Якая кніга найлепей патлумачыць іншапланетнікам Беларусь? А якая выратуе (не іншапланетнікаў! творцу!) ад дэпрэсіі?

У новым выпуску падкаста Марына Казлоўская і Дар’я Бялькевіч адказваюць на гэтыя пытанні творамі Якуба Коласа 📚🎧 Слухайце «Спіс на лета», каб па-шчыраму зацікавіцца «Новай зямлёй» ды «Сымонам-музыкам» — нават калі школьныя ўспаміны раяць вам гэтых нудотных тэкстаў унікаць.

Выпуск ужо на сайце:

Якуб Колас і страчаны рай

«Вельмі, вельмі, вельмі сур’ёзны выпуск. Ніякіх жартачкаў.»

І праўда: новы выпуск «Спіса на лета» аказаўся эмацыйна няпростым. У ім Марына і Дар’я абмяркоўваюць «Пошукі будучыні» і «Млечны шлях» Кузьмы Чорнага — стылістычна дасканалыя творы чалавека, які пражыў страшныя 30-я і піша знутры вайны, у невядомасці, калі яна скончыцца. Але побач з самым цяжкім, як заўжды, і тое, што дапамагае яго перажыць: радасць, памяць і чалавечнасць.

🎧 Кузьма Чорны і беларускі народны постапакаліпcіс — ужо на сайце, а таксама на:
- Apple Podcasts,
- Яндэкс.Музыцы,
- Spotify,
- Youtube.

Сачыце на зручных для вас платформах, падпісвайцеся ды пакідайце ацэнкі і водгукі. Гэта вельмі дапамагае распаўсюду падкасту 💙

“І ўраз згадаў мне рад уздыхаў прыглушоных,
І мук любоўных крык,
І цела гібкага шалёнасць, ізвіванне,
І п’яны, душны пах...”

Хто аўтар гэтага ўрыўка? Даведаецеся з нашага новага матэрыялу 👀 Там жа — яшчэ больш прыкладаў гарэзлівай, шчырай і ўтрапёнай беларускай паэзіі, якая не цураецца цялеснасці.

Эратычныя вершы беларускіх класікаў ужо на сайце ❤️‍🔥

Крупнік, і фаршмак, і гефілтэ фіш, і бабка, і дранікі-латкес... Кніга «Самы цымус» — чарговы доказ таго, што паэзія і кулінарыя непарыўна звязаныя, бо гаворка тут ідзе не толькі і не столькі пра ежу, колькі пра гістарычныя і сямейныя анекдоты, байкі, вершы, песні і ўсё тое, што яднае людзей і разам з кухняй складае нашу культуру.

Разам з выдавецтвам @gutenbergpublisher публікуем урыўкі, прысвечаныя Мінску. З іх вы даведаецеся пра селядцоў, якія былі ўвекавечаны Вінцэнтам Дуніным-Марцінкевічам, а таксама пра салодкае печыва ды горкую гісторыю мінскага паэта Майсея Тэйфа 👀

Чытайце пра іншыя смакі габрэйскага Менска на нашым сайце :)

26 жніўня — дзень памяці Алеся Разанава, роўна тры гады таму паэт пайшоў з жыцця.

Але мы заклікаем узгадваць рэдкага, а мо і ўнікальнага, творцу не раз на год, а штодзённа. І з гэтай мэтай зрабілі @razanau_wir_by — бот, які кожную раніцу дасылае вам тэкст Разанава, дадаючы — літаральна! — паэзіі ў будні. Мы ж, у сваю чаргу, дадалі ў яго новых тэкстаў, усё гэтак жа глыбокіх і тонкіх. Далучайцеся!

І, калі ласка, распавядайце пра бота сябрам! Версэтаў, пункціраў ды іншай выдатнай паэзіі ў кожную тэлеграм-скрыню 💛

Дудар на кані, загарэлы дачарна Купала і Янка Маўр у атачэнні пальмаў

Апошнія дні лета! Ці пераглядаеце вы ўжо свой фотаархіў, з уздыхамі прыгадваючы лепшыя моманты? Ці пакуль не гатовыя да развітанняў?

У любым выпадку, клічам вас зазірнуць у фотаархівы чужыя 👀 і даведацца, як бавілі свой летні адпачынак знакамітыя пісьменнікі — ад Купалы да Караткевіча.

Падборка ўжо на сайце:
Як адпачывалі класікі

Серыял пра каханне, першы феміністычны раман з моцнай і адважнай гераіняй і апошні вялікі тэкст пра шалёную апантанасць зямлёй.

Пазналі?

У новым выпуску падкаста "Спіс на лета” Марына Казлоўская i Дар’я Бялькевіч абмяркоўваюць “Людзей на балоце”, а мы запрашаем вас гэтае абмеркаванне паслухаць.

Іван Мележ: людзі, балота, зямля

Ці меў рацыю Багдановіч, называючы Венеру зоркай? Чаму неба бывае зялёнага колеру? І што значыць “мая любоў, — як свет і антысвет”?

Сабралі для вас самыя яскравыя цытаты з беларускай паэзіі, а падкаст @praz_kosmas патлумачыў, што менавіта захапляла паэтаў у начным небе.

🪐 Астраномія і паэзія — чытайце на нашым сайце

«Жураўліны крык», «Сотнікаў» («Ліквідацыя»), «Знак бяды», «Доўгая дарога дадому» — які з гэтых тэкстаў найважнейшы ў беларускай літаратуры, пры чым тут «Па што ідзеш, воўча» Евы Вежнавец, страх, віна, і дзе беларусы «накасячылі»?

