أجيتك- لكيتك- بلا راس بله ضلوع
بمنامي- وهيامي- بالحلام بالدموع
شلون ألمك
بيش اضمك
بالدموع بالدموع
...............
وسادتك جف بي نقص خنصر
فوك خدك منه دم يكطر
الرمل حار الشمس ماتعذر
عالترايب وذر متوذر
يبابه- الترابه- تجويك تأذيك
حبيبي- قريبي- أحن ليك واحاجيك
ارد اكلمك
بيش اضمك
بالدموع بالدموع
.................
شلون طيحه امن المهر طايح
ماهو خدك بالحجر رايح
الحافر ابصدرك حفر فاتح
حسين بالدم لو ترب سابح
تسلب- تخضب- الجسد اه تطشر
اعله ضلعك- يدرعك- بالخيول تكسر
شكد يألمك
بيش اضمك
بالدموع بالدموع
..................
حسين ملتم صاير شويه
ضلوع صدرك ليش ملويه
طحت يمك بيه مابيه
إش أرد الم يتعبن ايديه
انضرك- اعله ضهرك- بله ثياب يمذبوح
زغيره- وكسيره- احن ليك بلا روح
ابجي يمك
بيش اضمك
بالدموع بالدموع
.................
دورت عن راسك ألكيته
فوك نحرك جبته خليته
ماسمعني شكثر حاجيته
توسليته وبسته بلحيته
غربتك- ذبحتك- بالاحلام شفتها
المدينه- حزينه- تره اعليك عفتها
ما أهمك
بيش اضمك
بالدموع بالدموع
..................
الخيل ما ألها انكسر خاطر
ترف صدرك يكره الحافر
اعليك ساحك وشكثر عاثر
جم ضلع من الصدر طافر
شتطلبك- تسحكك- يمكسور الخواطر
تكسر- تطشر- بالضلوع الحوافر
ويجري دمك
بيش اضمك
بالدموع بالدموع
..................
السهم ماخذ كلبك وطالع
الحجر نص من جبهتك شالع
شكثر رفسات الصدر شابع
حسين صاير للسحك شارع
حريمه- ضليمه- يموتون النحبهم
نعاني- شنتاني- اذه الموت اخذهم
اه يسهمك
بيش اضمك
بالدموع بالدموع
....................
كلمات حسين باهض الحلفي

من الخيمه للحومه الشمر"
يركض وراي وأنهطر"
يابابا خشنات ايديه
طيح اخدودي من السطر"
يابابا يابابا حاجيني
يابابا يابابا حاجيني
...................
طايح يبابا وخيلهم لينه اعتنت
بالنار والدخان خيمتنه امتلت
أختنكت اسكينه والشمر طكها وبجت
النار حركتها وعله النار انتجت

ورم أديها من الضرب"
والنار بكفاها تشب"
لو ماتجرها عمتي
حدر ايده ماتت عالجمر
يابابا يابابا حاجيني
........................
شفت سكنه وركضت خفت أشكثر
صوب ابوي وملكه لاكاني الشمر
كلي طفله مدلله اخدودج حمر
الشمهن احسين ارد اشبعهن سطر

السطره الاوله المنها اون"
طيح ارموشي والجفن"
فص عيني من عيني وكع
لوعني عذبني شكثر"
يابابا يابابا حاجيني
.....................
ضلمه صارت وانطفه بعيني الضوه
عتني عته صدري خرخش والتوه
طبك بوشيتي وشعر راسي سوه
بيه يرفس لحد ماحيلي خوه

والدللته من الزغر"
كسرها تكسير الشمر"
الجانت عزيزه مدلله
شبعت دفع شبعت هطر"
يابابا يابابا حاجيني
.......................
من التراجي بيه يسحل عل ثره
عصب ذاني أتكطع ودمهن جره
بويه جرني وعضم صدري كسره
وذبني يم جثه وذر متوذره

كلي تعرفينه منو"
كتله اشم ريحت ابو"
شو كلبي ضل يخفك علي
الموسد بحر الضهر"
يابابا يابابا حاجيني
.......................
صحت بابا كلي مابي كل نفس
كطعت حنجرته وبعد ماعنده حس
يارقية حسين شبعته رفس
الخنجر بنص جبدته غرسته غرس

راسه وأدياته أكطعت"
واعليه جم مره ارجعت"
مجان التحبه فاطمه
بالخيل لاعبته شكثر"
يابابا يابابا حاجيني
.......................
ماسولفتلج ردت اسلب تكته
مد يمنته وكطعت جف يمنته
كطعت ادين الدللج يبنيته
ماضل كتر سالم الج من جثته

انه الشجاع انه القوي"
ذبحت الحسين العلوي"
طلعت كلبه من السهم
وذبحت بي طاري الخدر"
يابابا يابابا حاجيني
.........................
خادم رقية
حسين باهض الحلفي

يارمح الشلت راسه
ورد لا تجرح احساسه
الله يحب معانيه
ويحب تسبيحت انفاسه
بوسات النبي خضره"
بعدها امبينه ابنحره"
ورد لا تجرح احساسه -ورد لا تجرح احساسه
.........................
يرمح النايبه بهيده مع جروحه
لمست نحره وبجت اوداج مذبوحه
هاذه حسين ابوي الينكط ملوحه
حنينه هواي مومالت لجم روحه

تشيله كبالي وانه اسمع
لهاته ابريجه تتكطع
وصل من نحره تتشلع --حرام

وكف نبض الكلب بيه
سمعته ايكلي ارقيه
تعالي اتكربي ليه --سلام

ابنيتي وقرة اعيوني
الرمح طك راسه بسنوني
مشه وضاع ابشراييني
شكثر اذوني لجموني

زينب خل تجي اتجره"
بعدها امبينه ابنحره"
ورد لا تجرح احساسه
..................................
يكطع سنك البارد شرايينه
يغص بيك وتغورك دمعته ابعينه
انحصر دم ركبته وكطر من اجبينه
من شيبات راسه طاحن اسنينه

اتركه الخاطري انه
مكانك يحرم اهنانه
بعدها شفافه عطشانه-- وجروح

تطشر نضرته الحلوه
تصير المنحره تجوه
عليك حسين يتلوه-- ويلوح

اشوفه وما يميزني
عزيز وكلش ايعزني
تلجمه ومن يون يمي
يفز كلبي وينززني
واشمن ريحته وعطره"
بعدها امبينه بنحره"
ورد لا تجرح احساسه
.......................
احسه ايريد يحجي وياي مايكدر
تعب حدما شرك حجيه ابدمه المنحر
مختنكه الحجايه وعبره تتكسر
يرتل بالحمد والكهف والكوثر

احس بي يشتكي عندي
اعذره مادره ابزندي
اضم سطرات البخدي-- واصيح

حبيبي احجيلي شيألمك
بنيتك انه انه امك
تغص شما طفح دمك-- ذبيح

اجيك الخوف ياخذني
الرمح يابابا يرهبني
تكسر خاطري وارجع
اجر بي مايطاوعني
وتصد عيني اثنعش طبره"
بعدها امبينه بنحره"
ورد لاتجرح احساسه
..........................
اكل طعم الرمح ريجي احسنه
شلون ابرمح رهمت شالوا الجنه
تكربت اعله خده ردت ابوسنه
حفر بخدوده كثره وخقت الجمنه

بسته وشفتي انكصت
حديد امكسر انترست
الخيل شكد علي رفست-- عجيب

شكفه امجلبه بأذنه
اوحده مجلبه بجفنه
ماسمحلني ابوسنه-- الحبيب

بياض الشيب صار احمر
عضام حواجبه مكسر
جرح بسته وجرح عفته
كسرني الرمح والمنحر
مكان الباسته الزهره"
بعدها امبينه بنحره"
ورد لا تجرح احساسه
.......................
راسك عل رمح وجروحك اتندي
تبجي شماتصد صابيع البخدي
ردت امسح دموعك يابعد جبدي
الوح الرمح بابا جفوف ماعندي

