tgoop.com/AbdullahAlshwaily/2169
Last Update:
#العليلة_رئيسية
امنَ اباوعله يدير عيونه عني
أخذ كل البنات وما أخذني
وجهه يكلي اصعدي
السانه يكلي ردي
اجي اكباله بدمع ومناشغ وليش......ويدير الظهر ليه
اردانه امبلله ولو الزم اديه......يسحبها من اديه
أنه الدومي اطيح اكبال الحسين......مثل دمعت رقيه
جيب اللي يقنعه وحدي ما اروح .....الدار اهله الخليه
الجفه ما يصلح وجافوني الحنان
شوكفهم اعليه اهوايه نسوان
ولٓمٓن اجزي حدي
السانه يكلي ردي
.
.
.
بعد ما تطلع الحاء اويه الحروف.... بكثر ما كلت اسمه
بلكي يكول يلا امشي وياي .......افتر كمت يمه
وأنه كد ما عليله جف الحسين.......مابيه الزمه
وحطيت اعله متني الهادله احجاب.... عبدالله اويه هدمه
مِسحت ادموعي حد ما ثكلت الايد
كل ما اجر نفس جرحي وعلي يزيد
امنَ احط ايدي اعله خدي
السانه يكلي ردي
.
.
.
.
صعد مهره ومشه وبدموع الفراك.......... ضل وجه يديره
اختنكنا اثنينه وما ميزت دوم ......يا حسره جبيره
خيط من الضعن ما خله الحسين ......أخذ كل العشيره
صرت الفاكده العافوها الشيوخ.....عكب ما جنت اميره
انه الكوه اجر الرييتي الهاب
اركض ركض كل ما دكووو الباب
غَيره شنهي عندي
السانه يكلي ردي
.
.
.
.
يروحي افراك ابوي ايذبل الروح .......الموت اهون يروحي
شني معناهه أنام امنِ البچي اعليه......وتفززني جروحي
يبس دمعي وصرت اتفنن افنون.......بانيني وذاك نوحي
وكف دمي بشرايني وطحت ليش ......من كالولي روحي
ابو ميت وكفتي صارت ازماط
وشريان الدمع وسط الوجه ناط
لو شاهدني وحدي
السانه يكلي ردي
.
.
.
.
شنو حال التعيش بحضن الحسين....وفجأء تعيش غربه
راح وشوف عيني امنهد فركاه.......مزروع اعله دربه
بظلام الليل اشوفن ضهره مكسور.....ولازم بيده كلبه
واسمع صوت بذني بويه عطشان.....لمن ماي الله اشربه
اشاهد زلم فوك الكاع ميتين
بس لا ضعنه يرجع بس نساوين
ازمه وما تِعَدي
السانه يكلي ردي
الشاعر عبدالله الشويلي
BY الشاعر عبدالله الشويلي
Share with your friend now:
tgoop.com/AbdullahAlshwaily/2169