"...ጉዳት የደረሰባቸውን ሰዎች ለመርዳት ተጨማሪ ጥረት መደረግ ይኖርበታል" - የዓለም አቀፍ ቀይ መስቀል ኮሚቴ (ICRC)

የዓለም አቀፍ ቀይ መስቀል ኮሚቴ እና የኢትዮጵያ ቀይ መስቀል ማህበር በመተባበር በግጭት ለተጎዱ በሺዎች ለሚቆጠሩ ቤተሰቦች የውኃ፣ ምግብ እና መሰረታዊ ቁሳቁሶች አቅርቦት ላይ እየሰሩ እንደሚገኙ ተገልጿል።

በዚህ መሰረትም በቀርቡ በአፋር ክልል ከ16,000 በላይ ለሆኑ ሰዎች የመሰረታዊ የቤት ውስጥ ቁሳቁስ አከፋፍለዋል፡፡

የዓለም አቀፍ ቀይ መስቀል ኮሚቴ ጉዳት የደረሰባቸውን ሰዎች ለመርዳት ተጨማሪ ጥረት መደረግ ይኖርበታል ብሏል።

የዓለም አቀፍ ቀይ መስቀል ኮሚቴ የአፍሪካ ቀጠና ዳይሬክተር ፓትሪክ ዩሱፍ ፥ “የግጭቱ ውጤት በኢትዮጵያ የሚገኙ የተለያዩ ክልሎች ላይ ተጽእኖ እያሳደረ ነው፡፡ እኔም የሚደርሰው ጉዳት በጣም አሳስቦኛል፡፡ የተፈናቀሉ ሰዎች በአስቸጋሪ ሁኔታ ውስጥ እየኖሩ ይገኛሉ፡፡ አንዳንዶቹ በጣም በተጨናነቁ ትምህርት ቤቶች ውስጥ ነው የሚተኙት ሌሎቹ ደግሞ በጊዜያዊ መጠለያ ውስጥ እየኖሩ ነው” ብለዋል።

#ICRCEthiopia

ባለሃብቱ በሹ ቱሉ አረፉ።

የሲዳማ ክልል ካፈራቸው እውቅ የሀገራችን ባለሃብቶች መካከል በዋነኝነት ሚጠቀሱት ባለሃብቱ በሹ ቱሉ በህመም ምክንያት ማረፋቸው ተሰምቷል።

ባለሃብቱ በሹ ቱሉ በሆቴል ዘርፍ ጨምሮ በሌሎችም የስራ መስኮች ተሰማርተው ለበርካቶች የስራ እድል በማመቻቸት እራሳቸውን እንዲችሉ በማድረግ ሀገራቸውን ያገለገሉ ዜጋ ነበሩ።

በተለያዩ የስራ መስኮች ተሰማርተው ሀገራቸውን ከማገልገላቸው ባለፈ በሲዳማ ክልል ነዋሪዎች ዘንድ እንደ ነፃነት ታጋይም ይወደሳሉ።

ጄሲ ጃክሰን ሆስፒታል ገቡ።

በዓባይ ውኃና በኅዳሴ ግድብ ጉዳይ ኢትዮጵያን በመደገፍ የሚታወቁት እውቁ ጥቁር አሜሪካዊ የሰብዓዊ መብት ተሟጋች ጄሲ ጃክሰንና ባለቤታቸው በኮሮና ቫይረስ ተይዘው ሆስፒታል ናቸው፡፡

የ79 ዓመቱ የሰብዓዊ መብት ተሟጋች ጃክሰን ባሳለፍነው ጥር ብዙዎች በተሳተፉበትና ብዙዎች እንዲከተቡ ባሳሰቡበት ይፋዊ ስነ ስርዓት የቫይረሱን ክትባት ወስደው ነበረ፡፡ ሆኖም አሁን በቫይረሱ ተይዘው ከ77 ዓመቷ ባለቤታቸው ዣኩሊዬን ጋር ህክምና ላይ ናቸው፡፡