تعال شويه دنكلي
جرح جرحين عددلي
عل ترجيه الدكلي-- اضيع

اشوفك عل رمح تلعب
تريد اتدنك وتتعب
اعله سطرة عيني تتعذب-- وجيع

فديتك ضهري وزنودي
فداك عيوني وخدودي
انه الابجي على مودك
لاتبجي على مودي
مصابك بالكلب جمره"
بعدها امبينه بنحره"
ورد لاتجرح احساسه
.....................
مشيت وياك لجمه وتختل بلجمه
نتبادل النضره بكسرة الزحمه
دم راسك ينكط وايدي اتلمه
ماشمك بعيد امبارك اشتمه

واصيحن بابا مشتاكه
شويه اتدنه عل ناكه
راسك هل رمح باكه-- تعال

صبر ماضل بعد كافي
عليك بلوعة اجتافي
اصيح وعل رمح غافي-- محال

اندفع وانطك فلا احجي
الشمر يضربني سكته ابجي
اذا انته ابرمح راسك
يابابا شريد احجي
كسرني الهضم جم كسره"
بعدها امبينه بنحره"
ورد لاتجرح احساسه
........................
خادم رقية ع
حسين باهض الحلفي

نزعو خوذ شالوا صوارم"
للحومه طبوا بالعمايم"
لو طلعن الشيبات زينب تزعل
شياب خاف تشوفنه وماتقبل
شباب شباب والحيل بعده بحيله
...........................
يوكف هوه الطف من يغيم زهير
تخلس الدنيه من يصول برير

والعافيه العد عابس نفرضت فرض
يركب الخيل يساوي ضهره ويه الارض

هي هي" يصيحون بيها المعركه وتتخربص
هي هي" الواكف يطيح بخوفته ويتكرفس

واليوكفلهم خوش زلمه
يكسرون واهس اخته وامه
يكرون بيها مثل كر المنجل
شياب خاف تشوفنه وماتقبل
شباب شباب والحيل بعده بحيله
.........................
الله واكبر ياصلابت حبيب
عالسيف كاتب لاله طيبه وطبيب

يتبختر اعله الجيش ويشمر حجي
نسوان اسويكم واشبعكم بجي

وين وين" شواربكم المفتوله شو سكتو
وين وين" لاخبر لاحس كولوا ها جا متو

ميتين لو خرسان انتم
موجاي اسولف ماسمعتم
انه حبيب معدل ابن معدل
شياب خاف تشوفنه وماتقبل
شباب شباب والحيل بعده بحيله
.........................
اليل بس والصبح يبدي النزال
الميدان واسع بي تبين الرجال

مسلم وجون ووهب لو نزلوا سوه
اطيح الكلوب وينكطع شم الهوه

صار صار" مشرادهم مثل الجراد الينثر
صار صار" بردي الركاب وبيها بارح يكسر

بصدورهم الكلوب ماتت
والروس صوب النار طارت
ضاعت الشرده وللدرب ماتندل
شياب خاف تشوفنه وماتقبل
شباب شباب والحيل بعده بحيله
........................
الدنيه ضلمه بيها حل الخسوف
كالو الحر طب هسه كاع الطفوف

واجب صلاة الخوف صفوها الركب
الحر الرياحي يريد لجهنم حطب

نار نار" وجر عليهم ياعلي من هتف
نار نار" مشرادهم طك بضواحي النجف

سوه العجايب والعجايب
وياهم يدور طلايب
ياخذ الراس اويه النفس لو اجبل
شياب خاف تشوفنه وماتقبل
شباب شباب والحيل بعده بحيله
..........................
الروس هدلت ماهي فوك الركاب
شبكت انحور الزلم ذار التراب

خيرهم من الخوف ذب هدمه وطفر
والشمر ضم روحه ولبد لاذ بعمر

سال سال" دم المناحر وصل حد الركب
سال سال" والسيف عطشان ارتوه من شرب

واحد يكل للثاني نشرد
ندور مجين بيه نلبد
واحدهم من الخوف حاله تخردل
شياب خاف تشوفنه وماتقبل
شباب شباب والحيل بعده بحيله
........................
عباس حياهم هله بهالشباب
يمونسين الحومه وكت الحراب

كسروا خشوم ولوو ذان الشمر
حي الله جفهم الاسمر شكد جسر

مات مات" دمهم بالعروك ونبضهم وكف
مات مات" الشيخ والقائد شرد عل طرف

عباس متبسم يكلهم
ينصار اخوي الماكو منهم
حي الله زلم الماكو منهم يحصل
شياب خاف تشوفنه وماتقبل
شباب شباب والحيل بعده بحيله
.......................
حسين باهض الحلفي

راس عبدالله ابرمح معقوله"
من يطيح ابخنجر ايتجوله"
وينه وين الرمح
الله اكبر عل ذبح
ليش ليش
......................
آنه الطشروا بالطف حلمها
انه الذبحوا ابو بيتي وأبنها
انه ام فاكده وخالي حضنها
شافت راس ابنها ودر لبنها

تكطع- تفلش- كلبي من الأهات
ابجي- وانحب- اعليه بتلث ونات
أه أه أه اعليه بتلث ونات

آنه حرز حسين وام عبدالله"
اعثر ومحد يكلي اسم الله"

للسبي من الصبح
الله اكبر عل ذبح
ليش ليش
....................
حسين أبوره الخيمه واره جثته
اجو حفروا مكان البي دفنته
دجوه بالرمح بعيوني شفته
كعد كدام عيني وكص ركبته

اخذو- راسه- ونطوني المذبوح
شبكته- احضنته- بس منحر وجروح
ليش ليش ليش بس منحر وجروح

الكيت جلمه ابنحره ماحاجيهه"
يمه يمه جبدتي رويهه"
العطش اكبر جرح
الله اكبر عل ذبح
ليش ليش
............................
عله اطراف الرماح الروس تفتر
جابولك رمح من راسك اكبر
جيبر اهواي وانته ازغير منحر
مال امن الهوه وحشروله خنجر

صحتك- يمه- من هزاك الريح
لمن- توكع- كون ابحضني اطيح
هنا هنا هنا كون ابحضني اطيح

عالي رمحك لو طحت تتهشم"
ترف تطشر بعد ماتلتم"
ابرمح راسك منفتح
الله اكبر عل ذبح
ليش ليش
........................
يغثني الذابحك يمه ابجلمته
ابذبحك يبني يتنومس سمعته
يكللهم ازغيره شكد ركبته
رميته ونبلتي لا ماخطته

ارميته- ابسهمي- وجان ابعد العين
نحره- اكطعته- وهوه بحضن حسين
مات مات مات وهوه بحضن حسين

هوسوا كدام عيني ابرمحك"
حين توكع حرمله يضل يضحك"
ويقهر ابكلبي ويلح
الله اكبر عل ذبح
ليش ليش
......................
كتله الخاطر الله الرمح وكفه
الهوه كشر خدوده خدوده ترفه
طبع رمان ابني وانه اعرفه
الشمس سوت بخد اوليدي خسفه

نزله- شويه- من الحر خل يرتاح
يلجمه- المنحر- من رمحك لو طاح
يلوج يلوج يلوج من رمحك لو طاح

عيونه غارت من الحر براسه"
الرمح سوه النحر مثل الطاسه"
تكشر الوجه السمح
الله اكبر عل ذبح
ليش ليش
.......................
ابني خلص راسه عيني اتنضره
شما هوه اعله الكاع توكع وذره
من الشمس طاح وتساقط شعره
يفلت ويرجع يدكه ابصخره

عبدالله-منه- ضلت بس ارسوم
راسه-ابكبره- بس شويه ادموم
راح راح راح بس شويه ادموم

التم عذاب الدنيه كله بروحي"
الرمح والحر فرهدن مذبوحي"
منه ماضل شي يصح
الله اكبر عل ذبح
ليش ليش
............................
كلمات حسين باهض الحلفي

حنينه اجروحنه هواي
ترفه برقت الماي
نتشابك اذا لمنه الخطر ونموت سكته"
ونصيح الخوف مسنه يا ألهي الفرج يمته"
.............................
الغربه البينه تملي شكد مسافات
حفاي الجدم والكاع شفرات
نطوف ابين أه وليل مسموم
وشياطين السلاطين وحراسات

لا قار اليضمنه ولا تعشش هسه يم بابه الحمامه
الموت يحيط بينه بكل زويه منين جا نلكه السلامه

