قل اعوذ برب الناس ...
يا رملة اقري ليحسدونه
تؤام يوسف والعباس …
سبحانه الخالقهة أعيونه
……
اشرق وجهه ابنور الباري ابنج جــسام
غــــطيه بالـــبركع ليحســـدونه الظــلام
طالع مـــثل البدر الساطع مــــل الخيــام
أسم الله ايحفضة ويرعاه من كوم الشام

بدموعج مشطيلة الراس…
ابعونج ربنه ايكون وعونه
… ..
من عباس ويوسف ماخـــذ كل أوصاف
لون اعيونه وديرت وجهة اتحير الشاف
سبحان الله الكلشي ايحب ابجاسم عــاف
مو بـس اعليه كلبج خايــف كلنة انخاف

موش انسان ابنج اللماس
حكج لوخفتي ايحسدونه
…………
خـــل انزين صينيت القـــاسم بالياس
عريس وربعة ايزفونه اتصيح الناس
بــــيدج عجنيهه الحنه وحنيلة الراس
يا رملة القاسم حاضر عرسه العباس

طشي اعليه اورود الياس…
عريس وربعة ايزفونه
……
ام يجيب المضطر نقــره ابعالي الصوت
وندعي الباري اينجي القاسم من الموت
نجي القاسم مثل النجيته امـــــن الحوت
كــــاع الطف مترجّع كلمن ليهه ايفــوت

تاخذ روحه ابلاية احساس...
متهم بحبابة اينطرونه
… .

عين الماصلت عل الهادي اتصيبة بعين
خل نقرالة ايات الكرسي الحفضة الحين
شمس الله اتغازل ضحكاته ومــن سنين
غالي القاسم عـــد عماته وعــند حسين

غالي واغلة امن الانفاس
عد عمة احسين ايعرفونه
… .
يارملة ادعي الجاسم يـــرجع سالم لـيج
دعوة ام ميردهة الباري رفــــعي ايديج
فكد اوليدج اصعب من كل صعب اعليج
كــل احبابه اتحس يا رملة وتشعر بيج

نعلم حزنج ما ينقاس …
عالقاسم روحج مجنونه
……

الحمد الله رب العالمين
اللهم صل على محمد وال محمد
موسى الخادم….
https://www.tgoop.com/y1_7y

عبد الله

خليه بالخيام — توه الولد نام

ابني امن اشوفه يروح تـعبي ويـنـزاح
ليـش امـن اديه يـروح لـيـد الـذبـاح

خليه بالخيام — خليه بالخيام
——————-
يحسين احلفك بالدمع عوف الولد نايم

ذابل جماله امن العطش شمسوي يا وادم

بس تمشي بي بره الخيم لا ما يـرد سالم

عبد الله ما يحمل سـهم نحر الطفل ناعم

نومته عطشان — وبحضني ذبلان

يحسين عوفه امن البچي هسه ارتاح
ليـش امـن اديه يـروح لـيـد الـذبـاح

خليه بالخيام — خليه بالخيام
——————-
اقبل يموت امن العطش بس لا سهم كافر
زغـيـرون ما يحمل سهم لا يگـدر يكابر

