أخو سكينه علي علي
نصر دينه علي علي
نصر دينه ــ نصر دينه
++++++++++++++++++++++
برز يا محله مشيته وشدة احزامه
اتگول حيدر بالملاحم لفة الثامه
صال بيهم جنه جده وركضت الوادم
يخمش برمحه صدرها ويشطر الهامه
أخو سكينه علي علي
نصر دينه علي علي
نصر دينه ــ نصر دينه
++++++++++++++++++++++
صاحت الغوث العساكر من طلع ليهه
جنهه خيبر وهوه حيدر من نزل بيهه
وينه مرحب خله يطلع خل اشوفنه
ما تبارزني زلمكم ساكته اشبيهه
أخو سكينه علي علي
نصر دينه علي علي
نصر دينه ــ نصر دينه
++++++++++++++++++++++
جنه وجه الهادي جده وحجيه ووصافه
الله منطيه من جماله وعطفه والطافه
اشمحله ملفوفه اعله راسه خضره العمامه
ايگول هذا اهوه محمد ياهو الشافه
أخو سكينه علي علي
نصر دينه علي علي
نصر دينه ــ نصر دينه
++++++++++++++++++++++
جيوشهم من طب عليهه ردهه للكوفه
حيدر وشمرة يمينه الوادم اتشوفه
يسطر الزلمه اعله وجهه اشمحله سطراته
ماتت الجيمه برعبها وباست جفوفه
أخو سكينه علي علي
نصر دينه علي علي
نصر دينه ــ نصر دينه
++++++++++++++++++++++
عمتي وصتني اديكم اله اگطعهه
وعيونكم يهل الغدر بالسيف اشلعهه
الموتكم يا آل أميه يزيد وداكم
اليوم هاي جيوشكم ليزيد ارجعها
أخو سكينه علي علي
نصر دينه علي علي
نصر دينه ــ نصر دينه
++++++++++++++++++++++
صاح وين اللي يبارز والتعرفونه
بكر ابن غانم طلعله الخوفه بعيونه
ابلا حجي طگه اعله راسه اﻻكبر بسيفه
سيفه شگ راسه وتوصط مفصل امتونه
أخو سكينه علي علي
نصر دينه علي علي
نصر دينه ــ نصر دينه
++++++++++++++++++++++
حسين باهض الحلفي

اشصاير يبابا وتنذبح
و تتعلك ابراس الرمح
وانه يسلبوني
امن ابجي يضربوني
وتتعلك براس الرمح
:::::::::::::::::::::::::::::::::::::::::::::::::::::::::::::
آنه وخوتي للقصر يابويه طبونـــــــــــــه
ويزيد گاعد عالعرش وكباله خلونــــــــــه
وعاين يبابا العمتي ويخزرها بعيونــــــــه
وجرّو عليلك بالحبل رادو يذبحونــــــــــه
الله ياهضم السبي ـ من عاينوا ستر النبي
وانـــه انخطف لونــي
امن ابجي يضربوني
وتتعلك براس الرمح
:::::::::::::::::::::::::::::::::::::::::::::::::::::::::::::
يتنومس ايزيد ابجتلنه ويذكر اسلافــــــه
وجابوله راسك بالطشت وبن الدعي شافه
وجهك يبابا امن الشمس متغيره او صافه
وبالخيزران ابكل حقد ضل يضرب اشفافه
بيهن محمد قبلك ـ وعليهن ايصلي الملك
يــــاريت ذبحـــوني
امن ابجي يضربوني
وتتعلك براس الرمح
:::::::::::::::::::::::::::::::::::::::::::::::::::::::::::::
خليت اديه اعله الوجه لمن نضر ليــــــــــنه
يا وسفه ماضلت زلم عدنه وتحاميـــــــــــنه
اعيونه حمره امن الزعل ويعاين عليـــــــــنه
عباس وينك ما تجي اتحط صبعك بعيـــــنه
يا عمي وينك ياشهم ــ يا كاسر اخشوم الزلم
يــاگـــره عيـــونــــي
امن ابجي يضربوني
وتتعلك براس الرمـح
:::::::::::::::::::::::::::::::::::::::::::::::::::::::::::::
شيل العصه عن والدي يكفي تذبحونـــــــــــــــــه
ميـــت ابــــوي ابيا ذنـب لمن تضربونــــــــــــــــه
عاينلي غضبان وخفت من نضره عيونـــــــــــــــه
شال العصه وطك راس ابوي وكسر اسنونـــــــــه
جدامي راسك ينضرب ـ ريت انضرب راس الگلب
وگـــامو يـــدفعــوني
امن ابجي يضربوني
وتتعلك براس الرمح
:::::::::::::::::::::::::::::::::::::::::::::::::::::::::::::
عگبك يبابا اتلوعت ياهو اللي يرحمـــــني
واحد دفعني اعله الوجه والثاني شتمـــني
وبسوط واحد من طحت زورگ جلد متني
او واحد يگلهم جاريه خلوها تخدمـــــــني
كتلهم امي فاطمه ـ ابيا دين اصيرا خادمه
بســكم تضلــمونـــي
امن ابجي يضربوني
وتتعلك براس الرمح
:::::::::::::::::::::::::::::::::::::::::::::::::::::::::::::
ياعــــــــمه زينب حشمت لحكيني ياعمــــه
ياعــــــــمه ما عدهم رحم ﻻدين ﻻذمــــــــه
ياعــــــــمه مطبوع اﻻثر بخدودي جف زلمه
ياعمه احس متني انجرح بيدي هيست دمه
بهدومي تربان وملح ـ ويلجمني ياعمه الجرح
يــــالـــوعه متــوني
امن ابجي يضربوني
وتتعلك براس الرمح
:::::::::::::::::::::::::::::::::::::::::::::::::::::::::::::
حسين باهض الحلفي

ما يكابر ➖جرحه ساهر➖أبو طاهر➖عمه أبو الحسنين
بيده رايه➖وعنده غايه➖أمن البدايه➖إينفذ أمر حسين
حياه ➖حياه ➖ حي الله سبع الليل
⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒
تحله بچفوفه القياده➖روحه عزمت عالشهاده➖يعرگ أجبين السياده➖چنه زمزم
الفادي عمره وفادي روحه➖تنزف الغيره بجروحه
➖صاحب الروح السموحه➖وحله أبن عم
الكوفه تشهد➖بيهه من هد➖مسلم أرعد➖چنه زلزاله
من يقاتل➖سيفه عادل➖ما يجامل➖عرفو أفعاله
حياه➖حياه➖بالضلمه نجم سهيل
حياه ➖حياه ➖ حي الله سبع الليل
⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒
أشر بصبعه ولواها➖الحومه بيمينه خذاها➖الساحه بسمه ومانساها➖أشمحله عزمه
سير أعليهم يسامر➖ما ترك واحد لباجر➖هذا كسار الخواطر➖مسلم إسمه
فدوه لسمه➖الطگه يعمه➖والله زلمه➖أمعدل وهيبه
دمه غالي➖خشمه عالي➖ما يبالي➖أشمحله ترتيبه
حياه➖حياه➖ يالاوي ضهر الخيل
حياه ➖حياه ➖ حي الله سبع الليل
⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒
طوعه تشهد يابو طلبه➖الفارس أبچفك تصلبه➖بالرمح تخمشله گلبه➖هي تشهد
گالت أبعيني أشوفه➖وحده هو وماكو كوفه➖عزل الجيش وصفوفه➖أبسيفه من هد
هايه ذمه➖أحچيهه يمه➖چنه عمه➖حيدر الكرار
ضل يطشر➖ضل يبعثر➖سيفه يكسر➖چنه حامي الجار➖ حياه حياه➖وبرمحه روس إيشيل
حياه ➖حياه ➖ حي الله سبع الليل
⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒
أتصدر أخبار الملاحم➖هاشمي أووارث هواشم➖هذا خريج الصوارم➖ما يجامل
أمدربه عمه الشفيه➖عالشجاعه الحيدريه➖أموصى بس الآل أميه➖من يقاتل
إيشد عليهه➖إيچفي بيهه➖گص أديهه➖الطلعت أتشوفه
ياندمهم➖ضاع أسمهم➖خله دمهم➖يترس الكوفه
حياه➖حياه➖خلاها مثل السيل
حياه ➖حياه ➖ حي الله سبع الليل
⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒
إيشد بالكحيله ويجرها➖بالحرب فرصه عمرها➖معتلي الحب أبضهرها ➖ ياغرامه
أمعدله وتندل خصيمه➖هو گمره وهيه غيمه➖بين إديه تصبح يتيمه➖ ياهيامه
ياذلوله ➖أمنيله لوله➖بيهه سوله➖أتقبل إيده
وهو فارس ➖ماهو حارس➖حته عابس➖من عبيده
حياه➖حياه➖من يصعد أعله الخيل
حياه ➖حياه ➖ حي الله سبع الليل
⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒
ماتو الكلهم أجوله➖تاهت وما مش رجوله➖أستسلموله وصفگوله➖وما نساهم
گص أدين أوگص مناحر➖ميت أو واحد يشاخر➖الكوفه صارت بس مقابر ➖من فناهم
الكوفه تبچي➖منه تشجي➖عنه تحجي➖الهسه خلاها
أشتنسه منه➖تروي عنه➖حربه فنه➖أبصيته تتباها
حياه➖حياه➖گوه الله هذا الحيل
حياه ➖حياه ➖ حي الله سبع الليل
⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒⌒
@wuhob

