الامام السجاد ع

غمض ارتاح من الرماح
شافت اعيونك مواقف مؤلمه
وعله كل موقف تصبرك فاطمه

***************

شافت اعيونك مصاب الغاضريه
انته ساعتهه تمنيت المنيه
ولا تشوف اعله الهزل عمتك سبيه
والشمر كلساعه يضرب خد رقيه

هواي الجروح....شيبقه بالروح
ضعن كلمن جرحه وبعينه دمه
وعله كل موقف تصبرك فاطمه

***********

تعثر ابشهكه كبل لا جدم تعثر
ويه كل صرخت طفل عمرين تكبر
من تصيحك طفله وجهك كوه يفتر
تحز بيك السنسله واتجرحك اكثر

ترفع العين...لراس الحسين
تكله بعدك بويه عالعين العمه
وعله كل موقف تصبرك فاطمه

***********

كلبك شيحمل بعد من يا فجيعه
علرمح راس الابو هو ورضيعه
وابو فاضل طوله ظل اعله الشريعه
راسه مسبي وعالنهر جفه الكطيعه

راس عباس...ينزف احساس
ينزف وبشفافه جلمات الضمه
وعله كل موقف تصبرك فاطمه

***********

بعينك اتصد بالسبي خياله عشره
تصيح ذوله والدي الهشمو صدره
ويه كل طكت عظم تنشغ الزهره
كلبته الخيل بحوافرها اعله ظهره

فوك الارمال...صاير اوصال
سالبين ثيابه سلطان السمه
وعله كل موقف تصبرك فاطمه


***********

ياعلي السجاد هاي الدنيه حيره
تشوف زينب عمتك صارت اسيره
اتعز عليك هواي وانته البيك غيره
بالخرابه تشوف كعدوهه الاميره

