(هل ترانا هل نراك)
ليلك دمع مثل الشمع… يطفيك الحزن والحسره وحدك
عمرك سهر يم النهر ..تتاني البي وجع لجروح جدك
سمعناها المصايب… والجرح ماحملناه
شني بگلبك يغايب… شفت الماسمعناه
شفتهن من ولوهن… وصاحن واحسيناه
من العطش للخيمه جرك
گبالك الذباح يضحك
وانت بس انت ودمعتك
صعبه كلش وانت غايب
شلون تبچي اعله الخرايب
شايل جروح ابغربتك
ماصار ..مثلك ابهالدنيا غايب لونه
ماصار ..اويانه بس محد يشوف اعيونه
العفو.
……
جرحك كبر يالمنتظر ..بچينه اعليك بس محد يجيلك
غايب عمر بس مانمر… وبس وكت الشدد نصرخ دخيلك
ونحبه اهواي جدك
بس مامره اجيناك
عجيبه وهايه حيره
نعزيك ونسيناك
بس انت وجروحك
مامره فهمناك

ليش ماتعتب علينه
تجيب خير اتحط بادينه
واحنه مادورنه عنك
فشله لو سولفنه باسمك
ومانعرفه شنهو همك
مستحين هواي منك
وينك… ياهو كلف روحه بينه وصاحك
وينك… ماندورك دورك ذباحك
العفو
…… ..
ميت عطش وابلا نعش… گبالك بس ولا تگدر تدفنه
ناسك غرب جرحك صعب… مثلك ياهو بين الناس حزنه

خفيتوها السوالف ..واعلينه تخافون
مانحچي المصايب ..اذا سمعو يموتون
يضل هذا سؤالي… حال الشافها اشلون

الماي ماخله اعله حالك
شماتشوفه يروح بالك
عاليبس ريجه وچبدته
يالعطشت اوجوه ناسك
ماكو چلمة بگه ابراسك
عايش احسين اوغربته
راحو… من زمان وبس صور بعيونك
راحو… .ومحد اليسأل يمهدي شلونك

العفو
… ..
يالتبچي دم اعله الخيم… ناسك مادرو حزنك يمولاي
يابو النزف حزنك كلف... ولامتنه الخلگ چي نلطم اهواي

منو المنهم رضاها… نسوانه غرايب
منو الضيع بناته… .وباتن بالخرايب
يذبحون اهله كلهم ...دمهم عالترايب

عالرماح ابلا عمايم
تنذبح كل الهواشم
ياهو يرضه تصير هايه
المهدي شاهد عالمصايب
والتسموهن غرايب
ذني عماته السبايه
راحن ..ذابح اخوتهن خذاهن للسبي
راحن… ودم اخوهن خابط ابلون العبي
العفو
……
ظيم اوقهر كسر الظهر… الله يعين گلبه اهواي تعبه
بوكت العطش مثل النعش ..من يطونه ماي ومايشربه

مصيبه ماوراها… .ماتحصل مصيبة
والاجروح الچبيره… عالاگلوب الغريبه
شيحمله شكبره صبره… الماثار الحبيبه

يشوف كل الكتلو اهله
گبال عينه وهاي سهله
والمصيبة احنه النمنعه
الهسه مافكرنه بيها
ماوصلنه الغاية ليها
مالگاله ارجال سنعه

مولاي… فدوه الك نفديها كل هاي السنين
مولاي… ماكو غيرك بي عطر من الحسين

……
حسن نسيم
https://www.tgoop.com/yahussan98

يمدلله واميره
ماتشبه الاسيره
ماچنچ الغريبه
بگلبچ حمل عشيره

يالاسمچ الچبيره
كلچ شهامه وغيره
يازينب الكفيلة
تسميتچ الاخيره

مثلچ يزينب بالعزم مالچ مثل
چنتي ابشموخچ حيدره فوگ الهزل
اميرة موش اميسره وكلچ صبر
لميتي بيدچ كربله وبيدچ حبل