ጃክሰን ምንም እንኳን የፓርኪንሰን ህመም ተጠቂ ቢሆኑም ጥቁሮች የኮሮና ክትባቶችን እንዲያገኙ ሲቀሰቅሱ እና ሲያስተምሩ ነበር፡፡

የድምጽ አሳጣጥ መብቶችን በተመለከተ የአሜሪካ ኮንግረስ የያዘውን አቋም እንዲተው ለማሳሰብ በያዝነው ወር መባቻ በካፒቶል ሂል ሲደረጉ ከነበሩ ሰልፎች ጋር ተያይዞ ለእስር ተዳርገውም ነበረ፡፡

ከወጣትነት ዕድሜአቸው አንስቶ ከዶ/ር ማርቲን ሉተር ኪንግ ጋር ስለ ሲቪል መብቶች በመሟገት የሚታወቁት ጃክሰን በዓባይን ውኃ እና በኅዳሴ ግድብ ጉዳይ ኢትዮጵያን በመደገፍ ይታወቃሉ፡፡

ግብፅ በናይል ውሃ ላይ አለኝ የምትለውን “ታሪካዊ መብት” የቅኝ ግዛት ዘመን መብት እንዲሁም የዐረብ ሊግን ጣልቃ ገብነት በመቃወም ይታወቃሉ፡፡

የግድቡን ጉዳይ በተመለከተ በግብጽ እና ዐረብ ሊግ ተጽፈው ለተመድ ጸጥታው ም/ቤት የገቡ ደብዳቤዎችን ጉዳይ ጥቁር የአሜሪካ ኮንግረስ አባላት ኮሚቴ /Congressional Black Caucus እንዲቃወም ከአሁን ቀደም ጥሪ ማቅረባቸው የሚታወስ ነው፡፡

ከፍ ያለ ተደማጭነት ያላቸው ቄስ (ሪቨረንድ) ጄሲ ጃክሰን ለሁለት (2) ያህል ጊዜ ለአሜሪካ ፕሬዝዳንትነት ተወዳድረው እንደነበር የህይወት ታሪካቸውን የተመለከቱ ዘገባዎች ይጠቁማሉ፡፡

ምንጭ፦ አል ዓይን ኒውስ

ኢንሹራንስ ኩባንያዎች ለተሽከርካሪዎች ዋስትና የሚያስከፍሉት የዓረቦን መጠን ጨመረ።

የኢንሹራንስ ኩባንያዎች ከወቅታዊ #የዋጋ_ንረት ጋር በተያያዘ የዋስትና ሽፋን ለሚሰጧቸው ንብረቶች የሚያስከፍሉትን የዓረቦን መጠን እየጨመሩ መሆኑን ሪፖርተር አስነብቧል።

ኩባንያዎቹ በተለይ በሞተር ኢንሹራንስ ዘርፍ ለተሽከርካሪዎች የመድን ሽፋን ይጠይቁ የነበረውን የዓረቦን መጠን ከመቼውም ጊዜ በላይ መጨመራቸው ታውቋል ብሏል ጋዜጣው።

ኩባንያዎቹ ለሚሰጡት የመድን ሽፋን ይጠይቁ ከነበረው ዋጋ እስከ እጥፍ ጭማሪ እየጠየቁ መሆኑን የኩባንያዎቹ ደንበኞች እየገለጹም ነው፡፡

ደንበኞቹ የተሽከርካሪ የመድን ሽፋን ሲያሳድሱ በወቅቱ የተሽከርካሪዎች ዋጋ መሠረት ዓመታዊ የዓረቦን ክፍያቸውን እንዲፈጽሙ እየተደረገ ነው፡፡

የኩባንያዎቹ ደንበኞች እንደሚገልጹት ከሆነ ፣ የተሽከርካሪዎቻቸውን የኢንሹራንስ ሽፋን ለማሳደስ ሲቀርቡ ከዚህ ቀደም ሲከፍሉ ከነበረው የዓረቦን ዋጋ በላይ እየተጠየቁ ነው፡፡ ከኩባንያዎቹ የተገኘው መረጃም ፣ ጭማሪ ሳይሆን ወቅቱን ያገናዘበ ማስተካከያ እየተገረገ ነው፡፡

