tgoop.com/Alialahmedawy/4119
Last Update:
لمولانا القاسم ابن الامام الكاظم عليه السلام
تگعد قرب جرف النهر
تبچي على گطع النحر
من البعيد الاسئله ومن القريب
ياغريب اشبيك تندب ياغريب
--------------
شجاع ابغيرتك ديرتك محتاره
على چفوفك سندهم لو تهب غاره
جليل وهيبة مشيك چان مناظره
يسموك الغريب وصاحب الشاره
من الجهلتك والعرفتك
محتاره كلة ابهيبتك
الاسئله تجرح وتحتار شتجيب
-------------
ليش اعيونك اتهل من يسئلونك
واليگلك منو اهلك يختلف لونك
بگلبك شني اتظم وتحچي بعيونك
وكل حچيك مصايب من يسمعونك
ياهوه ظل ابحده
ابلا اخو ابين العده
وليش راسك بالمصايب كله شيب
------------------
تسولف ويه جرفه ابحرگه وبعبره
شكثر مايك يشاطي وماشرب گطره
گلوب من العطش بالخيم مستعره
والمحترگ گلبة سحگ چم جمره
من خيم رگظن والخيم
وانطفى بجدام الحرم
وين ما تنطي الوجود نار ولهيب
-------------
يشاطي انه البگلبه الجرح ما ينشد
وجمرة غيرته ما تخمد وتبرد
لو يحسب مصايب اهله ما تنعد
مصايب لو ابگلب اجبال هم تنهد
بين العطش بين احترگ
لو صدر بالخيل انسحك
ظامي ظل وعلرمل بالدم خظيب
--------------
بطعناته واجروحه سلبو اهدومه
يشاطي منذبح والغسل بدمومه
العطشان انذبح انسحگت ارسمومه
وبلا تجهيز ميت باقي بالحومه
الخد على حر الترب
واعيالة راحت وي غرب
وذاك ابو الشيب الحلو بالدم خظيب
--------------
انذبح حمايهن والحرم مسبية
الظعن مچتوف كله عگب راعيه
ومن سوگ الخرابة يطب يوميه
ابخرابة اتبات من يرظى علعلويه
من الخرايب للقصر
هذه الم درب اليسر
ابد جرح السبي مايشفى ويطيب
BY الخادم علي الحميداوي
Share with your friend now:
tgoop.com/Alialahmedawy/4119