ከአርባ ምንጭ ዚጊቲ አቡነ ገብረ መንፈስ ቅዱስ ዓመታዊ በዓል አክብረው እየተመለሱ በነበሩ ምዕመናንን ላይ የመኪና አደጋ ደርሶ በርካታ ቁጥር ያላቸው ምእመናን ከዚህ ዓለም ድካም ዐረፉ !

መጋቢት 6 ቀን 2017 ዓ.ም (ተ.ሚ.ማ/አዲስ አበባ)

መነሻቸውን ሐዋሳ እና ሻሸመኔ ከተማ አድርገው የመጋቢት አቡነ ገ/መንፈስ ቅዱስን ዓመታዊ ክብረ በዓልን በአርባምንጭ ዝጊቲ አቦ በማክበር ወደ መጡበት በመመለስ ላይ የነበሩ ምዕመን በወላይታ ዞን በዴሳ ከተማ መሻገሪያ ድልድይ ሥር በደረሰ ከባድ የመኪና አደጋ ከ20 በላይ ምእመናን ከዚህ ዓለም ድካም ዐርፈዋል።

አደጋው ዛሬ ምሽት 12:30 አካባቢ የደረሰ ሲሆን የተሳፈሩበት መኪና ወንዝ ውስጥ የገባ በመሆኑ የሟቾች ቁጥር ከእዚህ በላይ ሊጨምር እንደሚችል ነው የተነገረው።

በአደጋው የተጎዱ ከባድና ቀላል ጉዳት የደረሰባቸው ምእመናንን በወላይታ ሶዶ ኦቶና ሆስፒታል የሕክምና ክትትል እየተደረገላቸው ይገኛል።

ተዋሕዶ ሚዲያ ማዕከል ላረፉት ወገኖቻችን ዕረፍተ ነፍስን ለቤተሰቦቻቸው መጽናናትን ይመኛል።

ይህ animation 21የግብጽ ሰማዕታትን የሰማዕትነት ጉዞ የሚያሳይ አጭር ፊልም ነው

መጻጉእና አልጋው

በመጋቤ ሐዲስ ሄኖክ ፈንቴ

በኢየሩሳሌም በበጎች ብር አጠገብ መጠመቂያ ነበረች

ስሟም ጵሩጳጥቄ ዘቅልንብትራ ትባል ነበር

ጵሩጳጥቄ ማለት

1 ዘፈውስ (በሽተኛ የሚፈወስባት )
2 ዘበዓል (በዓል የሚያከብሩባት )
3 ዘመሥዋእት (መስዋእት የሚሰውባት )
4 ዘጉባኤ (የሚሰበሰቡባት )
5 ዘዓባግእ (በጎች የሚሰማሩባት) ማለት ነው

ቅልንብትራ ማለት በእብራይስጥ ቤተ ሳህዳ ማለት ሲሆን በግዕዝ ቤተ ሳህል (የምህረት የይቅርታ ቤት )ማለት ነው

አምስት እርከኖች አሏት

በዚያም በአምስት ዓይነት በሽታ የታመሙ ብዙ ሰዎች ተይተው የውሃውን መናወጥ ይጠባብቁ ነበር የእግዚአብሔር መልአክ ወደ መጠመቂያው ወርዶ ውሃውን በሚያናውጠው ጊዜ መጀመሪያ ወርዶ የሚጠመቅ ካለበት ደዌ ሁሉ ይፈወስ ነበር።
መጠመቂያ የተባለችው ተጠምቀን ልጅነትን የምናገኝባት ቤተ ክርስቲያን ናት
በጎች የተባሉ ምእመናን ናቸው
አምስት እርከን የተባሉ አምስቱ አእማደ ምስጢራት ናቸው
ውሃው የምንጠመቅበት ውሃ ነው
መልአኩ የሚያጠምቀው ካህን ነው

አምስቱ ሕሙማን
1 ዕውራን ዓይናቸው የታወረ
2ሐንካሳን የሚያነክሱ
3 ይቡሳን የሰለሉ
4 ጽውሳን ልምሾ የሆኑ
5 ጽቡሳን እግራቸው ያበጠ ናቸው

አምስቱ ሕሙማን የአምስቱ ጾታ ምዕመናን ምሳሌዎች ናቸው

አምስቱ ጾታ ምእመናን
1 አዕሩግ ሽማግሌዎች
2 ወራዙት ወጣቶች
3 አንስት ሴቶች
4 መነኮሳት መነኮሱ
5 ካህናት አገልጋዮች ናቸው