اللهُ اكـبــر كـربلـه اه يا ضـهـر عـاشــر

ضل الحسين الـوحـدة لا أخـو لا ناصر

كل ساعة ملچوم — ويـطـيح ويگـوم

بعيونه شاهد علي الأكـبـر من طــاح
ليـش امـن اديه يـروح لـيـد الـذبـاح

خليه بالخيام — خليه بالخيام
——————-
يردون اسلمك للـعدو عبـدالله يالغالي

يوليدي يمعذب الگلب بفراگك اشحالي

عـود أنا ردتـك تـچـوتي يا يمه للـتــالي

ما حسبت هـيـج الـقـدر لا چـانـت ابالي

تتركني وتـروح —- وتـردلي مذبوح

اليسأل شگـله الـولـد عـافـاني وراح
ليـش امـن اديه يـروح لـيـد الـذبـاح

خليه بالخيام — خليه بالخيام
——————-
ضليت ادورلك عذر بس ما يصح بـيـدي

مجبوره اسلمك للسهم سامحني يولدي

يا روحي ونـچ لا يـقـل بيه الحـزن زيـدي

يايـمه لمـن تـنذبح تــذبـح مـواعــيـدي

حسيتك اتگـول — يمـه انا مقـتول

يٰــنشـال رأسـك والــرمـح ما يـنـلاح
ليـش امـن اديه يـروح لـيـد الـذبـاح

خليه بالخيام — خليه بالخيام
——————-
نايــم دللـول الـولـد هل چلـمة تذبحني

خلوني اشمه وارتـوي واخـذو بعـد مني

من هسه بعـده ابخـيمتي وافراگه عذبني

يـبــرالـك الله ياولـد والله يـسـاعـدنـي

بفراگـك شلون — باجر يـشـمـتون

لحبال حصتي وانت حصتك لرماح
ليـش امـن اديه يـروح لـيـد الـذبـاح

خليه بالخيام — خليه بالخيام
——————-


عقيل زيدان الفريجي

https://www.tgoop.com/y1_7y

#محرم_١٤٤٧_هــ

مولاي سيد الشهداء لمولاي علي الاكبر (عليهم السلام)

بكثر ما كلبي لاچمني من السيوف
طلعت علبني ادور حيل ملهوف
يندهني .. ويدلني
اليدلني خواته وكلشي ماشوف

صاحن وراي الياكتر رايح
احسين رد منا علي طايح
رديت مكسور اسحل بروحي
زلمه شكبرني ومايكف نوحي

ابني واخو صايحله
من المهر طايحله .. بويه علي

مغيرين رسمه وطوله
شفته وصحت معقوله .. بويه علي

علي يبني .. علي يبني
------ __

اجيتك موش الأول ياعلي حسين
أجيت وسابگتني دمعت العين
يبن روحي .. ويمذبوحي
يبويه جيت أخبرك حالي مو زين

ردتك تگوم وياي للخيمه
ماراهمه تضل يبني بالهيمه
رايدله زلمه يردني لخيامي
وزحمه أنخه غربه وبني جدامي

وي الخيل اجيت مدافع
كالولي بزرك ضايع .. بويه علي

يبني أمك أمتانيتك
بلب العمر شاريتك .. بويه علي

علي يبني .. علي يبني
------ __
حسبتك تردلي وتنه ضليت
ومن أخيامي گوه يبني الك جيت
علي يبني .. أنكسر غصني
يراعي البيت گوم وياي للبيت

حفنه العمر وأيامه معدوده
والمثلي دمعه يفطر خدوده
يافي كبرتي وعازت سنيني
ياعلي بويه گوم باريني

ردتك تجي أتجيلي
يوليدي خلص حيلي .. بويه علي

صار الضهر بعيوني
ليل وتغير لوني .. بويه علي

علي يبني .. علي يبني
------ __
عمتك والعلاوي يريدن أتگوم
يلكبر گوم يبني مو وكت نوم
طلعت أعثر .. دليلي انطر
أخبرك بويه بيه تشمتت گوم


شديته ضهري بيا علي وجيتك
وسيوفهم لن گبلي شاريتك
سبگني الك سيف وعطش كافر
بس شفتك وصرت أكسر الخاطر

حر العطش بشفافك
ومسبلات أچتافك .. بويه علي

ماوجديتك يبني
فراگك علي تعبني .. بويه علي

علي يبني .. علي يبني

رسول رياض

https://www.tgoop.com/y1_7y

يبني علي يالأكبر ... جسمك لكَـيته امطشر
من يا كتر أشمك ... من صدرك امن المنحر
بويه علي .. بويه علي
.....////////////////////////\\\\\\\\\\\\\\\\\
١=
أشلون اردك للخيم محتار أني
كلما شلت منك جزء يوكَٓع الثاني
شيلمك امن الكَـاع يا زهرة زماني
جنت احسب انته اتصير دفان ابمكاني