نضم ارواحنه وين
وبينه ريحت حسين
يستار البرايه بكيفك التحفضنه انته"
ونصيح الخوف مسنه يا ألهي الفرج يمته"
............................
اليدورونه اعله خيل وهوه مشاي
يموت بجسمه حيله ويتعب هواي
ياخذ نص نفس من شدة الخوف
يجفل كلبه وينز من الفياي

تكصر خطوته من يلتفت ويموت من الرجفه كلبه
تنسد الدروب بعينه كلها شما يضن يندله دربه

نريد شويه نرتاح
لحمنه من الجدم طاح
غابه الدنيه ناس ذياب وين النضر درته"
نصيح الخوف مسنه يا ألهي الفرج يمته"
.........................
جان الطف وسع خطواتنه ازغار
مدري شلون خلص دربه بنهار
مدري احنه ركضنه اثنينه اهواي
مادري لأن بثيابنه النار

مثل اهل الكهف ياربي ترزقنه وتدلينه بمقاره
تلث مية سنة ماردنه هاذ اليوم بس يخلص نهاره

لا كوه ولا حيل
كتلنه مراكض الخيل
الضماير ماتت وضل بس امر الله ورحمته"
ونصيح الخوف مسنه يا ألهي الفرج يمته"
.........................
كطعنه الدرب سكته بهدوة لليل
تعبنه شكد تعبنه وخانه الحيل
بالماكو نتعثر والدر أه
واحدنه اعله لاخر ينوي ويميل

اسامينه اعله كل حايط جوائز للذي يدور ولكانه
اثاري الطمع خله الناس كلها تريدنه وتركض ورانه

يفتر فوكنه الطير
لازم روسنه اتطير
واحدنه اعله لاخر يبجي ويضم بدمعته"
ونصيح الخوف مسنه يا ألهي الفرج يمته"
.........................
بعد ذيج المسافه وذيج الدروب
مثل مسلم ابونه بحيره ونلوب
وكفنه اباب بلكت طوعه بالدار
وتطبنه للصلاه بس وكت الغروب

طلعت جاريه وكالت علي وياكم عرفناها كريمه
أكيد الي بسم حيدر يسولف نيته طيبه وسليمه

صاحت ليش هل خوف
تفضلو انتم ضيوف
طبينه ولاكن دارها تخوف صفنته"
ونصيح الخوف مسنه يا ألهي الفرج يمته"
.............................
اجه يمشي الاجل وعيونه تندار
وصاح منين هل طفلين الزغار
ذوله اولاد مسلم عمهم حسين
نزلوا عدنه هاي الليله خطار

فرح لمن سمع بينه واخذ سيفه اجه علينه شتمنه
اخذنه وبالحبل شدنه يجر بينه يتامه وما رحمنه

اخذنه وللنهر راح
ذبايح بيد ذباح
كناله بعدنه ازغار جا مو مسلم انته"
ونصيح الخوف مسنه يا ألهي الفرج يمته"
.........................
كلمات حسين باهض الحلفي

الخيل مضيعه وماجنهه تندل
اليتكلب حدرها جسد لو تل
تراب وفوكه تسحك حيل"
لو عثره اعله درب الخيل"
...........................
ضايعه----اعيوني وتدور أخيي الغالي
ضايعه----حال حرمه امتيه بلا والي

مغوشه اعيوني برماد اخيامي
اطلعت ادور عن حبيبي الضامي
بالعبايه مجلبين ايتامي
فرجه للكوفي صرت والشامي

الشامت بيده سوطه وعينه تذبح
طولي من الخجل ذاب وتجرح
احس دمعاتي نار اتسيل"
لو عثره اعله درب الخيل"
..............................
حايره----سوط عدواني شكبر نيشانه
حايره---- شكد رقية تصيحلي عطشانه

وانته مامنك خبر رد لينه
حسين وينك كسروا ايد سكينه
هجموا وحركوا الخيمه اعلينه
اعله الركض من العطش مابينه

السوط بيدين الشمر جل
خويه ومتن سكنه اعليهه هدل
متوني اعله العبايه تهيل"
لو عثره اعله درب الخيل"
..............................
باجيه----ومتني يصرخ كافي بسكم كافي
باجيه----السوط دمه متوني ويه اجتافي

أطلعت والحومه جثث ممليه
اسحك الشوك بجدم مجويه
اكعد شويه واكوم شويه
بناتك يكودني من ايديه

اسمع من بعيد مصايح وطك
اعاين لن اشوف اخيول تسحك
تفر براسهه وتميل"
لو عثره اعله درب الخيل"
.............................

شايله----جنود وتلح اعله تله ازغير
شايله----بالحوافر جم حديده اجبيره

كومه اهدوم تتكلب حدرهه
تسحكه ويطفر يطك بصدرهه
ثكيله وتربد الكاع وتطرهه
خيل ملثمه يحير أمرهه

هاذه الثوب اعرفه اي اعرفه
مطبوعه الرقية بجيبه شفه
صحت من هل وضع ياويل"
لو عثره اعله درب الخيل"
.............................
ساحكه----الخيل حد ما تعبوا رجليهه
ساحكه----جم ضلع منك مجلب بيهه

جم حديده من الحوافر مالكوهه
بين ضهرك بين صدرك ضيعوهه
انته طايح واهمه راحو بدلوهه
لحد ما اوصال جسمك شلعوهه

لحد ما جسمك من السحك خلص
والحافر شرك من دمك وقص
اعله اوصالك تلح واتشيل"
لو عثره اعله درب الخيل"
..........................
راجعه----أيست راح اخذ الثوب الرقيه
راجعه----خنصر ودم شيبتك راجع بديه

ارد اكلهه مابقالج بس هذني
انتي واخواتج تعالن ساعدني
خيول عشره بصدري داسن لوعني
هشمن ضلوعي الخيول ورضرضني

لمن حيلجن للنوك لمن
السوط يشم متنجن من تحنن
باقي اعلينه بس الليل"
لو عثره اعله درب الخيل"
.......................
حسين باهض الحلفي

حنينه- وتانينه- ولا واحد مر بينه
من احبابنه- ودك بابنه- شنو صاير مدرينه
عشك كلبي شايلك عشك"
صدك والله احبك من صدك"
........................
من كثر المناشد ملت الجلمه
الماتت نومته لا شك دفن حلمه
ضوه الشمعات يفتح واهس الضلمه
العاش أويه البجي تتحاوشه الجمه

حسراته- ولوعاته- مرسومه اعله أوصافه
حجاياته- وشكواته- مذبوحه اعله شفافه
يدك كلبي بلهم يدك"
صدك والله من صدك"
..............................
العليله اتكول من الهجر مختنكه
مو انه التتكيف مع الفركه
مريضه والدوه المحتاجته ملكه
يبويه حسين انه بعازت الشبكه

يلمبعد- ماتنشد- عن حالي المتعذب
بنيتكم- تانتكم- وشكد الكم تكتب
شبك وياكم بموعد شبك"
صدك والله احبك من صدك"
............................
صوت اليل اعيشه بروح مشتاكه
انه السابيني شوك اليكتل فراكه
نبض كلبي سفركم ياهلي باكه
بعدني اسمعهه بذني جبكت الناكه

من رحتو- وسافرتو- وانه عيوني ربيه
تعبني- وعذبني- يهلي فراك ارقيه
تطك ضلوعي البصدري تطك"
صدك والله احبك من صدك"
............................
اكض الباب واكعد وابجي واتحسر
ولو خيال اشوفه كلبي أستبشر
اركض من فرحتي وبالركض اعثر
واصيحن يا هله بجيتك علي الأكبر

تراوالي- تعنالي- ياخذني الاحبابي
وهمانه- وفشلانه- ارجع منه البابي
يخفك كلبي بالشوك يخفك"
صدك والله احبك من صدك"
.............................
كسر ضهري المرض والهم كسر كلبي
عله اجروحي صحت ساعدني ياربي
فراك خواني زاد اعله المرض تعبي
اضن عبدالله يمشي هسه لو يحبي