1 ዕውራን የተባሉ አእሩግ ናቸው ዕውርነተቸው በፍቅረ ንዋይ ነው የሽማግሌዎች ጾር ፍቅረ ንዋይ ነው ማን ይጦረና?ል ማን ይረዳናል? በማለት የገንዘብ ፍቅር ያሳዎራቸው አእሩግዕ ውራን ተብለዋል

1 ሐንካሳን የተባሉ ወራዙት ናቸው ሐንካስነታቸው በዝሙት ነው ወራዙት ጾራቸው ዝሙት ነው ሁለት ልብ ሁነው አንድ ጊዜ ወደ ጽድቅ አንድ ጊዜ ወደዝሙት ስለሚሄዱ ሐንካሳዎች ተብለዋል

3 ይቡሳን የሰለሉ የተባሉት አንስት ናችው የአንስት ፈተናቸው ትውዝፍት ነው (የጌጣጌጥ ፍቅር )ለጌጣጌት ሲሉ ህገ እግዚአብሔርን ስለሚረሱ መሰናክል ስለሚሆኑ የሰለሉ ተብለዋል

4 ጽውሳን ልምሾ የሆነ የተባሉ መነኮሳት ናቸው የመነኮሳት ፈተናቸው ስስት ነው መነኮሳትን ከገዳማዊነታቸው ህይወታቸው ስስት ልምሾ ስለሚያደርጋቸው ጽሁሳን ተብለዋል

5 ጽቡሳን ያበጡ የተባሉ ካህናት ናቸው የካህናት ፈተናቸው ጾራቸው ትእቢት ነው አእምሯችን ምጡቅ መዓርጋችን ረቂቅ ክህነታችን ሰማያዊ ስራችን ላእላዊ እያሉ ይታበያሉ ስለሚያብጡ ጽቡሳን ተብለዋል።

አምስቱ በሽተኞች ሲጠመቁ እንደሚፈወሱ ሁሉ አምስቱ ጾታ ምእመናንም በጥምቀት ባገኙት የልጂነት ኃይል ጾራቸው ፈተናቸውን ድል ነስተው አሸንፈው ይኖራሉ

በዚያም በመጠመቂያው ሰላሳ ስምት ዓመት ሙሉ በአልጋ ላይ ተኝቶ የነበረ አንድ ሰው ነበር
ጌታችንም አምላካችን ሲያልፍ አየውና ልትድን ተወዳለህ ?ብሎ ጠየቀው
ጌታዪ ሰው የለኝም ውሃው በተናወጠ ጊዜ
ቀድሞ የሚያወርደኝ

ሰው ያለው ቀድሞኝ ይወርዳል ይፈወሳል እንጂ መዳን እፈልጋለው አለው ጌታችንም ተነስ አልጋህን ተሸክመህ ሂድ አለው የፈቃድ አምላክ መሆኑን ለመግለጽ ጠይቆ ፈቃደኛ ሲሆን ፈውሶታል።
ወዲያውኑ ተፈውሶ አልጋውን ተሰክሞ ሔደ

4 ዓይነት በሽታዎች አሉ

1 ደዌ ዘእሴት 2 ደዌ ዘንጽሕ 3 ደዌ ዘመቅሰፍት

4ደዌ ዘኀጢአት

1 ደዌ ዘእሴት ዋጋ የሚያሰጥ መጨረሻው የሚያስደስት በሽታ አለ የኢዮብ ደዌ ዘእሴት ይባላል

2 ደዌ ዘንጽሕ በንጽህና ምክንያት የሚመጣ በሽታ አለ የጢሞቴዎስ ደዌ ዘንጽሕ ይባላል

3 መቅሰፍት የሚያመጣ በሽታ አለ የሳኡል እና የሄሮድስ ደዌ የመቅሰፍት ደዌ ነው

4 ደዌ ዘኀጢአት በኀጢአት ምክንያት የሚመጣ አለ የመጻጉእ በሽታ የኀጢአት ደዌ ነው

ጌታችን መጻጉእን በቃሉ ብቻ ፈውሶታል

በቀሉ የፈወሳቸው አሉ
በሀልዮ የፈወሳቸው አሉ
በመዳሰስ የፈወሳቸው አሉ
በሀልዮ በነቢብ በገቢር ሁሉን መስራት የሚችል አምላክ መሆኑን ለማስረዳት

