tgoop.com/Alfoatm3/10844
Last Update:
(( وحدك حسين ))
وحدك حسين .... راجع ومحني الضّهر
كافـــلي ويـن .... مايـرد مــــــن الـــنهر
ما أريــد الــمــــاي أريده
والله مشتاگه اللزم ايده
"" "" "" "" "" "" "" "" "" "" "" "" ""
ســـولفلي اشجره وراجع تِوِن سكته
اول مـــــره اشــوفك انتــه مــو انته
اعرفت طاح الگمر والدگ صدر لخته
من شفــتك عــمود الخـــيمه طيحته
صفنت الموت .... سـيرةّ وسط الخيم
كــلها تابـــوت .... ترسم اعيون الحرم
كسرته كــسره مِــــچيده
والله مشتاگه اللزم ايده
"" "" "" "" "" "" "" "" "" "" "" "" ""
اجه ويصفگ بدينه راحه وي راحه
وگف يمــــي وچفينه على اصفاحه
دنگ هامـــته ويبچي وعلى انياحه
يزينب وي عــيونه راحـــت الراحه
دمع الاعــيون .... بيه سوالف بينتّ
يگلي يم عون .... بيه كلها اتشمتتّ
اشما بچه جرحي يزيده
والله مشتاگه اللزم ايده
"" "" "" "" "" "" "" "" "" "" "" "" ""
يتــلفت بقه بــيـــن الـــزلم وحــده
حــيره تاخـذه وحيره بــقه اتـــرده
امدنگ راسه شفته ودمـعته ابخده
غـير المــوت حل حــسين ماعــنده
خطوه يعثر .... وخـطوه يرجع يلتفت
يآبــو الأكبر .... الصبح هيچي ماچنت
منـكـسر شــبلِ الصميده
والله مشتاگه اللزم ايده
"" "" "" "" "" "" "" "" "" "" "" "" ""
مـشدوه وشفت متــغيره احواله
وذاك حسين صاير يـشبه اخياله
شبر يمشي وشبر دمــعاته هماله
بعــد عــين الگــمر ياعـين تبراله
دمعته اطـيح .... بيهه قصه وفاجعه
ناضره يصيح .... عفـته يم المشرعه
مـن الدمع يخفگ وريده
والله مشتاگه اللزم ايده
"" "" "" "" "" "" "" "" "" "" "" "" ""
يتمـــــايل بقه لو جاســته الـــنسمه
هضــمني من بچه شــفته عزيز أمه
يتنــفس بــقه لچـــــمه وره لـــچمه
عَبره ابصدره ضل گوه الهوء يشمه
بالي نشــاد .... اشلون ابو اليمه صّبر
ثاري منراد .... روحه ضــــلت عالنهر
روحه ضلت يم عضيده
والله مشتاگه اللزم ايده
"" "" "" "" "" "" "" "" "" "" "" "" ""
عبد زينب
محمد مسلم الأسدي
خدر الفواطم
لنشر القصائد الحسينية (@Alfoatm3)
#اللهم_عجل_لوليك_الفرج
BY خدر الفواطم لنشر القصائد الحسينية
Share with your friend now:
tgoop.com/Alfoatm3/10844