مالهه اخوان. تطب ديوان
عله زينب هاي اصعب خاتمه
وعله كل موقف تصبرك فاطمه




علي حسين المياحي

شكراً الك ما قصرت يابوالفضل شكراً

شكراً عله الخدمه
شكراً يبو النعمه

شكراً. شكراً

****

ابو الموكب نصب خيمة هالسنه مقسوم اله
يصيح زاير بيش اخدمك يلي ماشي الكربله


متحضر انه العاشور
مشتاق الكلمة مأجور
من الناس

يا زاير لحسين انخاك
جوه الكبه ادعيلي وياك
بيها احساس

شكراً الك ما ينسي هذا الفضل شكراً

شكراً عله الخدمه
شكراً يبو النعمه

شكراً. شكراً

****

العنده خدمه بأربعينك يوزع اعيونه ثواب
خدمه حلوه وتعب ماكو الشايب ايرد لشباب

يسألونه ويخبرهه الناس
فاتحهه بوجهي العباس
هذا العام

يستاهل اهديله العين
حاسبني بخدمة لحسين
من الخدام

شكراً الك ماينكطع حبل الوصل. شكراً

شكراً عله الخدمه
شكراً يبو النعمه

شكراً. شكراً

****
ماكو احلى من الخدامه وانته قائد للخدم
وين نلكه مثل گلبك ينطي عينه للسهم

احنه بكيفك يامولاي
من ايدك هاي الايدك هاي
يا عباس

العايف خدمتكم خسران
وليخدمكم عالي الشان
بين الناس


شكراً الك نخدم نموت وما نمل شكراً

شكراً عله الخدمه
شكراً يبو النعمه

شكراً. شكراً

****

حسين گلبة رحمة الله وانته يالب الگلب
تترس ايدي من اكصدك ماكو شي يمك صعب

كلما كصدك شايل هم
ارجع يمشي بوجهي الدم
يامولاي

يعطش گلبي وانته الماي
ما تاخذ بس تنطي هواي
هواي هواي

شكراً الك تقضي الحوائج بالسهل شكراً

شكراً عله الخدمه
شكراً يبو النعمه

شكراً. شكراً

****

ترضه عني ولون ترضه الخدمه وياك الوصل
شما اكلك ما اجازي منك اني كل فضل

فضلك عابر حتى الهام
من انعده انعد ايام
يابو الخير

شما اطلب منك ممنون
استنكف من غيرك كون
من الغير

شكراً الك اصبر لون مال الحمل شكراً الك

شكراً عله الخدمه
شكراً يبو النعمه

شكراً. شكراً

****
بالنهايه من اشكرك مقصر بكلمة شكر
يديمك الله يابوفاضل خيمه فوگاي وستر

الله يديمك وبكل عام
بعينك محروسه الخدام
ياوفاي

من جفك ماكل كل طير
تارس جفي وجف الغير
في وماي


شكراً الك كول وفعل يابوالفضل شكراً

شكراً عله الخدمه
شكراً يبو النعمه

شكراً. شكراً

علي حسين المياحي

أستشهاد الرسول محمد (ص)

بلسم الجان الجروحي
روحه طلعت مدري روحي

مثل النفس عندي رايح وجاي
خنكه بلا محمد حيل دنياي

****

العمري ما فارگته لقرب من خيالي
غمضت عيونه انتهت ذيج الليالي
جنت بسماي اني اشوفه گمر عالي
وهسه حتى بصفي ظل مجانه خالي

بكلبي نار شلون تخمد
كبالي مات اني محمد

اليكفد مثل طه يفكد الراي
خنكه بلا محمد حيل دنياي

****

روحه من طلعت محمد اني شفته
حضنت اوداع الاخو بروحي حضنته
مغمض عيونه وشفت نزلت دمعته
عله فراگي بينت دمعت عشرته

تلاگن ادموعه ونحيبي
وكتله لا ترحل حبيبي

لتخليني وحدي ابقه وياي
خنكه بلا محمد حيل دنياي

****

الشايل الدنيه عله جتافه بعظمته
على جتافي للمگابر اني شلته
من الجنازه جن همسلي ابجي سكته
دمعك اكبال الشماته موش وكته

بعدي يردون الخلافه
وانته صاحب هلكلافه

شماتك يحيدر صاروا هواي
خنكه بلا محمد حيل دنياي

****

من دفنته وأيست ميرد اليه
من گمت اعله الظهر حطيت اديه
واني راجع ناده من گبره عليه
ياعلي هم مر علي وكت المسيه

اني اشتاگ الكعدتك
والگبر يمنع رفگتك

كاسر ظهرك ادري حيل فركاي
خنكه بلا محمد حيل دنياي

****

من بعد ملگه محمد كلشي فرگه
اجدامي ما يمشن يريدن اله رفگه
الملگه ميت والگبر ما عنده ملگه
ودنيه ما بيها محمد حيل خنگه

بدونه ما تحله حياتي
بالترب دافن غلاتي

ما شوفه بعد ليريد ملكاي
خنكه بلا محمد حيل دنياي

****

ابلا محمد راجع امبين مصابي
وفاطمة لاكتني منتظره اعله بابي
وين ابويه اتكلي لتيتم شبابي
وشافت اتراب الگبر بعده بثيابي

نزلت الدمعه بهضيمه
فاطمة صارت يتيمه

شافت من ابوها خالي مكفاي
خنكه بلا محمد حيل دنياي

علي حسين المياحي

#جديد_عافيتي_كلهه

رابط القصيده كاملة
https://youtu.be/wtVrIGgk964

اداء : الرادود حامد الحياوي
كلمات : الشاعر علي حسين المياحي

الولادات الشعبانية

ما يوصف فرحتي حتى اليوصفون
احساسي بمولدك من يكدر يفسره
هلا بجيتك حبيبي ويا اعز مخلوق
هلا وميت هلا ياريحة الزهره
هلا بشمل الائمة واخر العنگود
شعري والوزن والقافيه مقصره
هلا ابيت المحنه ودفو الكل بردان
هلا بجفك اليشبع جوعت الفقره
هلا بيوسف ولكن ما تمره عجاف
اليجيلك ما ترده وتعتذر مره
هلا بطعم الملاكه ولهفة العشاك
هلا براحت البال شما تمر حسره
هلا بغبشت صبحنه وذيج البروده
هلا اليطفي بكلبنه حرورة الجمره
هلا وما عندي غير الهلا من تلكاك
بس ياهلا بريحة فاطمة الزهره

