ሁስነል ኹሉቅ

#ኸሚስ_አመሻሹ_ላይ!

ሴቱን ሁላ ሪጃል ያደረገው ሑቡ!

የኡሑድ አምበሳ ተብላ የምትሞካሸው ኑሰይባ ቢንት ከእብ ወይም በቅፅል ስሟ ኡሙ አማራህ እስልምናን በማለዳ ከተቀበሉ የአንሷር ሴቶች ውስጥ አንዷ ናት። ሰዎች አል አቀባህ ላይ ከነቢ ጋር ቃል ሲጋቡ አብራ ቃሏን ለውዱ ሰው ሰጥታለች። ወቅቱ አዳዲስ አማኞች በቁረይሽ ይንገላቱ የነበረበት ነው። በዚህ መንገድ ላይ ብዙዎች የገፈቱን ፅዋ ወደው ተግተዋል። ለሐጅ ከመዲና ወደ መካ ይመጡ የነበሩ ሰዎች የቁረይሾቹን እይታ ሽሽት ሚና አቅራቢያ ካለ ተራራማ ስፍራ ነበር እስልምናን የሚቀበሉት። ኡሙ አማራህም በዚሁ መልክ ነው ወደ ሰይዳችን ማሳ ጎራ ያለችው።

ጀግና ነች። ከሒጅራ በኋላ በተካሄዱ አብዛኞቹ ውጊያዎች ላይ ከነቢ ጎን ሆና ጠላትን ተፋልማለች። ኡሑድ ቢባል ሁደይቢያ፣ ኸይበር አልቀራት ሁነይን የማማህ ቢነሳ በቃ ሰይፏን ያልመዘዘችበት የጦር ሜዳ የለም። በኡሑድ ዘመቻ እድሜዋ አርባ ሶስት ነበር። ባልና ሁለት ወንድ ልጆቿም በዚህ ዘመቻ ላይ ተሳትፈዋል። የጠማውን ልታጠጣ፣ የደከመውን ልታቀና ኮዳዋን ውኃ ሞልታ ተነሳች። በኡሑድ ጅምሩ ላይ ሙስሊሞች ድል እዬቀናቸው ነበር። በቅፅበት ግን ሁኔታዎች ተቀዬሩና ጠላት የአሸናፊነቱን ማማ ይቆናጠጥ ጀመር። ይሄኔ ነቢን ለመግደል አሰፍስፎ የነበረ የጠላት ወታደር እንደ ማዕበል እያጓራ ይጠጋቸው ያዘ። ዓይን በሚርገበገብበት ፍጥነት ክንፍ አውጥታ ነቢ አጠገብ ደረሰች። ከየትኛውም አቅጣጫ ማንም እንዳይቀርባቸው አድርጋ ጠበቀቻቸው። በቁርጥራጭ ጨርቆች የተጠቀጠቀ መቀነት ታጥቃ ነበር። ቁስለኞችን ታክማለች። እሷ ራሷም ወደ አስራ ሁለት ቦታ ተወጋግታለች። አንደኛው ግን እጅግ ጎድቷታል። ኡሙ ሰዓድ ረ.ዓ በኡሙ አማራህ ትከሻ ላይ ከባድ ቁስለት ተመልክታ ምን ሆና እንደሆነ ስትጠይቃት የኡሑድ እለት ያጋጠማት መሆኑን አውግታታለች።

ኡሑድ አስጨናቂ ዘመቻ ነበር። ሰዎች በድንጋጤና በግራ መጋባት ሲሸሹ ኢብን ቁመይህ ወደነሱ ሲገሰግስ ኡሙ አማራህ አዬችው። "መሐመድ የታል? ብቻ አንድ ሰው ያለበትን ይንገረኝ። ዛሬ በህይወት ከተረፈ እኔ ሞቻለሁ!" እያለ ይጮሃል። እሷ፣ ሙስዓብ ኢብኑ ኡመይርና ሌሎችም አስቆሙት። እሱ ነው ትከሻዋ ላይ በሃይል የወጋት። በእርግጥ እሷም አላስተረፈችውም። ግን ደራርቦ የነበረው የጦር ልብስ አስመለጠው። ሌላ ሰው ሊያጠቃት ፈረሱን እየጋለበ ሲጠጋት በጋሻዋ ሰይፉን መከተችው። መለስ ሲልም ፈረሱን ከኋላው አጥቅታ እግሩን በጦር ደለቀችው። ፈረሱም ጋላቢውም ወደቁ። ወዲያው ነቢ ልጇን ተጣሩ። በቅፅበት ደረሰና ጅምሩን አብረው ጨረሱት። ልጇ አብደሏህ ቢን ዘይድም ግራ እጁ ቆስሎ ደሙን እያዘራ ነበር። ነቢ በፋሻ እንድታስርለት ነገሯት። ከመቀነቷ ፋሻ አውጥታ ቁስሉን ካሰረችለት በኋላ "ልጄ ተመልሰህ ሄደህ እነዛን ጣዖት አምላኪያን ተዋጋ!" አለችው። ነቢ ይሄን እያዩ ነበር። "ኡሙ አማራህ ሆይ የአንቺ አይነት ወኔ ያለው ማን አለ!?" አሉ በመደነቅ። ለሷና ለቤተሰቧም ደጋግመው ዱዓ አደረጉላቸው። አንድ ጠላት ከኡሙ አማራህ ፊት ሲመጣ ነቢ ከጎኗ ቆመው ነበር። "ይህ ሰው ነው ልጅሽን ያቆሰለው።" አሏት። ዘላ እግሩ ላይ ብታቀምሰው ተዘረረ። ራመድ ብለው ወደ መጨረሻው ሸኙት። ነቢ ፈገግ ብለው "ኡሙ አማራህ ለልጇ ተበቀለች!" አሉ።