منچ عرفنه الناس
ماتشبه العباس
بالدنيا مامش لون
كون الورد ينداس



اميرة الانام… زينب
خليفة الامام… زينب

………………… ..
بيدچ حملتي رايه
حي على العبايه
رتلتي كل كلامچ
بالطف نزلتي ايه



يالبوجودچ غايه
تتكفلي السبايه
لو نامن ابخرابه
من زودچ الحمايه


من عندچ ومامش بشر مثلچ صبر
شماتكبر الطف گلبچ واجرحچ كبر
حتى الدمع من باوع اعيونچ وگف
من هيبتچ ضل خايف وخد ماعبر




الكل خدر عنوان
وعنوانچ القرأن
حرمة انتي بس اشلون
مو مثلچ النسوان


كفيلة الاباء… زينب
كتيبة الوفاء… زينب



……… …… ..


ياشامخة ابمصابچ
محد حمل عذابچ
ودعتي كل اخوتچ
بس ما نزل حجابچ



يامقدسه ابترابچ
ابذبح اخوتچ ثوابچ
ما بين انكسارچ
چان الشكر جوابچ




گالو عليچ امحدبه من گد الجرح
ظهر الدرع حدب على املاگه الرمح
گالو خسرتي وراحو اهلچ عالثره
گلتي اليطيح الخاطر الخالق ربح

مالچ شبه باوصاف
طولچ ولا ينشاف
طريتي وحدچ جيش
چنچ سبع تالاف


يالوحة الثبات… زينب
يامنبع الحياة… زينب

…………… …… .
ماهزتچ مصيبة
يازينب العجيبه
كل الخلگ تعرفچ
بس اسمچ الغريبة


يابت علي الحبيب
اسمچ صعب نجيبه
شموخچ وثباتچ
من گلبچ ونحيبة

ياحرمه مثلچ عالمه بعلم الحرب
هجمت عليچ الخيل ماعفتي الدرب
ماهزتچ نار وزلم چنتي الجبل
لبدت وراچ الناس كلها من الغرب

مثلچ ولا يلگون
يالتبچي ليچ اعيون
ياخيمة الايتام
بس يمچ يأمنون

ياراية الامان ..زينب
في قلبك الحنان… زينب

………… ..
من فرو اليتامه
صرتي ابجنح حمامه
لميتي كل ضعونچ
بس يمچ السلامه


ماعندچ الندامه
دليلچ وكلامه
ياهو الدليله بارد
بس تحترگ خيامه

چنتي الامان البالخيم والكافله
بعد الحسين ابصايتچ هالعايله
يالوگفتچ وسط الحرب وگفة علي
رجعتي بالسبعين الف بالبسمله


ياالماتشوفچ عين
بعيونچ النارين
من ركضن النسوان
بس انتي صرتي احسين

ياكلمة البقاء… زينب
وحيدة بالعراء… زينب

حسن نسيم
………… .
https: //www.tgoop.com/yahussan98

اللحن اسفل القصيده

السلام عليكم ورحمه الله وبركاته
احبتي خدمة الحسين ع
ابتداء من الليلة وحتى حلول شهر محرم الحسين ع سوف اقوم بنشر قصيدة مع اللحن كل ليلة
ومن لديه استفسار بخصوص اللحن مراسلتي على التليكرام
وعظم الله لنا ولكم الأجر
لا تنسونا من الدعاء احبتي 🙏🙏
وفقكم الله وثبت اقدامكم على طريق محمد وال محمد💓💓

خادمكم الأقل

(رحيل الحسين) عليه السلام

من كان فينا باذلا حياته
فليستعد ابكربله المماته
بس اليحب يرحل معي ابوفائه
والمايحب خل يبقه بامنياته

ياهو اليفارگ مهجته ويمشي ويعوف احلامه
درب العشگ يكتل تره اليعشگ يودع ايامه
انا انطي ديته الينذبح انا الكفل خدامه