ودعته- وفاركته- وبالمنحر قبلته
مد ايده- وكض جيده- حن ووان سمعته
يشك سهمه الكماطه يشك"
صدك والله احبك من صدك"
...............................
صحت يحسين الك بيه الف حسره
عاين عله عيوني تبين الكسره
حط ايده اعله ضهره وانحنه ضهره
دنك شالني وضمني عله صدره

حاجاني- وبجاني- وحاجيته وبجيته
يمسافر- جم حافر- بضلوعك حسيته
سحك بكربله باجر سحك"
صدك والله احبك من صدك"
..............................
كلمات حسين باهض الحلفي

خليت الحسين مسلوب مسحوك
بحبالي كل يوم عالنوك اطب سوك
شفت الحسين انذبح والحافر بصدره يدج"
جسم الحنين الترف مومال روك ودبج"
......................
من يمه فتت- بس خفت التفت- كلبي من النبض مات"
مكسورة ضهر- والحيل انكسر- يم شاطي المسنات"

حسرة صدري كسرت ضلع البصدري
وسوط الجاسي خيطه طابع بضهري

ياناكه بهداي تأخري وره النوك
عكبت الحسين للملكه مخنوك
يسفي اعله نحره الرمل مخسوف صدره الترف"
وجروحه ماتنحسب فوك ال٩٠٠ الف"
...............................
عثرت ناكتي- طاحت دمعتي- ابجي الذلت الحال"
لا تعتب علي- ياخيرة هلي- جفوفي مربطه احبال"

يصيح الشمر امشن لا تودعنه
يكلي بخيلي ارجع صدره ارضنه

لن نحرك يصيح ويكول مشتاك
هم كلبي ممرود وجروح الفراك
يلي نويت السفر يجمعنه يمته الدهر"
مادري راح اندفن لو اتاني يرجع خبر"
....................................
سرت بقافله" جروح محمله" ودموع ومعانات"
جفوف مزنجله" وسوط وسلسله" دمه أمتون البنات"

لا دمعه ولا جلمه ولا حسره
التتنفس ضهرها ابن الخنه يكسره

ماتنسع اه والضيم مدفون
نحجي العبارات بنضرات العيون
نقهر ولاكن دفن دم كلبي ينكط ألم"
صدعنه كلب الحجر والسوط لينه أبتسم"
.............................. .
خزانه النضر" واهسنه نكسر" شتحجي البيه خوان"
الناكه بلا قطه" رماح محوطه- وعسكر يحدي نسوان"

ألمهن والشمر يرجع يطشرهن
يشتمهن وهن يجرن نواضرهن

سمعهن هواي شتمات وجروح
يسئلهن حسين حي لو مذبوح
لاكن رقية تحن لو مرها طاري العشك"
اتكله حبيبي عدل انته عديم الصدك"
.....................................
جم ديره ونزل" طبوها الهزل" الشامت نضرته تبوك"
يهضمني الحجي" اعله الناكه انتجي" تكتل طبت السوك

خوارج تالي صرنه الدنيه سوتنه
انكسرنه ياوسف وجبيره كسرتنه

يرامونه بحجار ونصيح حرامات
بنات السماوات لا مو خارجيات
راس الحسين انضرب يمي اعله نص جبهته"
ادنيت امسحه الدمه لن اسمعت ونته"
.................................
حولت النضر" يم راس الكمر" ماتسمع يعباس"
زينب يلأبي" تعبهه السبي" يسيره مهبطه الراس"

تشاكف بالسياط وتعبت ايديهه
الناكه العرجه شلت حته رجليهه

درب اليسر موت يحتاج كفال
احجي يعباس شيلمهه الطفال
اعذرني خويه الحبل بجاك حد الألم"
لا تبجي خاف البجي يلجم مكان السهم "
................................
كلمات حسين باهض الحلفي

يابابا يابابا محبوب عيوني حسين
يا بابا يا بابا محبوب عيوني حسين
رايح وبحالي شصار
فركاك جروح ونار
...........................
رايح وجروحي تكابر
رايح ياشوف الناضر
رايح كاسرلي الخاطر -يانور العين

مسافر تاركني الوحدي
مسافر دمعاتي بخدي
مسافر ياحلمي الوردي- يابابا حسين

يتاركني بعذابي بعذابي ورايد تروح
الك دمعي ونحيبي ونحيبي وكل الجروح

اه اه اه

لاترحل لاترحل وتتركني بهاذه الحال
لا ترحل لا ترحل وتتركني بهذا الحال
تخليني بعلتي احتار
فركاك جروح ونار
محبوب عيوني حسين
..................................
تارك طفله بلا والي
تارك نار بدلالي
تارك روحي بلا غالي- يا اغله الناس

ماخذ كلشي وتاركني
ماخذ أهلي وعايفني
ماخذ عافيتي مني- ياعطر الياس

يمحبوبي دخيلك دخيلك امشي وياك
صعب كلش رحيلك رحيلك يضرني فركاك

اه اه اه

بعيوني بعيوني ترسم بوداعك موت
بعيوني بعيوني ترسم بوداعك موت
تضل بنتك للأقدار
فركاك جروح ونار
محبوب عيوني حسين
...............................
مروتك ياعشك اعيوني
مروتك لتخيب ضنوني
مروتك ليش تعوفوني- وحدي بهالدار

طفله بدنيه وماترحم
طفله شكد وتتألم
طفله خلافك ماتسلم- من الأقدار

يجرحي الماله طيبه ماله طيبه من تروحون
بعدكم يلحبايب يلحبايب تعمه العيون

اه اه اه

مابيه مابيه اعله فراكك روحي تموت
ما بيه مابيه اعله افراكك روحي تموت
وتضيك بعيني الدار
فركاك جروح ونار
محبوب عيوني حسين
.................................
خلافك ما اكطع نوحي
خلافك ماتهده جروحي
خلافك جا شلي بروحي- يبو عبدالله

زغيره فراكك جتالي
زغيره ومايرحم حالي
زغيره وراح افكد غالي- يكتل فركاه

الطفل عندي أتركه أتركه يداوي الجروح
اسكت بي حنيني حنيني واكطع النوح

اه اه اه

عبدالله عبدالله بروحي يهون فركاك
عبد الله عبد الله بروحي يهون فركاك
ينشف دمع الأنضار
فركاك جروح ونار
محبوب عيوني حسين
.................................
بعينك جم طفله يتيمه
بعينك نيران وخيمه
بعينك زينب بالهيمه- تلم الأطفال

دموعك يابابا ادكلي
دموعك ميردون اهلي
دموعك بالطف ترسملي- هزل واحبال

صعب كسر الخواطر الخواطر عند الاطفال
تتركوني بدمعتي بدمعتي وذلت الحال

اه اه اه

ماترجع ماترجع البنيتك كلبي يكول
ما ترجع ما ترجع لبنيتك كلبي يكول
هيجي تسولف الافكار
فركاك جروح ونار
محبوب عيوني حسين
................................
أشبكني وخل اغفه بصدرك
أشبكني ودنيني النحرك
أشبكني وخل الثم ثغرك- بهاي للحضات

تدري تهد حيلي الفركه
تدري غيابك ماصدكه
تدري هاي اخر شبكه- واخر نضرات

سلامات اعله صدرك اعله صدرك من الخيول
وداعآ ياحبيبي ياحبيبي غيابك يطول

اه اه اه

لا تنسه لا تنسه عندك طفله اتانيك
لاتنسه لاتنسه عندك طفله اتانيك
منك منتضره اخبار
فركاك جروح ونار
محبوب عيوني حسين
...................................
حسين باهض الحلفي

انه والنده علاقه
روحي للورد ذواقه
كلبي ينبض بشتياقه
للعشك والحنين"
الحبيب الحسين"
...........................
كلبي الما عاشك عاشك بس انته
يا أكثر والد حبته بنيته
يا راحت كلبي ونبضه وسالفته

يالساكن بنبض الكلب
هجرك يمحبوبي صعب
خليني اعيش برحمتك
تاركني شو نص الدرب

توه أبتده الحب وياك
يصعب علا كلبي انساك
يجرح حنيني فركاك
يالساكن بنبض الكلب

بشفتك احله بتسامه
يا ارق من الحمامه
اليل بحضانك انامه
عشكي بتلث سنين"
للحبيب الحسين"
..............................
يا أول نسمه مقرزه أويه الريه
الفطره الجمعتنه حب وحنيه
معودني اتنفس عطر الخاجيه

