ليلة 6 محرم ليلة أنصار الحسين محرم 1446
(وزن العگيلي)
باجر أنصاره يدخلوها
باجر أنصاره يدخلوها
**************************************************
بالحومه باجر أنصاره
عدهم عالگوم اجمل غاره
واحدهم شاهر فقاره
والحومه هناكه يصفوها
باجر أنصاره يدخلوها
**************************************************
عابس جون ويه النصراني
واحدهم للموت امتاني
صاحوا يحسين تلگاني
واجيوش الشر خل يمحوها
باجر أنصاره يدخلوها
**************************************************
من هدوا عالعسكر كلهم
عبره الموت او ماخذ منهم
تاريخ او يذكر ظل عنهم
ذكره او بالطف ايدونوها
باجر أنصاره يدخلوها
**************************************************
انطوا جم منحر بالعاشر
ويه حسين الهم مرقد باجر
يطوف بحضرتهم جم زاير
بدم الامانه يخطوها
باجر أنصاره يدخلوها
**************************************************
عهد او خطوا ابكل غيره
ما خلوا زينب بالحيره
اصحاب احسين اجمل سيره
هاي اتظل ويتذكروها
باجر أنصاره يدخلوها
*************************************************
الخادم المقصر
✍️الشاعر مصطفى النائلي

يعباس/// يبني افخر بيكم
بالحسين/// يمّه ما وصيكم
*--------------- *------------------ *
يبني يا عباس ادري ما تخالفلي وعد
والوفه در الحليب الي رضعته بالمهد
ما تعوف حسين وحده اتصيرله احزام وسند
تبذل الروح العزيزه وما تقصر بالجهد
يعباس/// صيتي يكبر بيكم
بالحسين/// يمّه ماوصيكم
*--------------- *------------------ *
يبني يا ساقي العطاشه ويا گمرنه الهاشمي
من تشوف الحرم تعطش غوص وسط العلگمي
اشما كثر جيش ٱل اميه بوهج سيفك ينعمي
ولاتضوگ الماي ابدا گبل الحسين الضمي
يعباس/// فاطمة اتجازيكم
بالحسين/// يمّه ماوصيكم
*--------------- *------------------
يبني يا گرت اعيوني وياعمد بيت الخدر
ياكفيل الحره زينب دونها اتضحي العمر
يل براسك غيرة الله ادري تتلاهب جمر
عينك اعله الحرم عينك واحذر من اهل الغدر
يعباس/// والعتب ياذيكم
بالحسين/// يمّه ماوصيكم
*--------------- *------------------
يبني اني امك واعرفك لمن يشتد الحرب
فارس ومن ظهر فارس تظرب وما تنظرب
الصعبه كلش سهله عندك مايعيقك كل صعب
من تطب للحومه ادري ايخيم اعليها الرعب
يعباس/// ترهب امواضيكم
بالحسين/// يمّه ما وصيكم
*--------------- *------------------
يبني ياعباس اريدن خوتك تصبح مثل
وعلم مابين البريه بالتزامك والعمل
تثبت الحتف المنيه وبالصبر تصبح جبل
ولمن تتگاطع الوادم بيك يلگون الامل
يعباس/// والعيون عليكم
بالحسين/// يمّه ماوصيكم
*---------------*------------------ *
الخادم المقصر
✍️مصطفى النائلي