حبنه عطش والمايحب
خل يشرب ويروه ابعذب
ماعدنه غير الله الصدگ
كل العليها بس چذب

فليرحل معنا
فليرحل معنا

……… ………
من وطن القلب على النهاية
هذا الضعن دربه درب هدايه
بدرب العشك مانرجع ابسلامه
ياقومي قومو حي عالمنايه


مشتاگ انه وذابحني هم وكل شوگي اشوف اسلافي
اضحك اذا صار الذبح والخيل فوگ اچتافي
ياخيل دوسي اعله اليدگ خلي يفز كل غافي

هذا العشگ هذا الصدگ
يصير الفناء اويه السحگ
خليني اذوب امن الدمه
الغير الله گلبي مايدگ

فليرحل معنا
فليرحل معنا

………………… ..
ان كان دين محمد بروحي
فياسيوف كثري جروحي
ويارماح فاطعني نياطي
فلا يزيد عمري غير نوحي


ماقدمت روحي ابعفه خايف على خدامي
باچر يصيرون ابغرب لو ماكو اسم الضامي
ماعدهم الله الينعبد لو سالمات اخيامي


الخاطرهم ابقه ابلا خيم
والشيب صاير كله دم
لو ما يضل راسي ابرمح
ماتبچي باچر هالخدم

فليرحل معنا
فليرحل معنا

…………………
هذا الضعن ياهل الضعن خذانه
بس اليحب الله يجي ورانه
والمستعد من تحترگ خيامه
يصبر عليهن هذا من دمانه


هو العشگ يبدي ابعطش وحروره تچوي اعيونه
العاشگ يبين من نحر ماينعرف من لونه
يتبسم الطعن الرمح مذبوح ويسحگونه


ليش اليحبك ينذبح
يالكل سواليفك ربح
كل عاشگ يسولف همس
بس حچيك الفوگ الرمح


فليرحل معنا
فليرحل معنا

حسن نسيم

https://www.tgoop.com/yahussan98

(انا بيدك)
احسبني كل شي بكيفك انته
انا بيدك مالي راي
انا ماكو ابلايه اسمك
ياضواي وياهواي
ياهو مثلك دوم اذكره
شماعرض بعيوني ماي


انا باسمك سجلتها اسنيني
ياهو غيرك سيدي ايلفيني
بكل ذنوبي وماعفتني الوحدي
امنيه عندي خادم اتسميني

وانصبلك عزه ابروحي واعزبلك دمع گلبي
اذوب بنحرك الضامي وافرح لو الك تعبي
اتيه ابكل درب مولاي بس الخدمتك دربي
حسين يامولاي حسين يامولاي

………………… .
شتسوه هايه الدنيا كلها
لو رحت عنك بعيد
ولو گلتلي بمجلسي ادخل
انا من عمري شريد
بس قبولك وي رضاك
هايه غايات العبيد


روحي لو مابيه انت شبيها
شتسوه اعيشن وانا معتز بيها
اعتبر روحي بعيد وخاين
بيوم لوما صورتك ابچيها


يساكن گلبي وجروحي كل ايامي لايامك
وحگك يحترگ گلبي شما يحترگن اخيامك
يمر بيه الدمع صوبين فدوه الدمعة ايتامك

حسين يامولاي حسين يامولاي
………………………
ياعذب يا خلقة الله
بيده ربك صوراك
الله خالقنه اعلمودك
حتى بس ننحب وراك
لو يصير وترجعلنه
تراوي جرح العوراك


الكل جرح بيك الله خالق شيعه
تبچي وتنوح اوتصيح البيعه
الوادم اشگد تعبد الله وخافت
والجنانك ندخلله ابدمعه


چبيره اعلينه حيرة البيك بجدرك هالخلك حارت
معاجز انبياء اشگد تعبو بالتعب صارت
تطلع معجزه الخادم ياما صارت ودارت

حسين يامولاي حسين يامولاي
…………… .
ياكريم ا شوسعه بابك
ماتردني شمااجيت
زين موزين انه اطبلك
وبحياتي اشگد عصيت
وبخدمتك حيار انا
سهله صعبه مادريت