بابا ـ جن اشوف بحيرتك طفله سبيه
بابا ـ جنهه تلهــج شفـــتك آ يـارقيـــه
ويــن رايـح والعساكر حاطت الخيمه
وهـــاي نضراتك تگول ابنيتك ايتيمه
;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;
ليش ﻻبس درعك ومتقلد بسيفـــك
روحي بيك امعلكه وماتقبل اتعيفك
انته عيني وآنه اجمل سالفه بطيفك
روح اذا لفراكي تكدر ضلت بكيفـــك
عمري ـ كله سلمته الحنانك ونته ربيته
عمري ـ جان ورده بحاجتك من عطفك اسكيته
ﻻ تســـافر والســفر ما ينحمل ضيمـه
وهـــاي نضراتك تگول ابنيتك ايتيمه
;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;
كعدت بكتره وتلاعب شفته بيديــــهه
تضحك بوجهه وتشبگه ويشبگ عليهه
بعينه دمعه وماگدر يم بنته يجريـــهه
يدري بالطفله تحبه وخاف ياذيــــــهه
دمعه ـ ضلت بعينه تلالي وماگدر يبجي
دمعه ـ اوياها عبره أمكسره وخنگته مايحجي
ايخاف باجــر من يروح أتيه بالهيــمه
وهـــاي نضراتك تگول ابنيتك ايتيمه
;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;
ومن بعد ما راح ابوها ونسفك دمــــــه
ابلهفه گصدتله رقيه واوجبت يمـــــــــه
گامت اتصيح اعله ابوها ومانطق جلمه
لملم ايديه وشبگها وگامت اتشمـــــــــه
اتگله ـ ﻻتون مااحتمل يحسين وناتـــــك
اتگله ـ وين من بعدك يبابا ايروحن بناتك
وين من بعدك نضل لو هجمت الجيمه
وهـــاي نضراتك تگول ابنيتك ايتيمـه
;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;
گلــــب ماعدهه اليتيمه وگعدت بكتـره
وگامت اتسولفله عن ما ضيهه وتذكـره
بابا ماتدري العده صطروني جم صطره
ﻻن شمـــو بالعــبايــــه ريـــحة الزهــره
تدري ـ اجه ايدور بالخيم عن الزجيه
تدري ـ مادره لبست عبايتهه رقيــــه
وگام يصطرني اعله خدي المااله شمه
وهـــاي نضراتك تگول ابنيتك ايتيمه
;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;
بابا موبــــس ابمشيتي اشبه الزهـــــــره
بكلشي صرت اشبهه حته ابعينهه الحمره
بابا عنـــد امــــك ضلع متهشم ابعصره
وانه ضلعي امن الرفس ماينجبر كســـره
عمتي ـ من لذت بيهه دفعها وعالوجه طاحت
عمتي ـ من صطرني انشلت ايدك يانذل صاحت
تنضرب زينب يبابا اجبيره وهضيــمه
وهـــاي نضراتك تگول ابنيتك ايتيمه
;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;
وانه جيتك خايفه والنار جوتــني
اهواي تعبانه وهدل من الضرب متني
بابا من جر التراجي حيل اذتــني
ذاني جرحها ﻻن ابقوته عتـــــني
عتني ـ من سلب يابابا من أذني التراجي
عتني ـ وگام يسطرني اذا يسمع بواجي
وصدرك بخيل اﻻعادي صار تهشيــمه
وهـــاي نضراتك تگول ابنيتك ايتيمه
;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;
حسين باهض الحلفي

ملا حسين باهض الحلفي:
وضعك ابين العده يايمه بجانـي
ﻻتطيح امن المهر ذباحك ايتاني
سيوفهم تنتضرك ـ كلهه تطلب نحرك
=========================
ﻻبـــس احـمر يمه لو هذا دمــــاك
لون ثوبك مدري من دم الجـــراح
ياملك والمثلك انته براسه تــــاج
مو غريب وينذبح لو جسمه طاح
انته ما تلــبس مثل هذا القميـص
اشكوك بيه واثار طعنات الرمـاح
ليش وحدك وين خوانك حسين
مثل طير اوحيد مكسور الجناح
ليش يايمه وحيد ابين عدوانك ـ
ويــن جاعبــاس اخوك وباجي خوانك
ياهو يلزم ضهرك ـ كلهه تطلب نحرك
=========================
اتميل يمه امن المهر يمنه ويسار
اتشيل سيفك كوه ومحدب كفاك
ماتلــوح الفـــارس اليجبل عليـك
حيـل تعبـان ونـزف دمـك خـذاك
هــذا انتــه اليشـبك الخيل وينام
وعكبت جــم فارس ابفارس وراك
حسين ما ضل بيك دم حته يسيل
وسـهم المـثلث علـه المهـره حــناك
سهم المثلث صوبك وبحالك اشسوه ـ
جـدام عيني امـن الالـم ضليت تتلوه
شفته طاح ابصدرك ـ كلهه تطلب نحرك
=========================
وصلن اجروحك الف بس ما نسوك
حـيل اكــثر اســمع العســكر يصيح
اسمعت واحد كــال طعنوه بالـرماح
لـحد مــا مـن المـهر جـسمه يــطيـح
بجسمك ايغوص الرمح حـد الضلوع
الدنـيه ضلـمه بعـينك وضاك الفسيح
شفـته مـن ايـدك رخـه وطـاح العنان
اتـدور اعـله الـگـاع رايـــد تــسـتريـح
مــن العطش مــن التعب متهدهده اركانك ـ
يوليدي اشوف امن الضمه متيبس السانك
يمه حاير بمرك ـ كلهه تطلب نحرك
=========================
ﻻ تـحط خـدك عـله اوسـادة رمال
يمـه انـه امـك تعال بحضني نام
خـل اشـد اجروحك التنـزف حنان
وخلي من جسمك اطلعها السهـام
ﻻتــعــفــر خــدك ابــهـذا الـــتـراب
انـتـه كـون اوسـادتـك ريش النعام
لـيـش مـحـد عـنـك ايـدافع عجيب
او حـيـد ﻻ انـصـار عـنـدك ﻻ عـمـام
تتگلب ابحر الشمس يايمه جدامي ـ
وتگلي يمه امروتج عينج عله اخيامي
عمري فدوه العمرك ـ كلهه تطلب نحرك
=========================
لـحـضـه مـاخـلـوك تـگـعـد تستراح
يـمـه مـن كـل جـانـب التـمو عليك
هـذا يـرمـيـك بـحـجـر هـذا بـنـبال
ونـتـه مـا تـگـدر بـعـد تـرفـع اديـك
انـتـه يـوليـدي العـطـش فطر شفاك
ماهو اخــيك حتــه بالجـربه يجـيك
يـمـه هـذا الـشمـر مـتـحـضـر يـريـد
بـخـنـجـره ولـلـذبـح رايـد يـعـتـنيك
يوليدي ما عدهم رحم مارحمو بحالي ـ
فوگ الصدر شمر اعتله وحز راسك اگبالي
او انه عيني اتنضرك ـ كلهه تطلب نحرك
=========================
حسين باهض الحلفي