شع نورك يمهدي ولمحنه
وزاح التعب مني ولمحنه
يشمل اكلوبنه انته ولمحنه
فرحنه بمولدك وي الزجيه


علي حسين المياحي

شع نور الحسين وهذا ميلاده
كتمل نور الكساء بخامس الساده

***

عن باقي الايام اليوم فرحتنه
بينت بالوجه نسمات ضحكتنه
مبتسمه اطلعت لحسين جلمتنه
بميلاده اليعيد ياخذ امراده
كتمل نور الكساء بخامس الساده

***

الديره اليوم حلوه وحلوه كشختنه
الوادم من فرحنه اليوم حسدتنه
شمحلاهه اعله طاري حسين لمتنه

فرحانه الولاية بيوم ميلاده
كتمل نور الكساء بخامس الساده

***

نعيد نبتسم ابهوسه وبصفكه
جم حسين عدنه خاطر نعشكه
يحبنه وهم نحبه وغيره ما نلكه

عادتنه نحبه شمحلى هالعاده
كتمل نور الكساء بخامس الساده


***


مثل حسين ماكو ومثل حنيته
ظم الخدم كلهه جوه خاجيته
كل خادم يخدمه يعلي من صيته

كلما ينطي حاجه ترجع ازياده
كتمل نور الكساء بخامس الساده


***

كتمل نور النبوه بخامس الشجره
مثل الدر طلع من جابته الدره
هديه من الله جان لفاطمة الزهره

ومن صلب النبوه تصبح اولاده
كتمل نور الكساء بخامس الساده

***

من الله نسأل احنه ايديم نعمتنه
وتضوي كل سنه وكل عام شمعتنه
يبقه حسين عايش ويه فطرتنه

ونبقه احنه بخدمتة وخدمت اولاده
كتمل نور الكساء بخامس الساده

علي حسين المياحي

#جديد_عجل_امر_القائم

رابط القصيده. 👇👇👇👇👇
https://youtu.be/02b6nNEvvO0

كلمات الشاعر علي حسين المياحي

اداء الرادود حامد الحياوي

هيئة الامام موسى الكاظم موكب جابر / بغداد مدينة الصدر

#جديد
▫️القصيدة - مشه ضعن الاحبهم

• رابط القصيدة ⬇️

https://youtu.be/YQWd2zR4PMw

الحان وأداء/ الرادود علاء العكيلي
كلمات / الشاعر علي حسين المياحي

موكب عزاء خدام الزهراء عليها السلام
محرم الحرام ١٤٤٥هجري

علي منين ابدي انه وياك من ياباب
ولو بالباب عندك انته جم ذكره
يناطور اعله دينك وكت كلهه تنام
حفروا جوه اسمك ما لگوا ثغره
همه بالمعارك اول يخلوك
بس رابع علي من تخمد الجمره
ماكو غير شغله ورابع يحسبوك
والشغله الاكيده وثابته الفكره
من تصير الخلافه تكون بالاعمار
يحسبوهه الجماعه كلمن وعمره
غم اعمارهم لا منفعه ولا شور
مثل عاگول مابي فايده وثمره
فرصه من العمر جان الغدير هناك
وضاعت فرصه الله علِيهم وامره
سارق بالغدير الجف نشوفه هواي
الما صافح علي جف ايدك السمره
حقد بگلوبهم والغيض يعمي الشوف
ثابت ياعلي من بيعة الشجره
انه گلبي غديري مبايعك نبضات
وحلاته وياك من يعشك عله الفطره