يا حياتي المنك اوبين ايدك
الجوارح بيه كلها اتريدك
تطي دوم اوما تردني ابعازه
شماخذيت اتگلي الله يزيدك


ماادري انت ليش اوياي عطائك ماا وگف مره
مااستاهلك مولاي انا البالذنب عمره
بس هو الطبع غلاب حسين وگلبك اشكبره

حسين يامولاي حسين يامولاي
…………… .
حسن نسيم
https://www.tgoop.com/yahussan98

اللحن

كانت محاورة بين العليلة والعم الحنون ابي الفضل العباس عليه السلام
…………… ..
(طلب العليلة )
مو ثگيله وهاي نوگ اهوايه
خل اروح اوياك يابو الرايه
بتكم واخذني اوياكم
ماينحمل فرگاكم

………………………………………

ياعمي اريد اطلب طلب .. تتدخل ابموضوعي
يابو المحنه التحترگ… لمن تشوف ادموعي
تدريني مو حمل البچي… والحسره جوه اضلوعي
خليني اموت ابكربله… ولا اموت وحدي ابلوعي

خذني واطيكم ضوه البعيوني
فدوه بس الوحدي لتخلوني
امدللات ابگدي
وانه الدموع ابخدي

………………………
لو موتي صار امن الزغر… . ولا ليلة اموادعكم
فوگ الوجع صار الوجع… من فارگتكم كلكم
لو بيتي يتهدم علي… ولا يخله من لمتكم
خذتوها كلها ويه الضعن... بس انه چن موبتكم

يالخذيتوا اسنين فوگ اسنيني
مابقت بس الا دموع ابعيني
الفرگه مو البعمري
امشيبه وانه بزغري


…………………… ..
خليني اموت امن العطش… اولا اموت من الفرگه
عبدالله خل ايضل الي… من يبچي گلبي ايحرگه
يخوفني طاري كربله… خاف الاخيول اتسحگه
من يبچي غاد امن العطش… من ماتسكته الشبگه

الموت اشوه ولا يضل ابالي
ماالوحه اعله الرمح چي عالي
وشلون اشوفه ابرمحه
شما حركوه ايذبحه
……… ..
يبنيتي ضلي الوحدچ…. بس غايه ضلتچ بيها
باچر ترد ام الخدر… ….. بس انتي تتلگيها
ماتگدر اتشيل الجدم… غيرچ منو يتچيها
بس الفگد مثلچ اهل… يعرف وجعها البيها

لو شبگتيها امسحي اعيونها
وديري بالچ لا تلچمي امتونها
بالنار لتذكريها
بس باوعي الرجليها
………… .
تعبانه ترجع والتعب….. ماخله بيها اسنينها
حيرانه واهموم السبي… وشماتها امحيرينها
واسيها بدموع اوصمت… وعالحاله لاتسألينها
اتموت لمن تنسأل… عمة رقيه وينها


رجعت من الشام ماخذ حيلها
وكل دمعها الطاح مايكفيلها
المذبوح اخوها شتحچي
ماتبرد اشما تبچي
………
حسن نسيم

الى مولاتي العلية عليها السلام ثگيل
https://www.tgoop.com/yahussan98

••القصيدة | ها يشام|
••اداء |الملا علاء التميمي|
••كلمات |حسن نسيم|
••الذاكر |علي نائل|
افتتاح مخيم ابناء لواء العباس