جبير السوگ ـ نطب عالنوگ
عله الشام ودواوينه ـ بحبال ايدينه طبينه
±±±±±±±±±±±±±±±±±±±±±±±±±±±±±
يماي العين ياخويه حياتي ابدونك شتسوه
يـاجـرحي الـجـبـيـر الـلي تـركـتك منذبح توه
بهذا الوكت يبن امي شكثر محتاجه للخـوه
يـريـد الحـادي يـاخـويه اطـب للشام بالگوه
بحرم وطفال مشه الجمال
حده الحادي وگطع بينه بحبال ايدينه طبينه
±±±±±±±±±±±±±±±±±±±±±±±±±±±±±
تبين كسره الخاطر ابوجه كل طفله مسبيه
رقيه اتغطي دمعتهه وتلوذ امن الخجل بيه
تكسر خاطري اسكينه تمشي اگبالي محنيه
عمت عين الزمان البي الخلـگ تتفرج عليه
خدر عباس عيون الناس
تصبحنه وتمسينه بحبال ايدينه طبينه
±±±±±±±±±±±±±±±±±±±±±±±±±±±±±
ثــلث تيام وكفنه اعله باب القــصر ســابينه
بشتمات وحجاره الناس كامت وسفه ترمينه
هذا يصــيح يازينب سـبيه اشـطــبج عـليـنه
كـافـل خـدرج الـعـبـاس هـذا الـيـوم جاوينه
اخوتج وين الگمر وحسين
حجي الشامت يبجينه بحبال ايدينه طبينه
±±±±±±±±±±±±±±±±±±±±±±±±±±±±±
جــم ديــوان طــبونه وجــم ديـــره الـدخـلنـاهــا
والــــعـذب دلـيـلـي الـشـام ريـت اولا وصـلـنـاهـا
تـلـكـتـنـه بـعـزف وطـبـول وشـتـم اهلي سمعناها
الحادي ايطبنه وسط السوگ بيسرنه ايريد يتباها
نِسه وايتام نطب للشام
الخلك تتفرج اعلينه بحبال ايدينه طبينه
±±±±±±±±±±±±±±±±±±±±±±±±±±±±±
القصر الطاغي طبونه گاعد عالعرش شفته
راس حسين جدامه وسف بعيوني شاهدته
اگبال عيون اخياته بعصاته ايحرك بشفـته
شتّم امــــي الزهره وشتّم والــدي اسمعته
سمعته ايگول خوارج ذول
شتمنه وسب اهالينه بحبال ايدينه طبينه
±±±±±±±±±±±±±±±±±±±±±±±±±±±±±
حسين باهض الحلفي

ليش تمشي وتلتفت ــ جنك امضيع اخت
الجيش كله ضل يصيح ــ هاﻻسد يمكن جريح
°°°°°°°°°°°°°°°°°°°°°°°°°°°°°°°°°°°°°°°°°°°
هيبه الدنيا ابمشيتك والهوه من تمشي يفتحلك مجال
تارك الخيمه بحرمها اوحيد متعني وردت تطلب نزال
ﻻجن بعينك دمعتك او آه لمن تنزل ادموع الرجال
بيا وكت بالحومه تبجي وسيل دمعك بلل خدود الرمال
شايل بگلبك جرح ــ اهواي اشد من الذبح
ابريتك ضاگ الفسيح ــ هاﻻسد يمكن جريح
°°°°°°°°°°°°°°°°°°°°°°°°°°°°°°°°°°°°°°°°°°°
للخيم گلبك يردك والفرس خطواته تسحگ للامام
ايدك اعله السيف لاكن فكرك يطوف اعله زينب بالخيام
تحجي وي گلبك تگله شلون بختي وألهه گدهري شنهي ضام
هاتضل بليه خيمه وين باجر هيه وبناتي تنام
اشما يطگ گلبك سهم ـــ اتدير عينك للخيم
زينب بدمك تسيح ــ هاﻻسد يمكن جريح
°°°°°°°°°°°°°°°°°°°°°°°°°°°°°°°°°°°°°°°°°°°
شلون تحمي الخيمه وحدك هذا جيش اهواي مالمته عين
عمر صاح الدنيا فرصه وياخذ اكبر جائزه اليذبح حسين
شمر گال انطوني مشعل آنه اريد احرگ بيوت الضالمين
خيمه وحده وكلهه تركض هذا يسلب ذاك اليجتف ادين
بيك كل كسرة ضلع ـــ صوت زينب تستمع
ونته متوسد طريح ــ هاﻻسد يمكن جريح
°°°°°°°°°°°°°°°°°°°°°°°°°°°°°°°°°°°°°°°°°°°
طايح ابدنيه جبيره وحومه وسعه والخدر عنك بعيد
ياامام اﻻمه كلهه بس وسافه الامه شو تبعت يزيد
بس وريد اوحيد عندك وجيشهم سبعين الف يطلب وريد
ونته كل الدنيا ملكك لاجن امن الدنيا بس زينب تريد
حسين من من تعتذر ـــ اشگد عدت جلمه خدر
وگلت خل اهوه واطيح ـــ هاﻻسد يمكن جريح
°°°°°°°°°°°°°°°°°°°°°°°°°°°°°°°°°°°°°°°°°°°
ابروحك تجود اويه روحك بينك وبين الذبح ساعة زمان
انطيت لليذبح وريدك گتله بس خدر اختي اريدنه ابامان
خشنه گاع الطف عجيبه تخلي خدك وين شو ماكو مكان
بكل دماك اتسيل زينب ولذلك تنزف جروحك حنان
ساعه ويروح الشمر ـــ يوگف ايشوف الخدر
ابسبي زينب يستريح ـــ هاﻻسد يمكن جريح
°°°°°°°°°°°°°°°°°°°°°°°°°°°°°°°°°°°°°°°°°°°
الخيل داست فوگ صدرك ترفه روحك والسنابك خشنه حيل
اﻻعوجيه اشگد ثكيله ابكل اثر حافر ضلع كامل تشيل
المغرب تدورك رقيه ونته من جسمك بقى بس شي قليل
ابكل كتر عطرك تشمه اتصيح بابا اشما تمر من يمهه خيل
يمهه كل مامر مهر ـــ اتصيح اشم ريحة عطر
عطر الحسين الذبيح ـــ هاﻻسد يمكن جريح
°°°°°°°°°°°°°°°°°°°°°°°°°°°°°°°°°°°°°°°°°°°
حسين باهض الحلفي

