#үбүлүөй

⭐️ Үтүөлээх быраас үтүө күнүн бэлиэтиибит

Норуоттар икки ардыларынааҕы Европа Академиятын "Золотая корона" уордьан кавалера, РФ үрдүкү профессиональнай үөрэхтээһинин бочуоттаах үлэһитэ, СӨ үтүөлээх бырааһа, Үөһээ Бүлүү улууһун, Балаҕаннаах нэһилиэгин бочуоттаах олохтооҕо, ХИФУ бочуоттаах бэтэрээнэ Ахмед Романович Варфоломеев үбүлүөйдээх 85 сааһын бэлиэтиир уопсастыбаннас кыттыылаах үөрүүлээх тэрээһин улуус дьаһалтатын аактабай саалатыгар буолла.

Улуустааҕы киин балыыһа үлэһиттэрин "Сиккиэр" ырыа ансаамбыла балыыһа гиимнин ыллаан үөрүүлээх тэрээһини саҕалаатылар. Маргарита Анисимова салайааччылаах М.А.Алексеев аатынан өрөспүүбүлүкэтээҕи лиссиэй-интэринээт 8-с кылааһын үөрэнээччилэрэ Ахмед Варфоломеев "Дьол хоһоонун" ааҕан иһитиннэрдилэр.

Улуус салалтатыттан, доруобуйа харыстабылын бэтэрээннэриттэн, улуустааҕы киин балыыһа коллективыттан, нэһилиэктэр баһылыктарыттан, улуус тэрилтэлэрин салайааччыларыттан, үөрэппит оҕолоруттан Ахмед Романович туһунан этэр тыл эриэккэһэ, эйэҕэһэ этилиннэ.

Эҕэрдэ бастыҥын, маанытын, махтал истиҥин хомуйар күнүгэр кини киһи быһыытынан ураты майгытын, үлэлээн ааспыт чаҕылхай кэмнэрин бэрт истиҥник ахтан-санаан аастылар.

"Үөһээ Бүлүү" хаһыат

#бэлиэкүн

⭐️ Быйыл улууска 11 фельдшер үлэлии кэллэ

Бу сылга саҥа үлэлии кэлбит фельдшер идэлээх эмчиттэри олус эппиэтинэстээх үлэни саҕалаабыттарынан улуус кылаабынай бырааһа Сардаана Павлова эҕэрдэлээн туран киин балыыһа аатыттан "Стильный доктор" медицинэ таҥаһын маҕаһыыныттан бастакы үлэ таҥастарын бэлэх уунна.

Ахмед Романович Варфоломеев саҥа үлэһиттэргэ бэйэтин үтүө санаатын, кэс тылын аныырыгар эппиэтинэстээх үлэлэригэр бэриниилээх буолалларыгар баҕарда.

"Үөһээ Бүлүү" хаһыат

#бэлиэкүн

⭐️Киин балыыһа сиэстэрэлэрэ наҕараадалары туттулар

Доруобуйа харыстабылын эйгэтигэр үтүө суобастаах үлэлэрин уонна нэһилиэнньэ доруобуйатын харыстабылыгар киллэрсэр сэмэй кылааттарын иһин

Улуустааҕы киин балыыһа оҕону эмтиир салаатын сиэстэрэтэ Наталья Огочонова "СӨ доруобуйа харыстабылын туйгуна" түөскэ кэтэр бэлиэнэн наҕараадаланна.

Анестезист-сиэстэрэ Татьяна Прокопьева СӨ доруобуйа харыстабылын министиэристибэтин Бочуот грамотатынан бэлиэтэннэ.

Улуустааҕы киин балыыһа сиэстэрэтэ Любовь Семенова СӨ доруобуйа харыстабылын министиэристибэтин Махтал суругун тутта.

Эҕэрдэ буоллун, наҕараадалаах эмчит идэлээх эдэр үлэһиттэргэ.

"Үөһээ Бүлүү" хаһыат

#бэлиэкүн

⭐️Саха Өрөспүүбүлүкэтин бочуоттаах бэтэрээннэрэ

Улуус бэтэрээннэрин Сэбиэтин бэрэссэдээтэлэ Иван Чычахов улаханнык ытыктанар үтүөлээх бырааһа Ахмед Романович Варфоломеевы уонна кини олоҕун аргыһын Раиса Ивановнаны "СӨ бочуоттаах бэтэрээнэ" дастабырыанньалаах түөскэ кэтэр бэлиэнэн наҕараадалаата.

Ону тэҥэ Ахмед Романович үбүлүөйүн көрсө улуус хаһыатыгар балаһанан тахсыбыт ыстатыйатын бэлэх уунна.

"Үөһээ Бүлүү" хаһыат

#бэлиэкүн

⭐️ Эмчит бэтэрээннэр эҕэрдэлэлииллэр

Үөһээ Бүлүү улууһуттан төрүттээх Дьокуускай куоракка олорор доруобуйа харыстабылын бэтэрээннэрин ааттарыттан СӨ үтүөлээх бырааһа, РФ уонна СӨ доруобуйатын харыстабылын туйгуна Светлана Сибирякова анаан-минээн кэлэн, үбүлүөйдээх киэн туттар биир дойдулаахпытыгар Ахмед Варфоломеевка эҕэрдэтин анаата.

"Үөһээ Бүлүү" хаһыат