اتنفسك شهكت ضلع
لا تكسر كليب الشمع
وين بتسامات الصدك
شو تبتسم ويه الدمع

هجرك ألي لا ميلوك
ماترحم دموع الشوك
يا اغله واجمل معشوك
اتنفسك شهكت ضلع

يا هواي الما اعوفه
عايشه بلذت جفوفه
فدوه كل عمري الحروفه
ألك بالروح ادين"
الحبيب الحسين
.............................
تارسني مروه فدوه الحنيتك
احله من الجنه شيبات الحيتك
بكد طيبت كلبك صدك حبيتك

من يلمس جروحي الهوه
يفزن علي كلهن سوه
اشتاك ابوس بيمنتك
وبخنصرك ألكه الدوه

هلخنصر أشكد اهواه
والمحبس اعشكته وياه
بيدك يصير شمحلاه
من يلمس جروحي الهوه

يا تراتيلي وصلاتي
كلمة السر بحياتي
يلتدليني اعله ذاتي
وشوكي لمن يحين"
لحبيبي الحسين"
.............................
من كد ماأحبك هلكد شاغلني
صح بتك انه بس أمك جني
حاسبتك بابا حاسبتك أبني

كللهه ياطعم العنب
ها يم التراجي الذهب
خنصر يميني ينكطع
وهاي التراجي تنسلب

ياوردتي ما انساج
ساعه ونرد انه وياج
يم جثتي راح الكاج
كللهه ياطعم العنب

وينكسر كلبج عليه
وما اشبكنج بديه
هنا تفرغنه المنيه
ويبقى بس الونين"
الحبيب الحسين
............................
اليكطعلي الخنصر يكطع عشرتنه
يسلب جم نضره يطشر ضحكتنه
يكسر واهسنه ويذبح نيتنه

صدر الدفو يشبع سحك
وتتكسر اضلوع العشك
يموت الحنان ويه السهم
وتتبده نبضات الصدك

سهم المثلث جريه
وجرحي بعباتج شديه
ونحري بدموعج رشيه
صدر الدفو يشبع سحك

قبلي شفتي بهداوه
شويه خل تاخذ نداوه
لساني بشفافي تساوه
بللي من تجين"
لحبيبي الحسين"
.............................
نختم قصتنه والد وبنيه
محبس من عندي ومنج ترجيه
صبعي يكطعونه وايدج مجويه

يم الخدود الناعمه
ها يا شبيهة فاطمه
إيقبل ايديج الحبل
بخدج اثر جف ازلمه

جفوف الشمر حيل اكبار
وخدودج هواي زغار
لو طكج يشبن نار
يم الخدود الناعمه

الملتقى هناكه يبابه
بالطشت وسط الخرابه
راح احضرلج لعابه
شبكي فوك الوتين"
الحبيب الحسين
.........................
خادم رقية
حسين باهض الحلفي

والكثير الكثير من القصائد قيد الطبع نتشرف بخدمة خدام الحسين ع ان شاء الله أيضا انزل الحانهن وانه ممنون

صح أنه عاشك للحرب_بس بالخيم عايف كلب_ رقيق"
الحنيه ضلت والدفو_ الينعد أبو وينعد أخو _ وصديق"
مو مالت أمتانه اوبعد _
أمن أتأخر أيموت الورد _ رقيق
............................
عايش حياتي أمعذبه _ ومرتاح كلش للعذاب _ جي بي عشك دافي"
بعيوني ما يركد حلم _ عايش حياتي مو خيال _ عشكي أبذهن صافي"
يغفه المنام أعله الرمش _ مايوم بحضان المنام _ جفني سرح غافي"

أبكد الوفاء الشايله أبراسي _ أتمنيت خادم مو أخو حالي
لوما حسين أرسومه موجوده _ ماعاشك وهسه الكلب خالي

بس أنه محبوبي صدك _ يعرف قوانين العشك _ حنين"
أسمه الطيور أتغرده _ مدري أسمه بشفاف النده _ حسين"
مدري الضحه مدري الحمد
_ أمن أتأخر أيموت الورد _ رقيق
................................
كلولي عطشان وكلت _ بس تعطش الورده تموت _ أبكل الورد سوله"
الماي الاجل جودي أنخلق _ مايعطش الحط للعذب وجود _ لا ماهي معقوله"
أتكربته وبعيني شفت _ ريحان بجروف الجفاف _ ذابل على طوله

فز كلبي وجروح الخجل صاحت _ عطشان ويعيش النفس بيه
قررت أموت أعله النهر ضامي _ أي والتراجي وشيلة أرقيه

يمروي رية فاطمه _ معقوله تشكي أمن الضمه _ وتميل"
أشرب شكو بعيني دمع _ وعصر شكو أبصدري ضلع _ يسيل"
حدما ألك بالماي أرد
_ أمن أتأخر أيموت الورد _ رقيق
...............................
مستعجل أبجودي رحت _ والدنيه كلش مو أمان _ ما تنصف العاشك
عايف كلب ينكط ضمه _ وشفافه تتفطر جروح _ أبموج العطش غارك"
الجدمه إيعثر فاكد أخو _ وبمشيته ضهره يميل _ طبع الذي إيفارك"

أمن ابعيد شفت المشرعه أتلالي _ من العطش رف كلبي ولساني
أتانيني خيمه أجروحها أتكابر _ محتاجه ماي وضاله أتاني

أشكد مستحي الكيت النهر _ لجل الخيم ميت قهر _ غريب"
من شافني حن وبتسم _ كلي أخذ وروي الخيم _ عجيب"
وعن حومة الشاطي أبتعد
_ أمن أتأمر أيموت الورد _ رقيق
............................
ميت عطش من دنكت _ شلت العذب بين الجفوف _ مو قصدي أشربنه"
شاورته وبهايه ردت _ جان القصد ماي الفرات _ بحسين أذكرنه"
تجري وحبيبي أبعازتك _ يبست لهاته وحاله حال _ أرجعله يتمنه"

جودي ترسته وللخيم راجع _ أمشي وتجيني أسهام عطشانه
ضميته لاكن ماخلص جودي _ أشبيدي عليه الدنيه خوانه

بالجود لن سهم أستقر _ أبعيني سهم ثاني أنكسر _ جريح"
من حين الأميه أنجفت _ عبدالله من مهده التفت _ يصيح"
من العطش كلبي أنمرد
_ أمن أتأخر أيموت الورد _ رقيق
................................
ويه الجروح أتعاندت _ كمت وعله أهمومي أنتجيت _ وجفوف ماعندي"
بزنودي للجود أحضنت _ كل ضني الكه أشويه ماي _ ولكيته متبدي"
خجلان للموت أوكفت _ وأشعر بعدني ما وفيت _ ويه الورد وعدي"

صح العمود أهواي أذاني _ بس حيرة حسين أكثر أذتني
ينكسر ضهره حسين بفراكي _ وأنه يميل وينكسر متني

أباب الخيم وكفن شفت _ بت الاخو ويه الأخت _ أنحنيت"
مكسور واهسهن بجن _ وأنه أسمعتهن من حجن _ بجيت"
ما عودتهن عالبعد
_ أمن أتأخر أيموت الورد _ رقيق
.............................
من صحت خويه أبلا وعي _ عذرآ حبيبي ما دريت _ جان الألم كاسر"
الموت بعروكي يدك _ خو تدري ينسه الكله أه _ وطبع الذي إيكابر"
محتاج بس ترضا علي _ وتكل خواتي الساقي مات _ وسكينه لتناطر"

لا تطلع أمن الخيمه يا روحي _ تبجي رقيه من تفاركها
ذاك الشمر بس تطلع إيتاني _ عالخيمه يركض بيده يحركها

صح تبقى حسره أبضامري _ تشبكني تجبر خاطري _ وأموت"
ومن ريتك أتنفس عطر _ وتغيب روحي أعله الصدر _ أبسكوت"
أيحين الأجل خد أعله خد
_ أمن أتأخر أيموت الورد _ رقيق
................................