بيج آنه أحس مشتاگه➖يالصاعده أعله الناگه
متعذبه➖جي ناگتج هزيله
ومتسلبه➖ ياعمه يالعقيله
عمه زينب➖عمه زينب➖عمه زينب
♨⬅♨⬅♨⬅♨⬅♨⬅♨⬅♨
صعدن عله النوگ أبعبي➖طاري الهوه أيأذيهن
سلب مقانعهن شمر➖وسلب جفوف أيديهن
گصرن عبيهن بالحرگ➖وبين جدم رجليهن
لا كافل أولاضل خدر➖سوط السبي أيماشيهن
أوف➖يازمن➖زينب تراها
أوف➖بالسبي➖حدب گفاها
عگب الخدر تاليهه➖أتضم الوجه بيديهه
ومحدبه➖ ودمع الهضم تسيله
ومتسلبه➖ياعمه يالعقيله
عمه زينب➖عمه زينب➖عمه زينب
♨⬅♨⬅♨⬅♨⬅♨⬅♨⬅♨
الخمشو تراجيهه خمش➖وعيون عدهه أمزورگه
أتعاين العمتهه غدت➖شافتهه تمشي أمدنگه
صاحت يخدر الله أوعلي➖هاي أنتي ماني أمصدگه
فوگ الهزيله أبلاغطه➖وعبايتج متحرگه
أوي➖گلبي عمه وجعني
أوي➖حالج شفته وفجعني
شو دمعتج مسفوحه➖وحجايتج مذبوحه
متألمه➖يالبالخدر جليله
ومتسلبه➖ ياعمه يالعقيله
عمه زينب➖عمه زينب➖عمه زينب
♨⬅♨⬅♨⬅♨⬅♨⬅♨⬅♨
ياعمه مكسورة ضهر➖لو بالخجل محنيه
حاجيني ياهيبة علي➖أتكطع گلبها أرقيه
گلي لبوي أعله الشمر➖وحجيله عالترجيه
وگليله عن حالج بعد➖يازينب المسبيه
آخ ➖ ضهري يلجمني عمه
آخ➖ متني مسحيلي دمه
حيل الشمر أذاني➖وگطع عصب إذاني
والشمر ➖ بيه شفه غليله
ومتسلبه ➖ ياعمه يالعقيله
عمه زينب➖عمه زينب➖عمه زينب
♨⬅♨⬅♨⬅♨⬅♨⬅♨⬅♨
الماخوذه گوه أبلاولي➖صبت دمه أمن أعيونهه
المسبيه تمشي أويه الشمر➖يبنيتي شوفي أشلونهه
عمتج رقيه أمن الضرب➖هدلن يعمه أمتونهه
زجر وخوله والشمر➖أشگد بالسبي أيطگونهه
صوط➖عالمتن وشسوه بيه
صوط➖بالضرب گطع أديه
ياعمه يالحبيبه➖عمتج صفت غريبه
شماجره➖بس ما صرت ذليله
ومتسلبه➖ ياعمه يالعقيله
عمه زينب➖عمه زينب➖عمه زينب
♨⬅♨⬅♨⬅♨⬅♨⬅♨⬅♨
لاصوت لا عندج عتب➖مخنوگه ليش انفاسج
مكسور ضهرج عالهزل➖ومجروح لون احساسج
متونج تميل اويه الهوه➖وهدلت الشيله براسج
متحفيّه يخت الگمر➖مبيوگ حته امداسج
وين➖كافلج مايفزع ألنه
وين➖نخوته وذيج المحنه
صيحيله بسمه مره➖ضهر الشمر يكسره
وللخدر➖مايعتذر كفيله
ومتسلبه➖ ياعمه يالعقيله
عمه زينب➖عمه زينب➖عمه زينب
♨⬅♨⬅♨⬅♨⬅♨⬅♨⬅♨
لا يارقيه مايرد➖إي والمتن والشيله
لوجان يسمع نخوتي➖جا هسه گمت أشكيله
راسه أعله رمحه ماگعد➖لموه وصل بشليله
الماعنده راس أولا جسد➖ياعمه شنهو أحجيله
آه ➖عازته لمن زجر نهرني
آه➖حشمت بيه ما أجه وحضرني
ياعمه يارقيه ➖ أتشلع لحم أديه
متغربه➖ياسفرتي الطويله
ومتسلبه➖ ياعمه يالعقيله
عمه زينب➖عمه زينب➖عمه زينب
♨⬅♨⬅♨⬅♨⬅♨⬅♨⬅♨
➖➖➖➖➖➖➖➖
حسين باهض الحلفي

عزيزه أمدلله ﻻ ﻻ تجتفوني
اكل لحسين ابويه لو تضربوني
الحبل ياذي أديه ـ زغيره اعله الاذيه
اكل لحسين ابويه لو تضربوني
====<>=====<>=====<>=====<>====
زغيره امدلله ومحمل اذيه
عزيزة كل خواتي اسمي رقيه
ابوي حسين منطيني هديه
عبايه امن امي فاطمة الزجيه
يشمني والدي وكلساع اشمه ـــ
يشبهني الابو بالزهره امه
مثل امه الزجيه ــ زغيره اعله الاذيه
اكل لحسين ابويه لو تضربوني
====<>=====<>=====<>=====<>====
عجيبه حسين راح اوما اجاني
وعدني ابجيته وضليت اتاني
اعله ابوي حسين يتفايض حناني
اريد اشگيله المصاب الدهاني
اگله يالابو لحگ عليه ـــ
عزيزة گلبك اخذوها سبيه
يبويه انا رقيه ــ زغيره اعله الاذيه
اكل لحسين ابويه لو تضربوني
====<>=====<>=====<>=====<>====
الشمر بيه توگل صوطه بيده
يضربني امن اگول حسين اريده
يبويه وهالمسافات البعيده
شلون اگضيهه ياابن الصميده
اگضيهه تحت شتم او مسبه ـــ
ومن ابجي الشمر متني يضربه
يبويه اشسوه بيه ــ زغيره اعله الاذيه
اكل لحسين ابويه لو تضربوني
====<>=====<>=====<>=====<>====
يبويه امن الضرب هدمي تشگگ
ونه زغيره تره اوما احمل الطگ
غده متني علي من سوطه ازرگ
ومشي حافيه او جدامي امحرگ
يجويني الرمل وعليه يمشوني ــ
وانه حافيه وزغيره يدروني
اضل احبي اعله اديه ـ زغيره اعله الاذيه
اكل لحسين ابويه لو تضربوني
====<>=====<>=====<>=====<>====
وصلنه الشام وباب القصر صرنه
وبها اللحضه لن الحرس وگفنه
اعله اسامينه غده يابويه يسألنه
يعزلون الاسمهه فاطمه منه
الاسمهه فاطمه خدها يسطرونه ــ
وضلعها ابخشبه يابويه يكسرونه
وانه بدمعه جريه ــ زغيره اعله الاذيه
اكل لحسين ابويه لو تضربوني
====<>=====<>=====<>=====<>====
يبويه والله حيره اتحيرينه
تره طبت القصر تصعب علينه
وبره الناس تصيح بينه
ندور عن ملاذ اوما لگيينه
تره طبت القصر يا والدي صعبه ــ
زلم كثره يبويه والزلم غربه
يمصعب هالرزيه ــ زغيره اعله الاذيه
اكل لحسين ابويه لو تضربوني
====<>=====<>=====<>=====<>====
خذوني للخرابه او بيهه خلوني
او راسك بالطشت يابويه راووني
شبكت الراس بويه وغمضت اعيوني
وعلى راسك اموت ابحسره رادوني
على راسك متت بويه ينور العين ـــ
طلعت روحي وي ما گلت بابا حسين
وبونه شجيه ــ زغيره اعله الاذيه
اكل لحسين ابويه لو تضربوني
====<>=====<>=====<>=====<>====
حسين باهض الحلفي