ليلة 7 محرم ليلة مولاي ابو فاضل محرم 1446
آنه زينب الحوراء اصرخ ياضوه عيوني
كفيلي اعله النهر من طاح بيتي انهدم ومتوني
**************************************************
ماتلحگ يبو السجاد راح اليكفل العيله
مابياش اروحن ليه جسمي صاير انحيله
ياهو الي يضمد اليوم ياهو الي يباريله
واني ابلا كفيل أمسيت والعدوان يولوني
كفيلي اعله النهر من طاح بيتي انهدم ومتوني
**************************************************
عگبك خويه ياعباس حملي ياهو اليعدله
غريبه ابين ناس اجناب وابدا هاي مو سهله
امشي اميسره للشام سبيه وناگتي هزله
ومايگلون اخت عباس مسبيه يسموني
كفيلي اعله النهر من طاح بيتي انهدم ومتوني
***********************************************************
يخويه من يجن الليل وعيالك بلا والي
واني ابين جيش ايتام ريتك ماشفت حالي
ماخذنه الرعب والخوف مثل الشبح يبرالي
ماصدگت يالوليان بالغربه تعوفوني
كفيلي اعله النهر من طاح بيتي انهدم ومتوني
**************************************************
شگل السكنه من اتصيح ياعمي العطش فتني .. عطشانه وتريد الماي وبصيحتها اذتني .
ومن تصرخ يبويه احسين صرختها تموتني .
واني ابين هاي وهاي شنهو البصر فهموني .
كفيلي اعله النهر من طاح بيتي انهدم ومتوني
**************************************************
من بعد الكمر عباس امست حيرتي حيره
مظعنه والعده يحدون من ديره لعد ديره
وروس اخوتي فوك ارماح وين النخوه والغيره
بحر الشمس مصلوبه ومن احجي يشتموني
كفيلي اعله النهر من طاح بيتي انهدم ومتوني
**************************************************
الخادم المقصر
✍️مصطفى النائلي

ليلة 10 محرم ليلة استشهاد مولاي الإمام الحسين عليه السلام
يحسين يعيوني يعيوني هذا عاشرك
يحسين يعيوني يعيوني گطعوا منحرك
گوم اوياي يحسيني
گوم اوياي يحسيني
*----------------------*---------------
*
خويه بالعاشر اشوفك جن صريع او دامي
تموت من حر الظهاري يابو سكنه او ضامي
وترجع لصوب المخيم هيج احس گدامي
ظلمه لا بل سوده خويه اصبحت ايامي
اعداك شافوني شافوني وانه اركض إلك
يحسين يعيوني يعيوني گطعوا منحرك
*---------------------*----------------*
يابو سكنه هالعساكر اجت تحرك بالخيم
او انه اركض مره اطيحن من شفت لاحك سهم
ابعون اعثر مره اني او مره حسيت ابألم
من شفت هالخيل تسحگ صدرك انت وانهشم
قاهرني يحسيني يحسيني بصدرك حافرك
يحسين يعيوني يعيوني گطعوا منحرك
*-----------------*--------------------*
خويه راسك شفته عالي اشلون مرفوع برمح
او من صعدت التل يغالي بعيني اجه يوم الذبح
النار بالخيمه شفتها او انه اصدن عالجرح
او ريت بالعاشر يخويه عسن لا جانه الصبح
حيل اذاني اذاني خويه مذبحك
يحسين يعيوني يعيوني گطعوا منحرك
*-------------------*------------------*
آه يخويه الگوم هجمت واني صرت ابلا ولي
مره اندب يابو فاضل مره اصرخ يا علي
ابلايه خيمه صرت اني فقط صوتي يعتلي
عگب موتك ياكفيلي
مابقه واحد ألي
عالنهر عباسي عباس داير ناظرك
يحسين يعيوني يعيوني گطعوا منحرك
*-------------------*------------------*
اخر اللوعات خويه سكنه راحت عالهزل
انهض انهض شوف زينب حشمت يا ابا الفضل
عندي اطفالك امانه
والوضع لا مو سهل
درب يسري خويه يصعب
والفگد ماينحمل
يحسين عفتوني عفتوني وي حادي ويضربك
يحسين يعيوني يعيوني گطعوا منحرك
********************
الخادم المقصر
✍️مصطفى النائلي

يباها
الدهر ما يرحم ابزينب/// يباها
الشمر للشام ألف وسفه/// يباها
عيون اتصد عليها اشگد/// يباها
ودخلت للقصر زينب سبيه
✍️مصطفى النائلي

