لطمية ممكن تقرأ مربعه او فزاعيه....للامام الكاظم ع....


اتهده ابنعش ابو طلبه...يشياله
ماذيه الحديد وحالته حاله

::::----::::()()::::----::::

ماذيه الحديد امهدد امتونه
ابهيده وياه ابهيده من تشيلونه
اتسيل ادموع ساكه لا تلجمونه
ادمومه امن الحديد اشلون سياله

::::----::::()()::::----::::

ارحم حال ابو طلبه يشيال
ابهيده اوياه ادخيلك وارحم الحال
لا يمه اهل لا يمه العيال
لا يمه اخو لا ولد تجاله

::::----::::()()::::----::::

ابهيده اوياه لا تلجم مفاصيله
هداه الحديد وباد كل حيله
ومن سم اللعين امكطع ادليله
مسموم الامام وذاب دلاله

::::----::::()()::::----::::

يشيال النعش شيله على الهون
خلصان الكلب والحيل مرهون
خلصان الدليل ابضيم السجون
يجر حسرات لهله وعينه هماله

::::----::::()()::::----::::

يشيال النعش بهداي وياه
بهيده وياه خافن تلجم اعضاه
الف يا حيف ما رحمته دنياه
مرمي اعلى الجسر محد تدناله

لطميه فزاعيه....للامام موسى الكاظم ع...



وسفه اليوم شالوه الحماميل
عنه وينهم ركابت الخيل

🌀🌀🌀🌀🌀🌀🌀🌀

وين اهل السلح والخيل هاليوم
تحضر موسى ابن جعفر المظلوم
ايشيلون الجنازة ابكلب مالوم
اتشده اخيولها وتتعنه بالليل

🌀🌀🌀🌀🌀🌀🌀🌀

وين اهل السلح والخيل عنه
هذا نعش ابو طلبه المجنه
يحلون الحديد اليوم منه
ايشيعونه ابلطم وتنادي يا ويل

🌀🌀🌀🌀🌀🌀🌀🌀

شيلوا نعش ابو طلبه يخياله
يشيلون الجنازة وينها ارجاله
خل تحضر هله خل تحضر اعياله
وين اليرفع المظلوم وايشيل

🌀🌀🌀🌀🌀🌀🌀🌀

وين اليوم خل تحضر عمامه
شيلوا اجنازته وشيلوا العمامه
ميال الوكت بيه اشعلامه
شد اوياه عيب انطاه تمهيل

🌀🌀🌀🌀🌀🌀🌀🌀

وسفه اليوم حمّاله التشيله
قصة موسى ابن جعفر ثجيله
حديده ضاهده وكطّع دليله
هل اليوم يا دمعي عليه سيل

لطمية...حيدريه او سريعة.....لرهين السجون الامام الكاظم ع....



هلله هلله اليوم شال الكاظم

()()::::()()::::()()

عالجسر ظلت رميه اجنازته
لا اهل هاليوم ويلي الحضرته
اربع احماميل شالوا جثته
حيف يا مولاي وانت العالم

()()::::()()::::()()

شال ابو طلبه وعليه تبجي الخلك
الكون كله اليوم بالعبره اختنك
وجن سماها اليوم عالكاع انطبك
شراد منه سمماها الظالم

()()::::()()::::()()

الكاظميه اليوم مرجونه واتون
شال ابن جعفر وغطّاها الحزن
حزنن الاملاك اعليه وبجن
اتصيح واويلاه كلها الوادم

()()::::()()::::()()

تبجي الاملاك لجله امكدره
والمدامع مو دمع دمها جره
ابحال ابوه اليوم ابنه ما دره
ينتظر لن عوده يرجع سالم

()()::::()()::::()()

شال والي الرافضه وصنديدها
والخلك تنحب واتصفك بيدها
اليوم فرحانه النواصب عيدها
معيد وفرحان ويلي الظالم

للسيد الصدر قدس الله سره..



