁

فاللهمّ مافي قلوبنا وأكثر، نسألك الجَبر والسعادة الكامِلة، أن تجعلنا من عبادك الصالحين وتجمعنا في الجنة أجمعين .

ممكن نصلّ على الحبيب!♥️
#يوم_عرفة
#تيسير_الصادق

إتعرّفتَ على بنوتة
لطيفة ومُحترمة جدًا ماشاءالله عليها

هي زوجة وأم لطفلين
وشغالة
ربنا يوفقها وييسّر أمورها كُـلها .

مما شُفتها أول مرة، كان واضح عليها
الروقة والأدب والإتزان
فـقلت لنفسي (أكيد علاقتها بالقرآن قوية)

لأنه مُعاهدة القُـرآن بتظهر في التعامُـل والكلام!

بعد فترة من التواصُـل
والونسة
عرفتَ إنه وِردها
من القُـرآن كل يوم طُـول السنة = ١٠ أجزاء

اللهم بارِك ♡

قالت لي :
بقرأ الجزء في ٢٠ دقيقة
يعني
في ساعة و٤٠ دقيقة بقرأ خمسة أجزاء

بصحى لقيام الليل
قبل الفجر بساعتين، بصلّي وأدعي
وأقرأ خمسة أجزاء، وبعد الفجر بقرأ خمسة أجزاء تانية

والحمدلله بختِم كل تلاتة يوم ♡

مرتين بس ما قدرتَ أقرأ وِردي مع الفجر
كنت عيانة
فقريت
خمسة أجزاء بعد الظهر وخمسة بعد المغرب

أصرّيت شديد إني ما أضيّع وِردي
لأنه القُـرآن
فيهُ برَكة
شُفتها في يومي وسعادتي وكل تفاصيل الحياة

وأنا بسمَـع في كلامها
جات في بالي الآية :
﴿هُم دَرَجاتٌ عِندَ اللَّهِ وَاللَّهُ بَصيرٌ بِما يَعمَلونَ﴾🌱

فاللهم وفّقني لصُحبته وتلاوته، اجعلني وذُرّيتي من أهله الذين هم أهل الله وخاصّته، أن يُـضاء معه شبابي ويُهدى به قلبي ويزيّن كتابي يوم ألقاك .

ممكن نصلّ على الحبيب! ♥️
#القران
#تيسير_الصادق

ماشاءالله تبارك الله
صحبتنا الليلة عايشة سعادة إستجابة
دعوات ذي الحجة 😍

ولسه عشر ذي الحجة ما انتهت..!

اللهم بارِك
اللهم بارِك ♡

فاللهم مافي قلوبنا وأكثر، نسألُك الأمان والسّتر مع العافية، أن ترزقنا جبرًا يليق بعظمتك وسُلطانك وكرمك، وتجمعنا في الفردوس الأعلى أجمعين.

ممكن نصلّ على الحبيب!♥️
#الوتر