علي حسين المياحي

سرج مهره وكام يقره الفاتحه
وشاف ديره من العساكر طايحه

وين المفر وين. شافتكم العين

*******

سرج مهره عله الحومه وبده يحسب مناحر
حلف اله يسويها جماعيه المقابر
يلم بيها ويطشرها وزعل من العساكر
زلم شردت زلم عثرت زلم مكسوره خاطر

خله من الخوف نصهم نايحه
وشاف ديره من العساكر طايحه

وين المفر وين. شافتكم العين

*******

لون يغفه الاسد فرصه يحسبون لغيابه
وابوفاضل طلع لمن سمع طاري الذيابه
علي براسه وعلي بسيفه وعلي حاسب حسابه
يرد بيهم مثل ما رد علي ذيج الصحابه

حلوك عدهم بسوالف فالحه
وشاف ديره من العساكر طايحه

وين المفر وين. شافتكم العين

*******

وكف عاين اخذ فكره متى يخنك هواهم
يأشر بيده عليمنى عله اليسرى لكاهم
شمر خطوة جدم واحد وهمه نطوا كفاهم
ابوفاضل يحب ملگه ابد ميحب جفاهم

ملاگه سيفه وي الرگاب المالحه
وشاف ديره من العساكر طايحه

وين المفر وين. شافتكم العين

*******

وصل يم النهر دنك واخذ ماي برهاته
عله كيفه مله الجربه گمر جنه شحلاته
النهر ماله ابوفاضل حلاله وهم فراته
منو يمنعه لون راد النهر كله الخواته

الجربه كلساعه لخيامه رايحه
وشاف ديره من العساكر طايحه

وين المفر وين. شافتكم العين

*******

الشمر حاير لون شافه منو يخلص رگبته
ابوفاضل مثل سيفه ذبح تذبح خزرته
الشمر وينه يجي لجيشه لان رادو فزعته
طلع شارد گبل جيشه الشمر هوه ومهرته

راد عطوه من الگمر ويصالحه
وشاف ديره من العساكر طايحه

وين المفر وين. شافتكم العين

*******

ولا جنه بحرب داخل ترس وجه ابتسامه
رزن طبعه وعله اجتافه بنت عشها الحمامه
شديد وشده ابوفاضل لجن ما شد لثامه
الحمدلله ولا خله ترد رگبه بسلامه

دوم ضربت ابوفاضل راحجه
وشاف ديره من العساكر طايحه

وين المفر وين. شافتكم العين


علي حسين المياحي

حني يمه جف اديه. حتى اروحن للمنيه

عرسي يصير بالطف احلى لعراس
وخلي بعرسي كلها تسولف الناس

**********************

ييمه اليوم يومي انتي فرحيلي
دمعج من اشوفه ينهدم حيلي
لدمعج انطي ظهري شلون ياويلي
ابوس ايدج ييمه بداعتي دعيلي

حتى الله يسهل امري. دون الحسين انطي نحري

ويمشي الرمح بيه رافع الراس
وخلي بعرسي كلها تسولف الناس


**********************

ييمه رفعي راسج ونج اذاني
فرحي وخلي حرگه تموت عدواني
بخيمة گمر هاشم ناسنه تاني
تنطرني المنيه لعقد قراني

الحاضر الموت المسيه الغايب تضمني الزجيه

بيده للمنيه يزفني عباس
وخلي بعرسي كلها تسولف الناس


**********************

قسمتي يمه هايه وعشك دلالي
اليريد الغالي لازم ينطي شي غالي
ترضين الرمح لو مني ظل خالي
وبين الرووس راسي اني موعالي

ادري ترديلي الشهامه. يلا ودعيني بسلامه

وماخذ منج امشي زود واحساس
وخلي بعرسي كلها تسولف الناس


**********************

ييمه دموع ابو السجاد اذتني
وانه من انصاره هيج الزهره حسبتني
على زفتي اذا فاطمه سالتني
اكلهه وي عمامي امي زفتني

