tgoop.com/Alfoatm3/10838
Last Update:
أهوازيه (#شالوا_الساده) للسيده العليله
……………………………………………………………
معروفه الِذي ايرحلون . اثنين اثلاثه بزياده
بس انا ابفرد مصباح . شالوا كلهم الساده
……………………………………………………………
ذاك الصبح صار اغروب . شمس ابعيني مطفيه
موحش يا سلف عدنان . لا سيد و علويه
نوح الثكله گام اينوح . كل بيت اعل راعيه
ماكو اعمامه سوده أتنور . لا من خضره چفيه
انقفلت بوب و انصدعت
تبچي امن الدمع نگعت
هم انشوف وجه حسين . باب اعل القفل ناده
……………………………………………………………
جان الصبح بيه شمسين.شمس الباري وحسيني
عيد وصوت ابوي اهلال . لو فاطم يناديني
يل من بنته ماخذ روحي.وعقلي وگلبي وي عيني
ظلت عالجسد يحسين . اقبل مشي اتمشيني
ما بث للمرض شكوه
الحيل بشوفتك يگوه
ماريدن غطه وفراش . اتراب اجدامك اوساده
……………………………………………………………
ابيثرب جان مامش ليل.افياي انشوف بالشجره
لان عمي الگمر موجود . اعلينه ايوزع الگمره
أعلينه ايسيّر ابكل يوم . اشگد مرات مو مره
عمي و بُعد خمس بيوت . اشمن غيرته و عطره
وهسه اختنگت انفاسي
ريتي اتريد عباسي
ابوي الثاني ليش تروح . روحي اعليك معتاده
……………………………………………………………
مضيف الساده عامر جان.جاسم ورث من عوده
تطبخ رمله ليل انهار . سفرة عمي ممدوده
يرحب واكف اعله الباب . صوت الاكبر انشوده
وجاسم جن شطب ريحان . لازم دلته السوده
وهسه اضيوفكم سألت
وين اهل الكرم شالت
من هاشم لحد جسام . انتم للكرم قاده
……………………………………………………………
جنت الصبح من اكعد . اريوگي و ما اريدنه
اشبع من اصد كاروك . وچف عبد الله اشمّنه
اصيرن اخف من الريح . لمن بيدي اشلينه
مو بگماط من اقماش . ابرمش اعيوني اكمطنه
يهنياله و يخيعونه
الصد عبدالله بعيونه
يهنيال الفراش الصار . اعليه نومته و مگعاده
……………………………………………………………
من يندگ علينا الباب . اعرف دگة العمه
البيت وينگلب بستان . و الحيطانه مبتسمه
مثل المعضد البـ الأيد . اعليها الحرم ملتمه
حجيها و لأن من ياقوت . تطلع تلمع الكلمه
اشمن ريت شليتها
واتغطه ابعبايتها
و هسه ومدري وسط اخيام . لو تمشين بوهاده
……………………………………………………………
وردات اعل شاطي الماي . يا محلانه من چنه
ابوي اشكد يحب عمي . هيج انا واحب سكنه
حميده و خوله ملتمات . وشريفه اتحلي كعدتنه
شمحله ارقيه چنها العيد . لو گعدت ابوسطتنه
عيوني اصبحت معميه
اطيب ابشوفة ارقيه
يتراوالي عالي السوط . ما يرحمها جلّاده
……………………………………………………………
✍️ ( سيد خضر الزاملي )
خدر الفواطم
لنشر القصائد الحسينية (@Alfoatm3)
#اللهم_عجل_لوليك_الفرج
BY خدر الفواطم لنشر القصائد الحسينية
Share with your friend now:
tgoop.com/Alfoatm3/10838