حسين باهض الحلفي

لا تبجي ابوداعي أبوس إيدك
ابنيتك رقيه تضحك أتريدك
رايح يسر العافيه ولون الورد
العبدالله أجيب أميه ياخويه وأرد
..........................
يسمع عباس كل الاطفال عطشانه أتصيح عطشانه
أمن تلث تيام ما شربو ماي عمنه الكمر ينسانه
أنه العباس وبروحي أنفاس وعبدالله أشفاه ذبلانه

من غم مايك يافرات _ عطشانه اسكينه تبات _ موت وشلك بالحياة
وعبدالله أشفاه ذبلانه

تعطش رقيه وتبجي بوجودي
إله اشكك جربتي وجودي
أمن أسمع بجاهم كلبي أحسن ينمرد
العبدالله أجيب أميه ياخويه وأرد
...........................
طلعت زينب مشدوهة حال عباسي يا عباسي
تبجي الاطفال ياصوت الماي عالي ويجرح احساسي
عباس أرجوك لا تبطي اهناك أرجع يرفعة راسي

يملبس خدري التيجان _ أرجع ياستر النسوان _ فراس وزلمة ميدان
أرجع يرفعة راسي

ودع أخيك ومشي للحومه
إيموت الحسين اعليك لتلومه
يالعنده أنته أغله حته أمن الجبد
العبدالله أجيب أميه ياخويه وأرد
.............................
أمدنك عباس أه وحسرات والدمعه تحدي بعينه
يتنفس أه ويمشي أبلا روح متعني يم حسينه
حسين أتلكاه يابعد الحيل أهلآ يعم أسكينه

أموصيتك أم البنين _ ماترفع أكبالي عين _ ياسيد العاشكين
أهلآ يعم أسكينه

يا طيبة أجروحي أحب صوتك
لا تسكت أتعذبني بسكوتك
ياسر خشوعي اوياتراتيل الحمد
العبدالله أجيب أميه ياخويه وأرد
.............................
عباس إيصيح يا عطر الياس سامحني يبن الزهره
يا بعد الروح العبدالله إيروح فدوه العباس وعمره
رقيه من اتصيح عطشانه الماي ياخويه ضهري أتكسره

إيدورن بناتك بالجود _ ماي العذب ماموجود _ وعبدالله جبده ممرود
ياخويه ضهري أتكسره

إرخصني خويه المشرعه أتعاتب
ساقي العطاشه عالعلم كاتب
ساعه وتوسد خدي فوك الزند
العبدالله أجيب أميه ياخويه وأرد
............................
أتودعني أجروح كلك حسبات والدمعه ترست عينك
إيموت العباس ويذوب إحساس من تحضنه أبجفينك
ياضي عيناي ديني ودنياي فدوه رحت لسنينك

أتبسم يبعد العيون _ وشبكني جرحي يهون _ يالعايش أويه الضنون
فدوه رحت لسنينك

لا تبجي يمي ينكسر حيلي
من الشريعه أرجع إدعيلي
ويرجع عباس عينه أبعيونك تصد
العبدالله أجيب أميه ياخويه وأرد
............................
حاجاه حسين يا ماي العين أتحرسك عيون الزهره
خي أيرف الواك وسط الميدان خاطر عيوني أتنضره
يا سهم العين خويه ايتانيك أصوابه الدليلي أيفطره

جودك تصيبه السهام _ وتبجي عليك الخيام _ والدنيه تصبح ضلام
أصوابه الدليلي أيفطره

وتوكع يمينك خويه ويسارك
أصواب العمود إيضيع أخبارك
والضهري ما يتبقى سند لمن أهد
العبدالله أجيب أميه ياخويه وأرد
................................

حسين باهض الحلفي

كافي _ عباس رد من النهر _
كافي كلبي أنشلع ضهري أنكسر _
كافي ضلمه سماي أبلا كمر _ كافي
عباس _ عباس _ محتاجك أشكثر
عباس _ عباس _ يا خيمة الخدر
...............................
ديرة حرب وآنه أوحيد ونته الحرب فراسهه
والجانت أتضم الروس هسه تطلع راسهه
يدرون بيك العباس أمبجي الزلم خلاسهه
زينب تريدك وياي لا تمشي يا عباسهه

زينب أختك يا كافلهه يالمنطيهه أحجايه
إمواعدهه أتضل وياها رايه أتحجب رايه
زينب أيه وأنته أجلاد اليحفض روح الأيه

زينب _ ودعهه حماي الحمه _
زينب-بيدك يراعي الموزمه _
زينب-تسبيحة أمي فاطمه _ زينب
عباس _ عباس _ منهه لتعتذر
عباس _ عباس _ يا خيمة الخدر
..................................
الخيمه بستان أورود والعطر مالي الخيمه
بس أنجبرنه ازرعناه ياخويه وسط الهيمه
لا نهر لا بير إيفيض والصيف مابي غيمه
بس عدنه جود إيكفيه بجتاف راعي الشيمه

وردة جوري يمك ضلت عطشانه ومحنيه
تدري اليزرع كلبه إيذبل لو ذبلت جوريه
ولو جانت هالورده أتخبل ويسموها رقيه

حلوه _ بس كسر واهسهه الضمه _
حلوه-أشفايفهه تتكاطر دمه _
حلوه-أتاني النده من السمه _ حلوه
عباس _ عباس _ عطشانه تنتضر
عباس _ عباس _ يا خيمة الخدر
.................................
يم الورد فطر ياس هس توه خضر عوده
إيدور على كطرة ماي والكطره ماموجوده
بعده أبعمر ست وركات صوفرن حيل أوروده
أخدود عنده وشفاف خايف تجف أخدوده

إيدير أبعينه أجروحه أتكابر كلما شافك يمه
إيحل أكماطه إيمدلك إيده جن إيعرفك عمه
أهواي أتعلق بيك أوليدي ما متعلق بمه

يحجي _ بعيونه ويسولف صور _
يحجي-مثل النجم ويه الكمر _
يحجي جان العطش حجي النضر _ يحجي
عباس _ عباس _ إيحاجيك من تمر
عباس _ عباس _ يا خيمة الخدر
................................
أشبكني شبكة خوان يا أحله كل أخواني
خل تعرف الناس أشكد واحد يحب الثاني
أعصرني بضلوعك حيل حسسني ما تنساني
ردت أبدمعتك عباس يتبللن ذرعاني

بهداي أطلعنه أمن الخيمه ضهرك يسند ضهري
سكته أولا سولفنه أحجايه عن لا زينب تدري
لن صوت إيكلنه ويبجي يا كلبي ويا عمري

كالت _ شو يبجي الحسين أشسده _
كالت-أي هذا أهو حال النده _
كالت-يا خويه عباس أشبده _ كالت
عباس _ عباس _ الحسين منكسر
عباس _ عباس _ يا خيمة الخدر
...............................
ودعتك وكلك روح بس كلبي كلي أخسرته
عباس يرجع هيهات يحسين لو ودعته
دنكت راسي وحنيت وصبيت دمعي أبسكته
كتله يكلبي أشسويت بوداعه ضهري أكسرته

راح الماينراد أفراكه راح الساند ضهري
راح وذاك الخنجر شفته إيغازل صبعي ونحري
ياعباس أوداعك حافر ودج أضلوعي أبصدري

حافر _ بوداعك أبصدري أنطبع _
حافر-حسيته من ضهري طلع _
حافر-مو بس ضلع واحد شلع _ حافر
عباس _ عباس _ يا حيلي والعمر
عباس _ عباس _ يا خيمة الخدر
.....................................
كل الورد راح إيموت ويتهاوه وركه أبوركه
لو شال إيده الفلاح الما عدهه عرفه أتسحكه
رايح يراعي البستان البستان رايد ملكه
ويه النده الورد أيعيش كل صبح شبكه أبشبكه

أنجانك ما ناوي الجيه خلي أبالك فكره
محبوبك والتعشك وجهه أفراكك يكسر ضهره
يحتاجك من إيسحكونه وخنجر يكطع نحره

تدري _ ساعه وأطيح أمن المهر _
تدري-ويركض علي ركضه الشمر _
تدري-إيحر نحري ويبدي العطر _ تدري
عباس _ عباس _ وخواتي للأسر
عباس _ عباس _ يا خيمة الخدر
..............................