كبرني حيل امصابك .. شيب لحيتي اخضابك
اكَـعد علي محتاجك .. يذبحني بويه اغيابك
بويه علي .. بويه علي
..........////////////////\\\\\\\\\\\\\\\\\\
٢==
عالغبره مثل السبحه بويه امطشرينك
وليش السهام امشكَـكَـه اجفونك وعينك
وبصوب رجليك انظرلهه وصوب ادينك
والخاطر الله اصبر بعد يالذابحينك

كلشي الي راح امن ايدي.. وأصبر بعد يوليدي
موتك فجع دلالي .... وغيَّب اهلالي بعيدي
بويه علي .. بويه علي
.....///////////////////////\\\\\\\\\\\\\\\\\
٣===
لابيه اشيلك لا اعوفك عالوطيه
اكَـعد وحاجيني يمذبوح الرزيه
اشلون ارجعك لامك المنتضره جيه
مو هينه تنظرلك ذبيح ابين اديه

من طلعتك تدعيلك ... سالم ترد ادخيلك
افتحلي عينك بويه ... وللخيمه خل اشيلك
بويه علي .. بويه علي
...../////////////////////////\\\\\\\\\\\\\\\\
٤====
يابوية كَـوه المصرعك جاباني دمعي
جبت الدرب عثرات يبني وشوف وضعي
غالي انته مو بس عندي لا حتى اعله ربعي
موتك تركني ابلايه روح اعليك انعي

فكَـد الولد شيعوضه .... ايموت ألأبو كل لحضه
وبعدك مصيري اني .... بدموع عيني اتوضه
بويه علي .. بويه علي
...../////////////////////////\\\\\\\\\\\\\\\\
٤====
بعدك على الدنيه العفه يبني وحبيبي
اصبح نصيبك موت والهم من نصيبي
جرح الكَـلب ما يشفه بعدك يا طبيبي
وحزني يضل دايم عليك ابكَـد نحيبي

جرحك أشَد اجروحي . يا نبض كَـلبي وروحي
بعدك حياتي اشبيهه .بس حزني بويه ونوحي
بويه علي .. بويه علي
//////////////////////////=====\\\\\\\\\\\\\\

✍️🏻 كلمات #موسى_الخادم ٢٠٢٥

https://www.tgoop.com/y1_7y

هاشمي عنوانك
والحرب ميدانك

حي الله الأكبر
***
دخنت سوح الوغى....من يطب راعيهه
حادث الطف يمتلي....بصولته  يصفيهه
علي الأكبر  لو زعل....... كربله يمحيهه
رايته  رايته   علي.......ابيمنته ايعليهه

اعلنت   برهانك
والحرب ميدانك

حي الله الأكبر
***
تنحني رؤؤس الزلم.....من يمر اعليهه
رفعت ايديهه نعم.....اتذكرت ماضيهه
من نزع بيها ركض......ما  ستر  تاليهه
نفسه  ينعاد الأمر.......بالوغى يبچيهه

حيدري  ابيمانك
والحرب ميدانك

حي الله الأكبر
***
چنه عزريل وحضرها......لو نزل واديهه
ذكر   ابخيبر   علي.......ملحمه يسويهه
صارت البيده بحر.....بيده يحصد بيهه
شافوا  الأكبر  علي.......عاد  خيبر ليهه

تنتهي   عدوانك
والحرب ميدانك

حي الله الأكبر
***
اترجل اعليهم يجي......هاشمي يبديهه
چنه حيدر لو حمل.......بالحرب يفنيهه
يبتدي  بيهم  لگط.......والجمع يطويهه
بكر ابن غانم شرد.....چن صقر يصليهه