أهنا حرمنه أتسلبت وخيمنه حرگوها
وهنا يتامه اتسحگت وخواني ذبحوها
راوتني گاعج جم ألم
ياكربله ومحد سلم
وخـوانـي ذبـحـوها
®®®®®®®®®®®®®®®®®®®
ياذكرياتج كربله جم نايبه ولوعه
بيج انكسر گلبي وصرت مالومه مفجوعه
ابگاعج شفت جف الگمر عالشاطي مكطوعه
وهنا جنت من البجي اعله اخواني ممنوعه
اهنا صحت وهنا طحت وهنانه شتموني ــ
وهنا طفل يصرخ غده ياعمه ضربوني
ومحد رحم هاي الحرم
ياكربله ومحد سلم
وخـوانـي ذبـحـوها
®®®®®®®®®®®®®®®®®®®
بيج انذبح خدر الوصي وي ذبحة الضامي
وبيج احترگ گلبي مثل ماحركو خيامي
وبيج اجمع ابصبري غصب ومطشره ايتامي
جم طفله انضر حافيه ومنهه الجدم دامي
اذكر يتيمه اتسلبت جرو تراجيهه ــ
اتخلي اديهه اعله اﻻذن وتگلي شوفيهه
ومن تبجي والدهه انشتم
ياكربله ومحد سلم
وخـوانـي ذبـحـوها
®®®®®®®®®®®®®®®®®®®
من جلجل الليل اطلعت بس بيه مابيه
لن صوت من خلفي اسمعت صاحت يمسبيه
ياعمه فدوه الخاطري بس ريضي شويه
هزني الحنين الوالدي ياعمه انه رقيه
صدكيني ما اگدر بعد ياعمه لفراگه ــ
مشتاگه روحي الوالدي ياعمه مشتاگه
اهجس ركن حيلي انهدم
ياكربله ومحد سلم
وخـوانـي ذبـحـوها
®®®®®®®®®®®®®®®®®®®
خفت اعله گلب ابنيته تشوفه عله الغبره
ارميت العبايه اعله الجسد اخفي كسر صدره
سكتت شفتهه امن البجي ومتدت بكتره
مدت اديهه وشبكته ولمست جرح نحره
من مالگت راسه بجت صاحت يعمه اتأكدي ــ
انه شبكت دم ونحر معقوله ذبحو والدي
وبصدره جم سهم بسهم
ياكربله ومحد سلم
وخـوانـي ذبـحـوها
®®®®®®®®®®®®®®®®®®®
ضلن ينوحن عالجسد البنيه والعمه
هاي التقبله بمنحره وتضمه وتشمه
وهاي الوجهه اتخضبه وتصبغه من دمه
وهاي التگول أوياه اضل وگضي العمر يمه
وهاي التصيح امروتك اختك غريبه ونختك ــ
وهاي التگله اعله البعد ماعودتهه ابنيتك
يابويه دﻻلي انجسم
ياكربله ومحد سلم
وخـوانـي ذبـحـوها
®®®®®®®®®®®®®®®®®®®
ياكربله واكثر بعد ايدي الحبل شدهه
وجابولي ناگه ابلاغطه عرجه وصعب ردهه
واحد يگول امخدره وتصعد لوحدهه
وشامت يصيح ابلا خجل عباس صعدهه
من اسمعت طاري اﻻخو حن گلبي وندهته ــ
گالولي طاح اعله النهر وجفوفه خانته
يم النهر راسه انهشم
ياكربله ومحد سلم
وخـوانـي ذبـحـوها
®®®®®®®®®®®®®®®®®®®
حسين باهض الحلفي

ياترافه روحي يمذبوجي
ياطبيب جروحي وسبب نوحي
والوداع اوياك مايحلالي
ياعزيز الروح وجمل غالي
حبيب حسين ـــ حسين حبيب
✴️✴️✴️✴️✴️✴️✴️✴️✴️✴️✴️✴️✴️✴️✴️
انته روحي وآنه من دونك جسد وبلايه روح
انته گلبي وين رايح عيشتي بعد جروح
تحيرني ابسبب هجرك تعذبني بسبب بعدك عليه
يـمـالكـني اشعجب رايـد تفاركني ولاجني رقيـه
يالنويت اتهاجر كسر خاطر ⬅️
گول اردلج باجر يالمسافر
حالي ضايع يلي عندك حالي ⬅️
ياعزيز الروح وجمل غالي
حبيب حسين ـــ حسين حبيب
✴️✴️✴️✴️✴️✴️✴️✴️✴️✴️✴️✴️✴️✴️✴️
عمري ايام يكضن ابين الهجر وهموم الفراگ
اگدر انساك لو اعيش الحد مماتي وگلبي مشتاگ
يعذبني البعد مره ويتعبني انتضارك ياحبيبي
تسلمني الالم دهري ويالمني غيابك ياطبيبي
يالعشت بحساسي ياأنفاسي ⬅️
يااعز كل ناسي الزمن قاسي
يانضر عيني وفرح دلالي ⬅️
ياعزيز الروح وجمل غالي
حبيب حسين ـــ حسين حبيب
✴️✴️✴️✴️✴️✴️✴️✴️✴️✴️✴️✴️✴️✴️✴️
ليلي سكته وجنه باجر مايجي وحضنك بعيد
اگدر انسه لامحال وگلبي غيرك ما يريد
الم دمعي واصب عيني انحنه ضلعي ابمغيبك ياحياتي
صعب وضعي اذا ترحل اضل انعي اعله بابك حد مماتي
يافرح دﻻلي صعب حالي ⬅️
يلي شغل بالي يئآمالي
النوح ضل بس والحزن يبرالي ⬅️
ياعزيز الروح وجمل غالي
حبيب حسين ـــ حسين حبيب
✴️✴️✴️✴️✴️✴️✴️✴️✴️✴️✴️✴️✴️✴️✴️
يـــارقيه ➖گلهه ياأجمل نفس اتنفسه بشــوگ
يالحبيبه ➖ ﻻ تصبين الدمع ما يروي مخنوگ
جري المدمع يهد حيلي عزيزه ودمعتج تصعب عليه
اذا اطلع بــعد عنــج حـلم نــرجع بعـــد ونـرد سويه
انتي آية ليلي وتراتيلي ⬅️
هيجي يضعف حيلي لتبجيلي
امن المدامع ضحكتج احلالي ⬅️
ياعزيزه الروح وجمل غالي
حبيب حسين ـــ حسين حبيب
✴️✴️✴️✴️✴️✴️✴️✴️✴️✴️✴️✴️✴️✴️✴️
گلـهن ايـام ➖ ايــعـكــبـن ونــرد سـوه ياحـلـة الـعـيـن
يگضن بساع ➖ ومن جديد ترد رقيه بحضن الحسين
يماشيني لاجل بره يحاجيني السهم وگليبي لباه
تصد عيني الشمر واكف يتانيني اشوفه وحرمله وياه
والخيم يلفوها ويحرگوها⬅️
ابنيتي يسطروها ويسلبوها
وما يصح يمج حمه او لا والي ⬅️
ياعزيزه الروح وجمل غالي
حبيب حسين ـــ حسين حبيب
✴️✴️✴️✴️✴️✴️✴️✴️✴️✴️✴️✴️✴️✴️✴️
هم الاكيج ➖ وگعد بحضنج يبابا وانه مذبوح
ونتي تبجين ➖ والبواجي ماترد للميت الروح
يصب دمعج عله الحيتي ورد عطرج يمر بيه واشمه
بصده صوتج تناديني ردت منج يبابا الاحله جلمه
لمن اتنادني تذكريني ⬅️
بيدج اتشبكيني وتبوسيني
ما نسيتج يلي عشتي ابالي ⬅️
ياعزيزه الروح وجمل غالي
حبيب حسين ـــ حسين حبيب
✴️✴️✴️✴️✴️✴️✴️✴️✴️✴️✴️✴️✴️
حسين باهض الحلفي

