tgoop.com/Alfaesale/3206
Last Update:
شتسوه حياتي بدونك .. فدوه رحت العيونــك
يحسين أريد بكل عام .. تحزمني للخدمة حزام
خادم و أظل ممنونك
...........................
يحسين انا بخدمتك شما اتعب أشــــعر مرتاح
برأسه حظ الصاحبك واليمشي وي غيرك طاح
الطير من يهوه السمه شيوصله من غير جنـاح
الجنــــــة مقفوله بقفل يحسين وأنت المفتاح
مرتاح كلمـــن حباك .. للنــــار يمشـــــــــي العاداك
الجنة يدخلها منين .. الما لطم صدره اعله حسين
خادم و أظل ممنونك
...........................
يحسين مثلك وين اكوا بس أنت تارس عيني
يا أبو الأكبر مـــــن زغـــــر وياك جبت سنيني
لو يوم ما تلطم الك من زنودي اذب چفينـــي
ضايـــــع و اجيتك عالدرب بس انت الادليني
مغمض وجيتك مولاي .. من إيدك الايدك هاي
مدلي ايـــــدك اترجاك .. ما اسوه كلشي بلياك
خادم و أظل ممنونك
...........................
مولاي ارزقني الجزع و نطيني دمعة وحرگه
يحسين عنك لو رحت مثلك بعد وين الگـــه
سبحان رب الصورك وأحد وكلها تعشگــــــه
لا والله ما يلام أبد من يجن عابس حگــــه
بالحومه شگ هدومه .. جننته ياهو يلومـــــــه
يحسين عندك أنصار .. العاقل مثل عابس صار
خادم و أظل ممنونك
...........................
بعيوني ما شفتك لچن حبيتك أعلى الفطره
مبخوت خادم منبرك ويصير حظه شكبـــره
مهيوب وتحبه البشر الرافگك يبن الزهــــره
بيك التمسك ما خسر للسمه توصل قـــدره
يابو رقية الخدمـــة .. من الله أكبر نعمــــة
مذبوح لكن كل هاي .. عطشان وتوزع ماي
خادم و أظل ممنونك
...........................
الرادونه عنك نبتعد هل كلمة بين القوسين
احچيها للكل بالعلن ذوله صدگ متوهمين
عوفونــه بجنون العشگ نعرفها ونميز زين
شيسوي بالجنة بعد يا عالم العنده حسين
بخدمتك يابو الأحرار .. تأمرنه و نگلك صــار
جربنه وكت الصعبات .. نترك خدمتك هيهات
خادم و أظل ممنونك
...........................
خادم أهل البيت ( ع )
✍#حسين_الفيصلي
BY قناة الشاعر حسين ألفيصلي
Share with your friend now:
tgoop.com/Alfaesale/3206