ومن تمر زفه بغيابي. يمه ذكريني بشبابي

واذكريني بصواني الشمع والياس
وخلي بعرسي كلها تسولف الناس


**********************

ييمه رايد اني رضاج وي حلمي
راسج ينرفع بيه اني يا امي
هدم العرس لونه يصير من دمي
وكل عريس اخلي يسولف باسمي

الرايد الله يرفع اسمه. ترضه عنه كون امه

مثلي شلون عندي رضاج نوماس
وخلي بعرسي كلها تسولف الناس


**********************

بقت بلساني جلمه بخت يابختي
واذا ضمهه احس ماتنبري ذمتي
الوكت مابي امان وانت خو شفتي
ييمه خلي بالج فدوه ويه عمتي

مدري شنهو اللي تشوفه. بس وجهه اصفر اشوفه

واحنه اعله الرماح نصير حراس
وخلي بعرسي كلها تسولف الناس


نسألكم الدعاء /علي حسين المياحي

ياعريس ازفه والولد غاب

*******

ردت يصير بالطف احله الاعراس
نخلي بعرسه كلهه تسولف الناس
ومن خيمة عمامه يزفه عباس
وبين اهله وعمامه عرسه ينهاب

*******

منتظره اشوفن فرحة حسين
وبشر كل بناتي والنساوين
وفه حسين دينه وسدد الدين
عرس لبن اخوه وجرحه جن طاب

*******

لا عمه اصير ولا الي احفاد
كلبهه يصير مشلوع ام الاولاد
بتربية الولد جم حيل ينراد
صار الما ظن محسوبله حساب

*******

ارباي ايريد تعبه من يجازيهه
اكضيت سنين عمري بس احاميهه
متني يريد حيل من الطم اعليهه
هذا اول فرح بي ينذبح شاب

*******

هلهولة خواته صارت اصياح
الحنة تفطرت من الولد راح
صينته وشمعته والورد طاح
كلبي من الفجيعة تصوب اصواب

*******

فاتحته وزفافه صارن بيوم
ردولي الولد ودمايه الهدوم
نايم كتله المن يولد كوم
انه امك واعرفك تسوه العتاب

*******

مو كافي ييمه النوم مكروه
طولك بالنعش يالكوه خلوه
راسك من يلوحه وهيج طروه
ما غدروك لوما صعبه تنصاب

علي حسين المياحي

القاسم. ياجمال الله
عيونه. من العدو صمله
اوليدي. يمه يايمه

*********

من الحسد ما ظل ولد وعيونه ذيج الحلوات
الزين فاركني ومشه وظللي بس الشينات
ميدوم تاليت العمر كل اليسولف زينات
يعني اذا مات الولد گلوا گلب امه المات

فدوه. انطي لجروحه
روحي وترجعله روحه

اوليدي. يمه يايمه

*****

نوم العوافي بنومته ومحلي حتى التابوت
بين المحابس لو كعد ياخذ نظرنه الياقوت
يختار وين البي بخت امعدل بهاي الموت
تبين المعزه هنا اله وين اليحبه زاتوت

ابني الوادم اتحبه
طيب ولطيب گلبه

اوليدي. يمه يايمه

*****

ما كاسر احجايه الي من انولد حد يومه
عافيتي سلبهه الولد من سلبوها هدومه
في وشمس يدافعن كلمن تريد ارسومه
فوك الوجن ديرة عطش من الرمل مرسومه

ظلت. للعرس صوره
بيها. ما اخذ دوره

اوليدي. يمه يايمه

*****

عريس وبهذه العرس بجه بزفافه العرسان
ما سامعه اني گبل عريس يبقه عطشان
بعادت اهلنه ما شفت تسحك ابصدره العدوان
العريس ينزف للخيم مو نايم اعله التربان