Дар’я Бялькевіч і Марына Казлоўская ў новым выпуску падкаста «Спіс на лета» размаўляюць пра самага вядомага беларускага пісьменніка, які паказвае чалавека як вельмі складаную сістэму і ставіць пытанні «Што такое чалавек перад знішчальнай сілай бесчалавечных абставін» і «Чаму і завошта?».

Шукайце выпуск на сайце:
Васіль Быкаў: «свае» супраць «сваіх»

Вайна, страта блізкіх, хваробы, адзінота, але і беларускі джаз, жарсць да баравікоў ды жыццесцвярджальная дыялектыка…

Апублікавалі другую падборку лістоў ды дзённікаў Коласа — гэтым разам з запісамі, зробленымі ў саракавыя-пяцідзясятыя гады.

Шукайце матэрыял па спасылцы ✉️📖

У дзясятым выпуску падкаста «Спіс на лета» выкладчыца Марына Казлоўская і паэтка Дар’я Бялькевіч абмяркоўваюць галоўнага падпольшчыка беларускай літаратуры — Максіма Танка.

Чалавек, жыццё якога было поўнае радасці і рызыкі: падлеткам ён бярэ ўдзел у студэнцкіх хваляваннях у Заходняй Беларусі, некалькі разоў пераходзіць мяжу ў трыццатыя, трапляе на «Лукішкі», піша вершы, знаёміцца з будучымі нобелеўскімі лаўрэатамі, сустракае сваю Любоў, падрабляе почыркі і чытае Маякоўскага па-польску. Ён жа – чыноўнік пры надзвычай высокай пасадзе з трывожным чамаданчыкам у вітальні, які кпіць з графаманаў і смяецца з сябе самога, падарожнічае ад Японіі да Канады, піша смелыя верлібры, пяшчотныя эратычныя вершы, ратуе першую кнігу Алеся Разанава, вітае Незалежнасць Беларусі.

Слухайце выпуск пра гэтага яскравага паэта на нашым сайце 📖🎧

Палескі гласарый

У новым матэрыяле распавялі пра 7 па-свойму значных з’яў з Палесся, якія дапамогуць вам зразумець гэты таямнічы рэгіён.
І прапаноўваем гульню! Паспрабуйце здагадацца, што за з’ява стаіць за кожнай парай эмодзі:

1. 🐉🪟
2. 🌊🏺
3. ⛰️📜
4. 🏝️🛶
5. 🚲 🪵
6. 🪡 💎
7. 🐢🖤

А каб знайсці адказы, чытайце артыкул :)

Ці чулі вы пра «Іранскі дзённік» Пімена Панчанкі? Або пра паэму «Дзісенскі Чайлд Гарольд» Мойшэ Кульбака, дзеянні якой разгортваюцца ў Берліне? А яшчэ ёсць нарысы, мемуары і дзённікі пра замежныя ўражанні, якія здзіўляюць сваёй разнастайнасцю: нехта цікавіцца мясцовым побытам, нехта захапляецца архітэктурай, нехта заводзіць знаёмствы або проста назірае за людзьмі…

Так, у беларускай літаратуры не забагата экзотыкі далёкіх краёў. Але гэта зусім не значыць, што нашы пісьменніцы і пісьменнікі толькі і сядзелі сярод родных балотаў і пушчаў!

Каб даведацца пра іх прыгоды за мяжою, чытайце наш новы матэрыял!

“Малая падарожная кніжыца белліту” ўжо на сайце 🚂

Іван Шамякін – адзін з самых чытаных і дакладна самы «масавы» беларускі пісьменнік, агульны наклад якога складае каля 25 мільёнаў асобнікаў. Ягоныя кнігі дакладна ёсць ці былі ў вас дома.

У новым выпуску падкаста «Спіс на лета» паэтка Дар’я Бялькевіч і выкладчыца Марына Казлоўская абмяркоўваюць раман «Сэрца на далоні». Гэта тэкст, напісаны ў часы адлігі, у якім гаворыцца пра вострыя важныя тэмы – але вельмі асцярожна. Таксама ў падкасце Даша і Марына размаўляюць пра жыццё аўтара і разважаць пра двухдумства, час і патрэбы чытача.

Слухайце выпуск на сайце 🎧

Апошні выпуск сезона! Відэа! Ка-рат-ке-віч! 💣❤️‍🔥

Дачакаліся: нарэшце Марына Казлоўская і Дар’я Бялькевіч абмяркоўваюць пісьменніка, кнігі якога чыталі за ноч ды скрадалі з бібліятэк, самага любімага і важнага для беларусаў.

Вядучыя гутараць пра самога Караткевіча і яго творы «Дзікае паляванне караля Стаха», «Ладдзя Роспачы», «Каласы пад сярпом тваім», а таксама пра раскошу любіць гэтую зямлю і шукаць мора.

Не толькі слухайце, але і глядзіце (!) падкаст па спасылцы 😍 І як заўжды: калі ласка, падзяліцеся гэтым выпускам, калі ён вам спадабаўся. Гэта нас вельмі падтрымае.

За прастору, у якой запісанае відэа, дзякуем @gutenbergpublisher 🫶

❤️‍🔥 Новая міні-гульня на Wir.by — даведайся, што рабілі слынныя беларускі і беларусы ў тваім узросце!

Чым вы займаецеся ў сваім веку? Ці апублікавалі ужо галоўны раман свайго жыцця? Ці рыхтуецеся стаць дырэктарам Італьянскай оперы? А мо прадаяце сваю бібліятэку, каб паехаць з краіны ўслед за мужам?

Хутчэй пераходзьце па спасылцы, каб даведацца, як бавілі час Караткевіч, Ластоўскі, Пфляўмбаўм ды іншыя выбітныя асобы, калі былі вашымі аднагодкамі 🙂