مني خذت حبيبي➖وبفراگه ضيعتني➖يالبگت فرحتي
ﻻتطب خيمنه➖شوفتك عذابي➖ﻻتدنه عمتي
ﻻﻻ تزعلهه➖مايرضى كافلهه➖شوفتك عذابي
❌❌❌❌❌❌❌❌❌❌❌❌❌❌
گاعدات بخيمه واليسلب گريب ➖اوين اليحاميهن
خيمه تكطر نار لسه ابليه باب ➖والهضم غاطيهن
كتر بكتر يتلاوذن مثل الحمام
إيخافن اعليهن تصد عين الحرام
ياناس ذن جدهن نبي وبنات امام
اتصيح اشكثر رقيه➖ياعمه انه اخافاً➖اتاخرعليه بابا
خلينه اروح ادوره➖محتاجه اشوفه هسه➖مااحتمل عذابه
وضلت تسايلهه ➖مايرضى كافلهه➖شوفتك عذابي
❌❌❌❌❌❌❌❌❌❌❌❌❌❌
بره صوت يصيح مذبوح الحسين➖رادو ايسمعونهن
بره واحد كل للاخر هذا صوط➖ حيل طگ امتونهن
اصواتهم خشنه وﻻبيهه حنان
ذوله مين الذبهم علينه الزمان
صاح واحد ذني ما الهن امان
والواكف اعله بابي➖اشگد شتم ابخواتي➖وبينه اشتفه غليله
يخزرنه وحده وحده➖تالي رجع سالني➖من منجن العقيله
ايدور على ذلهه ➖مايرضى كافلهه➖شوفتك عذابي
❌❌❌❌❌❌❌❌❌❌❌❌❌❌
كتله اسكت يزعل اهواي الكفيل➖لو جبت طاريهه
اسم زينب لفضه بلسانك حرام➖سوره نزلت بيهه
حروف اسمهه امن الله نزلت عالرسول
هاي خدر الله الجبير انته شتگول
عربي انته شبيك ماعندك اصول
ﻻ تقترب عليهه➖وديني وانه اگلهه➖بس لا تصد علينه
انجانك ردت سبينه➖انطيني الحبل اليه➖وحنه النشد ادينه
آنه اگللهه ➖مايرضى كافلهه➖شوفتك عذابي
❌❌❌❌❌❌❌❌❌❌❌❌❌❌
اتفاجئت طكني اعله خدي بجفه حيل ➖شنهي بادر مني
اخدودي انه امعوده اعله اشفاف ابوي➖ليش هيج اتطكني
اتطگني بيدك حيل بس انه شجنيت
عيني طاحت بيدي من طگني وبجيت
بيك ضالم هالكثر لا ما دريت
رد گلي رقيه➖انه اذبحت عزيزج➖وجيت اسبي بيدي اخته
وشفايفه التبوسج➖سطرات اديه ذني➖ايعوضنج اعله شفته
ادموعج اسبلهه ➖مايرضى كافلهه➖شوفتك عذابي
❌❌❌❌❌❌❌❌❌❌❌❌❌❌
گتله هسه للخيم يرجع ابوي➖ومنك ارد اشكيله
ارد اگله الزلمه هذا اشگد لئيم➖طكني ابكل حيله
ارد اراويه خدي وشسوه اللعين
وارد اگله بسطرته روحلي عين
بحبله جاي ايربط الزينب ادين
لاجنه اذه گلبي➖احجايه گلي بيهه➖ريت اولا سمعته
جلمة بابا ماتت➖گبل اشويه بيدي➖والدج ذبحته
وراح اليدللهه ➖مايرضى كافلهه➖شوفتك عذابي
❌❌❌❌❌❌❌❌❌❌❌❌❌❌
عمه عمه هذا گلي مات ابوج ➖هالحجي سامعته
توه ودعني ومشه وگلي اجيج➖وهذا گال اذبحته
عمه گليله جذب هذا الكلام
عمه گليله اليطگ طفله حرام
انه تعبانه واريد بحضنه انام
ياعمه والهضيمه➖والصوب دليلي➖يضحك اعله حالج
يازينب يكلج➖حضري ادينج➖خل اشد حبالج
وتصعد هزايلهه ➖مايرضى كافلهه➖شوفتك عذابي
❌❌❌❌❌❌❌❌❌❌❌❌❌❌
حسين باهض الحلفي

عمه لو رديتي باجر يالعقيله
وصلي شوگي وسﻻمي للعليله
باجر تسألج عليه 〰️عمه شو ماهي رقيه
🔻🔺🔻🔺🔻🔺🔻🔺🔻🔺🔻🔺🔻🔺🔻
عمه گعدي اعتاب عندي اوياج العتاب
عمه ليش اتأمليني ابطاري الغياب
اقسم اعليج ابمصيبه امي والباب
هم بعد ياعمه ترجع ذيج اﻻحباب
عـمه گـليلي الصراحه وﻻ تـضـمين
حسين ياعمه بسفر لو ميت حسين
عليج بالزهره الزجيه 〰 ️عمه شو ماهي رقيه
🔻🔺🔻🔺🔻🔺🔻🔺🔻🔺🔻🔺🔻🔺🔻
عمه باجر لو رجع ضعنج يعمه
سلميلي اعله العليله وهاي ذمه
اخذي ثوبي اوياج خليهه تضمه
عمه من تشتاگلي اتطلعه وتشمه
هـذا ثـوبـي نـاگـع ابـدمع البواجي
وبـي نگط دم من اثر جر التراجي
باجر اتگلج خطيه 〰️ عمه شو ماهي رقيه
🔻🔺🔻🔺🔻🔺🔻🔺🔻🔺🔻🔺🔻🔺🔻
عمه ثوبي والعبايه اخذيهه تذكار
عمه بس طرف العبايه ﻻحته النار
عمه لتكليلهه اعليه اشجره وصار
يكفي ياعمه عليهه وحشه الدار
يكفي ياعـمـه عليهه امساهر الليل
عمه ما يحمل مصايب طبع العليل
عله وفراگ واذيه 〰️ عمه شو ماهي رقيه
🔻🔺🔻🔺🔻🔺🔻🔺🔻🔺🔻🔺🔻🔺🔻
عمه لو غسلتي جسمي وثوبي شلتيه
متني مجروح أعله كيفج لا تلجميه
الماي ياعمه اعله ضهري بهيده صبيه
لازگ الثوب اعله جرحي براضه شيليه
جنهم ايطلبوني حيف او اخذو الحيف
وانـه لـعـابـه ابـاديـه مـا شـلـت سـيـف
اخباري خليهه خفيه 〰️عمه شو ماهي رقيه
🔻🔺🔻🔺🔻🔺🔻🔺🔻🔺🔻🔺🔻🔺🔻
ادري هيه محضره اهدوم ولعايب
حگها ما تدري جوت خدي الترايب
فرشت الدار ابأمل جيت الحبايب
ما درت ياعمه خلونه بخرايب
لـو تـمـر نـسمه هوه ويتحرك الباب
تركض وتصرخ هله بيكم يالاحباب
اتصيح بدموع الجريه 〰️ عمه شو ماهي رقيه
🔻🔺🔻🔺🔻🔺🔻🔺🔻🔺🔻🔺🔻🔺🔻
حسين باهض الحلفي