ለዓመት ያክል ህክምና ቢደረግላትም ቁስሉ ሊድንላት አልቻለም። በዚህ መሃል ነቢ ወደ ሐምረዑል አሰድ ለመጓዝ ተነሱ። እሷም አብራ ለመሄድ ተዘጋጅታ ነበር። ሆኖም በደንብ ያልዳነው ቁስሏ አገዳት። ነቢ ከዚህ ዘመቻ ተመልሰው ሊዘይሯት ወደ ቤቷ እንዳቀኑ ለውጧን ሲያዩ ደስ አላቸው። "በኡሑድ የተጎዳነው እነሱ በፈረስ እኛ በእግራችን ስለነበርን ነው። ሁለታችንም እግረኛ ሆነን ብንፋለም ውጊያው ፍትሃዊ ይሆን ነበር።" እያለች ትቆጫለች። ነቢ ጌታቸውን ሲለምኑላቸው ኡሙ አማራህ "ያነብዬላህ በጀነት ካንቱ ጋር እንድሆን ዱዓ አድርጉልኝ።" ብላቸው ነበር። ቃሏን ተቀብለው የሙራዷን ሞሉላት። ጌታቸውን "እነዚህን ሰዎች የጀነት ጓዶቼ አድርግልኝ።" አሉት። "ከዛች እለት በኋላ በህይወቴ በገጠሙኝ ፈተናዎች በአንዳቸውም አልተረበሽኩም።" ትላለች። በዬዘመቻው ስትፋለም ኖራ በሃምሳ ሁለት ዓመቷም የማማህ ላይ በወኔ ተሰለፈች። እንደ አራስ ነብር በጀግንነት ስትፋለም ያያት የገፋ እድሜዋን አያምንም። በዚህ ዘመቻ እጆቿን አጣች። ገላዋ በድጋሚ ተበሳሳ።ያላትን ሁሉ ለነቢ ስትሰጥ ኖራ አለፈች። ነገ ቃል በተገባላት ጀነት ቁስሏ በሚስክ ታሸጎ፣ ሰምበሯ ኑር አፍልቆ፣ ከወደደችው ጋር ትገኛለች ቢኢዝኒላሂል ከሪም።

#ሶሉ_ዓለል_ሐቢብ
አሏሁመሶሊ ወሰሊም ወባሪክ ዓላ ሰይዲና ወመውላና ሙሐመድ ወዓላ አሊሂ ወሶህቢሂ ወሰለም!💚💚💚
                              💚💛❤️
                                 💚💛❤️
                                       💚💛❤️
ﷺ❤️ﷺ ﷺ ﷺ ﷺ ﷺ ﷺ
      ﷺ❤️ﷺ ﷺ ﷺ ﷺ ﷺ ﷺ              ﷺ❤️ﷺ ﷺ ﷺ ﷺ ﷺ ﷺ
💚💛❤️
💚💛❤️
   💚💛❤️
       💚💛❤️
🙏ተመሳሳይ ሃሳብ ያላቸው መልክቶች ቶሎ ቶሎ እንዲደርሳቹ ቻናላችንን
Join እንዲያደርጉ እንጠይቃለን፡፡ሼር በማድረግ ለሎሎች እንዲደርሱ
ያግዙን፡፡💚💛❤️
🙏እባክወ ለሚወዱት ሸር ያድርጉ🙏
                   👇
                  👇
               👇👇
:¨·.·¨: ❀   ቻናላችንን ▶️ይ 🀄️ላ🀄️ሉን!
·. Telegram 👇Join ያድርጉ
@yeresulnfkrmeglecha
@yeresulnfkrmeglecha
┄┄┉┉✽‌»‌‌🌹✿🌹»‌‌✽‌┉┉┄┄

435 viewsZ, 17:05