tgoop.com/AbdullahAlshwaily/2190
Last Update:
#رجوعـالسيدة
جايبه اجروحي لكبرك ما اجه أبالي ارد
حيل كبرانه بغِيابك وروحي ذبلها البعد
هوايه تعبني الوكت
ردت اموت وما متت
جيتك بيوم أربعينك شايله آهات والم
جيتك محدبه ونحيله بلا محامل لا علم
عليك دلاني حنيني وگبرك المتروس دم
مبين من ابعيد گبرك مغطه برماد الخيم
انكسر خاطر اخيتك ومحد يجبره وعلي
هايه اول مره اجيلك وانت ما گايم الي
اعذرني خويه تعطلت
ردت اموت وما متت
.
.
.
.
على ترابك يا جروحي كون يتبده العمر
ما اذبن ماي خافن يفز نحرك بالگبر
لسه ريجي اعليك يابس والهوى يدخل جمر
شلون ابلل ريجي وانت ريجك مشبعيه طبر
يا خسارتنا الجبيره ياللي نظراتك وطن
عفتك مطشر يغالي جسمك شلون اندفن
شحالي بعدك من رحت
ردت اموت وما متت
.
.
.
.
كربله شچم حلم باگت بحسره خلتني اعتنيك
جيتك ابلايه رقيه وجر اجر بروحي ليك
ماتت وازرگ جسمها ماتت بحسرة عليك
احتار من تنشدني عنك شرد اگول شلون اجيك
شكثر كالت بابا بابا مردت بكلبي النياط
ميته من الحرگه بنتك مدري ميته من السياط
وبدفنها تحيرت
ردت اموت وما متت
.
.
.
.
وين ذيج الهيبه كلها خويه شو گبرك زغِير
شايل الدنيا بكبرها شلون شالوك بحصير
على گلبك خيل تركض وانت ابو گلب الجبير
وراسك الخلصها ساجد عالرمح تالي يصير
الگابلك ما يسوه كلشي وانت أمام وابن امام
سيوف دم احجار غربه صارت عليك ازدحام
الكلفه من اطشرِت
ردت اموت وما متت
.
.
.
.
وحق شيباتك وعطفك اختنگ لو شفت ماي
بالسبي مشدوهه خويه وراسك الينطيني راي
شكد حنين وما تركني بالشمس يفتر وراي
اعله الضعينه هواي يفتر ساعة رايح ساعة جاي
رغم ما تعبان راسك بيه شديت العزم
راس من رتل الايه خورس احلوگ الزلم
كباله حيل اتعذبت
ردت اموت وما متت
الشاعر عبدالله الشويلي
@AbdullahAlshwaily
BY الشاعر عبدالله الشويلي
Share with your friend now:
tgoop.com/AbdullahAlshwaily/2190