ظل تاريخ.... اسمك مانسيناه
يا سيد الصدر عل الراس شلناه


📀📀📀📀📀📀

يمحمد الك تاريخ معروف

من هدام ابد ما جاسك الخوف

مثل عباس جدك ضحى الجفوف

يمصلي الجمعة ضيعيناه

📀📀📀📀📀📀


ضيعناك وسفة يا صدرنه

يا هيبة وبعد شيردك النه

نظل وياك ما ننسى عهدنه

يالضحى ابنينه وضحى بدماه

📀📀📀📀📀📀

ما ننسه صدرنه وذيج السنين

الك احباب تبجي وتلطم العين

يمصلي الجمعة الثبت الدين

اليوم ابعازته واليوم ردناه

📀📀📀📀📀📀


ما ننسه صدرنه وذيج الايام

تظل بگلوبنه شما مرت أعوام

انت الصحت لا ابوجه هدام

ضيعنه الشهم جا وين نلگاه

📀📀📀📀📀📀

ضيعناك يالتحجي ابعدالية

الك تحله القيادة والسيادية

وسفة تشيل ابو حجاية المشرية

عليك احباب تبجي تصيح ويلاه




ما ناسينه ////// تاريخك ظل



¢¢¢¢¢¢¢¢¢¢¢¢¢¢

✍🏻 #الحاجه_ طيف الساعدي
❌لاإجيـــز حــذف الأســم❌
✅إجيز للأخوة الرواديد بعدم ذكر أسمي
★★--------------★★----------★★

https://www.tgoop.com/tteef

فزاعية جنوبية... للسيد الصدر قدس الله سره...




الكم لايگة الونه.... يسادات

ما يبطل ونيني اعليك هيهات


📀📀📀📀📀📀


حلوة اعليكم الونه

أهل الزود سادتنه

وسفة منكم احرمنه

حگنه انوح وانعلي الونات
عليكم لايگة الونه... يسادات

📀📀📀📀

حگنه نبجي اعليكم

وانذكر محاجيكم

شايل وين حاديكم

الف ياحيف نمتوا بالمظلمات
عليكم لايگة الونه... يسادات

📀📀📀📀

ابو امصيفي بحر نيبة

يالموصوف ترتيبه

منه راح شيجيبه

منك خالية ظلت الجمعات
عليكم لايگة الونه... يسادات

📀📀📀📀

الجمعة ظلت اتنادي

شايل وين يالحادي

بيك اشصار وشسادي

وسفة غربت راعي الكلافات





كل احبابه تنوح اعليه /////// السيد غرب




¢¢¢¢¢¢¢¢¢¢¢¢¢¢

✍🏻 #الحاجه_ طيف الساعدي
❌لاإجيـــز حــذف الأســم❌
✅إجيز للأخوة الرواديد بعدم ذكر أسمي
★★--------------★★----------★★

https://www.tgoop.com/tteef

آه يا صدر.... يومك يطر الهامه

القلدك بيمن يشد احزامه..


✍✍✍✍✍✍

يومك يا صدرنه اعلينه ميهون

طر الهامه يومك بجه العيون

الك ونات بگلوب اليحبون

القلدك بيمن يشد احزامه

✍✍✍✍✍✍

نشد احزامنه بيش اعله دنيانه

خلانه ابحزن من شال مولانه

نون اعليه نبجي نريده ويانه

القلدك بيمن يشد احزامه

✍✍✍✍✍✍

طايح يا سندنه وراحت الهيبة

شايل يا صدرنه وبعد شيجيبه

يهديب وسبع والجابتك ذيبة

القلدك بيمن يشد احزامه

✍✍✍✍✍✍

تبجي اعيونه ونصيح ويلاه

شايل يا صدرنه وين نلگاه

ردناه للقيادة اليوم ردناه

القلدك بيمن يشد احزامه

✍✍✍✍✍✍

ردناه للقيادة ويرفع الراية

نظل وياك دوم والك وفاية

ما يصفه وكتنه وانخبط مايه

القلدك بيمن يشد احزامه



¢¢¢¢¢¢¢¢¢¢¢¢¢¢

✍🏻 #الحاجه_ طيف الساعدي
❌لاإجيـــز حــذف الأســم❌
✅إجيز للأخوة الرواديد بعدم ذكر أسمي
★★--------------★★----------★★