عرسه ما كمل عرسه
بحافر. الخيل لترفسه

اوليدي. يمه يايمه

*****

ظليت وحدي بيا ذنب عايفني المن يبني
بس دمع ثكلى فاكده بطور عراقي وني
تعبانه يمه من الوكت بين المصايب ذبني
مو عن كبر بيه الجره فراكك ترا الحدبني

انته كل سبب تعبي
بموتك ورمت گلبي

اوليدي. يمه يايمه

*****

ياوسفه يلطولك حلو مثلك تضم شاب الكاع
ضيك لحد ذاك الگبر ونته ابو عيون اوساع
جنت انتظر تكبر الي ولمك تصيرلهه شراع
ها كبر ها بعده الولد وموتك اجه بساع بساع

ادري بگلبك الفاكد
رايح. ايشوفك الوالد

اوليدي. يمه يايمه


علي حسين المياحي

الليلة الثامنة

( القصيدة بحق الامام القاسم ع )

يجسام بالرؤيه جن..شفت الحسن..للطف حضر يجسام
جاب الك حنه ونشد****آنه عندي جم ولد...يجسام

************************

ارد اسولف حلمي يمه شفته والحال ابتسم
جن ابوك ويانه حاضر يوم البعرسك عِلم
جنه ملتمين كلنه والفرح مالي الخيم
وأغله ماعنده ابوفاضل جابه ونطاك العلم

يكلك...تستاهله...ظل شايله...وزادك فخر...يجسام
وجفي بالرايه عكد****آنه عندي جم ولد...يجسام

*********************

جان مالي العشك عينك مستحه بيك اشكثر
وجن هديه انطاك عمك إغله من ذاك الامر
حسين كلك عكب عمك انته حماي الخدر
ابن اخوي انت واعرفك تكرم لزينب عمر

ابن من...واستغربك...شو والدك...أكرم نهر..يجسام
عالحسن طالع بعد...آنه عندي جم ولد...يجسام

************************

هوسه هوس شفت الاكبر ابن عمك مبتسم
هذا يمه حزام ظهرك حين للحومه تهم
رسّه مابيهـ لخواله شوفه ألمن بالعزم
بي ثلت لحسين اشوفه وثلث عباس الشهم

للحسين...أسمي اريد...أم الشهيد...انطي النحر...يجسام
فدوه للواحد أحد...آنه عندي جم ولد...يجسام

************************

يمه يابستان تعبي مشيتك تنكط ورود
ابوفاضل روح يمه وكله عمي انطيني جود
وتره ابوك يكلي رمله مو أوليدي المايجود
كون اسمع خبر عنك كطع الزينب زنود

أسميك...شيخ الورد...يلا استعد...تترك أثر...يجسام
بالحومه اعرفك يا أسد...آنه عندي جم ولد...يجسام

************************

من نزل جبريل يمنه علجنح شايل امل
من طرف خيمتنه شفنه يبارك لعمك نزل
ال هاشم صيت عدهم للعرش صيته وصل
الوحي ما شايف مثلكم وانتوا اصغركم فحل

علي وياك...لو نازلت...لو هوست..ليك النظر...يجسام
أويالحسين إعله العهد...آنه عندي جم ولد

************************

يمه حلمي بشاره صار وانته هذه الي تريد
من هداك الرايه عمك يعني تكطع ليهه ايد
وهوسه الاكبر بعرسك يعني أزفنك شهيد
الحسن من باسك بنحرك يعني ينحزلك وريد

أشارات...وضحن الي...بس وعلي...جفي انعصر...يجسام
يامه هزالك مهد....آنه عندي جم ولد...يجسام

نسألكم الدعاء
علي حسين المياحي

الاكبر

كضه عمري سهر. لحدما شب وكبر
اخذ حيلي بدلاله

من ايدي ضاع من ايدي. وليدي راح وليدي

راح الحيد ذاكه اليسوه معموره
مو واحد بعيني اولايه مهجوره

تعب رباه. ضاع وياه
بس امه وحليب امه علي شاهد
شكد عانيت وتمنيت
ادكول الناس عنه يشبه الوالد

ما ادري بالوعد. اخذ مني الولد
مشه بحيله وخياله

من ايدي ضاع من ايدي. وليدي راح وليدي

******

الله يعين گلبه اليفكد اوليده
من يجيبه الخواته يوسده بهيده.