ይህ የተለመደ አሠራር ሲሆን፣ የአሁኑን የሚለየው ከሌላው ጊዜ በተለየ የተሽከርካሪዎች ዓረቦን ዋጋ ጭማሪ ከፍተኛ መሆኑ ነው፡፡ 

አንዳንድ ደንበኞችም አደጋ ደርሶባቸው የጉዳት ካሳ በሚጠይቁበት ወቅት የኢንሹራንስ ሽፋናቸው በወቅታዊው ተሽከርካሪዎች ዋጋ መሠረት ገቢ እንዲያደርጉ መጠየቃቸውንም እያመለከቱ ነው፡፡

የሪፖርተርን ዘገባ ያንብቡ : telegra.ph/Reporter-08-22

ሙሐመድ አወል ሙሐመድ ሳላህ አረፉ።

በበርካታ የጥበብ ስራዎች የሚታወቁት ድምፀ መረዋው ሙሐመድ አወል ሳላህ በልብ ህመም ማረፋቸው ተሰምቷል።

ትውልዳቸው በደሴ ከተማ አራዳ አካባቢ ሲሆን ከእናታቸው ከወ/ሮ ሰዕዲያ ሰዒድ አህመድ እና ከአባታቸው ሐጅ ሙሐመድ ሳላህ አህመድ በ1958 ነበር የተወለዱት።

ትምህርታቸውን በወ/ሮ ስህን ትምህርት ቤት ከተከታተሉ በኋላ ወደ ውትድርናው አለም በመቀላቀል ሃገራቸውን ሲያገለግሉ ቆይተዋል።

በወታደር ቤትም በሙዚቀኝነት ሲያገለግሉ ቆይተው ወደሳውዲ ዓረቢያ በማቅናት ለ7 ዓመታት ቆይታ አድርገው ወደ ሃገራቸው በመመለስ የጥበብ ስራቸውን ቀጥለው ነበር።

በኋላም የዓለማዊውን የሙዚቃ አለም በመተው ወደ መንፈሳዊ ህይወት በማዘንበል ህይወታቸው እስካለፈችበት እለት ድረስ ሙሉ በሙሉ የበተለያዩ የኢስላማዊ የኪነጥበብ ስራዎች ሲያገለግሉ ቆይተዋል።

ሙሐመድ አወል በሙዚቃ ዓለም ከሰሯቸው ስራዎች ባሻገር በእስልምናው ዓለም በርካታ የጥበብ ስራዎችን አበርክተዋል፦
-የለኝ በጎ ሥራ
-ሙሐመድ ተብዬ
-እመስገጃሽ ላይ ታገሺ
-ውዴታ እስከጀነትና ሌሎችም የተካተቱበት ሶስት አልበሞችንና በርካታ ነጠላ ነሺዳዎችን አበርክተዋል።

ሙሐመድ አወል ሳላህ ከሚታወቁበት የጥበብ ሥራ በላቀ መልኩ የበጎ ተግባራት ላይ ከፍተኛ ተሳትፎ እንዳላቸው የቅርብ ወዳጆቻቸው ይመሰክራሉ።

ባለትዳርና የ6 ልጆች አባት የሆኑት ሙንሺድ ሙሐመድ አወል ሳላህ ለረጅም ግዜ የዘለቀ ልብ ታማሚ የነበሩ ሲሆን በጥቁር አንበሳ ሆስፒታል ህክምናቸውን ሲከታተሉ ቆይተው ትላንት ሌሊት ከሌሊቱ 9 ሰዓት አካባቢ ህይወታቸው እንዳለፈች ከቤተሰቦቻቸው ተሰምቷል።

የቀብር ስርዓታቸው ኮልፌ በሚገኘው የሙስሊም መካነ መቃብር ዛሬ ነሐሴ 17 ከቀኑ 7 ሰዓት ላይ ይፈፀማል።

የመረጃ ባለቤት: ሚንበር ቲቪ

#Djibouti : በጅቡቲ በኩል ወደ ኢትዮጵያ እያቀኑ የሚገኙት የተ.መ.ድ (UN) ምልክት ያለባቸው ተሽከርካሪዎች ንብረትነታቸው የኢትዮጵያ መንግስት ናቸው ሲል በጅቡቲ የሚገኘው የኢትዮጵያ ኤምባሲ በይፋዊ ትዊተር ገፁ አሳውቋል።

እነዚህ ተሽከርካሪዎች በዳርፉር በ #UNAMID ስር በሰላም ማስከበር ስራ አገልግሎት ላይ ሲውሉ የነበሩ ናቸው።