መጻጉእ ከግማሽ እድሜው በላይ በበሽታ ያሳለፈ ሰው ነው ዛሬም በየሆስፒታሉ የሚጠይቃቸው አጥተው የአልጋ ቁራኛ የደዌ ዳኛ የሆኑ ብዙ ሰዎች አሉ

እንደ መጻጉእ ሰው አጥተው ሰው የተራቡ መጻጉእ ከጎኑ የነበሩት ሰዎች ተፈውሰው ሲሄዱ እያየ እሱ ግን መፈወስ አልቻለም ነበር

ምክንያቱም የሚረደው የለምና ደግሞም የሚድነው አንድ ሰው ብቻ ቀድሞ የገበው ነበርና

ረዳት ያለው ሰው ቀድሞት ይገባል
ያም በየቀኑ አልነበረም በሳምት አንድ ቀን ቅዳሜ ብቻ ነበር
መልአኩ ከሰማይ ወርዶ ውሃውን የሚያውጠው በዚሁ ዕለት ስለሆነ

ሳምንት ጠብቀው ቀድሞ የገበው ይፈወስ ነበር

ያውም የሚፈወሰው አንድ ሰው ብቻ ነበር
ለምን ሁሉ በአንድ ቀን አልዳኑም ቢባል
በብሉይ ኪዳን ፍጹም ድህነት እንደሌለ ለመግለጽ ነው

ለመሆኑ በ38 ዓመት ውስጥ መጻጉእ ስንት ሰው ሲፈወስ ዓይቶ ይሆን ?

በሳምንት አንድ ሰው ሳያቋርጥ ይፈወሳል

በዓመት 52 ሰዎች ይፈወሳሉ
በ38 ዓመት ዓመት 1976 ሰዎች ሲፈወሱ ተመልክቷል እነዚህ ሕሙማን ቀድመው በመግባት የተፈወሱ ናቸው ሰው ረድቷቸው እንደምንም ጥረው ቀድመው ውሃው ውስጥ ገብተው የተፈወሱ ናቸው

መጻጉእ ግን የሰዎችን መዳን እያየ እሱ መዳን ያልቻለ ወደ መዳኒቱ የሚያደርሰው አጥቶ ከዛሬ ነገ እድናለው በማለት በሕመም ሲሰቃይ የኖረ ሰው ነበር ነገር ግን በመጨረሻ ሰው ባይኖረው ሰውን የፈጠረ አምላክ በቃሉ ብቻ ፈውሶት
38 ዓመት ሙሉ የተሸከመችውን አልጋ እሱ ተሸከማት ወደቤቱ ይዷል ::

መጋቤ ሐዲስ ሄኖክ ፈንቴ

የካቲት 24\2010

ዱባይ አላይን

"ክርስቲያኖችን በተኙበት ገብታችሁ ግደሏቸው"[የ አክራሪ ወሀቢያ የጅሃድ አዋጅ]

የኮፕቲክ ኦርቶዶክስ ቤተክርስቲያን በርካታ ምእመናንን በማጭበርበር የማይገባውን ገንዘብ በወሰደው ዲያቆን ላይ ሥልጣነ ክህነቱን የመሻር እርምጃ መወሰዱን አስታወቀች።

መጋቢት 10 ቀን 2017 ዓ.ም (ተ.ሚ.ማ/አዲስ አበባ)

ፋዲ ሹክሪ ኢስካንዳርን ተብሎ የሚጠራውን የግብፅ ኮፕቲክ ኦርቶዶክስ ቤተ ክርስቲያን አገልጋይ የነበረውን ግለሰብ የዲቁና ማዕረግ መገፈፉን ቤተ ክርስቲያኒቱ አስታውቃለች።

ግለሰቡ ከብዙ አመታት በፊት ከቤተሰቦቹ ጋር ወደ አሜሪካ ተሰደው እዚያ መኖር እንደጀመሩ የገለጸችው ቤተ ክርስቲያኒቱ ከቅርብ ዓመታት ወዲህ በተለያዩ የአውሮፓ አገሮች መካከል እየተዘዋወረ፣ እዚያ የሚገኙትን የኮፕቲክ አብያተ ክርስቲያናትን እየጎበኘ፣ ከወጣቶች ጋር ጓደኝነት መመሥረትና ከጳጳሳትና ከካህናት ጋር መቀራረብ ጀምሮ በተለይም ግሪክ ከሚገኙት የኮፕት ሊቀ ጳጳስ ብፁዕ አቡነ ጳውሎስ የዲቁና ማዕረግ አግኝቷል።

