tgoop.com/wuhob/3259
Last Update:
السيدة رقية ع
أتجر بالفرس عمتي الك
شو رايح وتارك هلك
وبنيتك ما ودعتهه
تبجي وتكض بيك أتركتهه
@@@@@@@@@@@@@@@
يرايح وين شو دمعاتك أتندي
مو من عادتك ما بوست خدي
إذا ما تبطي يابعد أهلي أخذني وياك
مو طبعك تحير تجيب وتودي
كسرة أبخاطرك--ويهل ناظرك--يا بابا أشجره
الزينب نضرتك--وعله أبنيتك--حس كلبي تره
عالفرس مايل منحني
للموت جنك معتني
دمعات عينك نزلتهه
تبجي وتكض بيك أتركتهه
@@@@@@@@@@@@@@@
مشيت وكلشي ميت جان بعيونك
تكلك عمتي لا تمشي يذبحونك
درت وجهك رحت والعبرة خانكتك
كسرتك واضحة من ميلة امتونك
ها يابو علي--لحظة إنزل ألي--أشتم منحرك
ما ترجع أحس--من جرت النفس--جاي اتصورك
يابو الهله شبيك أسكتت
حي وأحسنك متت
عبالي روحك فاركتهه
تبجي وتكض بيك أتركتهه
@@@@@@@@@@@@@@@
ساعة وشبت النار بوسط هدمي
ومن ذاني الطرف رجلي يصب دمي
خدي الجان وجهك تجي تشوفه عليه
امرايه اتكسرت هيج انطعج لحمي
جراني وصحت--طكاني وطحت--وحضنت الترب
فر بيه الارض--وانه برجله أكض--شبعني ضرب
أبنية حسين آنه وصرخ
بوجهي وطرف إذني ملخ
ترجيتي وي إذني أشلعتهه
تبجي وتكض بيك أتركتهه
@@@@@@@@@@@@@@@
أجيتك وانته مو كلك على بعضك
مكطع ما أميز طولك وعرضك
تارسلك مجان إيقارب الميدان
دم تترس اجفوفي منين ما اكضك
الحافرهم أصد--بي قطعة جبد--ورجع بالنضر
اهدوم مسلبه--أوصال أمجلبه--امن ضلوع الضهر
اتوسلتك وعندك عذر
ساحكتك الخيل أشكثر
حد ما اعضامك طشرتهه
تبجي وتكض بيك أتركتهه
@@@@@@@@@@@@@@@
راح أمشي بطرك روحي بدون أنته
ولو أنته نفس بالرية عاشرته
اذا سألن بنات أزغار عن حالي
اكلهن والدي بالخيل ضيعته
إيشوفن حالتي--يعرفن قصتي-- بشكلي وهيئتي
طبعات السطر--صابيع الشمر--أمبينه بوجنتي
موعد الي بطشت الذهب
أنسه الهضم وانسه التعب
موتتي اهناك يحل وكتهه
تبجي وتكض بيك أتركتهه
@@@@@@@@@@@@@@@
حسين باهض الحلفي
BY الشاعر حسين باهض الحلفي
Share with your friend now:
tgoop.com/wuhob/3259