كربله    اوطانك
والحرب ميدانك

حي الله الأكبر
***
صوگرت والطف هدل....ابغيرته ماليهه
كلها معزومه  بصقر........باچر  ايوديهه
ملحمه تصبح غداً......بالقصص يرويهه
هيه بغضت حيدره.....العادته ايعاديهه

برهنت طوفانك
والحرب ميدانك

حي الله الأكبر
***
تمت بعون الله تعالى الشاعر___يوسف_الفتلاوي
#جديد_محرم_الحرام_
https://www.tgoop.com/y1_7y

#ليلة_العاشر💔

مولاتي زينب (عليها السلام) بعد مصرع سيد الشهداء (عليه السلام)

يلتمن بناتي بنشقه لحذاي ـ خويه
چوانه الجمر ممشانه حفاي ـ خويه
شيطفي الخيم ومگطع الماي ـ خويه

رحت لحسين أشوفه وحيل محتاره
أگله أشكيلي بلكه الگه الجرح جاره
يگـلي أجروحي كلهه أتهون يم عون
بس المثلچ يضل ماله كل چاره

أنه أخته وعرف أشبيه وعرف الحيل ياذنه
يــــأشـرلي عللبنيات بويه الحگ يندهنه
ودمعته بعينه دم أطيح من گامن يحشمنه

00000000000000000000

هوه شضال منه وخاطر نعيش ـ خويه
محترگه الخيم چاا نلبد أبيش ـ خويه
مـــــو چنه سويه ننفرد ليش ـ خويه

گلبي من المصيبه والله يوجعني
وطگ اسياطهم يبن أمي تعبني
أضيع بالبنات ودنيه صارت ليل
وتيه بالزغار أنته أبنه لو أبني

مايسكت صهيل الخيل والأطفال مذعوره
وعمتهم نحيله أشلون تمشي بحيره مكسوره
الماعرفت أسمهه الناس تتطلع هسه مجبوره

00000000000000000000

أضل الوحدي والوادم شلون ـ خويه
حيل هواي زحمه ترگض أم عون ـ خويه
الهضمه أگبالي من فوگك يسحگون ـ خويه

حگي أتراگض وي الخيل وتعثر
أثاغب حگي ونته أگبالي تطشر
شتسوي بقميصك خيلهم يحسين؟
بحوافرهم خذنه أتقاسمنه أبر


تهد الأعوجيه عليك أه يا كسرت العاشر
أميضعتك ودور عليك گلي بيا كتر صاير
الخير أدريه تلمه الناس مو يطشر بحافر

00000000000000000000

بين المستحه والخوف رديت_خويه
گعدت أگبالهن وبحرگه ونيت_خويه
زلمچن ذبحوهه ماكو أهل بيت_خويه

ماوصيچن عليچن گضه الحيل
مابياش أدور جايچن ليل
تعالن لاطلعن تمشن بعيد
لبوچن رحت أشوفه وهدو الخيل

عمت عيني شكثر تعبان شفته وصاير بحيره
أخــر گعده هاي وياك گتله ورايحه الديره
ديره الماكو في عباس بيهه ولايصح غيره

رسول رياض

https://www.tgoop.com/y1_7y

آخر ليله آخر ليله ويه حسين
آخر ليله آخر ليله ويه حسين

،،،،،،،،،،،،،،،،،،،،،،،،،،،،،،،،،،،


ليلة دمع يا كربله مختنگه بيچ الانفاس
بس باچر ويمشي الضوه وما يبقه اخوي العباس
باجر حسين الوحده وعلخيمه مامش حراس
ياهو اليعينه بغربته ما ظل رحم موتى الناس


هاي    الليله   مو  نفس   الليالي
ما اريد    الصبح    ياخذ  دلالي
حچالي حسين عن باچر حچالي
ادري     بكربله    متخلي  غالي

