tgoop.com/Alfoatm3/10839
Last Update:
مولاتي حميدة( ع) وهية بطريق السبي وذاك التعب أدير روحها صوب الكوفة وتحاچي ابوها مسلم وتگلة.....
ادري ميت.....ونطرك وتاني
بوية مسلم....سبيهم گضاني
الدنية غربة...وانة متعودة عليك
ولله صعبة...بس حبل ماهن اديك...ولله صعبه
ــــــــــــــــــــــــــــــــــــــ
الغربة اخذت كل صفنتي واخذت احلام الدلال
هسة وكت الضهر امشي والشمس تچوي الخيال
بوية مسلم ريت تحضر بس حضورك؟ لا محال
انة مسبية وغريبة والخدر من روحي شال
ابچي ونحب....بلدرب بيدي الحبال
لمن اتعب.....أرسم لطولك خيال...لمن اتعب
الهزلة كلفة....أتعبت بوية وبچيت
بية لهفة ....بلدمع بعدك حچيت...بية لهفة
ياهضيمة....بهزيلة مچاني
بوية مسلم....سبيهم گضاني
ــــــــــــــــــــــــــــــــــــــ
اليتعب اتبوگة البواچي وعل مشي مايبقة حيل
انة ورقية مشينة وچانت الناگة هزيل
هية ماهو حسين ابوها وانة هم شد الرحيل
ثنينة نمنة بخرابة عل ترب ويمرنة ليل
شگد بچينة....نسولف بسكتة وجروح
ما حچينة....نحچي بس بلاية روح...ما حچينة
ضلمة صارت....بلا أهل وبلا عمام
كلها ماتت.....وصارت الدنية ضلام...كلها ماتت
ردلي بوية....رحيلك حْناني
بوية مسلم....سبيهم گضاني
ــــــــــــــــــــــــــــــــــــــ
باوعت ما شفت واحد بس شفت راس الحسين
اهنانة بية الغربة كبرت وضاگت ايام السنين
طفلة انة الشام يكتل انة وين اوهوة وين
امشي والسكتة سؤالي والدمع ماخلة عين
مات گلبي....عل نبظ مابية حيل
اهواية تعبي..ودرب الموادع طويل..اهواية تعبي
لا يروحي...راحت احلامچ بعد
يبقة نوحي...راح مسلم مايرد...ابقي نوحي
الغربه كلفه....يفگدك رماني
بوية مسلم....سبيهم گضاني
ــــــــــــــــــــــــــــــــــــــ
غصن حلمي انكسر بعدك كسرت اوتاد الخيام
بوية متعودة اعلة طولك بغير طولك ما انام
اليسر باگ الحيل مني وخضر بصفناتي شام
الشام اسمة يگضي گلبي منة ما شفنة سلام
خل اموتن....خّضر بروحي الحنين
من اخافن..اركض الراس الحسين…من اخافن
بعيني اشوفن....عينة متروسة حنان
وين اروحن..الشام ما يحمل امان..وين اروحن
شسوه بية....برحيلك زماني
بوية مسلم....سبيهم گضاني
ــــــــــــــــــــــــــــــــــــــ
سولفت لرقية ضيمي وهية حاچتني وتگول
يختي مسلم صدرة سالم حسين داستة الخيول
انة صدرة باگة حافر وچلمة ما يگدر يگول
ياحميدة زيدي ونچ وخلي دمعاتچ تطول
يارقية....جرحچ اكلف مني حيل
هم سبية....وهم ابوچ ادوسة خيل...هم سبية
ياجرحنة.....مسلم وجرح الحسين
يختي ضعنة....ما بقة واحد حنين....يختي ضعنة
مو حنانك....شمرهم خذاني
بوية مسلم....سبيهم گضاني
#محرم_1446هـ_
خادم الزهراء صلوات الله عليها
✍️محسن الباوي
خدر الفواطم
لنشر القصائد الحسينية (@Alfoatm3)
#اللهم_عجل_لوليك_الفرج
BY خدر الفواطم لنشر القصائد الحسينية
Share with your friend now:
tgoop.com/Alfoatm3/10839