تمشين➖جا ما دريتي الياقصر باجر تطبين
تمشين➖يم الجلاله وينج أوين الدواوين
محملج ميال شو ويه الهوه
ضهرج شماله عله الناگه التوه
هايزينب ➖ هايزينب ➖هايزينب
🔺🔵🔺🔵🔺🔵🔺🔵🔺🔵🔺🔵🔺🔵🔺
الربت الغيره بحضنهه وكبرت وسمتهه كافل للخدر
وين شو تمشي الوحدهه وكافل الناگه شخص أسمه الشمر
أمخدرة عباس جانت سيفه بيده ويذبح النسمه التمر
وهسه حيل الريح عالي وماگو فوگ النوگ هودج للستر
والسوط➖تعب أدين الشايله أشگد ورم متون
والسوط➖جان أسود ولكن تحول أحمر اللون
سوط عطشان وبالمتون أرتوه
ضهرج شماله عله الناگه التوه
هايزينب ➖ هايزينب ➖هايزينب
🔺🔵🔺🔵🔺🔵🔺🔵🔺🔵🔺🔵🔺🔵🔺
إي صحيح النوگ هزله لجن تمشي وبالصحاري عدهه حيل
ناگه وحده عليهه زينب گوه تمشي وتختلف عن الهزيل
عرجه شيثبت حملهه تخاف زينب بيهه لو گامت تميل
هاي المصيّت خدرها شلون دون أخوتها يا وادم تشيل
عباس➖ضعون هاشم صعدت النوگ المهازيل
عباس➖جم يتيمه تخاف من صوت الرياجيل
يابوفاضل حته طيحتهن سوه
ضهرج شماله عله الناگه التوه
هايزينب ➖ هايزينب ➖هايزينب
🔺🔵🔺🔵🔺🔵🔺🔵🔺🔵🔺🔵🔺🔵🔺
الدنيه تحسدني أعله أخوتي الليل ماصد لخيالي ولاجسر
والشمس يختل ضواها لو عباتي طلعت أتغض النضر
وهسه أمشي وماكو والي وناس غربه أمنين ماصد للبشر
الحادي والشامت شفتهم وماشفت ياوسفه وياهم گمر
شمات➖دار الزمن وياهم أمشي بليه كفّال
شمات➖داير مداري وحملي فوگ الناگه ميال
السير تعبني ورگد عضمي وخوه
ضهرج شماله عله الناگه التوه
هايزينب ➖ هايزينب ➖هايزينب
🔺🔵🔺🔵🔺🔵🔺🔵🔺🔵🔺🔵🔺🔵🔺
عاتبت راس الكفلني ودمعتي تتفايض بطرف الجفن
تدري ياعباس تدري أمن السبي طول الدرب زينب تون
طويل دربي وناگه هزله وسوط ياعباس مافارگ متن
العيله كلهه تصيح زينب وآنه لسمك خويه ياعباس أحن
ناديت➖ساعدني يالكلك حميه وغيره وحساس
ناديت➖وينك يشيال اللوه أحضر يعباس
جروح بيه وأنته لجروحي دوه
ضهرج شماله عله الناگه التوه
هايزينب ➖ هايزينب ➖هايزينب
🔺🔵🔺🔵🔺🔵🔺🔵🔺🔵🔺🔵🔺🔵🔺
يادمعتي أشگد أضمهه بس أثرها أعله الوجن خويه أنرسم
نضرة الشامت عذابي أشما يصدلي گلبي ينصاب بسهم
والشمر ماعنده غيره أشگد عله السانه يمر طاري الحرم
صيحته بسمي مصيبه وصوطه بمتوني أشكثر تارك ألم
ياحال➖حال العقيله بغيبتك ياصاحب الجود
ياحال➖عدهه يضل خويه وخدرها بناگه مگيود
الشمر يهضمني يشيال اللوه
ضهرج شماله عله الناگه التوه
هايزينب ➖ هايزينب ➖هايزينب
🔺🔵🔺🔵🔺🔵🔺🔵🔺🔵🔺🔵🔺🔵🔺
حسين باهض الحلفي

بوصالك ➖نايم سيف وچعب رمح
بوصالك➖الف وتسع مية جرح
گطع أديك الجمال ➖وحافر فرس فوگك صال
حسين ياذبيح ➖سليب ياحسين
🔻➕🔻➕🔻➕🔻➕🔻➕🔻➕🔻➕🔻
السيوف أتزاحمت ونته بجسد ناحل
كسر ضهرك كسر من طاح أبو فاضل
من حدر الدرع دمك يصب سايل
حيلك ماهو الأول لمن أتقاتل
وجروحك➖بضرب السيوف أتكاثرت
وجروحك➖بيهه الرماح أتكسرت
آه أشكثر دمك سال ➖وحافر فرس فوگك صال
حسين ياذبيح ➖سليب ياحسين
🔻➕🔻➕🔻➕🔻➕🔻➕🔻➕🔻➕🔻
ياواحد غريب أنختمت أسنينك
كلهه أمذبحه أتدير المن أبعينك
من كثر التعب شو ثگلت أيمينك
علي الأكبر تمنيته يجي يعينك
ياحالك➖يطلب نصير ومالگه
ياحالك➖جسمه السيوف أتشگگه
بين السيوف أبيا حال ➖وحافر فرس فوگك صال
حسين ياذبيح ➖سليب ياحسين
🔻➕🔻➕🔻➕🔻➕🔻➕🔻➕🔻➕🔻
المن تنطي ضهرك من تجي الغاره
وجبينك صوبوه الگوم بحجاره
أنترس ضهرك طعن هالناس غداره
وجم ملعون جرب بيك بتاره
بطعناتهم➖حيلك خوه وجسمك ضعف
بطعناتهم➖دمك خلص گد ما نزف
ومن المهر جسمك مال ➖وحافر فرس فوگك صال
حسين ياذبيح ➖سليب ياحسين
🔻➕🔻➕🔻➕🔻➕🔻➕🔻➕🔻➕🔻
الدنيا أتدور بيك وحيل ماعندك
طحت والگاع شالت روحها الخدك
المثلث عنده جرعه وصابك بجبدك
وحيد أبلايه ناصر محد يسندك
بالحومه➖من العطش ريجك نشف
بالحومه➖ومحوط بسبعين الف
وبالخيمه عطشانه أطفال ➖وحافر فرس فوگك صال
حسين ياذبيح ➖سليب ياحسين
🔻➕🔻➕🔻➕🔻➕🔻➕🔻➕🔻➕🔻
أبخاصرتك يغوص الرمح ياوسفه
وشربوك الترب يمفطر الشفه
ذباحك يتاني وحالتك كلفه
أمطبر ونته دوم أرويحتك ترفه
مذبوحه➖من العطش روحك ذبح
مذبوحه➖أو ردت العذب بس ما يصح
بيك العطش صال وجال ➖وحافر فرس فوگك صال
حسين ياذبيح ➖سليب ياحسين
🔻➕🔻➕🔻➕🔻➕🔻➕🔻➕🔻➕🔻
ياأطهر نحر ثغر النبي إيبوسه
السيف أيگطعه والحافر إيدوسه
الكندي الصاب ثغرك كسر ضروسه
صارت للذبح يم جثتك هوسه
جم واحد➖يطلب هديه بذبحتك
جم واحد➖يتمنه يگطع رگبتك
بس الشمر ذبحك نال ➖وحافر فرس فوگك صال
حسين ياذبيح ➖سليب ياحسين
🔻➕🔻➕🔻➕🔻➕🔻➕🔻➕🔻➕🔻
خيل أمنگبه وسحگت على ضهرك
حافرهه ثكيل أتعده من صدرك
من يسحگ عليك الحافر إيفرك
سنابك الاعوجيه أمجلبه أبنحرك
يازينب➖گومي استعدي للسبي
يازينب➖لبسيهن أبناتج عبي
ضعن الخدر عنك شال ➖وحافر فرس فوگك صال
حسين ياذبيح ➖سليب ياحسين
🔻➕🔻➕🔻➕🔻➕🔻➕🔻➕🔻➕🔻
حسين باهض الحلفي