ليلة 13 محرم ليلة دفنة الأجساد الطاهره محرم 1446
*-----------*---------------*
العليل اشلون يدفن والده
ابهالمصيبه اليوم الله يساعده
*--------------- *----------*
ابهالمصيبه اليوم محتار العليل
شاف ابوه احسين بس دمه يسيل
هالمصاب اليوم لا ماله مثيل
والقتل لال الرسول العاده
*--------------- *------------*
مو سهل لمن يهل فوگه التراب
او عالبريه ايشوف منثور الخضاب
شال جسم حسين هذا اعظم مصاب
او عمته تنتظره ظلت گاعده
*--------------- *------------------ *
ضل يواري بالجسد بأرض الطفوف
اشلون ملتمه على احسين السيوف
بس جسد دامي على الغبره يشوف
شاف اثر اخيول ضلت صاعده
*--------------- *------------------ *
شاف ابوه احسين محزوز الگفه
وإله تحضر فاطمه او المصطفى
الجرح ابو اليمه فلا يرهم شفه
غسله بدمعه العليل وكاده
*--------------- *------------------ *
ضل ينوح ابعبره يم ذاك الجسد
مو سهل هذا الهظم اعله الفگد
صاح بويه احسين جيتك عالوعد
ينحب اعله الوالد اصبح فاگده
*----------------*-------------------*
✍️مصطفى النائلي

سطرها
الزلم بجفوفه اخو زينب/// سطرها
وجثث وي روس خلاها/// سطرها
على ارض الطف اثر باقي///سطرها
وزلم تردم زلم بالغاضريه

✍️مصطفى النائلي

الخيم هاليله محترگه دوى الها
العقيله اجروحها ماتم دوى الها
الشام افرحت والكوفه دولها
اوزينب طفت الافراح هيه

✍️مصطفى النائلي

ابن طه النبي الاحمد وسجاد
يصلي اعله الترب ساعه وسجاد
عمر كضاه چن عابد وسجاد
ويهل دمعه اعله جرح الغاضريه
✍️مصطفى النائلي

الى استشهاد السيده رقيه 5 صفر 1446
طاحت اعله الراس بس مكسوره
طفله ماتت بالحزن مجبوره
*------------------*------------------*
طفله ماتت بالحزن عگب الذبح
يوم شافت راس ابوها اعله الرمح
تعيش جم لوعه بعد واشجم جرح
وبعينها ظلت لبوها الصوره
*--------------- ----*----------------*
بعينها ظلت صور لأرض الطفوف
صوره للعباس مگطوع الچفوف
واعله ابوها حسين محموله السيوف
ناحت بسكته ابصدرها احروره
*--------------------*---------------*
ناحت ابسكته على ظهر الهزل
مگيده الطفله بسلاسل وبحبل
اگبالها روس الاهل راحت قتل
تنشد اعله حسين وين احضوره
*------------------*------------------*
تنشد اعله احسين حته بالممات
فارگت طوله عگب ذيج الحياة
ودارت اعليها وسف هل نايبات
وكل مسية اغروب تفگد نوره
*------------------*------------------*
كل مسية اغروب تبجي اعله النحر
الراس مرفوع ابرمح خانه الدهر
ماتت اعله الراس هيه امن القهر
ادماه تتفايض بقت منثوره
*---------------*--------------------*
خادم رقيه عليها السلام
✍️مصطفى النائلي

