tgoop.com/AbdullahAlshwaily/2166
Last Update:
#رئيسية_لصاحب_الزمان_عج
ردت ارسمك كلشي اجه أبالي يمهدي وما أجيت
ردت ارسمك والذنب شخبط على اللوحه وبچبت
لا حقيقه ولا حلم
گلت اشوفك بالرسم
والذنب شخبط على اللوحه وبچيت
من وحي أفكاري المو يمك فكرت ارسم وجهك بيدي
جبت اجروحي وجبت اللوحه فرحان وچن صاير عيدي
اول مره اعيش اللحظه اضحك والدمعه بنص جيدي
جايب اقلامي من العاشر والواني من دم اورِيدي
اللوحه قطعه محرِگه من كل كتر تمطر مصايب
اللوحه قطعه چنها ماخوذها يمهدي من الخرايب
اتجردت من الاسم
گلت اشوفك بالرسم
والذنب شخبط على اللوحه وبجيت
.
.
.
.
ارسم بعيونك وعيوني تحجبها من الرؤيه ذنوبي
بشاطي الفشله غارگ كلي حتى ايدي مغرگتها عيوبي
اواگف عالضفه امتانيني وشايلي بجفينك ثوبي
تعبتك جا يمتى أنه اطلع من ذنوبي يا محبوبي
والله فشله خاف حاچي وياي واني ما اعرفك
والله فشله حتى بالاوصاف ما اگدر اوصفك
حيلي كلساه ينهدم
گلت اشوفك بالرسم
والذنب شخبط على اللوحه وبچيت
.
.
.
.
مالَك صوره أبالي وارسم وجهك يابو عيون الحمره
اني الفنان الما افشل حسيت الفن إبلا ثمره
بس كالو تشبهه عباسك وارسمت العباس بحسره
عين الزهراء المسطوره ويامهدي انت ضلع الزهره
حزن روحي حزن رسام وفشل يرسم حبيبه
حزن روحي برمش عيني يا ابو صالح خله شيبه
لأن بغيابك اهم
كلت اشوفك بالرسم
والذنب شخبط على اللوحه وبچيت
.
.
.
.
خسران الماشايف طولك والماقَبَل چفك ضامي
چا يمتى اعرگ منك فشله واوگع من توگف گدامي
بصحراء الهجران أتلفت ارد اشكيلك ضيم ايامي
لا آنه الشفتك بالواقع ولا آنه الشفتك بحلامي
يا كسرتي حتى باب الرسم ما وصلني يمك
يا كسرتي مختنگ خنگت مخيم يمتى اشمك
والله كل لحظه أنصدم
گلت اشوفك بالرسم
والذنب شخبط على اللوحه وبچيت
.
.
.
.
ارسم بس ما يطلع شخصك يطلع دم احمر مطشر
يمكن كاتبني وما ادري أكثر واحد اني مقصر
ما گايل عجل من گلبي وعيني الغيرك ضلت تنظر
يا ابو اجروح الما تتشافى يمتى اخيامك بيه اتغزر
اخذ بيدي امروتك لا تاخذ التوفيق مني
أخذ بيدي موتي يتحقق لَون تبتعد عني
بلايه شك عندك علم
گلت اشوفك بالرسم
والذنب شخبط على اللوحه وبچيت
.
.
.
.
صحراء روحي يمتى تمرها وتسگيها يا جرحي بشوفك
لو بس مره اشوفك بيها والله يالمهدي ما اعوفك
مو سبع اشواط ويگضيها گلبي يبقى الموته يطوفك
صرت اغبط عوجيت ايدك چي لاحت يالمهدي چفوفك
خذني يمك حطني خادم وين ماعندك جرح
خذني يمك الشمس ليل بوجهك انشاف الصبح
يا امان ويا شهم
گلت اشوفك بالرسم
والذنب شخبط على اللوحه وبچيت
الشاعر عبدالله الشويلي
BY الشاعر عبدالله الشويلي
Share with your friend now:
tgoop.com/AbdullahAlshwaily/2166