شايل عشگ ➖ما شالته أگـلوب النوارس
عـنـدي ألـك➖گـد الـنـده لـلـورده واهـس
لو عندي جنحين الحمام
چا وصلت أجمل سلام
🔺🔹🔺🔹🔺🔹🔺🔹🔺🔹🔺🔹🔺🔹🔺
يا أول حبيب وآخر حبيب بعيوني ماله ثاني
ياأول غرام وجـمل غرام وحده الملك كياني
وحدك عايش بحساسي
يـا أغـلـه وأجمل ناسي
يـمعـذب گـلبي وراسي
ياعشگ الحياة دونك أموت بس عشگك الحياني
يـاسر الوجـود بـس أنته أريد ياصـاحب الزمـانـي
بس لجلك عايش عمري
يالشـاغـل بالي وفـكري
يمتعب هـجـرك صـبري
دمـع الجفن➖شو ماهده ولا ساعه ينسه
مركب حزن➖گـلبـي بـقـه وبـليـه مرسه
لوبيدي بحروف الهيام
چا وصلت أجمل سلام
🔺🔹🔺🔹🔺🔹🔺🔹🔺🔹🔺🔹🔺🔹🔺
بحروفك أعيش ونته الأمان عايش أنه برحمتك
لوما أنته أضيع وصبح غريب يالعايش أبغربتك
أبـيـا ساعه تصير الطلعه
ونـعـيـش أيـام الـرجـعـه
وصوتك يالمهدي أنسمعه
ونشوف الحنان وطعم الأمان يالغايب بطلعتك
ونتنفس هواك تشفه الجروح تغسلهن بدمعتك
ونـقـبـّل ذيـج أعـتـابـك
ونـوگـف حـراس أبـابك
وتخلص ساعات أغيابك
يبن الحسن➖ إنّه الشرف نخدم عبيدك
طال الزمن➖اليمته تجـي ونقبل إيـدك
من بعدك يموت الغرام
چا وصلت أجمل سلام
🔺🔹🔺🔹🔺🔹🔺🔹🔺🔹🔺🔹🔺🔹🔺
طولت الغياب بعدك عذاب مر الهجر أجرعه
مجروح الدليل وحسب ليال من عمري جمعه جمعه
يالكاسر ضهري أفراگك
أبجي وأصرخ مشتاگك
أجـرع لـوعـات أغـيابك
من طبع اليغيب مهما يغيب لابد تصحله رجعه
ماضلت دموع تدري العيون صبنهه دمعه دمعه
سـاعـات الـينطر ولـفـه
يالغايب صـعـبه وكـلفه
جروح أحبابك ما تشفه
جرح بجرح➖نـتـحمل وشـامـت يعاتب
وشگد يلح➖جا لشوكت هالمهدي غايب
والينتضر أصبح يلام
چاوصلت أجمل سلام
🔺🔹🔺🔹🔺🔹🔺🔹🔺🔹🔺🔹🔺🔹🔺
أشما مر النهار وحل الغروب بضلوعي تغفه حسره
تتربى العيـون يمته الحبيب يطـلـع عـلينه فـجـره
مشتاگ وعيني تناطـر
گوه أعله فراگك صابر
شيصبر گـلبـي الباجـر
ياجرح اليطيب ونـتـه بعيد وبحـالي أنـتـه أدره
محتاجك حنان فگدك عذاب وبكلبي جنه جمره
ماتسوه الدنيا أبدونـك
محتاج أتصدلي عيونك
أرحـم حـالـة مـجنونـك
ليل الهجر➖مـايـنـحـمـل تـدري بـعـذابـه
أشگد أنتضر➖ومحبوبي جارحني بغيابه
والدنيا من دونك ضلام
چا وصلت أجمل سلام
🔺🔹🔺🔹🔺🔹🔺🔹🔺🔹🔺🔹🔺🔹🔺
شايل ورود بلكت تعود وبعيني مره أشوفك
طال الانتضار أتعده النهار وما بينت طيوفك
يادمعي وحلمي الوردي
يـالحـضـه بعيني أتعدي
ذوبـت أبـهـجـرك جبدي
يايوم التقيك ونـضـر عليك وشـتـم عطر جفوفك
وسجدلك جروح ويمك أصيح يالمهدي ما أعوفك
وتـحـرر مـن أهـاتـي
وتتطشر كل حسراتي
ومـا تتسايل دمـعـاتي
دمعة فرح➖لورادت أتسيل أعله خدي
وردة صبح➖وياها ألك بجفوفي أهدي
أقدس عشگ عشگ الأمام
چا وصلت أجمل سلام
🔺🔹🔺🔹🔺🔹🔺🔹🔺🔹🔺🔹🔺🔹🔺
حسين باهض الحلفي

أسمك➖أسمي سبع الگنطره ➖سموني
شغلك➖كافل عقيله حيدره➖بعيوني
عباس➖عنك بعيده الگنطره
عباس➖بعدك زغير أنته تره
♨♨♨♨♨♨♨♨♨♨♨♨♨♨♨
توه جديد أعله المشي وحجايته موزونه
بهدومه خلو خضرمه عن عين اليحسدونه
يامحله شمرة جلمته ومحله الكحل بعيونه
عريج بين بالزغر أيلاوي الهوه بمتونه
يزعل➖وتلوگ إله ارسوم الزعل ➖محلاته
أبعينه➖جن حيدر ونفس الفحل ➖خزراته
عباس➖ردن القميص أيشمره
عباس➖بعدك زغير أنته تره
♨♨♨♨♨♨♨♨♨♨♨♨♨♨♨
أويه أقرانه مايلعب أبد گعدات أبوه تحلاله
يشهد مضيف الغانمه وذاك الجمر ودلاله
جلمة هله أبحلگه وصف خطارهم هنياله
قنبر علي صب أگهوه إئشر عليه بشماله
قنبر➖أحذر تبرد گهوتك ➖داريهه
أسمع➖من تصب دنگ هامتك ➖وحنيهه
عباس➖أمعزب مضيفك حيدره
عباس➖بعدك زغير أنته تره
♨♨♨♨♨♨♨♨♨♨♨♨♨♨♨
المتيه أورايد نزل أوخلص متاعه أومايه
يم بيت حيدر خل يمر نار الگمر دوايه
بي سوله يلعب بالجمر ويونس المشايه
تمرات وشويه لبن عباس خادر جايه
أهلن➖أمضايفنه لا ما عزلن ➖مفتوحه
أمضيفي➖وجدامك أمضيف الحسن فك روحه
عباس➖جيت الضيف أيناطره
عباس➖بعدك زغير أنته تره
♨♨♨♨♨♨♨♨♨♨♨♨♨♨♨
يكبر مثل عود الورد بس حيل يابس زنده
من صار عمره أربع طعش ضلت تحسده الورده
أم البنين أمدنگه تستحي أتعاين خده
أيثني الركب فوگ الترب زينب أذا تتعده
زينب ➖صاحتله أرفع هامتك ➖حاجيني
خويه➖مشتاگه أعاين ريشتك ➖راويني
عباس ➖ما خلفت مثلك مره
عباس➖بعدك زغير أنته تره
♨♨♨♨♨♨♨♨♨♨♨♨♨♨♨
عباس بي نقطه ضعف أهل السلف يدرونه
إيصيحون يمه حسين أجه أبسرعه أيتغير لونه
أيموت بعروگه الدمه أوميت هله إيضنونه
ينكسر ضهره وينحني ويطيح فص أعيونه
سكته➖ماينسمع حته النفس ➖بشفافه
طبعه➖أستعداد يوگف كالحرس ➖لوشافه
عباس➖لحسين عمره ناذره
عباس➖بعدك زغير أنته تره
♨♨♨♨♨♨♨♨♨♨♨♨♨♨♨
بالمعركه أعليه يعتمد من جان يطلع حيدر
عباس كض الگنطره وتسدلي هذا المحور
يعترض مالك يم علي ويگله ماضن يگدر
إيخزره عباس أبطرف إيبس أعروگ الاشتر
أيخزره➖مالك يتيه مهرته ➖وعنانهه
إيدنگ➖أمن الخوف تعرگ گصته ➖نيشانهه
عباس➖من عندك أرجو المعذره
عباس➖بعدك زغير أنته تره
♨♨♨♨♨♨♨♨♨♨♨♨♨♨♨
حسين باهض الحلفي