قصيدة للمشايه
*---------------*
انعكدت النيه ورفعنه الرايه
وجينه الك يابو علي مشايه
*----------------*------------*
جينه الك يابو علي طول ابعرض
ياللي حبك بينا يسري اويه النبض
هذا ممشانه صبح واجب فرض
وكل وكت يحسين الك وفايه
*-----------------*------------*
كل وكت يحسين نتعنه الصحن
ما تهمنه المغرضه و اهل الفتن
المهم يرضه علي او ام الحسن
او يرضه مهدينا علينا ابهايه
*--------------- *------------------ *
يرضه مهدينا المهم طول الدرب
وبدورب حسين تلكه بس محب
احنه شيعه ويسهل علينه الصعب
واحنه للأصعب نضل شرايه
*--------------- *------------------ *
لكربله حافي گصدت لكربله
قافلة الزوار تتبع قافله
آه يحسين او هله نقره اله
بالضريح اتصير احله اقرايه
*--------------- *------------------ *
بالضريح اتصير افواج وبكاء
يا حسين ابكل وكت هذا النداء
تبقى ملجأ للحيارى كربلاء
ويبقه گبر احسين هو الغايه
*--------------- *------------------ *
✍الخادم المقصر
مصطفى النائلي

بالاقدام
اچيتك ازحف بچفي/// بالاقدام
ومثل باقي الخدم اول/// بالقدام
بولائه المحب ما ينعد/// بالقدم
المهم مقبول عد امه الزچيه
✍️مصطفى النائلي

شسولف يا جرح عن مقتله وذبحه

تسحگه خيول عشره بصدره وتفتحه

ابو اليمّه وگع امن المهر مجتوول

وچم سهم اعله جسمه نابت بجرحه

عاري اعله الترب لا اهله لا اصحاب

وعينه اعله الخيم مشبوحه ومفتحه

الرماح الشالته ابن النبي المختار

صلفه اشكد احسها وشكثر وكحه

جم طعنة رمح باقي اثرها شلون

ويتگاطر دمه من كل جهه او صفحه
✍️مصطفى النائلي

خبرتنه الايه في قرآنها
افمن مات انقلب عربانها
يا محمد . يا محمد
*-----------------*------------*
افان مات النبي صار انقلاب
اجت كل هاي العرب تحرقله باب
كل قصدهم جان والغايه الحجاب
ابباب دار المصطفى نيرانها
يا محمد. يا محمد
*-----------------*------------------*
اباب طه المصطفه هجمت زمر
او حاصروا للدار بكر وي عمر
ضد نبي الرحمه باطنهم ظهر
وضد علي ظهرت بعد شجعانها
يا محمد. يا محمد
*-----------------*-------------------*
اتظاهرت شجعان ضد حيدر علي
تدري طه امنصبه هوه الولي
او هذا خله النار بيهم تصطلي
او بعد ما ينفع ابد ندمانها
يا محمد. يا محمد
*---------------*------------------*
خطب طه اوگالهم يا مسلمين
اخذوا بكتابي اوعترتي الثقلين
هذا حيدر الكم الحصن الحصين
هاي عتره والكتاب السانها
يا محمد… يا محمد
*---------------*-------------------*
گال طه يا عرب هذا الزمان
ماصحا الدين بدا منكم دخان
اسلاف الكم سلبوا الامه الامان
هذا تأويل انبنه ابفرقانها
يا محمد. يا محمد
*---------------*----------------------*

الى استشهاد سيدتي ومولاتي فاطمة الزهراء
*------------------*------------------*
المستهل
انبياء الله اجت لأم الحسن
تخيط الها احجاب وتفصل الچفن
*---------------*--------------
النبي آدم حاضر وبيده الكتاب
يكلم الأعراب راد بهل الخطاب
(بأي ذنبٍ مقتوله ويهتك حجاب
حسرةً عالباع دينه يا زمن
*---------------------*--------
النبي ابراهيم من شاف الصفوف
صوب دار الزهره اجت هاي الألوف
يا إلهي ايصيح مجتمعه السيوف
اجمعت عالزهره كل اهل الفتن
*-------------------*----------
النبي عيسى حاضر الأم الحسين
على فعل الباب والصاير حزين
أضرموها النار زمرة كافرين
الباب والبسمار شهدلها وحچن
*-------------------*----------
اباب دار المصطفى مُوسى الكليم
ردد الكلمات من ربنه العظيم
الحرگ هذا الباب شيطاناً رجيم
واتبع هند بفعلته ابكل شچن
*------------------*-----------
النبي هود او طه وياه ذا الكفل
عزّوا الكرار بمصابه الجلل
عگب أم حسين ما ضله امل
كون يتمنه علي اوياها اندفن
*------------------*------------------*
✍️كلمات خادمكم : مصطفى النائلي