https://www.tgoop.com/tteef

وين تريد... مولانه على الهون

يومك يا صدرنه بجه العيون

😭😭😭😭😭😭


وين تريد يمعدل ينمرود

ياراعي الكلافة وماخذ الزود

شيردك علينه سيدي اردود

ريض يا صدر ريض بالضعون

✍✍✍✍✍✍

ريض يا صدر لا تلبس اجفان

زود وصيت عالزينات عنوان

عمت عين الزمان شلون خوان

وسفة بالگبر مولاي مدفون

✍✍✍✍✍✍

الجمعة اتنوح وتريد المصلين

ياراعي الكلافة وبارع العين

يالسادات ريضوا وين ماشين

ريضوا يالحيادة وين تردون

✍✍✍✍✍✍

يتاريخ ويظل للدوم تذكار

ومنك يا صدرنه خاليه الدار

تهل اعيونه والدمع مدرار

بعازتكم ترانه لا تشيلون

✍✍✍✍✍✍

احنه ابعازاتك ونريدك اليوم

اتزيل أحزانه وتزيل الهموم

احبابك نظل مولاي للدوم

احبابك ابغيرك ما يبدلون



¢¢¢¢¢¢¢¢¢¢¢¢¢¢

✍🏻 #الحاجه_ طيف الساعدي
❌لاإجيـــز حــذف الأســم❌
✅إجيز للأخوة الرواديد بعدم ذكر أسمي
★★--------------★★----------★★

https://www.tgoop.com/tteef

#القصيدة_في_ديوان_دمعه_فاطميه_الجزء_الرابع...
#للشاعرة_دمع_الفواطم..
صاحبة ديوان كف الخيرات لقضاء الحاجات...
خاص...بالامام علي ع




فزاعية جنوبية......للامام علي ع



التهابه الزلم.....طايح ابمحرابه
السيفه اعلى العده مانام بكرابه

°°••°°••°°••°°••°°••°°••°°

وين الجان يرهب من يلاكونه
ابو الحسنين هذا اللاعبه افنونه
بساحات الحرب كلهم يعرفونه
اله شاهد ابخيبر من شلع بابه

°°••°°••°°••°°••°°••°°••°°

يالراضع النيبة امن اول اصياره
اتظل اهل الوصف بأوصافه محتاره
ايحامي للدخل وايحامي الجاره
يومه ما يهون واتنحب احبابه

°°••°°••°°••°°••°°••°°••°°

بالمحراب طايح وسفه يالهيبه
امنين انجيب مثله المثله شيجيبه
امغذيته الشجاعة او راضع النيبه
ناره بالكلب تسعر او لهابه

°°••°°••°°••°°••°°••°°••°°

محرابه صبح غركان بدمومه
اله ونه ابكلب ما ينحمل يومه
وسفه اعليك يمعدل يجيدومه
زينب لاطمه واتصيح يا يابه

°°••°°••°°••°°••°°••°°••°°

وين الهايبته اسباع الرجال
ترف اعلام اله بالحومه لو صال
عليه اليوم وسفه حمل وشال
تون اهل العلم ما تحمل اغيابه


https://www.tgoop.com/tteef

#القصيدة_في_ديوان_دمعه_فاطميه_الجزء_الرابع...
#للشاعرة_دمع_الفواطم..
صاحبة ديوان كف الخيرات لقضاء الحاجات...
خاص...بالامام علي ع




لطمية او فزاعية....للامام علي ع....



حزنانة عليك اليوم...اسلاف العرب كلها

======(())======

حزنانه يوالي اليوم
تنحب والدموع ادموم
شايل وين يا جيدوم
رايح روحتك شلها

======(())======

تبجي اعليك تتناحب
مالوم الدمع لو صب
شايل وين وامغرب
افراكك يا علي ايسلها

======(())======

حلال المشاكل وين
شايل يا عمود الدين
اليوم الخلك حزنانين
انت المشكلة حلها

======(())======

حزنانه او تون اعليك
اليوم احبابك امضيعيك
رايح وين بعد الكيك
يا روحي الصبر ملها

======(())======

اليوم امكدرة الاسلام
تبجي اعليك يا ضرغام
بينه زادت الالآم
روحي الضيم حاصلها



https://www.tgoop.com/tteef

لطمية ثكيلة.. لسيدي ومولاي امير المؤمنين علي ع



عيني البجي عاميها...
والنوم ما مر بيها...

العين ما نامت بعد ..
من شال ابو حسين..

❇️❇️🔆🔅🔆❇️❇️


يا بويه عينك غمضت وانه السهر بعيوني
من نام طولك بالترب خابت يبويه ضنوني
شلهم علينه اهل الرده من شوفتك حرموني

عميانه عيني ابفركاك..
يالغربت وين الكاك ..

العين ما نامت بعد ..
من شال ابو حسين..