يا ربي   ما   يطلع  فجر
وبعيني ما اشوف الشمر


حيدر بويه ،، حيدر بويه ،،     ما  باقين
آخر ليله     ،، آخر ليله   ،،    ويه حسين


،،،،،،،،،،،،،،،،


يا حالة الما تنوصف يمي اخوتي وگلبي بنار
وجه الحسين يشع ضوه وباچر يصير الما صار
وجه الغفى بحظن النبي ويمسح عليه المختار
باچر يذبحونه العده بهالحاله ليوين اندار


اصد للمشرعه واندب كفيلي
يعباس الهظم هدالي  حيلي
ينايم  علنهر   چا  ما تجيلي
ما ينفع عتب وافرش شليلي

طول   بعد  ظل  للابد
اتمنه  تبقى  بلايه حد

وابقه وياهم ،، وابقه وياهم ،،  نور العين
آخر ليله     ،،   آخر ليله     ،،  ويه حسين


،،،،،،،،،،،،،،،،،،،،،،،،،،،،،،،،،،،،،،

ها يا رقيه ويه الابو هالليله حظنه مغطيچ
باچر يعلوية الرمل والنار راح تچويچ
باچر السوط من الخيم للنحر راح يوديچ
وتلگين ابوچ بلا نفس ومنظر ضلوعه يأذيچ

باچر خيلهم وسفه اعله صدره
والاف   الرماح   تريد     نحره
حدره الدم صبح نهران  حدره
يا أم الحسن    وينچ    يزهره 

ابنچ   ييمه   لوحده
علغبره ما بين العده

راح الوالي ،،، راح الوالي ،،، يم حسين
آخر ليله    ،،،  آخر ليله   ،،، ويه حسين

،،،،،،،،،،،،،،،،،،،،،،،،،،،،،،،،،،،،


عبد الله منك ما شبع هستوه گال ال بابا
الخايف عليه من الهوى باچر تشوف مصابه
يعطش لحد ما ينتهي أويسگونه بالنشابه
اليغفه اعله صدرك للاسف باچر يحظنه ترابه

ترجعه اعله الخيم  وتشوفه  أمه
ما   ميت   تصيح   ابني  وتشمه
يلرايح طفل   بس    راد     زلمه
ها   يبني   ويريت   عيوني تعمه


شفتك  يذبلهه  الضمى
يلغارگ   ابحر   الدمى

يبني الغالي ،،، يبني الغالي ،، رايح وين
آخر ليله   ،،     آخر ليله   ،، ويه حسين

،،،،،،،،،،،،،،،،،،،،،،

يم رمله جاسم هلگعد وعيونهه تنظر ليهه
گللهه يا يمه الصبر  والزفه  لتأخريهه
عندي العرس چلمة شرف واجب علي احچيهه
دمي اعله تربه كربله هوه الذي يحنيهه

راسچ    يرتفع    لو ردني عمي
مستشهد   بديه   وفاض  دمي
بنص   ذاك القتال  وچان  همي 
اسمع   بس ردت  هلهوله   أمي

وفيت  انه ابن  الحسن
وزنودي  ذني   اتگطعن

گلبي وياكم ،،، گلبي وياكم ،،، يلماشين
آخر ليله    ،،،   آخر ليله    ،، ويه حسين


،،،،،،،،،،،،،،،،،،،،،،

خانگني يا بويه الدمع كلما اشوف اخواني
صاح الحسين بعيلته واحد يودع الثاني
زينب اذا شفتي الشمر من الگفه ذبحاني
تبقه اليتامى بذمتچ راح امشي منهم اني

زينب  للمصايب  شدي  حيلچ
لا يمچ   اظل    لا صح كفيلچ
ياهو  اليسمع  الونه   ويجيلچ
يا نارچ    ولا    يبرد     دليلچ