خسارتنا چبيره او ما تعوض لا
ارتقه نصر الله جنات الخلد هاليوم

يالمهدي ثار الزهره ننتظره
بساعة ظهورك يبتدي چبره
*------------------*------------------*
ابساعة ظهورك للضلع تطلع
يالمهدي و ابهذا الخبر نسمع
و گبال سيفك هالعده تركع
ابهالخبر تفرح تره الزهره
*------------------*----------------*
يالمهدي فاطم تنتظر امرك
و الثار محسن هيه تنتظرك
تفرح تراها بيومك ونصرك
وتشوف بيدك رايتك خضره
*--------------------*----------------*
ساعة ظهورك اكبر ابشاره
ويلالي چفك ويه فقَّاره
يم گبر فاطم تقره الزياره
وأحنه وراك انردد ونقره
*------------------*------------------*
ويريد منك جم محب تظهر
گلب امك الزهره او علي تفطر
ابهاي المجالس ننتظر تحضر
وندري دمعتك عالظلع حمره
*---------------*-----------------*
وحته دمعتك تبجي عالمنحر
وتبچي العلي ذاك البطل حيدر
او بيا صبر من تحجي عالخدر
تجري الدمع والعبره عالحره
*------------------*-----------------*
لوعه وحزن من الظلع تبدي
يابو الوفه يل الغايب المهدي
عمتك صفت بيها الرجس يحدي
واهنانه زينب حست ابكسره
*------------------*------------------*
احداث صارت والظلع شاهد
بسمار نابت او بفعل حاقد
وسهام ترمي من رمح واحد
جان السبب بيها اثر سطره
*------------------*------------------*
✍️كلمات: الشاعر مصطفى النائلي

شيّعوها وي علي شيعوها
بهيده من كسر الضلع دفنوها
ــــــــــــــــــــــــــــــــــــــــــــــــــــــــــــ
بهيده من كسر الضلع وي فاطمه
ولسه ينزف ما وگف من الدمه
الله اليساعد علي حامي الحمه
روحه وسط الگاع من خلوها
ــــــــــــــــــــــــــــــــــــــــــــــــــــــــــــــــ
روح ابو الحسنين نامت بالترب
مو سهل هذا الجرح كلش صعب
علي يعاتب گام نبضات الگلب
شلون اصحاب النبي يضربوها
ــــــــــــــــــــــــــــــــــــــــــــــــــــــــــــــ
بالله يالشلتو النعش وي حيدره
اشلون شفتوا الدار نار اموجره
الدمع حگ يجري لأمنه الطاهره
حيث اركان العرش وجروها
ـــــــــــــــــــــــــــــــــــــــــــــــــــــــــــــ
فاطمه راحت لچن ظل الخضاب
فوگ ظهر الباب موجود المصاب
من فعل هالصحبه يُهتك هالحجاب
وبین باب وحایط ايدفعوها
ـــــــــــــــــــــــــــــــــــــــــــــــــــــــــــــ
عالزچیه انطبگت الباب او غدت
من بعد موت الرسول استشهدت
وبكسر هذا الضلع لله مشت
فاطمه الزهره بحزن نوحوها
ــــــــــــــــــــــــــــــــــــــــــــــــــــــــ
تمت وبعون ﷲ تعالى
✍️الشاعر مصطفى النائلي

وصيه انكتبت بحايط لبنها
وهي ترضع كمر هاشم لبنها
تكله عله العطش باجر لبنه
بالك لايمر ببن الزجيه
✍️بقلمي: مصطفى النائلي