https://youtu.be/ou7mjIkGc5w

هاي اول مره يازينب تصير
هاي اول مره احس كسرة بگفاي
شلون اسولفلچ يخويه وحيلي باد
زينب العباس ماجابلنه ماي
زينب العباس مايعرفني ليش
الدنيا كلها تهون زينب الا هاي
الموتتني يگلي طلبه احسبها دين
ماعرفني وگلي ناديلي الحسين
ياوكت عباس مايعرف اخوه
دورت وجها ولگيته ابلايه عين
شما اشيله من التراب يرد يطيح
مستحي وخجلان خويه شگد حنين
عمت عين الماي كلش تعباك
اجفوفك الحلوات شو ماهنه وين
گلي خويه وودوم ما گايلي اخوي
طلعت الكلمة الخذت مني السنين
گلي رد الخيمتي وطيح العمود
وگلهن العباس مايرجع بعد
وبوسلي ارقيه بشغف لمن تجيك
كلها عمچ ماگدر يوفي الوعد
كلها ذب اعيونه واجفوفه ومشه
وكلها راسه الحار كلش هم برد
طايح العباس گلها اعله النهر
وشابگ الجربه لان من ريحتچ
كلها ودالچ عذر بعيون ابوچ
گلها فدوه ايروح بس لا دمعتچ
گلها كل اجروحه تنزفلچ حنين
بساع ينزف دمه بي من ركضتچ
گلها اسف واعتذر مابيدي ماي
كلها حت ىاجفوفي راحن فدوتچ
كلها لتصيحين باجر بالخيام
انذبح كل ساع بس لا صيحتچ

وداعا ياخيم يالكلچ اجروح
وداع المادرت وين المسه اتروح
بعد راح الضوه وهل جانه الاغروب
يخيمه وحل اذان الفرگه والنوح


ودعت اخوتي .. ورافگني موتي
ياخيمه تعبني البچي
انا السبوها… والغربوها
وعالهزله ممنوع الحچي

يادنيا اجه المغرب
ودرب السبي ايتعب… مشينه
باچر على الناگه
وي راسه نتلاگه… .ولينه
الوداع… ياكربله
الوداع… ياكربله
……………………… .

………………… .
غثوني يخوتي كلش ابهاي
من خلّص ذبحكم جابو الماي
كرهت الماي گد ماگلبي عطشان
يارخص الضمه لو طايح الواي

جابولي مايه… وذبحولي رايه
منا بدت كل غربتي
واشلون اشربه… الجايبته غربه
منتظره ماي امن اخوتي


ياماي والخوه
شلون ارضه اتروه… واخوتي
ياروحي عالطاحو…
واباسمي ماصاحو… دموتي
الوداع… ياكربله
الوداع… ياكربله
…………… .
راح امشي يخوتي مشيه متلوگ
الدللتوها باچر تصعد النوگ
من ساعتها تبدي اتروح الاسنين
المحد شاف ظلها يشوفها السوگ

انه ودلالي… متعوبه حالي
ياخوتي يوجعني الحبل

هاي السبيه ..صاحو عليه
هذا الحچي الماينحمل


اه ياالسبي ودربه
اه ياحچي الغربه … الهضمني
چان الرمح عالي
من شوفت الغالي… حرمني

الوداع… ياكربله
الوداع… ياكربله


…………………
هذا اخر وداع ورايحه احسين
اخر شوفه باچر تنعمي العين
من يمك واروحن خويه للشام
اروح اعله الهزل مچتوفه الايدين

من ودعتكم… لو ميته يمكم
تدريني مو حمل الهجر
كل شي تغير… والدنيا تفتر
اغبش سبيه امن الفجر


بس انا وي روحي
ماشافو اجروحي… چبيره
راح اصعد ابخدري
عالهزله لو تدري… اسيره


الوداع ..ياكربله
الوداع… ياكربله
……………… .


……………… ..
ياشام الحزن جيتچ بله اخوان
اجيتچ عالهزيله ابلايه صيوان
يملگاچ اليتعب من الاحجار
حشمتي الزلم ليش احنه نسوان


تشامر علينه… واحنه ابعبينه
ماتنشگف بس بالعبي
شام المصيبه… رحمي الغريبه
ماتنسبي الجدها النبي

عالناگ ياهيه
لليسأل اعليه… غريبه
ياهالخلگ صعبه
زينبكم ابغربه… مصييه

الوداع… ياكربله
الوداع… ياكربله

…………… ..

حسن نسيم

السلام عليكم خدام الحسين عظم الله اجوركم هذه قناة الشاعر خادم الحسين بيها جديد لمنبر الحسين

https://www.tgoop.com/YahyaHa90