tgoop.com/Alfoatm3/10847
Last Update:
القاسم بن الحسن
صلوات الله عليهما
يامالك حواسي ومالك اسنيني
ياكوثر حناني ويانظر عيني
حنيت الدلالك. لاتكطع وصالك
يامالك حواسي
ــــــــــــــــــــــــــــــــــــــ
ماخذ كلبي وسهري وتعبي وكل ارباي
ياعافيتي وشمعة بيتي وكل دنياي
مدري ادعيلك لو ابجيلك تاه الراي
طحت ابشده..وصبري اتبده مثل الماي
بعدك كسرتي وجيتك تفرحني
وجهك ضحكتي وفركاك يذبحني
يالماهل هلالك..لاتكطع وصالك
يامالك حواسي
ــــــــــــــــــــــــــــــــــــــ
امك اني..ولاتنساني.. ياجسام
يابعد اهلي..ولمة شملي ..والاحلام
ياسجداتي..البمصلاتي..وبدر التام
الفاكد يسهر..لامايكدر..لحظه اينام
بفروض الصلاة أنته فرض سادس
بس تدري بغيابك يذبح الواهس
مشتاقه الجمالك..لاتكطع وصالك
يامالك حواسي
ــــــــــــــــــــــــــــــــــــــ
داير ضهرك.. حاسم امرك..عالترحال
شايفلك أم..بالهيمه اتظم..راحة بال
أنته استشهد..بس آنه احصد..شلة حال
موتي بموتك..وي تابوتك..من ينشال
هالليله اصدقائك كلهه معزومه
وابفاتحتك الشك ثوبه ماالومه
وجم صاحب بجالك..لاتكطع وصالك
يامالك حواسي
ــــــــــــــــــــــــــــــــــــــ
رحت بدمك.. تنصر عمك.. ..يالعريس
لامامنعك
.البس درعك.. ياقديس
ابوجه الغاضب..امضي وحارب..جيش ابليس
واني اتركني..ايورم متني..حادي العيس
رد ولاترد ياهي الاحجيهه
ماريدك تجي والذمتك ابريهه
بس ودي خيالك..لاتكطع وصالك
يامالك حواسي
ــــــــــــــــــــــــــــــــــــــ
ارحل يمه..مبري الذمه..
الله اوياك
ياجسامي..انسه ايامي
وماانساك
ابنار الدمعه..اعلك شمعه
موعد هاك
من نتلاكه..فوك الناكه
وراسك ذاك
اعتب عالرمح جي ماخذك مني
اكله يارمح خليني اشم ابني
يالعالي بجلالك..لاتكطع وصالك
يامالك حواسي
ــــــــــــــــــــــــــــــــــــــ
اخر نظره.. وتبدي الكسره
ويبده الاه
ساعه وعمك..يحمل جسمك
واتلكاه
بدم املطخ..ايجيبه واصرخ
واويلاه
واصفك بيدي..راح اوليدي
راح الجاه
راحت هيبتي وي روحة الغالي
احظر بالحسن وانعه عله حالي
جم طارش اجالك..لاتكطع وصالك
يامالك حواسي
محمد الجماسي
#اللهم_عجل_لوليك_الفرج
BY خدر الفواطم لنشر القصائد الحسينية
Share with your friend now:
tgoop.com/Alfoatm3/10847