❇️❇️🔅🔆🔅❇️❇️

عميانه عيني من السهر من غربت يالغالي
ابعيد لا تبعد علي ارحم يبويه ابحالي
اشلون ما اشوفك بعد ريض يسوري العالي
اعداك ما ترحم تره لو غمضت يالوالي

تدري العده ميرحمون ..
عدوان بويه يكرهون ..

العين ما نامت بعد ..
من شال ابو حسين..

❇️❇️🔅🔆🔅❇️❇️

سهرانه عيني وما غفت والنوم ما مر بيها
والروح ما هادت بعد من شال المربيها
جا شنهي روحي وظلتي يوم المشه واليها
يدريها بيه امعلكه روحي شكثر يدريها

شال وبعد وين الكاه ..
يا ناس محمل فركاه ..

العين ما نامت بعد
من شال ابو احسين

❇️❇️🔅🔆🔅❇️❇️


يا عين ظلي امساهره شلج بعد بالنومه
حيدرنه يا وسفه انطبر ظلت تسيل ادمومه
مطبوره ويلي هامته ورحي صفت مهدومه
مالومه روحي اعلى الوصي وحكها تظل مالومه

بحيدر علي فجعوني
نام السهر بعيوني ..


العين ما نامت بعد ..
من شال ابو حسين..

❇️❇️🔅🔆🔅❇️❇️

سهرانه ما نامت بعد العين جن مملوحه
والروح عالشال ومشه ظلت تون مجروحه
كرارنه بجرحه يون وكلبي يجر ابنوحه
ايكول شايل حيدره عني وبعد مالوحه

يا بالحسن فجعوني ..
بيك وتهل اعيوني ..

العين ما نامت بعد ..
من شال ابو حسين..




❇️❇️🔅🔆🔅❇️❇️



#الشاعرة_دمع_الفواطم

بتاريخ 10 //4 //2023



https://www.tgoop.com/tteef

لطميه مربعة....للامام علي ع...في ذكرى استشهاده...


امضيعين السبع...وسفه امضيعينه
انون اعليك يا حيدر يوالينه

==()==()==()==()==

ضيعنه السبع هاليوم ضيعناه
فاركنه المعدل ما بعد نلكاه
شايل يا علي والعدل شال اوياه
نايم عالتراب وغمضت عينه

==()==()==()==()==

ضاع اليوم واهل الدين يردونه
الف يا حيف عالمثله يفكدونه
عونه الحاضرك يا سيدي عونه
ابن عم النبي والناصر الدينه

==()==()==()==()==

ضايع يا سبع والناس حزنانة
وكلها اتصيح يا حيدر يمولانه
وين تريد يا حيدر يملفانه
يستاهل ونين اعليه ونينه

==()==()==()==()==

عليه الناس تبجي وتجذب الونه
الف يا حيف شال اليوم المجنه
عليه الدين يبجي ايكول اريدنه
يا كرار يومك حيل ياذينه
==()==()==()==()==

يمصاب السبع يلهب بالكلوب
الك جانون بالدلال منشوب
باسمك يا علي ماتمنه منصوب
جاوينه اليحامي الدين جاوينه


https://www.tgoop.com/tteef

لعمل هندسة صوتية مع مونتاج لاستشهاد الامام علي( ع )وانت كاعد بالبيت وترويجها على الفيس بوك للوصول لكثر من 10 الف متابع من خلال الهاتف التواصل مع
@ahmed_alziwar0

اجمل القصائد لاستشهاد الامام علي (ع )
كلمات القصائد تخبل لا تفوت فرصة الاشتراك بالقناة قبل حذف الرابط
https://www.tgoop.com/Jafar_Jafar_ssss

❉❉❉❉❉❉❉﷽❉❉❉❉❉❉❉
لسـتة #دعم_مؤسسة_منبريون_الحسينية🌻.
#التثبــيت_سـاعـه
#الحــــــــــذف
بـعـــد نشر اللسـتـةّ بـ4  سـا؏ـات
� غَـير مبري الـذمـةّ ٲمـام الله ڪـل من يـحذف البــوت دون ؏ـلمنا
استقبل 1000 عضو فما فوق
━━━━━━━━━━━━━━━
للإشـــتِـراك 👇🏻.

التواصل مع @ahmed_alziwar0

قناة خاصة بتلحين القصائد

https://www.tgoop.com/+PZwpTt2HLXcvUQZh

------------------------------------------------------