بيه شلون رايد عون
كمت اوكع وكوم وهم ارد اوكع
ذاك الطول شو مشيول
ابني راح سالم شو اجه مكطع

بحصيره ابني شفت. وكف گلبي وطحت
مو لولي جماله

من ايدي ضاع من ايدي. وليدي راح وليدي

******

اول مره احس بروحي المحير.
الاكبر مره اكول ومره مو لكبر.

رايح جاي وبلا ماي
ما عرفه كمت من ظهره لو صدره

ااا ياويل. من الخيل
داست فوك گلبه وطلع من ظهره


عظم يدفع عظم. شبع دوس وهضم
مو هذا ابني جاله

من ايدي ضاع من ايدي. وليدي راح وليدي

******

لمه شرد اكول وحيرتي حيره
مو زينه اكلهه طلعت الخيره

لطمي زين. راح الزين
موتي من النواعي كون عالاكبر

بگلبح داي. نواحي هواي
الام بفكد ابنها هواي تتغير

نعاويج دوه. علي نلطم سوه
شبيدي علجراله

من ايدي ضاع من ايدي. وليدي راح وليدي

******

الله يساعدج ادري انتي تعبانه
هي ام الولد بس هي خسرانه


الام هواي. في وماي
ملهوفه اعله ابنها دوم برباها

يروح بساع. تعب وضاع
من يموت ابنها تعمه عيناها

تعب وشكه العمر. تاليته للكبر
يصير الكبر حلاله ؟

من ايدي ضاع من ايدي. وليدي راح وليدي


علي حسين المياحي

اليله الثامنه


وياك ما خذت الگلب
وياك جاسم للحرب

رايح شبابك

******************************

من رحت جسام عني عمرك الظل اعله بالي
ما شفت شي من شبابك بعدك بعازة دلالي
جفك الينكط محنه بعده من الحنه خالي
وانه ادري الزمن ياخذ شكو انسان بكلبي غالي

الشموع طفاهه الهوه
وحسيت. ما نرجع سوه

رايح شبابك

******************************

يبني ياجسام رادت روحي تطلع وي طلعتك
جفوفي ما قبلت تحلك بيها من اني حضنتك
ما ردت سيف اني بيدك ردت بيدك كون حنتك
جانت امنيت حياتي تفرح امك يوم زفتك

ما صار. بخيمنه الفرح
واسمع. عريس انذبح

رايح شبابك

******************************

من اجاني خبر موتك يبني هد حيلي شبابك
حنتك محضرتهه امك شرد اكله اني بمصابك
شلون افهمها يجاسم صبح حنتك دم خضابك
يبست الحنه اعله ديها متانيه ترد من غيابك

عرفت. من عيني الدمع
كالت. ميموت السبع

رايح شبابك

******************************

روحي مختنكه اجيتك من شفت ما بيك جيه
يبن اخوي اني اجيتك ردت اشم ريح الخويه
هذه حكي من الخوه الجنت عايش جوه فيه
من الحسن بس انته ردتك والله مو مالت منيه

بس كوم. انطيك العمر
وخلي. يذبحني الشمر

رايح شبابك

******************************

احسب ابعمرك ثواني وجنت اشوف ابعيني تكبر
جنت اشربك ماي عيني مثل ما شربت الاكبر
اني ربيتك بديه وصعبه اعيش بدونك اكدر
يعني من اتموت ارجع محني ظهري وجدمي يعثر