من  كربله لشام  الدمع
صوت اليتامه الينسمع

هاي الليله ،،، هاي الليله ،،،  بس عدلين
آخر ليله   ،،،، آخر ليله ،،،،  ويه حسين


كلمات خادم الحسين
رعد الفريجي
#جديد_محرم_الحرام_
https://www.tgoop.com/y1_7y

شفته بمنامي ويگلي ضامي
توني فارگتك ياضوه عيوني
وزينب اتگلي خويه ذبحوني
**
بالطيف اجاني وايده عله صدره
شلونج سألني وبگلبه حسره
انته شلونك يحسين ياخويه اضلوعك وين
بصدرك هالحفره منين اشوف
تحجي وصوتك مخنوك جا خويه شگد مسحوك
بظهرك صدرك مطبوك اشوف

تنزف جروحك وخلصانه روحك
والشمس گتلي غيرت لوني
وزينب اتگلي خويه ذبحوني
**
يحسين اشوفن اجروح بوريدك
وياخويه انشدك وين اصبع ايدك
بنحرك شفتك مطبور خويه وصدرك محفور
واصبع ايدك مبتور حسين
بالعاشر شفت الويل وشمسويه بيك الخيل
داساك الحافر حيل حسين

اشلونه ضلعك خليني اسمعك
هدمت حيلي وخابت اضنوني
وزينب اتگلي خويه ذبحوني
**
اشلوني يختي گطعولي نحري
وبعده يزينب يوجعني صدري
سحگتني الخيل اهواي عشره الصعدن فوگاي
والحافر رايح جاي جريح
من عنده اشگد مجروح يسحگني وروحي اتروح
المن ظلتها الروح جريح

عطشان اگلهم وسبوني كلهم
كسرو ظهري وخويه سحگوني
وزينب اتگلي خويه ذبحوني
**
اهنا يزينب خلوني وحدي
بسهم المنيه گطعو جبدي
الخيل التمت والناس وآنه بآخر انفاس
انده وينك عباس تعال
گامو بيه ايطعنون وحيل بصدري ايسحگون
وظلو بيه ايسلبون تعال

عباس اريده يحضر عضيده
عازته عازه من يطعنوني
وزينب اتگلي خويه ذبحوني
**
هذا يزينب برمحه طعني
وذاكه اجاني بصدري رفسني
بالطف شفت الما صار ناس بخيل وبحجار
وناس اتسب حامي الجار عجيب
يومي ما مثله يوم شمسوي الهاي الگوم
ماخلت عندي اهدوم عجيب

طعنه عله طعنه وما بيه ونه
تنزف اجروحي وخويه لجموني
وزينب اتگلي خويه ذبحوني
**
الشمر اعتناني وجاثي عله صدري
لازم لحيتي ويگطع بنحري
بنحري ظل يطبر حيل وبعيوني صارت ليل
بكل طبره شفت الويل عذاب
عانيت من الطبرات واكثر خويه الطعنات
شگد اتحمل شوغات عذاب

راسي يگطعه برمحه يرفعه
عالترب زينب مرمي خلوني
وزينب اتگلي خويه ذبحوني
**
تمت
ميثم العمري

https://www.tgoop.com/y1_7y

حيهم يا عمام حسين طاح حسين من مهرة
واليتـه الزلــم ويريــد منكم واحــد يحضره
ــــــــــــــــــــــــــــــــــــــ
حيهم يا عمام حسين هذا حسينكم وحدة
طايح والزلم والخيل هدت لــي فرد هــدة
مـــا صح بالخلكَ نغـــار عنه العـــايل يرده
اول تالي هيج حسين حته اخوان ما عنده

الكلها تطيح جدامه
سلبو منه العمــــامه
ولا فزعت كَرابه وياه ولا من ناصر ينصره
ــــــــــــــــــــــــــــــــــــــ
مامش زلم بالصيوان ظلت حتــه احشمهــا
لزينب يهـل زينب ليش مــافزعت ولد عمهــا
ظل اعلى الرمل مطروح ابن سيد مكارمهــا
طاح وعنده بس نسوان ركضت ليه من خيمها

