tgoop.com/Alfoatm9/5187
Last Update:
فاطمة العليلة عليها السلام
ودعني ابوي وبس خبر
ردالي مگطوع النحر.
وعبد الله مفطوم بسهم
وجروحي ماخذها الألم
يادنيا
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
بجروحي كله استوطنت اوداعك ودمعاتي
ذبلن عيوني وشيبت من ودعت عماتي
كلش عليله من المرض وادعيلك وكلماتي
محتركه وي حرك الخيم ما وصلتك دعواتي
ومناطره الطارش يرد
من يندك الباب ارتعد
وبرجعتك عشت الوهم
وجروحي ماخذها الألم
يادنيا
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
تاركني يم ديرت غرب مابيها كل حنيه
بأربع حياطين اختنك مايمي اي علويه
لاحضنك اليمي وشم لاتدخل انته عليه
گلولي عبدالله عطش فرفح يريد اميه
ضميت اله ماي شكثر
صدر أمه يابس مايدر
عبدالله منهم ماسلم
وجروحي ماخذها الألم
يادنيا
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
مرسال ادز وي الهوه بلكت رقيه تشوفه
مشتاگه من چنه سوه مثل النهر وجروفه حسيتج امي ومو طفل جنچ مقام انطوفه
هسه اني وحدي استاحشت بگليبي احس الخوفه
مرسالي بدموعي سبح
من حلمي بالملكه انذبح
مو دمعه تبجي عيوني دم
وجروحي ماخذها الألم
يادنيا
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
گلولي صدرك والرمل ماعرفه من الحافر
امنيتي ماعوفك ابد بذات يوم العاشر
ذبلت اعيوني من البجي ودموعي تكسر خاطر
برموشي كمت احسب واعد بلكت اشوفك باجر
ترجعلي يالطولك نده
بويه البعد مو موعده
بفراگگ گليبي انثلم
وجروحي ماخذها الألم
يادنيا
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
حاجيني يالصوتك وگف والهوه كلش عالي
قالقني بُعدك والحزن مالحظه فارگ بالي
خطواتي ثگلت وانحنه من الجروح خيالي
فارگت الاعزاز بدمع غالي يودع غالي
واعزازي مابيهم امل
لرجعه ودعت الاهل
صوتي بالملگه انكتم
وجروحي ماخذها الألم
يادنيا
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
ضل بالي يم اختي الجمر من تركض يجويها
لا والد اضل بي نفس لاعمي ضل يحميها
واجساد اخوتي موذره وبس عمتي اتلم بيها
وحدي وعليله من المرض چا دنيتي شيكضيها
لوميته وياك اندفن
چاهسه مرتاح الجفن
ومدفونه وي راعي العلم
وجروحي ماخذها الألم
يادنيا
خادم رقية عليها السلام
الشاعر مهند الدريساوي
BY الشاعر مهند الدريساوي
Share with your friend now:
tgoop.com/Alfoatm9/5187