ذابل. جن غصن الورد
وياي. ما جنك ترد

رايح شبابك

******************************

انه اخر واحد ابقه لا معين ولا مناصر
لا اخو يحميلي ظهري ولا ابن اخ اليناطر
وحدي اظل ابمهري افتر تجتمع ضدي العساكر
الشمر يكسرلي ظهري لجن يكسر لختي خاطر


ينحز. راسي من الكفه
وزينب. تمشي مجتفه

رايح شبابك


نسألكم الدعاء
علي حسين المياحي

زينب بطرگ الدمع تاليهه
طاحت الخيمه وعمدها اعليها

****

طاحت الخيمه وبگت بس للدمع
صوت من كثر البجي ما ينسمع
شلون زينب هي وبهذا الوضع
بهيمه ظلت محد يواسيهه

****

بهيمه ظلت تنطره ذاك الكمر
تدري ما تدري يجيهه من النهر
كالت الما لحظة صحته وعتذر
زينب اخته رايده ايماشيهه

****

زينب ايماشيهه ظل المو كلف
وين مدير الوجه تلكه صلف
كلهم الوياهه ما بيهم عرف
منو اليسألهه ويشوف شبيهه

****

محد اليسأل وكال شلونهه
هواي ذبلانه اعله اخيهه عيونهه
كربله خيبت كل اضنونهه
ولا هله بالشام وي طاريهه

****
لا هله بالشام ديره بلا امان
حيل تعبهه وكسر بيها الزمان
لا اهل لا بيت لا ظلت اخوان
بغربة الما يرحم مخليهه


علي حسين المياحي

أستشهاد الرسول محمد (ص)

بلسم الجان الجروحي
روحه طلعت مدري روحي

مثل النفس عندي رايح وجاي
خنكه بلا محمد حيل دنياي

****

العمري ما فارگته لقرب من خيالي
غمضت عيونه انتهت ذيج الليالي
جنت بسماي اني اشوفه گمر عالي
وهسه حتى بصفي ظل مجانه خالي

بكلبي نار شلون تخمد
كبالي مات اني محمد

اليكفد مثل طه يفكد الراي
خنكه بلا محمد حيل دنياي

****

روحه من طلعت محمد اني شفته
حضنت اوداع الاخو بروحي حضنته
مغمض عيونه وشفت نزلت دمعته
عله فراگي بينت دمعت عشرته

تلاگن ادموعه ونحيبي
وكتله لا ترحل حبيبي

لتخليني وحدي ابقه وياي
خنكه بلا محمد حيل دنياي

****

الشايل الدنيه عله جتافه بعظمته
على جتافي للمگابر اني شلته
من الجنازه جن همسلي ابجي سكته
دمعك اكبال الشماته موش وكته

بعدي يردون الخلافه
وانته صاحب هلكلافه

شماتك يحيدر صاروا هواي
خنكه بلا محمد حيل دنياي

****

من دفنته وأيست ميرد اليه
من گمت اعله الظهر حطيت اديه
واني راجع ناده من گبره عليه
ياعلي هم مر علي وكت المسيه

اني اشتاگ الكعدتك
والگبر يمنع رفگتك

كاسر ظهرك ادري حيل فركاي
خنكه بلا محمد حيل دنياي

****

من بعد ملگه محمد كلشي فرگه
اجدامي ما يمشن يريدن اله رفگه
الملگه ميت والگبر ما عنده ملگه
ودنيه ما بيها محمد حيل خنگه

بدونه ما تحله حياتي
بالترب دافن غلاتي

ما شوفه بعد ليريد ملكاي
خنكه بلا محمد حيل دنياي

****

ابلا محمد راجع امبين مصابي
وفاطمة لاكتني منتظره اعله بابي
وين ابويه اتكلي لتيتم شبابي
وشافت اتراب الگبر بعده بثيابي

نزلت الدمعه بهضيمه
فاطمة صارت يتيمه

شافت من ابوها خالي مكفاي
خنكه بلا محمد حيل دنياي

علي حسين المياحي