ዋልድባ ገዳም

«ዕድሜህን ይበሉበሀል።»
✍🏻 መምህር ኤፍሬም ተስፋ

#ጠላትህን_ማሳደድ

ብዙ ወንድሞችና እህቶች እንደጀብደኘነት ይቆጥሩታል ።

ብዙዎቹ ደግሞ የጀግንነታቸው ምሥጢር አድርገው ይመኩበታል።

ብዙዎቹም አይነኬ ለመምሰል የውሸት ጉራ ይነዙበታል።

ነገር ግን ጠላትን እያሳደዱ ማጥቃት የጀግንነት መገለጫ ይሆናልን?*

ጥሬ ሐቁ መራራ ስንፍና ነው።

ጠላትን በፈሊጥ መከላከል የመኖርህ ግዴታ ቢሆንም።

ጠላትን ማሳደድ ግን የአእምሮ ስንፍና ነው።

ጠላትን ስታሳድድ የምታወጣው ኀይል የምታባክነው ጊዜ የምትናደደው ንዴት አለ።

ይህን ጉልበት ከጠላትህ ለማምለጥ ብትሮጥበት እርሱ የማይደርስበህ የጠላትህ ሰማይ መሆን ትችላለህ ።

ያኔ ጠላትህ ቀና ብሎ ለማየት ይጣጣራል እንጅ ወዳንተ ድንጋይ አይወረውርም። የሚወረውረው ድንጋይ ተመልሶ ከርሱ ራስ ላይ ያርፋልና።

ሰማይን ይገረሙበታል እንጅ አይመቱትም።

በረዶውን ቢያዘንበው፣ መብረቁን ቢያጮኸው፣ ዐውሎ ነፋሱ ከሰማይ ቢመጣ ዐመቱን ሙሉ በፀሐይ ድርቅ ቢያቃጥል፣ ቀና ብለን ከማየት ውጭ የምናደርገው አንዳች ጉልበት የለንም።

ሰማይ ራሱን ያስከበረው ከፍ በማለቱ ነው።

እንደመሬት ዝቅ ቢል ኖሮ አራሹ፣ተኳሹ፣ ነጋሹ፣ እግረኛው እረኛው ዳንሰኛው ሙደኛው ደገኛው ቆለኛው ሁሉ ሲጠቀጠቀው የሚኖር መከራ ተሸካሚ ነበር።

አንተም እንደሰማይ ከፍ ለማለት ፍጠን እንጅ እንደመሬት ለመውደቅ አትታገል።

በራስህ እቅድ ተጓዝ በምቀኞችህ ትእዛዝ አትመራ።

ጠላቶችህን ስታባርር ለአድመኝነታቸው አድማ ስታከማች ለጉልበታቸው ጉልበት ስታዘጋጅ የምትውል ከሆነ ለራስህ ያለ አንዳች ጊዜ ትቀራለህ።

በደጋፊዎችህ ኀይል የምትወጣ በጠላቶችህ ኀይል የምትወርድ ጠላቶችህ በሚያጠምዱለህ የድንጋይ ውርዋሮ ሜዳ ድንጋይ ስትለቅም የምትውል ከሆነ እያስፈጸምክ ያለኸው የጠላቶችን እቅድ ነውና ከግብግባቸው ራቅ።

ነገር ግን በትንሽ እውቀተትህ ከቀኑብህ ብዙ ተምረህ አናድዳቸው ደረቅ እንጀራ ከከለከሉህ እንጀራ በወጥ ለመብላት በርትተህ ሥራ።

ለጠላት እጅ መስጠት ሀገራዊ ነውር ቢሆነም ከጠላት ጋር መታገልም ግለሰባዊ እብደት ነው።

ጠላቶችህ እንዳይጥሉህ ተጠንቀቅ እንዳያገኙህም ራቅ እንዳያጠቁህ በፈሊጥ ተከላከል።

እግር በእግር ግን አትከተል።

ሁሌም ከኋላቸው ከተከተልክ ወደፊት ማለፍ አትችልምና።

ጊዜም አትስጣቸው ያለህን ይወስዱብሀል።

እየከሰስክ ሥራ አትሠራም እየተኮስክ አታመርትም እያቆሰልክ አታነብም።

እየገደልክ አትነግድምና ለጠላቶችህ ጊዜ አትስጥ ዕድሜህን ይበሉብሀል።

2.0K viewsዘጰላድዮስ, 08:59