حسين باهض الحلفي

ماكو اليشبهونك محال _
يا خالق الحب والجمال
يا حبيبي فد سؤال _ شمسوي بكلوب البشر" غرامك
...........................
ما أسألك يا ورد _ أترجفني حد البرد _ عشكك نقاوة كلب _ عشكك جروح اليحب _ حنين- أبترافه"
يمبلل الخد دمع _ نسمه وتريح الضلع _ يالعلمتني الوفه _ أبحبك دليلي أكتفه _ سبيل- اللطافه"

تاركني وين _ ها يالحنين _ جمال العافيه"
شبكة خليل _ وتحضني حيل _ الضلوع الدافيه"

يا عله بفراكك تطيب _
أكثر أعاني من تغيب
يا أول وأخر حبيب _ تذبل أعيوني أمن السهر" غرامك
...............................
يا سر وجود الصدك _ أمشبع رقيه شبك _ يا أترف أمن النسم _ أبدلالي تارك سهم _ أريد- وجودك"
صدرك وقف للعشك_مو مال دوس وسحك _ موطن صرت للعطر_أتحسدك ورود الحمر _ تغار- من خدودك"

أجمل حبيب _ كلش قريب _ الدليلي ومهجتي"
سيد الغرام _ تذبل حرام _ يوردة دنيتي"

تعطش صدك لو بالخيال_
أعله أشفافك أتصلي الرمال
طايح عله أجروح الزلال_ ويغازلك جرف النهر" غرامك
................................
أتخيلك كل صبح _ شمس وتغازل رمح _ وعيونك أعله الضعن _ أبنيات يتمايلن _ عذاب- سبيهن"
يا خاطري المنكسر _ أمأذيك سوط الشمر _ يضرب رقيه وتون _ ونته أعله رمحك تحن _ تشوف- بجيهن"

أنته الغيور _ ضعنك يدور _ أعله نوك وينسبي "
جرحك جبير _ كلبك كسير _ حمر لون العبي"

لو عطشت أرقيه تصيح _
ماي أعله شفتهه تطيح
فوك الرمح ونته ذبيح _ تتبده جن ماي المطر" غرامك
..............................
أنطيت الكلب والنحر _ ونطيت تجوة ضهر _ ونطيت خيمه وعبي _ وبنات جدهن نبي _ جروح- مصايب"
ياهو اللي مثلك شهم _ ترتاح من تنلجم _ وتشهك الربك وفه _ وتفيض بالعاطفه _ نطيت- حبايب"

كلبك حنين _ أعله أسمك حسين _ يمهجة فاطمه"
كلك عطاء _ رب الوفاء كريم الخاتمه

من عثرت الناكه بجيت _
وي زينبك مدري شحجيت
دنكت جن إلهه شكيت _ أشما عاينتلك تنكسر" غرامك
.............................
مو راس ويه الضعن _ روحك وكلبك مشن _ للكمر مره تصد _ ويطيح دمعك ورد _ عجيب- مقامك"
عالرمح بس تلتفت _ أتدور بنت لو أخت _ محتاج كلي شنو _ مشتاك صرت المنو _ كسير- علامك"

جاسم تريد _ الأكبر بعيد _ رمح يسبك رمح"
سكنه ورباب _ أحبال وتراب _ جرح شابك جرح"

يالمنكسر يم البنات _
أمن السوط إي متلوهات
أبشتمه وحبل متكبعات _ أتشوف العبي صارن سمر"
غرامك
............................

حسين باهض الحلفي

عوضوني أبغيره خلوني أقتنع
ياهو مثله أبشبكته إيرخي الضلع
أحب ملكاه"
صعب فركاه"
ياهو مثله أبشبكته إيرخي الضلع
......................
ملكه تلاكينه _ أتشابكنه وبجينه _ وجان الدمع واهس"
أشماله العشك يبجي _ حاجيته ما يحجي _ أبطعم الهجر حاسس"

وصبت مدامعنه دمع أحمر
نص جلمه راد إيكول مايكدر
أمكطعه أوداجه شفرت الخنجر

وحجيتله احجايات بنعومة ورد
أشبكني بابا وخل نذل طعم البرد
الهجر أذاه _
صعب فركاه
...............................
طعم العشك ملكه _ ويتكمل أبشبكه _ ونبض الكلب يوكف"
ونفاسنه أتهاجر _ ورواحنه أتسافر _ ونضراتنه أتسولف"

كلمن يكل محبوبه مشتاكك
وضلوعنه أنخليهه تتشابك
أيكلي وأكله يكتل أفراكك

ونطيح للكاع أبجي وشهكة ضلع
وضهورنه نحنيهه حدما تنكطع
أحن ونعاه _ صعب فركاه
................................
بسته وترجيته _ وبهيده حاجيته _ وكتله البعد كاسر"
ردت أمسح أدموعه _ يومي عله أضلوعه _ طاحنهن الحافر"

أبصدر الترافه الخيل شمكسره
أضلوعه المستهن ماهن أبصدره
خليت إديه وطاحن أبحفره

أحنيت ضهري وعسر أبريتي الهوه
العبره خنكتني وأحس ضلعي التوه
محال أنساه _
صعب فركاه
.................................
ياهز الكطع راسك _ وفوك الصدر داسك _ ومكسره أضلوعك
باك العطش روحك _ ومطشره أجروحك _ وميبسه أدموعك

دمك يسيل وصبغ شيباتك
ذاري الترب يسفي أعله وجناتك
أكعد يبابا أنسلبن ابناتك

الخيمه حركوها وجوه جدمي الجمر
عمتي زينب بابا سلبهه الشمر
تصيح أحاه
صعب فركاه
.................................
ذبحو نبض كلبي _ وباكو حلم تعبي _ وعافيتي سلبوها"
كتله أفتح إيدينك _ وصدلي أبطرف عينك _ ترجيتي باكوها"

والسوط أكل نص من كتر زندي
والصطره أخذت وصله من خدي
وشكد مصايب بالكلب عندي

أبدي مين أمن أرد أسولف يا ألم
اللوعه تبدي أوياي من جمر الخيم
حنين وأه _
صعب فركاه
..............................
يالمنكطع نحرك _ ومات الهوه أبصدرك _ ومفتره أنفاسك"
ياهو الكسر ضلعك _ ياهو البتر صبعك _ ياهو الكطع راسك"

أمطشر على حر الترب جسمك
أمعفر الشيب ومنسلب هدمك
مرمي أعله وجهك منسفك دمك

الحادي صاح إيريد ياخذنه أبأسر
أتكوم لو أمشي تحت رحمة شمر
أروح وياه _
صعب فركاه
..............................

حسين باهض الحلفي

أشبيهه عين أرقيه _ مسطوره لو مجويه
زركه حمره _ جويه سطره
أشبيهه عين أرقيه
........................
يابت حيدر عنهه أحجيلي _ أكثر من رمحي أتأذيني
أتماشيني وعيني أتصد ليهه _ بس كوه أعليهه أتماشيني
وردة جوري يمج ضلت _ شو ذبلانه أنضرها أبعيني
معقوله أحجي أوياها وتسكت _ ماتكدر حته أتحاجيني

مكسوره بنتي أشبيهه _ شو تعرج أبرجليهه
أشبيهه صفره _ جويه سطره
أشبيهه عين أرقيه
.......................
أحجي أوياها أشويه أتدني _ ما تدنه أبنيتي الحلوه
خافن ماتكدر توصلي _ بس لا جف رجليهه أمجوه
شو تفرك بيديهه أبنيتي _ وتهز ركبتهه وتتلوه
زينب حبل إيديه أيعور _ وبركبتهه الحبل أشسوه

خويه الحبل لو عتهه _ يصلخ جلد ركبتهه
يصعب أمره _ جويه سطره
أشبيهه عين أرقيه
.......................
حاجته وكالت يا بابا _ شيسوي المكسوره أضروسه
تعرف ليش أتخورس حلكي_ من موقف بتك مخلوسه
أيجرجر بيه الكطع نحرك _ ونفاسي أمفتره ومحبوسه
يم جسمك ذباني وكلي _ شوفي شلون الخيل أتدوسه