ቤተ ክርስቲያኒቱ በመግለጫዋ ይኸው ግለሰብ በአውሮጳ ሀገራት የሚገኙ በርካታ አብያተ ክርስቲያናት አባላትን አመኔታን ካገኘ በኋላ በሚኖሩባቸው ሀገራት የመኖሪያ ፈቃድ ሂደታቸውን እንዲያጠናቅቁ ድጋፍ መስጠት እንደ ጀመረ እና ይህን ተግባር ለመፈፀም በእነዚህ ሀገራት ውስጥ ካሉ ባለስልጣናት ጋር ጠንካራ ግንኙነት እንዳለው በመናገር በውሸት ከበርካታ ምእመናን ብዙ ገንዘብ ተቀብሏል ነው ያለችው።

እንደ መግለጫው በእነዚህ ሀገሮች የሚገኙ አንዳንድ አብያተ ክርስቲያናት አባቶች እነዚህን ድርጊቶች መፈጸፀሙንና በሀሰት ከምእመናን የማይገባውን ጥቅም ለማግኘት ወደ ስርቆት መግባቱን ካወቁበት በኋላ፣ ሌሎችን ምኤመናን እንዳያታልል በተለያየ መንገድ ማስጠንቀቂያ ሲልኩ፣ አንዳንዶቹም የወሰደባቸውን ገንዘብ እንዲመልስለት ለማሳመን ሞክረው ነበር፣ ግለሰቡም ለአንዳቸውም ምላሽ ሳይሰጥ አልፎ ተርፎም የማታለል ሥራውን ቀጥሎ ነበር። ከምንም በላይ ብፁዕ አቡነ ጳውሎስ የተባሉት በግሪክ የኮፕት ሊቀ ጳጳስ እሱን ለማግኘት ያደረጉት ሙከራ አልተሳካም።

ብፁዕ አቡነ ጳጳስ ጳውሎስ ቅዱስነታቸው ብፁዕ ወቅዱስ አቡነ ታዋድሮስ ዳግማዊን በዚህ ጉዳይ ላይ ካማከሩ በኋላ፣ ከስህተቱ እንዲመለሱ ፍቃደኛ ባለመሆኑ፣ አካሄዱን ለማስተካከል ተከታታይ ሙከራዎች ቢደረጉም ምንም ተግባራዊ ምላሽ ባለማግኘታቸው፣ በብዙ ሰዎችና ቤተሰቦች ላይ ቁሳዊና ሥነ ልቦናዊ ጉዳት የደረሰባቸው በመሆኑ፣ ብፁዕ አቡነ ጳውሎስ በቅዱስ ፓትርያርኩ ይሁንታ የቀድሞውን ዲያቆን ሥልጣነ ክህነት ሽረዋል።
በሊቀ ጳጳሱ የወጣው ውሳኔ ቅዱሳን ቁርባንን ከመቀበል ፣ የዲያቆን አገልግሎትን እና በኮፕቲክ ኦርቶዶክስ ቤተክርስቲያን ውስጥ ያሉ ሁሉንም አይነት አገልግሎቶችን በዓለም ላይ እንዳይቀበል ማድረግንም ይጨምራል።

ቤተ ክርስቲያኒቱ በዚህ ጉዳይ ባወጣችው መግለጫም የቀድሞው ዲያቆን ከላይ በተጠቀሰው መሰረት የለበሰውን የቤተክርስቲያን ልብስ ማውለቅ እንዳለበት በማሳሰብ ይህንን መጣስ ከምእመናን ህብረት ሙሉ በሙሉ እንዲገለል ያደርገዋል ብላለች።

ይህ የግብፅ ኮፕቲክ ኦርቶዶክስ ቤተ ክርስቲያን እርምጃ በተለይም በማጭበርበር፣ በማታለል እና ሙስና በመሳሰሉት የክፋት ተግባራት ላይ ቤተ ክርስቲያኒቱ ያላትን የማይቀያየር አቋም አመላካች ነው።

እኛስ ከዚህ ምን እንማር ይሆን?

ዘገባውን ለማሰናዳት የኮፕቲክ ኦርቶዶክስ ቤተ ክርስቲያንን ይፋዊ ድረገጽ እና ሲ ኤም ሲን ተጠቅመናል።