هضيمة وحيل موسهلة
بس نســــوان تفــزعلــه
وعلوياتكم بالبر ركضن والدرب عثرة
ــــــــــــــــــــــــــــــــــــــ
ركضن صوب ابو السجاد من فزعت الخيــالة
شـافنــه بهـــذاك الحـــال كَــامن يبجن لحــاله
ذنــي مدللات حسين مـــا يتحـــاجن بجــــاله
هسه حسينهن مــن طــاح صارن بيد جتـــاله

هسه الهضم كاتلهن
من طــاح المدللهن
ومن ينطر فجر للشام وراهن ع الهزل سفره
ــــــــــــــــــــــــــــــــــــــ
ركض وملافت وعثرات من الخيم للحـــومة
اطيحن من يطكَوني واحير انوب بالكَـــومة
وصلت يمه ولكيته يلوج والحر غير ارسومه
صدك نايم لكيت حسين بس شلونها النومة

شفته وعسن لاشفته
يتكَلب عــــزيز اخته
يصيح الماي اريد الماي كَلبه من العطش جمره
ــــــــــــــــــــــــــــــــــــــ
بس انه افزعت لحسين مــا صحت زلـم تنغــــر
خلصت الدرب لوعات نوبه انهض ونوب اعثــر
لكيته من التعب مكَطوع نفسه وميت من الحـر
الف وتسع مية صواب بيه وبعــد بيــــــه اكثــر

حرت يا جرح اضمدنه
اخ يصيـــح اسمعنـــه
اشدن يا جرح بحسين وبي من كل كتر طبرة
ــــــــــــــــــــــــــــــــــــــ
من فوك المهر للكاع طيحت شيخكــم صعبة
لا ظلت عشيــره ويــاه لا خـــوان لا صحبـــه
كبل الذبح يطلب مــاي محـــد يقبل يشربـــه
ومـن بعـد الذبح سلبوه وسحكت خيلـهم كلبه

طايح شيخكم زحمه
بيـد المــــالهم رحمـة
من كثر السحكَ بالخيل ضلوعه انطبكت بظهره

رائد الناشي

#اللهم_عجل_لوليك_الفرج

https://www.tgoop.com/y1_7y

قصيدة في نهار يوم العاشر وما بعده جديد محرم ١٤٤٣ هـ

اويلاه يا فاطمة   اويلاه يا فاطمة
======================
يا يمة بتچ بالغرب   اويلاه يا فاطمة
واخواني نومة اعالترب  اويلاه يا فاطمة
ما اوچد بعيني الدرب   اويلاه يا فاطمة
لهالحالة موش معلمة   اويلاه يا فاطمة
=====≠=========
بالحافر حسين انهشم
صدرة ويعاين للحرم
من ظهرة مطلاع السهم
مذبوح سابح بالدمة
==============
صوب الشريعة التفت
ناديتة يا خوية وخفت
العباس طولة ماشفت
مطروح حالة مؤلمة
===============
جاسم والاكبر والطفل
انظرهم وعيني اتهمل
والعيلة مچتوفة بحبل
والنار بينا مظرمة
===============
بالنار شبت خيمتي
ومحد اجاني من اخوتي
يايمة شوفي حالتي
اعلية الاعادي ناقمة
================
مچتوفة بحبال اليسر
والعيلة حاديها الشمر
ويتأمر اعلينا زجر
ما چني بت حامي الحمة
================
نسوان يبچن بالضعن
وايتام ما عدهم وطن
وعليل حاير بالزمن
من الشمر شيسلمة
================
ظلام ما رحمونة ابد
حبل بحبل بينا انعقد
لا تچوة عدنا ولا سند
بس العليل انحشمة
================

أسالكم الدعاء رائد الاسدي

https://www.tgoop.com/y1_7y