لمن يدوس الحافر _ نحرك أسمعه إيشاخر
من يكسره _ جويه سطره
أشبيهه عين أرقيه
.......................
كلما أصرخ يجوي إيديه _ كتله أشمالك طفله وميته
والله أتعورني أبجف إيدك _ أترك ذاني أشمالك أنته
شمسويه أبقوتك تسطرني_ ليش أبجفك خدي أشلعته
ترضى حسين إيطك أبنيتك _ ماسواها ورحت أذبحته

من عاتبيته أبدمعي _ كام ورفسني أبضلعي
رفسه عصره _ جويه سطره
أشبيهه عين أرقيه
........................
زين أشمالج دوم أمدنكه _ مرات أترفعين أعيونج
بعدج يا بابا أمخوفينج _ أتخافين أبسوط إيطكونج
لو راسج صعبه أترفعينه _ كد ما خدرانات أمتونج
لو مستحيه أمصخم وجهج_ أرماد الخيمه أمغير لونج

يا حلوه يا رمانه _ مستحيه لو زعلانه
ليش أمفتره _ جويه سطره
أشبيهه عين أرقيه
........................
إي يا بابا صح مستحيه _ مستحيه وكلش خجلانه
إنطوني أشوية ماي وجبته _ بيدي المجويه التعبانه
أتطشر من إيدي وما ضكته _ مقسوم أبقالك عطشانه
وهسه أتمنيت إيرد بيدي _ حته أروي أشفاك الذبلانه

مو حكي لو مستحيه _ يالخضبولك لحيه
أنته أدره _ جويه سطره
أشبيهه عين أرقيه
.......................

حسين باهض الحلفي

إني أنا العباس أغدو بالسقا
ولا أهأب الموت عند الملتقا

بيمينه" ضلت ترف الرايه
والموعد" يم شاطي المسنايه
.......................
زلمه من الخيمه طالع لاجن ابهيئة كمر
وخته صاحت يابو فاضل راشده دربك خضر
كلهه يا زينب النيه أذبح أبسيفي النهر
أمن العطش عبدالله يبجي وخاطر أرقيه أنكسر

هل يعلمون بالنزال من أنا
أرواحهم تزهق في رأس القنا

هز رمحه" وتعنه ليهه أعنايه
والموعد" يم شاطي المسنايه
........................
يا هله اتكله العقيله أبكافلي ومية هله
هله أبصكار الكتايب هله أبزلمة كربله
الماي إذا بيدك قضيته مو صعب يا مسهله
روح ذل الشمر وكسر يله ركبة حرمله

يا سيد الشعجان قد حان اللقا
فمذ رئاك الجيش قد تفرقا

حل يومك" أسبي الجيوش أسبايه
والموعد" يم شاطي المسنايه
.........................
طب عليهم روح روح أتبخرو مثل الهوه
بعده ما جردله سيف ولا نشر طرف اللوه
أحزام ضهر حسين هذا اليحط للعله دوه
أتطشرو والكاع ضاجت ما تلمهم نينوه

لا تعرف الفرسان أين المهرب
تجندل المطلوب تحت الطالب

والحومه" أبسيفه غدت دمايه
والموعد" يم شاطي المسنايه
........................
للنهر طب والجيوش أتناكثت مثل المطر
للسمه أصريخ الكتايب وصل من صال الكمر
شال رمحه أبن الصميده ونبته أبصدر النهر
غرف بيده الماي يشرب للخيم حن وذكر

يانفس من بعد الحسين هوني
وبعده لا كنتي أو تكوني

لحسيني" شنهو الفرات ومايه
والموعد" يم شاطي المسنايه
........................
ترس جوده وشال راسه للخيام وكله هم
وزينب أتعاين لخوها إيرفرف أبجفه العلم
حال جيش الشرك كله بينه ما بين الخيم
بالغدر كطعو يمينه وصابو الجود أبسهم

والله إن قطعتمو يميني
إني أحامي أبدآ عن ديني

وتحاوط" من كل كتر رمايه
والموعد" يم شاطي المسنايه
........................
أتلاكف السيف أبيساره حين طاحت يمنته
عينه صوب حسين أخيه وضل يكفكف دمعته
كسرة العباس كسره محد إيسد فيته
ماي ماضل ويوصله ونطكع جف يسرته

قد قطعو ببغيهم يساري
فأسقهم يارب حر الناري

أجفوفه" أيه هوت يم أيه
والموعد" يم شاطي المسنايه
........................

حسين باهض الحلفي

أباب الخيمه مدفون _ والنار _ وصلت باب الخيام"
أشم عطاب الكماط _ والخيل _ سحكتك بالجدام"
دللول _ عبدالله يغالي
دللول _ ياسهر الليالي
..........................
سهرت أعليك حد ما طاحت جفوني
أم عبدالله خوانك يسموني
يا عطر الورد يا فتشة أعيوني

أهات ودموع _ يمرخي الضلوع _ أبجيك ونعي"
طشرت الاحلام _ بدروب الايام _ ويسيل دمعي"

أكضي الليل أناغيك _ أحاجيك _ حبيبي وكرة العين"
تذوبني أبمعانيك _ يمدلول _ أزغير بزرة حسين"
دللول _ يا كمره وتلالي
دللول _ يا سهر الليالي
............................
خذاك حسين من إيدي وبجت إيدي
أستحيت أحجيهه در بالك عله وليدي
بجيت أشبيك يمه كزبر أوريدي

ونيت وبجيت _ بهداي حنيت _ يا روح أمك"
بيدين الحسين _ وسمعت الونين _ لحضانه ضمك"

خذاك وللعده راح_ أسمعت صاح _ أميه أوليدي تعبان"
أبسهم طشرو معانيك _ وويلاه _ الدمك جان عطشان"
دللول _ أبسهم ذبحو دلالي
دللول _ يا سهر الليالي
.............................
ركبتك مايله وعيونك أمفتره
ودمعتك يابسه أعله خدودك أمكسره
نص السهم بعده أمجلب أبنحره

جن طير مذبوح _ ودماك مسفوح _ ياليل تعبي"
رديت مجتول _ بكماط محلول _ وعيون تربي"

ميته الجلمه بشفاك _ والموت _ باك أشكد عبارات"
العبره أمجلبه بالريج _ مخنوك _ إبني أتحسر ومات"
دللول _ أتفارك روحي تالي
دللول _ يا سهر الليالي
.............................
حفرنالك لحد نص متره مو أكثر
أنهيل أتراب فوكك خاف تتعور
الرمال الخشنه تلجم كطعة المنحر

دفنوك بدماك _ والروح وياك _ ما بيه أودعك"
يم باب الخيام _ أحسنلك أتنام _ من تبجي أسمعك"

أذا ونيت أحس بيك _ أجي ليك _ ومسح بيدي دمعك"
أذا فزيت عطشان _ أجي أبساع _ أحضننك ورضعك"
دللول _ مهدك يمه خالي
دللول _ يا سهر الليالي
.............................
لمن طاحت زلمنه والخيم شبت
الخيل أعلينه عنوه أتعنت وطبت
أعله كبرك صالت وفوكه أشكثر دبجت

ياريت الخيول _ أتصول وتجول _ أعله أضلوع أمك"
مذبوح مسحوك _ بالنار محروك _ شيحمله همك"

تواسي أبموتك حسين_ يمدلول_ حته أبسحكة الخيل"
هم عطشان ذبحوك_ داسوك _ الحوافر جسمك أتشيل"
دللول _ يالعذبتو حالي
دللول _ يا سهر الليالي
............................
حفرو كبرك وطلعوك من عنده
رغم أتراب لحدك تشبه الورده
كلتلهم أريد أمسح رمل خده

إيصيحوم جيبو _ والراس كطعو _ ونطوها جسمه"
برماح شالوك _ وردود ذبحوك _ وتصيح يمه"

شلتك بس بلا راس _ يا ناس _ أريد أرضع حبيبي"
ذبحتو وهو عطشان _ جوعان _ عليه إيدر حليبي"
دللول _ أحجايه ما حجالي
دللول _ يا سهر الليالي
............................

حسين باهض الحلفي